رواية أهدتني معاقاً الفصل السادس 6 بقلم أم عائشة (أسماء عبدالهادي)

يامن_فروح ايه رايك نخرج نتمشى شويه

فرح_بجد يا يامن،انا فعلا محتاجه الخروجه دى

يامن_طب يلا ادخلى البسى وانا كمان هروح اغير هدومى

_بابا انا نازل شويه انا وفرح ،محتاجين حاجه نجيبها واحنا جايين

_تيجوا بالسلامه يابنى ،خد الفلوس دى علشان لو اختك احتاجت حاجه

_متحرمش منك يابابا،معايا مصروفى ومفيش دراسه فمتوفر معايا الحمد الله

_بردو خدهم معاك ،متحرمش اختك من حاجه يا يامن

_فرح فى عيونى يابابا ،انا خارج النهارده علشانها حسيتها زهقانه فقلت اغيرلها المود

_ربنا يباركلها فيك يارب

فرح _انا جاهزة يلا يا يامن

****

كان امجد يقود سيارته ومعه اصحابه بالداخل _ايه الملل ده ،المدرسه كان فى حاجه بنتسلى بيها

_ايه رايك يا كبير نروح نلعب بلياردو

_ممم وهوا كذلك ملعبتوش من زمان ،فرصه ارجع بطولات زمان ،وفجاءه غير رايه ووقف بالسيارة بصورة مفاجئة

_ايه وقفت ليه يا امجد

امجد بخبث_التسليه جت لحد عندى ،بينا نتسلى شويه

****

فرح_انا مبسوطه اوى يا يامن الجو هنا تحفه

يامن_ حبيبتى انا لو اعرف انك هتكونى سعيدة كدا كنت جبتك كل يوم  خليكى هنا هروح اجيب عصير واجى علطول ،فرح متتحركيش من مكانك

فرح _حاضر

مشى يامن قاصدا اقرب ماركت ليبتاع منه العصير

شاهد امجد عرجته وسولت له نفسه المريضه التسلية به قليلا متناسيا انه بشر سواء مثله تماما

امجد_ايه ده ياشباب ،انا اول مرة اشوف سلحفه ماشيه فى الطريق كده عادى

فهم يامن انه يتحدث عنه فتجاهله واكمل طريقه وكأن الامر لا يعنيه،فالتف الشباب حوله ليمنعوه من المرور

امجد_مستعجل على ايه ،احنا لسه معملناش معاك الواجب ،ثم غمر لصاحبه

هم يامن باختراقهم لكى يعبر فهو لا يريد أن يسبب المشاكل

شاب_على فين يا كميلة ،لسه امجد باشا مسمحش بده

نظر يامن بتحدى الى امجد_ممكن اعدى يا …امجد باشا

امجد باعجاب محاولا اخفاءه_ايه ده انت طلعت بتتكلم زينا عادى

يامن_اه تصدق غريبه وبسمع كمان شوفت بقا

امجد بغضب من استهزاء يامن بكلامه_لا وعندك لسان تتريق بيه كمان

يامن بهدوء_ ممكن تتفضلوا  علشان اعرف امشى؟!

وقف امامه امجد_طب ما تمشى حد مانعك

هم يامن بالعبور الا أن امجد وضع قدمه امامه فتعرقل يامن وسقط على الارض

ضحك يامن ومن معه كثيرا عليه

جاهد يامن فى مسك اعصابه ووقف مرة اخرى _اتمنى تكون اتسليت كويس انت واصحابك

امجد بكبرياء_ ممم  بصراحه اه اصل اللى زيك كده ،مملين اوى فلازم نعملك جو وكده

يامن بوجه خال من التعابير _وخلصت ولا لسه

اغتاظ منه امجد لما لا يستطيع لاستفزازه _لا انت الظاهر شايف نفسك وعايز حد يفوقك

يامن_اللى محتاج يفوق من الوهم هوا انت يا سى امجد ،متقلقش كل حاجه بتترد عند ربنا فمسيرك انت كمان يجيلك حاجه تفوقك

