رواية البر التاني الفصل الثاني والخمسون 52 بقلم لولو محمد
رواية البر التاني الجزء الثاني والخمسون
رواية البر التاني البارت الثاني والخمسون
رواية البر التاني الحلقة الثانية والخمسون
رشيد / و انا مصلحتى ايه ان الزنايته يدمنوا
فيرا / مهم لما يدمنوا مش هيقدروا يخالفوا كلامى و ساعتها مش هياذوك
رشيد / و انتى ناويه تعملى كدا ازاى
فيرا / النهرده انسب معاد البلد كلها هناك هياكلوا و يشربوا
رشيد / فاهم فاهم بس هتحطى الحاجات فى الاكل و الشرب ازاى
فيرا / انا ليا ناس فى كل حته يا رشيد
رشيد / ربنا يوفقك بس برده انا دورى ايه فى كل ده
فيرا / عوزاك تساعدنى
رشيد / هههههههههههههه انتى مش ليكي ناس جوه
فيرا / ليا بس عشان يوصل للمطبخ
رشيد/ انا حتى ما دخلتش من باب السرايا قبل كدا عشان ادخل المطبخ
فيرا/ عاوز تفهمنى انك ما تعرفش حد فى البلد خالص
رشيد / اعرف مختار و مغاورى و عباده و امين و عباس اعرف ناس كتير بس ما فيهمش واحد ممكن يساعدك كلهم لو شموا خبر باللى هتعمليه
فيرا / عباس
رشيد / ابن اخت الحج شاهين جارحى ابا عن ام ابوه يبقي ابن عم الحج شاهين مات من واحد و عشرين سنه فى طالعه من اياهم دلوعه امه زى ما بيقولوا نسوانجى و بتاع كاس انا ما اتعاملتش معاه وش لوش هو ما يعرفنيش بس انا عارفه بنتكلم فى التليفون بس ما اتقابلناش
فيرا / اسحبهولى بره البلد
رشيد / النهرده ؟
فيرا / سمعت انه طلق مراته و فى مشاكل كبيره بينه و بين الجوارحه
رشيد / بس هو جارحى حتى لو بياكلوا بعض جوه السرايا حبايب قدام الناس زى الزنايته بالظبط
فيرا / اسحبه قوله اى حاجه انا عارفه انك مش هتغلب
رشيد / بكره ممكن النهرده ..
فيرا / لسه بدرى على الفرح انا متاكده انك هتقدر تتصرف
رشيد يبص الناحيه التانيه و ينفخ
فيرا / انت مش عاوز ترجع فلوسك و لا ايه ؟
رشيد / ماشي .. سمر
فيرا / مالها
رشيد / حبستها فى الاوضه مش عجبانى هتتمشي و تاخد راحتها و ما حدش هيتعرضلها
فيرا / طبعا
رشيد يهز راسه و يمشي
……………………..
فى اوضه ماجده
ماجده بتلبس الباب يخبط
ماجده / الباب مفتوح
مغاورى يدخل ماجده تبصله
مغاورى / عامله ايه
ماجده / الحمد لله
مغاورى / ما تعرفيش عباس فين
ماجده / و انا اعرف منين
مغاورى / ما كلمكيش و لا قالك اى حاجه
ماجده / لا ليه هو فى حاجه و لا ايه
مغاورى / لا بس صحى من بدرى و خرج و لسه ما رجعش و بكلمه ما بيردش
ماجده / شوفته فى المكتب
مغاورى / شوفته و سالت صحابه
ماجده تروح تجيب الموبايل و تتصل
ماجده / هو فى حاجه ؟ وشك مخطوف
مغاورى / لا ما نمتش كويس بس ها رد
ماجده تهز راسها لا
مغاورى / خليكي وراه لو رد قوليلى
ماجده / مغاورى
مغاورى يبصلها
ماجده / فى حاجه صح ؟ فى حاجه ؟
مغاورى / ايه يا بت مالك انا بس قلقت عليه ليكون زعلان و لا حاجه انتى عارفه بقاله فتره متغير
ماجده / انت بتقول الحقيقه صح
ماجده عنيها تتملى دموع مغاورى يبتسم و يبوس راسها
مغاورى / وربنا انتى خساره فى جته اللى جابوه
ماجده تبعد عن مغاورى
ماجده / انت بتقول ايه هو مش ابو عيالي و ابن عمتى
مغاورى / اه طبعا امال ايه بقولك ايه خليكي وراه و خفى فى الحلاوه شويه ادى فرصه لغيرك يبانوا
ماجده / اطلع بره يا مغاورى
مغاورى يضحك و يمشي و يقفل الباب ماجده تقعد و تفضل تحاول تتصل مش بيرد
…………………….
فى صحرا
عربيه فيرا واقفه و رشيد و فيرا و ادواردو راكبين فيها عربيه عباس تركن و ينزل منها فيرا تنزل من عربيتها
عباس / ما تقوليش الست فيرا مش كدا
فيرا تبتسم
عباس / طب كنتى كلميني وش و انا كنت جيتلك لزمتها ايه اللفه دى كلها
فيرا / يعني متفقين
عباس / عمرنا ما هنتفق انا اليوم اللى هحط ايدي فى ايدك اقطعها اهون عليا
فيرا / فكر تانى عندك اللى يزعلوا عليك و تزعل عليهم
عباس يبص على رشيد و ادواردو فى العربيه و يبص حواليه فى كل حته
عباس / ما تجيبي من الاخر ورايا فرح و لسه ما جهزتش
فيرا / ما نفسكش مراتك ترجعلك ما نفسكش تبقي كبير الجوارحه تاخد حقك من خالك اللى جلدك و خلاك مالسه البلد كلها
عباس / بالحبوب بتاعتك ؟
فيرا / و ليه لا
عباس / بس كدا مش هبقي انا الكبير هتبقي انتى الكبيره
فيرا / و انا و انت ايه
عباس / ههههههههههههههههههههه
فيرا / تمام بلاش الجوارحه ايه اخبار الزنايته معاك
عباس يرفع حاجبه ادواردو ينزل من العربيه
ادواردو / تو سبيدينج كارز كمينج تواردز اس ( عربيتين جايين هنا بسرعه )
فيرا / صحابك دول يا عباس ؟
عباس / و انا اش درانى
عربيتين يبانوا من بعيد
ادواردو / وى هاف تو جو ( لازم نمشي )
فيرا / وايت فور ايت ( استنى )
عربيه تفرمل و شاهين و رجاله ينزلوا منها فيرا تبتسم و تبص لعباس شاهين يروح يقف قدام فيرا و يديها ضهره و يبص لعباس
شاهين / بتعمل ايه هنا يا عباس
عباس / بعتولى مرسال معرفه ما كنتش اعرف انه
شاهين / طب يلا يلا ورانا فرح عاوزين نجهز له
شاهين يطبطب على كتف عباس عباس يروح يركب شاهين يبص لفيرا
شاهين / ابعدى عن عيالى و الاولى تبعدى عن بلدنا و انا قدامك اهو
فيرا / احتراماتى
شاهين / عاوزه فلوس هديكي
فيرا / انا مش عاوزه فلوس
شاهين / لا عاوزه مهو اللى زيك ما بيعوزوش غيرها هاتى من الاخر عاوزه كام
فيرا / تبيع مختار الزيني بكام
شاهين / انتى كدا مش عاوزه فلوس صح انتى عاوزه دم
فيرا تبتسم
شاهين / حظك انى رايق النهرده
فيرا / مبروك لخد
شاهين / ما توسخيش اسمها على لسانك و ارجعى مطرح ما جيتي
فيرا / يعني ما اتفقناش ؟
شاهين/ ما فيش اب بيبيع ابنه و ان كان يلزمك دم انا قدامك اهو وريني روحك
فيرا / احتراماتى ليك ما لهاش نهايه انا عاوزه مختار
شاهين / احلمى على قدك يا بومه انتى و احلمى على قدم
شاهين يشاور للرجاله يمشوا فيرا تركب العربيه و هى بتضحك
رشيد / شكلهم ما كانش بيقول نكت
فيرا / فى حياتى ما شوفتش فى خفه دم المصريين ههههههههههههههههه
رشيد / هم يجننوا فعلا
فيرا تبص لرشيد و تبتسم
…………………….
