Uncategorized

رواية الوقوع في الحب الحلقة الرابعة 4 بقلم هبوش

 رواية الوقوع في الحب الحلقة الرابعة 4 بقلم هبوش 

رواية الوقوع في الحب الحلقة الرابعة 4 بقلم هبوش 

رواية الوقوع في الحب الحلقة الرابعة 4 بقلم هبوش 

جوري/ حي علياااا زعما طايح مني بعد نزلت من السيارة 

ساجدة/ فنصت فاها… نهااارك الاحرف صورك معبى التلفون ????

جوري/ بخوف… اااوووه اعلياااااا هاااتي تلفونك نتصل بيه… 

طلعتلها تلفونها واتصلت جوري برقمها قعد يضرب 

جوري/ بقلق…يضرررب قاااعد… 

وادم كان امدرس سيارته نازل منها و ايهدرز مع صاحبه 

قعدت جوري تتصل كذا مرة بس مافيش حد رد 

ساجدة/ بترقب… شن صااار 

جوري/ مزال يضرب زعما مش لاقيه حد 

ساجدة/ ان شاءالله حاولي اخرى توا نشوف المشرفة بالكي تبعث حد برا ايشوفه 

جوري/ ايه باااهي…وعاودت اتصلت 

وصاحب ادم كان مستند ع السيارة ويسمع فيه 

صاحبه / تلفونك من بكري نسمع فيه ايرن 

ادم/ باستغراب… تلفووني ني…

وطلعه من جيبه شبحله…

ادم/ مافيش حد رن 

صاحبه/والله صوت تلفون… 

والتفت فتح باب السيارة وصوت وضح 

ادم/ بتعجب… اي صح زعما من ناسيه عندي… 

وخش لسيارة ايتبع في صوته 

دور شوي وشبحه طايح تحت الكرسي اللي جنبه طلعه بيده وقعز يشبحله قاعد يضرب واسم ساجدة طالع ع الشاشة 

قبل مايفصل فتح عليه 

ادم/ الوووو… 

و جوري كانت بتصكر تلفون سمعت صوت رجعاته ع وذنها وردت 

جوري/ الوووو بالله ياخوي تلفوني هذا وين لقيته 

ادم/ بغضب… ووووين كاان عقلك باااهي ماطاح منك برا السيارة 

جوري/ ااادم!!؟ اوووووو???? وين لقيته 

ادم/ لقيته طايح في سيارة وين ماكنتي امقعمزة 

جوري/حطت يدها على قلبها…باااهي الحمدلله اقفله وخليه عندك لعند ماتجي تاخذنا…

وصبت تلحق في ساجدة 

ادم/ اوووكي???? …

وصكروا الخط 

صاحبه/ تلفون بنت خالتك 

ادم/ حطه في جيبه…اهااا 

صاحبه/ والله بنت حلال لو طاح منها في شارع معاد تلقاه 

ادم/ حك لحيته… اييي هيا مالا انتلاقوا 

صاحبه/ وين ماشي خليك ايحطوا في العشى 

ادم/ خليها مرة ثانية عندي شغل بنديره قبل مانروحه بيهم 

صاحبه/ اوكي يابرو انشوفك غدوة 

ادم/ سلام… ولع السيارة ومشى 

لعند ماوصل جنب القاعة درس السيارة وطفها… 

خذا تلفونها وفتحه بكل سهولة لان ادم خبير في الكترونيات ويعرف كيف يفتح التلفون اللي امامن بالبسبورد 

اول حاجة دارها خش ع المسنجر وقعد يتفحص فيه ومع من ادردش دور في كل المحادثات ومالقاش اي حاجة من اللي براسه ابتسم بفرحة وخذا نفس طويل بايرحية 

كمل تفحص وقبل مايصكره خش ع الاستديو 

ويلقي صورها ????قعد بالصورة يكبر ويصغر ويشوف لكل تفاصيلها 

ادم/ باس صورتها… محلاااك وربي اتجنني… 

وطلع تلفونه افتحه ودار تحديد للكل وبعثهم لتلفونه???? و قفله وحطه في قرج السيارة 

…… 

عندي 

مستندة ع السرير و نفتح في مواقع اتساعدني كيف انزيد انطور من خبرتي 

جاني شعار طلب صداقة خشيت عليه 

ولقيته يامن 

انا/ ????من وين عرف ايميلي ???? زعما نقبل ولا لا نقبل ولا لا اممممم يلاااا انشوف شن يطلع منه????… 

وافقت ع الطلب 

وخشيت في جولة تفقدية في منشوراته وحي ع البنات اللي ضايفهن اكثر من شعر راسي ههههه وكل منشور فوق من مئة تعليق و اغلبهن بنات من انحاء العالم ????

انا/ بانزعاج… خززززي مش امزعل دولة…

وطلعت من صفحته ورجعت ع اليوتيوب 

اشوي وبعثلي مسج 

يامن/ بسرعة وافقتي ع طلب الصداقه شوره ماصدقتي????

انا/ ????????… من معاي لو سمحت…

يامن/ ههههه تبي تقنعيني ماتعرفيش من انا ولا خشيتي ع صفحة ????

انا/ لو انت فاضي اني مش فاضية لسخافتك ومايشرفنيش نعرفك وهيااا باااي… ودرتله حظر 

انا/ بغضب… حقيررررر وحتى اني حيوانة نستاهل ليش وافقت ورديت عليه ????… 

يامن/ ههههههه غبية ???? 