امجد_لا ده انت الظاهر نسيت نفسك مبقاش الا حته الواد المعاق ده اللى يجى يكلمنى انا بالشكل ده ،هاتهولى هنا عند رجلى اعلمه الادب

امسكه الشباب عنوة وحاولوا اخضاعه لامجد

_ استنى عندك انت وهو

فجاءه وبدون سابق انذار وجد امجد يدا تصفعه بكل ما اوتيت من قوة على وجهه

تفآجأ امجد من هذه الصفعه الغير متوقعه ،كيف تجرأت هذه  الفتاه من صفعه بهذه البساطه وكيف لم ينتبه

فاق من شروده وجه الشباب يحملقون به وكأن على رؤسهم الطير ،فهم ايضا صدموا بما حدث وما ادهشهم حقا هو وقوف امجد بلا حراك لفترة بعدها

جال امجد ببصره بحثا عنها وهو فى قمه غضبه_هيه راحت فين البت دى

_مشيت مع الواد المعاق ده

_ازاى ده بسهولة ،تعمل عملتها السودة دى وتمشى اقسم بالله لندمها بقيت عمرها على اللى عملته ،انا امجد كارم حته بتاعة زى دى تعلم عليا ،دوروا عليها فى كل مكان عايزها قدامى حالا

_,مش موجودة ،دورنا فى كل مكان هنا وفى الشوارع القريبه ومش موجوده

_يعنى ايه بنت الايه دى ،هتمشى كده من غير ما تتعاقب ،دوروا فى كل مكان وكل شارع بيوصل لهنا وقال باعلى صوته ،،حاااااللا ،هرول الشباب من امامه بحثا عنهم لكنهم لم يتمكنوا من العثور عليها

استشاط امجد غضبا ،هجيبها لو راحت فين  وساعتها هندمها على اليوم اللى اتولدت فيه ،دى وقعت خلاص تحت ايدى

***

فى التاكسى

_يامن ليه اصريت نركب تاكسى

_الواد ده وشلته مش سهلين ابدا ،شكله واصل اوى وواخد فى نفسه مقلب حبتين،واللى انتى عملتيه معاه،مكانش هيعديه على خير علشان كده ،ركبتك تاكسى بسرعه،قبل ما يشوفونا

_دى اقل حاجه ممكن اعملها لامثاله ،دا واحد عايز الحرق،مفكر نفسه مين ،لو كنت سبتنى بس عليه ،كنت هعرفه مقامه كويس،فاكرها جدعنه اللى بعمله ده

يامن بحدة_ فرح اللى عملتيه ده ميتكررش تانى ،انا مبقتش صغير علشان تدافعى عنى

فرح_الحكايه مش حكايه صغير ولا كبير،انا استحاله اشوف اخويا حد بيتعرض له واسكت

_فرح ،هيه كلمة قلت لك بعد كده متتدخليش ،انا مبقاش يفرق معايا الكلام بتاعهم ده ابدا ومش بيأثر فيا باى شكل ،انا بعد اللى حصلك بسببى ،اتعلمت والحمد لله رضيت بحالى كده جدا ومفيش اى كلمة من كلامهم هتقدر تهزنى

_كل ده جميل،بس ده ميمنعش اننا لازم نوقفهم عند حدهم ،ونعاقبهم على تصرفاتهم دى

_وانا بعفيكى من المهمه دى يافرح

_يامن انت بتقول ايه

_فرح افهمى ،لو حصل حاجه ممنوع تدخلى باى شكل ،انتهينا

_لا يا يامن منتهيناش ،انا..

