رواية ابنه بائعه الخضار الفصل الثاني 2 بقلم هبة نصر
رواية ابنه بائعه الخضار البارت الثاني
رواية ابنه بائعه الخضار الجزء الثاني
رواية ابنه بائعه الخضار الحلقة الثانية
تستيقظ امال من النوم لتوقظ امل وعبير .. وتتجه امل للمطبخ لتحضير الفطار .
امل / ايه ده .. انتى هتعملى ايه
امال / هساعدك ..مش كفايه انك بتعملى كل حاجه فى البيت ومبترضيش تخلينى اعمل حاجه .
امل وهى تضع يدها فى وسطها / ياسلام يا ست ماما .. وانتى كان حد اشتكالك .. مش كفايه انك قاعده فى الشارع طول النهار فى الشمس والحر وفى السقعه علشان تربينا .. دى اقل حاجه اقدمها لك .. ثم تنحنى وتقبل يديها
امال وهى تضع يديها على رأس امل / ربنا يرضى عنك زى ما قلبى راضى عنك
امل وهى تقبل خد امها / اهى الدعوه دى عندى بالدنيا وما فيها … اتفضلى اقعدى بره على ما احضر الفطار .. واصحى خم النوم اللى نايمه جوه دى .. هتتاخر على المدرسه زى كل يوم
عبير / مين اللى بيجيب فى سيرتى على الصبح
امل / مفيش يا ستى .. اتفضلى اجهزى بقى على ما اخلص الفطار هتتأخرى
عبير / ايوه كده ناس متجيش الا بالعين الفوشيا
امل / بنت انتى .. اخلى يلا .. والااا
عبير / خلاص خلاص فيه ايه يا أموله .. بنهزرو معاكى
لتخرج الام الى السوق وتتجه عبير الى المدرسه وامل الى الكليه حيث تنتظرها مروه
…………………
يجتمع الجميع على سفره طويله .. عليها ما لذ وطاب من الوان الطعام
عفاف / بردوا ناويه تروحى الكليه النهارده يا سمر .. انتى لسه تعبانه
سمر / معلش يا ماما .. لازم اروح علشان اصالح امل بعد الموقف اللى حصل امبارح
سليم / يااه هتروحى الكليه وانتى تعبانه علشان تصالحى اللى اسمها امل دى .. للدرجه دى بتحبيها
سمر / جداً يا أبيه .. اصلك متعرفش امل .. دا كل اللى يعرفها يحبها
عفاف / بس شكل البنت اللى اسمها مروه دى بتكرها .. بدليل الموقف اللى عملته إمبارح لما كانت هنا
سمر / فعلاً يا ماما .. دايما تغير منها .. علشان كل سنه بتطلع الاولى على الدفعه والكل بيحبها ومجتهده و..
سليم / برااحه ..
سمر / يا سلام يا أبيه لو تعرف امل اد ايه هى بنت ممتازه .. دى حتى بترفض انى اعزمها على اى حاجه .. ودايما تقولى علشان انا مش هقدر ارد لك العزومه
سليم ببسمه جانبيه / واضح انها بنت ممتازه فعلا
شريف / ايه دا انتوا بدأتوا فطار من غيرى
سليم / ابقى اصحى بدرى وانت تلحق الفطار معانا
شريف / مش كان ورايا شغل كتير فى المجموعه
سليم وهو يغمز لشريف / شغل لحد وش الفجر
شريف / اعمل ايه .. ما انت اللى سبت لى الشركه ورفضت انك تديرها .. واكتفيت بالسلك القضائى
سليم / انت عارف انى مليش فى اداره الاعمال .. وانى بحب النيابه والقضاء
سمر / اسيبكم بقى تتناقشوا مابين القضاء وإداره الاعمال .. وامشى انا .. باى باى
….. …………………….
لتدخل امل من باب الكليه بحثاً عن سمر بعد ان لمحت عربيتها خارج الكليه لتتفاجأ بمروه فى وجهها لتمر من جانبها دون ان تنظر لها
مروه بصوت عالى ليلتم الطلبه/ فيه ايه يا بنت بياعه الخضار .. مش هتقوليلى صباح الخير
امل /….. لتنظر لها من فوق لتحت
مروه / انا مش عارفه انتى جايه كليه العلوم تعملى ايه .. المفروض تبقى مع الست اممك على فرشه الخضار فى السوق
امل بإبتسامه / بروح يا مروه فى الاجازه او لما ماما تكون تعبانه
مروه بغيظ/ انتى ايه .. مش مكسوفه .. وكمان بتضحكى
امل / واتكسف من ايه .. انا امى مش رقاصه ولا بتشتغل فى الممنوعات على اتكسف منها .. امى زى امهات كتير بتشقى وتتعب علشان تربى بناتها .. والحمد لله كلها شهرين واتخرج واشتغل واريحها واختى فى ثانويه عامه .. انتى بقى مشكلتك ايه
مروه / يا بجاحتك .. يعنى بنت بياعه خضار وداخله كليه من كليات القمه .. انتى اخرك دبلوم وتقعدى على فرش جنب مامتك فى السوق
امل / وماله الفرش اللى فى السوق ..انتى ليه شايفه نفسك احسن منى
مروه / علشان انا احسن منك فعلا .
امل / براحتك .. مش هرد عليكى
لتمشى امل من امام مروه ..لتتدخل سمر واللى كانت متابعه الموقف ورفضت ان تتدخل لثقتها ان امل تستطيع ان تأخذ حقها .. فهى ليست بالنت الضعيفه فهى اقوى مما يتخيل احد
سمر /ايه اللى انتى عملتيه دا .. ايه السواد والنقص اللى جواكى دا يا شيخه
مروه / وانتى مالك .. مش كفايه انك طردتينى من بيتك إمبارح
سمر /كان لازم اعمل كده .. لما تبقى فى بيتى وتغلطى فى ضيفه زيك فى بيتى .. يبقى لازم اطردك .. لانك ماحترمتيش البيت اللى انتى فيه
مروه / انتى بتساوينى ببنت بياعه الخضار دى
سمر /اوعى يا مروه تكونى فاكره ان امل مش عارفه انتى بتعملى ايه ..امل عارفه انك بتاخدى الملخصات اللى هى بتتعب فيها وتعملها لنا قبل الامتحان علشان نراجع منها .. وانتى بكل بجاحه تخديها وتصوريها وتبعيها
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية ابنه بائعه الخضار)
