رواية يويو الفصل الثاني 2 بقلم لولو محمد
رواية يويو الجزء الثاني
رواية يويو البارت الثاني
رواية يويو الحلقة الثانية
محمد / اهو يا سيدي حوارات البنات ما بتخلصش … صحباتها طالعين رحله لاقصر و اسوان تبع الشغل و نازلين زن على ودانها و امها مش راضيه تطلعها
خالد / و طبعا الرد الازلى لما تتجوزى ابقي اطلعى
محمد / عليك نور
خالد / لا كدا ليك حق طبعا … بس انا مش شايف مشكله انها تطلع الرحله تغير جو و تنبسط شويه
محمد / لوحدها ازاى بس
خالد / ما هى مع صحابها
محمد / يا خالد البنات بتبوظ بعض
خالد / انت ليك ببنتك و ما دام انت مربيها و واثق فيها ما تخافش اديها الثقه دى مره
محمد / ما تلعبش فى دماغى انت كمان مش هتبقي انت و صحباتها عليا
خالد / طب انا عندى فكره هتحللك الموضوع ده و تريح كل الاطراف اسمعها يمكن تعجبك بس محتاجك تثق فيا شويه
محمد / ما طبعا بثق فيك قول خير
………………
فى القطر
ست بنات قاعدين فى كابينه من ضمنهم تقى و امانى و فى بنتين نايمين و ساندين راسهم على الشباك و بين الكنبتين شنط البنات على الارض
تقى / انتوا متخيلين اننا هنفضل متزنقين كدا لحد الساعه ٨ الصبح
امانى / ايوه البتر هيشتغل اهو ما تحمدى ربنا دا احنا ما صدقنا انك ركبتى القطر ده اساسا
سحر / و بعدين هو احنا يعني هنقضي الوقت ده نبحلق فى بعض انا عملت حساب و جبت كوتشينه و اونو و هنولعها للصبح
البنت تشد شنطتها و تقعد تدور فيها
امانى / استاذ و رئيس قسم الرحلات و الفسح فرقى … هنلعب على المشاريب الخسران يعزمنا على حاجه ساقعه
تقى / براشوط ما بتصدق اى فرصه
امانى / لا و انتى الصادقه انا واثقه انى هكتسح … فين يا بنتى الكوتشينه هى شنطه دى و لا مغاره على بابا
تقى / طب بقولكوا ايه لحد ما تجهزوا هروح اجيب نسكافيه من الكافتريا اللى فى القطر عشان انا مش متعوده اسهر لدلوقت
اريج / انتى عارفه يا بنتى الميه دى جايه منين و لا معموله فى ايه
امانى / يا اختى سمى الله كل حاجه تبقي تمام بلاش وسوسه انتى يعني فاكره اكل نضيف اوى ما كلو على الله
تقى / رهيبه امانى دى رهيبه .. المهم حد هيعوز حاجه اجيبهاله معايا
امانى / اعملى حسابى فاى كان اللى هتجيبيه و ما تجبيش للمحسوكه دى بق ميه
تقى تضحك و تمشي و البنات تفرق لعب
…………………….
فى الكافتريا
احمد قاعد مع اتنين صحابه
محمود / انا مش فاهم انت مضايق نفسك ليه
احمد / و الله لولا زنكم ما كنت طلعت دا انا عندى ضغط شغل للركب و الراجل ابن الجزمه حاطتنى فى دماغه و غالبا كدا مش هكمل فى ام الشركه بنت التيت دى
سعيد / يا عم ما قولتلك فكك من الهبل ده شقاك و تعبك يروحوا للناس كدا تعال معايا تكسب
احمد / اجى معاك فين بس يا سعيد اشتغل يوم و عشره لا انا عاوز شغل ثابت
سعيد / يا عم بكره ربنا يكرمنى و اكبر و ما تعرفش تكلمنى غير بمعاد
محمود / يعني يوم ما هتتغير هتتغير علينا احنا يا واطى
سعيد / اسمع منى يا ابنى كلمتين ابرك من عشره اللى انت فيه ده مش شغل ده استعباد و كل ما اخدت بالك بدرى بدرى كل ما خلعت بدرى بدرى كل ما بدات شغلك الخاص بدرى بدرى كل ما كبرت بدرى بدرى
محمود يطبل على البار
محمود / و بدرى بدرى باااادرى سعيد جه بدرى بااادرى
احمد / قال و انا هربان من مقابله العروسه الجديده يقوم بختى موقعنى اقضي اسبوع كامل معاكوا انتوا … بختى و انا عارفه
التلاته يضحكوا تقى تدخل العربيه و احمد مديها ضهره تروح تقف فى جنب
تقى / لو سمحت فى نسكافيه كاراميل لاتيه
الوايتر / لا فى تلاته فى واحد العادى
تقى / تمام اتنين
الوايتر / ثوانى حاضر
تقى تروح تقف فى جنب ناحيه الباب تلعب فى الموبايل و احمد و صحابه يكملوا هزار