وضع يامن يده على كتفها وتكلم بهدوء هذه المرة_فرح،انا مش هستنى لما حد يأذيكى بسببى ،انتى متعرفيش الولد ده قد ايه شرانى ،انا شفت ده فى عينيه ،والحمد لله اننا بعدنا عنهم ،اوعدينى يافرح متتدخليش بعد كده

صمتت فرح،فهى فى قرارة نفسها لن تستطيع أن تعده بذلك ابدا

_اعتبر سكوتك ده وعد يا فرح

استغلت فرح فرصه توقف السيارة

_يامن وصلنا

نزلوا من السيارة بعد أن اعطى يامن السائق اجره ،استدار يامن الى اخته_انا اسف فسحتك باظت بسببى

_لا مش بسببك ،بسببه هوا ،ثم قالت فى نفسها،اه لو اطول اقطم زمارة رقابته الحيوان ده ثم حاولت رسم البسمة على وجهها _توعدنى بخروجه تانيه مليش دعوى

_ماشى ياستى نخرج تانى وربنا يستر بقا

_ايه ده اوعى تكون خايف من الحيوان ده

يامن وهو يمسكها من ملابسها_اخاف مين يابنت انتى ،قدامى على فوق يلا

ابتسمت له فرح فى سعاده فهاهو اخيها يتخطى العقبات ويتحداها ايضا ،دعت ربنا أن يعينه على ذلك

******

_انت فين يا امجد مش ظاهر ليه بقالك كم يوم ،وكمان النهارده حفلة نجاحك انت ونودى ،يعنى الليله ليلتك

امجد بضيق_انا موجود اهو، حاجه مهمه هخلصها واجى

اسر_حاجه ايه دى بقولك الليله الحلقه وانت لسه مستعدتش

امجد _اسر،متخنقنيش ،انا على اخرى ،قلت شويه وجاى

اسر_ماشى ياصاحبى منتظرك،سلام

امجد،جهز كل حاجه على ما تجى ،سلام

وجه حديثه لشاب امامه_ها عملت ايه

الشاب بيأس_والله يا امجد باشا ،دورنا وفى كل حته وسأنا على المواصفات اللى قلتها،حتى  مواصفات الواد المعاق اللى معاها ومفيش فايدة ،فص ملح وداب

امجد بغضب _يبقى هما مش من المنطقه هنا،حظها حلو انها نفدت من ايدى ،بس مبقاش انا امجد كارم ان ما لقيتها واخدت حقى منها كويس اوى وابتسم ابتسامه شر فهو لا ينوى على خير ابدا

وركب سيارته قاصدا الفيلا كى يستعد للحفل المقام على شرفه

امال_ايه يا ميدو ،كنت فين كل ده،ومعقولة لسه مجهزتش ،دى الحفلة حفلتك يا حبيبى

امجد_متقلقيش يا ماما لما الحفله تبتدى هتلاقينى جاهز ،اسر فين ؟!

امال _فوق مستنيك

امجد_طيب انا طالعله ،عن اذنك يا قمر

امال _ماشى ياحبيبتى

صعد امجد الى غرفته بالاعلى ،وجد اسر قد احضر له الكثير من الثياب الفاخرة ليتختار منها ما يريد

اسر_ها ايه رايك جبتلك محل كامل هنا ،اختار اللى يعجبك

امجد  وهو يعاين الملابس _ممم مش بطالين

اسر بغضب _نعم هوا ايه اللى مش بطالين،ده انا منقيهم بالقطعه ،ومن افخم الماركات

امجد بضحك_خلاص يابنى ،صعبت عليا

اسر وما زال على غضبه_ااامجد

امجد ومازال يضحك على تصرفه _لا بجد برافو عليك ،ذوقهم تحفة جدا

اسر وهو يعدل من جاكيت بذلته الفاخرة _ايوة كده اتعدل

امجد _طب يلا طريقك ذراعى،

اسر_ماشى يا كبير ،خد راحتك

***

ارتدت ندى فستان اسود اللون ينزل بضيق الى اسفل مطرز بالاحجار الكريمه بيضاء اللون ،وصففت لها خبيرة التجميل شعرها بطريقه جعلتها رائعه الجمال (ملناش دعوى بالكلام ده يابنات احنا ملتزمات بحجابنا الحمد لله)

امال_ روعه يا نودى ملكة الحفلة اكيد ،ربنا يحميكى يا روحى

نودى_بجد يا انطى ،حلوة ؟!

