رواية كحل عرب الحلقة السابعة والستون 67 للكاتبة زينب ماجد
 |
| رواية كحل عرب الحلقة السابعة والستون 67 للكاتبة زينب ماجد |
رواية كحل عرب الحلقة السابعة والستون 67 للكاتبة زينب ماجد
( انقلب السحر على الساحر )
عمت عين الليالي
وهجم بيت الموت..
يتخطى الرعيع و ياخذ الماجد .
(عريان السيد خلف)
– تهددني بويه وانا ابنك ؟
– واكسر رجلك بعد ، خوش يو لا … الابن اليطلع عن شور ابوه عاق موش ابن و حده الجتل .
حجاها و اندار بخطواته الثكيله وهو متجي اعلى عكازته و شطفته فوك راسه ذابها منا و منا .. وطلع .
اندارلي جسام متعجب و هو يتسائل : السمعته صحيح يو انا اتخايل ؟
– لا تزعل بس هاذ موش اب ، ابليس ما يسويها ويبلغ اعلى ابنه .
كعد بالكاع و هو صافن بدنياه وما مصدك ابوه اللي هدداه : ياخذ فلوسي .. يضغط علي يمشيني بشوره اكولن ابوي … بس تصل بيه المواصيل يهددني بالموت .
عاينت للكتب جدامي و هو صافن انهديت عليهن . كضيت اول كتاب طريته ، اندكت الباب وفاتت عمتي نجمة : ابوك يرييييي…….
كطعت حجيها و هي تهد علي و تاخذ الكتب من عدي و تفشر علي و تصيح : كح…. براسج تكسرين جلمة ابوهم ، يو ما الحية انت يصير هيج بين الابو و ابنه ، عساها بحظك وابختك يضويحي الحرامي.
كام اعلى حيله جسام و وكضها وصاح : انت الربيتيني و بحسبة ابنج صافه وياه و هو يهددني ، ولو اذا هو ابوي و هدداني .. انت شترجى منج .
– ابوك هاذ يو يسحك اعلى راسك تكله زيد بويه موش توجف بوجهه لجل مرة ، انا موش هيج ربيتك .. اصحى اعلى زمانك جسام يمه الواحد من يطيح ما تسنده مرة وابوك و اخوتك عزوتك .. شنهي جلمتك و تريد تطلع تعزل ولك .
– ما اظلن هنا لو مو تهددوني ، يو تصلبوني ، ظلة ما اظلن … خوووووش .
عافها وتعدانه وطلع ..وهي كضتني لعبت بحالي لعب على الصياح و الفشار و الحجي .. ليما دفعتني ليبرا خاطر امس اشتغل ..
طلعت وانا روحي واصله الهامتي اشتغل وافادي موجر .. منين ما اجيبنها ، اخافن اعلى جسام لا صكد سلطان يسويها وينفذ تهديدة ، جا وين نظم رواحتنا من الامن و هم يدرون بكل شاردة وواردة .
للظهر رد و عيونه بكصته ، وانا انوم بوسن .. خليتها بفراشه و كمت ليه وكلت اله : لا تضايك روحك يبعد حيلي ، جا شنسوي نصبر والله كريم .
– ولج ابوي ابوي ، تفهمين شنهو يعني ابوي ؟
– اعرف والله اعرف بس كلي شتسوي ، اذا قهرت بروحك حليتها ، جا موش انت تصلي وتصوم وتعرف الله يختبر الوادم والله جاي يختبرك بابوك خاطر يشوفك شتسوي.
ظل يعاين علي و بعده الدوخة و التعجب بعيونه .. حبيته بخده و كلتله : خلني اكومن اصبلك غدة ، تاكل و تسند چبيدتك ، وربک يحلها ، جا هي يو تظل اعلى بنادم ما يحل شي .
– لا دايخ خليني انامن .
نام سويعه وكام : انا لزوم اشوفن حل .
– و شنهو الحل .
– اروحن ابلغ اعليه و اكولن ابوي عده كتب و جاي يهددني بيهن .
– اسم الله الستار ربي جا ما راضي اعلى فعله تكون انت تفعله ، خليت له؟ .. اضكر الله وصل اعلى محمد .
– و شنطر .. يخليني عبد عده و يهيني و يفشر علي ليما اطك روحي يبلغ و يعدمني ، مامش حل.
– جا موش كتلك يحلها ربك ، انت بس اصبر وربك يحلها لا تخاف ، بالاول خلنا نتفك .. لا نضايكه ولا نحتد وياه شما يحجي يا اذن صمي سمعج .. ليما ربك يفرجها .
– هالوضع هاذ ما احملنه.
– ميخالف يبعد حيلي ، دوس اعلى روحك و احمل لخاطري .
ظليت اقنع بيه و اهدي وهو يفور .
……
حاكم : هااا الله بالخير .
سرحان : اااااااهلا الله بالخير والرحمة ، هلا بيك ابو ستار ، تفضل .
– والله يابو مأمون .. اجيت اعليك بشغيلة .
