رواية الخطيئة الفصل الخامس 5 بقلم مجهول
رواية الخطيئة الجزء الخامس
رواية الخطيئة البارت الخامس
رواية الخطيئة الحلقة الخامسة
– انتي بتقولي ايه يا نهلة، هي وصلت للقتل
= قدامك حل تاني، قوليه، حياتك كلها بتتهد قدام عينيكي اهو، لو كنتي قولتيلي من اول يوم انك تعرفي فؤاد دا من قبل كدا مكنتش سمحت باللي حصل دا كله، حضرتك بقى
اللي حبكت تجددي غراميات زمان بعد ما بقى ليكي بيتك وسمعتك وادي النتيجة، اللي آمنتيه على نفسك وعلى سمعتك بيلعب بيكي دلوقتي وبيبتزك، طلع كلب سعران، والكلاب لما بتتسعر مالهاش غير علاج واحد انتي عارفاه كويس
– واللي في بطني، اقتل ابوه ازاي
= انتي غبية، هو انتي مصممة تفضحي نفسك، الموضوع دا يتنسي خالص، اللي في بطنك دا ابن مصطفى السباعي مش ابن حد تاني، انتي فاهمة، وفؤاد دا لازم يختفي النهارده مش بكرا، كل لحظة بتمر عليه وهو بيتنفس خطر عليكي وعلى حياتك كلها
– طب ازاي يا نهلة، ما انا مش قتالة قتلا برضو
= مفيش حد بيتولد قاتل، فيه ظروف بتجبرنا نعمل كدا ومبتسيبش قدامنا اختيارات، وعلى رأي المثل يا روح ما بعدك روح
– طب هنعمل ايه
= حلو..هقولك بس الاول انتي ليكي حاجة عندي، خدي الالم دا اللي كنتي اديتهولي اول ما اقترحت عليكي فكرة انك تنامي مع واحد غير جوزك عشان تخلفي، وفي الاخر روحتي رميتي نفسك في حضن حبيبك القديم، مفيناش شياطيين وملايكة، فينا ناس لقت الفرصة وناس لا، والالم دا عشان الوقت اللي ضيعتيه وانا بقنعك ان فؤاد لازم يموت
وفي النهاية قولتيلي هنعمل ايه، انتي مقتنعة من اول لحظة ويمكن تكوني فكرتي في كدا من قبل ما اعرض عليكي اصلا وجدالك معايه كله مش اكتر من ترضية لضميرك، ترضية ضيعت من وقتنا نص ساعة احنا في أمس الحاجة ليها، دلوقتي نقدر نبتدي..
لو فكرنا في الحل التقليدي وفكينا فرامل العربية دا هيأخرنا لحد بعد بكرا لما ينزل يصرف الشيك، لانه مستحيل ينزل يشتغل على التاكسي تاني بعد ما بقى معاه المبلغ دا، والتأخير دا مش في صالحنا، كمان فيه احتمال انه يكون جاب اي سيرة في البيت قدام مراته والقضية تفضل مفتوحة وسرك يفضل عايش بعد موت فؤاد..
– والحل
= هنأجر حد يدخل البيت بالليل، انبوبة البوتاجاز تتنسي مفتوحة، عود كبريت يترمي الموضوع كله خلص، وخلص بنضافة
– بس احنا كدا مش هنموت فؤاد لوحده احنا هنموت مراته وولاده
= مفيش احنا فيه انتي، انا مبقتلش، ثانيا بقى لو قدامك حل تاني اعمليه لوحدك من غير ما ترجعيلي
– طب هبعت مين يعمل كدا؟
= هجيبلك حد يقدر يقوم بالمهمة دي بس انا كل دوري اني اعرفكم ببعض وبعد كدا منك ليه انا ماليش دعوة
– حاضر
بعد ساعتين جابتلي واحد اسمه صبحي، صبحي عشم، مجرم مشهور ما اعرفش ايه علاقتها بيه، اتفقت معاه على كل التفاصيل ودفعتله عربون، وقبل الفجر كان تم التنفيذ وجالي قبض بقية فلوسه ومشي، وبيت فؤاد ولع بكل اللي فيه، في اليوم التاني بعت حد يتأكد من الخبر، وعرفت ان كل اللي في البيت ماتوا، محدش نجي منها..
واتقفلت صفحة فؤاد للأبد، او انا كنت فاهمة كدا..
عشت حياتي بشكل طبيعي جدا، كنت بخرج وبروح النادي وبعمل شوبينج، مصطفى كان مسافر فرنسا وانا كنت عايشة في البيت لوحدي، ما انكرش اني من وقت للتاني كنت بفتكر اللي عملته في فؤاد بس كنت اكتسبت مهارة كويسة جدا، مهارة تبرير الافعال القذرة، كنت بعرف الاقي المسكن المناسب لكل نوع من انواع وجع الضمير..
لحد ما في يوم بعد الحادثة باربع تيام فؤجئت اني جايلي استدعاء من النيابة..
ولقيت وكيل النيابة بيوجهلي اتهام مباشر بقتل فؤاد..
– وانا هقتله ليه، انا ايه علاقتي بيه اصلا
= انا اللي المفروض اسألك ايه علاقتك بيه
– ماليش علاقة بيه
= امال كان بيهددك بإيه
– مين قال انه كان بيهددني
– وهو فيه سبب تاني يخليكي تكتبيله شيك ب 200000 جنيه، الشيك دا لقيناه على تابلوه التاكسي، مكتوب قبل الحادثة بيوم واحد
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية الخطيئة)
