رواية ايلين وسليم الفصل الرابع 4 بقلم هدير محمد
 |
| رواية ايلين وسليم الفصل الرابع 4 بقلم هدير محمد |
رواية ايلين وسليم الفصل الرابع 4 بقلم هدير محمد
_ وانا مرات سليم ولا مش شايفة الخاتم؟!
” طبعا عرفاكي يا حبيبتي ، تشرفنا
سلمت عليا بكل برود ، و أبو سليم قالها
*إنتي ايه اللي جابك هنا ؟
“والله يا عمي انا جيت عشان سليم بس قعدت تقولي انا منفعش ابقى له شوف اختيارك القمر عملت فيه ايه
_ محدش قالك تيجي و محدش محتاجلك
” لا فيه سليم محتاجلي انا
_و جايبة من فين كل الثقة ؟
” لما يقوم بالسلامة هتعرفي انا جايبة من فين كل الثقة دي
* رغد اتعدلي في كلامك يا تقعدي ساكتة أو تمشي
“و ماله هقعد ساكتة بس محدش يكلمني منكم تاني
يارا قالتلها
-إنتي بقيتي بجحة و باردة مش عارفة سليم بيطيقك ازاي و أيلين اللي مش عجباكي دي أحسن منك مليون مرة على الأقل مش بتكلم كوم شباب زيك و ماشية مع كله و لا افكرك يا رغد تحبي افكرك ؟
رغد بصتلها بعصبية و راحت قعدت بعيد و يارا قالتلي
– متخديش على كلامها رغد أخلاقها مش كويسة وكلنا عارفين كده بس سليم مش راضي يصدق ابدا
_ واضح عليها
– تعالي اقعدي يا أيلين هنا
_حاضر
قعدنا حوالي ساعتين و استنينا أي خبر من الدكاترة ، فجاة الدكتور خرج و كان بيجري و بيقول
*شوفوا بنك دم فيه ولا لا
روحت وقفته و قولتله
_فيه ايه يا دكتور ؟
*عايزين دم للمريض اصل فقد دم كتير و رايح أشوف حد يتبرعله
_هو حالته خطيرة ؟
*كل اللي هقدر أقوله ادعي العملية تعدي على خير و نلاقي متبرع بالدم
و مشي الدكتور و انا حساه كل اللي بيحصل ل سليم ده بسببي انا
-أيلين خلاص متعيطيش أن شاء الله خير
_يعني انا لو مكنتش اتخانقت معاه بالشكل ده مكنش هيطلع من البيت وهو متعصب كده و أكيد بسببي مركزش في السواقة و عمل الحادث ده كل اللي بيحصل ل سليم انا السبب فيه و مش هسامح نفسي لو حصله أي حاجة
-يا بنتي اتماسكي كده هيبقى بخير انا متأكدة
مسحت دموعي و قولتلها
_متعرفيش سليم فصيلة دمه ايه ؟
-اعرف طبعا فصيلة دمه +AB
_ دي نفس فصيلة دمي انا ، انا هتبرع بالدم !!!!
لسه همشي أروح اتبرع بالدم ف أبوه و وقفتي
*أيلين إنتي هتحتاجي الدم ده استني مش ممكن نلاقي متبرع
_مينفعش يا عمي كل دقيقة بتمر على سليم خطر على حياته انا هتبرع بالدم و بعدها ابقى أكل كتير و اعوضهم
*مش عارف أقولك ايه ربنا يخليكي لينا
_لو سمحتي؟
~نعم
_متعرفيش فين اتبرع بالدم ؟
~الدور الأول رابع أوضة على أيدك اليمين
_تمام شكرا
نزلت و روحت عند الأوضة دي و كانت هناك دكتورة
*إنتي المتبرع ؟
_ اه انا
*طب عندك أي أمراض مزمنة زي الضغط أو السكر و غيره
_لا انا كويسة
*طب تمام
أخدت الدم اللي هي عيزاه عشان سليم
*ابقى كُلي فواكهة كتير عشان تعوضي الدم اللي اخدناه
_تمام
رجعت فوق و يارا قالتلي
-انتي كويسة ؟
_اه كويسة
– مش عارفة أقولك الدم اللي اخدناه منك هينقذ سليم بجد إنتي أحلى وحدة شوفتها و عمري ما هنسى اللي عملتيه ده
_ده واجب عليا لازم اعمل كده
انا و يارا فضلنا ندعي ل سليم وقرأت قرآن عشانه …….. و قاسم جه هو ومراته
^سليم فين ؟
_في الأوضة هنا
^هو كويس ؟
_ان شاء الله يكون بخير العملية قربت تخلص
^يارب
قعدنا مستنيين ساعتين كمان ،،،،،،،،،، الدكتور خرج من الأوضة
_يا دكتور العملية نجحت ؟
-سليم كويس صح ؟
^ما تطمنا يا دكتور
*العملية نجحت الحمد لله وهو تمام الدم اللي كان محتاجه وصل بسرعة ف عشان كده هو كويس
_الحمد لله ، هو هيصحى امتى ؟
*ساعة بالكتير و هيصحى زي القرد بس لما يصحى متخلهوش يحرك دراعه الشمال كتير
_هو اتكسر ؟
*لا مفيش كسر بس هو اتجرح فيه جامد عند الكتف في أيده الشمال بس عشان الحركة الكتيرة ممكن تفتح الجرح تاني !!