– محلولة ان شالله ، جااااايكم يزلام .
– الله يعلي علومك .
– ام ستار شلونها ستير شنهو حاله
– الكل زين لجن ستار لا تجيب طاري .
– فراري ادري .. عليش ما تخلي يرد لا يروح يوهدنكم بمصيبة .
– والله يابو مأمون الضنا غالي وهم شامرينا بحلك الموت ، يو اكدر اخذ مجانه ، اروحن وعلي ، لجن ما يرضون و ظال اجيبنه منه و اهدنه هنا ، ويوم عدنا ويوم عد اخواله .
– الله كريم ، تفرج ان شاءالله وتكضي الحرب و تصير سوالف وربك .
– بعديش يبو مامون ، خذت ثلثين حيلنا ، وشبابنا يومية تابوت، ما خلت اعلى حالنا حال .
– هاي بعد شنسوي، شنهي طلابتك كول .
– والله اجيتك بسالفة ام مؤيد ، انا اعرف قسيت وياها و طلعت اعصابي لجن تظل مريتي و المرة عزيزة يبو مأمون ووفريخاتي عدها ، ما يصير هي غاد وانا هنا متهجولين .
– تريدنا نمش ليغادي نجيبها .
– والله كلت اخذك انت و الوجوه الخيرة و نروح مشية ليهم .
– تامر ابطن عيني .. الجمعة بحيل الله نطلع لبغداد انا وياك و عمي .
– ما تكصر يبو مأمون الله يطيك العافية.
– اعلى راسي يبو ستار ، جا انت وحيد منا .
– الله يسلمك .
……..
هدية : جويعدة احوكن بالمهفة .. وجمارة و نوسة كاعدات يمي ، جمارة تنطك بيها وتكللها كولي : جمارة
وذيج تردم وراها .. و امي امدده احذاي و بنات ستير يلعبن .
دش ابوي و حجه ويا امي اعلى سالفة رجعة ايمان ، كالتله : جا و الدين؟
حاكم : نمش ليهم ونشوف شنهو رايهم ، جا انا كايل الها اطيني غاصبها .. عطية و تزقنبني بيها ، تريدها تصبر علي كل ما يصير عدي اناوشها.
– ما اظنن اخوتها يرضون .
– والله هاذ العدي ، ما رضت اجيبن فريخاتي واردن .
– تاخذهم من امهم.
– اي اخذهم ، تريدهم تجيهم ، تريد فلوسها تكعد ابيت اهلها من ادبرهن اطيهن الها و جهالي عدي .
– المرة اخلاف ضناها ما تعيش .
– ما عدي غير هالحل ، انا هم مليت .. صارلها جم شهر غاد وجهالي مبعدين عني ، مشتاك الهم مشتاكلين ليمتها نظل اعلى هالحال .
جاي يحجي ابوي ، تدنت اعليه يسرى .. و كالتلي : يعني ترد ليجاي ؟
– جا وين تروح
– واحنا ما عولينا نفتك ، ترد ترجع علينا .
– نفتك عليش ، جا ايمان بنيتنا .. وانا احبنها .
– الحجي هاذ شنهو جا منهو الحبحب الادين خاطر ابعدها من ابوج .
– يااااع انااااااا .
بصرختي اندارو علي ابوي و امي ، حجت امي : شكو ؟
هدية : شوفي الفلك .. تكلي انا بعدت ايمان عن ابوي .
حاكم : شني الموضوع شمالجن .
كامت يسرى بساع و مشت ، حجيت انا : والله بويه ما اعرف ، تنشدني شنهي ترد مرة الاخرى وكتلها اخيتنا ولنها تتهمني مبعدتها عنك .
طلعت يسرى : انا اتهمنج يو انت الأجيتي و تحبحبين بدي و رجلي و تكليلي ابعديها منا خاطر ابوي يحب امي .
كواغد : ولجن شني هالحجي هاذ .
– يمه علي العباس ان جاني مسوية هيج .
– عليش تحلفين جذب تراه العباس مو شوية وشارته اطك بالكاع، موش انت الاجيتي اطلبين مني اسوي سحر لابوج و جريتي دشداشته من الحمام خاطر اوديه للمرة الأعرفها و تبعد يسرى عنه .
– علي العباس انا ما مسويه هيج ، عليش تجذبين . انا كلت الج عكد محبة .. خاطر تتحسن العشرة بينه و بين امي .
– توج تكولين مامسوية شي وهسه عكد محبة ، شنهي تستحين تكولين انا سويت سحورة يو بس علي تذبن بلاجن .
حاكم : ولجن بنات الجلاب ، تفهمنه شمسويات لا وعلي احطن اركابجن و اكصمها .. سحورة شنهي محبة شنهي .
امي ظلت تعاين بالوجوه و انا عايفتي خرطت ، ماي ما ظل بوجهي و احلف اله واكلله : بويه وعلي كالتلي ما تخليني اسوي لابوج محبة ،كلت الها و يصير زين ويا امي ويجبل اعليها .. كالت يكوم يعبدها وانا صدكيتها و كلت الها سوي .
