رواية عريس يابوي الفصل الثامن 8 بقلم دودي
رواية عريس يابوي الجزء الثامن
رواية عريس يابوي البارت الثامن
رواية عريس يابوي الحلقة الثامنة
فجر تاني يوم الساعة ٥ صباحاً لقت فرح اللي بيصوت في ودنها
رحمة/ فرااااااح
اتفزعت فرح/إيه البيت بيولع؟ ابويااااا امييييي الحقـ…
بصّت للي قاعدة بتبصلها وهي مبتسمة بغباء وهي حاطة ايدها على خدها
رمت المخدة على رحمة وقالت/يا شيخة يلـ…ـعن أبو معرفتك قطعتي خلفي الله يسامحك بتعملي ايه يا بت انتي فى بيتنا؟؟؟؟ والساعة كام؟؟؟ يخـ…ـرب بيتكككككك الساعة ٥ انتي يا بت معندكيش اهل يسألوا عليكي ايه اللى جابك عندنا الساعة دى؟؟؟
رحمة/قومي على الحمام قدامي اخلصى ورانا سفر
فرح برفهة حاجب/سفر ايه انتي اتهطـ…ـلتي يا بت انتي هنروح فين احنا ومين اللي هيسمحلنا أصلاً
رحمة/ لا ما خلاااص سمحولنا واللى كان كان انا استأذنت ابوكي وامك نطلع رحلة اسكندرية مع الجلبة والخريجين اللى احنا منهم مع الكلية وحجزت على الموقع والسفر النهاردة الاتوبيس هيمشي من قدام الجامعة ٦ ونص اخلصي بقاااا معندناش وقت
فرح بصّالها وفاتحة بوقها زى التلميذ الفا…شل ومش فاهمة كل ده حصل امتى وازاي
رحمة/ اخلصي على الحمام على ما اجهزلك شنطتك يلاااا
دخلت الحمام وصلّت ونزلوا راحوا على الجامعة
ركبوا الاتوبيس وقعدوا
رحمة/اخيراااااا اجازة
فرح/ ومالك فرحانة اوي كده يا اختى
رحمة/هنزقطط ونتنطط ونتفسح ونحتفل منبسطش ليهههه؟؟
فرح بلوية بوز/هنحتفل بإيه بقى؟؟ بخيبتي؟
رحمة بزعل بس مبينتش/ لأ بيوم ميلادك يا جميلللل عقبال مائة سنة ياقلبي
فرح بإبتسامة باهتة/ ربنا يخليكي ليا يارب يا رحوم
أسد/وانا مفيش ربنا يخليك ليا يا أسّودي
فرح بصدمة/ انت بتعمل ايه هنا؟ مش هتبطّل تمشي ورايا فكل حتة بقى انا تعبت
كمّلت بغيظ/وبعدين مانت عندك اللي تقولك يا اسّودى ولا نسيتها؟
أسد بحب/بس انا عاوزها منك انتي يا فرحتي
ابتسمت فرح بس قلبت وشها تاني بسرعة
فرح/امشي من وشي يا أسد انا على آخرى ومش عاوزة افرّج الناس علينا
أسد/ اتكلي انتي شوية يا رحمة عبال ما اشوف آخرتها ايه مع صاحبتك دي
جت رحمة تقوم مسكتها فرح من دراعها
فرح/ اوعي تتحركي من هنا ماااشي
رحمة فى ودنها/ اهدي شوية يا فرح ده جوزك وانتي بتحبيه وعارفة كده كويس و المشاكل متتحلش كده وانتي عليكي غلط برضه من تفكيرك وطريقتك يبقى اسمعيه وشوفي هيقول ايه عشان توصلوا لحل
قامت رحمة وقعد اسد ولسه هيتكلم قاطعته فرح وودّت وشها للشباك
فرح/ارجوك يااسد انا مش قادرة اتكلم ولا أناهد أرجوك متقولش حاجة
اسد بتنهيد/حاضر يافرح هسكت حالياً
فجأة انفجرت فيه
فرح/بس انت ايه اللى جابك ورايا برضه؟ انا رايحة اغيّر جو وابعد عن التوتر يوم لازقلي ليه هه؟؟
أسد بعصبية/ أمّال عاوزاني اسيب مراتي تيجي رحلة وسط شباب وبنات لوحدها من غير راجل واتفرّج عليها ليه قالولك عنى ايه بالظبط هه
ودت فرح وشها الناحية التانية تانى وهى بتبتسم على غيرته الواضحة بس رجعت تاني للحزن لما افتكرت اللى حصل منه
