رواية سفير العبث الفصل الثالث والثلاثون 33 بقلم روزان مصطفى
رواية سفير العبث الجزء الثالث والثلاثون
رواية سفير العبث البارت الثالث والثلاثون
رواية سفير العبث الحلقة الثالثة والثلاثون
° التنهيدة الثالثة والثلاثون °
| ك من إنحنى على رُكبتيه في توسل ألا تتركهُ حبيبته، إنحنى قلبي أمام القدر ألا يخذُلني مرة أخرى |
* في منزل العقرب / صباح اليوم التالي
رجع وهو بيفتح الباب ومش قادر يصلُب طوله، قفلُه وهو بيدور بعينيه عن مياسة اللي ظهرت فجأة وهي بتجري وشعرها حواليها زي كُتلة الدهب
إستقرت قُدامه ووقفت وهي بتبُصله بأمل إن أهله وافقوا عليها، لكن علامات ااضياع وعدم الإتزان اللي كان فيها خلت حصون أحلامها تنهار وصدرها علي وهبط وقالت بصوت زعلان: مش موافقين صح؟
شاور بصوباعه عليها وقال بعدم وعي: هتجوزك، وهيوافقوا، حماتك القديمة راحت لأمي.. وطينت الدنيا
شهقت مياسة بصدمة وهي مبرقة
رجعت عينيها لعيون عيسى لقته مركز على شفايفها وبيقول بتتنيح وعدم وعي: هو إنتي حلوة أوي إنهاردة كدا ليه؟
كان بيتمطوح لورا وقُدام، جه عشان يقربلها يبوسها ملحقش راح واقع على كتفها ف حضنته وهي بتحاول تثبتُه.. سحبته بصعوبة للأوضة بتاعتُه وحطته على السرير ف وقع على ظهره، بدأت مياسة تقلعه جزمته وتظبط نومته بعدها غطته
راحت لأوضتها وخرجت بنطلون وقميص، وحطت طرحة مش ملفوفة كويس على راسها
ونزلت من البيت بعد ما خدت فلوس من عيسى!
* في منزل الرايق
دخل البيت الصُبح بعد ما الحرس حاولوا يكلموه لكنه من تعبه وعدم وعيه رفض
دخل البيت لقى رفيف قاعدة على الكنبة مكانه ووشها اصفر، قامت مفزوعة أول ما دخل
كشر بإستغراب وقالها: منمتيش ولا إيه؟
قربت رفيف بهدوء وهي واقفة قُدامه بصت من ورا كتفه على إزاز الشباك، ميل هو راسه وبصلها بإعجاب وعدم وعي ف قالت بقلق: نوح، في إتنين جُم الفجر وإنت مش هنا، وقالوا إنهُم ولاد عمك
ولاد عمك
ولاد عمك
الكلمة إتكررت في ودانه زي صدى الصوت، غمض عينه ودعك راسه بإيدُه جامد وقال: دي هلاوس الهاش، أنا هفوق وأبقى كويس
رفيف سمعته وهو بيكلم نفسه بصوت عالي ف قالت بتبريقة: مش هلاوس يا نوح، أنا شوفت الحرس بيحاولوا يكلموك وإنت مسمعتهمش، هُما نايمين في العربية لو كانوا شافوك كانوا نزلوا كلموك
حاول يعدل نفسه وقال بتعب: خُديني الحمام، عاوز أفوق
حاوط دراعه حوالين رقبتها وسحبته رفيف على الحمام، نزل راسه تحت الحنفية بتاعة الحوض الواسع وشغل المياه الساقعة..
