رواية أهدتني معاقاً الفصل الخامس عشر 15 بقلم أم عائشة (أسماء عبدالهادي)

فى اليوم التالى

ذهبت فرح الى الجامعه لاول مرة وحدها بدون يامن ،كانت تشعر بالوحده حقا ،كان يامن يملا حياتها فعلا ،كانت بجواره تشعر بالامان ،لاول مرة تركب المواصلات من دونه ،ظلت تتذكر حديثه ومرحه معها طوال الطريق ،كان صديقا لها اكثر من كونه اخ ،انسابت دمعه فارة من عينية رغما عنها _ربنا يشفيك يا يامن يارب

نزلت من الميكروباص وجدت نغم فى انتظارها امام الجامعه

_حمدا لله على السلامه،يابنتى كنت جيت جبتك بالعربيه اسهل ،دماغك ناشفه اوى

_يابنتى ،حرام اتعبك كل يوم

_طيب يلا المحاضرة هتبتدى

*****

بعد انتهاء اليوم

_هتروحى المستشفى،ولا هتروحى البيت

_هروح البيت اعمل اكل وبعدين اروح المستشفى

_تمام ،يلا هوصلك

_يابنتى متتعبيش نفسك ،هرجع زى ما جيت

_هوصلك يعنى هوصلك

_نغم ،سيبينا شويه ،عايز اتكلم مع فرح

وقفت امامه بتحدى _وانا مش عايزة اتكلم معاك

قال لنغم بحدة_نغم ،امشى دلوقتى

_لا مش همشى يا امجد ،انا قلت لك ابعد عن فرح

_نغم متخلنيش ازعلك وانا مش عايز اعمل ده

_عايز ايه ياامجد ،قول اللى عندك قدام نغم

_نغم مش هقول كلامى مرتين ،انتى عارفه انا ممكن اعمل ايه

نغم باستسلام_فرح انا هستنى بعيد ،خمس دقائق وهرجعلك تانى

ذهبت نغم بوجع ،لا تدرى لما تتعلق به هكذا وهو على هذا الحال ،حاولت مرارا أن تبعد تفكيرها عنها ،لكن بمجرد أن تراه تتحطم كل حصون دفاعها ،هى تعرف تمام المعرفه انه لا يناسبها كما انه لا يبالى بها من الأساس ،تنهدت فى ضيق وظلت تنظر لهم من بعيد

***

_عايز ايه يا …ثم أكملت بسخريه_ياامجد باشا

،اسمع من النهارده مش هسمح لك تقف تتكلم معايا الواقفه دى ولا انك تتعدى حدودك وتحاول تمسك ايدى فاهم ،من النهارده هتشوف فرح تانيه خالص

_لا خوفتينى ،وايه كمان يا قطه ،

انتى ناسية انتى مين ،مبصتيش لنفسك فى المرايه ولا لهدومك انتى مجرد واحده ملهاش اي لازمه فى الحياه و،الظاهر انتى متعلمتيش من الدرس اللى بعته ليكى مع اخوكى ،مش انا اللى تتحديه يا..يافرح

تغيرت تعابير وجهها الى الصدمه والالم معا _انت السبب فى اللى حصل ليامن؟!،غبية ازاى مربطش الاحداث ببعضها ثم أكملت ببكاء والم_ليه ،،ليه تأذيه بالشكل ده عمل لك ايه

يامن عمره ما اذى حد ،طول عمره فى حاله ،انت انسان معندكش قلب ،حسبنا الله ونعم الوكيل فيك

ضحك امجد ضحكه عاليه _ايوة كده عايزك ،تعيطى كمان ،عايزك تيجى تترجينى انى اسيبك فى حالك انتى واهلك

فرح بانكسار_لو كنت عايزنى اعتذرلك ،،فانا اسفه يا امجد باشا ،بامكانك ترد بدل القلم عشرة ،ومستعدة اعتذر لك قدام الجامعه كلها ،بس ارجوك سيب اخويا فى حاله كفايه معاناته طول عمره ،ارجوك

_ممم مكنتش اعرف انك هتستسلمى بسهولة كده

_مش ده اللى انت عايزة ،وانا مستعدة،بس خليك فاكر انى مش هسامحك ابدا ياامجد على اللى عملته فى يامن ،هيجى اليوم اللى اخد فيه حق اخويا بنفسى منك

