رواية كحل عرب الحلقة السادسة والستون 66 للكاتبة زينب ماجد
 |
| رواية كحل عرب الحلقة السادسة والستون 66 للكاتبة زينب ماجد |
رواية كحل عرب الحلقة السادسة والستون 66 للكاتبة زينب ماجد
(تهديد )
بديك اجرح جروحك
لو ردت تجرح بديك
ولا بأدين الغير .. جرح الغير ماينصح
(عريان السيد خلف)
ملوك : شنهو التعرفه عن زناد ؟
-نمش ونحجي ..
مشت وياه وهي اعلى نار تريد تعرف شنهو اليعرفه عن زناد ، طلعو من البيت للبستان و كال الها : زناد بالكويت ويا خاله كاطع .
نشغت و اندارتله : عليك العباس صكد ، شدراك منين عرفت ، صكد هو بالكويت ؟
– عدي معارف جثيرين غاد ومعاميل شغل نوديلهم ويجيبولنا و هم الكالولي عن زناد .. موجود و عايش ويا خاله .. و حسب ما سمعت مزوج .. صكد جذب بعد ما اعرف هاذ العرفته .
– الله يبشرك بالعافية .. يمه وليدي توه استراح كلبي .
– الأريدن اكللج بيه يا ام زناد .. ما دامه الشيخ زناد موجود لا تخلين للواوية مجان من كون قاسم ال ضاحي هاذ ناوي يسيطر اعلى سرحان من كونه عمه الجبير و يجتاح المضيف و يصير الراي رايه واعلى هالأساس زوجاه بته.
– جنك بكلبي يابو نعمة ، ما تعرف بته من ساعة التزوجت سرحان و لليوم شلاعبة و شجاريه اعلينا .. تمش وتصيح انا الشيخة .
– الحك المشيخة لياسر بعد ابوه زناد لجن ياسر جبير و سرحان اخذ مجانه ، لجن لزوم المشيخة تظل لبن ازناد ، موش بيد سرحان و قويسم.
– انا جناحي مكسور يبو نعمة ، لا ولد ولا سند .. اتجي بروحي اتجي لخاطر جهال ولدي ونسوانهم ، من كون انا مرة و هن نسوان و نعتاز سرحان بس مرته عكربة ما خليتنا بحالنا.
– هم ذول اولاد ضاحي .. ضاحي لعب براس دواي و صف احذاه ليما كوش اعلى القصر و المضيف .. و قاسم مثل ابيه يصف بصف سرحان وزوجاه من بته .. خاطر يكوش اعلى الاول و الاخر وينكال عنه شيخ.
لزوم تخلين ياسر بكتر عمه و يحضر مضايفه وجعداته و لزوم يردله حك ابوه .
– هالامر انا اتصرف بيه .. لجن ما اعرف عدك خبر بهدية بت حاكم يو لالة ؟
– شمالها ؟
– هدية جاي تشتغل ويا سرحان بالمعمل .. وسرحان متاني الفرصة اليردها ليه و يخطبها ويخلصها من نهوة فليح اعليها
– يمن يمتى هالامر و حاكم يدري بيها يو لالة ؟
– سرحان مخلي اموره اعلى نار هادية وما مورج احد اعلى اسراره ، لجن مرته هي الفضحت هالامر و مغتاضة من وجود هدية بمعمل سرحان ،
– انا ما ادري توني عرفت منج .
– دام عرفت يبو نعمة لزوم اتصرف ، لجن حط ابالك .. الوصلت الكم هالخبر هاذ مرت سرحان موش غيرها … ياله اودعناك .
– اوصلنكم .
– لا اتمشى لوحيدي ما عدي شي ، الاريدنه منك ادير بالك اعلى بتي وبت ابني ، امانة عدك .
– احطنهم بعيني .
………
هدية : خايبة شمالج شجاج ما تكليلي ، عليش ما داوميتي غير تكليلي.
– ما اريد اروحن .. مدرسة بعد ما اروح
– ولج مرمريتي افاد امي عليش هيج خايبة ، غير اعرف شكو .. كاضة البنيات و مبيسه بيهن شجاج.
– يكللي بت ام الروبة ويعيبن علي عبن امي تبيع روبه اباب الفرن الغاد عن مدرستنا ، يصنفن علي ويتمضحكن ويسمني ام علاكة الخضرة عبن ما عدي جنطة.
– يااااع يروحن لغندرة امي شنهي يلحكنها امهات الكمل .
– ما اريد اروحن .
– جا ترضين يصيرن احسن منج ويدرسن و يتثغفن و انت عبن حجن جم حجاية كعدتي وبطليتي و تاليتج تعرسين من واحد فقير و تكومين تبيعين روبة .. عليش ما تركزين بدراستج و تصيرين احسن منهن و تخليهن وراج .. الشغل مو عيب خايبة العيب من نستحي من شغلنا ونبطل ويظل هاذ حالنا .