وفضل تحتها يتلوى من البرد، رفيف سندتله الفوطة على طرف الحوض وقالت: هروح أعمل فنجان قهوة عشان أضمن إنك فوقت
فضل يغسل في راسه وإتعدل، حس إنه فاق ومش حاسس بغير بدوخة فقط.. قلع قميصُه وشعره نازل على وشه وعمال ينزل نُقط مياه على جسمه
نشف شعره ووشه بالفوطة كويس وهو بياخُد نفس، طلع على فوق وغير هدومه كُلها بعدها نزل لقى رفيف واقفة قُدامه بصنية القهوة ووشها مصفر لسه، قرص خدها بهدوء وهو بياخُد الفنجان راحت حضنت الصنية الفاضية وقالت: ممكن سؤال متعتبرهوش تطفُل مني؟
خد رشفة من الفنجان وحرك راسُه بمعنى قولي، بلت رفيف شفايفها بلسانها وقالت بتوتر: هو إنت إمبارح روحت لعمرو؟
شرب القهوة مرة واحدة ف إتخضت رفيف، مسك الفنجان قُدامها وهو فاضي ف عدلت الصنية راح حاطه في الصينية وقال: مبحبش أتكلم عن شُغلي وعملت إيه، ومش حابب أخوفك مني.. بس كُل اللي حابب أقولهولك إني خدتلك حقك لدرجة، مش هيعرف ينام من التعب النفسي اللي أنا سببتهوله
قربلها نوح وهو بيرجع شعرها كُله لورا وبيلمس رقبتها وقال: زي ما لمسك غصب عنك وخوفك وأنا مش جنبك
إترعشت رفيف وقالت بتوتُر: مش جنبي إزاي بقى، دا إنت سيبتلي السواق بتاعك تحت بيتي عشان يلحقني لو حصل حاجة وأهو نفعني
طبطب الرايق عليها وقال: هروح أشوف إيه اللي جابهُم، كويس إنهم مدخلوش البيت
إتحرك الرايق ناحية باب بيتُه وفتحُه وهو بيطلع للحديقة، لقى عربية يودا متفيمة مخدش بالُه منها وهو داخل، بهدوء خبك بصوابعه على إزازها كذا مرة لحد ما الإزاز نزل وبصله واحد بإبتسامة وقال: دي أصول الضيافة عندك؟ أومال لو مش متربي في مصر بلد الكرم
نزل التاني من الباب التاني للعربية وقرب لنوح وهو موجهه كلامُه لأخوه: لا أصل إبن عمك نوح عنده حساسية ناحية حريم بيتُه، ف تلاقيه خاف يدخلنا والمدام بتاعتُه جوا
بصله نوح ببرود وقال: جدع إنك عارف، لو هنتكلم في أصول ف المفروض اللي جاي لناس يبلغهم قبلها إفرض هُما مسافرين ولا مش في البيت
نزل التاني وهو بيقول: نوح! إحنا جاييز من المطار عليك وتعبانين، ينفع كدا؟
رفع نوح حاجب وهو بيشاور ناحية بيتُه وبيقول: إتفضلوا
قفلوا العربية ونزلوا ورا نوح وهُما داخلين البيت، قفل الباب وراهُم وسابهم واقفين يتفرجوا على سيراميك البيت الإسود واللوحات الغريبة المتعلقة
لف واحد منهم وقال لنوح: ذوقك في اللوحات مُختلف تمامًا عن ذوق بيتنا القديم، فاكرُه؟
حط نوح إيديه الإتنين ورا ظهره وقال ببرود: إيه اللي جابكُم، أنا عارف إن الأسهل عليكُم تصلوا الرحم مع فرعون ولا إنكم تجولي
بص التاني للحيطة اللي عند المطبخ لقى رفيف ساندة وبتتفرج ف قال بإبتسامة خبيثة موجه كلامُه لنوح: نتكلم في مكتبك أو في غُرفة خاصة؟ عشان واضح إن المدام فضولية شوية
لف نوح وبص لرفيف بعدها شاور برقبته إن روحي إنتي، لف وبص لولاد عمُه تاني وهو بيقول بنبرة غريبة: تعالوا ورايا على المكتب.
