رواية بنات القسوة الفصل الأول 1 بقلم آلاء محمد
رواية بنات القسوة الجزء الأول
رواية بنات القسوة البارت الأول
رواية بنات القسوة الحلقة الأولى
كانت قاعده ف الصاله في بيت بنتها .. ماسكه طبق وبتاكل منه بسرعه … كانت جعانه اوي وبقالها يومين مكالتش وفجأة الطبق وقع منها واتكسر ..
سميرة خافت اوي / يالهوي .. الطبق اتكسر ..
جت بنتها و زعقت بعنف / كسرتي الطبق .. حرام عليكي بقي لسه منضفه .. انا زهقت منك ومن قرفك .. امتي بقي ربنا يريحنا منك ..
سميرة بخوف / والله يا بنتي غصب عني .. هو .. هو اللي اتزحلق من ايدي .. انا هقوم انضف اهو ..
بنتها ( منال ) / لااا خليكي .. انا اللي هعمله بدل ما تتعوري ولا يجرالك حاجة واضطر اوديكي ل دكاترة ومصاريف .. انا بعد كده هجبلك طبق بلاستك طالما كبرتي و خرفتي كده ..
سميرة دموعها نزلت وقالت / انا اسفه يا بنتي ..
منال زقتها / بلا اسفه بلا بتاع بقي .. اوعي كده ..
سميرة فضلت تعيط .. كان صعبان عليها نفسها اوي .. بنتها بتشتمها وتهينها لمجرد انها وقعت طبق .. فضلت ساكته وباصه علي بنتها اللي بتنضف وهي مخنوقه وزهقانه ..
منال / اوووف .. أنا مش عارفه اظبط اي ولا ايه من وراكي .. حاجة تقرف ..
بنتها مشيت من الصاله ودخلت اوضتها وهي لسه بتعيط ..
سميرة لنفسها / ما برضه عندها حق يعني .. انا كسرت كوباية امبارح و بهدلت السرير الأسبوع اللي فات .. هي اكيد زهقت وتعبت .. ده كفاية عليها عيالها وشقاوتهم ..
سميرة قامت من مكانها وراحت لاوضه بنتها وخبطت عليها ..
منال / ادخل ..
سميرة دخلت وقعدت جنبها / سامحيني يا بنتي انا والله مكنتش اقصد خالص .. الطبق كان في ميه من تحت فتزحلق من ايدي وانا كمان كان بقالي يومين مكلتش وكنت جعانه اوي .. متزعليش مني انا اسفه ..
منال / انتي بقيتي لا تطاقي علي فكرة .. انا زهقت ..
سميرة وطت علي ايد بنتها وباستها / خلاص بقي قلبك ابيض يا حبيبتي ..
منال / طيب طيب سامحتك .. روحي بقي اعملي انتي غدا انهارده ..
سميرة / بس انا مش بقدر اقف كتير عشان الروماتيزم .. ما انتي عارفه يا بنتي ..
منال/ طيب طيب خلاص .. هقوم انا وأمري لله .. ربنا يريحني من الهم ده بقي ..
منال قامت وسابت امها زعلانه اوي وبتدعي ان ربنا ياخدها عشان متقلش علي بناتها اكتر من كده ..
اليوم خلص واخر الليل كانت منال قاعده في اوضتها بتكلم اختها نيفين ف التليفون ..
منال / انا مبقتش طيقاها يا نيفين دي كل يوم والتاني تعمل لي مشكله مره توقع طبق تكسره مره تكسر كوبايه مره تبهدل هدومها .. انا زهقت وكلمتها مليون مره برده مفيش فايده ..
نيفين / والله يا بنتي انا فاهمه اللي انتي فيه ما هي كانت كده عندي برده لحد ما جوزي حلف عليا انها ما تخشش البيت تاني اعمل ايه طيب ..
منال / خلاص نكلم هند تاخدها عندها شوية .. انا مبقتش عارفه اخد راحتي مع جوزي خالص .. وهو كمان بقي مضايق ومكشر طول الوقت بسببها ..
نيفين/ ايوا ما هي امك لا تطاق .. من ساعه التعب اللي جالها ده واحنا اتبلينا بيها .. يا بنتي دي مره مسكت سيلا بنتي الصغيره وكانت هتعورها عشان فاكراها جايه تسرق منها حاجه .. لا وتاني يوم عملت نفسها مش فاكره حاجة ..
منال / خلاص كلمي انتي هند تاخدها شوية ..
منال قفلت مع اختها بعد ما اتفقوا يودوا امهم عند اختهم التالته و قامت تجهز شنطه الهدوم …
تاني يوم دخلت لامها اوضتها ..