فى الفرح بالليل
ستات كتير فى المطبخ و انتصار و مريم و فاتن واقفين وسطيهم فاطمه تدخل
فاطمه / ام فاتن
انتصار تروحلها
انتصار / فى ايه
فاطمه / هتفضلي واقفه كدا مش فى ناس تسلمى عليهم
انتصار / ما انا واقفه هنا عشان الناس ما انتى عارفه اللى فيها
فاطمه تتنهد
فاطمه / طب روحى انتى و انا هقف مكانك شويه
انتصار / فتحى عينك كويس خلى اليوم يعدى على خير
فاطمه / ما تقلقنيش بقي
انتصار / الله ينور يا جماعه الهمه … فاتن … مريم … الهمه هاه
فاتن / ما تقلقيش يا ست الكل
انتصار / مش هتاخر عليكوا
انتصار تطلع بره البنات بترقص انتصار تسقف و تزرغط و تروح تشد هند و يرقصوا قدام بعض انتصار توطى على هند
انتصار / روحى المطبخ و اقفى على ايديهم شويه
هند تبتسم و تمشي ناحيه المطبخ و شيري متابعاها انتصار تزغرط
………………..
فى الجنينه عند الرجاله
مختار واقف و الصوانى داخله خارجه و مغاورى واقف عند صندوق الحاجه الساقعه و بيفتح الساقع و يحط على صوانى و ناس تشيل الصوانى و توزع على الناس و عبد الله واقف متابع الرجاله و هى بتوزع و عباده بيرقص على حصان فى النص عباس يروح يقعد جنب شاهين شاهين يطبطب عليه
عباس / عرفت انى هناك ازاى
شاهين / و انا من امتى بشيل عيني من على عيالي
عباس / بتراقبنى يعني
شاهين / لا ما براقبكش بس كل العربيات متركبلها نظام تتبع ده اللى بيشتغل على القمر الصناعى لما ما عرفناش نوصلك خفنا يكون جرالك حاجه
عباس / و البتاع ده ركب فى عربيتي من غير ما اعرف ازاى
شاهين / و كانت هتفرق فى ايه يا عباس انت كنت ناوى تخبى عليا انك قابلت الوليه دى و لا داهيه لتكون غسلتلك دماغك
عباس / و هو مغاورى لما اشتغل معاها كانت غسلاله دماغه و لا هو حلال لمغاورى وحرام عليا يا خال
شاهين / لما قالولى عباس بيخون عباس بيطلع اسرارنا بره قولت ما يعملهاش دا ربايه ايدي عباس بيغلط اه بيتوه اه لكن لا بيغدر و لا بيخون
عباس / عشان كدا جلدتنى مش كدا
شاهين / بسبب الخمره و النسوان اللى كنت بتنقع روحك وسطيهم كل ليله
عباس يبص الناحيه التانيه
شاهين / انا جوزتك بنتى اديتك حته من كبدى و انت ما صونتهاش و سكت سنين و انا ساكت و بسكتها سنين و انا بقولها بكره يتعدل بكره ربنا يصلح حاله شوفت ضنايا بتدبل قدام عيني عشانك و انا ساكت كنت ببقي عارف انك بتخونها و اغمض عيني كنت ببقي عارف انك مش فى اسكندريه و اغطى عليك عشان بيتك ما يتخربش بس ماجده كانت فاهمه كانت بتبصلى و تقولى بعنيها انا فاهمه يابا انا عارفه هو فين يابا و كنت بهرب من عنيها عشانك و عشان بيتك انت بقي يا عباس عملت ايه
عباس / انا ما كنتش اعرف انى هقابلها هى كنت رايح اقابل رشيد
شاهين / عارف
شاب يدخل شايل صينيه ساقع و يعزم على شاهين و عباس شاهين ياخد ازازتين ويبتسم للراجل يمشي و يعزم على عباس عباس ياخدها منه
شاهين / افرح لاختك و حاول تصلح اللى اتكسر اقف جنب اخوك بدل ما هو واقف بطوله وسط الناس ديدابان خايف على الناس
عباس يحط ازازه الحاجه الساقعه و يوطى يبوس ايد شاهين شاهين يسحب ايده عباس يروح يقف جنب مغاورى و يعبى الصوانى و يشيل و يفرق على الناس
………………
فى اوضه خديجه و عباده
عباده و خديجه يدخلوا و الستات بيزفوهم و زغاريط و احضان
ام مغاورى / مش هوصيك عليها
عباده / فى عنيا
الست تزغرط و يمشوا و يقفلوا الباب وراهم عباده يروح يقفل الباب بالمفتاح و يروح يقف قدام خديجه عينها على الباب
عباده / بتفكرى تهربى و لا ايه
خديجه تبصله و تبتسم
خديجه / لسه مش مصدقه ان اتقفل علينا باب واحد
عباده يبتسم خديجه تبتسم اوى
خديجه / حاسه ان قلبي هيطلع من بين ضلوعى
خديجه تضحك و تبص فى الارض عباده يمسك دقنها و يرفع عنيها لعنيه تبص فى الارض تاني و هم مبتسمين
عباده / الاوضه دى لو اتقتل فيها القتيل ما حدش يحس بيه
خديجه / المفروض تقول كلام يطمنى على فكره انت بتعمل ايه
عباده / ههههههههههه ما اقصدش والله انا اقصد يعني خدى راحتك يعني
خديجه تبص حواليها و تبص لعباده
خديجه / طب انا هاخد غيارى و ادخل الحمام
عباده / بس ما تتاخريش بقي بالله عليكي
خديجه تفتح الدولاب و تطلع عبايه و تيجي تروح الحمام عباده يشدها من ايدها يسحبها فى حضنه تبتسم
عباده / بحبك يا بت
خديجه تحضنه و تتعلق بايديها فى رقبته يحضنها اكتر خديجه تهمس فى ودانه
خديجه / مش هنصلى ؟
عباده / هنصلى بس اشبع منك شويه الاول دا انا مستنى بقالى كتير اوى
عباده يحضنها اكتر و فجاه يسيبها
خديجه / لحقت تشبع و لا ايه
عباده / لا بس قولت الحق اشد الفرامل قبل ما الدنيا تبوظ منى و امشي من قدامى بقي لحسن الشيطان جايب عياله و نازل زغزغه فى ودانى
خديجه تبتسم و تبص فى الارض و تروح الحمام و تقفل الباب عباده يقف على الباب
عباده / خلاويص
خديجه / هو انا لحقت
عباده / الاعجاز فى الانجاز هاه فى ناس بتجيب جاز هنا
عباده يروح يفرش السجاده و ياخد ورده من الفازه على الترابيزه يحطها على السرير و يروح يقف قدام المرايه و يسرح شعره و يحط برفيوم و هو بيغني
عباده / يا بنت السلطان حنى على الغلبان الميه فى ايديكي يا خوخه و عبوده عطشان
……………….