– واذا عيبن علي ؟
– جا مامش احد غاد تشتكين عده
– المدير ما يحبني .
– ولونه .. روحيله وكليلة و يو ما سوا شي .. ظلي صمي اذانج عنهن .. جا تخليهن يغلبنج و يصيرن احسن منج و انت تكعدين من وراهن .
ظليت اقنع بيها هالبت ترد للمدرسة من كون امي كل املها جلجول تخلص مدرسة وتصير صاحبة شان جبير موش مثلنا من الكماط للرجال وما فهمنا من دنيانا غير الركضة ورضا هاذ وذاك خاطر نعيش.
لجن ظلت ابالي اشتريلها جنطة .. بس الجنطة غالية حيل .. حكها مال اسبوع شغل .. بس كلت هلبت اكدر اشتريلها جنيطة حتى يو اخيطلها جنطة و اسويلها .
ثاني يوم داوميت بشغلي .. للضحى ورحت لسرحان : هلا يشيخ
– هلا بيج بويه .
– دام استراحة نص سويعة هلبت تخليني امش للسوك بساع ما اتأخر واردن .
– عليش ؟
– هيج عدي حاجة رايدة اشتريها .
– روحي ولا تتاخرين
– يطيك العافية يشيخ .
طلعت من المعمل ، ركبت بعربانة ويا ابو الحصان وساك للسوك .. وصلت غاد ، دوريت ولفيت اعلى جنيطة الها مامش كلهن غاليات وما عدي فلوسهن ، اشتريتلي كماش كوي ورديت للمعمل كلت عودين من احلن اخذنه للخياطة تسويلها جنيطة اعلى كدها .
دشيت ولن جدامي خنجر و سرحان مدنج يدقق بالحسابات، من شافني خنجر هيسته عله حسه و هو يكل لسرحان : اي يبو مامون .. يمتى عرسك ما كلتلي .
سرحان ما رد عليه و موجد بالحسابات .. كملها خنجر وهو يكله : شيخ وتاخذ اليحلالك .. ٢ اربع .. بكيفك بوية .
شال راسه سرحان خاطر يحجي وياه وكفت انا وكلتله : السموحة تأخرت .. عن اذنك .
كليت اعليليكتي اعلى كتر و ظليت اشتغل لجن عكلي انشغل .. اليحجي خنجر صكد يو يتشاقه ؟
ظل عكلي يجيب ويودي .. ليما عقلي اقتنع صكد يريد يعرس ، و كام يخترع مواقف شلون اتعارك وياه ، و شكلله و شعاتبنة .. صفنت اعلى روحي
هسه انا العرس و الما عرس شنهو المحصلته ؟
لا يغير من امري شي ولا يفيدني بشي .
….
جمارة : يومين ما مداومة بمدرستي وامي تحج وتغلط علين عبن اريدن ابطل و هي تريدني ادرس ، ليما حجت وياي هدوة رضيت وكنعت اردن للمدرسة .
داوميت بالمدرسة .. و اعلى هالحال يتمسخرن بيه و يصيحن ام الروبة .. انا دايرة عنهن و ملتهية انقل من دفتر البصفي الواجبات الضيعيتهن امس .. و هن يذربنن بسوالفهن.
ليما دشت المدرسة و هن وحدة كاعدة بالكاع .. تصيح روبة روبة و الثانية تذب عليها فلوس وتضحك.
صحنا قيااااام .. وكفت اعلى حيلي و هن تراكضن .. كتلها : ست ترضين كاعدات يغلدن على امي جيف تبيع روبة وعلي يومين ما مداومة بس من وراهن والمدير ما يحبني .. بس احجي يفصلني.
حجيتها وبجيت وانا افرك بعيوني ..
صاحت عليهن المدرسة و كالت الهن : الحجي هذا صحيح ؟
– لا ست جاي نتشاقة وياها والله
جمارة : لا وعلي ما يتشاقن ، انا يو اتشاقى جا ضحكت وياهن موش دايرة عنهن.
المدرسة : اوكفن يم الزبالة بساع و على تك رجل ووجهجن للحايط .
ظلن يتوسلن بيها و يكللها : نتشاقة والله ست ..
صاحت بيهن ووكفتهن يم الزبالة و بدت تشرح النا المادة .. و انا اتنوعلهن مرتاحة جيف واكفات عد الزبالة .. ومن اعاينلهن ارفع خشمي و ادير عنهن خاطر اغيضهن.
طلعن وشوشه وهن يحجن علي اندارت ليهن المعلمة و هي تكللهم : واكفات يم الزبالة و ما مستحيات على روحجن ، اندارن اشو .
اندارن ليها و انطت لوحدة منهن طباشير و كالت الهن : حلي على الصبورة بدال المزعطة مالتجن .
كضت الطباشير و ظلت واكفة وصافنة بالصبورة .. تحل و تكللها (ست صح )و المدرسه ترد عليها .. معليه كملي الحل .
