رواية غوى بعصيانه قلبي الفصل الثامن والأربعون 48 بقلم نهال مصطفى
رواية غوى بعصيانه قلبي الجزء الثامن والأربعون
رواية غوى بعصيانه قلبي البارت الثامن والأربعون
رواية غوى بعصيانه قلبي الفصل الثامنة والأربعون
الفصل الثامن والأربعون
(18) ج 2
“يا من أراقبه والوصل منقطع
كيف السبيل إلى إعلان أشواقي؟ ”
••••••••
لأول مرة يحل الصقيع على أرجاء المنزل ، جاءت العاصفـة فأخذت جميـع سُكانه ورحلت ولم يتبقى إلا الوحدة والجـدران المشققة .. لقد كان كل ركن هنا يزهر بالحيـاة ، بالحياة التي تمردت عليها مرة ولعنتها أخرى وعُدت إلى أحضانها معتذرة مكتفيـة بحضن أبي ودفء أخوتي.. تحولت أعوامي إلى سراب ، فارقت البيت والأهل وبتُ انتمي لأناسٍ لم أصادفهم في سُلم العمر لمرة .. مـا أنا عليـه الآن لم يخطر بعقلي للحظة بأن سأساق إليه !!
وها هي عادة القدر الذي يأتي ليفاجئنا كل مرة بمصائر مغايرة عن الأحلام التي أفنينا فيها زهرة العمـر ..
تقف ” حياة ” وراء ” بار” مطبخ منزلهم تتأمل تفاصيل السـاحة الخالية من صوت أخوتها الجياع ورائحة الأسماك المتنوعة التي اعتادت أن تقدمها لهم .. زاحت عبراتها المترقرقـة ثم اتجهت نحو الثلاجة وأخرجت منها ما تحتاجه لتحضيـر وجبة الإفطار ..
شرعت في تقطيع الخضراوات وكسر البيض حتى شق ثغرها ضحكة حزينة عندما تذكرت يونس وهو يؤكد عليها بكل مرة ” بيض عيون مش أومليت يا سيلا ”
تنهدت بمرارة وقالت لنفسها :
-وحشتوني أوي …
دارت ناحيـة الموقد وأشعلت أحد أعينه ووضعت فوقها المقلاوة وبجوارها ” عبلة الفول المغلفة ” ثم اتجهت ناحيـة ” الراديو ” وشغلت أغنيتها الصباحيـة التي كانت تجمع أخوتها ” نسم علينا الهوى ” وعادت مرة أخرى لطهي الفول الحـار شاردة مع كلمات الأغنيـة وتدندن معها بشـوق عازف لماضيها ..
حتى جاءت أيدي عاصي لتطوق خصرها برفق هامسـًا :
-ده أيه الصباح الرايق ده !!
لم يعد قربه يرعبها بل أصبح مصدر أمان ومحض انتظار لها .. ردت بهدوء يطوقه الشجن :
-كُنت أول ما اشغلها أخواتي يعرفوا أن الفطار بيجهز .. أول مرة أشغلها وعارفة أنهم مش هيجوا ..
أحس بوجعها الغائر بداخلها وقال :
-في أقرب وقت هتتجمعوا تاني ..
ثم غير مجرى الحديث :
-بتعملي أيه ؟!
قلبت محتوى المقلاة بخفة وقالت :
-طبق فول بالزيت الحـار هتأكل صوابعك وراه ..
دفن أنفاسه بشعـرها وقال بإعجاب :
-دي كفاية ريحتـه ..
أسكره عطرها المحبب إلى فؤاده فتعمد ملء جيوب قلبـه من قربها وسألها بنبرة مدججة بالوله :
-هربتي إمبارح قبل ما نخلص كلامنـا ..
تملصت منه بدلالٍ بعدما بد شبح الابتسامه على وجهها وركضت نحو الثلاجة وسألته :
-بتحب المربى !!
رفع حاجبه مُدركًا خطتها الجديدة في الفـرار ، فاقترب منها بخطوات اندس الخبث بها وقفل باب الثلاجة بايده وبالأخرى سجنها تحت حِصاره وقال مُتيمًا :
-“يا من أراقبه والوصل منقطع
كيف السبيل إلى إعلان أشواقي؟
تُراهُ يدري بأنَّ القلبَ مَسكنهُ
ولستُ أُبصرُ بالعينينِ إلاهُ ….
القلبُ يسأل عيني حينَ أذكرهُ :
يا عين قولي متى باللهِ نلقاهُ ؟”
تآزر عليها شـوقه الذي تأملته بعيونه فسألتـه بخفوت :
-أنت فتحت الصندوق !
أومأ بالإيجاب وهو يقترب منها أكثر فأكثـر :
-كان عندي فضـول أعرفك أكتر …
-وعرفت أيه؟!
-وقعت في حُبك من جديد ..
تبسمت بدلالٍ وقالت متعمدة إثارة غضبه :
-بس الكلام المكتوب في الرسايل مش ليك !
عقد حاجبيـه متسائلًا :
-وأمتى هتكتبي لي زيه ؟!
حائرة تتمايل أمامه كطفلة مدللة :
-أنا هكتب للشخص اللي قلبي هيحبه وبس .
-وليـه مش أنا !!
تحركت عينيها بسرعة يمينًا ويسارًا ثم شرعت بمحاولة جديدة للهـرب ولكنها فشلت تلك المرة وهو يحكم قبضته عليها بإصرار :
-انسي ..
وقفت أمامه كالقطة المتمردة وقالت :
-الأكل هيتحرق !!
-يتحرق ..
بجزل طفولي سألته :
-أنت عايـز أيه !
-عايز أعرف ردك على كلامي ..؟!
-أي كلام ؟!