_ايوة كده ارجعى القطه الشرسه اللى حبيتها فيكى ، كده مش همل منك بسرعه

فرح وقد فقدت السيطرة على هدوئها وقالت ببكاء مرير_انت عايز ايه بالظبط ابعد عنى بقا حرام عليك ، بتعترض طريقى كل شويه وتريقه عليا وعلى لبسى ومتكلمتش ،تريقه على اخويا وسكت ،اتعديت على اخويا وكنت هتموته وبحاول امسك اعصابي ومفيش فايده ،منك لله يا امجد

لا يدرى لما اثار رؤيتها منهارة هكذا شيئا ما فى قلبه ،احس بالم حاد فى اعماقه ،خنجر اصاب قلبه فاخترقه فاصابه فى مقتل ،لم يستطع المكوث اكتر ،احس بوحش فى المكان يطارده خطى بسرعه اشبه بالعدو وركب سيارته وانطلق بها

***

لم تكن تنظر إليهم فقد انتابها شعور بتأنيب الضمير كيف تحب من سبب الاذى والوجع لصديقتها الا تعد هذه خيانه ،هى تحب فرح ولا تريد لها الا الخير ،وايضا لا تستطيع التحكم فى قلبها،تحبه من طرف واحد ولا تستطيع البوح بهذا لاحد اذا فليبقى بداخلها طالما لا احد يعرف بهذا ولا حتى هو نفسه

فاقت من حالتها تلك،وجدت فرح منهارة على الارض تبكى وامجد ليس بالجوار ،جرت سريعا اليها

_فرح ايه اللى حصل ،امجد عمل فيكى حاجه ،قوليلى يافرح ردى عليا متسبينيش كده

فرح ببكاء_ امجد السبب فى اللى حصل ليامن يانغم

سكتت نغم ولم تستطع الكلام

فرح _انتى كنتى عارفه ومقلتليش ليه يانغم

نغم باسف_هيفيدك بايه انك تعرفى يا فرح شوفى حالتك عاملة ازاى،انا اتكلمت معاه وهو وعدنى انه مش هيأذيكى لا انتى ولا عيلتك

فرح باستخفاف _وكأنه هيفى بوعده ده ،انا السبب فى اللى حصل ليامن ،قوليلى هبص فى وشه ازاى بعض كده ثم أكملت ببكاء _انا السبب ،انا اللى عملت فى يامن كده ????

نغم بالم على ما يحدث لصديقتها_فرح ارجوكى متعمليش فى نفسك كده ،انتى مش ذنبك حاجه،قومى يلا تعالى معايا ،علشان نرجع البيت

فرح _سيبينى يا نغم ،انا ضعيفه ،ضعيفه اوى ،انا اذيت يامن بضعفى ،اذيته بخوفى من الحقير امجد ،بس انا مكنتش خايفه على نفسى، كنت خايفه عليه كنت خايفه احكى ليامن ليأذيه،وبردو قدر يأذيه ،قوليلى اعمل ايه ،انا مبقتش عارفه اتصرف ،ليه انا مستسلمة تماما لل بيعمله معايا امجد ،انا مكنتش كده

نغم بحذر _انتى حبيبتي امجد يافرح؟!!

فرح بصدمة_حبيته!!انا مبكرهش حد فى حياتى قد كرهى ليه ،امجد ده احقر انسان شوفته ،ولا عمرى هسامحه على اللى عمله

تنهدت نغم براحة ،ظلت تفكر كيف ستخلص صديقتها من براثن امجد ،،،ترى هل ستستطيع؟!

نغم_قومى يافرح يلا ارجوكى ،تماسكى انتى مش ضعيفه يلا هوصلك للبيت وكل حاجه هتتحل باذن الله

اوصلت نغم ،فرح الى بيتها ،كانت فرح طول الطريق تحاول تهدئة نفسها حتى لا يلحظ والدها حزنها

نغم_انا هفضل معاكى لحد ما تهدى ،تعالى يلا نعمل الاكل علشان عمو محمود قرب يجى

نغم لكى تخرج فرح مما هى فيه_ماشاء الله شطورة يافرح ،بتعرفى تطبخى ،تعرفى انا ولا مرة دخلت المطبخ ،مش بعرف اعمل شاى حتى تصورى

ابتسمت فرح ،نغم_ايوة كده اضحكى يافرح ،مش عايزة اشوفك حزينه تانى ،ده انتى حتى اسمك فرح

تنهدت فرح فى الم _صعبان عليا اللى حصل ليامن

نغم بحزن_ربنا يشفيه ،الحمد لله انها جت على قد كده

فرح_وهسيب الحيوان ده يتحكم فينا كده ؟!