– جذابه عمي وعلي ، من عبن سحر موش محبة رادت وراحت جابت دشداشتك النكسة البالحمام و تحب بيدي خاطر اوديها للمرة تسوي العمل اعليها وتبعد من ايمان.
– يااااا مرة ولج ، موش انت السويتي .
– لا انا شني اسوي سحورة، كلت الج هكو مرة و انت دكيتي الا تسوين سحر لابوج .
كواغد.: من دهر الدهرجن كوز ولجن شني سحر شني كطع ، انتن شمصخمات .
حاكم: الزبدة شنهي يهديوة ، من يمتى ولج تسوين سحوووورة .
– بويه وعلي انا مالي غرض
يسرى : جا ياهو اله غرض شنهي تريدين تذبينها براسييي .
ونعله يكوم اعلى حيله و يكضني من راسي و يجر يسرى من جتفها وكال : كعدن جدامي و ما تنطكن حرف لا ما اكلجن … احجي هديوة سنهي المسويته
– بويه وعلي ابن ابي طالب شفتك ما تجبل اعلى امي و امي مضيومه و القهر جاتلها حجيت ويا يسرى و شكيتلها كالت انسويله محبه ، انا كلت ما بيها شي ، وطلبت مني اجيبن دشادشتك و انا جبتها من الحمام .
توني حجيت و جر راسي للكاع و طكاني ، و تولاني جتل ، عمر ابوي ما طاكني هالطكة ، ازود من يوم الفضيحة مالت فليح .
وامي طاحت بيناتنا و تفاكك بينا ، وابوي طبك امي وياي و يصيح : ما تعاينين بناتج شيسوووون ، تسحريني انت و بناتج يكوييييغد ، هاي تاليتي بناتي يدووووورة سحورة و يسحرن ابوهن ، كله من حدر راسج ظاله هدد ، لا تعاين بت ولا ولا ولد .. ظالة شكالت الهوايش شحجت الروبة شعملت القراااااااية و عايفة بناااااتج .
وامي تكله : جا رديت علي ، انا ياهو ماتي ، موش حالي حالك سمعيت منهن ، انا يو ادري ارضى .
– بعدييييش ، بعددددددديش ، بتج مسويه سحووووورة تعرفين شنهي تسوي سحووووورة ، يعني اخس من الكح….. من كون الكح… تكلك انا كح… ما تشتغل من جوا ليجوا وتذي الوادم .
صاحت ايمان و كالت ساحراتني و ما صدكت ، انا معيشها وياجن يل الما تستحن ، اليوم اشردجن وعلي اليوم .
وظل يروح و يهدد و يجتل بيه ، جرتني امي وجمارة من بين اديه و دخلني لحجرة لالة .. وانا ابجي .
وابوي يصيح و يعربد بالبيت و يكللهن (تالي شيبي بناتي يسون سحوووورة ، اعيبن اعلى الوادم و بتي تعمل هالعمااااايل .
طك الباب و يسرى خنست بحجرتها ، ما كربالها ، ردت امي تغلط و تتعارك وياها و يسرى تكلها : هسه تتعاركين وياي ، من بعد ايمان و خليته يغفي اعلى شليلج جنت انا العزيزة .
كواغد : غدي منج و من عمايلج يالما تستحين اعلى روحج .. انا بدورج ولج ، اصلي و اصوم ليا وجه اضيع صلاتي لاجله و اخليج تسويلي سحورة ، لجن ما تظلين بهالبيت … يهالبيت هاذ ما تظلين بيه ، يو انا يو انت ، ونشوووف.
– والله البيت بيتي وانتم الرديتو علي وخذيتو مني وعشتو بيه ، يو تخافين الله ما تحجين هيج و اطرديني من بيتي ، لجن كل خوف ومستحى ما عدجن .
انهدت امي و يسرى تكاصبن صارن من الروس ، وانا طلعت من الحجرة ، كضيتها و تناوبيت اعليها ، واعلك براسها و املخ .
دش ابوي و ستار .. و احنا اعلى حالحال ، فكوها من عدنا و هي ركضت ورا ستار و تصيح : طكني وجتلني ترضووووووها ، ترضوها يطكني ، شنهو العملته انا ، لا سويتلكم شي ولا كربيت كل العمل من حدر راسهن .
هي تصرخ و ابوي علك ويا امي معارك ، ستار هد مرته و طاح بين امي وابوي ، كامت امي لبست عباتها و طلعت من البيت و كالتله : خلي ايمان و يسرى يفدنكم ، انا رايحة لاخوتي .
طلعت امي من البيت و نوسه و جمارة يبجن .. اعلى طلعتها جمارة كامت تصيح و تصرخ و نوسه انخلست صريخ بلا وعي .
دشيت بحجرة لاله ابجي … و ستار كض يسرى كطعاها تكطع ، سلاها سل ، وشالها هي و بناتها طرداها من البيت .