قرأ الاعتراف بعينيه قبل ما يكرره لسانه “قلبي الذي استقر على كتفيك دونًا عن كتاف العالمين ” .. زمجرت رياح غضبه هاتفًا :
-حيـاة !!!
تلصصت من تحت يده بخفه وركضت لتقفل الموقد ثم اتبع خُطاها عاقدًا ذراعيـه أمام صدره منتظرًا ردها حتى دارت إليه بتوجس :
-بلاش تستنى مني ابادلك نفس المشـاعر ..
-ليـه !!
أغرورقت عينيها بماء الحزن :
-أنا كُل حاجة بحبها بتروح مني .. قلبي مش هيتحمل خُسارة جديدة ..
رد بدون اقتناع :
-أنتِ بتتلككي ، فين المشكلة ، أنا بحبك ومستني رد على حبي ده منك .. عشان نبدأ حياة جديدة سوا !!
دنت منه أكثر وقالت بيأس وهي تطالعه بأعينها الحادة :
-خايفة لو سلمت لك قلبي تروح منه ..
-يعني أيه ؟!
تنهدت بحيرة :
-يعني اديني وقتي ، محتاجة أقعد مع نفسي شوية .
تقبل طلبها على مضض :
-تمام ، مش هضغط عليكِ ، بس لازم تعرفي أن صبري له حدود ..
أحتل الأسف ملامحها وقالت بهدوء :
-صحى البنات عشـان نفطر كلنا سـوا ..
••••••••
-طمني يا دكتور ؟!
أردفت شمس سؤالها بعد مرور ليلة عصيبة عليها بالمشفى تترقب حالة تميـم الحرجة لساعات طويلة حتى خرج الطبيب من غرفة العناية وقال :
-الحمد لله ، صحته مستقرة وهننقله غـرفة تانيـة ، لان الرصاصة كانت قريبـة من العمود الفقري .. وكان لازم نطمن عليه الأول
-يعني هـو أحسن دلوقت ؟!
-اطمني يا مدام ، الحالة مستقرة ومفيش داعي للقلق ، ساعة وهيفوق ويطمنك بنفسـه ..
هللت بخفوت :
-الحمد لله ، الحمد لله ..
ثم انصرفت متجه ناحيـة الزجاج الفاصل بينهم تتأمله وهو نائم تحت الأجهزة المتصلة بجسده وألقت سؤالها المحمل بالعتاب :
-ليـه كده يا تمـيم !!
ثم أغمضت عيونها الذابلة وقالت لنفسها :
-مش مهم أي حاجة ، المهـم أنك ترجع كويـس .
•••••••
-الساعة ٧ وفي محـاضرة الساعة ٨ المفروض نصحى ولا أيه ؟!
أردف مُراد جملتـه بحماس وهو يهاتفها كي تستعجل وتفارق مرقدها وتكف عن التكاسل ، فأجابته بصـوت يملأه النوم وقالت بعتب :
-على فكرة أنت السبب !!
-أنا ؟! وأنا كُنت عملت أيه ؟!
نهضت من مرقدها بخمول وأكملت :
-ولا حاجة ، بقيت ترغي معايا لوش الفجر بس ..
أتاها صوته ضاحكًا بصوت مرتفع ثم قال :
-بحب استغل الناس الحلوة .
تأففت بإعجاب :
-مـراد !!
-عيون مراد ..
-صباح الخـير ..
-صباح العسل ..
ثم ألقى نظرة في ساعة يده غيرت نبرة صوته :
-أنتِ لسه نايمة ، قومي يلا عشان تروحي الجامعة ..
-جامعة أيه !! مش هروح النهاردة..
احتدت نبرته :
-عالية ، قدامك خمس دقايق تقوليلي أنك في التاكسي ورايحة الجامعة ..
-يووه !! مش هينفع والله عايزة أنام ..
أصـر على رأيه :
-فات دقيقة …
-بس بقا يا مراد ، قلت مش هروح !!
-مفيش الكلام ده أنا أهم حاجة عندي العلم ، يلا قومي كده وأنا معاكي على التليفون .. قوليلي هتلبسي أيه ؟!
اتسع بؤبؤ عينيها :
-أيه الاسئلة الغريبة دي ؟ مالكش فيه ..
ارتسمت ابتسامة عريضة على محياه :
-طيب دخلتي الحمام ولا لسـه !!
فارقت مخدعها وهي ترتدي نعالها :
-هقفل على فكرة ..
-الله !! بفكرك عشان تغسلي سنانك ..
-مالكش فيه بردو ..
انصت لصـوت فتح باب المرحاض فقال ممازحًا :
-كده أنت وصلتِ الحمام ..
طافت عينيها في المكان بسرعة كي تتأكد من عدم وجود كاميرات ثم هتفت بذهول :
-أنت عرفت ازاي !!
انفجر مراد ضاحكًا بهستيريا ثم قال :
-بلاش تاخدي شاور عشان الجو برد ..
فاض صبر عالية من سخافته الزائدة ، فبدون إنذار قفلت الهاتف وانهاء المكالمة وهي توبخه سرًا :
-هو اتعلم الرخامة دي كلها أمتى !!!
مرت قرابة النصف ساعة حتى فرغت عالية من ارتداء ملابسها واستعدادها للذهاب إلى الجامعـة ، توقفت على مقدمة الدرج تشاور نفسها إذا كان من المفترض أن تمر على سوزان أم لا ولكنها حسمت حيرتها أخيرًا بالذهاب مكتفية بارسال رسالة نصية لها …
فتحت باب المنزل بعجلٍ وهي تراقب الساعة حتى علقت عينيها بسيارته التي تنتظرها بالخارج واقفًا أمامها يطالع الوقت حتى أشرقت شمسها على قلبه الذي أغرم بها .. وقفت مشدوهة حتى ختمت صدمتها بابتسامة واسعة:
-يخربيت الجنان !!