فى الجنينه تحت
الناس بترقص مختار يروح يقف جنب مغاورى
مختار / انا تعبت
مغاورى / الخوف ان بعد كل ده يكون فاتنا حاجه
مختار يبصله
مغاورى / بيتهيالي الوحيد اللى عرف يستمتع بالفرح النهرده العريس
مختار/ دا وقت قر ده وقت قر
مغاورى / ههههههههههههههههههه لا يا عم لا بقر و لا حاجه ربنا يباركله
مختار / عقبالك
مغاورى / من بقك لباب السما
عبد الله يروح يقف معاهم
عبد الله / هو الناس دى مش ناويه تمشي انا احوليت و انا ببص فى ازايز و كبايات الناس
مغاورى و مختار يبصوا لبعض و يضحكوا
عبد الله / والله الراجل بصلى كانى ببصله فى ازازته انا شكلى بقي فنله حمالات ما ينفعش كدا
مختار / انا بقول نقفل على كدا و نلم الليله
مغاورى / و مين سمعك يلا على البركه
مختار يسيبهم و يروح يوشوش الكبير يهز راسه موافق مختار يروح يوشوش الفرقه الشعبى
……………………
فى اوضه عباده
عباده قاعد على السرير بيفرك يقوم يخبط على الباب
خديجه / مين ؟
عباده / مين ايه هو فى غيرى هنا افتحى
خديجه تفتح الباب فاكه شعرها و لسه بالفستان عباده يبصلها من فوق لتحت و يتصدم
عباده / و حياه … انتى كل ده و ما غيرتيش
خديجه / كنت بفك الطرحه و امسح المكياج عشان اتوضي انت مستعجل على ايه
عباده يحط كف على كف و يقف معوج و يبصلها و هو فاتح بقه خديجه تبتسم
خديجه / هغير الفستان و اتوضي و اطلع خلاص هانت
عباده / انجزى
خديجه / حاضر
خديجه تدخل و تقفل الباب
عباده / اقسم بالله عارف انها مش هتبقي سالكه انا عارف بختى
خديجه / هتسلك ان شاء الله انت بس قول يارب
عباده / يارب ياختى … خلصتي
خديجه / بفك رباط الفستان اهو ما تصربعنيش بقي
عباده / خدى راحتك احنا ورانا ايه الفجر هياذن انجزى
خديجه / لسه بدرى على الفجر
عباده / خلصتي طيب
خديجه / لسه يا عباده بطل بقي وترترنى .. يوووووه
عباده / فى ايه
خديجه / الفستان مش عاوز يتفك
عباده / اقطعيه اقولك تعالى و انا اشقهولك
خديجه / بطل هزار بقي يا عباده الله
عباده / طب تعالى اساعدك
خديجه تفتح الباب و تطلع تدى لعباده ضهرها
خديجه / الرباط مش عاوز يتفك مش عارفه شديته غلط و لا ايه
عباده / ثانيه واحده
عباده يروح يجيب مقص من على التسريحه و يقص الرباط
خديجه / انت عملت ايه لتكون بوظت الفستان
عباده / ابو الفستان يا خديجه هو انتى هتلبسيه تانى انا بجيب جاز هنا قلبك عليا و لا على الفستان
خديجه / ما تزعقليش الله
عباده / حقك عليا هاتى راسك ابوسها
عباده يبوس راسها
عباده / ابوس ايدك بقي انجزى خلينا نصلى الركعتين
خديجه / حاضر خمس دقايق بس هغير و اتوضي و اجيلك
عباده / اتفضلي يا خديجه اتفضلى يا ست البنات اتفضلى
خديجه باصه لعباده
عباده / انتى هتفضلى بصالى كدا ما يلا بقي يا خديجه ابوس ايدك
عباده يبوس ايدها تبتسم بالراحه و تدخل الحمام تانى و تقفل الباب
عباده / دى مش عين لا دا سحر اسود لعين انا عارف
………………….
فى اوضه مختار
هند بتعلق الفستان و مختار ممدد على السرير
هند / انا رجلى ورمت النهرده بس بصراحه كان يوم حلو جدا
هند تبص لمختار تلاقيه باصصلها و مبتسم
هند / صحيح مغاورى هيتقدم لسماح ؟
مختار / اتقدم خلاص
هند / كانت حلوه اوى النهرده تعرف ان فاطمه اللى ممكيجاها انا ما كنتش اعرف انها شاطره اوى كدا
مختار يشاورلها تجرى تنام فى حضنه يبوس راسها و يشد الغطا عليها
مختار / النهرده كان يوم صعب اوى بالنسبالى و ان شاء الله يكون عدى على خير
هند / هو ممكن يكون
مختار / احنا عملنا اللى علينا
هند / ان شاء الله خير
مختار / بعد بكره المكن الجديد هيركب مكان الجيم عاوزك تتمرنى عليه
هند تهز راسها
مختار / بفكر اقفل السطوح و انقل الجيم فيه او اقفل حته فى الجنينه او حتى المضيفه
هند / مش هتفرق يا مختار الجيم ما عدش ليه لزمه
مختار يبصلها تبتسم
مختار / خايفه ؟
هند / اكدب لو قولت لا … مرعوبه
مختار يبوس راسها
مختار/ حقك عليا
هند / ايه النكد ده … حقى عليك فى ايه و انت مالك باللى حصل كفايا انك بتحاربه
مختار / بس انتى و اهلك ما لكوش ذنب فيه
هند / و هى الست دى ما راحتش مصر يعني على الاقل انا هنا جنبك و وسط اهلك هناك كان لينا مين
مختار يبتسم
هند / انا مش خايفه على نفسي انا بخاف عليك انت انت اللى فى وش المدفع مش انا
مختار / انا بخير طول ما انتى بخير
هند تحضنه اوى
هند / بحبك اوى يا ابن الزيني
مختار يبوس راسها و هو مبتسم على الاخر
……………….
فى اوضه عباده
خديجه نايمه فى حضن عباده يبص عليها و يبتسم و يبوس راسها تفتح نص عين
عباده / انا بحلم صح ؟
خديجه تبتسم و تبصله
عباده / تزعلى منى لو اجلنا لبنان شويه
خديجه / عمرى ما ازعل منك ابدا
عباده / انا مش هلغيها هاجلها شويه لما الدنيا تستقر انا خايف عليكي والله خايف ما اقدرش و انا لوحدى
خديجه / خلاص خلينا هنا
عباده / انا مش هلغيها هاجلها بس
خديجه / لوحدنا هناك لوحدنا هنا هتفرق فى ايه ما دام سوا
عباده / بجد يا خديجه
خديجه / و الله
عباده / بحبك يا بت
عباده يزغزغها تضحك على اخرها
عباده / هعوضك اقسم بالله هعوضك
خديجه / عارفه من غير حلفان بس قولى انا رقم كام عندك دلوقت
عباده / الدنيا عندى فى كفه و انتى فى كفه
خديجه / قول والله
عباده / والله … تعرفى يا بت انا عمرى ما كنت اصدق انى احبك بالسرعه دى كدا بس انتى يخربيت اللى يزعلك يا شيخه قلبتى كيانى و برجلتى الدنيا اقسم بالله الواحد قبلك كان ملك كدا عايش مش فارق معاه اى حاجه و ملك فى نفسه كدا دلوقت الواحد بيصحي و ينام متعلق على مكالمه يسمع فيها حسك بس
خديجه / هو انا حاسه انك بتقول كلام حب صح
عباده / امال ايه بحبك يا بت
خديجه / هههههههههههههههههه و انا كمان بس انت بتقول كنت ملك و بتاع كانك دلوقت بقيت حاجه تانيه اقل
عباده / طلع القوى فى الاقوى منه طلعت مش جامد زى ما كنت فاكر و عقلى ما طلعش اللى بيمشيني صحيح الحب بهدله
خديجه / هههههههههههههههه يعني حلو و لا وحش الحب ده
عباده / هو من حيث حلو فهو حلو
خديجه / فى بس جايه صح
عباده / طول ما انتى جنبى كدا ما فيهاش بس
خديجه / لا مدام كدا بقي خليني
عباده / خليكي
خديجه / ما انا هخليني الله
عباده / شكل النحس بتاعك اتفك يا عباده
خديجه / هههههههههههههههههههه
………………….