صاحبه/ يشرب في ارقيلة… خيرك تضحك 

يامن/ شبحله مع رفعت حاجب… شنو حرام نضحك… 

صاحبه/ لا انت بذات حلال… وجبد ايدخن

… معش فتحت المكتب 

يامن/ خليه مصكر شن عندي ماندير بيه 

صاحبه/ و كيف قاعد بلا شغل ياراجل نشتغلوا و الوقت ماحوتك يمشي ملل وكساد للنم 

يامن/ توا نفتحه مرتين في الاسبوع اهو تغيرت جو 

صاحبه/ مزلت تبي سكرتيرة ولا خلاص 

يامن/ تي فوتهم النفخ كان بتقعد كيف اللي قبلها تضحكلها تلصق فيك وتنكد عيشتك 

صاحبه/ هههههه وانت مش امقصر 

يامن/ هذا هو انا من الاول انقول ماتفكرش في الارتباط شن بنديرلهم عاد 

صاحبه/ لعند امتى بتكملها عزري ماتبيش تتنزوج!؟ 

يامن/ شن خطرها عليك???? من بعثك 

صاحبه/ هههههههه لالا مافيش حد اطمن 

يامن/ شاف لساعته… نمشي غدوة بنوض بكري… 

صاحبه/ بتفتح المكتب مالا 

يامن/ خذا تلفونه… ماشي للمزرعة مع بوي 

صاحبه/ باستغراب… انت! تمشي للمزرعة شن بدير غادي؟ 

يامن/ في موضوع بنتمه وضروري نكون متواجد هيا سلام…

روح للحوش وهذا اليوم الثاني على التوالي ايروح ومايسهرش مع شلة الصياع ????

……….. ????????????????????????????????????????

ساعة احداش طلعوا صفية وغالية والبنات من العرس وادم يستنى برا 

ركبوا كلهم 

ادم/ شن جو العرس 

صفية/ ما شاء الله عليه عقبالك يانور عيني 

غالية/ ان شاءالله عقبالهم كلهم 

ادم/ ايسوق وحك لحيته… هيا مالا دوريلي على عروس… 

ورفع عينه يشبح لجوري… ????

صفية/ امغير انت انوي ما عليك بالعروس 

ادم/ ماعنديش مشكلة حتى من غدوة نتزوج اهم حاجه اتكون شقراء وشعرها اصفر هههه… قاطعاته جوري 

جوري/ بانزعاج… وووين تلفوني 

ادم/ اااااا صح ذكرتيني كذا يا امي افتحي القرج طلعي تلفون 

صفية/ فتحته… باهي اللي طاح هنا مش في شارع 

غالية/ بغضب… بلكي اتحرم اتصور بيه والله كان طاح في يد ولد حرام كانوا صورك ع النت 

جوري/ بملل… دايرتله باسبورد 

ادم/ بستهزاء… هه ابقي عبي عليها 

غالية/ مرة ثانية انتبهي كويس وبطلي اتصوري روحك راه وقت توا ايخوف 

جوري/ باهي خلاص درتوهالي قصة اوووف????

ادم/????…

غالية/ تسال في ادم… ماتعرفش امتى بيروحوا عبود ومعاذ 

ادم/ لا والله ياخالتي الحق ما كلمتهم 

غالية/ بضيق… وخيرهم مايتصلوا مايقولوش ننشغلوا عليهم 

صفية/ بتنهيدة…والله الحاج رقيتله منه وحاط اللؤم عليا 

ساجدة/ ان شاءالله ربي يهديهم 

ادم/ مش عارف ليش امكبرين الموضوع شن فاها ايسافروا ويفرهدوا مش جريمة هي

جوري/????

صفية/ باهي يتصلوا ع الاقل مايخلوناش مشغولين 

ادم/ عادي مدوريش توا كم يوم وايروحوا 

… 

وكملوا الطريق هدرزة عامة وادم كل شوي يسرق في نضرة لجوري اللي فاتحة تلفونها وغارسة وجهها فيه… 

اخر الليل 

ادم راقد في سريره ويتفرج ع صور بابتسامة عريضة وعيون قلوب ????

اما جوري بعد بدلت حوايجها كلمت صحباتها ع الواتس لعند ساعة 2 

و ساجدة جنبها تهدرز مع خطيبها ويسأل فاها ع العرس وشن لبستي ومن رفعكم عاد خطيبها غيور هلبا وناقر عليها 

عند يامن راقد من ساعة بعد ماتقلب هلبا وهو ايخطط ويفكر كيف ايبعدني عن بوه عاد واخذ فكرة عني اني نبي نلعب ع الحاج بيش يتزوجني ???? 

.

.