وراح جاب لالة و اجا حطها بالبيت ، انا بحجرتها ابجي ، ساعة الدشت كالت : هااااا ولج ، شصار عمتي تبجي و انت تبجي و عمي و ستار غادين نار شكو ؟
– انا غمة ، امداني امداني الف مرة ساعة الامنيت بيها ، المثلها يتأمن.
– جا غير تكليلي شكو .
كعدت اسولف الها و احلف الها ، حجت لاله : ايمان عرفت كالت مسوياتلي سحر وما صدكيناها .
– وعلي ما اعرف سحر كالتلي محبه و انا امنت ، كلت هلبت يحن كلب ابوي و يجبل اعلى امي ، انا تعرفيني احبن ايمان ازود من يسرى ، و احبن فريخاتي تظنين بيه اذيها .
– دية نعرف يسرى و نعرف عمايلها ، لجن الذنب ذنبج المثلها ما يتامن يهديوة .
– من عبني غمة ، وعلي يو ما غمة ما امن ، حجت وياي جلمتين حلوات صدكيتها .
– تشوفين ديه .. وعلي هاي حوبة ايمان لساها ترن بأذني ساعة الصاحت من كل حيلها و دعت علينا وكالت دعوة يتيمة ما تتعداكم.
خلت البيت طشاره لذاك الصوب من كونها مظلومة.
– جا كليلي شلون احطن وجهي بوجهه ، و المصيبة ابوي ، مالي وجه جدامه .
– هدي الناس ديه و استغفري الله ، من كونها مظلومه و انظلمت .
– انا ما ادري والله ، جا ادري بظليمتها و ارضى ، ووكديت اعليها من كونه سحر و نترت بيه و هي تكلي ( موس كلت الج لا ) ياله امنيت .
– الله كريم ميخالف ديه ، ان شالله تنحل .
– شتنحل و البيت غده تراب .
-تراب ولا يسرى موجوده ، خلينا نفتك .
كمت من الحجرة .. وهديتها اللاله تاخذ راحتها .
ستار كعد بالحجرة مالت لالة .. جمارة جانت ترش بالباب و مكعدة نوسة اعلى جذع النخلة ، خاطر تخليها تسكت ..
شافت سيارة الأمن من بعيد ..
جميرة نجرة بساع دشت و وكالتله : ستار امن اشرد .
هاذ كض شماغك و اطفر من البيت .. صفوا الامن. ، وانا كمت اخفك .. لا ابوي ولا امي بالبيت ، ركضت اعلى اعبيتي لبستها.
دشوا اعلى البيت و هم يصيحون : الهارب ستار حاكم خضير ، ويننننننه.
لاله : يا خوية شعرفنا جا غير بالعسكرية .
– تلعبون علينا .. ستار هارب من جم شهر .
لاله : يمممممه فلك الفلكني ، جاااا زلمتي وينه
هدية : يعني اخووووي مامش ، دخيلك ربي. يممممممه.
كمنا نتصايح و نتباجى و جمارة كامت ادمع و كاضة بنوسه خاطر لا تخاف، و هم ما خلو زاوية بالبيت ما فردشوها .
خلصوا تفتيش ومامش اثر اله من كونه هو اعلى باله هالامر ما ادري شمتاني بحاله هاذ بس كون ما يروح ليغادي ويموت بالحرب و ظال يتخوتل منا ومنا.
حجه الشرطي و كال : لو عرفنا جاي تظللون العدالة ، حسابكم عسير
لالة : يا خوية مت عينه اليظلل ، جا احنا كلنا بحماكم الله يطيكم العافية و يديمكم اعلى روسنا .
هدوا البيت و طلعو
التبين بلاغ جاي على ستار .. ولالة كالة مامش غير مرته يسرى .. ما كفاها سحورتها هالدور راكضة ورى عمر الزلمة.
ليما طلعوا ارواحنا هرطت من الخوف ، كعدنا نتباجى ، ليما اجا ابوي تالي الونه ينشد بينه شلون دشوا علينا الامن و احنا مامش احد موجود بالبيت .
ظلت لاله وجمارة يشرحله السالفة بتفاصيلها .. انا تجيت اعلى كتر ما كربيت منهم ، اعلى سالفة يسرى مالي وجه احطنه بوجه ابوي .
حجزت روحي بحجرة ايمان ظليت جويعدة بيها ، لهناااااك دش ابوي شافني بيها كال : الج عين ولج و كاعدة هنا.
ما رديت علي ظليت ابجي ، هدني و مشى نام بالهول .. وانا هاذ الليل من كونه غفيت اعلى كثر ما بجيت.
ثاني يوم .. كعدت الصبح ابوي طالع غباشي ما نعرف وين ، انا ما اشتهيت الزاد كلت الاله : ديري بالح اعلى ابنيتي وانا اروحن .
لاله : جا ما عرفنه علوم ستار شنهي ، خاف خذوه الامن دية انا افادي مشوش اعليه.