نغم _هكلمه تانى يافرح اوعدك هحاول اخليه يبعد عنك

فرح_لا ابعدى عنه ،ده انسان ندل ممكن يأذيكى انتى كمان

عاد محمود من الخارج _السلام عليكم ،ها يافرح خلصتى الاكل هنروح نتغدى فى المستشفى مع يامن

فرح _اتفضل يابابا انا جهزت لحضرتك الاكل ،ابقى سلم على ماما ويامن

محمود_انتى مش جايه ؟!

فرح_معلش يابابا كان نفسى بس مش قادرة تعبانه شويه

نغم_اتفضل انت ياعمى وانا هفضل مع فرح لحد ما حضرتك ترجع بالليل

محمود_طيب زى ما تحبى ،خدوا بالكم من نفسكم ومتفتحوش لحد

فرح_حاضر يابابا

**،

نغم_ليه مروحتيش يا فرح ،انا متاكدة انك مش هتتحملى تفضلى بعيد عن يامن

فرح بحزن_مش قادرة ،مش هقدر ابص ف وشه وانا السبب فى اللى حصل له

نغم _فوقى يا فرح ،انتى عارفه انك مش السبب فى حاجه وكله بسبب ..تنهدت بضيق ..امجد

فرح_ارجوكى متجبيش سيرته بتعصبنى

نغم _حاضر ،،ممكن ناكل بقا انا جعانه اوى وريحه الاكل تحفه

***

مروان_الف سلامة عليك يا يامن

ادهم_ايه يابنى ،انشف كده ،انت واخينا الخرع ده ،مشيرا الى حازم

حمزة _سلامتك يا يامن

علاء_سلامتك يا يامن،كان نفسى نتعرف فى ظروف احسن من كده

يامن _شكرا ليكم

ادهم (ده ادهم الصياد غير ادهم بن عم امجد خدوا بالكم ياشباب)

يامن مين اللى ممكن يعمل فيك كده،اقصد فى حد على عداء معاك

يامن _لا على ما اعتقد ،انا عمرى ما اذيت حد ،معرفش مين دول او عايزين ايه

مروان_يعنى انت مش بتشك فى حد

حازم_ايه يا جماعه هوا احنا فى النيابه هناولا ايه

ادهم بحده لحازم_انت تسكت خالص انا ماسك نفسى عنك بالعافية ،،لولا عمى لؤى موصينى مجيش جنبك كنت فرمتك ،،شويه صيع يعلموا عليك ،ها (منور يا ادهم ،،هارك اسود عايزه يعمل ايه يعنى )

مروان_خلاص يا ادهم اللى حصل

حمزة ليامن_متاخدش فى بالك،هما كده علطول

يامن_ بس جميل ،خوفكم على بعض

علاء _يلا ياشباب علشان نسيب يامن يستريح

قام الجميع بتوديع يامن وتمنى له الشفاء العاجل

كادوا يخرجون الا انهم وجدوا الرعد فى طريقهم ،فافسحوا لعمهم الطريق احتراما ،،حمزة_منور يا عمى

رمقه رعد نظرة اربكته _على القصر يا حمزة

حمزة_اوامرك ياوحش

رعد_ ادهم ،اخفى اخوك من قدامى

ادهم وهو يسحب اخوه من ملابسه _حاضر يا عمى

(ملحوظه رعد معندوش ابناء غير حنين وبس وهنعرف ده فى الجزءالثالث من لماذا يا ابى باذن الله)

دخل رعد الى غرفه يامن،الذى ما ان رأه حتى سر كثيرا يامن _ياااه ،رب ضارة نافعه ،باشمهندس رعد بنفسه هنا قدامى ،انا مش مصدق ،،ربنا حقق لى حلمى انى اتعرف على عيلة الصياد

