رواية أهدتني معاقاً الفصل التاسع عشر 19 بقلم أم عائشة (أسماء عبدالهادي)

فى اليوم التالى فوجىء اسر بامجد يدخل عليه مكتبه فى الشركه

قام اسر من مكانه مندهشا وسعيدا فى نفس الوقت _ايه ده امجد باشا تكرم وجه هنا الشركه ،حد يقرصنى يمكن بحلم ياناس

جلس امجد على الكرسى المقابل لاسر واضعا قدما فوق اخرى ورمقه بنظره ارعبته _طب اقعد بدل ما اخليك تفضل تحلم طول العمر باللى هعمله فيك

جلس اسر على مكتبه بخوف فيبدوا ان امجد لا يمزح حقا _انا فرحان جدا بوجودك ،نورت الشركه يا امجد باشا

امجد بجديه _سيبك من الكلام ده ،وفهمنى ايه اللى بيحصل هنا انا سالت كم موظف وانا جاى قالى ان الاحوال مش كويسه

اسر بحزن وضيق_للاسف الشركات كلها اللى بنتعاقد معاها لغت التعاقد ده وكده خسرت الشركه تقريبا كل حاجه ،مش عارف ده حصل امتا وازاى احنا كنا شغالين كويس

امجد بغضب_ازاى ده يعنى هيه سايبه وكارم باشا كان فين من كل ده ،ثم اكمل بسخريه _فالح كل شويه تعالى معايا الشركه يا امجد ،هيه فين الشركه دى ده احنا نعلن افلاسها افضل

اسر وهو حزين على عمه كارم_ابوك احواله لا تسر الايام دى يا امجد ونفسيته فى الحضيض الفترة اللى فاتت مكنش مركز فى الشغل خالص لحد ما راح مننا كل حاجه

رفز امجد بضيق _هاتلى كل ملفات الشركه والملفات الخاصه بالشركات اللى كانت متعاقده ولغت العقد ،وعايزك تقعد معايا تفهمنى ايه النظام

فرح اسر بذلك كثيرا_بجد يا امجد هتمسك الشركه

امجد بسخريه_ده لو حقت قبل ما تقع نهائيا

اسر وهو يقوم من مكانه _طب تعالى ،اوديك مكتبك ،رئيس مجلس الادارة

_اقعد انا مش هروح غير لما المكتب يتجهز تماما ليا وللسكرتيرة الجديده وياريت تبدا فى التجهيزات دى من دلوقتى

_تمام هعملك اللى انت عايزه فى مكتبك ،بس مكتب السكرتاريه كويس ليه عايز تغيره

امجد_علشان المكتب هيتنقل ويكون معايا فى نفس الاوضه

اسر بصدمه_بتهزر يا امجد فرح عمرها ما هتوافق على حاجه زى كده ،دى شكلها بنت محافظه مش زى البنات اللى نعرفهم

نظر له امجد باهتمام وعينيه تاكله بشرارها_وانت عرفت منين ؟!

ابتلع اسر ريقه _ما هو انا قريت ملف المعلومات بتاعتها و…

هجم عليه امجد وامسكه من تلابيب ياقته_انت اتجننت يا حيوان  مين سمحلك تشوف الملف ده

اسر وهو يحاول الخلاص_امجد انا اسف مكنتش اعرف انك هتزعل كده ،انا بس حبيت اعرف معلومات عن البنت اللى شاغله دماغ امجد بالشكل ده واللى كانت السبب فى وجودك هنا بالشركه

تركه امجد وعاد الى مكانه _اللى عملته ميتكررش ،وملكش دعوى بفرح نهائى مفهوم

اسر وهو يتحسس رقبته  ويهندم ملابسه_حاضر

امجد _اسمع انا عايزك تمشى معظم الموظفين اللى هنا خلاص مبقاش ليهم لازمه ،سيب بس اللى انت واثق فيهم وحاسس انهم امنا

اسر _حاضر يا امجد

اخذ امجد طوال اليوم يراجع ملفات الشركه وهو يزفر بضيق بهو ليس معتاد على مثل هذا المجهود وتلك المسئوليه الكبيرة فالشركه تكاد تكون منهارة تماما

لكن اسر كان معجب بمهارة امجد فهو استطاع فهم ما يقوله اسر بكل سهولة واستطاع مراجعه معظم الملفات بوقت قياسى

