رواية الوقوع في الحب الحلقة الثامنة عشر 18 بقلم هبوش
 |
| رواية الوقوع في الحب الحلقة الثامنة عشر 18 بقلم هبوش |
رواية الوقوع في الحب الحلقة الثامنة عشر 18 بقلم هبوش
لما مشى الحاج للمستشفى يسأل عليا تلاقى مع ممرضة طالعة من غرفة العناية
ح سليمان/ يابنتي المريضة وردة كيف حالها وعيت؟
ممرضة/ الحق يا حاج من ربع ساعة دخلوها اخرى للعمليات
ح سليمان/ بفزع… للعمليااات!؟ ليش؟
ممرضة/ توا يطلع الدكتور ويقولك السبب
ح سليمان/ بوجع… لا حول ولاقوة إلا بالله
…
وقعد واقف جنب باب غرفة العمليات و يدعيلي بعد نص ساعة طلع الدكتور
ح سليمان/ بخوف… شنووو يادكتور خيرها وردة
دكتور/ حط يده… البارح ساءت حالتها واكتشفنا عندها كدمات في الرحم سببلها نزيف حاد والحمدلله قدرنا انسيطروا عليه قبل ماتخسر الرحم
ح سليمان/ متاثر… الحمد لله ربي لطف بحالها اللهم لك الحمد و الشكر…
وطلع كلانكس يمسح في عيونه من الدموع
وقتها كان يامن واصل للقسم وشبحهم من بعيد تجمد الدم بعروقه وقلبه وقف ????????
تقدم يمشي بخطوات اثقال وكل خطوة اتزيد معها دقات قلبه
شبحه الحاج انصدم و مشى خطوتين لعنده
ح سليمان/ ياامن
يامن/ بخوف… وررردة وووين يااحاج ماااتقولش ماااتتت????????????
ح سليمان/حضنه… اااطمن وردة بخير الحمدلله …
قعد يامن يبكي على كتف الحاج
ح سليمان/طبطب عليه… ربي كريم الحمد لله علي سلامتكم
يامن/ وخر ومسح عيونه… هي ووين توااا
ح سليمان/ اشوية وايطلعوها من العمليات توا الدكتور طلع منه وطمني
يامن/ بحزن… عملية على شنووو????
ح سليمان/ شده من كتفه… تعال قعمز توا نحكيلك…
ومشى بيه لكراسي الانتظار
قعد يحكيله ع الحادث وشن الاصابات اللي عندي والعمليات تاثر هلبا وجعاته حالتي مشى للدكتور ايزيد يستفسر منه وبعدين طلعوني للعناية اول ماشبحني ع السرير غايبة عن الوعي رافعيني للعناية جاء شد يدي و يمشي معاي لين وصلوا للعناية وقفوه برا وخشوني قعد يشبح من مرش الباب ويشوف فيهم كيف نزلوني ع السرير واعطوني كيس دم
ح سليمان/ هيا امشي للحوش تريحلك اشوي
يامن/ لا بنقعد امشي انت يا حاج
ح سليمان/ اهو الدكتور طمنك عليها وقالك مش ح اتفيق الا بعد ثلاث ساعات خلاص ليش قاعد
يامن/ بتنهيدة… توا انروح بعدين خليني هنا اشوي
ح سليمان/ على راحتك…
وطبطب على كتفه ومشى و يامن رجع يشبحلي من مرش الباب
فات الوقت وبعدين روح للحوش قعمز مع الحاج و صفية شوية و طلع لغرفته فوق
اول ماخش غمض عيونه وخذا شهيق ايشم في عطري اللي عالق في الغرفة وصكر الباب وشاف حوايجه اللي امخليتهم ع السرير مشى السرير وقعمز ع جهة اللي نرقد فاها قعد ايمشي في ايده يلتمس مكاني وخذا مخدتي شمها بحضن كان في شعور شوق ولهفة كبيرة ????????
مد ايده لحوايجه وتخيل كيف ناخذ فيهم كل ليلة في حضني و انرقدهم معاي ابتسم بوجع وندم ان اخر اتصال كان قاسي معايا وخاف يفقدني وتقعد حسرة في قلبه مدى الحياة ????????????