فى جنينه فيرا
رشيد نايم على السور و حاطت رجل على رجل سمر تدخل
سمر / رشيد رشيد
رشيد يبصلها و يقوم يقعد سمر تبص حواليها و تشاورله ينزل رشيد ينزل تقرب منه و تتكلم بصوت واطى
سمر / فيرا طلبت منى انى اناديك تنام فى اوضتك
رشيد / طب روحى و انا هاجى وراكى
سمر / انت بتفكر تهرب ؟
رشيد يبص للناحيه التانيه و يبتسم و يبصلها
رشيد / لا
سمر / لو نويتها بالله عليك ما تسبنى هنا لوحدى … اقتلنى الاول ماشى
رشيد / امشى يا سمر امشى
سمر تبصله و تمشى و هو يمشى وراها يقابل فيرا عند باب الفيلا
فيرا / اتصالحتوا
رشيد / اطلعى فوق يا سمر
سمر تطلع فوق
رشيد / انا لحد دلوقت مطاوعك و بريحك على الاخر مع ان لحد دلوقت ما جاليش من وراكى غير التعب
فيرا / اخص عليك و الفلوس دى كلها
رشيد / ما انتى خدتيها
فيرا / لا انت اللى اديتهانى انا كنت بديك بنات ببلاش انت اللى اخترت دى و تمنتها بنفسك حصل و لا لا و احنا فيها
رشيد / انتى عاوزه ايه يا فيرا من الاخر انا لا منى بشتغل معاكى و لا مع غيرك و بعدين استفدتى ايه من انك تحرقيني بالشكل ده
فيرا / ما انت كدا كدا كنت محروق عندهم
رشيد / معنى ان عباس جه انى ما كنتش محروق
فيرا / هتفرق فى ايه ما انت كنت فاكر نفسك محروق يا رشيد
رشيد / ما تفرقش انا مضايق و خلاص
فيرا / ان كانت سمر
رشيد / انا مضايق منك انتى مش من سمر ما تحشريهاش فى كل حاجه و بعدين انا زعلان منك لسبب تانى غير اللى حصل النهرده
فيرا / خير
رشيد / بعد كل اللى عملتهولك و لسه مش بتثقى فيا
فيرا / انا !!!
رشيد يمد ايده من جيبه و يطلع علبه صغيره فيها الكاميرات و اجهزه التتبع اللى كانت فى هدومه
رشيد / ايه دول
فيرا تبتسم
رشيد / انتى مش جايبه عيل صغير من على القهوه انا فى اللعبه دى من سنين لا دا انا اللى حطيت قوانينها كمان و على راى المثل و انتوا جايين كنا احنا مروحين
فيرا / ههههههههههههههههههه حلو اوى المثل ده
رشيد / ما تكرريهاش تانى بقى عشان احبك
فيرا / و انا ميهونش عليا زعلك بس صدقنى دا كان عشان حمايتك عشان ابقى عارفه انت فين و بتعمل ايه
رشيد / و بتكلم مين و بتقوله ايه لو سالتينى هقولك بس هديكى المعلومه بتمنها انما السرقه حرام حرام يا فيرا
فيرا / استغفر الله العظيم
رشيد / لو هنكمل مع بعض لازم نثق فى بعض زى ما انا واثق فيكي و مامنك على حياتى انتى كمان لازم تثقى فيا
فيرا / ما انا واثقه فيك بدليل انك لحد دلوقت ما اخدتش من الحبوب بتاعتى
رشيد / بخصوص الحبوب فكرى تانى فى حوار العلاج انتى ممكن تكسبى منه دهب
فيرا / انت عارف ليه حاجه زمان كانت احسن من دلوقت
رشيد / ليه ؟
فيرا / لان الناس اكتشفت ان المنتج لما يبوظ بسرعه انت هتشترى تانى و الحبوب انت بتاخدها كل يوم لكن العلاج بتاخده مره واحده يبقى انهى اللى بيجيب فلوس اكتر
رشيد / الحبايه ب الف صح
فيرا / مش فى كل المناطق دا عرض و طلب و انت عارف
رشيد / العلاج كمان هيبقى عرض و طلب
فيرا / صدقنى يا رشيد فعلا ما فيش علاج اصلا اللى اخترع الحبوب دى مات
رشيد / مات !!!
فيرا / اه انا قتلته قبل ما يبيع التركيبه لغيرى يرضيك بعد ما عملته و شهرته يجيبلى منافسين فى السوق
رشيد / الواطى قال على راى المثل يا مامنه للرجال يا مامنه للميه فى الغربال
فيرا / اطلع ارتاح يا رشيد انا عارفه انك زهقت من القاعده عشان كدا بكره وراك شغل
رشيد / العمليه بمليون اخضر
فيرا / و مقدم يا رشيد حاضر
رشيد / حبيبتى يا فوفا كدا الواحد يعرف يطلع ينام و هو باله رايق
فيرا / و انت من اهله
رشيد يبتسم و يطلع فوق ادواردوا يدخل فيرا تديله العلبه يفتحها و يستغرب و يبصلها
فيرا / هاو ديد هى فايند اوت (ازاى عرف )
ادواردوا / هى ايذ دينجيراس ( هو خطير )
فيرا / اى نو سو وى مست كيب هيم ان اور تيم ( عارفه عشان كدا لازم يفضل فى فريقنا )
دواردوا / نو وى مست كيل هيم ( لا احنا لازم نقتلهم
فيرا / مهو طول ما انت بتقتل اى واحد كويس معانا ما بيفضلناش غير الخايبين
ادواردوا / وات ( ايه ؟ )
فيرا تسيبه و تمشى و هو بينفخ و بيكتم جواه
………………………..