سعيد / يا عم فكر فيها بس بدل ما نشتغل عند الناس نفتح شركتنا احنا و نبقي ناخد الواد ده معانا يلا عشان ما يتقمصش
محمود / و انا دايس انا اساسا مش طايق الوليه الاتش ار اللى عندى دى عليها حته بوز الله يكون فى عون جوزها
سعيد / ما جوزها السبب يا عم ما هو لو كان
محمود / ششش لغم لغم
سعيد يبص على تقى
سعيد / احم احم دع الخلق للخالق
التلاته يضحكوا لتحت
احمد / هفكر فيها
سعيد/ بسم الله الله اكبر
تقى تبص عليهم و ترجع تبص فى الموبايل
احمد / انا فعلا مش مرتاح فى الشغل فى الشركه دى بس صدقنى القرار ده مش سهل ابدا امى و انت عارفها
الوايتر / النسكافيه يا انسه
تقى تروح تاخده احمد يبص يشوفها
احمد / تقى
تقى تبصله و تستغرب احمد يقوم يروحلها
احمد / ايه الصدفه السعيده دى
سعيد يوطى على محمود
سعيد / هو ايه النظام
محمود/ اول مره اشوفها
تقى / صدفه !!
احمد / اكيد مش مريض اوى كدا انى اطاردك يعني و بعدين هنروح بعيد ليه اساليهم اقسم بالله ابويا اللى … ابويا … نايل كروز صح
تقى / ايوه
احمد / بس كدا وضحت … على العموم فرصه سعيده
تقى / عن اذنك
احمد / تحبى اوصلك
تقى / عن اذنك يا باشمهندس
تقى تاخد الكب هولدر و ترجع احمد يروح يقعد مع صحابه و هو بيبص على مكان ما تقى مشيت
سعيد / ايه النظام
احمد / انا برده استغربت حركه الفشخره الجامده بتاعه ابويا دى و خد صحابك و غيروا جو و انت مضغوط
محمود / اوعا طلعت كمين
احمد / بقولكوا ايه ما تيجوا نرجع الكبينه بتاعتنا انا ضهرى وجعنى
سعيد / مش هتحصلها خلينا لما نركب المركب هتروح منك فين هناك
احمد / يا عم انت اى زيطه و السلام انا رايح انام
محمود / و ماله
احمد يسيبهم و يجرى ورا تقى يلاقيها واقفه مع امانى بيتودودوا اول ما يقرب يسكتوا احمد يشوف امانى يلم نفسه و يعدى
احمد / بعد اذنكوا
احمد يعدى و امانى متابعاه
امانى / طب و الله لذيذ
تقى / عشان كدا ابويا وافق … بجد مش مصدقاهم
امانى / و لا كان حاجه حصلت و اعتبريها صدفه فعلا
تقى / بس هو نفسه قالى انها مش صدفه و ان دى مؤامره بين ابوه و ابويا
امانى / شكلها فاتحه خير علينا ان شاء الله
تقى/ يا بنتى اهدى شويه دا طالع معانا النايل كروز يعني اسبوع بحاله
امانى / بقولك ايه احنا طالعين ننبسط ما تنبسطي و مين عارف مش يمكن نعمل جزء جديد من غراب فى الوادى
تقى / و الله انتى فايقه و رايقه
امانى / و انتى نكديه و مش وش نعمه الواد جامد و يجي منه
تقى / يجي ايه بالظبط
امانى / يتحب يا جزمه يعني طول بعرض حليوه و برستيج و ابن ناس و انتى بنفسك اتكلمتى معاه و استلطفتيه ناقصه ايه بالله عليكي هاه ناقصه ايه
تقى / نفسي اعيش سنى يا بنتى جواز ايه بس فى السن ده
امانى / طب حد يلايمنى بس على راجل عدل يوحد ربنا و انا اقسم بالله ما هعتق امه
تقى تضحك
امانى / فكيها احنا فى رحله
تقى / و الله ما حاجه مهونه عليا الهبل اللى انا عيشاه ده الا انتى يا ايمو
امانى / اى خدعه عدى الجمايل
………………………
فى عربيه تانيه
احمد بيتكلم فى التليفون
احمد / يعنى بتعترف
خالد / جدا و بعدين بقولك ايه انت دلوقت كل الكور فى ملعبك عد الاجوان يا سيدي و بكيفك بقي خسران ايه
احمد / لا بس موقفى كان زباله اوى
خالد/ و لا زباله و لا حاجه دى فرصه سعيده جدا لكل الاطراف انجوى و مشي حالك
احمد / تمام
خالد / بقولك … حتى لو مفيش نصيب او يعني اى كانت الاسباب انا مش هوصيك انا خليت ابوها يوافق علي طلوعها الرحله على مسؤليتي
احمد / يعني كمان هشتغلها بودى جارد
خالد / انت تطول دى فلقه قمر
احمد / و الله انت اللى هتضيعني
خالد / هتدعيلى
……………………..
