رواية كحل عرب الحلقة الحادية والسبعون 71 للكاتبة زينب ماجد

( طلب زواج ) 

لا تحتار 

الحيره مـرض والماي من ايحير

يبهت زراگه ويتناوشه الزنجار

– عريان السيد خلف

راديون : نايمة نفسة وايمان احذاي اداريني ، مسيجينة لا خلت بيت لا طبخ كلشي هي شالته عني ، انامن والجاهل يظل عدها اداريه وتسهر علي و جسام ينام بالدوانية غاد . 

ليما اجو اهلي و اندكت الباب .. وسمعت حس اسرحان يسلم وامي تحج ويا جسام و تكله: جا راديون وينها 

– جوا فوتو فوتو 

دخلو علي انا كمت لحيلي سلمت عليها وعلى عمتي ردحة  ، : شلونج شلون صحتج 

– على الله امونه ما هدتني خطية النهار كله مجابلتني 

عاينتلها و كالت : يطيها العافية 

ظلن كاعدات يمي و سرحان و جسام بالدوانية .. كامت مرت سرحان و مرت زناد ويا ايمان خاطر يزهبن الغدا .. 

وامي و عمتي مجابلاتني 

سرحان : شني ما شني 

– والله يابو مأمون اعلى حطت ايدك .. من الشغل للبيت ومن البيت للشغل. 

– هاي الدنيا بعد .. شني حاكم كعد وياك 

– اي والله جاب مريته و كعدها فوك جا وين يروح 

– الله يطيك العافية هم شلت عنه المكرود ما يعرف منين يندار ، مرته غاد ام ستار مريضة ، وعايلته منا .. واستشهاد ابنه هد حيله 

– الله يعينه ، انت كلت اله يتسرح و يشتغل بالمعمل 

– اي 

سكت ، سرحان عرف سكتت جسام شني : اسمع خوية انا ما مشغلك بالمعمل موش انك من ال ثجيل ومستنكف لا بالعباس ولا ابالي هالسالفة وانت حسبة اخوي، لجن انا ما رايد اتوهدن ويا ابوك من كون يو عرف انا عاينك اعلى عصيانة يذب السالفة اعلينا ويسويها دكت عشاير وانا مالي خلك طلايب . 

جسام : الله كريم جا هو ما وهدن حالي غير ابوي . 

ظل سرحان و العايلة عد بيت جسام يوم واحد وثاني يوم اخذهن ورجع للسماوة ، هاطر لا يطول ويجيب الشبهة لبيت جسام . 

مشت الأيام … و خنجر يحاول يكتم اللي بداخلة و يحس ان هو ما يناسب هاي اللي كانت بالأمس طفلة و اليوم هي شابة و تحبه و تغار عليه ، شلون يتأقلم ويا بنت جان يدزها حتى يعرف اخبار حبيبته .. تالي تكبر ويحبيها .. شكد ما يحاول يبعد نفسه و يتجاهل ، للحظة ما و بموقف صغير يرجع لنقطة الصفر و كأنه ما حاول. 

اما جمارة فما كانت تشوف غيره .. حاولت تخليه يميل الها بس هو ملتزم بسكوته .. هذا السكوت اللي خلها تضجر .. كان من المفترض تصبر و تسكت الى ان يقرر الميلان والرضى بحبها لكن صغر سنها اللي يحتم عليها التسرع و الأستعجال كعادة طبيعية للمراهقين خلاها تختار الطريق الأسرع لجذب قلبه قبل نظره.   

لما شافت من خنجر البرود و السكوت ..لعبت بالنار و قررت تثيره . 

طلعت من المدرسة خنجر متانيها ليغاد ، هي تجاهلت ومشت للمكتبة اللي جدام .. خنجر ظل يعاين من ابعيد منين مشت ، ظل يربي ليها.   

شاف حيدرة مشى للمكتبة اللي هي بيها ..

جمارة : شرايد مني 

حيدرة :- كلت الج بس احجي وياج 

– احجي بساع وامش 

– انا رايدج اعلى سنة الله ورسولة و مستعد اسوي كلشي تريدينه.   