دنت منـه بهدوء ثم هتفت :
-انت بتعمل أيه هنـا ؟!
-مستنيكي من ٦ الصبح ..
-ماشي هعمل نفسي مصدقة !!
ارتفعت نبـرة اعتراضه :
-خدي هنا !! انا هنا من الساعة ٦ حتى اسالي مونيكا اللي كل شويـة تخرج تقول لي ” مش ينفع كتا يا فنـتم ” وتدخل تاني ..
غاصت عاليـة في غيبوبة من الضحك على طريقة تقليده للخادمة :
-قصدك سيلڤيا !!
-أنا عارف بقا ، أهي كلهم شبه بعض .. بس أيه الحلاوة أنتِ فيها دي !!
أحمر وجهها خجلًا :
-يووه بقا .. همشي !
-تمشي فين وتسيبيني مع مونيكا .. اركبي اركبي .
لم تجد حلًا له إلا الامتثال لأوامره ، صعدت سيارته وشرعت في ربط حزام الأمان ، وصعد هو الأخر بجوارها وبدأ في تشغيل سيارته وسألها :
-هنروح فين !
-فين أيه يا مراد !! الجامعة .. عندي محاضرة الساعة ٨..
-والساعة كام معاكي !
-٨ إلا تلت ..
تحرك بسيارته قائلًا :
-كده أول محاضرة فاتتك ، مش مهم نروح نفطر الأول وبعدين نعوض في تاني واحدة ..
حدجته بدهشة :
-مراد !! والعلم ؟!
-قلت هنعوض في تاني محاضرة .. متركزيش بقا .
•••••••
-بابي ممكن نلعب في الجاردن ؟!
سألت تاليـا والدها بطلبها الأخير إثر شعورهم بالملل من الجلوس أمام التلفـاز .. ترك عاصي هاتفه بعد ما تصفح أحوال البورصة وقال :
-الجـو صعب بره ، وهتبردوا ..
توسلت له داليا :
-هنلعب مش كتيـر ، حبة صغيـرين بس ..
نهض مجبرًا وأمسك يديهم وذهب ناحيـة الحديقة الخاصة بالمنزل والقريبة من الشط ، فما وصلوا إلى أعتابها انطلقن الفتاتان بمرح ، أشار عاصي لرجلين من حراسه بحزم :
-عينكم ما تغفلش من عليـهم ..
ثم عاد مرة أخرى إلى المنزل يبحث عنها لاختفائها بعد تناول الإفطار .. صعد لأعلى وطرق باب غُرفتها حتى سمحت له بالدخول :
-بتعملي اي هنـا ؟!
ردت بضيق وهي ترمي أحد الملابس من يدها :
-مفيش ..
قفل الباب وتقدم إليها يتامل ملامحها الغاضبـة :
-لا في !! مالك ..
وقفت أمام المرآة تتأمل هيئتها :
-كل هدومي ضاقت عليـا ، ومش عارفة أية البطن اللي بدأت تظهر دي !! مكنش ينفع انسى نفسي وأكل كتير ..
ابتسم باستغراب :
-مفيش ولا حاجة من اللي قولتيها صح !! فين الوزن الزيادة ده !!
-بقول لك الهدوم مش بتقفل عليـا !! هدومي أنتَ متخيل ..
-الكلام ده مش حقيقي .. أنتِ زي الفُل ..
-يعني متخنتش !!
وقف خلفها يراقب صورتهم المعكوسة بالمرآة :
-وفيها أيه !! ما تتخني براحتك .
-لا طبعا ما ينفعش ..
ثم دارت إليـه :
-لسـه زعلان !!
-هزعل ليـه ؟!
-أبدًا مودك مكنش أد كده على الفطار ..
-عادي مشاكل في الشغل بس .. المهم يلا عشـان نلحق نرجع ..
تحركت قليلًا من أمامه :
-مش عايزة أسيب البيت ويرجع يتقفل تاني ، أنا حياتي هنا ..
قال متفهمًا :
-أنا مقدر كُل ده .. بس مش هينفع أسيبك لوحدك ولا هينفع اسيب شغلي ..
-طيب وشغلي وشغل بابا وحياتي ؟!! أنا عندي اقتراح ..
-اقتراح أيه ..؟!
فكرت قليلًا ثم قالت :
-ارجع أنت القاهرة وشوف شغلك ، وأنا هقعد هنا ارجع لحياتي وشغلي .. وكل ويك آند أجي القاهرة أو أنت تيجي هنا ..
أطلق ضحكة ساخرة :
-والمفروض أنا أوافق على الهبل ده !!
-ومتوافقش ليـه ! صدقني ده الصح .
دنى منها أكثر ممسكًا بذقنها وكأنه يُريد معاتبتها بلطف :
-وهو ينفع مراتي تنام في بلد وأنا في بلد !!
إعلان ملكيته لها صراحة بث وميض السعادة والحب معًا بقلبها ، فتبسمت بطاعة وقالت :
-معاك حق …
ثم تحمحمت هاربة من سطو نظراته القوية :
-نمت كويس في أوضتي ؟!
أكدت ملامحه الجواب وهو شاردًا بجمال عيونها التي يغار منها غزل الشعر وقال :
-كان ناقص تبقي معايا ..
باغتته بقُلبة خفيفة على وجنته كرد فعل غيـر متوقع منها وعادت لمكانها تقف أمامه بدون خوف تُراقب دهشته من فعلها الذي دفعها قلبها لإرتكابه .. مرر أنامله على وجنته وسألها :
-أيه ده !!
طالعته بتردد لا تعلم هل تُريد تقبيل الحياة التي منحتها رجل مثله أو تُقبله هو بالأخص !! تنهدت متبسمـة :
-مكنش قصدي أزعلك الصُبح .. بس
-كملي ، سكتي ليـه !!