* في منزل والدة نبيل
كانت قاعدة بتقطع فلفل عشان تقليه وعلى راسها الإيشارب الإسود، فاردة رجلينا الإتنين على الأرض وساندة ظهرها على الكنبة، سمعت صوت خبط على الباب ف ركنت الطبق اللي فيه الفلفل على جنب وقامت وهي بتسند على الكنبة لحد ما إتعدلت وفضلت تمشي بالراحة والباب عمال يخبط
أم نبيل بضيق: طيب طيب ياللي على الباب هي الدنيا هتطير
راحت فتحت الباب لقت مياسة واقفة قُدامها وعينيها مفيهاش خير راحت أم نبيل جت عشان تصوت مياسة كتمت بوقها وزقتها لجوا وقفلت الباب برجليها
مياسة من بين سنانها: كمان عاوزة تفضحيني هنا يا ولية يا بنت ستين كلب، دا أنا اللي هفضحك وهفضح إبنك وهخلي الرايح والجاي يتف عليه، هفضحكم وأقول كان شغال في المافيا وبسبب كدا أجهضت بسببه وهنزل على النت ورقة المستشفى يوم ما أجهضت، زي ما إنتي يا بنت الكلب مش سيباني بعد ما ربنا خده وريحنا منه عشان تعرفي إن الله حق، دايرة ورايا هنا وهناك عشان تشوهي صورتي في عين أم الراجل اللي حبيته
أم نبيل بتبريقة: من أول ما شوفتك وقولتله دي بت عينها بكسة وواسعة مبتختشيش، جيالي لحد البيت بتاع إبني تقوليلي بتحبي واحد وتتجوزيه، عاوزة تعيشي وتكملي حياتك بعد ما جبتي أجل إبني! مش هيحصل وهتفضلي زي البيت الوقف وأي عيلة. هتخُشي عليهُم بمسكنتك هروح ألحقهم منك
رفعت مياسة رجل من رجليها وهي بتاخُد الشبشب وبتنزل بيه على أم نبيل وبتقول: دا لو كان ليكي عِمر ونصيب وحياة أمك لأجرسك وفاكرة اللي عملتيه في بنت أختك؟؟ هفضحك بيه برضو ما هو نبيل إبنك الحيلة حكالي وهروح البلد أجيب بنت أختك تفضحك وتجرسك معايا، يا بنت الكلب يا سو دا خدمتك وكُنت مريحاكي وصونت إسم إبنك على حياة عينُه اللي معندوش نخوة
كملت مياسة ضرب فيها بالشبشب وقالت: طب قسمًا عظمًا لو جيبتي سيرتي تاني لاهفضحك بكُل حاجة وأخلي الناس بدل ما يدعوا لإبنك بالرحمة يتفوا على قبرُه سمعاني وأديني حذرت
أم نبيل وهي بتتضرب بتصوت وبتقول: يخرااابي إلحقوني جاية تخلص عليا زي ما خلصت على إبني
حدفت مياسة شبشبها على الأرض وهي بتلبسُه وبتقول: صوتوا عليكي ساعة وسكتوا، اللهم بلغت
خرجت مياسة من الشقة ورزعت الباب وراها، قعدت أم نبيل على الأرض وهي بتقول: منك لله يا نبيل على جوازتك الهم
نزلت مياسة من العُمارة وهي بتقول في عقلها كأنها بتكلم حد: لو كُنتوا شوفتوني من كام سنة كان مُستحيل لو إتعجنت تحت رجل حد أكبر مني في السن إني أغلط فيه، لكن دلوقتي فاض بيا، ماهو حطوا نفسكُم مكاني تخيل يدخُل حياتك ناس أبوك أجبرك عليهُم وإنت وسطهم أو وإنت بعيد عنهم مش مكتوبلك تفرح وتتهنى! الولية مش سيباني في حالي ودايرة تشيع عليا كلام محصلش، ذنبي إيه إن إبنها سكته عوق وجابت أجلُه!
وقفت تاكسي من على أول الشارع وركبته وهي بتقول عنوان بيت العقرب.