دش خنجر وطكاه اعلى ظهره و كض قميصه : شعدك هنا 

– ميل ايدك 

– اجفيني شرك و اجفيك شري لا بعلي هنا اكصبنك ، امش ياله.  

ادخل صاحب المكتبة وانا طلعت بساع ، هيسيت مصيبة راح اطيح اعلى راسي من عيون خنجر اليخوزرن .. اول ما وصلت باب السيارة كضيته طلع هو .. ومستعجل جاي صوبي .. ركبت بساع و صكيت الباب اجا صعد و ضرب باب السيارة حييييل ، و اندار علي : شعدج واكفة وياااااه ولج. 

– ما وكفت رحت اشتري كتاب 

– كتاب يو تحجين وياااااااه  ، جدامج غشيم و اتجذبين علي.  

– انا ما مجذبة عليك مشيت اشتري و هو اجا يحجي وياي و حجيت وياه 

– هااااه وتحجيها بفخر حجيت وياااااه

– اي جا ليش شني مسوية جريمة الزلمة جاي يكلي رايدج اعلى سنة الله ورسولة.  

– هاااااه و انت رايدته لهالجلب 

– الجلب وفي احسن من هواي ناس 

اندار و هو يغلط و يفشر و يصيح ، وينعل بروحه ويشتمني .. سكتت ما رديت عليه وكف اباب مدرسة ياسر و نزل و هو يكول : مطي ابن مطي اليأمن الوحدة . 

ظليت اعاين ليه واكف و موجرة اعصابة ، مدري شمالني شو كيفت ، عبنه حس اعلى روحه و كام يضوج و يغار .. نزلت من السيارة بساع اندار و كال : وين 

– بس اشتري من هاذ الدكان وعلي جوعانة 

– دشي انا اجيب 

مشى عصبي وانا ظليت اعاين ليه .. 

راح جاب لفة لبلبي وبيها عنبة : انا ما اريدن لفة كلت اشتريلي توتو 

– دهاج هاج ازقنبي ولا تظلين توتوتين.  

خذيتها منه ورديت للسيارة و هو رد كعد وصك الباب، انا صكد جوعانة و الصمونة حارة وريحة اللبلبي و العنبة طكت براسي ما اهيس بروحي الا ماكله تلث ارباعها .. شلت راسي ولنه يعاينلي 

استحيت و كتله : وعلي جوعانة 

– اكليييي جا انا كاضج 

– اي جا معاينتك هاي خلت الزاد يوكف بزردومي. 

تبسم و دار عني ، كملت اللفة كلها شو هاذ كام يفتح بالجامات .. ولو صكد ريحة السيارة صارت بس عنبة و اديه تعط .. 

حجه : حيدرة لا تتكربين منه بعد حتى يو حجه وياج .. لا تحجين 

– عليش 

– بوية جاي اكللج لا تحجيييين 

– عمي انا ما حاجيه هو يمش وراي ويكلي اريد اخطبنج 

– جذاب كلاوجي مالج غرض بيه 

– انت تكول عليه جذاب و هو يكول عليك جذاب وتهنا. 

– يكول عني عليش انت شمسولفتله علي خاطر يكلج جذاب 

– ما مسولفتله شي . 

جاي نحجي اجا ياسر وصعد بالسيارة سلم وكال : ريحة عنبة 

– اليوم المفجوعة ترستنا عنبة  

– اشتهيت كلش جوعان، منين جبتي 

– من ذيج للمرة الكاعدة غاد 

راد ينزل كتله : وحدة وياك ياسر 

خنجر :- ولج مرة انت يو شنهي ؟ 

– عمي جوعانة 

– ولج لبلبي هاذ ينفخج 

– لا تجي عمي ما اريدن . 

ظل يضحك .. و كال جيب الها ، جاب بس استحيت اكلها ، ليما رديت للبيت كبل لا انزل كال : السالفة الكتلج عليها بعد لا تعيدينها.  

ضحكت و نزلت .. ظليت طايرة بروحي … 

عشت يومي وانا اتخايله ، لجن ثاني يوم من داوميت هم صاد وجهه عني .. وما يعاين ليه . 