*خدوا بالكم منه كويس
_تمام يا دكتور
*تقدروا تدخلوا عنده بس شخص واحد اللي يدخل
فرحت جدا و حمدت ربنا……. جيت ادخل الأوضة راحت رغد دخلت قبلي روحت مسكت ايدها و قولتلها
_ مش ملاحظة أن انا اللي مراته مش إنتي ؟؟؟؟
“ملاحظة طبعا
روحت رجعتها بره وقولتلها
_يبقى انا ادخل الأول
و دخلت لقيته نايم و قعدت جمبه
_هتصحى و تبقى كويس و أنا مش هضايقك تاني والله و أوعدك ان دي آخر مرة اضايقك فيها ولو ضايقتك تاني انا اللي هسيب البيت مش أنت و أن شاء الله انت تفهم أني مش خاينة و تغير فكرتك الوحشة دي عني
فجأة فضل يكح و فتح عينه و حاول يقوم
_لا لا متقومش خليك زي ما انت
=هو ايه اللي حصل ؟
_انت عملت حادث بس الحمد لله عدت على خير
لاحظ أن انا اللي بتكلم فبصلي بغضب
=إنتي بتعملي ايه هنا ؟
خبط الباب و دخل صديقه قاسم
^ما إحنا حلوين اهو و بنصحى بدري ، يا شيخ ده انا خوفت عليك
=اطلعي بره يا أيلين
^استنى ايه اللي تطلع بره دي ؟!!! انت اهبل انت مش عارف هي عملت ايه عشانك
=و مش عايز اعرف خليها تطلع بره لأني مش عايز أشوف وشها نهائي
^لا أيلين مش هتطلع يا سليم دي مراتك عارف يعني ايه مراتك !!
=اه عارف لكن مش ناسي اللي هي عملته و هي اصلا السبب في الحادث
^هي السبب ؟!!! ليه هي كانت اللي بتسوق العربية و قلبتها بيك يعني ؟
دخلت يارا و رغد و أبو سليم قاله
*انا مش عارف أنت بتعاملها كده ليه ؟
=ما أنت لو عرفت هتكرها أضعاف ما انا بكرها
-سليم انت قايم من العملية مينفعش العصبية اللي انت فيها دي
=طلعوها بره او طلعوها من المستشفى كلها وانا مش هتعصب لكن طول ما هي قدامي كده هتعصب و هكسر المستشفى على الكل
كلامه كسرني حرفيا و جيت اخرج راحت يارا مسكت ايدي وقالتله
-أيلين هتفضل قاعدة هنا
=تمام يبقى خلاص انا اخرج
حاول يقوم و فضل يفك في المحاليل المتركبة في ايده
راحت رغد منعته و هو لما شافها اتفاجىء جدا
=رغد !!!!
“اقعد يا سليم مكانك متقومش عشان ناس صحتك أهم و ارتاح كده و بطل كلام أنت لسه صاحي
شوفت في عينه فرحة كبيرة أول مرة أشوفها لما شاف رغد جمبه
=أخيرا جيتي
“طبعا لازم أجي الحمد لله على سلامتك
خرجت بره عشان هو عايز كده
قال أبوه
*رغد اطلعي بره و ابعدي عن سليم
=رغد مش هتطلع فاهمين كلكم رغد هتفضل هنا
^ انا مستغرب جدااا منك يا سليم انت تطرد مراتك و دي تقعدها معاك عادي !!!