فاتوا ست ايام وكل يوم ايجي يامن من الصبح لاخر الليل يشبحني من بعيد ويمشي ????????
سابع يوم
فتحت عيوني بتعب وشبحت اجهزة حوليا و راجعت ذاكرتي شن صار معاي وتذكرت السيارة والحادث غمضت عيوني ورجعت فتحتهم وكنت هلبا عطشانة
انا/ بصوت ضعيف… نبببيييي ميييية …
قعدت انادي بصوت دوبه طالع ايجي حد يشربني مية لين حسيت بتعب ورجعت غبت عن الوعي
بعد ساعتين رجعت فقت وكانت في ممرضة اتغير في الكنيولة
انا/ شبحتها… عطشااانة اااعطيني مييية
ممرضة/ قربت … حمدلله ع سلامتك
انا/ بتعب… نبببي مييية…
مشت جابت شيشة مية خذت قطنة وسقتها بالمية وجت بللت شفايفي
ورجعت عاودت نفس الطريقة
انا/ بصوت ضعيف… نننبي نشرررب
ممرضة/ توا بس بللي ارياقك وبعدين تشربي كويس
انا/ االيوم شنوووو
ممرضة/ الاربعاء…
غمضت عيوني تذكرت الحادث كان الثلاثاء
انا/ ااامس درررت االحادث
ممرضة/ كملت تركيب كانيولة جديدة… لا ليك اسبوع تقريبا…وابتسمتلي… الحمدلله على سلامة…
ومشيت نادت ع الدكتور
شافني الدكتور و ساعة ثمانية وصل يامن للمستشفى و تلاقى مع الدكتور وقاله وعيت من الغيبوبة طار من الفرحة و جاء لعندي قرب مني وطبس عليا باس جبيني
يامن/ ورردتي حبيبتي
انا/ تخيلت انه حلم… ياااااامن
يامن/ شد ايدي باسها…يااروح يااامن الحمدلله ع سلامتك… ورجع يبوس كف يدي
انا/ فتحت عيوني… ااانت ياااامن؟
يامن/ ابتسم… لا انا الدكتور
انا/ بصوت هادي… لاااا ااالدكتوررر طرف
يامن/ قصدك انا شين
انا / امممم ااانت شييين هلباااا
يامن/ قرص خدي… اااستحشتك ياااشوكة و ربي مستاحشك موت …
وقعد ايبوس في كل مكان في وجهي بلهفة وحب ❤????
فاتوا دقائق حب وغرام وخش الدكتور طلب منه يطلع بيش ايجهزوني نطلع من العناية للقسم قعد يامن جنبي طول الليل شاد بيدي مرة اني نوعى ننتبهله مقعمز ومرات يسحبني النوم
ثاني يوم ساعة 11 الصبح
الغرفة امتليت حتى عزيز جايب نسوانه االزوز واول مرة نشوف الخوف في عيون نجوى كانت تبكي فرحانة بسلامتي لين بكتني و مريم حمدت بمجاملة وقعمزت اتهز برجلها واتشوف في اهتمام وحب يامن ليا
وخالي ومراته ايهدرزوا مع الحاج وصفية
و معاذ وصل متاخر و جاء قرب مني
معاذ/ باحراج … الحمدلله ع السلامة
انا/ الله يسلمك
يامن/ قرب منه… اعتذر منها يا غبي
معاذ/ باهي اسكت بس… و طلع وردة… جبتلك وردة حلوة كيفك تفضلي …
ومدها ليا
انا/ ابتسمت خذيتها… شكرااا كلك ذوق
معاذ/ غمز ليامن… اسمع
يامن/ بغيرة … توا انغرق الغرفة بالورد مش وردة وحدة
معاذ/بستهزاء… لا يا راجل
انا/ هههههه ????