كلت للمدرسة على اجازة .. خاطر نمش انا وامي واهديوة لگبر ستار نزوره ، بس نسوانه يظلن بالبيت عبن كاضات عدة.  

بس انا من صعدت بالسيارة كتله : عمي بعد لا تجيني باجر 

– عليش ؟ .. موش دوام 

– اي بس انا ما اداوم 

– عليش ما اداومين ؟ 

– هيج شغلة خاصة بيه عمي . 

ظل يعاينلي: هكو  شي 

– لا عمي ، بس هكو ناس جايين يحجون بيه ولزوم اركد بالبيت . 

– يحجون بيج شنهي اخوج ميت موش مالت خطبة و هالسوالف انتم ما استحون 

– عمي لا صفكة ولا هلهولة هي حجوة ويمشون 

– بعلي ما تستحون خايبين شهيد عدكم يو راس باجه .  غير تحترمون مصابة .

– عمي الا اكلك احنا حالتنا صعبة من كون ابوي عزل ابغداد و هو بالعسكرية و امي مريضة و ناكل ما نتعشى ، ما اريدن اظلن عالة اعلى اهلي ، اعلى اقل اخفف عنهم و اعرس عمي .

– من عمى العماج وموت الخذاج من ساعة الصعدتي وانت متوليتني عمي ما عمي شني هاز كاروكج انا ولج.  

– عمي انت والله ما تفهم . 

– لذا حيدرة نهري لا تتورطين بيه.  

– جا بعد ما اكدر لزوم اخفف اعلى اهلي.  

– ولج شني زايدة و تخففين ..

– جا بعد شسوي . 

ظل كاعد اعلى جمر .. ليما وصلاني وهو يوصي بيه ما اوفك .. وانا اكلله ما اكدر .. ثاني يوم غبشنا للنجف وابوي بالعسكرية موش ويانا .. زرنا الكبر و بجينا و كعدنا حذاه و تعاتبينا و امي غدت تراب ، كوة جريناها من الكبر خاطر لا اتطيح ونبتلش بيها ، رحنا كعدنا بالامير رتعنا شواي وزرنا و امي اشترت النا دجاجة مشوية بثواب ستار وفرشنا علاكة بضريح الأمام وكعدنا نتعشى ، شالت نص من الدجاجة ضمتها لبنات ستار ياكلنها .. 

ردينا ثاني يوم الفجر .. وصلنا للبيت الساعة ٦ ونص .. ردت انامن بس بالي كله ويخنجر وافكر شيفكر هساه .. ما نمت لبست هدومي و طلعت للشارع العام خاطر اتنطره من كون انا كايلتله ما اداوم اليوم بس اذا مر وشافني يوكف  ، بس حيدرة مدري جنه مراقبني اجا وظل يذربن براسي ، شما ابعد عنه وما احجي هو يهربد ويحجي .

صكد و مر خنجر بالسيارة ما جان حاط اعلى اباله اداوم ، تفاجئ من شافني ، وكف السيارة بساع.  راد ينزل لحيدرة ، بس حيدرة مشى لسيارته وكف يغلط عليه و يصيح.  

وصلاني و هو يحجي : انت موش ما اداومين اليوم ، شعدج داومتي 

– عدي امتحان 

– من يمتى عدج موش كلتي بعد ما اجي 

ما رديت هو ظل يحترك و يطفى لوحيدة ، وصلت للمدرسة داومت و طلعت ، لكيته بالباب يدخن تتن ، من شافني ذب من ايده و وكف نافش اديه وفاردهن بوكفت شقاوجية … وصلت ليه و كال : خطبج موش يو لالة 

– ياهو ؟ 

– النكس الواكفة وياه الصبح 

– عمي لا يروح احد يسمعك دصعد 

– ولج عمي لا تكولين ، اركع راسج ترا . 