وصلوا الفندق وطلعوا حطوا الشنط وغيروا هدومهم
رحمة بحماس/بينا يا معلم على الفُسح ده انا هلففك اسكندرية كلها
فرح بإبتسامة لحماسها وجارتها فيه/ يلا بيناااا
نزلوا على الكورنيش وكلوا شاورمة وايس كريم واتمشوا واتصوروا كتير ورجعوا آخر النهار
طلعوا بتعب للأوضة خدوا شاور وريٌحوا ساعتين وصحيوا بالليل
رحمة/بعد ما تصلّي البسي الفستان ده ده هديتي ليوم ميلادك يا فروحتى
ابتسمت فرح وبصّت على الفستان عجبها اوي كان موڨ بكُم شيفون موڤ وضيق نازل على واسع وفيه كريستالات صغننة متناثرة عليه مدياله ضي حلو اوي
حضنت فرح رحمة وقالت
فرح/ربنا يخليكي ليا يا رحوم وميحرمنيش منك ابدا
رحمة/ ولا منك ياقلبي يلا بقى صلّي عشان البس انا كمان فستاني الوردى الجديد الكميل وننزل نتعشى فى المطعم قبل ما نرجع الفجر ان شاء الله
نزلوا المطعم لقوه كله ضلمة
فرح/ يا عالم يا معفـ..ـنة فندق طويل عريض ومفيش عشا ولا أوبن بوفيه جتكوا القـ..ـرف
فجأة لقت المطعم كلوا بينوّر وكل اللى فى الرحلة واقفين بيسقفوا ويصفروا والمطعم كله متزين بورد وبلالين وزينة تخطف القلب والعين
فرح بدموع/عشاني ده بجد!!!!
لقت اللى بيلبسها سلسلة دهب عليها فراشة وبيهمس ورا ودنها
أسد/أه كل ده عشان فرحتي كل سنة وانتي معايا.. بحبك
قلب فرح بقى بيدق زى الطبل لدرجة انها حست ان هيغم عليها عيونها دمعت بفرحة وهى بتبصله نظرتها وجعت قلبه فيها حب وعتاب ووجع وفرحة زعلته من نفسه ومن اللى عمله معاها بس “مش بإيدي يافرح” ده اللى قاله أسد جواه وهو باصصلها بحب وندم
فجأة لقت ابوها وامها ظهروا ومعاهم عم محمد وطنط حنان جيرانهم القدام اللي عزّلوا من ١٠ سنين وبقت مبتشوفهومش كتير هما وولادهم رغم انهم كانوا سوا دايماً
جريت حضنت ابوها وامها وهنّوها بيوم ميلادها وراحت على حنان وجوزها
فرح/ميدووو يا حبيبي كده برضه تنسى فروحتك ومتسألش عليّا
محمد/عقبال مائة سنة يارب يا فروحتى ومين قالك انى مبسألش عليكي انا على طول بشوف ابوكي على القهوة وعارف كل اخبارك
فرح/يعنى بتتقابلوا يبقى ان مشوفكش ماااشي
اترمت فى حضن حنان وهى بتقول
فرح/وانتي كمان يا حنون وحشتيني اوووي ومن آخر مرة جيتي عندنا وانا مشوفتكيش
حنان/معلش يا فروحتي كنت مسحولة فى توضيب ڤيلة اسد اللى هيتجوز فيها بقالي شهور
فرح/ ايه ده الواد اسد هيتجوز يا سلاااام بقالي كتير اوووى مشوفتوش عامل ايه يا حنون هو والبت مروة وحشوني جداااا وبعدين انتي جاية مع ابويا وامي وتعبتي نفسك كل المسافة دي عشانى تسلميلي يا حنون يا قمرررر
حنان بخبث/ كله من اسد ساحلني وراه أنا وأبوه عشان يصالح مراته يوم ميلادها
فرح بصدمة وتهتهة/مر…ا..ته ويـ..ـصالـ…ـحها واااا..سد
شاورت وراها وهى مدياله ضهرها/قـ..صدك اللي ورايا ده أسد ابنك!!!!
حنان بضحك شاورت بأه
ضربت فرح على صدرها وقالت:
فرح/يا لهوي يا حنان بعد التربية والأدب والتدين ابنك طلع حراميييي
حنان بخضة/ليه بس كده يا فروحة حرامي ابه بس!!! ابني ظابط اد الدنيا وريها يا واد الكارنيه بتاعك
فرح بسخرية/المضروب!!