يامن/ قرب بهمس…تسلملي هالضحكة
ح سليمان/ صبى… هيا خلوها ترتاح
صفية/ جت لعندي… عقبال ماتطلعي بسلامة
انا/ الله ايسلمك… و طلعوا
يامن/ شبح لمعاذ… وانت ماتبش تمشي
معاذ/ قعمز ع سرير… لا دوبني جيت نبي نهدرز
يامن/ نووض نووض خليها ترقد
انا/ لا مش نعسانة
معاذ/ بخبث… هاا سمعت… وعدل قعميزته… على فكرة الحيوان اللي اسمه خالد هارب معش لقيته والله عابيله على نهار احرف بس نوصل فيه
يامن/ مش قلت في واحد يعرف وين قاعد
معاذ/ ايه قالي في تونس وين نحصلوه
يامن/ امغير ايجيب عنوانه حتى لو كان في المريخ
انا/ بقلق… لا ااانتم مادخلكمش خلوااا الشررطة تشده ????
يامن/ بعقدت حاجب… تي شرطة شنو والله الا انجيبه انربيه الحيوان حتى لو نكمل عمري في الحبس????
معاذ/ خليه بس يوصل هنا وبعدين ساهل
انا/ كيف عرفتوا ان خالد هو اللي في السيارة بالكي حد ثاني…
يامن ومعاذ شبحوا في بعض باستفهام
يامن/ بستغراب … سياره شنو…
ادركت مش عارفين في سيارة اتضايق فيا
انا/بربكة… لاا لا ماقلتش سيارة
يامن/ شبح لمعاذ… سمعتها شن قالت
معاذ/ اي سمعت قلتي سيارة شن قصتها
انا/ لو بتجيبوا لنفسكم المشاكل مش ح نقول
يامن/بغصب… ووورردة احكي شن في ????
انا/ اوووف كان في سيارة تلحق فيا وصكرت عليا الطريق لين فقدت السيطرة وخشيت ع المعاكس
معاذ/ ????
يامن/ بغضب… هي هكي القصة ???? مااشي حسابه معاي عسير ????????????
معاذ/ الكلب ضروري نستدرجوه
يامن/ ارقامه مزالوا في تلفونك؟
نا/ مانعرفش تلفون وين بعد الحادث
يامن/ قاعد عندي في الحوش…وشبح لمعاذ… شوف حد من اللي تعرفهم في تونس
معاذ/ اوكي
انا/ بخوف… يامن ما توجعلي قلبي ماصدقت طلعت من… قاطعني
يامن/ بعصبية… مااالا تبيني نسكتله ششششن اااتشوووفي فيااا مش ررراجل ااااني
انا/ اااني خااايفة عليك معش نبي نخسرك????
يامن/ بحنية… ماتخافش ياعمري انا معك
معاذ/ تنحنح… اااحممم اااحممم نمشي نا خوذوا راحتكم
انا/☺️
يامن/ باهي حسيت على روحك من بكري قلتها لك هيا وجهك
معاذ/ بنضرة على جنب… الله الله وين كلامك زمان سبحان امغير الاحوال ????…
و طلع شبحنا في بعض وضحكنا
يامن/ اللي متشمت اكثر من فرحان
انا/ شن كنت اتقول زمان هيا اعترف ماتخافش????
يامن/ زاد قرب… شفايفك يبوا اوكال ناكلهم لك… وعض فمه… ااااخ لو مش خايف عليك بس ????…
واني سخنت وجهي وله احمر قعدت ساكتة
يامن/ بخبث… خيرك ساكتة وووين االلسانك ????…
و ضحك بصوت ????????????
انا/ تحررج فيا بقصد تعرفني في الغزل نرتبك انتحشم
يامن/ طبس بيده الزوز محاوطني… مزال بعد اتروحي الحوش ويصكر علينا الباب
مش ح نرحمك… ????
انا/ يااامن خلاص سماطة ????
يامن/ ???? خواااافة…
.
.
فات ايام وطلعت من المستشفى وضرورة التزام بالعلاج الكميائي والطبيعي
و دارو غداء بسلامتي و قعدت راقدة ع السرير في دار المعيشة تحت واللي ايجي ايحمد يلقاني و يامن يبي يهبل عشان معش ايشوف فيا الا بالليل متاخر و ايجي يرقد معاي على الصالون بيش ايونسني
بعد اسبوع خف الزوار و في الليل كانت خالته غالية و ساجدة عندنا هدرزوا ومشيوا خش يامن
يامن/ مساء الخير
انا و صفية/ مساء النور
صفية/ تعشيت؟
يامن/ اي تعشيت مع الشباب… وشبحلي… لو مش مرتاحة هنا اقعدي في دارك
انا/???? لا بالعكس مرتاحة هلبا
صفية/ قعدتها هنا اسهل من اطلوع ع دروج ناقصها هي
يامن/ حك لحيته… قلت مرات مش واخذة راحتها وتبي دارها ????
