رواية طفولتى المشتتة الفصل الثامن والثلاثون 38 كامل

الجد مو عاجبه الكلام : انا حلفت يمين ما تطلع من بيتي الا لبيت زوجها

نايف ما لقى غير هذا الحل : بالطلاق من ام سيف ما تعيش ريم غير عندي لحتى تتزوج

وقف الجد بعصبية : انتم ما عندكم غير بالطلاق بالطلاق

وقف ابو سليمان : يبه هدي وكل شي بالتفاهم خلص انت يبه كفر عن يمينك وخلي البنت تعيش عند ابوها

الجد بعصبية وبحزم وبدون تراجع بقراره: ما علي منه يطلق يزوج ما لي دخل ريم ترجع هنا الحين وبصراخ بسرعة تيجي الحين

فيصل وقف : يا جماعة الخير صلوا على النبي وما يصير الا خير

واشر للبنات يطلعون من المجلس

ردد الموجودين بصوت هامس « اللهم صل على سيدنا محمد »

الجد خفف عصبيته شوي : انا قلت ترجع ريم الحين يعني الحين

ناظر نايف وهو يكتم عصبيته : يبه الله يخليك البنت عندي خلاص ما تعمل مشاكل

الجد بصراخ : قصدك اني انا اعمل مشاكل واشر على نفسه

تقدم نايف من ابوه وباسه على راسه : محشوم يبه

ابعد الجد نايف عنه بقهر وبأمر : روح جيبها الحين

الجده وهي جالسه وتناظرهم بخوف : بس نايف نقل كل اغراضها لبيته

التفت الجد بعصبية : انا هنا بالبيت كرسي والا طاوله ما ادري عن شي وما حد يستشيرني بشي

وبحده اشر على نايف من سمح لك تاخذها وبصراخ جاوبني

اقترب خالد من جده : يا جدي لا تتعب نفسك صحتك اهم من الكل وكل شي ينحل بالتفاهم

ابعد الجد خالد عنه بهدوء وطلع جواله وفتحه وضغط على احد الاسماء

الكل كان يراقب ومو عارفين يتصل بمين بس تفاجئ انه الجوال مغلق

ناظر نايف والشرار يتطاير من عيونه : ساحب منها الجوال ؟؟

نايف بهدوء : اظن انها صغيره عالجوال ومو ضروري يكون معه و..

قاطعه الجد بصراخ : اخرس مو انت تقرر ضروري والا مو ضروري

تفاجئ وانقهر نايف انه ابوه يهينه قدام الجميع

ناظر الجد فيصل وبأمر الحين تيجيني ريم ومعها كل اغراضها

فيصل باعتراض : يبه والطلاق ؟؟؟

الجد بلامبالاه : بحريقه هو وطلاقه علشان ثاني مره يحلف بالطلاق وبامر والتعب ظاهر بصوته بسرعة رجعوها هنا

تقدمت ساميا ببكاء من الجد : تكفى يا عمي تكفى خليها عنا لوقت زواجها تكفى يا عمي لا يطلقني وببكاء تكفى

نايف بعصبيه : ساميا

خالد ببرود : متى زواج البنت ؟؟؟

فيصل وهو يتنهد : بعد ما تخلص الثانوية

خالد رفع حاجب : يعني كم بقى حتى تكمل الثانويه ؟؟

الجده بتعب وهي تشوف زوجها وابنها حالهم كذا : بعد سنتين وحطت يدها على صدرها حسبي الله على ساره وبنتها ما جانا من وراهم غير وجع الراس

خالد ببرود : طيب الحل خلي زواجها قريب وتنتهي المشكله

صقر بعصبية : سكت دهرا ونطق كفرا البنت صغيره وبعدين كيف نتصل فيهم تعالوا تزوجوا البنت وحنا شرطنا عليهم الزواج بعد سنتين