تسريع في الاحداث 

فات اسبوع عادي مافيش جديد ويامن يوميا ايجي يقعد في المزرعة ويستفز فيا والحاج سليمان حس بغيرة يامن وانه قاصد ايجي للمزرعة فاعجباته القطة وقعد ايزيد في شك يامن وايدير في حاجات تخليه يغتاض ???? عاد الحاج فاهم عليه وعرف كيف ايجيبه للطريق 

اما جوري امتحانات ولاهية في القراية وادم كل فترة ايجي مخصوص عشان ايشوفها حتى لو من بعيد 

اما اني وضعي كيف ماهو في الحوش عرايك مع نجوى وفي المزرعة عرايك مع يامن ????‍♀️ عاد وين انا وين الهم 

ثاني اسبوع 

روحوا معاذ وعبود من تونس بس كان في توتر وخوف واضح عليهم 

جرس الباب يضرب 

صفية/ فتحت الباب… معاااذ الحمدلله ع السلامة حبيبي … وخذاته تحضن فيه 

معاذ/ حاضنها وبصوت مرتعش… الله ااايسلمك ياام 

صفية/ شدت وجه… هكي ادير فيا تشغلني عليك ليش ماكلمتني ولا كلمت خوتك طمنتنا عليك

معاذ/ نحى ايديها… مممافضيتش ووونسيت نكلمكمممم… 

ونزل الشنطة من اكتافه 

معاذ/ حوووايجي اااغسلهملي…

وكان يتكلم وجه شاحب ومرتبك

صفية/ تشبحله باستغراب… معاااذ خيررك ياوليدي مريض 

معاذ/ بخوف… ااااا لالا كوويس بس تعبااان من الطريق بنمشي ااندوش ونرررقد… 

ومشى من جنبها وهو طالع فوق وقف التفتلها 

معاذ/ بيش تغسلهم كلهم وسخين

صفية/ تشبحله… باهي توا انحطهم في الغسالة … 

وقعدت اتبع فيه بعيونها لين اختفى عليها 

صفية/ بتنهيدة… يستر الله حالته مش عجباني ابصر شن صاير لا حول ولاقوة الابالله مزال بعد ايروح الحاج بيدير نهار ????????…

وخذت الشنطة خشت للدار الغسيل وقعدت اطلع في الحوايج وتحط في الغسالة وكل قطعة اطلعها تشبحلها وتشمها 

اخر شي انتبهت لتيشرت في تمزقات وبقع دم ???? خذاته وطلعت لعنده وقلبها ????

خشت لداره وقعدت تخبط ع باب الحمام

صفية/ معاااذ ااافتح قولي هذااا شنوووو…

و معاذ كان تحت الدوش طلع حط المنشف ع نصه 

معاذ/ قااعد ااندوش يام شن تبي … 

صفية/ شادة التيشرت… هذاااا شنووو 

معاذ/ بربكة… شنوووو 

صفية/ اااشبح كيف قاعد امشرك وعليه بقع دم شن صاااير يااامعاذ 

معاذ/ ندشه منها… مااافيش حااااجة طحت من السيارة اتشرك وانجرررحت…

خبطت ع صدرها وقربت اتحسس عليه وتلمس في جسمه

صفية/ ان شاءالله بس مش منضر وكيف طحت ياااهمي 

معاذ/ بعد ايديها… مااتخافيش قاعد كويس…

ورجع للحمام عزق التشرت في سلة الكناسة 

صفية/ تربح ياوليدي معش اتسافر من راسك راهو بوك زعلان منك 

معاذ/ بنرفزة… اووووه عليناااا خلاص خليني توا راااسي يبي ينفجر…

ومشى لدولابه طلع حوايجه

صفية/ بقلق… باهي ارقد تريح اشوية قبل مايروح بوك

………… ????????????????????????????????????

في مزراعة

انا/ فتحت باب المكتب…ممكن ياااستاذ اتفهمني شن اللي درته 

يامن/ ايلف بالكرسي… شن دررت… 

انا/????… ااسمع راهو والله ساكتة عشان خاطر الحاج ماتخلينيش نطلع من طورري 

يامن/ ضحك بهزوة… ههههههه شن بديري مثلا يا ست شوكة 

انا/ قربت منه بغضب… شغلي ماتدخلش فيه ولو سمحت هاات مفتاح المخزن اني نعرف شن اللي بنستحقهم 

يامن/تؤتؤتؤ هيا ارجعي لمكتبك وقت ادوري حاجة اني بنطلعهم على مااعتقد المزرعة مزرعتنا واني مسؤول على رزقنا وكيف مايقولوا المال السايب ايعلم السرقة 

وانا بنحرس عليه من النفوس المريضة ????

انا/ بغضب… شن قصدك???? اني سراقة 

يامن/ ايهز بالكرسي… ماقلتش انتي! قلت النفوس المريضة انتي النفوس المريضة!؟ ????

انا/ تنهدت بنفس طويل … اللهم جيبك ياطولت البال صار هكي باهي خليه عندك بس ماتروحش لين ما اني نكمل دوامي وانروح ????… وجيت بنطلع 

يامن/ هاااييي اسمعي مش انتي اللي تامريني وقت ايصحلي نطلع 

انا/ من غير مانشبحله… اوكي كلامي مع الحاج مش معك انت…

نقز رقيتله وجاء لعندي بنفتح الباب شدني لفني ليه 

يامن/ بتفنيصة… مش عاااجبك ولا مش مالي عينك ششششن تحسابي رووحك فيقي راهو وقسم بالله رجلك معش ايدوس المزرعة وترجعي وين ماكنتي… ????

انا/ عيني في عينه… مش وردة اللي تخاف من تهديداتك وياريت تخليك بعيد عليا احسن مانشكيك للحاج يعرف شغله معك????

زاد ضغط ع يدي وقرب مني لدرجة انفاسه تخالط انفاسي وجسمي كله تقشعر من قربه وعطره ????

يامن/ بخبث… واثقة من نفسك هلبا… وعيونه نزلوا لشفافي اللي بدوا يرعشوا 

انا/ بلبكة… نحي ااايدك خليني نمشي … وقعدت بنفك روحي منه 

يامن/ لصقني ع الباب… مش مخليك و عنادك مش ح ينفعك… 

ونزل وجهه يبي ايبوسني دفيته من صدره 

انا/ راهو زودتهاااا والله معاد سكتالك… ????