ليما ظلت تشخبط و تمعمر و حلها كله غلط ، كامت المدرسة تغلط عليهن و ترزلهن جيف ملتهيات بهالسوالف وما مركزات بدراستهن .
ردت اغيضهن ، رفعت ايدي وكلت الها : ست ست، احلن انا ؟
– كومي ياله .
وكفت وخذيت الطباشير و كمت اشرح لروحي و احلن .. ليما حليته كله و انداريت للمدرسة : ها ست صحيح ؟
صفكتلي بديه وكالت للبنات : صفكولها
ابتسمت حيل و ظليت اعاين للصف بفرحة ، كامت من مكانها و هي ترزلهن و تكللهن : شفايتلجن تصيرن مثل بنت ام الروبة التحجن عليها ، يو اهلجن حارصين اعلى دراستجن مثل ام الروبة جان هسه انتن بالعلالي مو بصف الزبالة ، يلا ردن لمكانجن ولو انعادت السالفة واتمسخرتن بزميلتجن .. صفي بعد مدخلنه .. افتهمتن ؟
– نعم ست .
– ردن يله .
ردن لمكانهن و المعلمة تمدح بيه و تكلي : انت اشطر وحدة بالصف ركزي بيهن و خليهن لسوالفهن المكسرة ، بعدين تصيرين دكتورة و هن يبقن بنميمتهن ميفلحن. لتخلين احد يحبطج و يخليج تعوفين مدرستج ، انجحي و كسري عيونهم خوش .
– خوش ست .
رديت لرحلتي وانا اعاينلهن بنظرة منتصرة ، وكعدت فرحانه بروحي .. وكمت اوجد ويا المدرسة اكثر خاطر اصيرن احسن منهن .
بس ما تابن بس طلعت المعلمة .. يكللي .. (شايفة روحها بت ام الروبة)
– بت ام الروبة ولا المدرسة توكفني يم الزبلة و تغلط علي و ترزلني جدام الكل …
وظليت اعيب عليهن و امش للزبالة و اوكف و اقلدهن من يتوسلن بالست وما تخليهن يحجن .
كامن يغلطن علي : كتلهن انا ما احجي ويا الكسولات اليوكفوهن بصف الزبالة .
هدية : بفكري امش واوهوس .. لسنا ردت اطلع وكفاني سرحان .
ندهني : هدوة
انداريت ليه و انا انزل ابوشيتي :- ها
– اذا تعتازين شي كولي لا تستحين .. الشغل وهالامور اعلى جنب لجن حطي ابالج يمتى ما اعتازيتي ما يردج الا السانج .
-تسلم يبو مامون .. كافي اعليك نسوانك ، ما اريدن اوهدنك وياي .
– نسواني ؟… شني جديدة هاي .
– جا موش تريد تعرس.
– سواها النذل و صدكيتيه ؟ جفيلج العباس مامش شي من هاذ كل السالفة .. سلطان مطيني مرة وانا لهساع ما مقرر بحكها شي .
– ما يعتاز تحج وتبرر انت شيخ وما يحك لاحد يوكف بوجهك و يمنعك .. جلمتك شما قررت تظل فوك الراس .
– تبسم .. ولون غيض الغيرة برسومج احبنها لجن ما احبن تتضايكين يو تكدرين خاطرج بهالامور .. اشيخن اعلى الكل ويظل كلبي حدر امرج .
تبسميت : جا انا اروحن .
– بكل خطوة عافية ..
طلعت منه متبسمه .. وضحكتي شاجة حلكي .. وصلت نص الدرب وتضكريت علاكتي نسيتها ، رديت وانا اركض .. دشيت سرحان طالع ، خذيت عليليكتي ورحت للخياطة وكلت الها يومين اريدنها جاهزة ..
رديت للبيت ونعله ابوي جاي .. حبيته و سلميت اعليه.
بس اشوفنه حيل مغتاض .. وما كارب حجرة ايمان نايم بالهول .
ليما كعد .. نشد امي اعلى ايمان ..
كالتله : اجو اخوتها ليجاي تعاركو وياي ، هم زين الله ستير جان عد خوالة يم مريته جا توهدن بيهم و كضو الامن .
– تعاركو عليش ؟
– يكولون ماخذين فليساتها .. كلت الهن جا بايكيهن .. غير هي اطتهن ووكفت ويانا بشدتنا، جلمة منه جلمة مني تكاومنا ليما راحو بعد ما دريت عنهم بس العرفته ماخذين ايمان هي و فروخها .
حاكم : يصير خير .
جويعدين و اندكت الباب ، فكها و لنه سلطان اعلى الباب : ها الله بالخير
– الله بالخير و العافية ، تفضل تفضل.
دش وهو ينشد عن احوال ابوي و ينشده عن مريته البغدادية و شصار وياه .. بس ابوي كاله : مشكلة بسيطة و انا احلها .