الحين رح يقولون اكيد فيها بلاء علشان قربوا موعد الزواج

خالد ببرود وبابتسامه بارده : احترمني تراني اكبر منك

اعطاه صقر نظره هم على اعصابهم وهو ببرود يتكلم

مسك الجد الجوال مره ثانية واتصل برقم بعد دقايق جاه الرد

السلام عليكم ………كيفك …………الحمد لله كلنا بخير ………..لا والله كنت ودي افتح معك موضوع ……………ما في غير كل خير ان شاء الله …………كنت ودي اجلس معك بس ما عندي وقت واليوم راجع من السفر ………….الله يسلمك ………..ما يأمر عليك ظالم ابغى العرس يكون بعد اسبوعين ………..ادري اني فاجئتك ………….اعتبر كل التجهيزات على حسابي والحجوزات …………….ادري انك ما تقصر بس انا ودي اخليها هديه البنت للعرس ………….لا لا بعد شهر كثير مثل ما قلت لك اسبوعين وانا ادبر الحجوزات بنفسي ………….خلاص اتفقنا ………مشكور يا زياد ……….مع السلامه

ناظر الجميع الجد بوجه مبهوت وانصعقوا

ناظر
ابو سليمان الهادي ابوه بقهر : يبه انت وش عملت يبه ودك يقول اكيد البنت فيها بلاء والا ما رماها كذا علينا وضرب على جبهته بقهر وجلس وكل الهموم فوق راسه

سليمان بعصبية : يخسى يتزوجها والله على جثتي ما يتزوجها

الجد ببرود جلس مكانه : اعلى ما بخيلك اركب

طلع سليمان من المجلس وهو يتوعد وبعدها لحقه نواف وقبل ما يطلع ناظر جده : اذا ودك تفقدنا ويتنفذ حكم القصاص علينا زوجها لزياد

جلس خالد ببرود : انت عقلك يا نواف والغبي للي قبلك من ايش ؟؟ وش دخلك زياد زوجها وبأي وقت له حق يوخذها انتم ما لكم علاقه

نواف ناظر اخوه الكبير وطلع بدون ما يرد عليه

فيصل بقهر من ابوه جلس بدون كلمه لانه ما يضمن يضبط اعصابه

نايف كان واقف ويناظر للبعيد الافكار متضاربه بعقله مو مستوعب انه ابوه عمل كذا

ناظر ابوه بقهر وبوعيد : وقسم بالله لاحرق قلبك عليها

وطلع من المجلس مستعجل

وقف الجد وبخوف : ام سيف وين ريم ؟؟؟

ام سيف من بين بكاءها بغرفه مقفل عليها الباب

بسرعة طلع الجد خلف نايف وهو قلبه قارصه خايف من عصبية نايف لانه اذا عصب ما يعرف للي قدامه

كان يمشي بسرعه وهو يردد اللهم اني اسألك رد القضاء

طلع من المجلس خلف االجد ابو سليمان وفيصل وصقر وخالد والشباب بهلع وخوف من تهديد نايف …….

الجده وقفت بتعب وقلبها يتراقص من الخوف و من بين دموعها : ابني واعرفه اذا عصب ما يعرف ابوه من اخوه

حطت يدها على صدرها الله لا يوفقك يا ساره انت وبنتك للي من وراها رح يقضي ابني حياته بالسجن

يا رب لطفك يا رب هالمجنون ما ادري وش رح يعمل بالبنت يا رب لطفك يا رب

جلست على الارض رجلينها مو قادره تشيلها من الخوف خايفه على ضناها يرتكب جريمه

تعرف نايف اكثر واحد باولادها عصبي وعند كلمته

ساميا وهي تشاهق : انا ال غ بي ه ل يه نا دي ته ا

وعضت على شفايفها بندم

ام خالد تهدي الوضع وهي تفرك يدينها : يا خالتي اهدي ان شاء ما يصير الا الخير

الجده وهي جالسه وتناظر ام خالد وتهز راسها : اي خير وبنت الحيه بيننا اي خييييييير

ام سليمان رايحه جايه متوتره وخايفه

دخلوا الينات لما سمعوا السالفه و بكاء الحريم

كانوا يناظرون بصمت لانه الموقف ما يتحمل كلام زايد ………

بعد مرور وقت وسديم ترن على اخوها نواف بس ما يرد

امها بخوف : شوفي عمك صقر تأخروا

رنت سديم ويدينها ترجف من الخوف رن حتى فصل ما حد يرد

ناظرت امها وهي تعاود الاتصال واشرت بحواجبها

انه ما رد

فجأة دخل مصعب ومعاه احمد وهم يركضون

احمد : يمه يمه ريم

دفشه مصعب : انا رح اقول

احمد يمسك مصعب من كتفه : لا انا رح اقول

صرخت الجده واعصابها تالفه : بس بس لا بارك الله فيكم قطعتوا قلبي وش صار

دخلت نوف وهي متحمسه ومعاها الاخبار : يمه يمه

ريم ما لقوها بغرفتها وعمي نايف ما لحقوه طلع بسيارته مسرع

وجدي كان يصرخ ويقول رنوا على نايف بس كانوا يقولون مغلق تلفونه

الجده بانهيار : خلص اسكتي اسكتي لا بارك الله فيك

وبنحيب خلاص ابني راح ابني راح يا ويلي عليه بعز شبابه يقضي عمره بالسجن حسبي الله عليك يا ساره حسبي الله عليها