منال هزتها / اصحي .. قومي بقي انتي ايه موركيش غير النوم ..
سميرة قامت مخضوضه / ايه … انا فين انتي مين ..
منال / انا مين يعني انا منال بنتك ..
سميره قامت وقفت / بنت مين انا معنديش بنات انت جايه تسرقيني صح .. انت مين انطقي …
منال / بسم الله الرحمن الرحيم مالك يا وليه انتي اتجننت ولا ايه بقوللك انا بنتك …
سميرة بصتلها بغضب ومسكتها من رقبتها كانت بتخنقها / انا معنديش بنات … انتي مين يا بت انتي .. انتي اكيد جايه تسرقي الغويشه والسلسله بتوعي .. انطقي …
منال كانت بتنفس بصعوبه وقالت / اوعي اوعي بقولك ..
فجاه رحيم جوز منال دخل الاوضه واتفاجي بالمنظر ..
شد سميره وقعها على الارض وضربها بالقلم وقال / انتي اتجننتي يا ست انتي عايزه تموتي بنتك ده انت عقلك خف خالص ….
رحيم قرب من منال / انتي كويسه ؟
منال بتتكلم بصعوبه / ايوا انا كويسه .. خدها من هنا يا رحيم والنبي ..
رحيم راح ل سميرة وشدها وقال / قومي قومي خلينا نخلص منك .. انا مش عارف عقلي كان فين أما وافقت انك تيجي هنا ..
سميرة فجأة اغمي عليها ووقعت ف الارض ..
منال / يالهوي .. لتكون ماتت يا رحيم ..
رحيم/ لا يا ستي دي اغم عليها .. هاتي اي حاجه افوقها ..
منال جابت برفان ورحيم قعد يفوقها .. شوية و سميرة فاقت ..
سميرة / ااه يا دماغي .. هو حصل ايه يا رحيم يا ابني ..
رحيم بزعيق / يعني مانتيش عارفه حصل ايه فجاه سمعت صوت غريب ف الاوضه دخلت اشوف فيه ايه لقيتك بتحاولي تخنقي بنتك .. انا مش فاهم انتي ازاي تعملي كده ..
سميره قالت بتوهان / انت بتقول ايه انا مستحيل اعمل كده .. انا مش فاكره حاجه ابدا من اللي انت بتقوله ده ..
رحيم / والله فاكره مش فاكره مش موضوعي انا مش هسمحلك تقعدي في بيتي اكتر من كده .. قومي معايا يلا اوديكي عند هند ..
سميرة بصتله بانكسار وقامت من علي السرير .. وقربت اللي بنتها اللي بعدت عنها بخوف …
سميرة/ سامحيني يا بنتي والله انا مكنش قصدي آذيكي بس انا والله مش فاكره اي حاجه وعموما انا همشي عشان اريحك من همي انا عارفه ان انا حامل تقيل اوي عليكوا يا حبيبتي انا اسفه …
سميره مشيت مع رحيم وركبت معاه العربيه وطول الطريق كانت بتفكر ازاي ده حصل ..
سميره بصت لرحيم بدموع / رحيم يا ابني انا عايزاك تحجزلي عند دكتور عشان اعرف مالي انا دايما بنسى حاجات كتير وفي حاجات بتقع مني ..
رحيم من غير ما يبصلها / طيب طيب هبقى اشوف الموضوع ده …
فضلوا ساكتين وشوية ووصلوا بيت هند اللي استقبلتهم ببرود ..
هند بضيق / تعالوا ادخلوا ..
رحيم / لا انا مستعجل ورايا شغل .. خديها اهي ودي شنطتها ..
هند اخدت الشنطه وقفلت الباب .. كانت سميرة قاعده علي الكنبه ف الصاله ..
هند بصت لها بحده وقالت / اسمعي بقى طول ما انتي قاعده هنا ملكيش دعوه بجوزي او بعيالي تخليك قاعده في الاوضه وخلاص وانا هدخلك الاكل والشرب لحد عندك .. ولو عوزتي تروحي الحمام تقوليلي وانا اجي ادخلك انما انتي متتحركيش في الشقه كده بمزاجك ..
سميرة / حاضر يا بنتي ..
هند/ انا النهارده عازمه اهل جوزي على الغداء هتدخلي الاوضه ومش هتطلعي منها طول ما هما موجودين واياك تخرجي منها .. سامعه..
سميرة / حاضر والله .. طيب انتي مش عايزة اساعدك ف الأكل بدل ما انتي واقفه لوحدك ..
هند/ لا مش عايزة منك حاجة .. اهل جوزي لو عرفوا ان انتي اللي عاملة الاكل هيقرفوا منك ..