وطلعت متصنعة القوة وداخلي كله يضرب في بعضه رعشة على حرارة على دقات قلب سريعة وكان زاد شوية راه كنت ميتة بين ايديه ???????? وصلت مكتبي وصكرته وراي وانا في حالة ????

يامن/ ههههه ومزال ماشفتي شي يا شوكة لو ماخليتك تندمي على خشتك للمزرعة مايكون اسمي يامن ????… 

انا/ مستندة ع الباب ويدي ع قلبي… اااهدي ياوردة ااااااووووووه… 

وخذيت زفير وشهيق ????????

انا/ نشبح ليدي… شن صارلي ليش نرعش هكي اوف ديري بالك تضعفي ياوردة انتي هنا جاية تشتغلي ماتخليش يلعب بي مشاعرك 

انا/ هزيت راسي… انا قوية ومش ح يحرك فيا شعرة ???? ياحليلي لو مش مغرور وعدواني اووووف شن اللي نحس فيه بعد نشبحه معقولة ايكون هو لالالا مستحيل انحب انسان تافه ومتكبر اي مستحيل ????… 

تقدمت للمكتب وقعمزت حاطة وجهي بين ايديا ونشبح للباب بسرحان 

فات الوقت وخش خالي المكتب

خ محمود/ بنمشي مشوار توا انجي 

انا/ وين؟ 

خ محمود/ الحاج سليمان بعث لي نمشي انشوفه ونرجعلك بيش انروح بيك 

انا/ بملل… باهي 

خ محمود/ ان شاءالله مش امطول وتوا انوصي يامن يقعد في المزرعة بيش ايونسك لين مانجي 

انا/ بتمتمة… هه ايونسني! 

خ محمود/ شن قلتي 

انا/ بااهي باه ????… 

مشى لعند يامن دق الباب وخش 

خ محمود/ يامن تربح نوصيك تقعد في المزرعة ماتخليش وردة بروحها لعند مانجي 

يامن/ خير في حاجه 

خ محمود/ الحاج يبيني ضروري ومرات انطول ولا حاجة 

يامن/ لا تمام امشي اني قاعد 

خ محمود/ بارك الله فيك… 

وطلع ماشي للحاج 

ويامن ارتسمت ضحكة خبيثة ع وجه وصبى من مكتبه وجاء لعندي فتح الباب من غير مايستاذن 

انا/ بغضب… كيف تخش بدون استاذن ماتعرفش الذوق 

يامن/ بهزوة… شوفوا من يحكي هه الذوق بنتعلمه منك ????

انا/ بنرفزة… قول شن تبي 

يامن/ مانبي شي جيت انقولك خالك طلع وصاني عليك ???? 

انا/ بستعجال… اي اي ايي عارفة 

يامن/ خش وصكر الباب… كويس ????

انا/ زمطت وبربكة… علاااش صكررته ااافتح الباااب 

يامن/ التفت للباب ورجع شبحلي… خيرك خايفة عادي بنهدرزوا ع شغل ونشربوا قهوة… وجاء قعمز

انا/ مممش خاايفة ليش ااانخااف ????… رجعت قعمزت مكاني 

يامن/ يشبح للمكتب… مكتبك حلو 

انا/ عيني في تلفون… شكرا 

يامن/ العفو???? وين اشتغلتي قبل ماتجي هنا 

انا/ في عيادة… 

يامن/ممممم… وصبى جاء لعندي وانا عرقت وقلبي ايخبط رفعت وجهي شبحتله

انا/ ااارجع لمكانك لوووسمحت… وبلعت بخوف 

يامن/ عقد حاجبه… علاش ممنوع نوقف ع الروشن… ????

????وفاتني وفتح الروشن خلفي قعد واقف عليه

انا/????

يامن/ جو حلو برا… والتفت يشبحلي 

انا/ اي حلووو

و يامن رجع خطوة وطبس عليا وايديه ع مكتب ويشبحلي عن قرب

يامن/ شن رايك نطلعوا ناخذوا دورة في البلاد بعيد عن جو المزرعة الممل☺️

انا/ بلكلكة… لالا شكرا عندددي شغل تقدررر تمشي عااادي نقعد بروحي مششش خااايفة وووخالي توااا ايجي 

يامن/ شد يدي… خيرك ترعشي شنو امصقعة اندفيك????… 

وقعد يفرك فاها بين ايديه واني بنموت من حركته ونضراته اللي يسحروا قعدت نشبحله بسرحان ونسيت نفسي 

ويامن مزال يتحسس يدي وزاد قرب مني 

وووهب جيت بنوقف ننضرب في صفة الروشن اللي مفتوح فوق راسي عيطت عيطة هك كبرها بعد الخبطة جيت طحت مكان ماكنت مقعمزة بس بدل الكرسي طحت ع الأرض 

يامن/????????????????

انا/ اااااااي ياااارسي ااااهه ااااااههه كله منك خليته مفتوووح????

يامن/ ميت ضحك…ماااتشوفش انت ????????

انا/ ???? علاااش تضحك يابارررد 

يامن/ ههههه تعالي هاتي ايدك ????… 

وطبس مد يده ايساعدني نوقف 

انا/ بعدت يده… زيح غاادي مانبيش مساعدتك نعرررف نصبي بروحي… 

وقعدت انصبي ونتحسس راسي ????