على الكروز
تقى واقفه على الديك و بتتفرج على النيل احمد يدخل
احمد / فرصه سعيده
تقى / طب الرحله مقلب من عموا و بابا كلامك ليا كمان مقلب و لا صدفه
احمد / ابويا موصيني عليكي
تقى / و الله !!!
احمد / اقين بالله ما بحكها عيب كدا انا ابن ناس
تقى / بس يا ابن الناس اكيد ما ترضاليش الناس تتكلم عليا و تقول ما هى بتكلم شباب اهى حضرتك لا اخويا و لا خطيبي و لا حتى قريبي من بعيد و لا ايه
احمد / معاكى حق .. على العموم هى فرصه سعيده و ادينا مع بعض … من بعيد … لو احتاجتى اى حاجه … انا معاكى فى الرحله فى اى وقت تحتاجيني يعني … مش انا رقمى لسه عندك ؟
تقى / مسحته
احمد / رقمك لسه عندى … هرنلك
تقى / عن اذنك
تقى تمشي و احمد متابعها
احمد / طب ما طلعت حلوه اهى يا عم احمد هتعوز اكتر من كدا ايه … دوس بقي
…………………….
فى المطعم تقى و صحباتها قاعدين
امانى / يعني الجدع يعمل ايه اكتر من كدا دا بدل ما تظبطى امورك و تباصي لاختك حد من صحابه الحلوين دول
تقى / شششش كفايا فضايح ارحميني
امانى / ارحميني انتى عاوزه اخش دنيا زى كل العرايس دول … مش كان حد يقولنا ان النايل كروز دى تخصص هانيمونات بدل الحرمان العاطفى اللى احنا فيه ده
البنات تضحك
سحر / بصي يا تقى من اللى حكيتوه شكله فعلا راجل كويس اديله فرصه
تقى / بعد اللى حكيته يا بنتى دا لو كان لقى واحده احسن منى ما كانش رجعلى
سحر / لا كان هيرجع لانه طب خلاص يا جامد انت يا مستمكن
البنات تضحك
سحر / يعني لو احتاجتى حاجه و رقمى عندك تماحيك باينه اوى يعني
تقى / انا لما اتكلمت معاه اتكلمنا لان كان فى بينا حاجه مشتركه اننا احنا الاتنين ضد الجواز
اريج / ما هى ديما بتبدا بكدا يا بنتى اديله فرصه هتخسرى ايه
امانى / بصي اخطفيلك شويه من حلاوه البدايات و اخلعى بيقولوا سكرها عالى اوى
اريج / سيبك منها دى جعانه دى … بغض النظر عن اى حاجه انتى من تعاملك … البسيط … معاه شوفتى منه اى حاجه وحشه
تقى تهز راسها لا امانى تخبط على الترابيزه الكل ينتبه
امانى/ امال بقي منشفه ريق ابونا ليه من الصبح … فى حاجه يا باشا
كل واحد يبص قدامه
تقى / انا شبعت هروح اقعد على البول لحد ما تخلصوا و تتجمعوا
تقى تقوم و تتمشي تليفونها يرن
تقى / صباح الخير يا ماما ازيك
عبير/ الحمد لله يا قلب امك عامله ايه و اخبارك و اخبار صحابك مبسوطين
تقى / اكيد الحمد لله دا حدث بيحصل مره واحده فى العمر اكيد هنستغله احسن استغلال
عبير / طب و عامله ايه
تقى / الحمد لله
عبير/ تستاهلى الحمد اقصد يعني
تقى / احمد !! اه قابلته يا ماما و سلمنا على بعض و بعد كدا كل واحد فى حاله هو مع صحابه و انا مع صحباتى فى اى استفسار تانى
عبير / انا بس بطمن عليكي
تقى / انا زى الفل الحمد لله
عبير / تمام يا حبيبتي على العموم لو احتاجتى اى حاجه كلميني على طول
تقى / ربنا ما يحرمنى منكوا