اسد بضحكة/تؤتؤتؤ مش مضروب..مع حضرتك المقدم أسد السيوفي فى خدمتك يا فرحتي
فجأة لفّت فرح ناحيته ومسكته من ياقة قميصه الاسود القمر اللى كانت عاوزة تضربه وهو لابسه عشان كان شكله حلو اوي وقالت
فرح/ يعني انت ياض انت دخلت عليّا الأوضة ٣ الفجر وعملتلي فيها حرامي عاوز تسرق التليفزيون اللى حيلتنا وبلفتني وضحكت عليّا كل ده وتطلع فى الآخر ظابط
أسد لقى اللى بيمسكه من قفاه
لَف لقى عبد العزيز بيزغرله/ بقى بتدخل الأوضة عليها الفجر يا واااطي ومن ورايا
أسد بتهتهة/ااا..صل كا..نت وحشاني والله يا زيزو
عبدالعزيز: والله!!!
اسد/والله يا عمي كنت هقابلها فى الشارع واحاول اسرقها عشان اتعرف عليها زى ما قولتلي بس كانت وحشانى اوى قولت ادخل عليها بالليل اشوفها ومش هتحس بيّا بس الهانم طلعت قعدالي ل٣ الفجر صاحية
عبدالعزيز/اه ماهو كله من الروايات والز..فت اللى بتسهرها ليلاتي
لقوا اللى بيحشر دماغه وسطهم/لا واللـــه!!
رد اسد بتلقائية/اه واللـــه!!
بصت لفرح لعبدالعزيز اللى بلع ريقه لما اكتشف انها سمعت كل كلامهم
عبد العزيز/فروحة حبيبة بابا
فرح/طالما فروحة وحبيبة بابا يبقى مصيبة قول ياقلبي ولا استنى انا هقولك انت اتفقت مع البيه عليّا يلعب عليّا ويفهمني انه حرامي وانا بقى تعجبني المغامرة واتجوزه يلعب بيا وبمشاعري ويرميني
فرح بصرخة/ صححح
اسد انفعل منها وفجأة زعق/ لأ مش صح مش صح يا فرح كفاية بقى اتهامات وظنون وجو روايات كفايةةةة متضايقة ليه هه مش ده اللى كنتي بتحلمي بيه ضرب وحرامي ولا زعيم ماڤيا ويتجوز عليكي ويسحلك ويهزقك وتحبيه
مش ده اللى كنتي عاوزاه وكنتي بتمرمطي العرسان وترفضيهم عشانه، سنين وانا بحبك من ساعت ما عزّلنا وانتي فى بالي مفارقتنيش كنت فاكر انها مراهقة وهنسى بس محصلش كبرت ودخلت كلية الشرطة واتخرجت واشتغلت وانتي فى قلبي وبالي قررت اجهّز ڤيلتي الصغيرة اللى شوفتيها وافرشها واتقدملك واحكيلك على حبي وعذ…ابي فى بُعدك ولما عرفت انك اتقدملك عريسين ورا بعض خوفت تضيعي مني فروحت لعمي المكتب
فلاش باك
رزع اسد باب المكتب على عبدالعزيز والسكرتيرة وراه بتحاول تمنعه
عبدالعزيز/ ايه يلا انت داخل زر..يبة ولا ايه؟
أسد بعصبية/ معلش يا زيزو ما انت لازم تسمعني انا مش هقدر استنى اكتر من كده
اتحرج عبدالعزيز من زيزو اللى قالهاله قدام السكرتيرة/ اتفضلي يا آنية انتى اخرجي دلوقتى
عبدالعزيز/ اترزع وقول عاوز ايه وداخل كده ليه ؟
أسد/ انا عاوز اتقدم لفرح انا مش هستنى تضيع مني مع واحد من اللى عمّالين يتقدمولها
عبدالعزيز بسخرية/لا متقلقش فرح لسعت لا هتتجوز غيرك ولا تتجوزك
اسد/ وده ليه بقى ان شاء الله؟ناقصني إيد ولا ودن
عبدالعزيز/فرح الروايات كلت عقلها من ساعت ما اتخرجت وقراءتها للروايات زادت اوي لحد ما مبقتش تقعد معانا دائماً فى اوضتها مع الكتب والاسكريبتات لحد ما اتجننت قال ايه عاوزة زعيم ماڤيا يحبها وتتّوبه بعد مايسحلها ويتجوز عليها ويضربها وتعيش معاه جو الاكشن وكل ما يجيلها عريس تطفشه وتطلع فيه القطط الفاطسة بسبب قال ايه مش مطابق للمواصفات
أسد بضحك/ لا والله!! دي راحت منها خااالص
عبدالعزيز/اه والله زمبقولك كده عارف انت الحاجة الوحيدة اللى منطبقة عليك فى اختياراتها اسمك لانها كانت عاوزة اسم العريس يبقى زى ابطال رواياتها أسد..فهد..ليث.. غدنفر.. قاسي
أسد بتفكير/ واللي يخلي المواصفات كلها تنطبق عليّا؟
عبدالعزيز/ ازاي؟؟!!!