شرد قلبها على نواصي عينيـه :
-عاصي أنت راجل مش من السهل يتكرر ولا يتعوض ، من حقي أخاف ، خايفـة اتعلق بيك والدنيا تفرقنا وقتها لو لفيت الأرض على كعوب رجليا مش هلاقي اللي يعوضني عنك ويساعدني أنساك .
” خيمة صغيرة تحت ظل رموش عينيكَ تغنيني عن قصرٍ لم يُحاط ببساتين خطواتك ”
عانقته بذراعيهـا وأكملت :
-أنا قلبي داب من الوجع .. ومش هكذب عليك عاش كتير بيتمنى يدوب من الحُب .. بس حب بعده وجع مش عايزاه .. توعدني لو سلمت لك نفسي متوجعهاش !!
فتحت كلماتها أبواب قلبه الموصدة بحب ظن أنه زار قلبـه من قبل ، ولكنه ادرك أي أي مشاعر من دونها عبث لا يذكر إمراة وجودها يلغي جميع النسـاء بعينيـه … حملها بين يديه فسندت رأسها برأسه وسألته بخفوت :
-أنت هتعمل أيه ؟!
تحرك ببطء نحو مخدعهـا :
-هتعرفي دلوقتي ..
-أقول لك على سـر ؟
-قولي ..
-من أول يـوم شُفتك فيـه وأنا كُنت خايفـة قلبي يتورط فيك ..
رفع حاجبه مستفسرًا :
-اعتبره اعتراف صريح ؟!
اكتفت برسم ابتسامة واسعـة دفنتها بين شدقيـه مبادرة بقبلة طويلة أطاحت بعقله للسحاب ، ارتخت يده من تحت ساقيها فأنزلهـا برفق كي يقدم مراسيم حب تليق بهـا ، ما شـرع أن يفرغ بثغرها أيام شوقه فاستردت وعيها مبتعدة عنه باعتراض:
-استنى .. ماينفعش الحاجات المُخلة دي تحصل هنا في أوضتي ..
-نعم ياختي وهو أنا مأجرك ده أنتِ مراتي ؟! وبعدين أوضتك دي يتكتب فيها حاجات مخلة عادي !!
توترت قليلًا مبتلعة ضحكتها :
-ااه عادي ده خيال ..
-ننفذه بقا ولا أيـه !
حاول تجاهل دلالها واستكمال ما بدأه ولكنها مانعته بإصرار وهي تهرب من تحت يديه :
-قولتلك أوضتي لأ !!
زفر بضيق :
-يعني أنتِ دلوقتِ مشكلتك في المكان ولا فين !!
-ماليش فيه ، كله إلا أوضتي .. ممكن لما نرجع أوضتك نشوف الموضوع ده ..
أعلن راية التحدي :
-بس أنا هوايا جاي على هنا ..
أجابته بدلالٍ :
-وأنا قولت لك أوضتي لا يا عاصي بيه دويدار ..
رفع حاجبه متحديًا :
-وانا كمان أوضتي لا ..
غمزت له :
-خلاص براحتك ..
مجرد ما قالت جملتها فرت هاربة من النيران الملتهبة بعينيـه ، حك ذقنه بغيظ :
-رجعنا للجنان !!!!
ملاذ الحب ألا تعرف في حضرته من تكون ، تندفع بجنون وبأفعال لم يخلقها العقل ، تحترف الدلال كطفلة لم تتجاوز السبع سنوات .. في الحب نحن نتجرد من كل شيء قبل ملابسنا ، فلا تلوم على محب ولا تسأل عن هوائية تصرفاته .
••••••••
” حل المـساء ”
فوصلت عاليـة إلى القصـر بعد يوم طويل قضت نصفه مع مراد حتى سرقهم الوقت ونسيت أمر الجامعة وبقيته ذهبت مع سوزان لتناول الغداء وشكرها على حسن استضافتها لها وبعد جدال طويل أصرت عالية على عودتها للبيت .
دخلت من الباب مُرحبة بسيدة وسألتها :
-مامـا جات يا سيدة !
لاحظت ارتباك سيدة وهي تجيبها :
-نورتي يا ست عاليـة !
-مالك شكلك مش مريحني ؟! انتِ عايزة تقولي حاجة صح !!
دنت منها سيدة وأشارت بسبابتها :
-ست عبلة في أوضتها فوق ..
-طيب تمام ، هطلع لها .
أمسك بكم سترتها و أوقفتها :
-لا استنى ، مش هينفع تطلعي لها ..
عالية باستغراب :
-في ايه يا سيدة ؟!
-أصلو ست عبلة مش لوحدها فوق ..
-أومال مع مين ؟! ااه خالتو جيهان قصدك !
هزت رأسها بالنفي :
-ولا ست جيهان !!
زفرت عالية بنفاذ صبر :
-سيدة !! مش مريحاني ..
-ست عبلة فوق مع جوزها ..
ألقت الجملة من شدقها باندفاع إثر إلحاح عالية التي دارت بها الأرض وكررت ما سمعته بسخرية :
-فوق مع جوزها !!! جوز مين يا سيدة .
-جوز الست عبلة ..
-ماما اتجوزت !! طيب مين وأمتى وازاي !!
ردت سيدة باستسلام :
-أهو ده اللي حصل هنعمل أيه ..؟!
-انا لازم اطلعلها ..
أوقفتها سيدة راجية:
-دي مأكدة عليا محدش يعتب ناحية أوضتها بلاش وأستنى هي هتنزل كمان شويـة !!
ثارت عالية غاضبة :
-هي ازاي مدخلة راجل غريب البيت وكمان على سرير بابا !!! ده أيه الهبل ده !!
” بالسيـارة ”
-بابي ،صحيح الحـوت أكبر سمكة في البحر ؟!