* في اليخت
وصل للمينا وبدأ الناس ينزلوا منه، خرجت رهف من اوضتها بعد ما ظبطت نفسها لقت واحد لابس قُبعة سودا وموطي راسُه قُدامها، إتخضت ورجعت لورا بعدها دققت لقته عاصم.. رفع راسُه ومد إيده ناحيتها بكروت ماسكهم بإيد واحدة وقال بنبرة هادية: إسحبي كارت
إستغربت شوية بعدها سحبت واحد وخبته
عاصم بهدوء: تؤ، شوفي الرقم اللي سحبتيه كام
بصت للكارت وهي بتحاول تخبيه منه بعدها قالت: خلاص شوفت
فضل عاصم يفنط الكروت وهو بيقربلها وهي بترجع بظهرها لورا لحد ما لزقت في سور المركب ووراها البحر
رتب عاصم الورق على بعضُه وبصلها من تحت القُبعة بتاعتُه بعيونه الملونة وقال: الرقم اللي معاكي قلب سبعة؟
رهف بثقة: تؤ، اللي معايا رقم أربعة و..
بصت للكارت لقته سبعة، ف رفعت راسها وبصتله بصدمة راح باس خدها بسُرعة
شهقت ف قال عاصم: خدع ساحر مش هتعرفي تفهميها
رهف بصدمة: إنت إزاي تبوسني!
مشي وإداها ظهره راحت مشيت وراه وبتقول: إستنى هنا بكلمك
قلع القُبعة ولبس نظارته الشمسية تاني ونزل من اليخت وقال وهو مديها ظهره: لو عاوزة تكوني على اليخت لوحدك خليكي
بصت حواليها لقت اليخت فاضي ف جريت وراه
نزل عاصم والحرس بياخدوا من إيدُه شنطتُه وبيرحبوا بيه
فضلت رهف واقفة بتبُص حواليها على عربية توصلها، ساب عاصم باب عربيتُه مفتوح وقال: هوصلك أنا، صعب تلاقي هنا عربيات توصيل خاصة، كمان أنا راجع القاهرة
فضلت باصة بتردُد للباب المفتوح وبعدها قربت وركبت مُضطرة، قفلت الباب وراها وسندت ظهرها في العربية الواسعة
إبتدت العربية تتحرك بيهُم
فضلوا ساكتين شوية بعدها عاصم قطع الصمت وقال: بلبس نظارة عشان، العيون مرايات..
رهف بصتله حسبته بيتكلم في الفون لكن إكتشفت إنه بيكلمها، بصلها وقال: يعني من عيونك أقدر أعرف بتفكري في إيه
ظهرت على وشها تعابير سُخرية وقالت: إنت صدقت إنك ساحر بقى
قلع نظارتُه وقالها بهدوء: بُصيلي طيب
بصتله بعينيها ف فضل مركز وقال: إنتي خايفة تروحي تقابلي أختك عشان عصبية، ومتوترة من اللي حصل على اليخت من شوية، وبتفكري هنشوف بعض تاني ولا لا
فتحت بوقها بصدمة لإن فعلًا دا اللي في عقلها، لكنها قالت بعناد: مش صحيح
عاصم بتركيز: فتحة بوقك بصدمة دي بتأكد كلامي، العيون مراية الشخص بتفضحه وبتفضح أفكاره، عرفتي ليه النظارات مُهمة.. أنا بحب الخصوصية في كُل شيء
رهف بفضول أكبر: طب دي وفهمناها، إيه حكاية العصاية اللي على طول ماسكها دي
بص عاصم قُدامه ولبس نظارتُه تاني وقال: دي بتاعة والدي الله يرحمه، كان طول الوقت ماسكها ومعاه في كُل مشاويره، كانت بتحسسه بهيبة.. وأنا بعمل زيه.
رهف بتفهُم: أاه
إبتسم هو وبص قُدامه، بطنها طلعت صوت من الجوع لإنها ملحقتش الفطار على اليخت، خد عاصم باله من اللي حصل ف فتح الثلاجة الصُغيرة بتاعة العربية وخرج منها كلوب ساندوتش وقال: دا بيكون إحتياطي في العربية لو ملحقتش أفطر كويس، كُليه هيعجبك بيتجدد يوم بيوم
رهف بكبرياء: مش عايزة أنا أص..