اسد بصدق/ انا بحب فرح اوى يا عمي ومش هقدر استغنى عنها وانت عارف ده.بس هي لا هنشوف حبي ولا تصدقه او تحبني طول ماهي عايشة الخيال كده فأنا بعد اذنك هلعب لعبة معاها تخليها توافق تتجوزني وانا اوعدك مش هتمم جوازي منها غير لما تبقى شايف ومتأكد انها بتحبني بجد
عبدالعزيز بتفكير/انا واثق فيك يا اسد بس دي بنتي ومقدرش اجى عليها بس فى نفس الوقت هى بتضيّع حياتها وانا عاوزها تفوق بقى..قولى هتعمل ايه؟؟
اند فلاش باك
اسد/واتفقت معاه اظهرلك كإني حرامي واعيّشك جو الرواية عشان تقتنعي ان الخيال مينفعش يكون واقع وان الروايات حاجات جميلة بنعيش معاها ساعات قراءتنا ليها وبنستفيد منها ونستمتع بيها بس اللى ابطالها بيعيشوه مش شرط احنا نعيشه او نتحمله ابطالها خيال فى عقل اللى ألّفها عشان يمتّعنا بأحداثها مش اكتر لكن مينفعش خيالنا يبقى واقعنا يا فرح مينفعش
فرح بعياط وتسقيف/براڤوووو احسنتم لعبتوا عليّا كلكم اهلي واهلك
بصّت لرحمة بعتاب/وصاحبتي
رحمة بدموع/كان لازم تفوقي يا فرح وانا لو مكنتش متأكدة انه فعلاً بيحبك مكنتش ساعدته
فرح بسخرية وعياط/ بيحبني!!! خدعني وهاني وضربني واتجوز عليّا وبيحبني ونعم الحب والله
أسد بوجع لدموعها/ انا أسف يافرح والله أسف بس مكنش فى طريقة تانية تفوقي بيها وتحسي بحُبي انا بحبك يا فرح وانتي كمان بتحبيني وانا متأكد من ده
فرح بقهر/ انا بكرهك بكرهككك
لقت اللى بيكلمها
مروة/ سامحيه يا فرح اسد فعلاً بيحبك
جريت عليها مسكتها من شعرها/ليكي عين تيجي لحد هنا يا صافي الكلـ..ـب
مروة بصراخ/الحقيني يا ماما الحقني يا اسددد الله يخرب بيت شورتك السوداااا
اسد بضحك وهو بيحاول يخلصها من ايد فرح/خلاص يا فرح بقى معلش شعر البت هيطلع فى ايدك دى اختى مروة يا بنتي بس بقى
فرح سابت شعرها بصدمة ومروة جريت استخبت ورا اسد/ يعنى دى مش مراتك!!!
اسد هز رأسه بلأ
ابتسمت فرح بفرحة وعدلت وشها بسرعة/يعني انتي كمان جزء من اللعبة؟؟
مروة/الله يخرب بيت معرفتكم انتوا الاتنين ده انا كنت فى نص هدومي وانا بتدلع على اخويا والبس اللبس الز..فت ده الله يسامحكم
فرح بصّت لأسد وقعدت تعيط وجريت من المكان كله
جه عبدالعزيز يجري وراها مسكه اسد/استنى ياعمي انا هروحلها
جري اسد وراها لقاها قاعدة على الرمل قدام البحر ضامة رجلها لصدرها وبتعيط بصوت عالى وشهقاتها قطّعت قلبه
راح قعد على ركبه قدامها على الرمل وقال
أسد/والله يا فرحتي بحبك اوي ومكنش بإيدي اوجعك أو اضايقك بس كان لازم تفوقي من الوهم عشان تشوفي حبي وتحسيه وتقدري تحبيني كل مرة كنت بتوجع عليكي واقول اتراجع واحكيلك وامسك نفسي على آخر دقيقة
مكنتش بنام وانا سامع عياطك كان الندم وإحساس الذنب بياكل فى قلبي
بصتله فرح والدموع مغرقة وشها وكمل بإبتسامة والدموع بتلمع فى عيونه/لما كنت بشوف غيرتك عليا والمقالب اللى عمالة تعمليها بسبب غيرتك كنت بفرح اوي انك بدأتي تحسي بيا وبتحبيني وأءنب نفسي زيادة على اللى بعمله معاكي