يامن/ اسطفلي ????

انا/ بغضب… متشمت فيااا ان شاءالله في راسك ???? 

يامن/ بالضحكة… لو تشبحي لشكلك كيف ولة هههههههه ????

انا/ فنصت فيه… ممكن تطلع برااا 

يامن/ ههههه طالع طالع يخرب عقلك على هالشعر اللي عندك من امتى مامشطتيه ههههههه 

… ومشى يضحك ????????

انا/بستغراب… شعري!… 

ولمست راسي???? تذكرت قاعدة بدون وشاح وشعري اللي شديته عشوائي اغلبيته منكوش خشيت نجري للحمام شبحت لروحي ع المرايا 

انا/ ???? حييييي هذا شنو واااك عليااا توا يهزاء ع شكلي اني ناقصة ااااوووف ????????

… 

ونحيت الشدة شفت مكان الخبطة كيف متورمة تاففت ورجعت لفيت شعري باهمال ولبست وشاحي كويس طلعت نشوف لمكتبي وكيف كان يامن قريب مني استرجعت الموقف وانا مبتسمة وبعدين متت ضحك عللي صار???????? 

لما مشى خالي للحاج ????

طلعوا من المصنع ومشيوا لمنطقة خارج طرابلس وخذاهم الوقت وهم من شغل لشغل

واني كل شوي نشوف للساعة وبعد جت الخمسة ونص اتصلت عليه 

انا/ الووو ها ياخالي وينك 

خ محمود/ شاف ساعته… سامحيني والله مانتبهت للوقت 

انا/ باهي امتى اتجي راهو عطلت ونبي انروح

خ محمود/ توا نتصل بعزيز ايجيك مازلنا امطولين

انا/ باهي شوفه ايجي توا…. 

صكر مني واتصل عليه 

خ محمود/ الوو خير ياعزيز 

عزيز/ اهلين ياخالي كيف حالك

خ محمود/ كويس كويس اسمع بيش تمشي اتروح بوردة انا طلعت ومطول برا 

عزيز/ كييف وليش ماجت معك بعد طلعت 

خ محمود/ كان عندي شغل ومزال دوامها هيا امشيلها قاعدة تستنى فيك 

عزيز/ انا توا في الورشة عطلت بيا السيارة خليها تستنى ساعة اخرى وانجيها 

خ محمود/ ساعة اخرى وقت مغرب ماضنيش تابة 

عزيز / زبري شن بنديرلها 

خ محمود/ خلاص توا نتصرف بالكي انروحوا توا… 

مشى خالي للحاج قاعد واقف مع صاحب الشغل قاطعه كلمه على جنب وقاله وردة تبي اتروح للحوش وقت عليها وان عزيز سيارته عاطلة بيه 

ح سليمان/ حتى لو روحنا تبي ساعة خليك توا نقول ليامن ايروح بيها…وعلى طول طلع تلفونه اتصل بيه 

وخالي ماقدرش ايقوله لا وعارف لو خوي عزيز يعرف ان يامن وصلني للحوش ايديرلي مشكلة قعد خالي ساكت ويشوفله هو ايكلم في يامن ويطلب منه ايروح بيا 

ح سليمان/ اطمن عليها وصيت يامن ايوصلها لعند باب الحوش 

خ محمود/ بس ياحاج خايف من خوها ايعاركها راكبة مع حد غريب و… قاطعه 

ح سليمان/ ابتسم… مش ح يكون غريب ان شاءالله … 

خ محمود/ بعدم فهم… ان شاءالله خير 

ح سليمان/ باذن اللة خير ????… 

عندي اتصل خالي جيت رديت عليه خش يامن 

انا/ نشبح ليامن… ها ياخالي شن قالك عزيز 

خ محمود/ عزيز سيارته في الورشة ومطول 

انا/ بخيبة… اااه اامطول هلبا يعني ولا شنو

خ محمود/ معليش يابنتي توا ايروح بيك يامن كلمه الحاج توا… 

ويامن مستند ع الباب وايديه في جيبه ????

انا/ بملل… اووووف ????????

… صكرت منه بخيبة 

يامن/ بنضرة نصر… هيا نمشوا 

انا/ اوكي شوية بس… 

و درت روحي مش هامني ونلف في معدات في الشنطة رفعت راسي شبحتله 

انا/ اوكي خلاص توا نلحقك… 

يامن/ عدل وقفته… تمام ماتعطليش… ومشى 

تاففت وخذيت شنطتي وطلعت بعد ماصكرت المكتب 

ويامن في سيارة شغل ع الاغاني واني جيت فتحت باب السيارة بنركب وقفني 

يامن/ اااستني… وحط قطعة فرش حطه ع الكرسي 

يامن/ توا اركبي????

انا/ عصبت من لقطته… معش بنركب… 

وخبط الباب بالقوة 

يامن/ نزل ايعيط عليا… بشوووية ع 

البااب الزززح كسرتي ااامه 

انا/بغضب… مزال نكسر خشمك ياااتافه يامتعجرررف … 

وجيت ماشية لداخل 

يامن/ لحقني شد يدي … وووقفي وين ماشيه

انا/ فنصت فيه… نحي اايدك احسن مانكسرهالك هي الاخرى 

يامن/ غمزلي… كذا جربي يامفترسة ????