قاطع كلامها صوت بطنها تاني بس أعلى
راحت ساحبة من إيده الساندوتش وقالت: عشان مكسفكش بس
ضحك هو وهو باصص لشباك العربية وهي بدأت تاكُل بإحراج
* في منزل الغُريبي
دخلت والدة يوسف عليه الأوضة وهي بتصحيه وبتقول: يوسف، إتطمنت على أخوك إنه روح؟
إتقلب يوسف في السرير وقال: قلقانة عليه أوي
والدة يوسف وهي بتسحبه من التيشيرت: قوم إتعدل كلمني
قعد يوسف على السرير وهو نعسان وقال وهو بيفرُك وشه: إستغفر الله العظيم عاوزة إيه يا ماما!
والدته: لا تكون قالب وشك عليا إنت كمان عشان اللي إتقال في الحُسين إمبارح! يعني أنا غلطانة؟
بصلها يوسف بغيظ وقال: بصراحة أه غلطانة.. أصل يعني إيه مش عجباكي عشان مُطلقة محسساني إن إبنك اللي ولد ولود أوي، كويس إنه حب واحدة عشان يهمد
والدته وهي ماشية وراه وهو رايح للحمام يغسل وشه قالت: مشوفتش حماتها قالت إيه لما جت هنا!
غسل يوسف وشه وقفل المياة وهو بيقول: ما يمكن بتتبلى عليها عشان مش عوزاها تتجوز بعد إبنها! مياسة مش وحشة أنا شوفتها وقعدت معاها كتير وإنتي شوفتيها بنفسك لما عيسى جابها هنا يوم المحشي
والدته: دي مسكنة البدايات إنت أهبل متعرفش
يوسف بعصبية: مسكنة إيه إذا كان عيسى بنفسُه قالك هو اللي كان بيجري وراها، فكري يماا وحكمي عقلك عشان متخسريش عيسى اكتر ما إحنا خسرانينُه أساسًا، انا هلبس عشان الإمتحان وفكري في اللي قولتهولك عشان متخسريش عيسى
لبس يوسف هدومه ونزل عشان يروح الإمتحان قابل نيللي في طريقُه، بس الغريبة إنها لامة شعرها ولابسة كويس
إبتسم وهو شايفها من بعيد وراح مصفر بصوت عالي، بصت نيللي وراها وشافتُه لكن موقفتلهوش كملت طريقها
راح ساحب سكوتر بتاع طفل في الشارع وقدم ناحيتها، وقف قُدامها بالسكوتر راحت مكشرة وبتحاول تعدي بعيد راح واقف قُدامها
نيللي بعصبية: إيه السخافة دي!
يوسف وهو بيرجع الكاب بتاعُه لورا: أكيد رجعتي للبسك القديم عشان شكمتك، ثقة راجل البيت
نيللي بقرف: لا عشان تخرسوا لسانكُم اللي قرفني في حياتي أحكام ملكوش حق فيها!
يوسف بمُغازلة: بس بس بسس إيه راديو! ما تيجي أعزمك على عناب على ما يبقالنا بيت ناكل فيه كباب
نيللي بقرف: صباحك هباب
سابته ومشيت راح وقف قُدامها تاني وقال: طب ما أعزمك على..