ساميا لما سمعت بالخبر صارت تبكي بصوت عالي

يا ليته طلقني ولا قتلها يا ليته طلقني ولا قتلها خلاص يا خالتي نايف طار

جلست ام خالد وام سليمان يهدون الوضع

وسلمى ولينا يبكون والخوف دب بقلوب الموجودين الا وحده جالسه تناظرهم باستغراب ومو فاهمه شي عليهم الا بكاء وصراخ

دخلوا الرجال المجلس ووجههم ما يبشر بالخير

جلس الجد وتنهد بتعب ونفسه ضاق : لا حول ولا قوة الا بالله

ابو سليمان يهدي ابوه : وكلها لله وان شاء الله خير والحين بإذن الله نلاقيه

الجد حط راسه بين يدينه : لهم الشباب ساعه دوروه وما لقوه وين راح بالبنت وين وعض على شفته بقهر

فيصل وهو رايح جاي بالمجلس وقلبه قارصه ويدعي ربه انه يرجع نايف بالسلامه يكفي انهم فقدوا عماد ما ودهم يفقدوا نايف

دخل صقر المجلس ورد السلام بصوت خالي من الحياه

وقف الجد بلهفه : بشر يا صقر لقيتوهم ؟؟

هز صقر راسه بالرفض وجلس وعقله مشوش اخذ نفس وغمض عيونه بألم

ناظرهم خالد ببرود : ما ادري ليه مكبرين السالفه ابو وبنته ما رح يضر
ها مهما معصب ما رح يضرها تبقى ضناه و..

قاطعه صقر بصراخ : اقول لك انت اسكت احنا على اعصابنا وانت يا برودك

تقول هذا الكلام لانك ما تعرف نايف روح شوف جسم البنت للحين علامات الضرب والتعذيب بجسدها من عمك الزفته للي ما قلب فيه ذره رحمه هذاك الوقت كانت طفله كيف الحين رح يسوي فيها

انصعق خالد معقول عمه نايف كذا ليه يفرق بالمعامله بين بنت ساره وبين سلمى ولينا غريب كل هذا حقد ناظر صقر ببرود : مهما كان رح تبقى بنته ويخاف عليها اكثر منك ومن الكل لانها بنته من لحمه ودمه

صقر من بين اسنانه : وقسم بالله اذا ما قفلت على فلسفتك هاذي ليصير شي مو طيب

خالد ببروده المعتاد ابتسم : حاضر عمي مع اني اكبر منك بس يالله نمشيها للحلوين وغمز له بابتسامة

ناظره صقر بقهر وسكت الوقت مو وقت شجار والا كان كسره تكسير على بروده ……..

جالس مع امه وخبرها انه قدم موعد الزواج

ام زياد بقهر : والله يمه ما يمدانا نخلص تجهيزات

زياد ببرود : معكم اسبوعين

سوسن باعتراض : يعني مو مناسب ابد

نوفه : وعنا دوام بالمدرسه كيف نجهز ما في وقت ابد ما في وقت ولوت بوزها

وقف زياد بهدوء : انا اعطيتكم خبر وجهزوا اموركم وابوي اتصلت فيه وخبرته وما عنده اعتراض بالعكس انبسط كثير

تركهم زياد وهم يتحلطمون وطلع للحديقه وجلس على كرسي منزوي وناظر السماء وهو يفكر وش سبب تقريب موعد الزواج ؟؟ قرار مفاجئ