اسر_برافو ياامجد انت فهمت النظام بسرعه يوم او اتنين كمان لما تقعد مع المسئولين وهتفهم الدنيا كانت ماشيه ازاى

امجد_لازم نحاول نظبط الدنيا علشان لما فرح تيجى تبان الشركه انها كويسه مش منهارة ولا حاجه

رن هاتف امجد

امجد_ايوة يا شهاب

اسر فى نفسه_ياباى الواد ده رخم مبحبوش ابدا

شهاب عبر الهاتف_شهاب صحيح انت مسكت الشركه

امجد  _شركه ايه يابنى دى ،خلاص تكه وهتعلن افلاسها ،انا مشيت معظم الموظفين ،ثم اكمل بخداع_وممكن كمان افكر اقفلها خالص واشوف مشروع تانى اعمله

تبسم شهاب بخبث وادعى الحزن_ليه كده بس يا امجد كارم باشا ممكن يزعل

امجد _كارم باشا مبقاش زى الاول ،شكله كبر وخرف انا بفكر اوديه دار المسنين ????????????

شهاب واسر اصابهم الصدمه

شهاب وهو ينظر الى فيومى باشا والده ويبتسم_دار المسنين،كارم باشا ده ممكن يموت فيها

امجد بلا مبالاه_يا بنى حالته بقت صعبه ومحتاج يتعالج نفسى

شهاب وهو يدعى الحزن_قلبى عندك يا صاحبى

امجد وهو يدعى الموده_متحرمش منك ياشهاب

شهاب_طيب يا امجد هقفل ورايا مشوار ،سلام

امجد بغموض ،سلام

***

ضحك شهاب كثيرا على ما يحدث لامجد وابيه وشركته

الفيومى _هوا ده الشغل اللى ع كبير ،كارم مغرور مش هيتحمل وجوده فى دار المسنين ،ممكن يروح فيها

شهاب بشر _فى داهيه وعقبال ابنه كمان بالمرة

الفيومى وهو يضحك_الظاهر انك بتحبه اوى

شهاب_اوى اوى مش هقولك انى نفسى اخلص عليه بايدى ،بس مصيره يا هيقع هوا كمان ،

****

اسروهو يصرخ فى امجد_انت اتجننت يا امجد عايز تحط كارم باشا فى دار مسنين

امجد بلا مبالاه _وفيها ايه ،هيتعالج هناك ولما يتحسن يخرج

اسر وهو يغادر الغرفه _لا انت الظاهر جرى لعقلك حاجه

*****

على بابتسامه_شكلك مزاجك حلو النهارده يا ام على

سماح وهى منكشحه_البت اختك جالها عريس انما ايه لقطه ،معاه فلوس يااما

على بامتعاض_ياماما مش كل حاجه الفلوس،الاخلاق اهم ،الفلوس مش هتصنع السعاده

سماح_ياعبيط اسمع منى الفلوس اللى بتعمل كل حاجه اليومين دول ،اخلاق ايه ،الراجل ميعيبوش الا جيبه

على _مع احترامى لحضرتك يا ماما بس الكلام ده مش صحيح ،،الراجل ميعيبوش الا سوء اخلاقه وقلة احترامه لنفسه وللاخرين

سماح بتأفف _بقولك ايه ياواد يا على حل عن نافوخى ،وسيبنى اخطط اشوف هجيب لاختك ايه فى جهازها ،انا لازم اجهزها احسن جهاز يتكلم عليه ستات الحارة كلها

على _بردو يا ماما؟! ،والله كل الحاجات دى شكليات فارغه ،،هاتيلها الحاجه اللى هتحتاجها فعلا ،وبلاش التقليد الاعمى اللى ضيع الناس ده ،،النساء دلوقتى بقت تجيب حاجات بالافات وفى الاخر تتركن على الرف فى النيش ،طب بالزمه ده مش حرام ،بامكانهم الاستفاده بالفلوس دى فى حاجه مفيده  او حتى يسدوا الديون اللى عليهم من باب اولى

سماح وهى تدفع على ليخرج_وانت ايش فهمك انت بشغل الستات ده ،قوم ياخويا اطلع للسنيورة مراتك اللى مش عارفه تجيبلى حته العيل اللى نفسى فيه ،بس انا خلاص هجوز اختك وهيه اللى هتجيبلى العيل اللى نفسى فيه