امال_حلوة جدا ياحبيبتى

نودى_يعنى تفتكرى ،هعجبه ياانطى

فهمت امال مقصدها وتعمدت عدم الفهم _هوا مين يا نودى

نودى باحراج_ امجد ياانطى ،هيعجبه شكلى كده

امال _ اكيد طبعا ياروح انطى ،مين يشوف نودى ومتعجبهوش

نودى_وانا مش عايزة اعجب حد غير امجد وبس

امال بخبث_ بقى الموضوع كده

نودى محاولة اخفاء امرها_موضوع ايه بس يا انطى

امال_عليا انا ياروح انطى ،عامة اكيد انا هكون سعيدة بده جدا ،ده انتى حبيبتى يا نودى

نودى وهى تقبل امال من خدها_ياروحى انتى يا انطى ،بحبك اوى

_الله الله انتوا قاعدين هنا تحبوا فى بعض وسايبنى مع عمى اللى مش عاتقنى من ساعه ما جيب ،يكونش بشتغل عنده،اه انا ناوى ده بس مش دلوقتى ،لما اخلص الجامعه

امال_تعالى يااسر يا حبيبى شوف القمر ده

اسر وهو ينظر الى اخته ،واو واطلق صفيرا ليدل عن مدى اعجابه _ ايه الجمال ده كله يابت يانودى ،انا مش متعود منك على كده

نودى _لا ياحبيبى انا حلوة ف كل وقت ،شوفى يا انطى اسر

امال _اسر بيهزر معاكى يا نودى مش اكتر

نودى وهى تغيظ اخيها_انا اصلا ميهمنيش رأيك فى حاجه

اسر_اه يهمك رأى حبيب القلب وبس

نودى وهى تجرى خلف اخيها_اااسسسر

اسر وهو يهرب منها _ههه متبقاش حمقى كده يا برعى هتبوظى صالون التجميل اللى ف وشك ده

نودى _والله ما سايباك يا اسر

امجد وهو ينظر بطالته التى تأسر قلوب الفتيات(البائسات)

قائلا بامتعاض _مش هتبطلوا بقا حركات العيال بتاعتكم دى ،كبرتوا على كده

نودى وهى تنظر لامجد باعجاب شديد _ واو ياامجد جينل مان بجد ثم أكملت بدلع _بقى انا وحشه يا امجد،وشبه برعى

امجد لاغاظتها _مين قال كده ده انتى برعى وفتحى كمان

نودى وهى على وشك البكاء_بقى كده يا امجد ،طب انا مش هحضر الحفله دى وطالعه اوضتنى

امجد وهو يلحق بها_استنى بس يانودى بنهزر معاكى ،انتى قمر والله

تناست نودى حزنها والتفتت اليه بسهوكه_بجد يا امجد

امجد بدون تأثر فهو يعدها ابنه خالته واخته لا اكتر_بجد يا نودى ،يلا  نخرج بقا ،الكل منتظر برا

نودى بسعادة وقد عادت اليها ثقتها فى نفسها _يلا يا ميدو

امجد بتحذير_نودى ،ميدو دى متقوليهاش قدام حد غيرنا مفهوم

نودى_مفهوم يا ميدو

***

فرح_ماما الفساتين دى جميله اوى ماشاء الله ربنا يبارك فى صحه حضرتك

احسان_عجبوكى يا فروح

فرح _اه جدا ،لدرجه انى كنت هطلب منك واحد ليا

احسان _ ما هما كلهم ليكى يا قلب ماما ،عملتهم ليكى علشان الجامعه

فرح بسعاده _بتتكلمى بجد يا ماما ،دول ليا

احسان_هوا انا عندى اعز منك ومن اخوكى يا بنتى ،نزلت السوق وقلت بالمرة اشوف هدوم ليكى ،ملقتش حاجه عدلة ،قلت اعملك انا بقا زيهم بس عدلت فيهم شويه علشان يكونوا على مواصفات الزى الاسلامي اللى ربنا أمرنا بيه ،شوفى وفصلتلك خمارات كمان من نفس اللون

فرح_تسلميلى بجد يا ماما ربنا يباركلى فيكى

احسان_وفيكى ياقلب ماما،يلا قيسيهم علشان اشوف لو محتاجين تعديل

يتبع..