سميرة/ خلاص يا حبيبتي .. انا هدخل الاوضه ..
سميرة دخلت الاوضه وفضلت قاعده فيها طول اليوم .. كانت حزينه انها بقيت لوحدها بالشكل ده .. وف نفس الوقت هي عارفه ان بناتها مشغولين ..
أما هند خلصت الأكل ولبست وفضلت مستنيه اهل جوزها ..
هند / احمد كل حاجة جاهزة .. اهلك فين ..
احمد/ جايين اهو .. اسمعي اوعي امك تطلع من الأوضه مش ناقصين وجع دماغ ..
هند / لا يا حبيبي ما تقلقش انا نبهت عليها وما تطلعش بره الاوضه ..
احمد / طب اقفلي عليها الباب من بره بالمفتاح احتياطي محدش عارف ايه اللي ممكن يحصل ..
هند بدلع/ حاضر يا قلبي ..
هند فعلا قفلت الباب بالمفتاح بالراحه .. وشوية وأهل جوزها جم .. فضلوا يتكلموا ويضحكوا وياكلوا .. أما سميرة كانت سامعه صوت ضحكهم وبتبتسم من قلبها وبتدعي لبنتها بالسعاده بس فجأة حست انها عايزة تخش الحمام ..
سميره / يا دي الحوسه طب اعمل ايه انا .. هحاول اخرج من غير ما احد منهم يشوفني وكده كده الحمام جنبي على طول ..
سميرة جت تفتح الباب لقيته مقفول .. ف قالت تستني شوية أما بنتها تدخلها الاكل تبقي تروح .. فات ساعه وسميرة مستنيه .. مكنتش قادرة تمسك نفسها .. قامت و حاولت تاني ..
سميرة / هند .. هند يا بنتي افتحيلي .. مش قادرة استني اكتر من كده .. يارب .. هند ..
فضلت تخبط علي الباب وتنادي يمكن حد يسمعها بس هما كان صوتهم عالي ف مكنوش سمعينها .. و فجأة حست انها مش قادرة تمسك نفسها اكتر وهدومها اتبهدلت .. قعدت علي الارض وفضلت تعيط ..
سميرة بعياط / اعمل ايه يا ربي .. السجادة اتبهدلت وهند هتزعل .. هي قفلت الباب ليه بس .. طيب اطلع هدومي واحاول اغير .. بس ممكن اعمل صوت و يعرفوا اني هنا .. بس لا مش هعمل صوت ..
سميرة قامت تشوف هدومها فين وغيرت فعلا .. شوية و الناس مشيوا وهند راحت فتحت الأوضه واول ما دخلت ..
هند / ايه ده .. ايه الريحه الوحشه دي .. انتي عملتي ايه هنا ..
سميره بصتلها بدموع / يا بنتي كنت عايزه اخش الحمام قعدت احاول افتح الباب لقيتك قفلاه والله مقدرتش امسك نفسي ..
هند اتعصبت / يعني ايه مقدرتيش تمسكي نفسك وانتي صغيره نونه عشان تعملي كده في الارض .. ايه الارف ده ..
سميرة/ سامحيني يا بنتي أنا اسفه ..
وهند / اعمل بيها ايه اسفه دي … طب عقابا ليكي انتي اللي هتقومي تغسلي السجاده دي ودلوقت …
سميره / حاضر يا بنتي هغسلهالك عيني بس خليها الصبح ده الجو دلوقت برد اوي ..
هند / لا هتعمليها دلوقتي مليش فيه .. قومي يلا …
هند خلت سميره فعلا تغسل السجادة .. كانت بتعملها وهي بتتالم بسبب رجلها .. وحاسه انها دايخه من قلة الاكل ونفسها بيضيق .. لكن جت علي نفسها و خلصتها ..
هند / حتي بعد ما عملتيها منضفتش اوي .. انا هبقي اعملها قومي يلا ملكيش لازمه اصلا ..
سميرة قامت وهي تعبانه اوي ومش قادرة تقف ..
سميرة / طيب انا جعانه اوي .. ممكن تديني اكل يا هند ..
هند / اوووف طيب حاضر .. ادخلي الاوضه وانا جايه ..
سميرة دخلت الاوضه وهي فرحانه انها هتاكل .. شوية وهند دخلت عليها ب طبق جبنه وبيضة ..
هند/ اتفضلي كلي يلا ..
سميرة/ ما انتي عارفه يا بنتي اني عندي حساسية من البيض .. لو كلته اتعب ..
هند / وانا مالي .. هو ده اللي عندي .. الاكل اللي فاضل من العزومه يدوب علي قدي انا وجوزي وعيالي ..