صفية/ على راحتها وين ماتبي تقعد الحوش حوشها
انا/ تسلمي يا عمتي البركة فيك وفي عمي
يامن/ غمزلي… نبي نمشي كان تبي تطلعي انساعدك
انا/ بمكر… لا امشي ارقد قاعدة هنا ????
يامن/ غمتله????… باهي تصبحوااا على خير…
وعطاني نضرة تخوف???? ومشى
صفية/ هيا نساعدك للحمام قبل مانمشي
انا/ لا صحيتي مانبيش حمام امشي ارقدي قاعدة تاعبة من الصبح تجري
صفية/ اي والله نعسانة ماني قادرة نفتح عيوني…
وصبت مشيت واني قعدت ع تلفون نتصفح وبعدين هدرزت مع حنين قريب ساعة ومانتبهت الا و يامن واقف على راسي
انا/ بفزع… يااامن رررعشتني!!!
يامن/???? اتشوفي فيا شبح ????
انا/ خيرك مش راقد
يامن/ يا مسمومة انقولك تمشي دارك اتقولي لا بنقعد هنا خيرررك اانتي تحرجي فيا قدام امي
انا/ بخبث… علاااش نحرج فيك شن المشكلة ????
يامن/ بغضب… توااا اانوريك المشكلة شنو…
وطبس عليا رفعني
انا/ ياااامن يا مهبول نزززززلني
يامن/ ماشي بيا… نزل قهرتك والله مانحطك الا ع السرير فوق عااجبك راقدة تحت بعيدة عليا ????…
وطلع ع اول درجة
انا/ واااك حشم بيك ايشوفونا… ????
يامن/ ???? خليهم ايشوفوا اصبرت بما فيه الكفاية????…
وطلعنا فوق لغرفتنا خش بيا وصكر برجله
يامن/ قاعدة سمينة كسرتي ضهري
انا/ ضحكت… تستاهل من قالك ترفعني????
يامن/ شنو نسيتي في حاجة مادرنهاش لعند توا ????????… ونزلني ع سرير
انا/ حاجة شنو!!!؟ ????
يامن/ طبس عليا… نلعبوا عريس وعروسة ????????… وباس شفايفي
انا/ صديته… لا يامن اني مش مستعدة
يامن/ ???? مش حرب هي خلاص هنيلي روحك…
وقعد يفتح في ازرار بيجامتي
انا/ حطيت يدي ع يده… باهي اصبر لغدوة وا… قاطعني
يامن/ ولا دقيقة واحدة… وكمل اينحي في البيجامة
انا/ واااه عليا راهو مزلت مريضة مانقدرش
يامن/ بزعلة… خيررررك انتي مش مستاحشتني ولا شنو
انا/ شديت وجه بيديا… لا مستاحشتك والله
يامن/ خلاص مالا ارخي روحك وماتخافش عارف ظرفك
انا/ ذبلت عيوني… تمنيت لو ظروفي احسن
يامن/ باس يدي… انا انحبك كيف ما انتي
و مزال الحياة قدامنا ديري اللي في خاطرك بس توا اعطيني اللي في خاطري راهو ملهوف عليك موووت ????????????
انا/ باهي موافقة… وعضيت شفتي ????
يامن/ بلهفة… ااه منك انموت في عضت شفايفك…
وبدا ايبوس في شفايفي و ايغازل فيا بكلمات حب واشتياق وووو❤????????????????????????
بعد ماتهنيت خذاني في حضنه ورقدنا ????
………….????????????????????????????????????