أردفت تاليـا سؤالها الفضولي على آذان والدها الذي يقود السيارة بنفسه ، وحياة التي تجلس بجواره فـ رد مؤيدا :
-أيوة يا حبيبتي …
عارضته حياة :
-أيوة أيه !! أنت بتقول معلومات غلط للبنت ..
نظرت تاليا إليها وهي تقول :
-سيبك من بابي ، الحـوت من أكبر الأسماك في البحر بس مش أكبرهم …
هتف عاصي ساخرًا :
-بدأنا في الكلام اللي مايتفهمش ..
حدجته بحدة :
-ركز فـ السواقة ..
ثم عادت لتاليـا موضحة :
-أكبر الأسماك نوع اسمه القـرش الحوتي .. وده مش من فصيلة الحيتان .. ده بيتغذى على جميع الأسماك الأصغر منه ..
جاءت تاليـا بسؤال أخر :
-طيب لو الحوت قابل حوريـة البحر ، هيأكلها ؟!
أحست حيـاة بعمق السؤال ففكرت قليلا قبل أن تُجيبها وقالت مقترحة :
-ممكن نعرف رد بابـي على السؤال ده ..
ابتسم عاصي بمكرٍ وقال بمغزى لم يفهمه غيـرها :
-الحـوت مستني بس حورية البحر تقع تحت أيده ، وهيأزأزها عضمة عضمة ..
تدخلت حياة هنا بعد ما ابتلعت توعده لها :
-سيبك من بابي يا حبيبتي ..
أطلق ضحكة ساخرة اشعلت نار الانتقام منه وقالت بخبث :
-أحنا مش اتفقنا أن القوة مش بالعضلات وبس !! وأن العقل أقوى كتير .. فاكرين لما قولت لكم أن الحوريات عندهم ذكاء خارق !!
جاءت داليا مقترحة :
-يعني ممكن حورية البحر تغلب الحوت !!
-حورية البحـر هتروض الحوت بذكائها ، لحد ما يقع في حُبها ووقتها مش هياكلها ، بالعكس ده هيحميها من كل الحيوانات المفترسـة اللي ممكن تأذيها !!
جاء عاصي معترضًا :
-أنا مش بيتحكي لي ليه حواديت زي العيال دي !!
تدخلت داليا هاتفه بحماس طفولي :
-عشان حضرتك كبرت يا بابي ….
قطع حديثهم صوت رنين هاتفـه فنزعه من الشاحن وقال :
-دي عاليـة … ألو !
-عاصي أنت فين ؟!
-انا قريب من القصر ، في حاجة ؟!
-لو سمحت تعالى بسرعة ..
-في حاجة يا عالية ؟!
-ااه ، أمك اتجوزت ..
-أيه ؟!!!!!!!
••••••••
عادت شمس برفقـة تميم لـ غرفتهم الخاصـة بعد ما أكد الطبيب عليها بتوفير جميع سُبل الرعايـة .. جاءت حاملة مائدة الطعام كما طلبتها من الفندق والتي تضـم الأصناف الصحيـة من الطعام ..
جلست على طرف فراشه وطلبت منه أن ينهض لتناول عشائه .. عجز تميم أن يعتدل بمفرده فتركت الطعام وساعدته ثم وضعت الوسادة خلفه وسألته :
-مرتاح كده ؟
-أسف يا شمس تعبتك معايا ..
انغمست في تبريد الطعام وقالت بدون التطلع لوجهه :
-مفيش تعب ، ممكن تاكل عشان تاخد أدويتك .
-وأنتِ كمان لازم تاكلي عشان مأكلتيش من إمبارح ..
تجاهلت اهتمامه بها ورفعت الملعقة المحملة بالشوربة وأطعمته برفق ، تابعت في إطعامه حتى فرغت الكميـة فنهضت لتضع المائدة بعيدا ثم أحضرت الأدوية .. وضعت القرص بفمه ثم منحتـه كوب الماء:
-اتفضـل ..
بلع القرص ثم الأخر حتى فرغت من إعطاءه جرعة الدواء فسألته :
-محتاج حاجـة ؟!
-محتاج نتكلم يا شمس ، أنا مش هرتاح طول ما أنتِ مصدرة الوش ده وزعلانه مني .
-مش وقته يا تميـم ..
أصـر معاندًا :
-أومال أمتى وقته ؟! شمس لازم تعرفي أن الموضوع أكبر من إنك مفكرة أني خدعتك .. أنا اخترت الكرسي ده بدل روحي ، لو معملتش كده كان زمان عبلة خلصت مني من زمان ..
ردت بجفاء :
-أنت حُر في حياتك .
حدجها معاتبًا :
-أنتِ أزاي بالقسوة دي !! أزاي مش مدية نفسك فرصـة تعذريني ..
-حمد لله على سلامتك يا تمـيم ..
تفهم عدم قدرتها واستعدادها على الحديث فأوما متقبلًا :
-تمـام يا شمس ، بس كلامنا لسـه مخلصش ..
نهضت لترفع الوسادة من خلفه وهي تقول جملتها الأخيرة:
-تصبح على خيـر ..
•••••••
دخل عاصي القصـر بعواصف غضبها التي تُطيح كل ما يُقابلهـا ، لحقت به حياة ممسكة بالفتيات ومجرد ما رأت سيدة طلبت منه :
-خدي البنات أوضتهم يا سيدة ..
ركضت عاليـة إليه :
-عاصي أنت لازم تخليها تمشي الجدع ده من هنا ..
-هي فين ؟
-في أوضتها فوق ، متعرفش أني هنـا ..
صاح بصوت ينافس الرعد :
-سيدة قولي للهانم تنزل ..
ربتت حياة على كتفـه :
-ممكن تهدى بلاش عصبيـة ..