سلطان : اي جا خوش ، اكلك صكد بتك تشتغل بمعمل سرحان يو جذب
– عليش ؟
– ردت انشدنك .. خاطر اتوكد السمعته صحيح يو جذب .
– بعد ذيج الشدة عايلتي الكل كامو يشتغلون خاطر يكدون و نرد نوكف اعلى حيلنا .. و هدوة اشتغلت بالمعمل .
– و عد سرحان ، شنهي ما تستحي اعلى شواربك ، بتك تشتغل عد ذاك الانفضحت وياه .. يو ناوي تطلكها من فليح و تناسب سريحان يحاكم .
– هالحجي ما ارضاه يبو نعمة و جلمتك هاي مردودة اعليك ، بناتي و اعرفنهن .. و ما مشتغلة عد واحد ردي الشيخ سرحان خيرة الزلمة و يو طلعت للشغل .. طلعت مغشاية وساترة روحها .
اما ذيج السالفة انا و انت نعرف ناصر هو السواها و فضحني و فشلاني ويا الشيخ مطر الله يرحمه.
– وترضى بتك تشتغل عد اسريحان .
كواغد : الله بالخير .. من رخصة ابو ستار لجن سنعيت الصياح و اجيت و عرفت السالفة .. اطني خوية شنهو غلطها بشغيلتها هاي .. انا ما اشتغلت عد الشيخ مطر ، عمتي ام حاكم ما اشتغلت عد الشيخ ضاحي .. شنهو الحصل هسه و تضايكيتو من هدوة عبن اشتغلت عد الشيخ سرحان .
– الصوج صوجكم انتم الرضيتو الرواحكم تشتغلون عد ال ضويحي و تحطون اركابكم حدر اجدامهم ، وجبتو الذلة لال ضاحي ، عيب اعلى ارواحكم ما خليتو ماي بوجوهكم و انتم تخدمون هالرعيع ذول السطو اعلى حك ابونا ثجيل.
على حس حاكم و هو يداهر وياها و كواغد كالتله : جا وين حسك هاذ ساعة الطحنا بضيج .. ما شلت ايدك و كلت لا تظن وحيد من ال ثجيل يشيل عنكم الفصل . ما شلت ايدك عني ساعة الانحكم رجلي وظليت وحيدة بس الشيخ مطر عايني و مخليني اشتغل بقصره و كاعه .. وين ثجيل من انطردت ام حاكم وحكها و حك حاكم راح ابطن ناصر واخوتها .. بالضيج ما نعاين احد منكم و يو شلنا ارواحنا اجيت تشوبشون اعلينة .
اغتاض سلطان من حجايات كواغد و كال الها : راضين بت عزبة تطلع صبحية وتشتغل ويا الزلمممم غاااد .
كواغد : لا والله مت عيني يو راصية واعلى امرك من باجر انا اكعدنها بس تتعهد وانت شيخنا ، تطيها اسبوعيتها التحصلها من المعمل و هي جويعدة ؟ .
– وانا شنهي مبتلي بيكم واتعهد اعلى اسبوعيتها ، جيش جرار اولادي واحفادي وما اعاين دربي اعلى كثر ما موهدن بعيشتهم .. احيرن بامركم .
– جا من كون ماتكدر تتكفلها عليش جاي تحجي و توكف برزقتنا .. بسكم ملينا .. ياما طعنتو امي و طعنتو بسترها جيف جانت تشتغل بكاع ضاعي هساه انداريتو اعلى بتي ، فاض غيضي منكم … يززززي.
طلع سلطان و هو مغتاض و اعلى الباب هو وابوي يتداهرون .. اندارت امي ليسرى وكالت الها : مامش غيرج طلع الحجاية .. انا موش وصيتج الحجي ما يطلع ، انت ما ينفع وياج شي .. تعديت سالفتج ذيج وما جزتي من ضنااااي ، لجن وعلي يا يسرى ، يو بطلت هديوة يو انفضحت بسببكم ، ظله ما تظلين هنا ، لطردج و اطلكنج و اخلي ستير يبيس بحظج .
يسرى : وعلي عمه ما حاجية لاهلي ولا فاكة حلكي ، هديوة اخيتي وما فتنيت اعليها من كون اعرفها مستورة ومغشاية ، لا جبت طاريها ولا حجيت.
-جا يا سالفة طاحت اعليج و كلتي انا يو ما نكرتيها عنج .. من ياهي لياهي اعدن و اعددلجن سوالفج يسرة.
ظلت يسرى تبري بروحها وتنكر هي الكايلة لاهلها اعلى شغلي بالمعمل … بس ابوي ظل يتصايح ويا امي ويكللها : بطليها وخليها تكعد .
– عليش ابطلنها .. شنهي طلع منها العيب و اكولن اخافن تفضحنا البت تروح بدربها وترد بدربها و عاينتني و شايلة عني، عليش تبطل والله سلطان اغتاض وما عجبه ، عساه لا عجبه .. ليمتها نظل ندور رضاه واحنا ما محصلين منه غير الشين .