انا/ اانت واااحد بااا… قاطعني تلفون ايرن 

انا/ نتشت يدي وطلعت تلفوني … الووو ياخالي 

خ محمود/ ها ياوردة طلعتوا 

انا/ااا لا هيا طلعين توا 

خ محمود/ باهي يابنتي ديري بالك من روحك وكان سألك عزيز قولي خالي روح بيا 

انا/ تمام… 

حطيت تلفون في شنطة ومشيت للسيارة فتحتها وركبت معصبة لان مضطرة نمشي معه ????

يامن/ جاء ركب ايسوق… انتي مسمومة على فكرة…وشغل السيارة 

وانا سكتت مانبيش انرد عليه قعد يستفز فيا بطريقة غير مباشرة وانا درت وجهي للمرش ونشوف للطريق بعد وقت درس السيارة 

انا/ شبحتله… خيرك وقفت 

يامن/ توا انجي… 

ونزل صكر الباب ولف خش لعمارة فاها مكاتب 

قعدت ننفخ ونشوف للساعة فات خمس دقائق وماجاش قعدت نضرب في الكلاكس السيارة و مع هذا ماطلعش 

سلمت امري لله واستنيته وبعد ربع ساعة بيش نزل وانا النار طالعة من اوذاني ????

اول ماركب عيطت عليه 

انا/ كيييف تخليني كل هالوقت في السيارة ليش ماااانزلتني في حوشنااا ومشيت لشغلك 

يامن/ ايشغل في السيارة…بالكي نشتغل عندك سواق وانا مانعرفش ????

انا/ بغضب… هذا اسمه قلت ذوق وانا اللي غبية مشيت معك 

يامن/ خلاص ياغبية معش تعاوديها وتمشي معاي 

انا/ نفخت????… الله اايسامحك يا خالي ااالله ااايسامحك

يامن/ روقي راه ايطق فيك شي عرق ????

انا/ ???? ممكن اتزيد السرعة هكي مش ح نوصل الا مغرب 

يامن/ لا اسف هذه السرعة اللي نمشي فاها تجنبا للحوادث ????

انا/ تحمقت… اوووف شن درت في روحي الله ياااخذني… 

يامن/ بصوت ضعيف… ان شاءالله ????

… 

ورفع صوت المسجل وكملنا طريق في هدؤء تام لين درس بالقوة واني كنت سارحة نقزت وتحركت من الكرسي قريب انضربت في المرش لو ما حطيت ايدايا سندت روحي

انا/ عيطت عليه… هاااااايي مااااتشوفش ياااغبي 

يامن/ اااحترمي نفسك من بكري تغلطي واني ساكتلك… 

وطفى السيارة وفتح الباب بينزل 

انا/ نشيحله بتعجب… ووين ماشي 

يامن/ من غير مايشبحلي…مش شغلك…ونزل 

انا/ عيطت عليه…تعااال هناااا وصلني قبل…

وجيت بنفتح الباب مابش يفتح قعدت نخبط ع مرش 

انا/ ااافتح السيارررة ✋ياااامن ????…

وفاتني ماعبرنيش وخش لمحل واني نار ????شاعلة وعزيز يتصل معش عرفت شن اندير بلعت رياقي ورديت عليه 

عزيز/ وووينك تواااا 

انا/ في طرريق قريب نوووصل 

عزيز/ مع من؟ 

انا/ مع من يعني مع خاالي ????

عزيز/ باهي باهي

انا/ بربكة… انت روحت ولااا مزال 

عزيز/ توا خشيت الحوش 

انا/ ???? ااااه اوكي سلااام… 

وصكرت منه وضربت ع خدي 

انا/ واااه عليااااا ني نهاري الاحرف من عزيز يذبحني ويشرب من دمي ????…

واستنيت يامن على نار لين شبحته طالع يتكلم بتلفون ويضحك جن اجنوني من بروده اول مافتح الباب بيركب 

انا/ ووووقسم بالله انت واااحد تااافه وعديم المسؤولية… قاطعني

يامن/ ضمي فمك قاعدين في شاارع شن االهم ااحمدي ربك انوصل فيك… وركب ايسوق 

انا/ نفتح فالباب… اافتحلي بننززززل… 

وقعدت نحرك في مقبض الباب بالقوة 

يامن/ شد يدي… تكسري الفاااسد… 

انا/ فنصت فيه وكنا اقراب هلبا… نززلني معش بنمشي معك ????

يامن/ بكل هدؤء شبح لفمي… هبلة من بيوصلك بعدين ????… وابتسم ع جنب ????

انا/ مالكش دخل اااافتح الباب. ????وخبطته بيدي

يامن/ اوووص… وعض ع شفته… مزال النهار طويل علاش مستعجلة… 

ونضراته لشفافي زادت توتر وقلبي دقاته سريعة حاولت مانخليه ايحس بالارباك اللي اني فيه تمالكت روحي وتكلمت بهدؤء 