نيللي بمُقاطعة: إيه رأيك اعزمك على السمر كورس؟ عشان شكلك إتأخرت على إمتحانك
يوسف بخضة وهو بيقلع الكاب وبيرميه: يا نهار أزرق إتسحلت فيكي يا بنت القمر ع الصُبح
شاور بإيديه للتاكسي وهو بيصفر وبيقول: خُد يسطا الرصيف كُله مُحاصر
ضحكت نيللي وهي بتكمل طريقها وبتبُصله عشان وحشها
* في منزل الرايق
حطت رفيف قُدامهم صنية العصير وراحت تاني للمطبخ
إبن عم نوح: هي المدام متضايقة من حاجة؟ مش عاوزة تقعُد معانا ليه
حط نوح إيده على راسُه بصُداع وقال بضيق: ما تلخص وتقول جاي ليه إنت وأخوك؟
رجع إبن عمه ظهره لورا وقال بنبرة مُتأثرة: بعد وفاة والدي.. على ترابيزة العشا اللي كُنا كُلنا قاعدين عليها لو فاكر، مرت فترة طويلة وعمي اللي هو. والدك بيعاني، وبيتهمك بحجات سمعناها بوداننا.. وبيرفُض يقعُد معاك
كُنا فاكرين إنه بيعاني من حالة نفسية صعبة بسبب وفاة أخوه اللي هو أبويا، بس لما فكرنا فيها ولاحظنا تصرُفاتك بلا مُبالاة وقت وفاة والدي شكينا نفس شكوك عمي
سند الرايق خده على كف إيده وهو باصص بملل لإبن عمه وقال: وإنت هزيت طولك بعد السنين دي كُلها عشان تقول الكلمتين دول؟ مفهمتش إيه المطلوب مني برضو؟ شاكك ونازل تنتقم يعني!
إبن عمه ضحك ضحكة مُتقطعة بعدين قال: لا، الميراث إتقسم بعد ما كان والدي ووالدك فلوسهم وشُغلهم سوا، شُغل العيلة وإسمها الكبير، إنت خدك ورثك من أبوك وإحنا خدنا ميراثنا وكُل واحد بعد، ليه منعملش زي أبويا وأبوك ما عملوا! نحُط فلوسنا على بعض ونرجع إسم العيلة من تان..
قاطع كلامُه ضحكة نوح وهي بيكُح وبيشربمن العصير بعدها شاور بصوباعه وقال: طب فلاش باك للسيناريو بتاعك؟ أنا كُنت عارف إنكُم نازلين مصر.. وإنت وأخوك لا همكُم إسم العيلة ولا نيلة.. إنتوا بس اللي فضل من ميراث أبوكم شوية فكة من كُتر لعب القُمار، تسكتوا! لا.. تحجزوا تذاكر على مصر القاهرة وتيجوا لنوح إبن عمكُم الغني اللي معاه فلوس.. وتقولوا الكلمتين دول، وتفكروني بحادثة أبوكم القديمة على أساس إني اتهز وأسلم نمر وأقول طب ما الصُلح خير قوم نتصالح وأديكُم فلوسي، قووم إمسح الريالة يالاا
إبن عمه التاني: هو إنت عرفت دا كُله إزاي؟
حط نوح رجل على رجل وقال بهدوء: عشان أنا رايق، بتابع كُل حاجة وأنا برنس مكاني، والحمدلله إن إسم عيلة أبوك إختفى، كانت عيلة وس***ة أساسًا.. لو شربتوا العصير تقدروا تقوموا عشان يادوب تلحقوا الطيارة تطمنوا الست الوالدة إن خطتكُم الثُلاثية فشلت بجدارة
وقف إبن عمه وقال: صدقني هتندم يا نوح
نوح بنفاذ صبر: ياعم برا عنك أندم ولا لا هبقى أشتري فلوكة زي الأستاذ محمد مُحيي لو ندمت وهولول فيها من الندم، مع السلامة
خرجوا من بيت نوح وركبوا عربيتهُم ومشيوا بعيد
رفيف كانت بتأكل اختها الصُغيرة في المطبخ ف شخط نوح بصوت عالي وقال: رفييف!
جات جري وهي مخضوضة وبتقول: حصل حاجة؟
بصلها نوح من فوق لتحت بإعجاب وقال: عندك فُستان حلو عشان تحضري بيه معايا خطوبة الإسبوع الجاي؟
رفيف: خطوبة مين؟
هرش الرايق في دقنه وقال: خطوبتي أنا وإنتي
بصلها لقاها متنحة راح مطرقع صوابعه قُدام وشها، رمشت من الخضة وبدون مُقدمات غطت بوقها بإيديها وهيي بتقول بصدمة: أناا!