وظلت امي تداهر ويا ابوي ، تكربت مني يسرى وهي تكلي : ابحظج و ابختج صالج شكثر من اشتغلتي ، حجيت تهمتج فد يوم يو عايريتج .. يو احطن بتج اعلى كلبي و اكلج ديه روحي ، بضميرج احجي.
– لا والله الحك ينحجي ، من يوم الداومت جميرة و نويسة عدج شايلتها عني ما شكيتي .
– بت اخوي موش فضل .. وانت حسبة اخيتي بس وعلي انا ما حاجية ولا كايلة .
ظلت يسرى تبري نفسها جدامهم و تدور رضاهم من كون تخاف اعلى بيتها خصوصا بعد ما طلعت ايمان ولالة من البيت ، و هدية و كواغد مثل الخطار يردن من الشغل ينامن .. ويكعدنلهن شواي .. لا ينظفن ولا الهن غرض بشي .. وحاكم بالشهر لو بالشهرين ينزل مرة و ظال البيت ليسرى و بناتها و كاسبة الكل .. فما رادت تخسر و تروح زعلانة عد اهلها و تضطر كواغد تجيب لالة بمجانها تظل بالبيت .
لبست عبايتها وراحت لامها خاطر تعرف منها ياهو الوصلالهم الجلمة .. امها كالت الها : ما ادري عن السالفة انا .. توني عرفت منج .
كايلة الها .. انا مرتاحة بكعدتي ولا تدخلون بهديوة و تخربون علي .. خلوني اعلى هالحال ، راضية رجلي وراضية عمتي و البيت الي وحدي ، يو تعديت الباب يجن غيري ويستحلن مچاني.
من سمع ناصر هديوة تشتغل عد سرحان اغتاض .. وراد يروح لحاكم بس ام يسرى كالتله : يو رحت وتعاركت وياه شنهو النجني غير يطرد بنيتنا و تطيح اعلى افادنا ، هدها خلها تولي ، تكد اعلى روحها و اعلى بتها .
وراحت بنفسها لسلطان خاطر تخليه يهد هدية لخاطر يسرى .. ورادت تعرف منه السالفة خاطر تبري بتها وما تخلي كواغد تتهم ابتها .
سلطان ما راضيي يحجي و يكللها وصلني ..
ونجمة مرته ندستها و كالت الها: الحجي بيناتنا ، مرت سرحان هي الوصلت الخبر السلطان من كونها مغتاضة من وجودة هدية بالمعمل .
خذت هالحجاية هاي ام يسرى و ذبتها بحلك كواغد و برت بتها من السالفة …كواغد و درت مرت سرحان فاضحة بتها .
كضي الدرب وروحي لسرحان و عاتبته : عليش مريتك تفضح ابتي ، شنهي مشغلينها خاطر تفضحون بيها ، انا ما اتهمنك من كونك خيّر ومعدل لجنها من ذاك الوكت وهي تهدد ابتي ، ليما سوتها صكد و فضحت بيها بال ثجيل .
سرحان و درى بفخرية و مفتنة على هدية .. تسودن ، رد للبيت شايطة روحه …
اول ما دش و لن مروان واكف اعلى الحوض يلعب بالماي و الدنيا شتا باردة تكتل.
صاح : فخرررررررررية ، فخرررررررررية
ركضت خاطر تعرف سرحان عليش يصيح .. ليما وصلت كال الها : جاهل يلعب بالماي بهالبرد ، وين عنه انتتتتتتتت .
– داخل انا جنت احجي ويا عمتي هسه اخذنه ابدللة.
– اوكفي عدج .. شموصلج لال ثجيل و تكليلهم اعلى هدية بت حاكم تشتغل بالمعمل .. انا حذريتج من هالسالفة يو لا ؟ .
– ما رايحة ولا كايلة .
– انا حذررررررررررريتج يو لا
– تصيح علي شمالك .. كل هاذ جيف ال ثجيل عرفو بهديوة تشتغل عدك . جا من كونك خايف عليش مشغلها.
ويا ما حجتها وصفكها اعلى وجهه و كال الها : تلمين غراضج و ما تظلين عدي .. و يو ظليتي وعلي اطك ابالي اذبن يمين الطلاك اعليج واطلكنج.
كامت تبجي وتصيح .. وامها وكفت تداهر ويا سرحان .. حجه ويا امه كال الها : ارد ما الكاها بالبيت ، و يو لكيتها البيت هاذ اهدنه فوگکم.
طلع من البيت وراح للمضيف و هو يحجي لعمه اعلى سواية فخرية و كاله : اعذرني ما اريدنها ابيتي .
عمه ما رضى وكاله : انا اجتلها وادبنها ، بتي تمش لال ثجيل و تحجيلهم اعلى اسرارنا ، غير احطن ظهرها علوة نصه و اكسرنه الها.