– دام ابوي غبش تلاكينه طلع يدوره .
جمارة : وانا ياهو اليوصلني للمدرسة وامي ما موجودة ؟ حتى ابوي مامش .
– دكومي وياي امشي اروحن لبيت خالي اوديج لامي تاخذج .
خذيتها ورحت لبيت خالي صلاح .. امي موش عدهم ، يمكنها عد خالي جبار ، رحت لجبار ومامش ، يكلي : يمكنعا راحت لبيت عليوي .
– دشوف الحظ و انا اظلن افرن اعليها وهي مامش .
– وهسه شلون ؟
– امشي وياي للمعمل اخذ رخصة و امشي وياج ليغادي ، بس انا ما اندل انت تندلين ؟
– اي اعرف المجان وين .
– جا خوش امشينا.
طلعت انا وياها بالمعمل … دشت وياي ، حجيت ويا سرحان ، كال : خنجر راح يجيب ريوك .. تاني يجي وياخذها بسيارتي عليش تروحين انت ليغادي ، شيردج لوحيدج .
– جا بعد احسن .
اندرت ليها و كلت الها : اكعدي هنا ليما يجي خنجر .
تبسمت هي ، من فلك الفلكني جنها طابتلها السويلفه، هديتها ورحت لشغلي ، دكايك و اجا خنجر ، اول ما شافها صاح : لك دشووووف ياهو هاااااذ ، شلونج جلجول.
غندبت هي و سرحان كاله: موش وكت سوالف ، هاك السويج ووصلها للمدرسة ، ياله اخوي.
– اي خادم للمصلبخين ، يااااله
جمارة : شني منا الناس لا تغلط.
ضحك سرحان و خنجر يكلها : دمشي عيني ، لا تغلط ، لازم نحترمها الدكتورة ، امشييي .
مشت و هي عاوجة خشمها ، انا دنكيت اشتغل بعد .
…
خنجر : اي شلونج
– شلوني ، هاذ لوني
– ايباااااه صايرة تصنفين ولج .
– عمي عليك العباس بسك تعيب علي ، والله خوالي يكلولي صايرة تسودنين العكل من جمالج .
– جا ما يمدح البت غير امها و خالاتها.
– ما عدي خالات شني تسمع صفح ، خوالي خووووالي.
– مامش فرك ..
– شني عمي وعلي اخبل ، جا غير صويحبات امي كلهن خطبني .
– وعليش ما وافكتي ؟
– اريدن اصيرن دكتورة .
– خوووش نشوف تصيرين يو ما تصيرين .
– اصير انا المدرسة كله تكلي انت اشطر وحدة احسن من حويرة و عذيرة و ونهيدة.
– ذني منهنه ؟
– ذني يغارن مني عبن انا اشطر منهن ، يكللي بت ام الروبة و ام علاكة.
– وما شجيتي حلوكهن
– لا سحلتهن بالكاع بس المدير كال افصلج .
– غير اطكه انعل راعية ، شحده يفصلج .
– صكد عمي .
– وعلي اليوصلج بس كليلي علي .. اكضي كضيان.
– جا خوش .
وصلت للمدرسة و نزلت من السيارة و انا افكر اذا كربني اكلن لعمي عليهن … توني جاي اصكن الباب ، صاح : جميرررة .
– ها عمي .
– اجذب عليج … انت احلى وحدة بالسلف.
تبسمت ليه ، غمز ليه و حرك السيارة وانا طار كلبي طيران ، وامشي للمدرسة و اهوس ( شلون ركصج يعمارا هيج وهيج احا احا )
……
هدية : مدنجة اشتغل و انا عكلي مشغول بغير مجان ، سرحان يفتر اعلى العمال و يتفكد ، وصلي حجه : شماله وجيهج يهدوة .
فزيت من امچيني بساعه : هاااه ، شني .
– وجهج شماله ياهو الطاكج .
– ها لا ، هيج طحت .
– هكو شي كولي.
– خلها الكلوب مجودرة يسرحان ما بياش حيل اعلى الحجوة.
– ان جنتي معتازة شي ترا انا موش غريب .
– يطيك العافية ، عايشة بخير الله يديمك فوك راسي .
– ابوج اجاني خاطر نمش لايمان نردها .
– بودي اروحن و اتعذر ليها .
– عليش
– غلطت بحكها بلايا علم واريدة ابري ذمتي وياها .
– انا راح اذبن الجلمه اعليه بحجة لزوم ناخذ مرة و انت خلي امج تحطج بالروحة و تعاي .. واذا رضى احطنج اعلى راسي
– سالم راسك الله يديمك ان شاءالله .
جاي يحجي دش رفيق حزبي للمعمل .. هدني ومشى ليهم .. وظلو يمشون بالمعمل و ينشدونه و يتفكدون .
احنا كلنا توكفنا عن العمل احتراما للامن ، و ظلينا نعاين ليهم و هم يحجون ، كاله : شكثر تحصل من هالمعمل ؟
سرحان : خير و بركه الله يديمها ..
