رواية غلطة عمري الفصل الثاني 2 بقلم بسملة محمود
رواية غلطة عمري الجزء الثاني
رواية غلطة عمري البارت الثاني
رواية غلطة عمري الحلقة الثانية
نور بتفتح عينها بتعب :اه انا فين… انا كنت بحلم ايوا انا كنت بحلم اكيد ده حلم.. بصت حواليها لقت نفسها ف نفس الأوضة
نور بصراخ :لا لا لا… استحالة اللي بيحصل ده مين عمل فيا المقلب البايخ ده نور قامت بسرعة م السرير ولسة هتخرج م الأوضة قابلت ماهر اخوها ف وشها.. نور بفرحة : ماهر الحقني ي ماهر خرجني م هنا ابوس ايدك انا قربت اتجنن
ماهر حاوط كتفها بهدوء :اهدي ي نور ي حبيبتي اهدي وفهميني مالك انا مش لسة سايبك امبارح وكنتي كويسة فيكي اي بس
نور بدموع :ي ماهر انا كنت نايمة ف اوضتي ف بيتنا صحيت لقيتني ف البيت ده اللي معرفش فيه حد وابص ف التاريخ الاقيه 13/11/2022 طب ازاي ده يعني لو انت عامل فيا مقلب قول والله مش هزعل بس كفاية بقا عشان بقا بايخ اوي
ماهر بقلة حيلة: نور انا مش فاهم منك حاجة انتي بتقولي اي يعني اي فجأة مش فاهمة حاجة اومال مين اللي عيد ميلادها كان امبارح وجمعتنا كلنا هنا… ماهر قطع كلامه وبصلها بتحذير : نور لو عاملة الفيلم ده كله عشان الكلمتين اللي قولتيهم امبارح ليا انا وتاليا وبابا وماما ف يريت توفري كلامك عشان ده فيلم رخيص اوي
نور بعدم فهم : فيلم اي وكلام اي انا مش فاهمة حاجة
ماهر قام م مكانه : كدا انا اتأكدت انه فعلا فيلم… بعد كدا ي هانم متكلميش معايا الا لما تبطلي اسلوبك الرخيص ده عشان لو بابا وماما استحملوه انا مش هستحمل انتي مافيش فيكي فايدة بجد… ماهر مشي وساب نور مصدومة مكانها ومش عارفة ترد ومش فاهمة اي حاجة.. قعدت تفتكر اخر لحظاتها امبارح
فلاش باك
نور بنوتة جميلة 20 سنة ف كلية اداب انجلش
شعرها اسود ناعم بس هي قصته لرقبتها عشان عيد ميلادها انهاردا لون عينها عسلي بشرتها بيضا.. قصيرة ودمها خفيف… واقفة ف نص الصالة والفرحة باينه على ملامحها حواليها باباها سعيد ومامتها أميرة واخوها الكبير ماهر وتاليا خطيبته وبنت خالتها وسارة ودول أقرب ناس ليها… وواقف ف ركن بعيد أدهم جارها وحبيب طفولتها بيبصلها بابتسامه وحب وهو شايفها فرحانه بعيد ميلادها ال 20 وبتقضيه وسط الناس اللي بتحبهم
سعيد وهو بيحضنها: كل سنة وانتي طيبة ي نوري وعقبال مليون سنه ي حبيبتي.
نور وهي بتبادله الحضن :وانت طيب ي حبيبي و يرب كل سنة انت وماما معايا.. وحضنت والدتها
ماهر :وانا تالين مالناش أحضان ولا اي
نور بمرح :ليكو طبعا بس الهدايا الاول
ضحكو كلهم وقعدو سوا وقضو وقت لطيف وبعد م اليوم خلص نور دخلت
اوضتها ومسكت هدية أدهم بحب وجريت جابت تليفونها عشان تكلمه جابت رقمه ورنت عليه فتح عليها وهو بيرد بحب : وحشتيني ي نوري
نور بخجل :وانت كمان
أدهم بضحك:طبعا لسة مفتحتيش الهدايا
نور :ولا هدية وحياتك وكلمتك عشان نفتحهم سوا… بقولك اي م تقوم تشغل كاميرا الكومبيوتر ونتكلم فيديو على مسنجر ونفتحهم سوا
أدهم :ماشي ي ستي قومي يلا وانا هرن عليكي عشان تفتحي
قامت نور بسرعة ظبطت شعرها ولبسها وقعدت قدام الكومبيوتر عشان تكلم أدهم…
نور بعد م فتحت الكاميرا :اي ي أدهم شايفني كويس
أدهم وهو بيظبط الكاميرا :ايوة ي نور ي حبيبتي شايفك كويس يلا بقا افتحي هديتي اول حاجة
نور بحماس فتحت البوكس اللي أدهم جابهولها: الله ي أدهم ده الدريس اللي كان نفسي فيه واي الشوكولاته دي كلها دي حلوة اوي ربنا يخليك ليا ي حبيبي
أدهم بحب :ويخليكي ليا ي حبيبتي.. دوري كويس ف البوكس عشان فيه حاجة لسة تحت
نور :مش لاقية حاجة ي أدهم. اصبر كدا فيه بوكس صغير خالص تحت
أدهم :ايوا هو ده افتحيه بقا
نور فتحته لقت خاتم فضة حلو اوي :الله ي أدهم ده تحفة اوي.