غمض عيونه وهو يتذكر صوت ابو سلمان كان متعب معقول صارت مشكلات على زواجي منها

يمكن احفادهم اعترضوا وقرر يقدم موعد الزواج حتى تنتهي المشكله

قاطعه رنين الجوال استغرب رقم غريب

رد بهدوء الو

رد المتصل بتهديد : كلمتين اسمعهن كويس بطلق ريم غصب عنك فاهم

زياد بهدوء وعرف انه توقعاته صح : من الادب ترد السلام وبعدين تعرف بنفسك ا…

قاطعه المتصل : لما تحترم نفسك وتطلق بنت عمي وقتها افكر ارد عليك السلام

تكلم شخص آخر : وقسم بالله يا زياد اذا ما طلقت البنت غير يوم زواجك يزفونك جنازه فاهم

زياد ببرود : اعلى ما بخيلك اركب وقفل الجوال بوجه المتصل

وشد على الجوال بقهر وقف وهو يفكر وشاد قبضة يده على الجوال

بالمجلس جالسين على اعصابهم رن جوال الجد

كل الموجودين ناظروا بخوف

شاف الجد رقم المتصل ارتاح شوي

ورد بهدوء : الو …………..الله يسلمك ………… الجد تحولت نظراته لغضب مين منهم ……….

الموجودين ناظروا بخوف

ما قال اسمه …………صحيح كلامك ولك الحق تزعل ……….لا تهتم دواهم عندي ………….ادري لو تبلغ يعتبر تهديد وينسجن عليها ادري ……..بارك الله فيك ……….خلاص اعتبر السالفه انتهت …….ان شاء الله خير ………مع السلامه

قفل الجوال وناظر جهة الشباب اربعه مو موجودين

الجد ناظر عبود بعصبيه : قول للكلاب للي برا يجوني الحين وبصراخ بسرعه ……..

فيصل وعلى راسه علامات استفهام : وش فيه يبه خرعتنا مين للي اتصل

طنشه الجد وهو يناظر للبعيد وشاد على اسنانه بقهر **

**

**

**

**

**

**

**

**

سليمان بقهر : قسم بالله ليندم

بدر : يمكن يخاف من تهديدنا

عمر بتفكير : ما اظن يخاف بس يمكن اختصار للمشاكل يطلق

نواف بتفكير : احس يا شباب تسرعنا لازم فكرنا بعقلانيه بدون طيش لانه اكيد رح يخبر جدي عنا

سليمان بلامبالاه : ما ظنيت لانه جبان

قاطعه عبود : شباب جدي يبيكم بسرعه تعالوا له

بدر : عمي نايف اتصل

ابتسم عبود نص ابتسامه : لا ما اتصل انتم تعالوا وتعرفون السالفة

تركهم وراح وطول الطريق الشباب يفكرون

دخلوا المجلس وقف الجد بعصبية : انتم اغبياء مجانين تتصلون بزياد تهددونه بالقتل

ناظروا للي بالمجلس الشباب باندهاش

الجد بعصبيه : مين الحيوان للي اتصل فيكم ؟؟

انتم ما تدرون انه المكالمه مسجله ويقدر يقدم عليكم شكوى تهديد بالقتل

تفاجئوا الشباب ما توقعوا كذا كانوا معصبين وتصرفوا بدون وعي

وقف فيصل بعصبيه : لا بارك الله فيكم انتم ودكم تنزلون راسنا بالارض

ما عندي علم انه مربين في بيتنا مجرمين سفاحين

نواف : ءءء يبه

قاطعه ابوه بعصبية : اخرس وانا اقول نواف الهادي الفهمان بينهم المهندس ويطلع منك هذا الكل
ام تهدد بالقتل وانت واولاد عمك

ما الومك انت وسليمان طول ما انتم تتمشون مع هذا الجوز واشر على بدر وعمر فاشلين دراسيا وبكل شي

ابو سليمان بقهر : يصير خير بس خليها تنتهي سالفه نايف وبعدها يصير خير

الجد ناظرهم بتهديد : قسم بالله لو اسمع انكم تتعرضون لزياد لو بنظره وقسم بالله ما يصير خير لكم

صقر مسك ابوه من عضده وبهدوء : يبه ريح نفسك صحتك اهم شي والبزران ذولا حسابهم بعدين

