رواية ما وراء القضبان الفصل السادس 6 بقلم رانيا سامي
 |
| رواية ما وراء القضبان الفصل السادس 6 بقلم رانيا سامي |
رواية ما وراء القضبان الفصل السادس 6 بقلم رانيا سامي
_ ازاى حبيته ؟ ازاى عيشت كل السنين دى مخدوعه فيه حتى بعد مااتجوزتك كنت لسه بحبه وكنت بكررلك الف مره انى مش هديلك حتى مساحه فى قلبى عشان هو فيه ؟ ازاى خدعنى وضحك عليا بالشكل ده ؟ ازاى معرفتش أكشفه على حقيقته ، ورجعت بصتله صدقنى انا عارفه انى مذنبه واستاهل الدبح بس انا معملتش كده غير من ثقتى وحبى فيه وانه هيتجوزنى فعلا وكان مفهمنى انه بيسعى عشان يحضر مبلغ وييجى يخطبنى ونعمل خطوبه ونتجوز فى اسرع وقت ، أزاى يعمل فيا كل ده ولييييه ليييييه !!
.. رانيا أهدى أرجوكى يارانيا متعمليش فى نفسك كده انا مش هتحمل أشوفك كده اللى حصل حصل مفيش حاجه هتمحى اللى فات وصدقينى انا دبرتله خطه بعد ماخدت النسخ اللى معاه وجبته هو والعيال اللى معاه خليت كاميرا الكافيه تصورهم وتسجلهم وسجلتلهم انا كمان وكنت مكلم البوليس قبلها وجه قبض عليهم ومأجر محامى يجبلى أقصى عقوبه ليهم وخلصت من حواره ده من شهر تقريبا والقضيه لسه شغاله
_ انا مستاهلش ، مستاهلش كل اللى انت عملته عشانى ده ياريتك اول ماعرفت كنت ضربتنى بالنار او عملت فيا اى حاجه تنهى حياتى ولا انى ادخل حياتك اخربها واعذبك بالشكل ده ومن الناحيه التانيه مكونتش عرفت الحقيقه اللى حاسه انى بموت بالبطئ من دلوقت من ساعه ماعرفتها
.. مد أيديه ، تعالى أتعدلى
_ قومت براحه واتعدلت ، قعد قصادى ومسك ايدى ممكن تسيبى كل حاجه على جنب دلوقت المهم سلامتك متتكلميش فى أى حاجه تانيه
_ هزيت راسى ، حاضر
_ خدنى معاك النهارده يا بابا
.. أحمد بصلى بأستغراب ، ليه يارانيا ؟
_ معلش يااحمد بس حابه أبات عند بابا النهارده
.. طيب هبات معاكى
_ لا عاوزة أبات لوحدى معلش
.. خليها على راحتها ياابنى وبكره هجبهالك
_ طيب ياعمى هوصلكم وأروح
.. طيب ياحبيبى
_ طول الطريق بيبصلى فى مرايه العربيه وكل ماتيجى عينى فى عينه أوطى راسى ، انا عينى اتكسرت أوى وضهرى أتقطم انا ازاى فى حياتى راجل زى احمد وبابا بعد ماعرفو غلطى أحتوونى لدرجه انى كنت حاسه دايما انى فى سجن من كتر ماهما محاوطين عليا أنا أزاى وحشه كده ؟ أزاى غلطت غلط كبير زى ده بدون ماأحس ؟
_ أعمل أيه دلوقت ؟ يارب أنا تايهه
_ بعد ماوصلنا ونزلنا من العربيه
.. تصبح على خير ياابنى
_ وانت من اهل الخير ياعمى
مشيت جنب بابا من غير مااتكلم
.. رانيا أستنى
_ وقفت مكانى ، أطلع انت يا بابا وانا هاجى وراك
.. ماشى ياحبيبتى
_ بصتله ، ايوة يااحمد
.. مالك بتفكرى فى أيه ؟
_ رفعت أكتافى ، ولا حاجه
.. متأكده ؟
_ أيوة
.. خايف عليكى
_ من أيه بالظبط ؟
.. خايف عليكى منك من تفكيرك
_ لا متخافش عليا انا هبقى كويسه أتطمن مهما عملت مش هعرف أصلح اللى حصل
.. المهم اللى جاى يارانيا خلينا في اللى جاى
_ هزيت راسى ، حاضر
.. هستناكى بكره
_ ان شاء الله ، تصبح على خير
.. وانتى من اهل الخير
.. أكله خفيفه كده قولت احضرها بقالنا كتير مكلناش مع بعض