فى اوضه ماجده الفجر الاوضه شبه منوره
ماجده نايمه و رايحه فى النوم و لابسه كاش حمالات طويل الباب يتفتح و عباس يدخل يقعد جنبها على السرير و يحرك شعرها من على خدها تتفزع
ماجده / يلاهوى
عباس / انا انا اهدى
ماجده تشد الكوفرته و تغطى نفسها
ماجده / هو ايه اللى انا اهدى انت بتعمل ايه هنا افرض حد شافك
عباس / ما يشوفونى احنا لسه فى العده
ماجده / عاوز ايه يا عباس السعادى
عباس / انتى اتصلتى بيا النهرده كذا مره
ماجده / ما كانوش لاقينك … مغاورى طلب منى اكلمك فكلمتك
عباس / بس ؟؟ عشان مغاورى طلب منك تكلميني بس ؟
ماجده / قلقوا عليك انت كنت فين ؟
عباس / و انتى ما قلقتيش يا ماجده
ماجده / كنت بقلق زمان بس بطلت ما انا لما كنت بزن عليك فى الرن انت فين كنت بتتعصب لما كنت بدور وراك كنت بعرف انك بتخونى فبطلت اقلق و بطلت ادور وراك يا عباس
عباس يبص فى الارض
ماجده / هو انت صحيح ممكن تاخد منى العيال ؟
عباس يبصلها باستغراب و عدم فهم
عباس / ايه الكلام ده عيال ايه اللى اخدهم و اخدهم فين و انا هعرف اعملهم ربع اللى انتى بتعمليه ؟
ماجده / يعنى مش هتستخدمهم عشان تجبرنى ارجعلك و لا انك تنتقم منى
عباس / دا انا لو شيطان و طالعلى قرون مش هتفكروا فيا بالشكل ده انا فيا عيوب اه بس مش واطى اوى كدا يعنى
ماجده / على فكره انا مش جايبه الكلام ده من عندى عمتى هى اللى بتخوفنى كل شويه
عباس / انتى مش عارفه امى يعنى بتضغط عليكي عشان ترجعى و تصلح اللى انكسر بينا نيتها خير يعنى
ماجده / انت لو حاولت تاخد منى العيال يا عباس انا هقتلك
عباس يبصلها و يضحك و يبص الناحيه التانيه
ماجده / انت هتفضل قاعد هنا كتير ؟
عباس يبصلها
ماجده / انا عاوزه انام
عباس / يا بت خلى عندك دم دا انا ابن خالك و ابو عيالك
ماجده / و انا اللى كنت طلقتك مش انت اللى رميت عليا اليمين
عباس / مش انتى اللى طلبتى
ماجده / اول مره اطلبها منك يعنى اشمعن المرادى اللى وافقت كنت شايفلك شوفه و لما نئبك طلع
عباس / انا لو كنت عارف اشوف غيرك ما كانش ده بقى حالى
ماجده / كنت بتنام معاهم عميانى يعنى انت فاكر ان الكلام اللى كنت بتقوله فى حقى ما كانش بيوصلنى الزباله الرخاص برقبتى عايش مع واحد صاحبك فاكر ان صحابك الزباله اللى كنت بتسكر و تتكلم عن عرضك قدامهم ما كانوش بيضحكوا عليك مع غيرك و الكلام بيلف يلف و يوصلنى ما كنتش بشوف شماته ستات البلد فيا انت عارف كام واحد اتقدملى قبلك كام واحد رفضته و اخترتك انت فى الاخر صونتك و صونت شرفك و ربيتلك عيالك و فى الاخر طلقتنى عملتى فيا كل حاجه توجعنى و فى الاخر طلقتنى
عباس / مش فكرالى حاجه حلوه ابدا
ماجده / فكراهم كلهم
عباس / طيب اهو الحمد لله
ماجده / و فاكره قصاد كل واحده منهم على الاقل عشر ليالى نمت فيها دمعتى على خدى بسببك فاكره كل سجده دعيت فيها ربنا ياخدنى عشان اخلص من عذابى معاك فاكره وقفتى فى فرح اختى و حنتها و الستات بتتكلم عنى انى مطلقه و انى ما عرفتش اكفى جوزى
عباس / انا ماليش دعوه بالناس و اللى فات مات قولتلك تبت و مش هكررها وعد منى قدامك و قدام ربنا انى مش هخونك تانى و لا هبص لغيرك و هعوضك عن كل اللى فات
ماجده / اطلع بره يا عباس اطلع بره انا تعبانه و مفييش حيل لمناهده اطلع بره و لا اقولك خليك انا هروح انام مكان خديجه
ماجده تقوم عباس يمسكها
عباس / خليكي فى اوضتك و بكره مع الايام هتتاكدى انى اتغيرت عشانك و انى بحبك بجد و ساعتها هتسامحينى و هترجعيلى
ماجده / تصبح على خير يا عباس
عباس يمشى و يقفل الباب وراه ماجده تقعد على السرير تعيط
………………………..
فى اوضه عباده
عباده نايم و واخد خديجه فى حضنه الباب يخبط بالراحه يفتح عينه خديجه نايمه يبصلها و يبتسم الباب يخبط تانى يقوم يلبس جلبيه و هو بيدعك فى عنيه و يروح يفتح الباب و ساده بجسمه يلاقي فاطمه
فاطمه / صبحيه مباركه انتوا لسه نايمين و لا ايه بنكلمكوا على المحمول كلها مقفوله
عباده / اه والله لسه نايمين و تلاقيهم فصلوا و لا حاجه
فاطمه / مش تفوقوا كدا يا ابنى الناس زمانها جايه
عباده / حاضر انا صحيت اهو هتشطف و ننزل حاضر
فاطمه / اجبلكوا الاكل هنا و لا هتنزلوا تاكلوا معانا
عباده / لا هننزل ان شاء الله
فاطمه / ماشي يا حبيبي ربنا يهنيك يلا فوتك بعافيه
عباده / الله يعافيكي يا اما
عباده يقفل الباب بالمفتاح و يبص على السرير يلاقيه فاضي يروح يحط ايده على اوكره باب الحمام صوت دوش فى الحمام يلف الاكره الباب يتفتح يبتسم
عباده / استعنا على الشقا بالله
عباده يدخل الحمام و يقفل الباب وراه بالراحه
………………….