قبض على يده من شدة غضبه وجهر :
-بسرعة يا سيدة …
ارتدت عبلة ملابسها بسرعة عندما وصل إلى مسامعها صوت عاصي القوي الذي اهتزت له الجدران ، وأخذت تُلقن فريد فيما سيقوله أمامه .. وقبل ما تصل إليها سيدة خرجت من غُرفتها هاتفـه :
-أيه مالك ليـه الدوشـة دي كلها !! مش قالولك في اتنين عرسان فوق ؟!!!
جهر عاصي باستهزاء :
-ايه مستنيـة نيجي نبارك ونحتفل !!
وصلت عبلة لمنتصف الدرج فوقعت أنظارها على حياة فأكملت ساخرة :
-الله !! ده الموضوع طلع بجد !!
ركضت عالية إليها وقالت بعتب :
-حضرتك ازاي تدخلي راجل غريب أوضة شهاب دويدار!!
اختالت فوق درجات السُلم :
-شهاب دويدار الله يرحمه ويبشبش الطوب اللي تحت راسه .. الحي أبقى من الميت ..
تقدم فريد الذي يرتدي ملابس النوم المصنوع من الحرير باللون الأحمـر وجاء هاتفـًا :
-أزيك يا أبو نسـب !!
خرجت نوران آنذاك وهي تكتب رسالة نصية لكريم :
-تعالى شاهد قبل الحذف 😂
اتسع بؤبؤ عيني عاصي وحياة برؤيتهم لفريد ، فأتاه صوت عاصي ساخرًا :
-الغُراب ده بيعمل أيه هنا ؟!!!!!!!
ألتوى شدقه ساخرًا :
-عيب يا عاصي ، دانا جوز أمك ، يعني في مقام أبوك ..
ركضت حياة نحو عاصي مغلغلة أصابعها بفراغات كفه وهمست له :
-عاصي أهدى ..
هتفت عالية بصدمه :
-هو ده اللي أنتِ متجوزاه ؟!!!!
تجاهلت عبلة سؤال ابنتها ووجهت حديثها لحيـاة :
-أعرفكم ولا تعرفونا أنتوا ؟!!!!!!
جهر عاصي بكل قوته :
-هي حصلت تدخل بيتي برجليك !!
هتف فريد بخبث :
-ما أنت كنت نايم في بيت عمي وأنا متكلمتش .. !!
تدخلت عبلة قائلة :
-وأنت متعصب ليـه يا عاصي ، دانا حتى وافقت اتجوز فريد على السُمعة ، مش مراتك تبقى بنت عمه ، وأنا ابني مش هيتجوز أي حد !!
عاصي بحدة :
-مختصـر الكلام ، رجل الكنبـة اللي متجوزاه ده يطلع بره بيتي وألا هجيب الرجالة يرموه بره ..
وقفت عبلة أمامه متحدية :
-لأ … وفريد بقا جوزي وأنا بس اللي أقول مين يقعد في بيتي ومين لا ..
-بلاش تتحديني وانهي التهريج ده !!
قهقهت عبلة بميوعة :
-أحنا فيها ، ورقة طلاقي من فريد قُصاد ورقـة طلاقك من المحروسة !! ونبقى خالصين ..قُلت أيه ؟!
ضغطت حياة على كف عاصي كأنها تتوسل إليه أن يُحكم عقله ، فأرسل إليها نظرة وهو تأئه فاستدل بعيونها وقال بعد ما رسم ابتسامة مزيفة على محياه :
-مبروك يا عروسـة ..
جملته اشعلت حقول من النيران في قلب عبلة التي كانت منتظرة حرب كُبرى معه فستغلها لمصلحتها وتبعده عن تلك التي سلبتـه من عالمها الذي زرعت بداخله كيان عاصي دويدار ..
قفل قبضته على يد حياة وسحبها بهدوء متجهـًا ناحيـة غرفته ولكنه توقف أمام فريـد بمنتصف الدرج وقال جملته الأخيـرة :
-أنت اللي أخترت تقف قُدام القطـر ، قابل يا حلو ..
ثم أكمل سيـره إلى غُرفتـه دون الالتفات خلفـه ، أما عن عاليـة فلم تتحمـل المكوث في القصر أكثر ، بعد ما أرسلت عليهما أسهم الخسة أخذت حقيبتها وفرت من حجـر الأفاعي الذي لا يُناسبها …..
صعدت عاليـة سيارتها وانطلقت خارج القصر وأول شخص جاء على رأسها للستعانـة به هو مراد ، هاتفه قائلة :
-أنت فين ؟!
-أنا في الشـركة ، مال صوتك ؟
-ممكن أجي لك ؟!
رحب مراد قائلًا :
-طبعا يا عاليـة تعالى …
” بغُرفة عاليـة بالقصـر ”
-عايـزة جنازة وتشبعي فيهـا لطـم ..
أردف كريم جملتـه ممازحًا مع نوران وهو يهاتفهـا من الحديقـة بالأسفل .. ضحكت بصوت مرتفع :
-بصراحة عيلتك دي مسرح ، وخالتك دي ست قادرة ..
-بنحاول نسعد معاليكِ أد ما نقدر والله ، مشاهدة ممتعة .
قفلت نوران إضاءة غُرفتها وتأهبت للنوم :
-متعرفش عاليـا راحت فين ؟! مشيت قبل ما اكلمها .
-منا جريت وراها بس ملحقتهاش بردو ، بس عرفت أنها كلمت مراد ، تلاقيها عنده دلوقتي..
-أممممم ، طيب .. هتعمل أيه ؟!
تحمحم كريم بفخر :
-ده أيه الاهتمام ده كُله ؟!!!
-حيلك حيلك يا بني ، فوق كده دي مقدمـة للانسحاب بس ..