=اهي دي يا قاسم اللي كنت عايز اتجوزها بس كلكم وقفتوا ضدي و اتجوزت وحدة تانية خااالص مكنتش متوقع تبقى مراتي و مش عايزها
^ربنا يهديك و تصدق كلامنا اللي قولناهولك زمان ، على العموم الحمد لله على سلامتك
قاسم مشي كمان و يارا قالت
– سليم لما تعرف الحقيقة كاملة ابقى متزعلش
و مشيت يارا كمان و أبوه بصله بحزن و مشي
“فكك منهم المهم دلوقتي اجبلك تاكل
=اه ياريت
خرجت رغد و لقيتني قاعدة بره فقالت بستفزاز
“واضح أن سليم كان هيطردني انا هههههههههه شوف دلوقتي مين اللي قاعدة بره
قومت وقولتلها
_الفرق بيني و بينك أني انا بحس و عندي كرامة الدور والباقى على اللي كرامتها بندور عليها و مش لاقينها
” بت إنتي انا سكتالك من بدري……
_ايه هتعملي ايه يعني مالك بصالي كده ليه ؟!!
_اقولك روحيله يلا امشي من هنا يا حلوة
مشيت رغد و جابت أكل ل سليم و دخلت عنده
و انا قاعدة على الكرسي شيفاه من شباك الأوضة وهو بيضحك و بيهزر معاها و كمان بتأكله بأيدها
_ عنده حق في كل كلمة قالها هو بيحبها هي ، انا مجرد وحدة أهله اجبروه أنه يتجوزني
_ بس برضو انا مستاهلش المعاملة دي
و انا قاعدة زعلانة و بيعيط لقيت حد حط ايده على كتفي كان أبوه
*متزعليش هو لما يعرف حقيقة رغد هيتمنى الزمن يرجع عشان يصلح غلطه
_بس يا عمي كنت جوزتهاله و خلاص هو بيحبها اشمعنا انا يعني ؟
_يعني لو انا مكنتش موجودة في حياته أظن كان هيبقى أسعد من كده
*أولا متقرنيش نفسك بحد ثانيا لو الزمن رجع هختارك إنتي و بس ، تعرفي ليه ؟
_ليه ؟
*عشان مشوفتش حد بأخلاقك و لا بأدبك إنتي مفيش حد أحسن منك يا أيلين
_شكرا على ثقتك فيا ، بس يا عمي……
*انا عارف و متأكد أن سليم هيحبك إنتي و هتشوفي بنفسك و متزعليش منه هو واحد عصبي شوية بس طيب و دماغه الناشفة عايزة تتكسر
*يا بنتي مالك بتعيطي ليه ؟؟؟
_مفيش حاجة
*عايزاها تخرج من عنده ؟
_لا مش قصدي ……
*و حياتك دموعك دي لإخرجها من عنده حالا
و دخل عند سليم
*ايه انا قطعت القعدة الحلوة دي ؟
=لا مفيش
*رغد
“نعم يا عمي
*أمك بتولد
“بجد ؟!!!!!
*اه شوفتي انا لسه شايف الإسعاف جاية من عندكم سألت واحد قالي أن امك بتولد
“طب…. طيب يا سليم انا لازم امشي
مشيت رغد جري و سليم قال لابوه
=على فكرة أمها لسه في الشهر الرابع
*ما انا عارف
=اومال قولتلها ليه أمك بتولد ؟
*يا سيدي افرض كانت بتولد صح و بنتها قاعدة هنا معاك مين الأحق يعني انت و لا أمها ؟!!
=انا عارف أنت مشيتها ليه ، المهم انا عايز أخرج من هنا
*هشوف هل الدكتور يكتبلك خروج و لا لا
*أيلين تعالي هنا
أبوه دخلني و قالي
*بصي تاخدي بالك منه كويس تحطيه في عينك بدل ما أزعل منك
_حاضر يا عمي
خرج أبوه و سابنا إحنا الإتنين ، سليم لما شافني دخلت كَشر و بص بعيد
_فيه حاجة اقدر اجيبهالك ؟
=لا مفيش
قعدت على الكنبة الموجودة في الأوضة
لقيته بيحاول يقوم فقومت اسنده
=مش عايز مساعدة منك
_سليم ممكن تحط خلافاتنا دي على جمب انت تعبان دلوقت
= و لما احطها على جمب هل ده هينسيني أنك خاينة
_ قول اللي انت عايزه عندك حق لكن انا مش هضايقك
=إنتي وجودك في حياتي هو السبب الأول اللي مخليني مضايق