سليمان يناظر جده : وقسم بالله بس مجرد تخويف له ما قصدنا شي

الجد يهز راسه بتعب واعصابه خلاص ما عاد يتحمل

غمض عيونه بتعب

رن جوال صقر استغرب وبصوت هامس المستشفى

ناظر الجد صقر وفتح عيونه على وسعهم واشر له حط على الخارجي

وقف صقر ورد بهدوء عكس قلبه للي يدق بخوف وحط الجوال على الخارجي : الو

وينك يا صقر

رد صقر بهدوء وقلبه يدق :بالبيت

تعال للمستشفى ضروري

صقر بخوف : ليه

حاله طارئه

صقر وهو يبلع ريقه : يعني حادث

لا جريمه قتل والضحيه البنت بحاله حرجه تحتاج لعمليه ضروري بسرعة لا تتأخر

وقف الجد بخوف وخلاص اخر امل عنده تبخر

عض على شفته بقهر وهو يردد انا لله وانا اليه راجعون

وجلس على الارض وخلاص ما عنده قوه يتحمل اكثر

قفل صقر الجوال وهو منصعق مو قادر يستوعب خلاص اكيد المجنون عملها

غمض عيونه بألم مو قادر يتحمل طفلة بريئه لازم يساعدها

فتح عيونه وناظر الموجودين ملامحهم شاحبه خلاص كل شي انتهى وعم المكان الصمت

طفلة بعمر الزهور انتهت حياتها ناظر امه للي تبكي بصمت والحريم بحاله لا يرثى لها

وفيصل ملامحه جامده ساكت وكأنه تمثال

رفع راسه للسقف وغمض عيونه بألم ما يقدر يشوفها مقتوله بين الحياه والموت ما يقدر

وابشع قاتل اخوه ما يقدر

وبداخله يردد يا رب رحمتك

طلع جواله من جيبه ويدينه ترجف ودموعه بعيونه رن على المستشفى واعتذر عن الحضور وطلب منهم يتصلون بالدكتور عثمان

قفل الخط وهو يناظر حوله وكأنه الزمن توقف كل شي حوله ساكن الا من صوت بكاء خفيف

مسح بعض قطرات العرق عن جبينه حاول ياخذ اكسجين مو قادر حاس الاكسجين بالغرفه انتهى

اخذ نفس بصعوبه بالغه وتفاجئ من دخول هذا الشخص

حس بالدم يفور بداخله ناظره بنظرات ناريه جاي بقوه عين شد على قبضه يده بقوه …….

دخل المجلس بتعب ناظر الحاضرين و ملامحهم باهته حزينه

جلس بجهة اليسار بهدوء ومسح على وجهه بتعب رفع راسه وشاف نظرات الجميع

كانت نظراتهم الشرار يتطاير منها

وقف الجد بقهر وكره وهو يناظر نايف : خلص هانت عليك بنتك

يا خساره تربايتي فيك وهز راسه بأسف يا خساره

نايف ببرود : مو هذا للي ودك اياه هذا انا نفذته

صقر وجن جنونه من بروده وفقد اعصابه وهجم على نايف بدون وعي وهو يصرخ : ذبحتها قتلتها يا مجرم وصار يضرب فيه بكوس على بطنه ووجهه

وقسم بالله لأسلمك للشرطه بنفسي

الجده وقفت بهلع : تكفى يا صقر اترك ضناي من بين دموعها اكيد ندم يمه اكيد ما كان قصده اتركه يمه لا تقتلني بعده

فيصل واقف عاجز ما يدري مو مستوعب شي كأنه بحلم مو قادر يصحى منه بس اهم شي ما يفقد اخوه ما يفقد اخوه

ناظر صقر بانكسار : اتركه يا صقر اتركه وناظر نايف بقهر ليه يا نايف عملت كذا ليه ؟؟

وبصراخ ليييييييييييييييه ؟؟

الضنى غالي يا اخوي ليه عملت كذا ليه ؟؟؟؟

هاذي طفله طول الاسبوع الماضي اكتشفت انها طفله تفكيرها طفولي

نزل عيونه للارض

طفلة بريئه بعمر الزهور ليه تقتل احلامها وتذبحها بتسرعك وغبائك

وجلس على الارض خلاص ما يقدر يسمع اكثر او يلوم اكثر ما يقدر

الجد بقهر : حسبي الله عليك حسبي الله عليك

وبحزم ناظر صقر : اتصل بالشرطة وبلغهم

قاطعته الجده وهي تمسك يده ومقطعه نفسها بكى : تكفى يا ابو سلمان تكفى لا تحرمني من ابني الثاني

ابو سليمان بقهر ابعد امه بلطف : يمه نايف غلط ولازم يتحمل عواقب اخطائه

كانوا الشباب يناظرون ببهوت مو مستوعبين الاحداث كأنهم بحلم وينتظرون بأي لحظه يصحون منه

ما توقعوا نايف يقتل بنته وبدون سبب كل ذنبها انها غلطه !!!