بص نوح وراها ورجع بصلها وقال: أيوة هو إنتوا واقفين طوابير ولا إيه، ماهو مفيش غيرك
قربلها وهمس عند ودانها وقال: ومش هيبقى في غيرك للعلم
فتحت بوقها من الصدمة ف قال نوح عشان يفوقها: إنتي مستوعبة إني بطلُب إيدك ولا لا؟
رفعت رفيف أكتافها ف قال نوح بتنهيدة: طيب، تتجوزيني يا رفيف؟ تقبلي تكوني مراتي رغم كركبة حياتي! تقبلي تشاركيني الرحلة اللي مفيهاش فرح غيرك!
رفيف خدت نفس وأول ما نطقت قالت: عشان شبه مامتك ولا..
قاطعها نوح وقال: عشان بحبك! الراجل لما بيطلب إيد ست بيتجوزها عشان بيحبها يا رفيف، صعبة دي؟
إبتسم وهو مكشر راحت إبتسمت بكسوف وهي بتهز في نفسها
نوح: ما تخلصي أه ولا لا!
إتخضت رفيف ف غمض نوح عينه وقال: أنا اسف والله بس سكوتك موترني وأنا مبحبش أتوتر
رفيف الإبتسامة من الودن للودن وقالت: خلاص نشوف الفُستان الإسبوع الجاي
وشها إحمر ف جريت للمطبخ ف راح قال نوح بصوت عالي: على فكرة بعد الجواز هشمع أم المطبخ دا خالص عشان متستخبيش مني
نوح بصدمة وهو بيعاتب نفسه: يعني البت معترفتش بحُبها وإنت رايح تتقدملها! إيه الغشومية دي!!
* في قصر أمير الدهبي
صِبا كانت قاعدة على طرف السرير بتهز في رجليها بعصبية وبتعُض ضوافرها وهي باصة قُدامها بغيظ، وأمير كان قاعد على الأرض وحاطط راسه على رجليها الثابتة اللي مبتهزهاش وهو بيقول: والله العظيم ما حاسس ناحيتها بأي حاجة، أنا بحبك بس معرفش ليه كُل أما أقربلك ولا ألمسك تحصل مُصيبة، وبعدين دي مرات أبويا يا صِبا
صِبا بعصبية: وإيه يعني؟؟ ما سمر كانت مرات أبو مُهند
إتعدل أمير ورفع راسُه عن رجليها وهو بيقول: إنتي مجنونة صح؟ المُسلسلات التُركي مأثرة على عقلك!
صِبا بتكشيرة: ودي هتتخمد في أنهي داهية؟
أمير وهو بيبوس رُكبة صِبا: في أوضة لوليا
صِبا بقرف: الله يجحمها مطرح ما رتحت، الاوضة دي هو_لع فيها عشان لمت كُل قرف الدُنيا
أمير وهو بيطبطب عليها: طب مُمكن تهدي عشان خاطري؟ أنا تعبان والله نفسيتي زفت وبراضيكي عشان خايف عليكي لإنك حامل ولسه هراضي أمي.. حسي بيا وخليكي جنبي
لعبت صِبا في شعره وقالتله: محتاج تحلق على فكرة شعرك طول، بس تصدق مستخسرة أقصهولك عشان ناعم وحلو
سند خده على رجليها تاني وقال بنبرة ضعيفة: أبويا ما_ت يا صِبا
جسمه بدأ يتهز ويتنفض بعياط راحت صِبا سحبته وحضنته، حضنها من وسطها جامد وهو بيعيط على كتفها بإنهيار لدرجة صِبا حطت كف إيديها على مؤخرة راسه وهي بتعيط معاه
صِبا بحُزن عليه: عيط، عُمري ما هشوفك ضعيف دا مهما إن كان أبوك
فضل يعيط في حُضنها زي الطفل، وهي حضناه جامد بتهديه.
* في منزل العقرب
صحي من النوم لقى مياسة بتغسل المواعين
ف قالها وهو بيتنحنح: إحم.. نزلتي من البيت تاني، وخدتي فلوس مني عشان تأذي نفسك. صح؟
مياسة وهي بتكمل غسيل مواعين: كان لازم أوقفها عند حدها بنفسي، إتعودت إني ضعيفة
غمض العقرب عينه وقال وهو ماسك نفسه: إطفي المياه أنا بكلمك!