فى السرايا تحت
العيله متجمعه بيشربوا شاى
شاكر / كنتى سبتيهم يصحوا براحتهم
فاطمه / يعني لما الجوارحه يجوا يطمنوا على بنتهم نقعدهم لسه على ما نصحيهم و يتشطفوا و ينزلوا
ناصر / مش عرسان ياخدوا راحتهم
انتصار / والله انا شخصيا مفييش حيل النهرده لا اشيل و لا احط مع انى نمت امبارح زى الفسيخه
فاتن / اه والله ياما نفسي فيه اوى
هند / مش غلط عليكي و انتى حامل ده يا فاتن
غفير يدخل
الغفير / الحج شاهين و اهله وصلوا يا كبير
ناصر و شاكر و الرجاله يطلعوا يستقبلوهم
فاطمه / اهو شوفتى
انتصار / قوموا يا بنات علقوا على الشاى و حضروا واجب الضيافه
مريم و هند و فاتن يدخلوا المطبخ و الجوارحه يدخلوا بالزغاريط و يسلموا بالحضن
فاطمه / اهلا بالغاليه ام الغالية
ام مغاورى / اهلا بالغاليه ام الغاليين امال فين سماح
فاطمه / بترتاح فى اوضتها انتى عارفه انها تعبانه و الفرح امبارح جه عليها بزياده
ام مغاورى / كبدى يا بنتى لا سلمتها الف سلامه
فاطمه / اكيد لما هتعرف انك سالتى عليها هتفرح اوى هبعتلها تنزلك
ام مغاورى / ما لوش لزوم تعبها نبقي نطلعلها احنا بس نطمن على العرسان الاول
فاطمه / بخير و زى الفل لسه نازله من عندهم هيجهزوا و ينزلوا
ان شاء الله
فاتن و البنات يدخلوا شايلين صوانى
فاتن / الشاى
انتصار / دخليه لابوكى فى المكتب و هاتى يا هند اللى انتى شيلاه هنا
فاطمه / و ابعتى حد ينادى للعرسان و سماح
فاتن و مريم يدخلوا المكتب و هند تفرق شاى على اللى قاعدين و عيل صغير يطلع يجرى على فوق
……………………
فى البلد
الفخرانى ماشى و هو مضايق يقابله شاب من اللى كانوا بيسهروا مع عباس
الشاب / مالك يابا فى حاجه مضيقاك و لا ايه
الفخرانى / لا ما فيش وسع من طريقى
الشاب / الله على فين كدا
الفخرانى / طالع على الكبير
الشاب / و تقولى ما فيش حاجه مضيقاك
الفخرانى / روحت اخد الحصه بتاعتى ما رضيوش يدوهانى
الشاب / الله انت مش استاذنت من الكبير قدامى امبارح و قالك روح خد اللى انت عاوزه هو كان بيشتغلك و لا ايه
الفخرانى / ما انا رايحله اهو اشوف ايه الحكايه دى و بعدين اللى اسمه عبد الله ده واد مش متربى هو عشان نسيبه هيركبه علينا و لا ايه ما فاضلش غير ابن امبارح ده اللى يبيع و يشترى فينا
الشاب / عمل ايه ابن الكلب ده
الفخرانى / دا كان ناقص يزقنى يوقعنى فى الارض عشان يطلعنى من الطابور
الشاب / و سكتله ؟ ليه ان شاء الله هو فاكر نفسه ايه دا حياله اخو الست و بكره يبقى جوز الست ليكون فاكر نفسه راجل طب والله لعرفه مقامه
الفخرانى / بقولك ايه يا عرابى ما لكش دعوه بالموضوع انا كلامى مع الكبير احنا مش حمل مشاكل
عرابى / و هو لما عيل صغير يمد ايده عليك و يهزاك قدام الناس دى ما تبقاش مشاكل
عباس ينزل من العماره اللى فيها مكتبه و يشاور لعرابى سلام عرابى يشاورله تعال يروحله
الفخرانى / ما تخلينيش اندم انى حكيتلك انا عارفك مجنون و بتاع مشاكل
عباس / صباح الخير يا حج فخرانى صباح الخير يا عرابى
عرابى / عاجبك اللى بيعملوه نسايبك دول
عباس / نسايبى مين
عرابى / سى عبد الله بيه بيمد ايده على ابويا و يطرده من الطابور عشان ما احنا غلابه و ما عناش فلوس
عباس / انت بتقول ايه هو ايه اللى يمد ايده الكلام ده حصل يا حج
الفخرانى / لا يا ابنى ما حصلش
عرابى / ما تخافش يابا قول اللى حصل
الفخرانى / و اللى حصل انه ما مدش ايده عليا
عرابى / انت مش لسه قايلى دلوقت اهو انه كان بيحاول يزقك عشان تطلع من الطابور
الفخرانى / انا قولت كان ناقص بس ما قولتش انه عمل
عباس / خلاص يا حج انا هتصرف النهرده حصتك هتكون عندك
عرابى / الكبير امبارح قايل لابويا قدامى روح خد اللى انت عاوزه و عبد الله مرضيش اصل كلام عبد الله بقى فوق كلام الكبير
عباس / و انت ما اتصلتش بالكبير ليه فى التليفون دا كان زمانه ماسح بكرامته الارض
الفخرانى / ما كانش معايا رصيد و عبد الله ما رضيش قالى خساره فيك الرصيد
عباس / ايه قله الادب دى هو فاكر نفسه ايه
عرابى / شوفت يا سى عباس شوفت ابن امبارح بيعمل فى ابويا ايه دا لسه خاطب امال لما هيتجوز ست مريم هيعمل فينا ايه … شاهدين يا اهل البلد شاهدين يا ناس اكمننا غلابا يا ناس اكمننا على باب الله
الناس تتلم
عباس / خلاص يا عرابى انا قولت هتصرف
عرابى / حق ابويا انا مش هسيبه انا بقولك اهو
عباس / خلاص يا عرابى لم الليله و خد ابوك على البيت و لا على الارض و انا هبعتلك الحاجه لحد عندك و فوقيها بوسه
عرابى / و كرامه ابويا و كرامتى و كرامه الفلاحين كلهم ما تحضرونا يا اهل البلد
راجل 1 / هو ايه اللى حصل يا عرابى
عرابى / سى عبد الله بيه بيمد ايده على ابويا و يكسر كلام الكبير و ما رضيش يدى لابويا الحصه بتاعته اكمنه معاهوش الفلوس مع ان الكبير اذن
راجل 2 / عبد الله جدع طيب و ابن حلال ما يعملش كدا ابدا
الفخرانى / يعنى انا كداب و لا ايه
راجل 2/ ما قصدتش يا حج بس اكيد فى سوء تفاهم فى الموضوع
عباس / قولت انا هحلها خلاص فضيناها سيره مش فيلم سيما هو يلا كل واحد يروح يشوف اللى وراه يلا اتفضلوا … يلا قولت .. يلا
الناس تتفرق و عرابى واقف هو و الفخرانى يبصوا لعباس
عباس / حقك هيجيلك يا حج قولتلك خلاص
الفخرانى يهز راسه موافق
………………………
فى اوضه عباده
خديجه لابسه عبايه استقبال بيضه و بتلبس الطرحه بسرعه و كل شويه تبوظ منها و تنفخ
عباده / انزل انا و تبقى تحصليني طيب
خديجه / اقسم بالله ازعل منك
عباده / طب ما تشوفى غيرها يا بنت الحلال
خديجه / ما هى دى طرحه العبايه اشوف غيرها ايه بس
الباب يخبط
عباده / دى تانى مره يطلعوا يستعجلونا
خديجه / ما تخلينيش اتكلم بقى مش انا عماله اقولك هنتاخر هنتاخر
عباده / و انا اش عرفنى انك هتقعدى ساعه تعدلى الطرحه
خديجه / يعنى انا السبب يعنى
عباده / اهدى بس كدا وصلى على النبى و حاولى تانى لو ما ظبطتش غيرى العبايه خالص اياكش طرحه التانيه تظبط
خديجه / عليه الصلاه و السلام
خديجه تحاول تلبس الطرحه تانى من الاول و مش راضيه تظبط عباده يتنهد و يقوم يفتح الدولاب و يقلب فى الطرح و يطلع طرحه بيضه تانيه و يديهالها
عباده / شوفى دى يمكن قرفتها تطلع احسن من التانيه
خديجه / ظبطت خلاص
عباده / لا يا شيخه
خديجه / اعترض بقى على اراده ربنا
عباده / و نعم بالله اتفضلى قدامى ساعه و نص بتظبطى الطرحه
خديجه / يلا يا عباده يلا يا حبيبى
عباده ياخدها تحت باطه تضحك و تكتمها
عباده / ما تيجي ما ننزلش و نطنشهم اصلك بتحلوى اوى فى الابيض يا بت
خديجه / وقتك هو يلا بقى يا عباده
عباده / اتفضلى