سميرة ابتسمت / وماله يا بنتي بالهنا والشفا علي قلبكوا .. انا هاكل الجبنه ..
فات كذا يوم وهند بتعامل امها بطريقه صعبه اوي .. مش بتديها اكل غير مرة واحده ف اليوم وبتكلمها وحش و منعاها تقرب من عيالها .. لحد ما ف يوم سميرة صحيت من النوم وخرجت من اوضتها مستغربة ومش عارفه هي فين .. لقيت هند وقفه ف المطبخ بتعمل الاكل ..
سميرة جريت عليها ومسكتها جامد / انا فين .. انتي فين .. انتوا خطفتوني صح ..
هند باستغراب/ مالك ف اي .. انتي بتحلمي ولا ايه .. روحي اغسلي وشك هتفوقي ..
سميرة / انتي مين بقولك .. انا فين ..
هند بخوف / لا ده منال كان عندها حق أما قالت انك اتجننتي .. ابعدي عني بقي ..
سميرة بعدت عنها وقالت / ااااه دماغي مش قادرة ..
سميرة وقعت علي الارض .. وهند فضلت تنادي علي جوزها ..
احمد جه علي صوت صويتها / في ايه يا هند مالها ..
هند بعياط / مش عارفه فجأة لقيتها اتجننت وبتقولي انتي مين ..
احمد شالها ودخلها اوضتها وقفلوا عليها .. شوية وفاقت وقامت ..
سميرة فتحت الباب وخرجت لقيت هند قاعده بتعيط / مالك يا حبيبتي بتعيطي ليه ؟
هند بعدت عنها ف احمد قال بزعيق / يعني مش عارفه عملتي ايه .. انا مش فاهم انتي ازاي كده ..
سميرة/ والله يا ولاد انا مش فاكرة حاجة هو حصل ايه بس ..
هند / ولا حاجة خشي اوضتك بقي …
سميرة دخلت اوضتها و فضلت تعيط .. شوية وقامت اتوضت وصلت وفضلت قاعده ف اوضتها بتسبح و بتبص لقيت فريدة حفيدتها واقفه علي الباب وبتبصلها ..
سميرة ابتسمت/ تعالي يا حبيبتي .. تعالي اقعدي جنبي .. عاملة ايه يا فريده …
فريدة / الحمد لله يا تيتا .. حضرتك ليه مش بتيجي تقعدي معانا …
سميره / علشان معطلكوش على المذاكرة يا حبيبتي وبعدين انا هنا مبسوطه قوليلي انت عامله ايه في المذاكره ..
فريدة ابتسمت/ انا بقيت شاطرة اوي و حفظت جدول الضرب كله وبقي عندي صحاب كمان ..
سميرة ابتسمت وحضنتها / برافو عليكي يا حبيبتي … أنا عيزاكي تكبري كده و تبقي شاطرة و ناجحه زيي .. حكم انا بدأت من الصفر لحد ما عملت محلات و عماير ..
هند دخلت الاوضه واول ما شافتهم بصت لسميره بحده وقالت … فريده اطلعي بره ..
فريده/ ليه يا مامي انا عايزه اقعد مع تيتا شويه ..
هند / بقولك اطلعي بره ..
فريده طلعت بره وهند بصت لامها / انا مش قولتلك قبل كده ملكيش دعوه ببنتي .. انت ايه غبيه مبتفهميش ..
سميره / يا بنتي انا مش قصدي حاجه انا لقيتها واقفه على باب الاوضه فقلتها تيجي تقعد معايا شويه بدل ما انا قاعده لوحدي طول النهار ..
هند / انا زهقت منك بقي .. بصي انا هتصرف بس خليكي عارفه انك مش هتقعدي هنا تاني ..
سميرة قامت وقالت / لا يا حبيبتي انا اسفه خلاص .. مش هضايقك تاني بس متخلنيش امشي من هنا ..
هند / يا شيخه اوعي بقي .. جتك الارف أنا تعبت منك .. بس انا عارفه كويس اوي هعمل معاكي ايه ..
هند زقتها وخرجت برا الاوضه وقفلت الباب …
هند مسكت التليفون وكلمت منال / منال انا زهقت من الست دي .. اسمعي انا معنديش استعداد اتحمل كل ده .. واعتقد لا انتي ولا نيفين كمان هتشيلوا ..
منال/ اشيل ايه انا مصدقت خلصت منها ومش هقدر اخدها عندي تاني ..
هند / ….
يتبع …
لقراءة الفصل التالي : اضغط هنا
لقراءة الرواية كاملة اضغط على : (رواية بنات القسوة)