رعد بهدوء_ ها اخبارك ايه دلوقتى يا بطل

يامن_الحمد لله فى نعمة ،شكرا على اللى حضرتك عملته معايا ،حازم حكى لى ان حضرتك اللى انقذتنا وجبتنا هنا ع المستشفى

رعد_كان نفسى القن الكلاب دول درس بس للاسف هربوا اول ما وصلت

يامن_حسبى الله ونعم الكيل فيهم

رعد_قوم انت بالسلامة وعدى السنه دى بتفوق كعادتك علشان مكانك فى شركه الصياد منتظرك

حازم_ايوة يا عم مين قدك،، هتشتغل مع الوحش

نظر رعد لحازم_انت لسه عندك بتعمل ايه

تراجع حازم للخلف_انا نسيت اعطى ليامن الورق اللى طلبه ،،مصمم يذاكر وهو ف المستشفى

رعد_حطه هنا وحصل اولاد عمك بسرعه

حازم وهو يخرج سريعا_حاضر

رعد_ايوة كده تعجبنى فيك عزيمتك القويه،انا مبحبش اللى يشتغل معايا يكون متكاسل ،

يامن_شكرا لحضرتك يا باشمهندس

****

امال _امجد انت فين ،مش ظاهر طول اليوم ،سالت عليك اسر ونودى ومحدش يعرف عنك حاجه

امجد_ مش راجع النهارده ياماما يمكن بكرة او بعده

امال _انت سافرت تانى!!

امجد_لا ،بس مليش مزاج ارجع ،سلام

امال_امجد استن..،اوف قفل الخط

كارم بسخريه_منتظرة من بنى ادم زى ده ايه

امال_لو سمحت يا كارم متتكلمش عن ابنك بالاسلوب ده

كارم بسخط_ابنى،،انا خارج ويمكن اتأخر

امال_حتى انت خارج ،هفضل فى الفيلا لوحدى

كارم_مش هتغلبى ،روحى النادى اقعدى مع صاحباتك

****

يامن _ماما فرح فين ،مشفتهاش طول اليوم

احسان_فى البيت ،تعبانه شويه

يامن بخضه عى اخته_تعبانه مالها ياماما

محمود_اختك كويسه مرهقه بس ،اكيد معرفتش تنام فى المستشفى امبارح

اتصل يامن بفرح للاطمئنان عليها

يامن _مش بترد ليه

محمود _يمكن نايمه ،متقلقش نغم معاها فى البيت وانا شويه ورايحلهم

يامن_روحلهم دلوقتى يابابا ،انا قلقان على فرح ،دى استحالة تفضل كده من غير ما تيجى تطمن عليا

فرح_فعلا ،حاولت ومقدرتش يا يامن

يامن بسعاده_فرح خضيتينى عليكى ،،فرح انتى كنتى بتعيطى؟!

فرح وهى تهز رأسها نفيا_لا يا يامن انا كويسه ،انت بس وحشتنى ،زعلت انى فضلت طول اليوم م غير مااشوفك ،فخليت نغم توصلنى على هنا

محمود_وهيه فين دلوقتى

فرح _روحت يابابا

****

بعد اسبوع لم يظهر فيها امجد لفرح ،وتحسنت احوال يامن وسمح له الطبيب بالعودة الى المنزل

الطبيب_دكتور لؤى بيعتذر انه مقدرش يجى النهارده وبيسلم على حضراتكم

محمود_مفيش مشكلة يا دكتور ،ربنا معاه

الطبيب_دكتور لؤى كان متابع حالة يامن وسمعت انه بيقول ان رجليه محتاجه عمليه جراحيه كبيرة شويه بس نسبه تحسن رجل يامن تتعدى ٨٠℅

محمود بفرحه_بجد يا دكتور ؟،والعملية دى تتكلف كتيير!؟

الطبيب_اكيد يا حج هيه مش عملية سهله ،ممكن تتكلف ١٠٠الف جنيه

محمود_ الله المستعان ،المبلغ كبير جدا

الطبيب_ ربنا يوسع رزقك ياحج،عن اذنكم

يامن_انا مش محتاج عملية يا بابا ،اناالحمد لله راضى بحالى كده ،مترهقش نفسك بالتفكير فى الموضوع ده كتير ،حضرتك عندك فرح محتاجه تتجهز ،ربنا يعينى واتخرج واشتغل علشان اساعد حضرتك