عبير / طيب يا حبيبتي اسيبك تنبسطى مع اصحابك
تقى / تمام يا ماما شكرا
تقى تقفل و تنفخ و تروح تقعد على كرسي من كراسي البول و ترمى الموبايل جنبها و تمسك دماغها احمد يدخل
احمد / انتى كويسه
تقى تبصله و تاخد نفس عميق و تتنهد
احمد / انا اسف و الله مش قصدى اتطفل بس حسيتك اضايقتي من التليفون فقلقت … انا اسف … عن اذنك
احمد يجي يمشي
تقى / انا موافقه
احمد يقف و يبصلها باستغراب
تقى / مش كنت طلبت فرصه تانيه لو لسه عاوزها انا موافقه لو غيرت رايك انسي اى كلام قولته دلوقت
احمد يروح يقعد
احمد / بيضغطوا عليكي صح
تقى / تؤ … مش ضغط بالمعنى … هم مش فاهمين انهم بيضغطوا … هم بيحبونى و بيخافوا عليا و عاوزين يفرحوا بيا … تمام هفرحهم … انت اكيد مش هتكون بتحب ماماتك اكتر ما بحب اهلى يعني … هتعصر على نفسك لمونه هعصر على نفسي اختها و اهو نشوف
احمد يبصلها و يبتسم و ساكت
تقى / انت عارف انا بقالى كام سنه بتحايل انى اطلع الرحله دى … خمس سنين … كل سنه الجامعه كانت بتطلعها و كل سنه اعيط و ارفص و لا حياه لمن تنادى
احمد / و ما فقدتيش الامل
تقى / ما انا ما طلعتش عشان سواد عيونى يعني انا طلعت عشان انت عارف
احمد / اقسم بالله ما فى اسوء من كدا جوازه
تقى / حيلك حيلك دى حياله فرصه اما نشوف حلاوه البدايات اللى بيقولوا عليها دى هندوقها و لا احنا ما لناش غير فى الحوادق
احمد / و الله هنشوف ما انا مش هكدب عليكي و اقولك انى ههد الدنيا و ابنيها انا حوار العلاقات ده ابيض يا فل … بس ممكن نتفق اتفاق … احنا هننزل بسقف التوقعات و نشيل التكليف … يعني اللى نفسه فى حاجه يطلبها … الاهتمام بينطلب عادى جدا … و انا وعد منى مش هتاخر … على قد ما اقدر يعني ما تنفخينيش طلبات
تقى / انا مش عاوزه منك حاجه اصلا
احمد / دا كلامك … هفكرك بالكلام ده بعدين
تقى / انا بجد مش فى المود دلوقت لاى هزار
احمد / و الله و لا انا
تقى / ليه خير
احمد / سبت الشغل تخيلى واحد هيروح يتقدم لواحده و هو عواطلى
تقى / و فيها ايه بكره ربنا يكرمك بشغلانه تانيه
احمد / ما هى مش سهله
تقى / لا سهله باذن الله اسعى انت بس و ربنا هيرزقك … سبت الشغل ليه
احمد / المفروض انى واخد اجازه فتره الرحله لقيت المدير بيه بيتصل تعال حالا الكلاينت عاوز يغير مكان عمود و لازم اعيد التصميم كله عشان يخلصوا الورق بتاع التراخيص قولتله اجى فين انا مش فى القاهره اصلا قالى لو ما جيتش بكره بالكتير هرفدك قولتله و انا مستقيل بناقص ام دى شغلانه تحرق الدم
تقى / هم الخسرانين
احمد/ انا بقول كدا برضه
تقى / و ناوى تعمل ايه
احمد / شكلى هطاوع صحابى و نفتح شركه خاصه بينا احنا
تقى / هتحتاج سيلز او سكرتيره
احمد / اكيد
تقى / و المرتبات عندكوا وضعها ايه
احمد / على الله حكايتها
تقى / على بركه الله اتفقنا قولى هنمضى العقد امتى
احمد / انتى بتتكلمى جد!!