-والله كُل واحد يخليـه في اللي يفهمه .. عموما هجاوبك ، بفكر انزل أسهر مع صحابي ونتعرف على شوية بنات جداد !!
احتل الضيق ملامح نوران :
-كريم أنت على طول تافه كده ؟!
-الله!! ما كنا حلوين ؟!
-تستاهل ، جايبـه لنفسك .. المفروض أن عندك امتحانات الشهر الجاي وجامعة .. وأنت كل اللي هامك البنات !!
جاء صوته مجاكرًا :
-والله ده كتير عليا في مكالمة واحدة ، يعني اهتمام وخايفـة على مستقبلي كمان !!
نوران بغضب :
-تصدق أنا غلطـانة … سلام .
-نوران نوران استنى ..
-اف نعم ! عايز تقـول أيه ..؟!
حك في رأسه ورفع عيناه إلى نافذة غرفتها وقال :
-بصي كده من الشباك بسرعة ..
نهضت على الفور ملبية طلبه :
-في أيه ؟!!!
-بصي بس ..
فتحت نوران النافذة فوجدته أمامها وأكمل قائلًا :
-كنت عايـز أقول لك إني هسمع الكلام وهروح أنام عشان عندي جامعة الصبح ، وكمان حبيت أقول للقمـر تصبح على خيـر وأنا شايفـه ..
كان يتأمل وجهها المستدير المجاور للبدر الساطع بالسماء ، رُبما يريد قلبه مقارنة القمر بجمالها ، أو يخبر النجوم أنه نال قمرًا في أرضه مثلهم … قفلت نوران الهاتف دون النطق ببنت شفة مكتفيـة بإرسال ابتسامة واسعـة ثم شدت الستار منفردة بقلبها الذي احتلته ضربات قوية لا تعلم مصـدرها ..
•••••••
-تحبي نتكلم هنـا ولا نروح مكان هادي ..
سألها مراد بلهفـة خاصة عندما رأي أثار الدموع المتساقطة على وجنتيها ، فأشاحت بالنفي :
-معلش ، خلينـا هنا مش عايزة أشوف ناس ..
-أقعدي طيب ، فهميني حصل أيه ؟!
جففت عاليـة عبراتها :
-مامي اتجوزت ، عرفت ؟!
زفر بآسى :
-بصـراحة مش فاهمة دماغ خالتـي !! مش فاهـم ليه تعمل كده !!
-تعرف ، أول مرة اتمنى بابي يكون عايش .. لاول مرة أحس أني ماليش ضهر من غيره ، أنا ملحقتش أشبع منه ولا مامي عوضتني عن الحب ده !! حسيت بنار جوايا لمجرد التخيل أن راجل غريب نايم على فرشته …
-عاليـة ، بلاش تعاقبي نفسك عن حاجات أنتِ مالكيش ذنب فيها .. اللي حصل حصل عشان مكتوب أنه يحصـل .. وأحنا مش في أيدنا غيـر نرضى وبس ..
بللت حلقها الذي جف من كثرة البكاء :
-لما خرجت من البيت ملقتش حد أروح له ، أنا معنديش أصحاب ولا حد أشاركه حزني ويطبطب عليا ، أول حد جيه على بالي هو أنتَ ..
-وأنا دايـمًا معاكِ يا عاليـة ومش هسيبك .. كفاية بقا عياط وقوليلي تحبي نتعشى أيه ؟!
ردت بفتور :
-ماليش نفس والله يا مراد ، كفاية جيت وعطلتك عن شغلك ..
-ياستي عطليني أنتِ بس كل يوم ، أيه رأيك أطلب بيتـزا !!
ابتسمت في جُب أحزانها وقالت :
-ماشي .. بيتزا ..
ذهب مراد لطلب الطعام ثم انشغل قليلًا في بعض ” الايميلات ” التي رد عليها بعجل حتى وقعت عيناه على عاليـة التي انحنت مستسلمة للنوم على الأريكـة .. ترك كل ما بيده وذهب نحو أحد ضُلف مكتبته وأخرج لحافه المعتاد لقضائه ليالي طويلة بمكتبـه .. وضع الغطاء فوقها برفق بعد ما نزع حذائها بحنان بالغ وحرص ألا يوقظها ثم قضى ليلته جالسًا بجوارها يتأملها ويعاتب الزمان على قسوته على شخص مثلها ….
•••••••
” بغُرفة عاصي ”
-عاصي أنت نمت !!
أردفت حياة سؤالهـا محاولة كسر الصمت المحيط بهم ، أصدر إيماءة خافتة :
-وحد يجي له نوم بعد المصيبة دي ؟!!
دنت منه وتعمدت مداعبة جدائل شعره :
-طيب أنت متعصب ليـه ؟!
-عايزاني انزل ابارك لهم يعني !!
-لا مش قصدي ، بس كان لازم تعرف أن فريد مش هيسكت ، بعد ما أخدت منه كل حاجة وخطيبته ..
حدجها بعنف :
-أيه خطيبته دي ما تتظبطي؟!!!
-انت هتتعصب عليـا أنا كمان ؟!
-ما أنت اللي بستهبلي …
حاولت تلطيف الجـو وإخراجـه من حالة الغضب الغارق بها :
-قصدي أقول لك أنهم عملوا كده رد اعتبار يعني ، فالمفروض تفكر في حل بدل ما تتعصب ..
قفز من نومته فجأة وقال محذرًا :
-رجلك لو خطت بره الأوضة دي هكسرها فاهمة !! أحرج تقفلي على نفسك لحد ما اتنيل وأرجع ، والزفت ده ولا تكلميـه ولا تقفي معاه فاهمة !!
لم تكبح ضحكاتها فتفوهت ضاحكة :
-فاهمة فاهمة ، متقلقش !!
-أنتِ بتتضحكي ليه ؟! أيه في كلامي يضحك ؟!!