انا/ توا خوي كلمني يسأل عليا ياريت تسرع شوي مانبيش مشاكل معه 

يامن/ رجع ع كرسيه وشغل السيارة… اوكي اوكي… 

ومشينا بعد وصلنا الشارع 

انا/ وقف هنا توا انكمل مشي 

يامن/ علاااش 

انا/ هك وخلاص هيا اوقف 

يامن/ تمام تمام… ودرس ع جنب فتحت الباب نزلت 

يامن/ باهي على الاقل قولي شكرا 

انا/ بستهزاء… على شنو ع حرق الاعصاب وكل شوي يخطر عليك مشوار…

وخبطت الباب بالقوة ???? نكاية فيه

يامن/ طلع راسه من روشن… باااهي توا ايبانلك ????… 

ورجع ايسوق فات من جنبي حرق العجل بيش ايخوفني وطار بسيارة 

انا/ بحقد… خزي يااامريض … 

وكملت لعند خشيت الحوش 

يامن/ مساء الخير صوفي… وعزق روحه ع صالون 

صفية/ بسرحان… مساااء النورررر 

يامن/ شبحلها بتعجب… خيرك قالبتها 

صفية/ بزعلة… خوك روح من تونس 

يامن/ ههه وباهي ليش زعلانة! هو وين توا؟

صفية/ راقد في داره والله اعلم شن صاير معه 

يامن/ بستغراب… شن في 

صفية/ ماقال شي بس هك ماعجبنيش ولقيت قميص مشرك وملبص بالدم 

يامن/ اهااا اكيد متعارك مع شي حد 

صفية/ تشبحله… تربح احكي معه و اعرف شن صايرله 

يامن/ باهي ماتشغليش روحك… وعدل قعدته… الحاج مزال ماروحش؟ 

صفية/ بتنهيدة… لا ربك يستر هو بروحه عابي ايديرله نهار بعد ايشوفه ????????

يامن/ حك لحيته…فوتيهم ركزي معاي نقولك على حاجة بس ساعديني فاها 

صفية/ شنو 

يامن/ نبي ناخذ استراحة وعاد انتي اقنعيه كل حد ياخذله حاجة باسمه 

صفية/ شن المغزى والله مافهمت عليك 

يامن/ باهي انفهمك هذا….

وقعد يحكيلها 

فات الوقت وروح الحاج بعد اذان العشاء 

خش دوش وطلع يتعشى وكانوا كلهم قعدين ماعادا معاذ مزال راقد ومايبش اينوض 

ح سليمان/ بسم الله… وقعد ياكل 

ادم/ يا حاج نبي خمس الاف دينار 

ح سليمان/ رفع عينه فيه… شن تبي فيهم 

ادم/ بناخذ كاميرة جديدة انكمل بيها شغلي 

ح سليمان/ توا ماعنديش استنى يومين ونعطيك 

يامن/ باندفاع… كيف ماعندكش افلوسك وين ولا بس يطلعوا للمزرعة كل يوم تشري معدات جديدة 

ح سليمان/ عقد حاجبه… شن دخلك انا حر نشري اللي نبيها افلوس فلوسي ومزرعة مزرعتي… وكمل ياكل 

يامن/ نزل كشيك… بس في حاجات الواحد مايتسرعش فيهن راهو هذه تبي تفرض روحها تحساب المزرعة ملكها 

كل مرة جاية بموضوع 

ح سليمان/ قصدك من!؟ 

يامن/ نقصد ع البيطرية الجديدة ماتقعدش كل حاجة تبيها اتقوللها باهي وقت توا ماتمنش لحد ا..قاطعه

ح سليمان/ قولها لروحك انا مش صغير بيش توريني شن اندير والبنت اهيا معش اتجي شورها شكيت منك كذا مرة خليك في شغلك واحوالك 

يامن/ ????قلت اندير بالي منها مانخليكش بروحك 

صفية/ ماكنت تبيهم يشتغلوا معك ليش تطرد فيه توا 

ح سليمان/ انا ماطردت حد يبي يجي يشتغل اهلا وسهلا مش يقعد ايضايق في خلق الله 

يامن/ بزعلة… ماضيقتهش هي اللي ادير معاي في مشاكل 

ح سليمان/ خلاص صكر ع سيرة خلينا اتتعشوا… وخذا ياكل

صفية/ ياحاج معاذ روح من تونس 

ح سليمان/ نزل اللقمة… من امتى 

صفية/ الضهر 

ح سليمان/ وليش ماقلتي اول ماجيت 

صفية/ بملل… اهو توا قلتها شن يفرق 

ح سليمان/ لا حول ولاقوة الابالله باهي وينه 

صفية/ من جيته راقد 

ح سليمان/ شبح لادم… امشي وعيه 

ادم/ تافف… بااااهي…مشى لعنده ايتمتم 

ادم/ معاااذ معاااذ نووض… ونحى من عليه الغطاء 

معاذ/ خليني راااقد الزززح… وقعمز خذا الورغان بيتغطى شده ادم 

ادم/ نوض نووض بوك يبيك… 

معاذ/ حك راسه… شششن يبي 

ادم/ اولا حمدلله علي السلامه وثانيا شن بيكون يبي منك بعد اللي درته هيا صبي صحصح واستقبل مايجيك من الهزايب ????

معاذ/ اوووف عليك هم … 

ونزل من سريره خش للحمام وادم رجع لعندهم 

………… ????????????????????????????????????

ساجدة/ بغضب… الحق مش عليه اني الغبية اللي كلمته…وعزقت تلفونها 

جوري/ تلعب بتلفون… خيرك امعصبة 

ساجدة/ من الهم اللي عندي مش عارفه شن هالجريمة اللي درتها ليه اسبوعين يكلم من راس خشمه

جوري/ على شنو متعاركين هالمرة 

ساجدة/ عشان ادم وصلنا يومتها قالي ليش ماقلتيلي نرفعكم وقعد ايهزب 

جوري/ووووه عليااا هذا شنو راهو بكل مزودها بغيرته 

ساجدة/بتنهيدة… اوووف تعبني معش عرفت شن اندير معه 

جوري/ تبي الحق طبعه صعب هلبا ربي ايعينك 

ساجدة/ لو بس ايبطل العصبية اللي عنده نقدر نتفاهم معه لكن هو بكل اول موقف ايعيط ويهزب ماتقول راكبه جن ????