على بامتعاض من حديث والدته_وهتجهزيها  الجهاز اللى بتحكى عنه منين ان شاء الله

سماح_ اسكت ،هوا انا مقلتلكش ،انا حاطه مبلغ من زمان اوى وانتوا صغيرين فى البنك هروح اسحبه اجهز بيه اختك،ثم اكملت فى انتشاء عجيب_زمانهم بقوا شىء وشويات النهارده

على بنفاذ صبر _اعملى اللى يريحك يا ماما ،انا طالع

سماح _روح باخويا ،انا مش عارفه البت امانى دى عاملة فيك ايه ،شكلها لاحسه مخك

هز على راسه وهو يردد ،لا حول ولا قوة الا بالله ،مفيش فايده ابدا

******

فرح _يامن انا مش شايفاك بتذاكر يعنى علشان الاختبار النفسى ده

تبسم يامن _الاختبار النفسى مفيهوش مذاكرة ،ده عبارة عن اسئلة بتقيس جوانب معينه فى الشخصيه زى الثبات الانفعالي ،والاجتماعي والثقافي وكده ،ودايما بيعتمد على السرعه وكمان بيكون فيه بعض اسئلة لاختبار الذكاء وبردو بيعتمد على السرعه

رفعت فرح حاجبها تعبيرها عن الدهشه _اها ،فهمت،بس انت عرفت المعلومات دى منين ؟!

يامن_ربنا يباركله دكتور لؤى ،لقانا واقين وقاعدين تخطط هنذاكر النفسى منين ،فقالنا على الوضع ،وبصراحه طمنا

فرح _جزاه الله خيرا ،،ربنا يوفقك يايامن

يامن_وانتى كمان ياروح قلب يامن ،ها جهزتى السى فى بتاعتك

فرح _اه جهزتها وكله تمام وكمان حطيت الكورسات اللى اخدتها خلال سنين الدراسه

يامن_ تمام ،ربنا معاكى يا حبيبتى ،هيه نغم صاحبتك مش هتقدم معاكى ليه

فرح _بتقول مش عايزه تشتغل فى الوقت الحالى

يامن_غريبه رغم أن الشغل ليها افضل لوضعها الحالي

فرح_انا قلت لها كده،قالت انها محتاجه ترتاح فترة وتحس انها اخدت اجازة وكده

يامن_اها ،ربنا ييسر لكم يارب

****

امجد _اسر انت فين يازفت ،مشيت كده وسبتنى

اسر بغضب_انا مش جاى خلاص النهارده بكرة بقا ،انا وصيت المسئولين يفهموك كل حاجه

امجد بغضب. مماثل _ليه بقا ان شاء الله ،وصوتك عامل كده ليه

اسر _بصراحه بقا انا هطق منك ،انت زودتها اوى مع عمو كارم

امجد_يابنى انا عايز مصلحته ،مش احسن من المصحه النفسيه

اسر _طيب ليه مش هيتعالج فى الفيلا

امجد بغموض_كده افضل ليه يا اسر بعدين انا فاهم بعمل ايه ،فاخلص يا زفت وتعالى بسرعه وياريت تجيب اكل لانى واقع خالص

اسر باستسلام  _حاضر يا سى امجد

*****

انتهى اليومين وتم تجهيز المكتب الخاص بأمجد كرئيس مجلس اداره الشركه

جلس على المكتب الخاص به بغرور شديد وهو يتوعد لفرح ،اخذ يبتسم عندما فكر في ردة فعل فرح عندما تعرف انها ستعمل معه

جاءه اتصال

امتعض وجه امجد _ايوة يا نغم اوعى تقولى انها مش جايه؟!

نغم بحزن_لا هجيبها واجى كمان شويه يا امجد،بس انا خايفه لتزعل منى لو عرفت الحقيقه ،انا كده بخدعها يا امجد ،انا بوديها النار برجليها

ضحك امجد بقوة_انا نار يا نغم ،،ماشى مقبوله منك ،،عامة ياستى قولى لها انك متعرفيش انى مسكت الشركه وانك فوجئتى انى هناك وبس شوفتى سهله ازاى

نغم برجاء_ليه مش تسيبك من اللى فى دماغك يا امجد ارجوك،،

امجد بملل _هنعيده تانى يا نغم

نغم باستسلام _خلاص يا امجد ،بس انت وعدتنى انك مش هتأذيها

امجد بغموض_لا طبعا

****

انهى مكالمته مع نغم ،،،اتصل بأسر

_اسر تعالى حالا ،عايزك

بعد ثوانى معدودة جاء اسر

_ها فهمت هتعمل ايه مع فرح لما تيجى ؟!