تسريع في الاحداث
فاتوا اسبوعين من اجمل ايام حياتي ويامن كان معاي زوج و اخ و صديق و حبيب عشت لحظات سعادة نستني كل ما مر عليا من حرمان و يوم بعد يوم حبي ليامن يكبر ويزيد ❤
اما عند ادم وجوري فات اسبوع كل حد في مكان و اسبوع الثاني روحت جوري الشقة بس كان ادم يتجنب يحتك بيها بيش ماتخذاش غريزته و يسبب في انتكاس صحتها و نهاية الاسبوع مشيوا لاخر مراجعة ليها والسبت حجزوا على رحلة العودة لليبيا
يوم السبت
ادم/ فتح باب الشقة… شنو جاهزة
جوري/ مقعمزة ع صالون وصبت… اايه جاهزة
ادم/ خذا الشنط… هيا…
وطلعوا وصكر وراه باب الشقة ومشوا للاصنصير استنوا الطالع وشوي وانفتح الباب
هيثم/ كان داخل… مساء الخير
ادم/ مساء الخير…
هيثم طلع وادم شد يد جوري ودخلوا
هيثم/ توصلوا طيبين
جوري/????
ادم/ شكرا سلم ع الاهل
هيثم/ ان شاءالله…
وشبح لجوري لاخر مرة ومشى
ادم/ شبحلها… خيرررك زعلاانة ????
جوري/ مش زززعلانة… ودارت وجهها
ادم/ بغضب… وااجعك الدكتورر معش ايشوف حبيبت القلب ????
جوري/ ااادم لوسمحت ماتكلمنيش بالهجة هذه ????
ادم/ ماااااالا كيف تبيني ااانخاطبك وانا سمعتك باوذاني شن قلتي له
جوري/ بثقة… ماقلتش حاجة غلط هذا الواقع
ادم/ عيونه ????نار… اااي الوااقع تمام اوكي ????…
وعم الهدؤ نزلوا من العمارة وركبوا في التاكسي ومشيوا للمطار
و ادم شايل في قلبه من جوري و زعلان هلبا وكل مايتذكر اللي سمعه نار تشعل في قلبه ????????
هيا نرجعوا قبل اسبوع ????
وقت كانت جوري في المستشفى وتتلقى العلاج في يوم كان ادم جاي ياخذ فاها اتروح الشقة سمع صوت هيثم داخل جن اجنونه وكان بيخش عليه بس وقفه صوت جوري وقعد يتصنت ع الباب
هيثم/ كنت نبي انشوفك بيش نعتذر منك عاللي صار يومتها والله ماكنت نعرف اسف حطيتك في موقف محرج
جوري/ بربكة… ولايهمك كان سؤ تفاهم انت مالكش ذنب
هيثم/ تنهد… تعرفي نكذب عليك لو قلتلك مش واجعتني بس الله غالب نصيبي هك ????ياخسارة
جوري/ نزلت عيونها… انت شخص محترم و دكتور كبير و مش اني وبس الف بنت تتمناك وصدقني انت تستاهل احسن مني
هيثم/ بارك الله فيك واني نتمنالك السعادة وديري بالك من روحك وصحتك
جوري/ ابتسمت… ان شاءالله
هيثم/ احتمال هذه اخر مرة انشوفك فيها اسمحيلنا لو سببتلك في مشاكل
جوري/ لا ان شاء الله انتلاقوا على خير ☺️
هيثم/ ابتسم… ان شاءالله هيا بسلامة
جوري/ سلم على نجاة وخالتي عائشة
هيثم/ يوصل…
وشبحلها وطلع و ادم لما سمعه بيطلع تراجع و خلاه يمشي وبعدين خش على جوري وكان زعلان منها ويتكلم معها ببرود حتى بعد وصلوا الشقة ماقلهاش حمد ع سلامة خش طول داره وقعد فاها وباقي الاسبوع معاملته جافة ????
.
.
في طيارة نعست جوري ونزلت راسها على كتفه وغفت بالنوم
وادم على قد ماهو زعلان على قد ماهو مستاحشته ويتمنى ياخذها في حضنه
وصلوا ليبيا وكان معاذ و سامي يستنوا في المطار بعد نزلوا من الطيارة كانت جوري شادة في يده و حاسة بالتعب
ادم/ خيرك جوري
جوري/بصوت ضعيف… مش عارفة نحس نفسي ضاق وجسمي تاعب ????