عباده و خديجه ينزلوا و عباده يقفل الباب وراه
………………
فى الشونه
عبد الله عمال يعد فى فلوس و يكتب فى الدفتر و الرجاله عماله تعبى فى شكاير و تمشى عباس يدخل و معاه عرابى
عباس / انت ما رضيتش تدى للحج فخرانى حصته ليه يا عبد الله
جابر / والله يا سى عباس كنا هنديله بس هو اللى
عبد الله / اسكت يا جابر … انا اتصلت بالكبير و حكيتله اللى حصل قال ان عنده ضيوف دلوقت لما يمشوا هيشوف الموضوع ده بنفسه اى كلام تانى فى الموضوع ده يبقى مع الكبير
عباس / و انك تمد ايدك على راجل قد ابوك دا برده نتكلم فيها مع الكبير
عبد الله / انا ما مديتش ايدي على حد
عرابى / يعنى ابويا كداب
عبد الله / لو قال انى لمسته حتى او حتى رفعت صوتى عليه يبقى اه كداب
عرابى / دا انت ناقص ربايه بقى
عبد الله / راجل تعال ربيني
عباس / انت متفرعن على ايه يا واد انت لتكون فاكر ان خطوبتك لبنت الكبير هتكبرك على الناس
عبد الله / انا كبير لوحدى و مش مستنى حاجه تكبرنى على الاقل ما بصغرش نفسى وسط الناس
عرابى يحاول يمسك فى عبد الله جابر يدخل
جابر / يمين تلاته يا سى عباس ما فى حاجه من اللى اتقالت حصلت و اسال الناس اللى كانت شاهده لو مش مصدقنا
عباس / يعنى عبد الله ما قالش للراجل انه مش هيكلم الكبير و خساره فيه رصيده
عبد الله / قولت
عرابى / يعنى بتعترف
عبد الله / مهو انا كنت هكلمه فعلا لو كان احترم دوره و الناس اللى واقفه لكن لما يرد و يهينى
عرابى / انت هتقلب الترابيزه و تجيب الغلط على ابويا
عبد الله / انا ما خدتش ابوك فى جنب الكلام كان قدام الكل
عباس / مين فيكوا يا رجاله شاف اللى حصل
جابر / ما حدش يا سى عباس اللى حضروا الموقف خدوا حاجتهم و مشيو بس لو عاوز اجبلك اساميهم من الكشوفات
عرابى / هتجيبوا حبايبكوا يشهدوا معاكوا
عبد الله / انت بتقل ادبك على فكره و انا ساكتلك احترام لعباس مع انك لا انت و لا عباس ليكوا حق تحاسبونى اصلا
عباس / ما انت لو فاكر انك لما تغلط
عبد الله / انا ما غلطتش و لتانى مره بقولك الكلام فى اللى حصل مع الكبير و لو سمحت سبنا نخلص الناس دى و نمشيها
عباس / ماشى يا عبد الله الكلام مع الكبير
عباس يشد عرابى
عرابى / يعنى ايه يعنى حق ابويا راح
عباس / امشى يا عرابى دلوقت كلامنا مع الكبير
عرابى يبص لعباس و يبص لعبد الله
عرابى / ماشى يا عباس ماشى يا صاحبى
عرابى يسيب المكان و يمشى
عبد الله / على فكره يا عباس انا كدا بقالى حق عندك
عباس يبصله
عبد الله / مهو مش انا اللى يتقاله خطوبتك من بنت الكبير كبرتك انا عمرى ما كنت صغير
عباس / لا و انت الشهاده لله يا عبد الله كبير من يومك كبير من يوم ما عمامك خطفوا اختك و اتصلت بمختار تعيطله يلحقها
عبد الله يبص لعباس
عبد الله / لو فاكر ان ده يعيبنى تبقى غلطان بس انا مش هزعل منك اصل العيب لما يطلع من اهل العيب ما يبقاش عيب
عباس يضرب عبد الله بوكس يوقعه فى الارض
عباس / فوق ياله و اعرف بتكلم مين مش هتعيل على اخر الزمن يعنى
عبد الله يقوم و ياخد عباس يوقعه فى الارض و ينزل فيه ضرب و يتخانقوا سوا و الرجاله تحوش بينهم
عباس / انت نسيت نفسك ياله … هدفعك تمن اللى عملته ده غالى اوى
عبد الله / وريني نفسك
عباس ينفض نفسه و يزق الناس الملمومه و يمشى
عبد الله / قفل الشونه على كدا جبرت النهرده خلاص
راجل من اللى واقفين / و احنا مالنا يا سى عبد الله
عبد الله / افترا بافترا بقى
عبد الله يقفل الدفتر و يحطه فى الدرج و يقفل الدرج بالمفتاح جابر يطبطب على الراجل
جابر / ما تزعلش هو متعصب دلوقت انما انت عارفه طيب و قلبه ابيض
الراجل / هو احنا لسه هنعرفه النهرده
جابر يقفل الشونه و الناس تتفرق و عبد الله يمشى و هو بيتكلم فى التليفون
…………………………..
فى السرايا
عباده و خديجه ينزلوا عباده سابق خديجه بسلمتين انتصار تشوفهم نازلين تزغرط و الكل يقوم يقف و يسلموا عليهم
عباده / اقسم بالله بقالها ساعه بتظبط فى الطرحه
فاطمه / هاتى البخور و المبخره يا هند من المطبخ اما نبخرهم
هند / حاضر
هند تروح المطبخ
فاطمه / ياختى عليكي وشك نور يا بت و احلويتى
انتصار / من يومها حلوه ياختى
انتصار تحضن خديجه و خديجه مكسوفه جدا
ام مغاورى / عامله ايه يا ست العرايس
خديجه / الحمد لله انا كويسه
هند تطلع معاها المبخره فيها بخور و تديها لفاطمه تبخرهم
فاطمه / حصنتكوا بكلمات الله التامه من شر كل شيطان و هامه و مش شر كل عين لامه
تليفون مختار يرن ياخده فى جنب و يبتكلم
شاكر / طب ايه يا جماعه مش هناكل لقمه و لا ايه سلمنا كتير
انتصار / جاهز ثوانى نغرف … يلا يا بنات يلا على المطبخ يا بنات
الكل يروح المطبخ و ناصر يبص على مختار و يروحله
مختار / تعال السرايا بس و ما لكش دعوه … خلاص يا عبد الله اهدى و تعال
ناصر / لسه حواره مع الفخرانى
مختار / اتخانق مع عباس و ضربوا بعض
ناصر يبص الناحيه التانيه و يرجع يبص لمختار
ناصر / قوله يجي على هنا طوالى
مختار يهز راسه
مختار / ايوه يا عبد الله ناصر بيقولك تعال على هنا … تمام احنا مستنينك
مختار يقفل
مختار / هو فى الطريق اصلا عباس قال كلام كبير اوى يا كبير و هيتحاسب عليه
ناصر / الناس تمشى و نتكلم على رواقه
مختار / اتكلم عن اللى حصل مع هند
ناصر يبصله
مختار / عن اللى عمله معاها عمامها ايام فرحنا
ناصر يهز راسه و يطبطب على كتف مختار ناصر يبص ناحيه الجوارحه مغاورى بينتكلم فى التليفون و بيبص على مختار و عنيهم تيجي فى عنين بعض
ناصر / والله ما عدت عارف هنلاقيها منين و لا منين
…………………………
فى اوضه ماجده
عباس قاعد و ماجده بتمسحله وشه بقطنه بمطهر
عباس / نسى نفسه ابن ال
ماجده / و هو عمل فيك كدا من نفسه يعنى
عباس يبصلها
ماجده / اللى اعرفه ان عبد الله ده واد غلبان و فى حاله و بعدين انت ايه اللى وداك الشونه اصلا
عباس يقوم يقف
عباس / تشكرى يا بنت الجوارحه تشكرى اوى
ماجده / انا لسه ما خلصتش
عباس / روحى طيبى سى عبد الله بتاعك
عباس يجى يطلع من الاوضه تقوم تجرى عليه و تحوشه
ماجده/ هو ضربك فى نافوخك جامد و لا ايه ؟ ايه اللى انت بتقوله ده ؟
عباس / اوعى من وشى يا ماجده ما تخلينيش اتغابى عليكي
ماجده / ما قدرتش على الحمار
عباس يزق ماجده تقع فى الارض تبصله
عباس / انا اللى استاهل ضرب الجزمه انى جيتلك من الاساس
ماجده / ما تجيش هنا تانى بقى
عباس يبصلها و يمشى و يقفل الباب وراه
ماجده / حسبى الله و نعم الوكيل فيك روح ربنا يوريني فيك يوم
ماجده تقوم و تروح تلم الحاجه و هى بتعيط تمسح دموعها و كل شويه تبص على الباب
………………………….