سرحان من شاف ردة فعل عمه وياه موش ضده .. وراح للبيت وتعارك ويا بته و طكاها وغلط عليها ، رغم بته تحلف ماماشية لال ثجيل .. بس صف ويا سرحان اعلى بته .. سرحان استحى بعد يصر اعلى طلعتها من البيت .. ظل هاجرها و داير عنها و ينام بحجرة ابوه الشيخ و هاد الها الحجرة .
بس هالمشكلة هاي تسببت بشرخ كلش جبير بين سرحان و فخرية .. من كون هاي اول ردة فعل لسرحان ويوصل لهالعصبية بس لأن اعتقد فتنت على هدية ورادت تأذيها .
هي زادت بحقدها على هدية و هو زاد ابعده عنها .
وملوك ارتاحت لهالوضع .. ساعة الهان فخرية و متجاهلها و ما يعاين الها ، تمر منها و تحاجي بجنتها و تكللها : حجاية اعلى هدية كلب البيت فوك حدر وخبطها .. جا يو خذاها و خلها عده .. شيسوي .. يعبدها ؟
اشوفن بسرحان ينعاد بيه الوكت و يصير مثل ابوه ساعة العشكني و فضلاني اعلى الكل و حطاني شيخة فوك روس الوادم .
وفخرية تتسودن و تووعد لهدية .. خاطر تبعدها من سرحان .
……
راديون : من ساعة الرديت لعيالي و لهالساعة و انا بالكوة مخلصة ايامي وياهم .. عمي لا راضي اشتري اخشاب من كون فلوسي من سرحان. . ولا هو المشتريلنه .. وظاله اشدشد غريضاتي بوصل و اسويهن كوار وبقج .
بس اكولن تهون لجل عيون بسام من كونه زين وياي و عاشكني ، ما طب و طلع لا ما غازلاني و يسمعني هالجلمات التطير افادي و تخليني اعشكنه.
وفوك حبه الي .. حبه لبت اخوي ..
يو اشتغلت و لهيت عنها يشيلها اعلى اجتافه و يطلع بيها للزرع يلاعبها و يخلي الجهال يلعبون وياها .
تبجي و تخلص الليل بجي .. لا شكى منها و لا كالي : بليتينا بهالبت ، يظل حاير بيها وياي ليما نحطها بوسطنا و تنام .
وتصرفاته هاي تزيد بعشكي ليه، واكومن احبنه ازود من كبل.
لجن وضع اهله صعب كلش ..
عمي سلطان ما ينجرع .. يو صبحينا لزوم نكيم طقوس الطاعة ليها و نحب ايده وراسه ويظل يوجد بينا ياهي السابحة ، ياهي الشعرها مبلل ياهي الثوبها مغيرته.
وجسام شغل ما عده .. كاعد بالبيت ومناطر اخوه جاسم يدبرله فلوسه خاطر يطيه و يشتغل بيهن ، وكاعدلي بالبيت كعدة.
وانا موش مثل كبل بالاسود
من نزعت حزني اعلى اخوي .. كمت ما يمر يوم لا ما البس و اتزين .. من كون هاذ طبعي احبن ادري ارويحتي من جنت عد اهلي و لهاذ عمري. .
يو فزيت من النوم غسليت وجهي ومشطيت شعري و عطريت روحي و كحلت عيوني و حكيت اسنوني بالديرم و حطيت الحمرة .. و طلعت اكمل يومي
وجسام يو شافني هيج يتسودن و يكوم يدور ختلات خاطر يجرني ليه .
جم مرة بمرة نسوان حمويني يكضنا بمجان و هو يجرجرني ، و يروحن يشكن لعمتي نجمة و عمتي عدل وكبل بحلك سلطان … يسبينا سباية بالحجي و المعاير.
خو اذا شافني سابحة الصبح .. جا شيخلصني منه ، ذيج الفشاير التكش منها الاذن .. يفشر بالقلم العريض علي جدام حمويني و كل جلمة يذبها يخليني اسبح بمستحاي جدام الولد .
صديت شفت ما ارتاح لا ما اعزل لوحيدي ..
انا عدي فلوس خير من الله ، حطة ابوي من الورث عد.
سرحان يو طالبت بيها ما يكلي لا ومن عين باجر يبنيلي بيهن بيت.
وهم هواي ..
بس سلطان عده فوك ال٩ ولد
وولده كل واحد بيهم متزوج اثنين و ثلاث .. وفروخهم سرب ..
ظليت افكر هلبت الله يقنع جسام و يرضى نعزل لوحيدنا و انا مستعدة اطيه شكثر ما يريد .
جنت كاعدة و حاطة الوسادة اعلى رجلي و منتجية للحايط و منومة وسن اعلى اجدامي ومدثرتها و اهزن بيها خاطر تنام .