ادم/ خلاص هانت توا نوصلوا الحوش وترقدي هيا بنرفعك لصالة شدي فيا…
وطبس رفعها ومشى بيها والناس تشبحلهم ???? عاد مش متعودين ايشوفوا هك حب في مطاراتنا ????????????
بعد خشوا صالة المغادرة شاف الشباب مشى لعندهم و سامي و معاذ شبحوا في بعض وضحكوا
جوري/ ااادم نزززلني سااامي ايشوف فينا
ادم/ خلاص شافنا شن الجريمة…
وصل لعندهم نزلها بشوية وسلموا بالاحضان ❤
في الحوش الكل مجتمعين و يستنوا امتى ايخشوا ادم وجوري بعد خشوا صوت زغاريت غالية و صفية لاخر الشارع وعليك فرحة صارتلهم لين جوري من البكاء تعبت وخذوها ترقد في دار المعيشة عاد نحن الليبين شورنا ايجي مريض من برا لازم ما نمرضوه من اجديد ????????????
المهم فاتوا ايام وكل يوم صحة جوري للاحسن بس مزالت ترقد تحت ومعها امها و صفية ماخلوهاش دقيقة بروحها وادم استسلم للوضع ماعندش مايدير ????♀️
.
.
بعد اسبوع
سامي/ لو سمحتي شوفيلي دكتور وليد لو قاعد اليوم ولا لا
الرسبشن/ اي قاعد عنده دوام اليوم ياخذ في المراجعات
سامي/ تمام… ومشى خطوتين وقفه صوت
حنين/ دعاء وين مكتب دكتورة ياسمين مالقيتهاش
الرسبشن/ اي غيرت مكانه توا مكتبها في الدور الاول جنب مكتب دكتور سامي
حنين/ ااهااا
سامي/ التفت وشبحلها ورجع خطوتين… كيف حالك يا حنين
حنين/ تشبحله بشوق… الحمد لله
سامي/ انتهيت اجازتك
حنين/ اييه
سامي/ اهمم باهي انستي العيادة
حنين/ الله ايانسك…
ابتسملها و مشى
وحنين رجعت قعمزت جنب دعاء ع الرسبشن وحطت يدها على خدها وتنهدت بوجع
اما سامي خش مكتبه بعد ماكان بيمشي لدكتور وليد شوفته لحنين نوضت حنينه و مواجعه ???? حتى بعد تزوجت مزال ايحبها و خذا قلبه وشاغله تفكيره على قد ماحاول انه ينساها ????
المهم اخر الدوام بعد ماكمل مراجعاته
كانت في ممرضة معه تهدرز مع ممرضة اخرى ويشربن في قهوة سمع اتقول حنين اطلقت على طول ماقعدتش عنده حتى اسبوعين
انصدم من اللي سمعه وقعد مركز على كلامها بعد مشيوا صبى نحى بالطوه ولبس جاكيته وطلع من مكتبه
سامي/ حنين وين
الرسبشن / توا روحت
سامي/ اووكي…
ومشى طلع برا العيادة وفكر ياخذ رقمها من الرسبشن بس حسها بايخة وقرر ياخذ رقمها مني و على طول ضرب الحديد هو ساخن واتصل بيامن بعد ماسلموا وسالوا ع الصحة
سامي/ وردة جنبك
يامن/ شبحلي …اييه ليش
سامي/ ممكن تعطيهالي انكلمها
يامن/ ههه لا ياراجل شن نعطيها لك بالكي في تيس قاعد اتكلم فيه
سامي/ تي بلا جو غيرتك الزح نبيها في موضوع خاص ضروري بالله دير خير مرة في حياتك واعطيني نكلمها
يامن/ بمكر…قولي شن تبي فاها قبل
سامي/ لا اله الا الله يااسيدي نبي نسالها على صحبتها فهمت توا
يامن/ ببرود…اااهاااا باهي شوية نعطيها التلفون …
وصكر عليه وجاء مدلي التلفون
انا/???? شنوووو
يامن/ شدي بيكلمك سامي ولد خالتي اسمعي افتحي ع اسبكر
انا/ ???? ممممم…
ورن تلفون بيدي فتحت عليه و يامن يستنى يسمع
انا/ الووو
سامي/ اهلين يا وردة كيف حالك
يامن/ فنص عيونه…اافتحي ع اسبكر
انا/ وقفت ومشيت للزيانة…الحمدلله بخير
يامن/????