دموعه نزلت وهى بصتله بصدمة انه بيعيط عشانها معقول بيحبها اوي كدة
أسد/ سامحيني يا فرحتي يارب ايدي تتقطع لو اتمدت عليكي تاني بس كلمتك وجعتني وهانتني
حطت فرح ايدها على بوقه وقالت
فرح/بعيد الشر عنك متقولش كده تاني
باس اسد بطن ايديها فاتكسفت وشالتها
اسد بعياط واستغراب/ياااه يا فرح معقول خايفة عليا بعد كل اللى عملته معاكي
فرح/صحيح انتوا لعبتوا عليا ووجعتونى بس الغلط كان مني من الاول يا اسد انا اللى سمحت لهروبي من واقعي يخليني عايشة فى عالم افتراضي طول الوقت..نسيت اهلى وصحابي وحياتي وبقيت مش عارفة افرّق بين الحقيقة والخيال وافتكرت ينفع يبقوا واحد
أسد مسح دموعه وحَب يضحكها/طب سامحيني وانا اعيشك كل يوم رواية شكل واسلّيكي آخر تلات حاجات واروّق معاكي واطبخ معاكي وكله كله سامحيني بقى الهي تحجّي يا شيخة
ابتسمت فرح بين دموعها وقالت
فرح/عاوزة فرح وفستان
اسد عيونه دمعت تاني وبيضحك فى نفس الوقت/بجد يافرح!! يعني وافقتي بجد ترجعيلي!!!!
فرحت فرح لفرحته وحبه ليها الواضح فى عيونه
قربت منه مسحت دموعه بكسوف وحب وشاورت بأه
فجأة اسد شالها ولف فيها وهو بيضحك بصوت عالى وبيقول/بحبككككككك
واتفاجئت فرح بصواريخ بتضرب
فى السما على شكل قلوب والناس كلها وأهاليهم بيسقفوا ويصفروا وفرحانين عشانهم
نزلها اسد وهى كانت مدارية وشها فى صدره بكسوف منه ومن الناس
رفع دقنها بإيده/ بحبك اوى يافرحتى
فرح بحب/وانا بحبك اوى يا أسّودي(تخيلو الظابط أسد بيتقاله أسودي😂😂😂)
ضحك اسد جامد وفجأة اتصدم من كلام فرح
فرح بغمز/ بس برضه جزء من روايتي اتحقق هتجوز واحد أسد وبيشتغل ظابط
اسد بضحك/ هعمل احلى فرح لأحلى فرحة فى عمرى وهنعيش كل يوم حدوتة فى حياتنا وبيتنا اللى هنبنيه سوا يا فرحتى
ابتسمت فرح بكسوف وخدها أسد فى حضنه بتملك وفرحته ماليا قلبه وعيونه ان حلمه اتحقق
بعد ١٠ سنين
أسد بغيظ/ الماتش هيخلص يا فرح بقااا حولي التليفزيون عاوز اشوفه يعنى حتي يوم اجازتي معرفش اتفرج على التليفزيون
فرح رقصتله حواجبها/لااااا هنتفرج على المسلسل التركي الجديد مليش فيه واتفضل كُل فشار واشرب بيبسي وانت ساكت يا أسودي
اسد بغيظ/ربنا على المفتري
وكمل/قوليلي تاني كده البطل قابل البطلة ازاي
ابتسمت فرح وقرب أسد بإبتسامة حب وخدها فى حضنه وقالها/اللى يسعد فرحتي يسعدني بلاها الماتش ابقى اعرف النتيجة وخلاص بحبك يافرحتي
باسته فرح فى خده/وانا بعشقك يا أسّودى
وقعد يتفرج معاها
دخلت عليهم حياة بنتهم الكبيرة ٩ سنين وابنهم الصغير عمر ٤ سنين كان بيلعب فى اوضته
حياة/ مامي فى رواية فى المكتبة حلوة اوووي سمعتك بتقرأي فيها من كام يوم وتضحكي انتي وبابي وعجبتني جداااا وعاوزة استلفها من حضرتك اقرأها عشان الحدوتة عجبتني جدااا
اسد بقلق/ انهي رواية دي يا حياة؟
حياة ببراءة/ رواية أحببت زعيم ماڤيا يا بابي
فرح غمزت لأسد وانفجرت من الضحك
أسد بفزع/ لااااااااااا
النهاية 😂😂😂😂😂😂
لقراءة الرواية كاملة اضغط على : (رواية عريس يابوي)