أدهم :انتي احلا ع فكرا،،، عقبال م البسك الدهب
نور اتوترت :اه ي حبيبي ان شاء الله..
باك
نور فاقت م شرودها ف اللي حصل امبارح وقامت فجأة: أدهم هو أدهم اللي هيلحقني هو اخر واحد كنت بكلمه امبارح انا لازم اروحله
نزلت نور ووقفت تاكسي بسرعة وادته عنوان بيتها ورقم العمارة
بعد شوية وقت نور كانت وصلت عند بيتها بس استغربت لما لقت المكان اتغير وفيه محلات جديدة فتحت.. بدأت تدور ب عينها على عمارتها هي وادهم بس مش شايفاها… :اي اللي بيحصل ده ازاي كل ده اتغير ف يوم وليلة انا مش فاهمة حاجة..
-نور ازيك ي بنتي عاملة اي
نور لفت بسرعة :طنط سعاد ازيك لو سمحت قوليلي هي فين العمارة بتاعتنا
سعاد بعدم فهم : مالك ي حبيبتي فيه اي م العمارة قدامك اهي
نور بنفي :لا ي طنط عمارتنا كان لونها بيچ ومش نفس الشكل
سعاد بضحك :ياااه الكلام ده من اكتر من 5 سنين ماهو خلاص ي حبيبتي باباكي وصاحب العمارة جددوها وغيرو لونها
نور بصدمة: اكتر م خمس سنين!!! طب طنط هو أدهم فين
سعاد :أدهم نقل م بدري ي حبيبتي.. هو نقل ف المهندسين وعيلته لسة هنا
نور :طب معلش اديني عنوانه ي طنط لو معاكي
سعاد بتطلع الفون بتاعها:ثواني ي حبيبتي انا كاتباه ع الnote اللي ف الفون عشان ميضيعش
نور بضحك :note و فون ده انتي اتطورتي اوي ي طنط سعاد
سعاد :خدي ي حبيبتي اكتبي عندك… المهندسين شارع…. عمارة ….. روحي اسألي بقا انهو شقة عشان انا مروحتلوش ولا مرة ده محمود ابني اللي علطول بيروحله
نور بسرعة :تمام ي طنط سعاد شكرا جدا…. نور طلعت تجري ووقفت تاكسي تاني وادته عنوان أدهم وكلها امل تفهم اي اللي بيحصل ده لان دماغها خلاص مش مستوعبة اللي بيجرالها.. :ي رب عدي اليوم الغريب ده على خير بقا
وصلت نور قدام عمارة أدهم وحاسبت التاكسي ونزلت راحت للبواب :لو سمحت هو استاذ أدهم محمد ساكن ف العمارة دي
البواب : تقصدي أدهم بيه راشد؟
نور بلهفة :ايوة هو ده هو فين بقا
البواب :هو ف شقة 6 الدور الرابع بس خدي بالك هو لسة مرجعش م شركته وساعات بيتاخر اصله الله اكبر عليه عندو سلسلة مطاعم و
كافيهات كبيرة وليها فروع كتيرة ف القاهره
نور بزهق من رغي البواب :تمام تمام هطلع استناه قدام شقته خلاص
البواب لنفسه :اممم شكلها وراها حكاية الست دي انا هتصل ب أدهم بيه اقوله……
نور طلعت وفضلت واقفة قدام شقة أدهم زي م البواب قالها ودماغها عمالة تودي وتجيب فيها وحاسة انها ف كابوس مش راضي يخلص وبتدعي أدهم ييجي بسرعة عشان تفهم منه اي حاجة… عدا ساعة وادهم لسة مجاش.
نور بتعب: اوف ده اتأخر وانا تعبت… انا اروحله شركته دي أسهل واحسن بدل وجع القلب ده… نور قامت ولسة هتضغط عشان تسحب الاسانسير لقته بيتفتح ف وشها..