انا/????
سامي/ برتباك… يااوردة بنسالك على حنين شن ااخبارها
انا/ كويسة الحمدلله اول امس قالت رجعت للعيادة ماتلقيتوش
سامي/ تنحنح… ااي شفتها اليوم بس في حاجة سمعتها ونبي نتاكد منها
يامن/ جاء قرب… توااا ااتشوفي ????
انا/ شبحت ليامن ????…اي اللي سمعتها صح
سامي/ اهااا باهي نطلب منك طلب
انا/ ولو اطلب من عيوني ????
يامن/ بغيرة ????
سامي/ نبي رقمها لو مافيش احراج
انا/ بفرحة…لالا مافيش احرج ولا حاجة توا نبعثهولك برسالة ااه على فكرة يا دكتور حنين بنت كويسة تستاهل كل خير
سامي/ فهم عليا وابتسم…ان شاءالله باهي صحيتي مش ح نعطل عليك
انا/ تمام ولا يهمك هيا سلم على خالتي مع سلامة
سامي/ يوصل… وصكرنا
يامن/ ???? شن اللي درتيه
انا/ بدلع… شن دررررت!
يامن/ مش قلتلك افتحي اسبكر وبعدين شن من عيوني ما من عيوني توا هذا كلام اتقوليه قدامي ????
انا/ نمشي بصعوبة… وااااه منك اعقل بطل غيرة ????
يامن/ لحقني… شن كان يبي
انا/ سرررر مافيش داعي كل حاجة تعرفها ????
يامن/ شدني من يدي… شنو شنو شن قلنا نحن مافيش حاجة سر بينا واللي اتصير تقوليهالي ولا تبي يتكرر اللي صار مع ااالزفت هذاك
انا/ لا اطمن موضوع خاص بيه هو و حنين توا ايجي يوم وتعرفه… وخشيت السرير… وانت خيرك قاعد لتوا ليش مش في المزرعة
يامن/ ماعنديش جو نمشي ساد ادم قاعد غادي
انا/ ???? امممم باهي…
وخذيت تلفوني فتحته وبعثت لحنين
يامن/ جاء قعمز جنبي… ماتبيش اتحني عليا لينا اربع ايام في الناشف …
وقرب يبي ايبوسني????
انا/ وااااك وواااخر من عليااا
يامن/ اووف خيرررك اتصدي فيا نبي حقي ااالزززح
انا/ راسي وجعني… مانقدرش كل ماتقرب متي نفسي تعية ????
يامن/ بزعلة… جو جديد هذا راهو مايمشيش الحال هكي ااايو…
وقاطعه تلفونه ايرن
يامن/ بغضب…وقتك انت ااالثاني…ااالووو
معاذ/ الفار طاح في المصيدة
يامن/ بعدم فهم…. فار شنو انت الثاني
معاذ/ ااالحيوان خالد قاعد في ضيافتنا ????
يامن/بفرحة… اااوكي مااادير شي لين ااانجيكم…
معاذ/ تم…
وصكر الخط ومشى فتح دولابه وطلع صندوق
انا/ نشبحلها باستغراب… شن في
يامن/ طلع مسدس… مافي شي… وحطه على خصره وراء جاكيته
انا/ ???? علااااش ااالمسدس
يامن/ قالتلك ماافي شي انا طاالع توا اانجي
انا / نزلت من السرير بخوف… يااامن اااستنى ????…
ويامن طلع بسرعة وصكر وراه الباب ونزل يسرع مشى لسيارته وانطلق بسرعة جنونية ????????????????
يتبع..
لقراءة الحلقة التاسعة عشر : اضغط هنا
لقراءة باقي حلقات الرواية : اضغط هنا
نرشح لك أيضاً رواية رقية للكاتبة هاجر محمود.