– والحزب شنهو حصته من هالشغل ؟
– هم راعين الدار وبيهم خير ويدللون .. احنه بالخدمه .
– ٧٠% من الوارد للحزب يرجع .
– كول يالله بويه ، خو كلي صك المعمل واكعد .. جا شنهو ربحي ، رواتب العمال شطيهم .
– لازم ما عاجبك ياااا شيخ
– بويه مو سالفة ما عاجبني الحزب فوك راسي لجن انا زلمة وهالمعمل باب رزقي ورق هالعمال .. شطي من ال٣٠% اليظلن ؟
– خيرك و خير المعمل من فضل الحزب واله الحصة الجبيرة .
– الفضل لله بعد ابوك .. واحنا موش فكور وهسه انملت جيوبنا .. من الاولى شيوخ و صيتنا لذاك للصوب عابر.
– لا بفضل الحزب مو بفضل احد ، لو ما الحزب مان اعليك و عافي عنك ، لا انت ولا غيرك يكدر يفتح المعمل …. نفذ .
حجاها و طلع من المعل ، سرحان ظل مبسمر بمجانه .
حجه وياه ابو يونس : عمي جا هسه شلون .
– والله يا عمي ما ادري ، اذا اطيهم ٧٠% اطلع خسارة ويفلس المعمل.
– بوية دامك شيخ والك عشيرة اتباع و عدك فلوس ومعامل وكيعان يشوفونك تشكل اعليهم خطر ، كل قوة غيرهم ما يرضولها ، يبدون كلشي خاطر يظلون مهيمنين اعلينا.
– بلوة هاي وعلي .. معناها اعزل و اكعد .
– جا وهاي الوادم وين تطي وجوها و شتاكل ، حو ؟
– اخذوا اجازة اليوم وردوا لداركم ، ومنا للسبت الله يحلها .
كلمن شال غريضاته ، لجنه ظل دايخ بالسالفة ، طشوا كلهم ، تكربيت منه : هسه شني يعني نبطل
– والله يا بوية ما اعرف ، امشي وعود الله كريم.
دار عني و تهيس راسه افتر اعلى هالعلم هاذ .
بوشيت روحي و طلعت من المعمل رديت للبيت ، تلكتني ، لاله : هاا شو من وكت رادة
– صارت مشكلة بالشغل و طشينا ، اطيني البت خلني اروحن اشوفن امي وين علمها … ستار ما عرفتي عنه خبر .
– لا والله افادي نار لهساع عمي ما رد ولا جابلي عنه علم .
– جا انا اروحن .
شلت بتي اعلى اجتافي و طلعت لبيت خالي عليون ، و يكلي راحت لجبار ، مشيت الجبار .. لكيتها : هلا يمه شلونج جا ادور اعليج من الصبح ليجاي وانت مامش وينج ، من بيت البيت شنهي.
– وشعدج لاحكتني ، فوك عملتج ولج
– يمه طكيتوني و تهمتوني و طلعت انا كح… و انا كل السالفة كلت الها محبة بس ردت ابوي يحن ليج .
– وانا شنهي اترجى منه محنة خاطر تدورين سوالف محنة ولج ، وانا من يمتى ارضى هالامور ، وشحصليتي
– ما حصليت غير المهانة ، جا شحصليت، لجن يمه وعلي ما جانت نيتي اذي ايمان انت تعرفيني احبنهت ، بس يسرى
– يطبج هرش من كون تعرفينها موش ادميه عليش تامنين .
تجيت عنها و هي ترزل وانا دموعي هلن بهداي ، اندرت شافتني ابجي ، تنهدت و سكت … غيرت الموضوع و نشدتني : جمارة راحت للمدرسة يو لاله ؟
– اي خنجر وصلاها بسيارة سرحان ، اجيت انشد اعلى ستار ما تعرفين امس شصار بحالنا ، خرطنا العافية وعلي بسبة هالعايقة سريوة.
– خلاج صلاح مختله ابستان الشيخ مطر ، بصريفة غاد ما يندلها احد و اجا ابوج عليه من غبشه و اخذ خاله و مشاله.
– باجر ابوي يمش لبغداد و اريد اروحن وياه .
– خايبة دركدي يم الدروب ، وين مطيه وجهج .. و عليش مصخمه بچمج .. استجني و هدي المتيريسه بحالها .
– يمه الصار وياها بسبتي انا الامنيت بيسرى .
– درس الج مرت الاخرى ما تأمنين باحد غير بامج و اختج بس ، ذني حفاظات سرج و سترج .. غيرنا يدكلج طبول يبتي .
– الله كريم غلطة و ما تنعاد ، وانت يمتى تردين وعلي البيت ما ينطب بلياج ، يو دشيت اهيسنه موحش ويريد ياكلني من كونج ما موجودة .
– جا بعد السواه ابوج و تريديني اردن .