اسر باستياء _اه فهمت ،والله حرام اللى هتعمله ده،يابنى سيبها ف حالها

زفر امجد بضيق_يووه مش هنخلص بقا

اسر _خلاص خلاص انت حر

امجد _هاتلى بقيت الملفات علشان اراجعها

اسر باستفسار_امجد أن شاكك فى حاجه معينه

امجد بغموض_ مش شاكك بل متأكد ،وقوع الشركه ده مقصود وخلاص قربت اعرف مين سببه

اسر بدهشه_نعم؟!”وانت عرفت ازاى؟!

امجد بحدة _شايفنى جاى العب هنا مثلا ،وبعدين انت مستقل بيا يا زفت

اسر باعجاب _بصراحه طلعت جامد يا امجد مكنتش متوقع ده منك ابدا

امجد وهو يشبك ذراعيه ببعضهما على صدره_امال كنت متوقع ايه ياخويا

اسر بتردد _بصراحه يا امجد اللى كان يشوفك وانت بتعدى الدراسه بالعافيه وطول الوقت برا وسفر وخروجات وسهر يقول انك يعنى فاشل ومش هتنفع لحاجه

ابتسم امجد بسخريه_يابنى ده كله كان بمزاجى،زى وجودى هنا بمزاجى بردو ثم اكمل بخبث،،كله علشانها …فرح

***

تهيئ يامن الذهاب الى الاختبار النفسى بشركه الصياد والذى وضعه الرعد خصيصا لتعجيز للموظفين فهو يريد فقط النخبه فى شركته

يامن _انا خارج ياحبيبتى ،خدى بالك من نفسك ،ها

فرح _حاضر ،بالتوفيق لينا

يامن_يارب يا فروح،سلام

***

تجهزت فرح هى الاخرى فارتدت دريس من الون الابيض يتخلله بعض الخطوط السوداء العريضه وارتدت حجابها فبدت كالاميره التى تكون فى القصص الخياليه ولكن بحجابها واحتشامها

جاءت نغم لاصطحابها وبداخلها فيضان عارم من القلق والخوف والحزن على ما يحدث،لكن كانت تبرر أن امجد لن يتراجع ابدا

نغم _يلا يا فرح،مستعده؟!

فرح _اه مستعدة يلا

***

قادتها نغم الى حيث مقر الشركه وهى تضع يدها على قلبها فهى لا تتوقع ما قد سيفعله امجد ،لكن كان ما يطمئنها انها فى الشركه ويوجد بها موظفون ايضا يعنى لا وجود لحماقات

نغم بتنهيدة _وصلنا يافرح

فرح_انتى مش هتطلعى معايا

نغم بتردد _ممم انا هستناكى هنا ،لو هتستلمى الشغل من اول يوم كلمينى وانا هاجى اخدك لما تخلصى

فرح بابتسامة_متتعبيش نفسك انا هعرف اروح

نغم _لا هوصلك لبيتك زى ما جبتك يافرح

ابتسمت لها فرح وانطلت فى طريقها داخل الشركه

خطت  الداخل فوجدت موظف الاستعلام،فقررت الذهاب وسؤاله على وجهتها

فرح_لو سمحت فين مكتب المدير من فضلك

كان الموظف قد تلقى معلومات مشددة بشأن مجىء فرح ،وان عليه اخبارها بمكان مكتب اسر بالاعلى

بمجرد أن رآها الموظف عرف على الفور انها الفتاة المطلوبة _حضرتك جايه علشان وظيفة السكرتاريه؟!

فرح_ايوة يا فندم

الموظف _تمام اركبى الاسانسير ده الدور الخامس واسالى عن مكتب باشمهندس اسر ،بالتوفيق يا فندم

فرح _شكرا لحضرتك

مشت فرح باتجاه المصعد الكهربائي وكادت لتضع يدها على الازار لتضغط على الرقم ٥ فوجدت يد تسبقها اليه وتضغط عليه

لاحظت فرح وجود شخص ما معها بالمصعد وانها سوف تبقى معه بمفردها داخله الى أن تصل لوجهتها فانطلقت مسرعه قبل أن يغلق المصعد وكان أن ينغلق على قدميها