تبسمت ، هو عصب بزايد مشى للسيارة و صعد و اندار يحجي : اسمعي لج ، عرس ما تعرسين ويو عرفت موافكة اعلى حويدر وعلي الا جيلة براسح و براسه 

– انت شمالك 

– انا مسودن وعكل ما براسي زيييين 

سكتت و رد حجه : اسمعي لج انا زلمة ما احب اهربد بالحجي واخذ واطي و شغلي حار بحار .. الله ورطني و خلاني احبنج و عليه انا باجر اجيبن نسوان و اخطبج ويو ما وافكوا اهلج ، ارش تيزاب و احركج انت و البيت افتهمتي.  

تبسمت : وحدة وحدة … انا ما فهمت 

– صماخج هالكبرة يفهم بكلشي من حجيت هالحجايتين نا فهمتي ، جاي اكلج انا رايدج 

– اكلك انت عاشك يو جاي تاخذ مني خاوة ، مو هيج 

– انا هيج يعجبج يعجبج ما يعجبج ركعي راسج بسبع حيطان 

– هلووو

– هاي الهلو ما تنكالي ، احرك ابوك فوك راسج يو كلتيها 

– جا ما موافكة 

– غير احركج والعباس . 

ضحكت بس هو من كل عقلة عصبي … حجيت : جا تعال والله كريم 

– يعني موافكة 

– تبسمت 

– بس سمعي ها .. انا واحد عركجي و شما ابطل اردن اشرب .. شغل ما عدي غير اوصل ياسر وسرحان يطيني ، فكري دينار ما بجيبي ..

– جا انا ما اريدن فلوس 

– لا بس انا موش دثو و اهدن عايلتي بلا اچل ، عودن منا وهيج راح اشتغل واكدن خاطر اجمع المهر ، و الحجرة اصبغنها ، ومن هسه اكلج غرفة اخشاب ما اجيبن.   

– اكلك هاي خطبة يو منية .. شني ؟ 

– هاذ العدي 

– جا ما اريدك 

– اكسر فجج غير . 

ظليت اضحك ، هو ها فك شوية و تبسم بس بعد العكر بكصته و حواجبة طابكات . 

رديت للبيت وانا طايرة من الفرح .. ما اعرف المن احجي ، بودي اصرخ و اخلي العالم كلها تعرف خنيجر راح يخطبني … 

سبحت و فكيت شعري و اتغنج جدام المرايا واضحك و اتخايلة جدامي واغني ( انا البي دليلي الي هتحبي و هو ديما يحكيلي ………) دشت علي هدوة 

– خايبة شنهي تسودنتي 

– شني ؟ 

– تفمين واخونا اترابه اخضر 

– من عبن انا فرحانه يهدوة فرحاااااانه

– اللي يديم الافراح يالله هلبت تفرحينا وياج ..

– خنجر كالي انا احبنج ورايد اخطبنج من اهلج 

– صكدددد 

– اي والله 

– يا رحمتك ربي هيج و يكعد بختج موش مثلي يجميرة .. وعلي فرحتيني ، يعني راح يخطبج 

– بس يكلي ما ابطل عرك ، شتكولين ابوي يوافك .

– والله شكلج ، خل وحيدة من اهيلته تمر تحاجي امي وبعدين نعرف شنهي الحجي.  

– جا خوش . 

انا عدالي يوم يومين ويودي بس بنفس اليوم ونعله عمته تمر على امي وتكعد وياها ، بالاول واستها اعلى اخوي … انا لبست ثوب لسود ومشطت شعري و عدلت روحي وكدمت ليها الجاي وكعدت يم امي وهي تواسي بيها.  

اندارتلي و هي تكلي : شكثر عمرج ؟ 

– ١٤ 

– يا صلاوات اعلى محمد … ام ستار تطينها يو لاله.  

– لا والله يدية رايدتها يصير براسها خير موش مثلي و مثل اختها حظ مايل وما كاعد ويا احد . 