قفلت مياسة الحنفية ولفتله وهي عينيها حمرا، تجاهل دموعها وقال وهو باصصلها بنظرة حادة: أخر مرة لما سيبتك عند الرايق وسيبتي بيته ونزلتي، مرجعتيش
لما روحتلك قالولي دي ما_تت.. كُنت بتعذب في السجن كُنت بم_وت عليكي، حياتك عندي أغلى من حياتي أنا شخصيًا
زعق بصوت عالي وهو بيضرب الحيطة جامد بوكس وقال: عشان بحبك!! أنا نُقطة ضعفي الحُب، جرحي اللي مبيتقفلش.. مفكرتيش فيا وإنتي بتتسحبي وتنزلي تاني ورايحة لحد بيكرهك!
جري ناحيتها ومسكها من كتفها وهو بيهزها جامد وبيضرُخ في وشها بيقول: مش كفاية اللي حصل ل..
قطع كلامه ف نزلت دموع مياسة اللي حبساها وهي بصاله ببرود بعدها قالت بصوت مكتوم من العياط: كمل! مش كفاية اللي حصل لمين.. لأمل صح؟
وطى عيسى راسه وهو ماسكها من كتفها ونزل إيديه بهدوء وهو بياخُد نفسه بسُرعة وبصوت عاالي
عيطت مياسة وهي بتقوله بوجع: كُل حاجة أمل، حبتني عشان شقرا زيها، بتجيب سيرتها في كُل حاجة وفي أي وقت، كُل اللي حوالينا شايفين حبك ليها ومش شايفين حبك ليا لدرجة إن أمك رفضتني! وإنت مش خايف عليا إنت خايف تكرر وجع اللي حصلك يومها بس أنا مش خيال أمل يا عيسى، أنا ميااسة.. أنا واحدة تانية غير أمل.. أمل الله يرحمها واجه الحقيقة
حط إيده على ودانه وهو بيلف في المطبخ راحت مياسة قالت: هنزل من هنا دلوقتي وملكش دعوة بيا..
عيسى بصوت واطي: مفيش خروج
مياسة بعياط: هنززل
عيسى بتكرار: مفيش نزول
ميااسة: هنزل هنززل هنزل
صرخ عيسى جامد وقال: مفيش مي_ت** أم نزول!!
هدي عيسى وهو شايفها بتعيط وقال: أنا بحبك إنتي عشان..
مياسة مسحت دموعها وقالت وهي سيباه وداخلة الأوضة: كلامك مش هصدقه بعد إنهاردة
دخلت الأوضة ورزعت الباب وسندت عليه وهي بتعيط جامد وصوت بهاء سُلطان في الخلفية ” وكان مفروض محبكش، ولو حبيت ما أبينش ودلوقتي خلاص همشي أنا وقلبي اللي دايب فين؟ ”
وقف عيسى في المطبخ وإيده اللي خبطها في الحيطة جايبة د_م من ناحية مفاصل الصوابع
بص على باب أوضة مياسة المقفول بعينيه الحمرا من الدموع وهو مكشر ولاوي بوقه بحُزن
وفي الخلفية صوت بهاء سُلطان وهو بيقول ” وليه طيب! عشان طيب؟ عشان يعني اللي في قلبي على لساني! بتكسرني وتخسرني! بتخسر حُب مش سهل تلاقيه تاني “
* داخل منزل بوسط البلد
دخلت رهف وهي بتقلع جزمتها وبتنادي وبتقول: مووني، شوفت عربيتك تحت عرفت إنك جيتي من الشُغل، أنا عارفة إنك على أخرك بس ههههه هحكيلك اللي..
دخلت رهف الصالة لقت منال قاعدة ووشها عايه غضب هادي
وجنبها راجل
رهف بصدمة: بابا!!!
يتبع…
لقراءة الفصل التالي : اضغط هنا
الرواية كاملة اضغط على : (رواية سفير العبث)
