رواية حواسي السبع الفصل السادس 6 بقلم هاجر نور الدين
رواية حواسي السبع الجزء السادس
رواية حواسي السبع البارت السادس
رواية حواسي السبع الحلقة السادسة
لحد ما لفيت فجأة ولمحت شخص غريب بلبس أغرب، يشبه للعصور القديمة اللي نيكولاي منها، وقفت في مكاني وأنا خايفة أقرب وبرضوا خايفة ألف وأمشي، فضلت باصة عليه لحد ما يظهر تاني من ورا الحيطة وفعلًا ظهر، الدنيا كانت ضلمة مش شيفاه كويس بس في عربية عدت من جنبه والنور نور فجأة في وشه وشوفت على جبهته نجمة داوود، إتفزعت وشهقت وجريت بسرعة من المكان اللي أنا فيها لحد ما وصلت البيت وقفلت الباب ورايا كويس جدًا، وقعدت على الكنبة وأنا باخد نفسي بالعافية، بعد شوية هديت وقومت من مكاني ودخلت عملتلي قهوة وقعدت أفكر في اللي أنا مُقبلة عليه لوحدي ومش عارفة أتصرف إزاي، ولكني لاقيت نفسي إتنقلت للمكان اللي بتنقل ليه وكنت واقفة على سلالم كتير أوي لدرجة إني مش شايفة هي بتودي على إي تحت، ولكن مكنش قدامي آي حل غير إني أنزل لإن المكان اللي واقفة فيه مكنش فيه آي حاجة ورايا، نزلت أول كام سِلمة وأنا قلبي بينبض بسرعة كبيرة، لحد ما وصلت لـ نُص السلالم تقريبًا، وشوفته!!
شوفت نيكولاي، بجد شوفته جريت على باقي السلالم وأنا بضحك إنه رجع أخيرًا وصلت ليه وجيت عشان أكلمه بس كإنه مش شايفني، وقفت قدامه وقولت:
_نيكولاي، إنت شايفني!!!
ولكن ملقتش منه آي رد، شوفت مجموعة من الناس داخلين عليه المكان اللي هو فيه وكان مرسوم على الجبهة بتاعتهم نفس نجمة داوود، بحركة لا إرادية إستخبيت وراه، بس هما دخلوا وإتكلموا معاه وهت سابني وراح قعد في مكان يشبه للصالون، وقتها فهمت إن هما كمان مش شايفني وإن دا مشهد بس قدامي لكن متنقلتش ولا حاجة، مجرد مشهد عايزني أعرف حاجة، قعدت قدامهم وركزت وسمعت الناس دي بتتكلم وبتقول:
_لقد مر مِئة عام على وجودك حي وحيدًا بعد وفاة كل أحبائك، وتجدد العهد والذي يتناول فيه خلاصك.
إتكلم نيكولاي وقال:
=وما هو خلاصي، لقد سئمت كل هذه الحياة، وسئمت العيش، ألم تكتفوا بعد من تلك اللعنة لقد تعذبت حقًا أضعاف ما تتوقعون.
_لم تتعذب قط، أنت فقط في البداية، العهد ينُص على، أن هناك عدة قرون بعد سوف تمُر عليك، إلى أن تُقابل لؤلؤ نهاية الخلود
ردد وراهم وقال:
=لؤلؤ نهاية الخلود!
_أجل، إنها فتاة، ولكن ليست كأي فتاة ستتسم بالحواس السبع وتتسم أيضًا بإنها حفيدة لـ ملك من ملوك الفراعنة الكِبار ولهم مكانة مرموقة.
إتكلم نيكولاي بإستغراب وقال:
=وما هي الحواس السبع، ومن هو هذا الملك?
_الحاسة السادسة هي أنها تستطيع التنقل بين حاضرها وماضينا والذي هو حاضرنا حاليًا، الحاسة السابعة ليس عليك أن تعرفها، أما من هو الملك، فـ هذا نحن أيضًا لا نعرفه، بخلاصك من حجر النار فـ هو يعني خلاصك من الخلود، وحجر النار لا يتدمر ولا ينتهي سوا بـ لؤلؤ نهاية الخلود
إتكلم نيكولاي وهو واضح على وشه اليأس وقال:
=متى ستأتي?
_لا علم لنا، سوا إنها ستأتي بعد عدة قرون بعد
=كيف لي أن أعرف أنها هي?
_لا أحد سيراك من الأن سوانا نحن، وسواها هي، وعندما تراك سيستطيع البقية أن يروك.
سكتوا شوية وبعدين قرب واحد منهم من نيكولاي وقال بصوت واطي نسبيًا:
_مواجهتنا صعبة، ولكنك أنت ولؤلؤ نهاية الخلود معًا ستكونون خطرًا علينا، لذلك سنسعى جاهدين لـ نوقفكم وسنبدأ بمواجهتكم عند لقائك بها بـ خمسة عشر يومًا، هذا هو العهد وهذه هي المعلومات التي يجب أن تعرفها، إنتهى عملُنا هنا الأن.
قاموا مشيوا وبعدين شوفت نيكولاي وهو قاعد حاطط وشه بين إيديه وبدأ يبكي، زعلت عليه جدًا ومبقتش عارفة أهون عليه إزاي دلوقتي وهو مش معايا، كنت لسة هعيط معاه، بس إفتكرت إنه قالي أتحلى بالقوة و وعدته وعد حتى لو هو مش سامعني وقولت:
_وحيات دموعك دي ووجعك كل السنين اللي فاتت وإنت بتتعذ*ب وحدك، أوعدك إني هعمل كل اللي أقدر عليه ومقدرش عليه بس عشان أخلصك من كل دا
رفع راسه وفضل يبص حواليه وكإنه بيدور على حد وكإنه حس بوجودي بس مش شايفني، إبتسمت لـ كونه حس بوجودي وكنت لسة هقرب منه أطبطب عليه بس رجعت تاني لمكاني، قومت بسرعة على جوجل وأنا ببحس عن مكان أثري بنفس المواصفات اللي شوفتها، ولكني بعد بحث كتير وعيوني وجعتني مقدرتش أوصل لآي حاجة، قومت نمت وأنا مقررة إني بكرة هروح المتاحف الأثرية وأكيد هلاقي هناك مُرشدين سياحيين يمكن هما ليهم معرفة بـِ بالمكان دا، دخلت نمت وأنا كُلي عزيمة عشان أنقذ نيكولاي من كل اللي عاشه في السنين اللي فاتت، صحيت تاني يوم من الصبح بدري ونزلت على طول على أقرب متحف ليا، فضلت أتنقل من متحف للتاني وكل ما اسأل مرشد سياحي عن المكان ميبقاش ليه علم بيه، لحد ما وصلت أخر متحف ممكن أروحله النهاردة وكان اليأس مُتملك مني، وكالعادة كل ما أسأل مُرشد ميعرفش المكان اللي بتكلم عليه، كنت خلاص خارجة من المتحف ولقيت واحد بيتكلم مع سُياح أجانب وقال جملة:
_بس المكان دا محظور إن آي حد يروحه، الأسطورة بتقول إن في شخص بس اللي يقدر يروحه غير كدا، فـ حجر النار هيثور وهيحرق اللي يقرب من المكان
جريت عليه بسرعة وأنا بسأله وبقول:
=إنت تعرف حاجة عن مكان حجر النار?
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية حواسي السبع)