ما توقعوا يزفها بالكفن الابيض بدل الفستان الابيض المقرر بعد اسبوعين !!!،

الجده من بين دموعها : ليه يمه عملت كذا ؟؟ ليه قتلت فرحتها ليه ؟؟ مهما وصل كرها عندك ما توصل لكذا ما توصل ؟؟

كانت راسمه احلام ليوم عرسها ناظرته الجده بحزن

كانت تنتظرك تزفها لعريسها مو تزفها لقبرها !!!

ليه قتلتها ودمرت حالك ؟؟ بعدك بعز شبابك ليه تحكم على نفسك بالسجن وبهستيريه ليه يمه ليه

انا من بعدك يمه اضيع

خفت نبره صوتها وهي تمسح دموعها المنهمره كيف انام وانا مو مطمنه عليك يمه بعيد عني !!!

كيف انام وما اشوفك كل يوم بعيني !!!

وبصراخ

كيف وكيف وكيف كله من ساره حسبي الله عليها للي خلفت وتركت هالبنت شوكه بحلوقنا بسببها خلاص ضاع ابني وبصراخ اشد ضاع ضاع ضاع

وقف نايف بصراخ : انتم وبعدين معكم ؟؟ وش فيكم علي ؟؟؟

اخذتها اربيها عندي واعترضتم ولما رجعتها لكم قلبتوها علي وبعصبيه وش المطلوب مني ؟؟؟

خالد ببرود وقف وبصوت عالي : يا جماعة الخير اتوقع في خلل في الموضوع وفي سوء تفاهم

صقر بعصبيه ويناظر نايف باحتقار : اي سوء تفاهم

والبنت بالمستشفى بين الحياه والموت

نايف وخلاص سكرت معاه وبعصبيه : اي بنت بالمستشفى تتكلم عنها ؟؟

صقر يناظره باحتقار : لا تحاول تهرب وتخلص نفسك من الجريمه تراها لابسيتك

قتلك لريم ورميك لها ما رح يمر بسلام البنت بالمستشفى الحين واكيد الشرطه تحوم بالمكان لانها جريمه قتل واعطى نايف نظره حاده

نايف اقترب من صقر والشرار يتطاير من عيونه : انا الحين رح ارتكب فيك جريمه وبقهر انتم وش تخبصون مين قتل مين ؟؟

خالد ببرود : يا عمي بنتك وين ؟؟

نايف اخذ نفس يخفف من عصبيته : اي وحده ؟؟

خالد بهدوء : بنت ساره ما ادري وش اسمها ديما او ريما

نايف وهو يكتم غضبه ما يطيق حد يسأل عن بناته :

بغرفتها هنا فوق

الكل ناظروه وكأنهم انصعقوا

صقر وهو مو مصدق : والبنت للي بالمستشفى ؟؟؟

نايف جلس بقهر : تراكم طفشتوني اي بنت ؟؟

فيصل وهو يحاول يفهم الموضوع : طيب ما شفناها هنا لما دخلت

نايف يناظرهم وهو رافع حاجب : دخلت من الباب الخلفي انا طلبت منها وبعدها ناظر ابوه ترى اغراضها رجعتهم على غرفتها من الباب الخلفي

خالد : والطلاق؟؟

نايف ببرود : بعد بكره امر المحكمه واستفتيهم ان شاء الله

الجد وهو مو مصدق : ريم فوق بغرفتها ؟؟

هز نايف راسه بتأكيد خرج الجد متوجه لغرفة ريم وهو يردد الحمد لله الحمد لله

لحقه صقر للي كان متشوق يشوف ريم ويتأكد انها بخير

توقع خلاص ما رح يشوفها مره ثانية وتذكر لما قبل ما يسافر لما ضربها نايف بالشارع تمنى انه ما يسافر ويدافع عنها

خلاص الحين استقر هنا مستحيل يقبل حد يهينها

مين ما كان

رح يساندها ويشجعها بكل شي ويرجع لها الامل

مستحيل يفرط فيها

غمض عيونه بألم لما تذكر لما كان يهين ريم بوجود نايف

كان يحاول يهينها ويسمعها كلام جارح كله علشان يخلي نايف يصحى على نفسه ويوقف مع ريم