نور بفرحة :أدهم اخيرا لقيتك… وحضنته بسرعة
أدهم اتخض م وجود نور وقلبه بدا يدق بسرعة.. كمية مشاعر بتهاجمه من رجوعها ليه هو كدب لما قال انه نسيها هو لسة بيحبها حتى بعد اللي عملته
نور اخيرا طلعت م حضنه وكانت بتعيط :انا مش مصدقة نفسي اخيرا لقيتك انا كنت هموت ي أدهم انا مش فاهمة حاجة انا صحيت لقيت نفسي ف بيت غريب ومعرفش انا فين ولقيتهم بيقولو ان احنا ف سنة 2022… طب ازاي ي أدهم انا كنت سهرانه معاك امبارح وكانت كل حاجة كويسة انا فاكرة
أدهم قاطعها بعدم فهم وهدوء : نور اهدي وتعالي ندخل جوا وافهم منك اللي انتي عايزاه
نور بهدوء :ماشي حاضر.. ومسحت دموعها
أدهم فتح باب شقته ودخل ونور دخلت وراه كانت شقة كبيرة اوي ومساحتها واسعة وكل الأثاث اللي فيها مودرن وشيك رغم بساطته.. لفت انتباهها ان فيه سلم ده معناه ان الشقة دورين.. لفت بسرعة لادهم اللي لسة واقف عند الباب واتخضت م شكله كأنها لسة واخده بالها منه… شكله اتغير بقا أطول وجسمه رياضي وعنده عضلات ملامحه باين عليها الهدوء على غير العادة بس لسة زي م هو وسيم.. لا ده بقا اوسم… أدهم بشرته خمرية عينه لونها عسلي.. جار نور وحب طفولتها معاها ف نفس الكلية بس أكبر منها ب سنتين هي اصلا دخلت نفس كليته م حبها فيه.. نور فاقت على صوته :هتفضلي بصالي كدا كتير
نور بحب :بحب ابصلك ي أدهم بس مبقتش فاهمة حاجة
أدهم اتوتر من كلامها وبص ناحية المطبخ: ثواني هعملك حاجة تشربيها.
نور بانفعال :لا ي أدهم مش عايزة فهمني ايه الي حصل وازاي كنت معاك امبارح ف عيد ميلادي وبكلمك ع الكومبيوتر ف اوضتي واصحى الاقيني ف بيت معرفوش مع واحدة معرفهاش وانت شكلك اتغير وعمارتنا اتغيرت حتى شعري طول وانا قصيته اول امبارح عشان عيد ميلادي
أدهم :طب اهدي كده وفهميني انهاردا كام ف الشهر…
نور: مكتوب ف البتاع اللي انا ماسكاه ده 13/11/2022 وانا مش لاقية اي نتيجة اشوف فيها التاريخ المظبوظ
أدهم بيضيق عينه: ليه ي نور هو امبارح اللي بتقولي عليه ده كان كام
نور :انت نسيت امبارح كان 12/11 عيد ميلادي
أدهم :يهني فين المشكلة ي نور امبارح كان 11 وانهاردا 12 انتي عاملة مشكلة ليه هو فيه رقم بينهم يعني!!!
نور بزعيق :لا بقا متجننيش امبارح كان 13/11/2015ازاي اصحي الاقي اننا ف 2022
أدهم :نعم ياختي؟!!! امبارح كان كام.. نور انتي جرا ل مخك حاجة؟
نور بعياط :ي أدهم والله ده اللي حصل نمت بعد م كلمتني صحيت لقيتني ف بيت غريب واغمى عليا وماهر جه ومشي وسابني وقال عليا بتاعت افلام وانا مش بتاعت افلام ي أدهم والله… نور بدأت تعيط بعنف لأنها حاسة انها ف كابوس مش قادرة تخرج منه ومحدش م اللي تعرفه بيساعدها
أدهم صعبت عليه نور وقلبه وجعه على عياطها :لسة بعد اللي عملته فيا بحنلها واتوجع عليها…. أدهم قرب منها وطبطب عليها :اهدي ي نور انا هساعدك متقلقيش انا معاكي… وطلع فونه ورن على سارة صاحبة نور ودي تبقا دكتورة مخ واعصاب وقالها تيجي على شقته وان نور عنده… وقام عمل ل نور لمون عشان تهدأ… بعد ربع ساعة كانت سارة جات بسرعة وادهم فتحلها: نور فين ي أدهم… نور حبيبتي انتي كويسة
نور كانت قاعدة ع الكنبة بتعيط ومبتردش
سارة :نور حبيبتي فهميني اي حصل معاكي عشان اقدر اساعدك
نور حكتلها اللي حصل معاها قدام أدهم وانها اخر حاجة فاكراها كان امبارح.
سارة بحذر :طب انتي عندك كام سنةي نور ؟
نور :20 سنة اي السؤال ده
سارة بهدوء: نور انتي معندكيش 20 سنة انتي سنك 27 سنة وامبارح كان فعلا عيد ميلادك ال 27 وانتي كبيرة وعايشة ف شقة لوحدك ف التجمع وبتشتغلي وتصرفي على نفسك والواضح ان عندك فقدان ذاكرة مؤقت ل مرحلة عمرية معينه خلاكي تنسى أحداث السبع سنين اللي فاتو
نور اتصدمت م كلامها و…..
يتبع…
لقراءة الفصل التالي : اضغط هنا
الرواية كاملة اضغط على : (رواية غلطة عمري)