– يمه ابوي تعرفينه عصبي لجن مامش اطيب وابيض من كلبه .. جا تحسبين علي ساعة العصبية .
– هديها هسه ليما يروح لبغداد و يرد .
– جا ستار مامش ، و ابوي يروح .. وانت هنا ، نظل انا و البنيات لوحيدنا .
– جا شمالج موش مرة
– لا انت ما موجودة موش مرة ، اجيبن البنات و نركد يمج.
– تعالن.
– هنا يو ابيت خالي صلاح
– خالج صلاح سخي لجن مرته كطعية ، يو كعدتي عدها ساهة ، كل شواي و طكتج ابسمار و تشكي بوجه الله ما عدنا و نا عدنا ، خاطر لا تظلين عدها هالاجيت هنا عد جبير .
– جا اروحن اجيبن البنيات و اجي
– امشي و انطري اخيتج ترد من المدرسة ياله تجيبينها و تجين .
– جا خوووش .
رحت للبيت نطرت ليما ردت .. خذتهن ورحنا لبيت خالي ، وابوي اجا ليغادي شافنا مجتمعين ، بس هو لا يحجي وياي ولا يحجي ويا امي ، سلم اعلى خالي جبار وكعد عده شواي .. و اجا لامي و كال الها
– انا رايح لبغداد اجيبن ايمان
– موفك بدربك
– عليش هيج تحاجيني معلك
– جا السويته شواي ؟
– حكج علي لجن انا من سواية بتج …….قاطعته
– لا تكول بتج انا منغله بيها و تذبها علي ساعة الشين ، وبعدين انت ما تحسب اهلك و اخوتك و نسوانهم الكلهن سحورة ومامش شالفة شينا ما جتنا من وراهم.. جاي تلوم اعلى هديوة الامنت ابت اخوك .
ومن كونك زلمه عادل و حافظ حك الله .. هديوة ما ينكسر خاطرها علي و تمش بهالدروب هالبت تشوفنا انا وياك ملتمين.
ذنوبنا لا تحملها اعلى جتاف ضنانا .. الذنب عدك انت.
– هسه بريتي الكل و طلعت انا المذنب.
– لا ابري احد ولا اذبن لوم اعليك ، حيلي مهدود و مالي خلك احد ، فكني واليرحم والديك ، و هد بنياتي بحالهن وروح شوف ذيج هلبت ترضى تردلك .
– الله كريم يكواغد .. الله كريم .
طلع من عدنا و مرت خالي جبار تطبخ و تحط جدامنا و نسوان خوالي اجتمعن كلهن اعلى جية امي ليجلي ، صارت لمه من العمر وضحك و سوالف .
خذت امي صينية من عشانا و مشت بالليل ودتها لستير ، شافته و تطمنت عليه و حبته وردت النا .
…
ثاني يوم الجمعة ، مر حاكم اعلى سرحان و عمه وركبوا وطلعوا لبغداد خاطر يمشون لايمان، لينا وصلوا ليغادي ، استقبلهم لؤي و جلال اخوة ايمان .
بدوها بحجي شغل و سوالف ، و سرحان ذب الحجلية و كاله : والله هيج و هيج الصار و انا ما عدي حل يو اطلع خسارة يو افضها و اعزل المعمل .
لؤي : بيع و افتح هنا
-الجان هنا والجان غاد شنهو اليفرك ، دام ذول وراي ما يطول غطاي.
– يا خويه بيع المعمل .. وحط فلوسك ويانا و نفتح معمل هنا مال البان، و انت عدك مزرعة هناكه و عندك فلح و حيوانات .. حلال تسمونها مو
– اي
– اي و شغل فلوسك هنا ابغداد ، و شغل بغداد يفوق المحافظات و الاقبال عليها قوي كلش.
– والله ما اعرف ، من امس وليجاي وانا حايرة .
– لا تحير ابو مأمون شنو السالفة ، احنا اخوتك ، عمي الله يرحمها لو صاير عدها ولد ما تحبه بكدك .
– الله يرحمها ، جا ما طولني اخيك ، خلني استغل هالاخوة و افتح الموضوع المجبل عليه انا و هالوجوه الخيرة …تحج عمي يو احجي
– لا احجي عمي انت شيخنا و بيك البركة
– الله يبارك بيك ، اي يابو سرمد .. النا مرية عدكم و جاين ناخذها.
– تاخذ عيوني بس اذا جان الموضوع يخص ايمان ، سده.
– افا جا كللنا كومه و اطلعو من البيت.
– لا حشاك ، بس سواية حاكم بأيمان مو هينه يابو مامون .
– الصار صار و هم مرة ورجال ، و المرة و الرجال كلشي يحصل بينهم ياخوية ، الصبحية واحد يطك بالاخر وبالليل غطيني و اغطيك .. جا هاي الدنيا
– حتى لو بس ما توصل ياخذ فلوسها و يخليها هيج.