=مالك مش عارفة تردي ؟ مش بتردي عشان إنتي عارفة كويس أن ده حقيقي
كلامه صعب معايا بس مرضيتش أرد ، أبوه رجع و قاله
*سليم الدكتور كتبلك خروج
=طيب يلا خرجوني عشان اتخنقت من المستشفى دي
خرج سليم من المستشفى و رجعنا البيت
*يا أيلين تاخدي بالك منه كويس سليم أمانة عندك و انا هاجي اطمن عليه
_تمام يا عمي
بقيت انا مسئولة عن سليم بأكله و باخد بالي منه و بخليه ينتظم على العلاج و كان قاسم و أبو سليم بيجوا كل يوم يطمنوا عليه
مع الوقت سليم كان بيتحسن ، لكن هو مش طايقني حرفيا و كل يوم يتخانق معايا و مش برد عليه و بطلت أدافع عن نفسي عشان معملش مشكلة ، و لسه مقتنع أني بخونه و بسيبه يقول كلام صعب و بيجرح في حقي و كنت بستحمل و بدوس على نفسي كتير
كل يوم أدعي ربنا ان الحقيقة تظهر و واثقة ان هيحصل كده في يوم و أكيد هيجي يوم سليم يعرف أن طول الوقت كنت بقول الحقيقة
عدى شهر و إحنا الإتنين طول الوقت مش بنتكلم أبدا يادوب بعمل اللي هو عايزه و بس
صبرت كتير لإن بعد الصبر فرج ……. بس طبعا طاقتي هتخلص يعني محدش هيستحمل كل شكوكه فيا دي
في يوم في الليل كان هو في البلكونة جيت عنده بكوباية النسكافيه اللي بيحبها و كوباية مية و معايا العلاج اللي بياخده
_اتفضل
شرب حبة من البرشام بس كان مزاجه معدول شوية ابتسم وقالي
=شايفة منظر النجوم و القمر منظرهم تحفة
بصيت على السماءو قولت
_ اه فعلا منظرهم جميل
=تعرفي انا نفسي في ايه حاليا ؟
_ نفسك في ايه ؟
مسك ايدي و لمس على شعري و قالي
=نفسي اصحى في يوم كده ملقكيش في البيت
=نفسي افتح عنيا و الاقيكي اختفيتي من حياتي كلها تبقي مش موجودة كده تخيلي السعادة اللي هكون فيها !!!!
=نفسي جدااااااااا اليوم ده يجي
سحبت ايدي من ايدي و قومت و قولت
_ أنت عايز كده ؟
=عايز كده اويييييييييي
مشيت و دخلت أوضتي و قفلت الباب و بقيت اعيط بطريقة فظيعة طول الليل
_ياربي انا عملت ايه لكل ده ؟؟؟؟
_من كتر شكه فيا بقيت انا بشك في نفسي فعلا
_مش قاردة والله طاقتي كلها خلصت انا اتكسرت
_انا استحملت كتييير استحملت و دوست على نفسي اكتر من مرة اعمل ايه تاني ؟!!!
_كل كلامه في حقي و في شرفي بيكسرني و بيجرحني أوي
_لغاية هنا و كفاية
فتحت الدولاب و طلعت شنطة كبيرة و حطيت فيها هدومي
أيوة انا قررت امشي كده كده انا مش هقعد مع واحد فاكر أني خاينة و كل مرة يقول عني كلام محصلش
سيبت رسالة ل سليم إذا قرأها يعني
و لبست و أخدت الشنطة و هو كان نايم و تسللت و خرجت من البيت و مشيت وانا ناوية أني هختفي فعلا و مخليش حد يعرف انا روحت فين و رميت الخط بتاعي ………….
*تاني يوم*
سليم صحي و خرج من اوضته و غسل وشه و عمل فطار لنفسه ،،،،،،،،،،، بعد ما خلص أكل لاحظ أن أيلين لغاية دلوقتي مخرجتش من اوضتها
=و انا مالي بيها تخرج أو متخرجش مليش دعوة في الحالتين
=بس كل يوم كنت اصحى لاقيها قاعدة هنا في الصالة
=و لا تكون زعلت من كلام إمبارح و قررت تحبس نفسها جوه الأوضة ؟
=و انا مالي براحتها هي
من أول الصبح لغاية العصر سليم لاحظ أن أيلين مخرجتش ولا مرة من الأوضة !!!
راح عند اوضتها مسمعش اي صوت ليها
قرر يفتح الباب و بالفعل فتحه و اتفاجىء لما لقي أيلين مش موجودة !!!