_حاسبى يا مجنونه هيقفل على رجليكى فى حد عاقل يعمل كده

لم تلتفت له فرح وخرجت مسرعه خارج المصعد فهى لا تريد اغضاب ربها حيث وجودها مع رجل غريب لوحدها فى المصعد يعد خلوة

تنفست فرح الصعداء عندما خرجت من المصعد الذى كاد أن ينغلق على قدميها وهى تخرج مسرعه قبل أن ينغلق الباب _مفيش مشكله هطلع فى اللى بعده

اما هو بداخل المصعد ،تعجب كثيرا من تصرفها ،لما عندما رأته فرت هاربه ،عادة ما يحدث العكس عندما يراه الاخرون وخاصه الفتيات ينجذبن نحوه وليس كما فعلت هى رفع حاجبيه فى دهشه قائلا_انا عارف انى هشوف العجب هنا فى مصر(اظن عرفتوا هوا مين )

****

وجدها بداخل سيارتها بالخارج تنتظر فرح

ضحك بشدة وهو يقول_رايحه تسليمها ليه بنفسك ،والله برافو عليكي ،مكنتش اعرف انك غبيه الدرجه دى

نظرت له نغم بدهشه

اكمل هو _ انتى عارفه انه بدأ يعجب بفرح ،يبقى انتى كده اوت يا حلوة

نغم_انت بتقول ايه ياشهاب

شهاب_بقول الحقيقه ، عارف انك معجبة بالاستاذ وهو مش سائل فيكى ولا معبرك حتى كعادته المتكبرة الغبيه ،بس تعرفى انك خدمتينى خدمة العمر بسذاجتك دى

نغم بحدة_وانا منتظرتش حاجه منه ، صحيح اعجبت بيه لكن عمرى ما صارحته بده ولا حتى بينت له حاجه ،وان كنت وافقت انى اجيب فرح هنا ده علشان احميها منه

شهاب _ههه مش بقول عليكى غبيه

نغم _شهاب لو سمحت ،اتكلم باسلوب كويس

شهاب _ايه مزعلك انى بقول الحقيقه ،،،ضيعتيه منك بجبنك ،واحدة غيرك كانت قدرت توقعه بكل سهوله زى صاحبتك كده مثلا ،قدرت تمثل عليه دور الصون والعفاف لحد ما وقع على جدور رقبته

نغم بحده_انت كداب ياشهاب ،،فرح عمرها ما كانت كده ابدا ،انا اكتر واحدة اعرفها كويس ،وكمان هيه بتكرهه كره العما

شهاب وهى يبتعد _بكرة تشوفى يا حلوة ،ان محدش مغفل الا انتى ،سلام

كان شهاب فى نيته الايقاع بفرح ونغم والعبث فى صداقتهما بالتشكيك فى نوايا فرح غير عابئ باخته ومشاعرها ،وايضا فرح بتعلق امجد بفرح لسبب سوف نعرفه لاحقا

اما نغم باحست انها بدوامة لا تستطيع الخلاص منها ،ترى ما تفعله صحيح ،ترى كلام اخيها صحيح ،احست برأسها يدور فاغمضت اعينها بداخل السيارة بألم

***

كانت نظرات الموجودين غريبه بعض الشيء لكنها اعتادت على هذا الامر وايضا كانت تعلم ان فى مثل هذه الشركات الكبيره نادرا الا ما رحم ربي ما يوجد من تهتم بحجابها واحتشامها، لذا كانت تتوقع شيئا كهذا لذا قررت فى نفسها أن موضوع الحجاب خط احمر اذا ما تكلم احد عن طريقه لبسها او حجابها فسوف تترك العمل على الفور فهى لن تغضب ربنا من اجل وظيفه

اخدت تجوب بناظريها المكان فى اعجاب شديد ،تبحث عن احد ما لتسأله عن مكتب باشمهندس اسر فوجدت رجل ما امامها  يوليها ظهره ويتحدث فى الهاتف ويبدو من هيئته انه شخص مهم فقررت سؤاله

_لو سمحت

ادار لها ظهره ليكون فى مقابلتها _انتى بتنادى عليا؟!

اخفضت فرح رأسها فى حياء وايضا لتغض بصرها فهذا الماثل امامها شديد الوسامة حقا

لكنها فوجئت به يقول_انتى ،،فتاة المصعد

رفعت رأسها قليلا لاعلى _نعم؟!

يتبع..