تقى / جدا
احمد / بس انتى عارفه ده معناه ايه
تقى / ايه ؟
احمد / ان ظروفى الماديه مش احسن حاجه
تقى / خدوهم فقره يغنيهم الله المهم بس ما تنساش جدعنتى معاك لما ربنا يكرمك لحسن انا متعقده خلقه و خصوصا ان اسمك احمد يعني
احمد / و هو فى احلى من اسم احمد منهم لله اللى شوهوا الاسم
تقى / تمام اتفقنا
امانى و البنات يدخلوا امانى توقفهم و تشاورلهم يرجعوا بسرعه تقى تتحرج
تقى / عن اذنك
تقى تقوم تجرى تروحلهم يقعدوا يالسوا عليها و يضحكوا و هى فى النص بتسكتهم و تضحك و احمد متابعها و مبتسم
………………………
فى شقه معموله مكتب هندسي
تقى تدخل مع باباها شايل شنطه هدايه محمود يروح يستقبله
محمود / اهلا اهلا استاذ محمد نورتنا … اهلا .. ازيك
محمد / الحمد لله امال احمد مش موجود و لا ايه
محمود / لا جوه هو بس معاه ناس دعواتكم اول شغل لينا
محمد/ ربنا يتملكم كل خير … دى حاجه بسيطه للمكان يا رب زوق تقى يعجبكم
محمود / لا لو كدا تبقي اكيد حاجه عظمه اتفضلوا تشربوا ايه
محمد / و لا اى حاجه احنا هنقعد هنا فى اى جنب نستنى احمد يخلص
احمد يطلع و هو بيسلم على راجل و مراته يشوف تقى يبتسملها الناس يمشوا و محمود يروح يوصلهم
محمد / اللهم بارك المكان جميل … و شكل ريحه حلو
احمد / ادعولى … دول مقاولين كنت عارفهم من الشغل القديم و لما سالوا عليا و عرفوا انى مشيت جم ورايا و باذن الله هنمسك شغلهم من النهرده
تقى / مبروك
احمد / الله يبارك فيكي هاه تشربوا ايه
محمد / و لا اى حاجه احنا مش ناويين نعطلك احنا بس كنا بنشترى شويه حاجات للجهاز عجبنا طقم تابلوهات صغيره للمكتب قولنا فرصه نعدى نسلم و نبارك
احمد / تعبتوا نفسكوا و الله بس برده لازم تشربوا حاجه
محمد / هنشرب عندنا النهرده بالليل انت مش جاى و لا ايه
احمد / ازاى جاى طبعا طب دا طنط ماكدالى ان تقى طبخالى بايديها
تقى / اه طبعا حتى تلاقيني قاعده دلوقت بلف محشي قدامك اهو
الكل يضحك
…………………
فى شركه مقاولات كبيره
سعيد قاعد و عمال يتلفت حواليه راجل ببدله يدخل واضح عليه الثراء
شريف / اهلا اهلا باشمهندس سعيد نورتنا
سعيد / دا نور حضرتك خير بلغونى ان حضرتك عاوز تقابلنى
شريف / هو ما حدش بلغك و لا ايه
سعيد / لا الحقيقه ما حدش قالى اى حاجه
شريف / انا اخترتك تكون المدير التنفيذى لفرع الشركه فى اسكندريه طبعا دا لو انت ما عندكش مانع
سعيد / المدير التنفيذى حته واحده !! ما تاخذنيش اصل انا قدمت فى الشركه هنا اربع مرات و اترفضت
شريف / قبل ما تفكر فى اى حاجه الاول اقرا العقد و بعدين شوف
سعيد يبص فى ورق قدامه و يرجع يبص لشريف بصدمه
شريف / اعتقد ان بمرتب زى ده هننسي اى حاجه قديمه و هنركز بس فى اللى جاى و لا ايه
سعيد / و المقابل
شريف / هشترى شركتك لاعلى سعر
سعيد يستغرب
شريف/ انا عارف انهم عملوا كل الاوراق القانونيه باسمك و دا مش عشان سواد عنيك دا عشان وقت الجد تشيل الليله لوحدك و هم فى الامان
سعيد / لا … عشان انا ليا علاقاتى و متعود اخلص الورق لنفسي دا غير ان فى بينا عقد شراكه من الباطن
شريف يناول سعيد عقد
سعيد / دا عقد بيع الشركه اقراه كويس و بعدين فكر
سعيد يبص لشريف و عنيه توسع اوى
شريف / الفرصه بتيجي مره واحده بس
سعيد يسحب القلم و يمضي العقدين
شريف / تحب تستلم منصبك الجديد من امتى
سعيد / من بكره لو ينفع
شريف / و ماله روح جهز حاجتك و اصحى الصبح روح مع المحامى خلصوا الاجراءات و اطلع من بره بره على اسكندريه
سعيد / و بالنسبه للسكن
شريف / هتغلب يعني يا سعيد جرا ايه يا باشمهندس … ماشي يا سيدي عشان بحبك بس … على ما توصل هيكونوا جهزولك شقه جنب الشركه تقعد فيها شهرين تلاته لحد ما ترتب امورك
سعيد / و انا مش طماع … تمام يا رياسه استاذن انا بقي
شريف / سعيد بالتعامل معاك يا سعيد
…………………….