_ تسلم ايدك يابابا مكانش ليه لزوم تتعب نفسك
.. ولا تعب ولا حاجه يلا مدى أيدك
_ قطعت لقمه وبدأت اكل ، بابا ممكن أسألك سؤال ؟
.. أسألى
_ ليه ؟ ليه خبيت عليا الحقيقه طول السنين دى ؟
.. بلع اللقمه وخد رشفه مايه ، عشان متعمليش فى نفسك اللى عملتيه ده وبعدين مالوش لزوم نفتح فى جرح قديم
_ ارجوك يابابا أنا عاوزة أعرف لازم أعرف كل حاجه ارجوك واتنهدت ، ريحنى وقولى ابوس أيدك
.. طيب أهدى هقولك حاضر ، عاوزة تعرفى ايه بالظبط ؟
_ محمد لما جه اتقدملى قالك ايه بالظبط ؟
.. كان جاى عامل نفسه ابن ناس ومحترم لحد مااتناقشنا فى الجد ف بدأ يستهزأ بيا ويقل منك قدامى لما سألته لو وافقت عليه هيجبلك أيه ك دهب وهيعيشك فين
قال أخرى معاها دبله وهعيشها فى ايجار انا مش هشترى شقه لانى مش حمل تكاليفها
قولتله بس بنتى مش قليله كده عشان تعيشها فى أيجار وتتشحطط ولا عشان تجبلها دبله وخلاص مع انك يعنى ياابنى فى بدايه الكلام قولت انك كونت نفسك وربنا فرجها عليك من وسع
قالى هو ده اللى عندى وبعدين بنتك ماشيه معايا اصلا وعارفه ظروفى كويس وراضيه اطلع منها أنت
انا ساعتها كأن حد دلق على راسى مايه نار مكونتش عارف ارد أقول أيه غير لقيتنى بشتمه قالى انت راجل متربتش صحيح راجل اخلاقه كده هيطلع بنته اخلاقها عامله أزاى ولما اتخانقت معاه أكتر على قله أدبه وانى مستحيل اوافق على واحد دنئ وقليل الأدب زيه قالى انا اللى قليل الادب برضوه ؟ انت اخر واحد تتكلم عن الأدب روح ربى بنتك احسن اللى كشفتلى جسمها وخرجت معايا ده انتو عيله زباله كلكم وخرج
.. ساعتها قلبى كان هيوقف بس حاولت اتماسك على قد مااقدر لو فاكره يوميها خدت فونك هو وخطك ومنعت نفسى بالعافيه انى اضربك وأئذيكى بأى شكل لأنى مكونتش عارف ممكن عصبيتى توصلنى اعمل فيكى أيه ساعتها لو تفتكرى دخلت الاوضه وقفلت على نفسى وكلمت أحمد أبن عمك يجيلى
* فلاش باااك *
.. احمد ؟ انت فين ياابنى ؟
_ انا مروح البيت ياعمى فيه حاجه ولا ايه ؟
.. ألحقنى انا فى مصيبه تعالى البيت عندى بسرعه
_ مصيبه أيه ياعمى فهمنى ؟
.. تعالى بس وهفهمك كل حاجه لما تيجى
_ حاضر انا جاى أهوه مسافه السكه
.. مستنيك
_ أيه ياعمى حصل ايه؟
.. اقعد ياابنى هفهمك كل حاجه
وبدأ يحكيله كل حاجه
_ يانهار اسود !!! هو قالك كده ؟
.. أيوة انا مش عارف اعمل ايه انا خايف يفضحها وانا راجل عجوز ياابنى مش عارف احميها منه ازاى ومش عارف اوقفه عند حده ازاى دماغى واقفه وحايش نفسى بالعافيه عنها عشان كده طلبتك انا بعتبرك ابنى وسندى تشوف معايا حل
_ متقلقش ياعمى سيب الموضوع ده عليا
.. انا مش عاوز رانيا تعرف حاجه لو عرفت هتموت فيها هى بنت كلب غلطانه وعاوزه الدبح بس هى اللى حيلتى فى الدنيا بعد امها وانا عارف انه ضحك على عقلها وعشمها انا مش عارف اعمل ايه ياابنى والله حاسس ان هيجرالى حاجه
_ اهدى ياعمى رانيا مش هتعرف حاجه ولا الواد ده هيتعرضلها تانى خالص وعد منى ومن دلوقت بقولك اتطمن رانيا بقت امانه معايا ، بصراحه يعنى انا عايز اتجوزها ياعمى
.. تتجوزها ؟!!!