فى مضيفه الزنايته
مختار بيمسح عين عبد الله بقطنه
عبد الله / انا كدا كدا خدت حقى منه
مختار / ضربته ؟
عبد الله / امال يتكلم عن اختى و اسكتله ؟
مختار يلم الحاجه
عبد الله / هو ماله اصلا جاى نافش ريشه و بيقل ادبه بمناسبه ايه مين هو اصلا
مختار / ناصر قاعد مع الحج شاهين اهو بيتكلموا فى المكتب
باب المضيفه يتفتح و مغاورى واقف
مغاورى / اجى و لا ايه ؟
عبد الله يبص الناحيه التانيه
مختار / تعال ادخل
مغاورى / عامل ايه يا عبد الله
عبد الله / زى ما انت شايف
مغاورى / ما انا وصلنى انك خدت حقك وقتها و بزياده كمان
عبد الله يبص لمغاورى و يبص الناحيه التانيه
مغاورى / حقك علينا الكبير بعت لعرابى و عباس و الفخرانى و هيواجهكوا ببعض
عبد الله / ما بعتش لجابر و الرجاله اللى كانت فى الشونه وقتها ليها
مغاورى / بعت ما تقلقش كبيركوا ما بيظلمش حد
عبد الله / تعال اقعد … اجبلك شاى ؟
مغاورى / كتير خيرك شربت جوه
عبد الله / لما تبقى فى مشكله فى الشغل ايه اللى يدخل اختك و خطيبتك فيها يعنى
مغاورى / قله ادب حقك عليا
عبد الله / و بعدين الفخرانى ده راجل كداب ان كان هو و لا الزفت اللى اسمه عرابى و سى عباس ده محموقلهم بمناسبه ايه
مختار / ما قولتلك عرابى يبقى صاحب عباس
عبد الله / اتلم تن.. المتعوس على خايب الرجا
مغاورى يبص لمختار و يضحكوا من غير صوت
………………………
فى المكتب
شاهين / هو حاله ما بقاش عاجب حد خالص و غلبت معاه ما عدتش عارف اعمل ايه دا من يوم ما طلق ماجده و هو بينام فى الجنينه
شاكر / ربنا يهديه و يصلحله الحال
شاهين / بس هو بيحاول يتغير على الاقل بطل روحه الكباريهات و الحتت اللى كان بيروحها دى
عباده / بس دا مش عزر فى اللى عمله و لا اللى قاله لعبد الله يا سيد الناس هى هند دى مش بنتكوا و اللى يمسها يمسكوا يعنى و لا ايه
شاهين / محقوقلكوا و الغلط راكبنا من ساسنا لراسنا بس اعمل ايه فيه قولى و انا اعمل
ناصر / ما تعملش يا حج و ما تشيلش نفسك فوق طاقتها الدنيا صاعبه على الكل الفتره دى و الناس مش طايقه بعضها و بعدين احنا كبار و عارفين نفرق كويس بين اللى غلط و اللى ما لوش ذنب و لا انت و لا اى حد من الجوارحه له دخل باللى حصل
غفير يدخل الكل يبصله
الغفير / الرجاله اللى طلبتها كلها بره يا سى ناصر … بس سى عباس ما رضيش يجي قال اللى عاوزنى يجيلى
الكل يبص لبعضه و شاهين يبص فى الارض و يهز راسه ناصر يقوم الكل يقوم
ناصر / دخلهم المضيفه و خلى الحريم تعملهم شاى و ضيافه و هاتهالنا انت ما تخليش حد من الحريم يجي المضيفه
الغفير / امرك يا كبير
ناصر / يلا يا رجاله
الكل يقوم و يروحوا المضيفه
……………………..
فى فيلا فيرا
فيرا قاعده بتلاعب رشيد شطرنج و فيرا مركزه و رشيد مبتسم اوى
فيرا / انت شاطر اوى فى اللعبه دى
رشيد / انتى اللى مش مركزه يا اما بتستعبطى
فيرا / بستعبط !!!
رشيد / اللعبى اللعبى
واحد يدخل يوشوش فيرا تبتسم اوى
فيرا / ثوانى يا رشيد
فيرا تقوم مع الراجل و تطلع بره و رشيد متابعها ثوانى و يقوم يقف يلاقيها داخله
فيرا / على فين
رشيد / فى حاجه و لا ايه ؟
فيرا / خير … كل خير اقعد اللعب اللعب
رشيد / قولتى هتشغلينى و حوار و لا شوفنا شغل و لا شوفنا حوار انا بدات ازهق
فيرا / خضره و وجه حسن و فلوس عاوز ايه تانى
رشيد / لو كانت العيشه دى بتريحنى كنت عشتها من زمان بس انا ما بعرفش اعيشها بخاف اعيشها اخد عليها ما اعرفش ارجع لنومه البلاط تانى
فيرا / مش هترجع طول ما انت بتشتغل معايا مش هترجع
رشيد / على رايك مهو اللى يشتغل معاكى ما يرجعش للبلاط يرجع على التربه علاطول
فيرا / هههههههههههههههههههههههههه بدات احبك اوى يا رشيد
رشيد / و انا اتحب اقسم بالله ما تفكك من ادواردوا الهلف ده و تركزى مع العبد لله مش يمكن اعجب
فيرا / عاجبنى
رشيد / ما بناخدش منكوا الا الكلام
فيرا / هههههههههههههههههههههههههه اللعب اللعب
رشيد يلعب حركه
رشيد / كش ملك
فيرا تبصله و تبتسم
……………………
فى المضيفه
الرجاله كلها قاعده و عباده مش موجود
الفخرانى / والله ما حصل و لا طلعت من بقي
عرابى / انا اساسا مشيت قبل الخناقه اللى بنقولوا عليها دى و ما قولتلوش يتخانق سى عباس هو اللى جه و احنا بنتكلم
عبد الله / لا والله !!!
الكل يبص لعبد الله عبد الله يبص الناحيه التانيه
ناصر / على العموم انا مش جامعكوا عشان انصبلكوا المشانق انا جامعكوا عشان ابلغكوا بحاجه و الحاضر يعلم الغايب ان كان عباده اتجوز فاللى بعده عبد الله
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