دور عليها في البيت كله ملقيهاش ،،،،،،،،، و أخد باله ان فيه ظرف كان على سرير أيلين ف أخده و قبل ما يفتحه نادى على البواب
=يا اشرف يا أشرف
*نعم يا أستاذ
=هي المدام نزلت من شوية ؟
*معرفش يا أستاذ
=يعني مشفتهاش و هي نازلة ؟
*لا يا أستاذ
*فيه بنت بتسأل عليك
=مين دي ؟
*معرفش بس هي مُصرة تشوفك
=طب خليها تيجي
*تمام يا أستاذ
جات البنت سليم كان أول مرة يشوفها
=مين حضرتك ؟
“انا ابقى بنت خال أيلين
=طب اتفضلي ، تشربي ايه ؟
“لا مش مهم انا جايلك في موضوع مهم لازم تسمعه بسرعة
=تمام قولي
“أيلين مش حامل
=عرفتي ازاي اساسا مين عرفك الموضوع ؟
“انا هحكيلك كل حاجة ، انا اسمي نور دكتورة صيدلانية ابقى بنت خال أيلين و أخويا مروان بيحب أيلين من زمان وكان عايز يتجوزها فلما أيلين اتجوزتك هو أخترع حكاية الحمل دي عشان تطلق أيلين وهو يتجوزها وهو متفق مع وحدة تقريبا اسمها رغد و أظن أنها عايزة تتجوزك كماااان
هم الإتنين غيروا الدواء الأملاح اللي بتاخده أيلين و ده عن طريق صاحب الصيدلية اللي بتشتري منه أيلين دايما
آخر مرة كانت أيلين عندي نسيت الدواء بتاعها وبالصدفة عرفت ان الحبوب متبدلة و مش هو نفس الدواء اللي بتاخده
و عرفت أن البرشام ده الحبة الوحدة منه بتخلي أعراض الحمل مستمرة لأسبوع كامل و أيلين كانت بتاخد منه دايما
و الدكتورة اللي جبتها و كشفت عليها دي كانت تبع مروان أخويا كان متفق معاها انها تقولك ان أيلين حامل
و لما عملت تحليل لأيلين هم الإتنين زوروا التحليل ، نتيجة التحليل اللي شوفتها دي مش بتاعت أيلين دي كانت بتاعت وحدة ست حامل فعلا بس غيروا الأسماء
و اللي كان بيعرفهم كل خطوة بتعملها هو البواب بتاعك كان بيقولهم كل حاجة عن تحركاتك
و هتقولي عرفت ازاي هقولك أني سمعت مروان بيكلم رغد دي إمبارح و بيتفقوا على أيلين عشان تطلقها و كل واحد يوصل لهدفه
لكن مراتك مش حامل ابدا أيلين مش خاينة و لا متعرفش حد عليك أساسا انا أكتر وحدة اعرف أيلين و أخلاقها مش كده دي مجرد لعبة من أخويا و رغد عليها عشان يدمروا حياتها كلها
و انا لما عرفت كل ده جيت أقولك على طول عشان أكيد حصلت مشاكل كتيرة بسبب الموضوع ده
سليم اتصدم من اللي سمعه و اتفاجىء جدا
“هي أيلين فين ؟ عشان أقولها
=أيلين مش موجودة
“المهم إني عملت اللي عليا و جيت أقول كل اللي أعرفه لما ترجع ابقى خليها تفتح تليفونها لأني برن عليها و شكله مقفول
مشيت نور
و سليم بيحاول يستوعب اللي سمعه مش شوية
افتكر الظرف اللي شافه أخده و فتحه و لقي أن أيلين هي اللي كتباه
و بدأ يقرأ هي كاتبة ايه فيه :
_ أول ما تفتح الظرف ده يا سليم اعرف اني وصلت لمكان بعيد جدا انا مشيت زي ما انت عايز انا فعلا من أول ما ظهرت في حياتك حصلك مشاكل كتير بسببي بس فهمت ده متأخر للأسف و قررت امشي نهائي و ابقى طلقني و بعد ما تعمل كده ابعت ورقة الطلاق عند حبيبة صحبتي
و هي ابقى توصلهالي خلاص انا فقدت الأمل أنك تعرف الحقيقة و تعرف أني مش خاينة و عمري ما فكرت اخونك و انت عندك حق أنت مش عايزيني و انا مجرد وحدة أهلك جبروك عليها من كل قلبي بتمنى بعد ما نطلق أنك تبقى سعيد في حياتك و تتجوز اللي بتحبها و تجيب منها أطفال و تعمل عيلة كبيرة و لطيفة و قول ل عمي انا آسفة لأني مشيت و سلملي على يارا لأنها هتوحشني …… أيلين …….
قفل الظرف وهو مصدوم ومش قادر يصدق أن أيلين مشيت فعلا
= أيلين؟!!!!!!!!!!!!!!!
*من الجانب الآخر*
_السلام عليكم
*وعليكم السلام ورحمة الله وبركاته
_عايزة اشتري تذكرة قطر لو سمحت ؟
* لفين ؟ بأسم مين ؟
_ للقاهرة
_ بإسم “ايلين مصطفى محمد”