– لا حدك يبو سرمد ، انا يوم التبرعت بورثها سبحان الله جنت موجود ابيته و هي التبرعت وهو ما رضى وكالتله انا شتفعني الفلوس و انت هاذ حالك ، و اطته و هاذ من زود اصلها عبنها بت اصول و تعرف الاصول لجن موش حك اعليه شلون اخذهن .
– لا والله ، ورثها يرجع ، مال ياكلهن علينا ، مو اولاد حجي منير الينوكل حقهم .
ظل ابو فاضل يحجي و يمون عليه ، بس اخوها ما راضي يردها الا يرد ورثها ، كالوله (منين يجيبلك الزلمه يشتغل هو و عايلته و ما لاحكين اعلى العيشة )
اخر شي حدد الهم مبلغ كل شهر يسلمه الهم الى ان يسدد ورثها كله ، و شرط رجعتها ما تعيش بريف السماوة ، يأجرلها بيت و تعيش ابغداد هنا .
حاكم رضى يسدد كل شهر ، بس ايجار ابغداد رفض و كال الهم : انا جايكم و مذعن بغلطي و كايلكم انا اغلطت بحكها و ساعة عصبية ، بس مال تحكموني و تركبون فوكي ، لا والله ، موش انا اليحكمني احد .
جاي تمثل علي خايف عليها وابوكم اطاها اليه من جوركم .. يو دك فج و حجي .. عيشة ابغداد ما اعيشن ، انا زلمة عسكري وعدي عايلة غاد موش فاضي و ما اجي غير كل شهر يو شهرين عشرة ايام .. هادلي بت حمرة خضرة هنا شنهو معناتها ؟
ترضى تجي تعيش وياي غاد .. اهلا و سهلا ما ترضى
ما بلازم .. خلها براحتها دام مرتاحة ، بس الجهال اخذنهم.
لؤي كاله : اي اخذهم ، جهالك ما النا علاقة ، بس رجعة ما ترجع للريف.
جابوها منا ردوها منا ، الأثنين صروا اعلى رايهم.
كالوا يابه جيبو الجهال خل ناخذهم .
ايمان و خذوا جهالها منها ، كامت تبجي و تلطم و طلعت تتوسل بحاكم تواسيل حتى يعيفهم عدها .
ساعة الشاف دموعها و تواسيلها ، كال الها : بويه عليش هالدموع ، ذوله الفريخات عدج خلهم حدرج ، وانا انطر ليما الله يهديج و تردين ليه، جا شبيدي بعد .
عافها وطلع ورجع للسماوة
بوجهه لكواغد .. صالحها و اخذها هي و بناتها ورد بيهن للبيت ، بس يسرى ما رضى جيتها من كون هاي ثاني مصيبة من حدر سحورتها .
…..
راديون: مرت الأيام و احنا كوة على الله حاملين سلطان و ضيمه و كلما جسام يطك و يريد يتعارك وياه اهدي و اكومن احبن بيده خاطر يهده و يتركه.
سلطان راد سرحان ياخذ بته ..
بس سرحان ما رضى ياخذها ، كام و خطبها من سلطان لأبن عمه .. ليما اقر ورضى يطيها لابن عمي قاسم ، و انزفت عروس من بيتنا لبيت عمي قاسم بصف بيت اهلي.
امي ضاجت من موقف سرحان ..
لإن فخرية كامت تتبختر اعلى روس الوادم و تحسب سرحان رفض يعرس ، لجل ما يكسر بخاطرها ، بس هي تعرف السبب الحقيقي الما يخلي سرحان يرغب مرة.
وظلينا اعلى هالحال يوم يجر يوم .
وحال الضيم حالنا .. من ورى سلطان و بلاويه اعلينا .
مرة من المرات جنت جاي انظف بحجرة عمي سلطان وعمتي نجمه ، و هي برا ، و عمي طالع بطلابة عشائرية ، ونعلي اشوفن الكتب مالت جسام ، حدر الكواني مالت الاهدوم المضمومه .
طلعيتهن .. كلبتهن .. والله هن .. حتى هاذ الانشك .
واكومن و احطن الكتب بجسمي و اشدن الحزام حيل اعلى خصري خاطر ما يطيحن .. و تحججيت و طلعت ورا البيت .
ذبيت عليهن نفط
توني جاي اشخط بالشخاطة خاطر اوجن العود و نعلها عمتي تلحكني ، بس شافتني ،، صاحت : شجاي تسوين ؟
بس شفتها شعلت العود و ذبيته اعليهن وجن كلهن ، و هي ركضت وكضتني من راسي بت ضويحي الماتستحين .. طكتني و تجر بيه .
وصلتني لبيت و تتعارك وياي وتصايح و تتوعد ، لجن كل هاذ ما همني ، المهم حركت البيهن اعدام رجلي ، ماي بارد و انذب اعلى افادي .
ليما دش سلطان و درى انا مسوية هييييج .
وهو تسودن ، كلب البيت فوك حد … وهو يهدد و يكلي : انطري شراح يجرى عني، لشوفج سود ايامج و اعدمنج ، يبت ضويحي ….