-بصراحة كده الموضوع كله يموت من الضحك ، انا مش عارفة أنت أفش ليـه !!
رغم عنه ابتسم عدوى من خفـة روحها في استقبال الكارثة التي حلت عليهم ،إمَراة مثلها تصنع المزاج الجيّد مَن أسوَء المَزاجات ، تأفف بضيق ثم عاد إلى نومه .. انحنت إلى وجنتـه وطبعت قبلة طويلة وقالت ناصحة :
-متنمش وأنت مضايق ، فك بقا ..
أمسك كفها وطبع بداخله قبلة حارة رجت كيانها وهو يجذبها لحضنه :
-نامي عشان تعب السفر ..
استراحت على صدره العارٍ ووضعت كفها الناعم فوقـه وهي تُراقب ملامحـه وهي تغوص في النـوم .. مرت ساعتان ولم يمـر طيف النـوم إلى أهدابهـا .. أخذت تتحسس ضربات قلبها التي ثارت فجأة ونبض رحمها الغريب بالنسبـة لها برغبـة جامحـه في قُربه ..
تململت بقلق بجواره كي تزعجه ، سعلت عدة مرات كي يفيق ولكن بدون جدوى .. ارتفع صوت أنفاسها وهي تقاوم حاجتها المُلحـة إليـه .. فارقت حضنـه وأخذت تتأمل ملامحه الحادة الذي شقت قلبها لنصفين .. حتى تفوهت بهمس :
-عاصي !!
تأففت باعتراض وابتعدت عنه وهي تجفف قطرات العرق المتصببة من جبهتها إثر تضارب هرموناتها الجنونيـة و تعاتب نفسها :
-حياه فوقي !! جرالك أيه ! أنا هقوم أخد شاور أيه الحر ده !!
كادت أن ترحل من جواره ولكن شيء ما بداخلها يجرها إليه ويعلن اشتائه .. مددت على طرف الفراش قفلت جفونها وهي تقول :
-نامي بقي ..
نهض فجأة وصاحت بصوت كارثي :
-عاصي عاصي .. اصحى ..
فزع من نومته وهو يشعل النور بجواره وسألها :
-في أيه مالك ..
تصلبت تعابيـر وجهها :
-هااه !! تقريبًا شوفت حلم وحش ..
تناول كوب الماء من فوق الكومود ومده لها :
-طيب اشربي ميـه ..
ارتشفت رشفـة صغيـرة ثم تركته بجوارها وسألته :
-أنت نمت !!
فرك عينيـه بكلل :
-ااه ، من التعب محستش ..
أخذت تفرك كفيها ببعضهما بضعف لم تعهده من قبـل وهي تراقب تفاصيله الرجولية التي لم تزيدها ألا فتنة وهو يجذبها إليه :
-متبعديش عن حضني وأنتِ مش هتحلمي كوابيس تانيـة ..
عارضته برجفة :
-أنا مش عايـزة أنام ..
-أومال عايزة أيه ..
“في الحب نحن عراء لا نرتدي الا ما يليق بقلوبنا ”
نزعت سترتها الصوفيـة وأغمضت جفونها وهي تحضن نفسها بنفسها وترتعش قليلًا .. اتسعت عيناه النائمة على تفاصيـل حوريته المتمردة وهي تتجرد من ملابسـها .. تفقد مفاتن جمالها التي تنافس الخمـر ولكنها بدون كؤوس تُسكر ..
بحكم خبرتـه بعالم النساء قرأ لغـة جسدها المتوق إليـه ولكنه تمرد وتبدلت الأدوار وقرر أن يُجاكرها بنفس اسلحتها الفتاكة ، فسألها بمكر :
-مالك .. ؟!
بللت حلقها حتى برزت عروق عنقها وقالت بتردد :
-اااي ، البيجامة جديدة ، وشكلي اتحسست من الصوف ، ممكن
-ممكن أيه ؟!
مددت على بطنها كالأطفال وقالت :
-تهرشلي في ضهري ….
تعوق أضلعه خروج قلبه المغرد بحب لم يتذوقه من قبل .. ابتسم بخبث ومدد بجوارها وشرع في تنفيـذ ما طلبتـه ، ما أن التقت أعينها المتيمة بأعينه الفاضحة فدارت وجهها الجهة الأخرى .. شد الغطاء فوق ظهرها حرصًا عليها من برودة الجـو وظل يواصل مهمـته المحببة لقلبـه فوق خريطة أرضـه حتى رست أنامله على مشبك منهدتها الداخليـة قفلت جفونها بحماس منتظـرة حصد نتائج خطتها ولكنه تراجع في أخر لحظة وهو يجذبها لحضنه ويهمس في أذانها :
-تعالى عشان متبرديش …
رفعت جفونها بيأس وهي تراقب عيونه المنغلقة :
-هتنام !!
اكتفى بإصدار إيماءة خافتة أخمدت ثورتها المشتعلة وحولتها لرماد وهي تستسلم أخيرًا للنوم بين يديه ويده التي لم تكف عن مغازلة ظهرها حتى الصبـاح ..
••••••
انفلق الصبـاح ووصلت الطائرة القادمة من ” دهب ” إلى القاهرة .. استقل تميـم وشمس سيارة أجرة حتى وصل الثنائي إلى القصـر …
هبطت شمس من السيارة أولًا ثم ركض نحو أحد الحراس لمساعدة تميم وسألها :
-فين الكرسي ….
لم يمنحـها تميـم الفرصة للجواب بل لحق بها وذراعـه المُعلق برابطة عنقـه واقفًا على ساقيـه تحت أعين الجميع المنفرجـة ، أمسكت شمس بيده وتقدمت ناحيـة الباب الخشبي الكبيـر ……….
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية غوى بعصيانه قلبي)