فى الشركه
احمد / دا انا هجيبه قدام امه بلبوص ابن الكلب ده
محمود / اهدى يا احمد الامور ما تتحلش كدا
احمد / بقي بعد العشره دى كلها يستوطى معانا كدا
محمود/ اهدى يا عم بقي
احمد / اهدى ايه انا حطيت تحويشه عمرى فى توضيب الشركه دى و فرشها و انت ناسي انى داخل بالنص و انت الربع و هو الربع انا اللى غبى و متخلف انى كتبتها باسمه بلا ورق بلا قرف ما كنت اتسحلت شويه فى الحكومه بدل القفا السقع اللى شربته ده .. و لا ابن الكلب التانى داخل يتشفي فيا طب و الله لاردله القلم ده عشره و بكره تشوف
محمود / على فكره انا مقهور زيك بالظبط بس احنا لازم نهدى عشان نعرف نفكر … احنا الاول ناخد العقد اللى معانا و نشوف محامى شاطر
احمد / و انا لسه هستنى محامى يجيبلى حقى
محمود / ما انت لو ما عملتش كدا هتضيع حقك لتانى مره اهدى و خلينا نفكر
احمد / انا كدا كدا هروح اتكلم مع امه ما هى شاهده على الشراكه دى من الاول و عارفه كل التفاصيل تشوفلها حل مع ابنها بدل ما اقسم بالله
محمود / يا عم انت مش هتروح فى حته انا اللى هروحلها انت لو اتكلمت مع اى حد و انت فى الحاله دى هتلبس نفسك ستميه قضيه
احمد / دا كل العقود اللى طلعت روحى عشان امضيها الفتره اللى فاتت و بقالى شهر ممقق عيني فى تصميماتها و تسليحها مكتوبه باسم الشركه مش باسمنا يعني حتى تعبنا راح للحيوان شريف على الجاهز.. انا هتشل مش قادر افكر هموت
محمود / و عشان كدا بقولك اهدى انت مش قده
احمد / قده و نص
محمود / لا دلوقت مش قده لازم تهدى و تفكر و تركز عشان تعرف تتعامل معاه من غير ما تضيع حقك او تلبس نفسك تهمه
احمد يروح يقعد على كرسي و يقوم يسيب المكان و يمشي محمود يحاول يحصله ما يلحقوش
………………
فى شقه احمد
ايمان/ يعني هياخد الجمل بما حمل !!
احمد / لا طبعا فى قواضي و محاكم و كل حاجه بس حلنى بقي على ما تفرج و ام المحروس بتقول ان ابنها مش نصاب و هيرجعلنا كل جنيه صرفناه على الشركه
ايمان / و دى حاجه وحشه
احمد / هاخد نص فلوس التشطيب و ايجار الشقه انما تعبى و سهرى و شغلى الشهر اللى فات كله راح للى ما يتسمي
خالد / ما انت الغلطان برده يا احمد
ايمان / مش وقت تقطيم يا خويا هو فيه اللى مكفيه
تليفون احمد يرن
احمد / دى تقى عن اذنكوا
احمد يقوم يدخل اوضته و يرد على التليفون
احمد / السلام عليكم ازيك
تقى / شده و تزول ما تقلقش هتفرج ان شاء الله
احمد / ان شاء الله
تقى / انت ناوى تعمل ايه دلوقت
احمد / مش عارف بس اكيد مش هقعد جنب الحيط اعيط يعني … هحاول ابدء من جديد بس مش عارف بقي هجيب كلاينتس تانين منين .. و بصراحه مش هقدر اشتغل فى اى شركه تانيه … هو بيعمل كل ده عشان يجبرنى ارجع لانى اخدت منه زباينه
تقى / طب اهدى خالص دلوقت و باذن الله هتفرج
احمد / باذن الله … المفروض انى ادور على شقه تانيه دلوقت ابدا اشطبها و افرشها من اول و جديد و ابدء اجرى فى الاجراءات مش عارف هعمل ده ازاى و امتى كل دى عطله و مصاريف فى وقت انا حرفيا فيه عاطل مش عارف احسبها و لا ادبرها ابدا
تقى / تاخد شبكتك
احمد / دلوقت !! يلا بجمله
تقى / انت فهمت ايه دى سلف و لما ربنا يكرمك هترجعهالى و لعلمك انا مش لقمه طريه هتستلمهم جرامات هترجعهم جرامات انا بقولك اهو انت عارف ان سعر الدهب بيتغير كل يوم
احمد / انتى بتتكلمى بجد يا تقى
تقى / بس الموضوع ده هيبقي سر بينا ما حدش يعرفه ابدا خصوصا اهلى و اهلك
احمد / انا عندى فكره تانيه بس … هتاخر جوازنا جامد
تقى / اسمعها
احمد / اظبط فرش شقتى و احولها شركه و افتح من الاسبوع الجاى الفلوس اللى هتجيلى مش هضيعها فى ايجار و توضيب و باذن الله لما اقف على رجلى ابقي انقل المقر او اشوفلنا احنا شقه تانيه نتجوز فيها انقل فيها العفش اللى هنحتاجه او اجيبلنا عفش جديد انتى و رزقك بقي ايه رايك
تقى / انا ما عنديش مشكله و الحلين قدامك موجودين و صدقنى ما حدش هيعرف اى حاجه
احمد / ربنا ما يحرمنى منك يا بنت الاصول بس انا عمرى ما هلجا للحل ده غير اخر حاجه و باذن الله ما احتاجلوش
تقى / باذن الله
……………………..