_ أيوة
.. سكت ، ورجع قال بعد ماعرفت اللى حصل
_ انا عارف رانيا كويس هى انضحك عليها لانها طيبه بسذاجه بس انا بحبها من زمان ياعمى وكنت هطلبها منك بس الولد ده سبقنى على مااظن دلوقت مفيش عائق انا عاوز اتجوزها وهحميها على قد مااقدر
.. بس رانيا مش هتوافق يااحمد دى عنيده ودماغها عاوزة الكسر وبتحب الواد ده
_ وادينا عرفنا نوايا الواد ده ايه يكسر عنادها ده ياعمى ؟
.. سكت شويه ، اننا نكون قاسيين عليها ونعاملها بالأجبار عشان تتقبل الجواز منك وتنسى موضوع ان ممكن يكون فيه حاجه تربطها بالواد ده
_ بس هتكرهنى ياعمى
.. انت شد وارخى شد وارخى لحد ماتتقبل الوضع
_ حاضر
.. انا مش عارف اقولك ايه يااحمد ياابنى
_ متقولش حاجه ياعمى اهم حاجه تشوف طريقه تقولها بيها انى هتجوزها وانك رافض الشاب ده
.. حاضر سيب الموضوع ده عليا
_ تمام
* باااااك *
.. أدى ياستى كل اللى حصل
كفايه عياط يابنتى روحك هتروح
_ حضنته ، انت اتعذبت بسببى اوى كده يابابا ؟ أنا اسفه أسفه بجد انا أستاهل الموت والله العظيم انا خساره فيا اكون بنت راجل زيك انا خليت كلب حيوان قذر زى ده يتطاول عليك ويقلل منك سامحنى يابابا والله ضحك عليا انا مكونتش عارفه عقلى فين ساعتها بس سامحنى بالله عليك ابوس رجلك
.. خلاص ياحبيبتى اللى فات فات ، وجزء من غلطك انا السبب فيه برضوة انا اللى معرفتش أحتويكى بعد موت أمك ولا صاحبتك ولا كنت مهتم بيكى وبتحركاتك انا أسف برضوة ياحبيبتى
_ حضنته أكتر ، انا اللى اسفه مع ان ولا مليون أسف يغفرولى انت واحمد عانيتو بسببى أووى
.. طبطب عليا ، اللى فات مات المهم دلوقت احمد قالى انك اديتى للعلاقه دى فرصه جديده أبدأو من جديد وانسو اللى فات احمد الوحيد اللى جدير بيكى وبيحبك ويستاهل فعلا تحبيه
بصى متفكريش فى حاجه نامى دلوقت وبكره ربك يحلها
_ هزيت راسى ، حاضر
غطانى وشال الأكل وقفل النور والباب
_ مبقتش عارفه أعتذر لأحمد أزاى او ايه ممكن يغفرلى الذنب الكبير اللى أرتكبته فى حقه ، حطيت ايدى على عينى وعيطت ، المرادى انا مجبره برضوة يااحمد المرادى انا للاسف مجبرة بس الحاجه المختلفه ان قلبى مش مطاوعنى بس عقلى مأيد قرارى وانا معودتش امشى ورا قلبى تانى كفايه عليك كده منى كفايه أوى
_ صباح الخير
.. صباح النور عامله ايه دلوقت ؟
_ الحمد لله ، النهارده معندكش شغل مش كده ؟
.. ايوه فيه حاجه ولا أيه ؟ مجتيش ليه ؟
_ تعالى يااحمد انت ، عاوزة اتكلم معاك فى موضوع مهم
.. طب مانتكلم فيه فى شقتنا يارانيا
_ اتنهدت وكنت هعيط بس مسكت نفسى ، لا معلش انا عاوزة اتكلم فيه هنا
.. مالك يارانيا انتى كويسه ؟
_ لما تيجى هبقى كويسه
.. حاضر يارانيا هقوم ألبس وأجى ، اجبلك حاجه وانا جاى ؟
_ حطيت ايدى على قلبى ومقدرتش امسك نفسى ف عيطت ، انت ليه طيب وحنين اوى كده معايا ؟
.. يارانيا مالك قلقتينى فيه ايه طمنينى لحد مااجى يارانيا
_ بابا بينده عليا ألبس وتعالى ، باى وقفلت
قعدت عالارض وسندت عالحيطه ، مش عارفه اجبهاله ازاى قلبى مش مطاوعنى وفى نفس الوقت مينفعش يكمل مع واحده زيه وجعته وكسرته وكانت بتحب راجل وهو معاها وظلمته وفى الاخر ضحكت عليه بأسم الحب !