محمود_ربنا يباركلى فيك يابنى ،ربنا يقدرنى علشان اسعدك انت واختك

***

جاء حسن مع والدته الى بيت محمود للاطمئنان على يامن وحددوا يوم غد لجلوس فرح مع حسن كرؤيه شرعيه بعد ما اصر يامن على ذلك رغم الحاح اخته انها لا تريد هذا الا بعد ان يتعافا كليا

كان يامن لا يزال لا يستطيع المشى ،لذا كان حازم يحضر له ما يحتاجه الى المنزل كى يذاكر من منزله

اتى اليوم المحدد لزيارة حسن

كانت نغم مع فرح لتكون بجوارها فى

مثل هذا اليوم

نغم_ها يافرح حاسه بايه

فرح_عادى يا نغم ،متوترة بس وحاسه انى مش هعرف اساله اى حاجه من الاسئلة اللى بقالى فترة برتب فيها

نغم_ايه يابنتى حيلك ،اسئلة ايه،هو داخل امتحان ؟!

فرح_الله مش لازم اعرف تفكير الشخص اللى هرتبط بيه

نغم وهى تلوى شفتها_طيب يلا يا مس ،مستر حسن منتظر برا لحد ما قرب يخلل

فرح_استنى بس هراجع الاسئلة فى دماغى

نغم_والله انا عارفاكى ،اول ما تدخلى هتتلخمى ومش هتعرفى تفتحى بؤقك حتى

فرح_طب نقطينى بسكاتك موترانى ،بعدين انتى جايه معايا ليه

نغم_طبعا علشان اشوف سى حسن بتاعتك

فرح_يابنتى مش لما اشوفه الاول

نغم_خليكى انتى على جنب ،اصلا لو معجبنيش هفركش الجوازة دى ،هوا اى حد ياخد فروح

لم تتمالك فرح نفسها من الضحك

احسان _فرح صوتك مسمع برا فى الصاله فى ايه يابنتى

فرح _اسفه يا ماما ،،خدى نغم ف ايدكى ،موترانى

احسان بامتعاض _ما هو باين انك متوترة فعلا

لكزت فرح نغم فى كتفها_شوفتى جبتيلى الكلام

نغم بتبرم_وانا مالى هوا انا اللى قلت لك اضحكى بالطريقه دى

جاء محمود_يلا يافرح

فرح بتلقائيه_ يامن فين

محمود_قاعد مع العريس ،يلا

مشت فرح مع ابيها الى حيث المكان الذى يجلس فيه يامن مع حسن ،كانت فرح ترتدى دريسا هادئا وعليه خمار من نفس اللون ولكن بدرجه افتح قليلا ،بدت مثل القمر فى ليلة تمامه ،لم تضع اى مساحيق ولا حتى كحل ورغم ذلك كانت جميلة حقا

دخلت مع والدها وعينيها ارضا م فرط خجلها ،اجلسها والدها بجوار اخيها يامن

ام احسن_بسم الله ما شاء الله ،،قمر يا عروسه

لاحظ يامن توترها فاقترب منها هامسا _ فرح حبيبتى مفيش حاجه تستدعى توترك الزايد ده ،حاولى تكونى على طبيعتك

محمود _تعالوا اتفضلو فى الصالة نسيب العرسان يتعرفوا على بعض شويه

يامن _فرح انا هقعد قصادك ف الصاله ،متقلقيش

عاون محمود ابنه على القيام ثم اجلسه مرة اخرى مقابلا لفرح فى الصاله

ظلت فرح تنظر ارضا ولا تتحدث وهو ايضا لم يتحدث

بعد فترة مل حسن من الانتظار فقرر الحديث اخيرا

حسن_انسه فرح ممكن ترفعى راسك علشان نقدر نتكلم شويه

كانت فرح فى موضع لا تحسد عليه ،فرفعت راسها الى اعلى تنظر الى يامن الجالس قبالتها فى الصاله لكنه لا يسمع ما يقولان _اشار لها يامن ان تنظر الى حسن كى تعرفه وتستطيع اتخاذ قرارها الصحيح

نظرت له نظرة خاطفه على استحياء

يتبع..