على القهوه
محمود قاعد مع سعيد
سعيد / يعنى عاوزنى ارفض فرصه زى دى … طب باماره ايه ما احنا التلاته قدمنا على نفس ام الوظيفه و قولنا هنشتغل سوا و هو اتقبل و احنا لا قال لا صحابى محتاجينها اكتر و لا قال احنا اتفقنا نشتغل سوا اتعين و باركناله و خلاص فرصه و جاتلى يا جدع
محمود / فرصه فعلا فرصه تغدر باصحابك مش كدا
سعيد / الراجل كدا كدا حاطت الشركه فى دماغه و احمد مش ملاك احمد سرق زباين الراجل يعني الراجل كان رد فعل و بعدين يا صاحبى انا ما سرقتكوش انا قسمت الفلوس بحق الله
محمود / و تعبنا فى المشاريع اللى راحت للبيه على الجاهز
سعيد / احنا فيها مكانك فى الشركه زى ما هو شريف بيه بيعرض عليك تبقي مدير الشركه دى و تكمل الشغل باسمها عادى و هو هيمول الشغل كله و مرتبك يا سيدي هيبقي تلت اضعاف اللى حددناه لنفسنا يعني فرصتك جاتلك
محمود / بس انا مش هبيع احمد يا صاحبى … خصوصا للراجل ده … اصله لا مؤاخذه ما اختارناش عشان سواد عنينا انت بنفسك قولت قدمنا كذا مره و ما اتقبلناش دلوقت اترش علينا سكر
سعيد / ما كانش عندنا خبره دلوقت الدنيا اتغيرت و احنا كمان كبرنا و اتعلمنا
محمود / انا كدا كدا ما بحبش اشتغل عند حد و ربنا يغنيني عن سؤال اللئيم
سعيد / و مين بقي اللئيم ده بقي
محمود/ دا دعاء عادى … انا جيت اقابلك كنت فاكرك هتوسطنى اصالحك على احمد بعد اللى عملته بس طلعت غلطان
سعيد / يعني ايه
محمود / يعني عن اذنك
محمود يقوم و يسيب سعيد
…………………
فى شقه احمد بعد ما حولها مكتب
احمد / انا عارف انها لقطه و ان ده حل كويس جدا بس منين يا صاحبى
محمود / يا عم الحكومه هتاخد فلوس الارض على دفعات احنا بقي هندفع المقدم و نستلم الارض نخلص الاجراءات و نبدا نبيع الشقق و بدفعات الشقق دى ندفع اقساط الارض و تكاليف المبانى و نسلم الناس و ناخد مكسبنا و نبدا نعمل اسمنا واحده واحده
احمد / دى مجازفه كبيره اوى يا محمود احنا لو ما عرفناش ندورها هتبقي اخرتنا وحشه
محمود / بص انا كلمت امى عن حتتين الدهب اللى كانت عيناهم لجوازى هبيعهم و ده هيبقي نصيبي مع قرشين محوشهم و انت شوف هتعمل ايه و نتوكل على الله نروح نقدم اول ما البوابه تفتح
احمد / مش عارف … سبنى افكر فيها و احسبها و نشوف الدنيا هتمشي ازاى
محمود / تمام بس ما تسرحش فى التفكير البوابه هتفتح بعد اسبوعين يعني لو يادوب اسبوع نفكر و اسبوع نتصرف
احمد يهز راسه و يفكر
…………………….