سرخت ، انا شيطانه مش بنى آدمه ومعنديش ذرة عقل
.. أدينى جيت احكى فيه أيه ؟
_ تعالى ندخل الاوضه جوه
.. تعالى ، عن اذنك ياعمى
_ اتفضل ياحبيبى
دخل ودخلت وراه وقفلت الباب
.. قولى بقا قلقتينى
_ فركت فى صوابعى وهزيت رجلى وبلعت ريقى ، أح..مد أن_اا ، أحم__د انا
.. فيه ايه يارانيا اتكلمى
_ احمد انا عوزاك تطلقنى
.. بصلى بأستغراب ، أطلقك ؟ اطلقك ليه ؟
_ قومت من مكانى واديته ضهرى
عشان احنا مش هينفع نكمل مع بعض تانى
.. جه وقف قدامى ومسكنى من ضلوعى ، ليه يارانيا هو حصل حاجه ؟ اه اه انتى قصدك يعنى عشان موضوع محمد وكده انا سامحتك والله والموضوع خلص يارانيا وبعدين احنا بدأنا بدايه جديده واحوالنا بقت احسن وحياتنا وكل حاجه بقت تمام ف ليه نخلى ماضى يأثر علينا يارانيا وعلى احوالنا دلوقت
_ سرخت ، بطل طيبه بقا بطل تحرقنى بطيبتك وحبك اللى انا مستهلهومش دول أنا كنت بمثل عليك يااحمد كنت بمثل عليك عشان اعرف أيه اللى أنت مخبيه عليا بس مش أكتر أما انا كان من جوايا بكرهك ومش طيقاك ومش متقبلاك ومدتش للعلاقه دى فرصه ولا حاجه كله كان تمثيل وكدب فى كدب انا مش بس ظلمتك وجيت عليك ووجعتك لا انا ضحكت عليك واذيتك أكتر
.. بعد أيده عنى ورجع خطوه لورا
أنتى بتهزرى صح ؟ قولى انك بتهزرى يارانيا
_ هزيت راسى ، لا مش هقدر أخدعك واضحك عليك تانى
.. مسكنى من ضلوعى جامد وهزنى ، ليه ؟ لييييه فهمينى ليييييه أنا أذيتك فى أيه ؟ شوفتى منى وحش أيه طول ماانتى عايشه معايا ؟ ده انا أستحملت اسلوبك وطبعك طول السنين دى عشان بحبك كسرت كل المبادئ اللى فى الدنيا عشان بحبك وبخاف عليكى حتى لما أتجوزتك اتجوزتك حب وخوف عليكى وعشان أحميكى واحافظ عليكى بغض النظر عن الزفت التانى ده ولما قولتيلى نبدا صفحه جديده ماصدقت وصدقتك وقولت فعلا انك هتبدأى معايا بدايه جديده ورميت كل اللى فات ورايا وعمرى ماكنت هفتح فيه ولولا انك عرفتى بطريقتك كنت هخليكى تكملى الباقى من عمرك مش عارفه حاجه
ليه عملتى فيا كده ليييييه
_ عيطت ، احمد اهدى بترجاك انا بعترف انى مستاهلش راجل زيك عشان كده طلبت الطلاق انت لازم تعيش مع ست تحطك فى عنيها وتحب حتى تراب رجلك مش ست زيه انا مش عارفه أيه ممكن يغفرلى الذنب اللى ارتكبته فى حقك بس يكفى حرمانى منك وانى هكمل الباقى من عمرى ندم عليك ووجع على انى ضيعتك منى
.. انا مش مستوعب ، مش مستوعب اللى بسمعه ده
_ انا اسفه بجد اسفه سامحنى
.. مشى من قدامى خرج ورزع الباب وراه ..