كان يتعمد يهين ريم قدام نايف حتى يثير غيرته ويخليه يوقف بوجه الجميع ويقول

هاذي بنتي ما اسمح لك يا صقر

كان كل مبتغاه يسمع من نايف حدك ريم ما اسمح لك

هذا سبب التناقض للي كان يدور حول صقر كان بوجود نايف فقط يهينها ويضايقها

اما بغير وجود نايف كان يضحك ويمزح معها وعلاقته مع ريم روعه

بس بمجرد حضور نايف يقلب على ريم ويصير ضدها

بس بدون فايده لانه نايف طول الفتره الماضيه يناظر بصمت ما اعترض ولا وقف ولو بكلمه مع ريم

علشان كذا قرر صقر خلاص يكنسل هاذي الخطه ويرجع مع ريم عادي

يكفيها للي جاها

من اليوم

رح يعتبرها مثل بنته

وصل غرفة ريم وهو يردد هاذي بنتي بنتي بنتي

الجده جالسه على الارض ومو مستوعبه الموقف

ناظر نايف امه ووقف وتقدم وجلس على الارض ومسك يدها وبحنان : علامك يمه ؟؟

حضنته امه وهي تبكي وتشاهق وتقول كلام مو مفهوم الا كم كلمه ( خفت افقدك مثل عماد )

اوجعته بكلامه لانه تذكر رفيق روحه عماد وزاد الكره لعيله ابو سعد وكل احفاده حتى ريم من ضمنهم

مع انه ما لها ذنب الا انها تحمل دمهم

فتح الباب بدون ما يطرق الباب ودخل الغرفه مندفع وهو وده يريح قلبه بشوفتها

شافها جالسه على السرير

حمد الله بصوت هامس

وتقدم بهدوء عكس قلبه للي يتراقص من الفرح

رفعت ريم وناظرته باستغراب وبعدها ناظرت صقر للي واقف عند الباب

كانوا يناظرونها ومو مصدقين كأنهم بحلم

اقترب الجد منها وحضنها وبصوت متعب : وينك يا بنتي ما جيتي تسلمين علي والا نسيتيني

ابتعدت ريم عن حضنه وباسته على راسه : والله ما نسيتك بس

قاطعها جدها بتحقيق : وين كنت قلقت عليك ؟؟

ريم بهدوء : اخذني معه شوف يا يا ابو سلوم اشترى لي هدية العرس واشرت على الهديه فوق التسريحه

وبحالميه وهي شابكه يدينها ببعض ورافعيتهم ومغمضه عيونها

ياه مو مصدقه اني بعد اسبوعين البس الفستان الابيض واجلس على الكوشه وانزف وا …

قاطعها الجد بضربه خفيفه على راسها : بنت استحي ابتسمت ريم : وش هدية زواجي ؟؟؟

تنهد الجد براحه وبعدها وقف وهو يبتسم براحه : مفاجئه

تعلقت ريم برقبته وهو طالع من الغرفه : بالله بالله وش هديتي ؟؟

نزلها الجد بهدوء وهي تتحلطم : اثقلي يا بنت لا تخليني اكنسله

ضحكت ريم ببراءه وهي تقلد الاطفال : توبه توبه والله ما اعيدها بس لا تكنسله

ابتسم لها الجد ونزل

ناظرها صقر وهو يحمد الله انه مجرد سوء فهم

اقترب منها وباسها على راسها وبصوت كله حنيه ومحبه : الحمد لله على سلامتك يا قمر

وبعدها نزل ودموعه بعيونه

ناظرتهم ريم وهي مستعربه تصرفاتهم

دخل الجد المجلس براحه وبعدها دخل صقر بعد ما مسح دموعه خارج المجلس

ناظر نايف الموجودين وبعدها تكتف ورفع حاجب : ممكن اعرف مين مؤلف الفلم الاكشن للي عملتوه ؟؟؟؟

ناظروا ببعض واشروا على صقر

فتح صقر عيونه على وسعهم وهو واقف وسط المجلس : انا

هز اغلب الموجودين راسهم

جلس صقر بابتسامة صفراء : انت السبب واشر على نايف قبل ماا تطلع تتوعد تحرق قلب ابوي