فى شقه احمد
ايمان / و انا هاخر عنك الدهب يعني اهو عندك صرف نفسك و ربنا يفتحها عليك
احمد / و انا هكتب لحضرتك نصيبك فى الارض كشريكه بكل جنيه اندفع بحق ربنا
ايمان / انا مش عاوزه غير ان ربنا يعوضك و ترجع تقف على رجليك تانى
احمد / ربنا ما يحرمنى منك ابدا يا ماما
…………………
فى كافيه
تقى تدى لاحمد كيس اسود
احمد / ايه ده
تقى / دى فلوس الدهب انا روحت اتصرفت فيه و جبتلك الفلوس و كنت محوشه قرشين فى البنك سحبتهم و دخلت جمعيه مع صحباتى و قبضتها الاول يعنى باختصار كل اللى قدرت عليه
احمد / و جايه تفرحيني يعني
تقى / لا حيلك انا جايه استثمر انت مش داخل فى مشروع و شراكه و حركات جرا ايه يا هندسه دا بيقولوا الاستثمار فى المعمار بيكسب جامد
احمد / كان المفروض تاخدى رايي قبل ما تعملى حاجه زى دى
تقى / انا اهلى حتى ما قولتلهمش الموضوع ده بيني و بينك دى فلوسي و دا دهبى و انا حره فيه
احمد / و دا مش صح يا تقى و اكيد عمرى ما هشجعك على مصيبه زى دى
تقى / فين المصيبه بس انا على فكره لو قولتلهم مش هيرفضوا بس انا مش عاوزه اى حد مهما كان يدخل بينا يا احمد
احمد / ما دام مش هيرفضوا يبقي نعمل من وراهم ليه … تقى مفيش حاجه لى الدنيا بتستخبى
تقى / عشان ما تتحرجش قدامهم و بعدين اديني بقدم السبت اهو ابقي عوضنى انت بقي بباقي الاسبوع
احمد / انا مش موافق على اللى عملتيه
تقى / طب لو سمحت خدهم دلوقت عشان ما يتسرقوش و لا يضيعوا و لا يبقي انا و لا انت
احمد / تمام خليهم فى شنطتك و هنحاسب و اروحك البيت تعينيهم فى دولابك
تقى / خلص الكلام يا احمد الفلوس دى لو مسكتها فى ايدى هسرسبها جنيه فى التانى خدهم و ابقي رجعهم لما تبيع اول شقه ان شاء الله و بعدين انت مش هتكدب على نفسك انت محتاجهم عشان تبدا الشغل فى العماره و ملتزم بمواعيد اقساط للحكومه و مواعيد تسليم للناس يعني محتاجهم ضرورى النهرده قبل بكره
احمد / لما اعجز خالص انى اتصرف هبقي اللجائلك
تقى / ماشي دول مش سلف استثمار اكتبلى بيهم نسبه فى اى حاجه حتى لو واحد فى الميه مش انا هبقي شريكتك فى البيت من النهرده انا شريكتك فى الشغل كمان و اقولك حاجه لما ربنا يكرمك كدا و تقف على رجلك شويه هسيب الشغل بتاعى ده و اجى اشتغل معاك و اهو اضمن ان شيماء مش هتفطرك فى الشغل
احمد / شيماء مين
تقى / السكرتيره و لا زميلتك و لا اى بنت دا اسقاط مش حرفيا اسمها شيماء يعني دا انت قديم نفخ
احمد / انتى بتتحولى كدا ازاى
تقى / هبهرك
احمد يضحك تقى تزقله كيس الفلوس اكتر من مره مش راضي ياخده لحد ما يتنهد و يمد ايده ياخده و يهز راسه بابتسامه شكر
…………………….
فى شقه تقى
عبير / و لما حضرتك ما كنتش موافق من الاول ما جيتش بلغتنا ليه
احمد / تعرفوا منها احسن
عبير / و لا ما تعرفوش خالص احسن و احسن
احمد / يا طنط انا
عبير / بص يا احمد انت دخلت قولت ظروفى واحد اتنين تلاته و كل يوم تتغير حاجه فى ظروفك و احنا ولاد اصول و نقف جنبك لكن توصل انك تبيعها دهبها و انتوا لسه فى الخطوبه دا ياريتها باعت دهبها اللى انت جايبه بس دا باعته كله
احمد / ما انا كتبتلها بيه نص شقتى و دى قيمتها اقسم بالله اكبر من الفلوس اللى دفعتها بكتير و وريت لحضرتك العقد متسجل فعلا يعني ما سرقتهاش و لا حاجه
عبير / انا ما سرقتكش بس اللى حصل ده مرفوض بكل المقاييس و انا كلمتك النهرده عشان تتصرف و تحله قبل ما عمك ياخد بيه خبر
احمد / احله ازاى طيب ايه اللى يرضي حضرتك و انا اعمله
عبير / ما اعرفش … انا حرفيا مش طايقه نفسي دلوقت … انا اول مره تقى تعمل حاجه من ورايا … و عملتها عشانك و بسببك
احمد يبص فى الارض
عبير / انا عاوزه اعرف راسي من رجلى انتوا هتتجوزوا امتى و با ظروفك دى هتتحل امتى ما انا لازم ارتب نفسي انا كمان
احمد / وقت ما تحبى ربنا هيفرجها شوفى حضرتك المعاك اللى يناسبك و انا هرتب نفسي عليه
عبير / ازاى بعد ما قلبت شقتك مكتب
احمد / هفكر انا و تقى فى الموضوع و نشوف انسب وضع و نبلغكوا بيه
عبير / انت ما لكش كلام مع تقى انت كلامك معايا انا انت هتقلب البت عليا و لا ايه
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية يويو)