دش جسام للحجرة و صك الباب وراه ، عاينتله : هلا يبعد حيلي كله ..
– يفداج حيلي … شششش باردة
– كرب تدثر وياي بالبطانية.
تكرب و كعد وهو ينشد : نامت ؟
– لا بعدها اداور بعيونها هسه تغفى ، اكلك صالي ساعة افكر .
– خير ان شالله.
– لا خير .. اكولن يو نعزل لوحيدنا .. شتكول.
– بسم الله يا الله تونه اجداد .. حتى فرخ جاهل ما عدنا .
– اي صحيح بس جسام انت تعرف عيشتنا ويا اهلك ما تنطاك .. وابوك شما يمر بعمر يزيد ما ينكص.
– شني هالحجي رويدا
– موش كصدي احجي اعل. اهلك والله لجن تعاين الحال .
– و شبيدنا
– بيدنا نطلع
– اخوتي كبار ما طالعين ، انا اطلع .
– واخوتك مرتاحين ؟ ما تعاين حالهم .. حال اردى من حال ، شنهي ننطر نصير مثل حالهم .. ١١ فرخ بحجره.
– الله كريم .. تفرج .
– بس عليش ننطر واحنا نكدر نفرجها اعلى ارواحنا ، ابوك هيج هيج غالط ومفشر و مكسر فوك روسنا ، خلنا نعزل و نطي حجرته لواحد من اخوانك.
– رويده هالتشوفين وضعي لا شغل ولا عمل و ناطر جاسم هلبت يطيني فلوسي ، منين اجيبن ؟
– من يطيكياهن .. جيبهن والعدك اعلى العدي و نلمهن ونبني بيهن يو نشتريلنا كاع ، انا حصتي من ابوي جثيرة شفايدتهن يو ما تهنيت وارتاحيت بجالهن.
– وانا اروحن اخذ فلوسج و اشتري بيهن شمالج تسودنتي .
– جسام شنهي فلوسي و شنهي فلوسك .. انا بت خير وما اهاين لهالامور .. المهم عدي سعادتنا ، خلنا نلم فليساتنا و نعزل لوحيدنا ولا فشار ابوك ولا بسبست نسوان اخوتك و فتنتهن.
– ما صالج شهر و تضايكتي
– لا وعلي موش هيج .. بس انا صفنت بزماني وكلت شفايدة الفلوس ضامتهن واحنا هاذ حالنا ، مامش فرك بيني وبينك ان جان منك يو مني ، انت بس وافك .
– هدي هالسالفة هاي يبعد روحي ونومي البت بمجانها غفت .. و كربي ليجاي خل افرش هالشعر هاذ و انامن .
ما اقتنع و ظل يسوف بالحجي ليما سكتني و نمنا
صبحينا الصبح باردة ثلج .. حميت ماي و سبحت كبل كعدت الكل ، لجن حظي ويا طلعت سلطان من حجرته انا الخاولي اعلى راسي .. اركض لحجرتي .. وهو صارت عيونه بكصته .
دشيت وانا اكعد بجسام .. وكلتله : ترا ابوك شافني وانا الخاولي اعلى راسي ، تحضر للحجي هههه.
تبسم هو وكام اعلى حيله
مشى يغسل .. وانا مشطت روحي و تعطرت و كعدت وسن بدلت الها وكعدتها خاطر امشط راسها و اسمع سلطان يتعارك .
بعدت راس وسن من عدي و جاي اكومن .. فات جسام عاكد حواجبه و روحه شايطة : هاا تولاك ؟
ما رد علي و كام يلبس بملابسه عدل و ينشف بروحه ، مشطت وسن و سلطان يصيح ، كمل جسام وانا خلصت .. طلع كبلي وانا وراه اسدن بالباب .
ورد تلكاه سلطان ؛ هااا دشيت اخذت المقسوم .. اطتك اللهاية .. ارتاحييييت يو لالة
– بويه بسك النسوان منا عيب وعلي ، دشيت بدلت وطلعت ، ترا ما صايرة هاي .
– انا ابوك تكلي عيب عليك ، ولك جسيييييييم ، ترد بوجه ابوووووك .
كام اعلى حيلة و جاسم و نعمة يجرون بابوهم و يهدونه و سلطان متسودن شلون جسام يكله عيب .
اندار علي و يصيح : الكح*** فاكه روحج ليه ما تسحون اعلى ارواحكم يومية الخزان متروس من حدر سوالفك الغمة .. يو شفتج سبحتي يبت ضويحي بعد الا اكسر هالعوجية اعلى روسكم .
صرت بنص هدومي من يحجي هيج و يفشر علي فشار ما يخطر اعلى البال، مشيت للمطبخ وانا محتقنة ، روحي واصلة لخشمي .
لحكتني نجمة و هي تكلي : تراه حكه ما تستحين اعلى روحج طالعة جدام عمج الفجر و الخاولي اعلى راسج.