– وان جان موش وكته لجن انا دازيني اعليها وحيد 

– ياهو هاذ ؟ 

– واحد رايدها اعلى سنة الله ورسولة 

– جا غير اعرفنه و اكلج 

– خنجر 

– خنجر ابو الخاوات 

– دية بطل من زمان والزلمة هساه كبر ويريد يستقر ورايد بت حلال و كالي اعليها خاطر اخطبنها اله 

– لا دية جرح اخوها بعده اخضر و هي تدرس ما اريدن اوهدنها بعرس 

– جا هو موش ياخذها و يردها 

– انا يو اعرف حاط عينه اعليها ما اخليها.   لجن ما اعرف بهالسالفة 

– جا هو قابل عينه نجسة ورايدها بغوى الزلمة رايدها بحلال عليش تمانعين 

– جثيرين الرادوها يديه ورفضت انا نوش انكص منه حرام زلمه ونشمي و عسنج بس تنخينه بس العرس ثكيل و هي عدها امال و تريد توصل وانا انهد حيلي عليها اجيبن واودي بس خاطر اخليها توصل وتالي هالتعب اطيها .. عليش . 

حجت امي و كرصتني بحركه خاطر اكومن ، كمت بساع و ظلن هن يحجن ليما راحت .. 

كامت وفاتت علي للحجرة ، معبسة ووجهه ما يبشر بخير ، بلعت ريكي ساعة الشفتها .. حجت : شعدج وي خنيجر ولج

– يمه شسمه ، يعني شعدي ما عدي شي 

– الحجي هاذ علي يجميرة 

– لا يمه يس 

هدية : دام رايدها بالحلال عليش ما تطيها يمه 

– تصمين حلكج و تسكتين عبن مامش غيرج مساندها اعلى هالفعايل الردية … شجاي تتملعبن من وراي ، شفتني طحت وانكسرت اعلى اخوجن و اتملعبتن بكفاي يالبرابيك 

هدية : يمه شلعبنا وعلي مامش شي ، كل للسالفة رايدها و هي رايدتها 

– اي هاذ الحجي جا كولي كوا….ة صايرة من وراي. 

– لا يمه و علي موش عيج 

– اسمعي ولج روحه و يهالردي بعد مامش ، امري لله اكومن اعلى حيلي واوصلنج .. من كون انتن بنات حويكم ما تنطن مجال بس اطيحن تغافلني و اطينن راسي 

– ياع يمه يمتى مطينين راسج 

– اسكتي ولا حجاية ، ما اسمع 

ظلت ترزل وانا ما حجيت ابد يس هديوة تردها ..  ثاني يوم هي خذتني ، خنجر اجاها و تكدم ليها و كايل الها .. انا رايدها وظل يحجي وياها ، رزلته و طردتها و كالتله : يو كربت منها اروحن اشجي للشيخ سرحان و اسويها جبيرة .

بس بعد هالخطبة خنجر تعلك بجمارة و هي زادت بعشكها ليه .. كاموا عشكهم يحجونه بالنضرات من ابعيد لبعيد . 

مشت الأيام .. 

وتسرح حاكم من الجيش .. واشتغل ابغداد وراتبه زين ، بس كل شهر يجي للشماوة ١٠ ايام .. و باكي ايامه غاد . 

مرت سرحان جابت بنية و سرحان فرح بيها جثير وسماها ( شيماء ) بس فخرية ضاجت جانت تتمناها ولد ، الا سرحان طاير بيها وولده يحبحبون بيها . 

راديون اعلى الأربعين مالت ابنها و حبلت فوكاه … 

وايمان هم حبلت مرت الأخرى على بتها الجابتها نهاد . 

الا ما بيوم .. نعمة عرف مكان جسام اللي يشتغل بيه 

راقباه و عرف بيته وين صاير ، ما اجاله ولا تكرب منه ؤاح لابوه و شاوره .. 

كاله : ادش عليه و تكضه تسلسله و تجيبه ليه وانا اتفاهم وياه.  

بالليل وجفتوا اعليه للبيت 

جان نايم هو و مرته وابنه و بت كريم وياهم 

جفتوا اعلى البيت بلا احم ولا دستور ، ٦ من اخوتها داهموا البيت كله ، فز هو ويا ما جاي يطلع ، ويدفره نعمة ركلة اعلى ظهرة كطع نفسه و طاحو اعليه كلهم تولوه جتل ليما فقد .. سلسلوه و شالوه وياهم…