ولما طلعنا وراك حركت سيارتك وطلعت وريم مو بغرفتها ونرن عليك وجوالك مقفل وتاخر الوقت وحضرتك ما رجعت وبعدها يتصل المستشفى ويخبرنا انه في جريمه قتل والبنت بين الحياه والموت

حك راسه باحراج

وبتعرف ربطنا الاحداث ببعض وتوصلنا لنتيجه انك القاتل

وابتسم صقر بعباطه

نايف بتريقه : لا يا كونان انت حرام مواهبك تروح عالفاضي لازم درست بمجال التحقيق

وبحده وقسم بالله الضربات لاردها لك انا اخوك الكبير وتمد يدك علي يصير خير وناظره بتوعد

فيصل بابتسامة : خلص امسحها بوجهي وسامحه

نايف : متهمني بجريمه قتل وضاربني ووده يسلمني للشرطه وودك اسامحه !!!

صقر بابتسامة : يا اخي قهرتني ببرودك

خالد بابتسامه : يعني لما جيت عملتوا فلم الاكشن هذا وغمز لعمه نايف وابتسم

تصدق يا عمي وانا اقول لهم عمي نايف ما يعملها وادافع عنك وما حد صدقني

صقر ناظره وهو يقرص عيونه : تدري كنت اثبت نفسي ما اهجم عليك

ناظرت الجده خالد بابتسامه وهي تناظر لحيته الخفيفه وعلامات الصلاح على وجهه : باحلامك تضرب اغلى احفادي

صقر بنغزه : وش هذا التمييز ليه انتي وابوي تفضلون خالد عن باقي الاحفاد هذا ظلم

ونظر لامه بتشكيك لا تقولين بكره لما اتزوج تحبين هذا واشر على خالد بتكبر اكثر من عيالي

فيصل : انت تزوج وبعدها يحلها ربك ولا تقارن نفسك تعرف اولادي فيهم ميزه ينحبون بسرعه وحرك حواجبه

صقر بقهر : مالت على اولادك وبالاخص خالد

خالد بابتسامة تقهر صقر : احترمني تراني اكبر منك وعندي اولاد

صقر لوى بوزه : مالت عليك انت واولادك وخاصة هالطيف خدودها كانها كيس مغذي

ضحك اغلب الموجودين

انقهر خالد بس مستحيل يظهر ابتسم ببرود : يصح لك تجيك بنت بحلاتها

الجد يناظر الموجودين : بما انه سالفه نايف وانحلت والحمد لله

وخلوكم من سالفه مين اغلى لانه فيه سالفه اهم

سالفه المجرمين السفاحين الثانيين

ابتسم نايف : يعني مو لوحدي قاتل مين مجرم مثلي ؟؟؟

اشر فيصل على الاربعه بحواجبه : ما شاء الله ذولي متصلين بزياد يهددونه بالقتل

الجد بحزم وقف واشر للاربعه يتبعونه للمكتب …..

وقف سليمان بقهر بعد ما طلع الجد : قلنا له بس مجرد تهديد بس

نايف بعصبية : وانت وش عليك بنتي وزوجتها وش لك علاقه حتى تطلقها واعطاه نظره قويه

فيصل ناظرهم بقهر : قدامي على المكتب نشوف وش اخرتها

طلع ابوسليمان بعد ما سحب الاربعه معاه

تنهد نايف
بقهر وطلع ومعاه فيصل وصقر

وقف خالد واقترب من زوجته وبالانجليزي : انتظري هنا لن اتاخر

هزت راسها بهدوء

الجده تناظر خالد : يمه ما لقيت تتزوج غير هاذي لو تشتمنا ما ندري عنها ولا اكيد رح نضحك بوجهها نفكرها تمدح فينا

خالد بابتسامة : جايز هههههههه

الجده بقهر : عاجبك ومبسوط انها تشتمنا

وقفت سديم وجلست قريب من الحريم : ما ادري وش معجبك بهاذي البلوى

خالد رفع حاجب وببرود يقهر : انا عاجبيتني وما طلبت رايك اوكي

وبعدها طلع للمكتب

وقفت الجده بهدوء وناظرت سديم : قولي لمقصوفة الرقبه هاذي تلحقنا على غرفه الحريم خلينا نشوفها

طلعت الجده والحريم لغرفة الحريم بالداخل ……

يتبع ……