– جا انا متعمدة ، غير طلعت من الحمام و هو جدامي .. قابل داشة لحجرته و كايلتله شوف الخاولي اعلى راسي.
– السانج السان كاولية ، لجن ما عتب اعلى بت ضاحي الحرامي .
– بسكم سب و شتايم بجدي ، ياهو البيكم يوصل جدامه خاطر تشتمون بيه ، فحل من فحولة ثورة العشرين و الوادم كلها تحجي بخيرة و فضله اعلى الوادم ، بسكم .
طكتني اعلى وجهي و زادت بشتيمت جدي و تصيح : يو وصلت حجايتج هاي لسلطان الا يخلي دمج بطولج يالما عدج حيا .. كل وكتج تدحسين و يا الزلمة بحجرتج ، لا حاطة كدر لجبير ولا تكولين عيب من واحد .
ظلت تغلط و تفلت علي و مشت ، انا سكتت بس دموعي كامن يتجارن .. صبينا الريوك للولد .. و جسام كاعد مغندب ، عاين علي ساعة المديت السفرة ، شاف وجهي وعرف انا باجية .
ما تريك .. كام من الريوك ..
صاح سلطان : تلحك اعلى ****** اكعد .
جسام : انعل عشيرتي كلها واحد واحد يو ظليت بهالبيت ساعة …
كام سلطان اعلى حيله و هو يصيح : تنعل العشيرررررة ولك جسييييم .
نعمة : بويه بسكم خلنا نتريك بهنا ما طلع صباح هاذ .
– ولك ينعل العشيرة ، ولك هااااذ اغم يمشي ورا ذيال مرته .. انسجن بسبب صاحبها وبعده رايدها ابو كرون .
جسام كام يصيح و يدفر بالبيت و يصيح : ما اظلن والله … روووووووويدا شدي اغرلضج ياله .
نعمة : ولك استحي اعلى روحك تصيح وابوي جدامك شنهي تسودنت .
– اي تسودنت … وخليت العكل الكممم ، انا ابو كروووون ، انا مكرىررن ، بس ابوك داس بمصارررراتي بس … فاضت روحي من قهره اعدي واكولن ابوي بس ليمتهاااااااا .
سلطان : دعدي باب البيت و اطلع و شوف ابوك شيعمل بحالك .
جسام : ما اظل ، يو اعيشن بصريفة مااااا اظلن بهالبيت ، من الصبح توليتني اعلى السبح و فشارك علي و اعلى مرتي .. وتختمها علي بابو كروووون بسك عني .
كام سلطان و بكل قوته ، وطك جسام بعوجيتك اعلى راسه .. ارتفع الصياح ما تعرف من صياح جسام لو اخوانه اليجرون و يفازعون لو النسوان و الأكل الانداس و الجهال التتباجة .
جريت وسن و دشيت للحجرة ابجي
وعلي يو ادري هيج مصيبة لضلن بوصخي ولا اسبح و يجرى علينا هالمصايب هاي ، كمت ابجي بهداي وانا جارة بت اخوي ومكعدتها بحجرتي .
دش جسام للحجرة و هو يصيح علي و يكلي : لمي اغراضج و كوميلنا يااااله .
– وين نروح
– كوووووووومي جاي اكلج
كمت بساع و انا المن هاليطلع بيدي و دموعي تجري و هو يصيح و يسمع بابوه : بعت اخشابي و كلت اسكت بعت سيارتي و صميت خلكي خذيت الجواي و الوراي وكلت ابوي ، تفشر و تغلط كل يوم واكوووولن ابوي ، جزعت كااافي ، يو ظال بالسجن ولا سجنك .. جزعتتتتت جززززعت .
كربت منه خاطر اهديه لجن نار وما يعاين احد دفعني و هو يصيح : لمييييي بساع .
المن و دش سلطان ، وهو متجي ايده اعلى العوجية و يمشي بهداي ، وكاله : تهد ابوك تريد ولك و تعزل بمره .. تهد ابوك لجل مرة يجسام .
جسام : عووووفني رحمة الوالديك بويه هددددني ، اعتبرني فاطس بالسجن ومست ولا تعدني من ولدك ، هدني ترا بالقران جزعت اطلع من السجن اشوف الدينا يو اشوووف الضيمممم
ويا ما حجاها وطلع الكتب من حدر سترته و ذباهن اعلى الفراش و كاله : جرب اطلع و عدي عتبة الباب .
جسام ظل يعاين للكتب ، ما استوعب اول بداية شيقصد ابوه ، ظل يعاين اله و يعاين للكتب ، تذكرهن ذني مالاته … اندار لابوه : تهددني .
– الولد اليهد ابوه لجل مرة موش ولد وموته اهون اعلى افادي من يفضل علي مرة و يمش عني … يو فكرت تطلع عن طوري ، بيدي اسلمنك للحزب و اخليهم يعدمونك انت وهاي بت ضويحي الحرامي …