جوري/هههههههه حتى هو جن ايخوف بكل عمري ماشبحته يضحك ديما معقده مش عارفه شن حببك فيه 

ساجدة/ بنبرة هادئة… حرااام عليك والله احنين وجوه حلو بس مايعرفش يتحكم في عصبيته 

جوري/ ????…

بينما البنات يهدرزن كان عبود ايشوف ليديه كيف يرعشوا وجسمه بدا يحرق فيه ونفسه ضاق ناض للحمام فتح ع المية وقعد يغسل في وجه و راسه بحركة سريعة ويتنفس بصعوبة قعد لحضات طلع ضام ايديه يرعش والحالة زادت معش قدر يتحمل خش على امه كانت اتصلي في العشاء بعد شبحاته ناضت من الصلاية 

غالية/ عبود خيرك هكي بسم الله 

عبود/ صوته يرعش… نننبي اافلوووس 

غالية/ توا نعطيك بس كنك مريض ولا شنو 

عبود/ كوويس كوويس هيااا بس اعطيني خليني نطلع 

غالية/ تنهدت ومشيت طلعت دزدانها… كم تبي 

عبود/ قرب منها… ثلاث مية 

غالية/ بتعجب… علاش شن تبي فيهم 

عبود/عيط… ااااووووووه عليناااا… وشد منها دزدان طلع الفلوس لقاهم سبعين دينار

غالية/ بغضب… ماعنديش الا هذول

عبود/ شن بيديروا دبرلي ثلاث مية توا 

غالية/ الله يهديك من وين اندبرهملك

عبود/ ايعيط… مش شوووري نبي توااا ااافلوووس…

وقعد ايدور في دولابها كيف المجنون و غالية تشد فيه وتهزب

ساجدة وجوري /سمعوا اصواتهم … خيرررك يااام????????

غالية/دفاته… اااطلع براااا 

عبود/ عيونه حمر… تعطيني ولا لا 

غالية/ بغضب… ماااعنديش و ااطلع برااا توا ايجي خوك يتفهم معك… 

رفع اصبعه في وجها وعيط عليها 

عبود/ بتهديد… اااعطوني حصتي من الحوووش وبعدهاااا معش ااااتشوفي ووووجهي 

ساجدة/ فنصت فيه… شن تخرررف انت ماتحشمش على وجهك تعيط على امك????

عبود/ هجم عليها و بعياط… صكررري فمك ياحيوانة…

و كان معصب مش واعي لروحه و قعد يضرب في ساجدة بجنون 

وصوت اعياطهم في شارع وغالية وجوري ايبعدوا فيه بالقوة ماقدروش عليه طلعت جوري تاخذ في تلفونها اتصلت بي سامي

وسامي كان جاي للحوش بعد كلماته جوري زاد السرعة وخش للحوش مسرع لقى ساجدة مغمى عليها وغالية وجوري يبخوا فيه بالمية وحالتهن حالة 

سامي/ داهش…شن فيه… وطبس ايقيس في نبض ساجدة وشبح لجوري … هاتي عبايتها بسرعة

غالية/ تبكي… كنها اختك يا سامي 

سامي/ مااتخافش يام بس نبضها نازل… 

جت جوري بالعباية قعدوا يلبسوا فاها 

سامي/ بحمقة… وينه الحيوان 

غالية/ هج من الحوش بعد ماضرب اختك وخذا منها خاتمها ????

سامي/بغضب… احسابه بعدين… 

وقام ساجدة بين ايديه وخذها للعيادة اللي يشتغل فاها ركبولها تغذية وبعد وعيت دارلها صورة طلع عندها شعب في الترقوة 

ورذوذ في كل جسمها 

بعد ساعة روحوا بيها للحوش و اتصل سامي على عبود اللي مايبش ايرد وكان مع صاحبه نزلين على كافي ويتكلموا مع شاب اللي ايبيع شوي اخرى وطلعوا ركبوا في السيارة 

جهاد/يشبحله بترقب… من امتى تاخذ فيه … 

عبود حط بودرة ع كف يده واستنشقه ورجع للخلف بسترخاء

عبود/ نبي نرتاح انا تعبت … ونزلوا دموعه 

جهاد/ اوووف انساها الزح معش اتفكر فاها 

عبود/ حط يده ع وجه… ماقدرتش لعند توا قاعدة قدام عيوني ياريت ماشيت معكم

جهاد/ خلاص شي و صار هذا يومها 

عبود/ عيونه حمر… لا نحن السبب لو ساعدنها ماكنش صار اللي صار 

جهاد/ بغضب… اسمع الموضوع هذا صكر عليه ماتقعدش اتحاسبنا على شي مادرناش… قاطعه بعياط 

عبود/ بس نحن السبب في موووتهااا… 

???? حي شن دايرين ومن اللي ماتت اوبااا

يتبع..

لقراءة الحلقة الخامسة : اضغط هنا 

لقراءة باقي حلقات الرواية : اضغط هنا 

نرشح لك أيضاً رواية رقية للكاتبة هاجر محمود.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى