رواية يمنى والياس الفصل الخامس عشر 15 بقلم زهرة الربيع

رواية يمنى والياس الجزء الخامس عشر

رواية يمنى والياس البارت الخامس عشر

رواية يمنى والياس الحلقة الخامسة عشر

حامد وقف قصادها بغضب مرعب وقال…الي قالو معتز صحيح
يمنى نزلت راسها بكسوف وقالت…ايوه صحيح..بس
حامد قاطعها بغضب وقال..بس ايه..قولتي جدي راجل كبير وهتعدي عليه مش كده بس لمعلوماتكم انتو التنين انا عرفت من اول يوم
يمنى ومعتز برقو بزهول ويمنى قالت…عرفت ..عرفت ازاي
حامد بصلها باستهزاء وقال…عرفت من الحزن الي في عيون الياس الولد ده شفاف عيونه مبتكدبش ولا هو كمان بيكدب اول ما سألتو قلي على طول طلع اشجع منك وحكالي عملتي معاه ايه وانا قولتلو اني هساعدو لو عايز يطلقك بس هو رفض وقالي انو مش هيغدر بيكي حتى لو انتي عملتي كده انا وقتها كنت هحكيلو على كل الي حصل معاكي بس مرضتش اضغط عليه اكتر من الي انتي عملتيه واخليه يفضل معاكي شفقه سبتو على راحتو وقلتلو امتى ما يحب يمشي انا هكون في ضهره
يمنى كانت مش مصدقه ان الياس مكانش مضطر يفضل معاها قالت…طب ليه مقولتليش يا جدو ليه مقولتليش انو حكالك
حامد قال..ده كمان طلب من الياس قلي بلاش اقولك علشان هو مش حابب انك تتواجهي معايا بسببو واصر اني اسامحك كمان
يمنى نزلت الدموع من عنيها واتمنت لو الياس معاها علشان تشكرو وحست انو وحشها قوي باست ايد جدها وقالت.انا اسفه يا جدي انا مكنتش عايزه اتجوز ولا عايزه ازعلك سامحني انت مش زعلان مني مش كده
حامد حط ايده على شعرها بحنيه وقال..يا حببتي انا بزعل عليكي تخبي عني انا يا يمنى وبعدين ازاي تعملي كده وتستقوي على حد مش هيقدر يواجهك ده الي انا علمتهولك
يمني حست بالكسوف والحزن من نفسها ومن الي عملتو قالت ..عندك حق يا جدي مكانش صح اعمل كده بس انت كنت بتضغط عليا و
بس حامد قاطعها وقال..وانا يا حببتي كنت بعمل كل ده ليه مش علشانك علشان ميعديش بيكي العمر وتلاقي نفسك لوحدك دانت اغلى من روحي وهدية ربنا الي صبرتني على فراق ابوكي..على العموم الي حصل حصل بس انا بقولك اهو لو ضيعتي الياس من ايدك تبقى ضيعتي فرصة عمرك الولد ده بيحبك فضل جمبك رغم كل الي عملتيه معاه وعمره ما استغل الوضع ولا طمع في حاجه لو خسرتيه تبقى فعلا غبيه
يمنى ابتسمت بفرحه وباست ايد جدها وقالت..شكرا يا اجمل جد في الدنيا واوعدك مش هبقى غبيه تاني انا اول مره اختار صح حتى لو الطريقه غلط انا هصححها …وطلعت جري على اوضتها بسعاده كبيره
حامد اتنهد بفرحه لما شاف سعادتها وقال..اشكرك يا رب.
معتز بقى حس الدنيا بتدور بيه مش مصدق انو بدال ما يبعده عنها قربو ليها اكتر بقى هيتجنن حرفيا مشي من غير ما ينطق دخل اوضتو بعصبيه واتصل على صاحبو وقال…ايوه يا زفت اسمعني كويس..اليله تنفذ واوعى تغلط غلطه واحده وقفل معاه وعنيه فيها كره يحرق الكون
الياس بقى كان عند بباه وتسنيم بيتكلمو في موضوع جوازه تسنيم
الياس قال…يعني افهم انك موافقه على الجواز بسرعه كده طب مش تستني امتحناتك وتتجوزي في الاجازه يكون احسن
تسنيم قالت…يا اليااس فينك وفين الاجازه احنا في اول السنه وبعدين انا هكمل عادي بعد الجواز ده حتى منير بيشجعني على الدراسه زيك بالظبط
الياس اتنهد وبصلها وقال باستغراب…هو انتي واثقه من قرارك ده يا تسنيم لو فيه حاجه خايفه ما تحكيها صدقيني انا مستعد اسمعك ومتقلقيش من حاجه ابدا انا اخوكي يا تسنيم
تسنيم بلعت ريقها بتوتر وقالت…حاجه..حاجه ايه يا الياس انا موافقه لان منير شاب طيب وانسان كويس و
بس قاطعها الياس وقال..بس ده مكانش كلامك من كام يوم يا تسنيم كنتي مش موافقه وبتقولي انك مش مرتحالو ومش عارف ايه و
بس تسنيم قالت ..يا حبيبي كنت غلطانه وبعدين هو انت متردد كده ليه هو مش منير صاحبك وانت بتقول انو كويس ولا انت غيران عليا ولا ايه
الياس ضحك واتنهد وقال..تمام يا تسنيم براحتك وانت يا بابا رايك ايه في حكايه الجواز دلوقتي دي
محمد والله يا ابني انا مش عارف بس يعني انت قاعد مع الناس دول من فتره وتعرفهم كويس وبالنسبه للجواز المستعجل ده مش مشكله يعني انا كمان عايز اطمن عليها انا مش ضامن هعيش لكم قد ايه
الياس وتسنيم قالو بعيد الشر عنك يا بابا والياس قال تمام..انا هقولو اننا موافقين وربنا يقدم الي فيه الخير
وكانو قاعدين بيتكلمو بس تلفون الياس رن وبص في التلفون بفرحه كبيره واستأذن ودخل اوضتو وقال ..اول مره ترنيلي يعني ايه وحشتك
يمنى قالت بسرعه من غير ما تفكر…جدا
الياس برق بزهول ومكانش متوقع خالص ردها الي خلاه هيطير من السعاده قال…ايه ده هو انا بحلم ولا حاجه
يمنى اتكسفت بعد ما خدت بالها من كلمتها قالت..انا قصدي..قصدي يعني انا
بس الياس ضحك وقال..طيب فيها ايه لما اكون وحشتك ما انتي كمان وحشتيني اوي ..اوي ..اوي
يمنى ابتسمت بسعاده وقلبها كان بيدق بسرعه قالت…احم..انا كنت حابه اققولك شكرا قوي بجد شكرا يا الياس
الياس استغرب وقال…شكرا على ايه هو فيه حاجه ولا ايه
يمنى قالت…. ابدا بس حبيت اقولك كده
الياس استغرب بس كان مبسوط انها بتكلمو بالطريقه الحلوه دي قال..على معادنا بليل علشان فيه كلام كتير حابب اقولهولك
يمنى قالت..انا كمان عايزه اققولك كلام كتير
الياس ابتسم وقال ..طب قولي دلوقتي انا حاسس ان فيه حاجه عايزه تقوليها
يمنى قالت..لا بليل بقى ويلا روح شوف الي معاك
الياس اتنهد وقال..تمام مع ان اليل مطول قوي والساعه حاسس انها مش بتتحرك انهارده
يمنى ضحكت بفرحه وقالت…الياس هو انت ..احم انت بجد عجبتك لميس..حلوه يعني..يعني قصدي ايه الحلو فيها
الياس ضحك من قلبو وحاسس بفرحه متتوصفش قال…اممم سؤال صعب الصراحه اققولك ايه ولا ايه ولايه قولي ايه الي مش حلو فيها
يمني اتغاظت جدا وقالت بغضب..لدرجادي طب تمام ابقى روحلها هيه بقى بالليل لاني مش طالعه معاك خليها تنفعك
الياس كان هيموت من كتر الضحك قال وههو بيحاول يسكت..اهدي بس ..اهدي بهزر والله بهزر وحياتك ماشوفت فيها حاجه واحده حلوه انا بس لما كانت موجوده شوفت حاجه عمري ما شوفتها وحبيتها اوي
يمنى قالت باستغراب ..حاجة ايه الي عمرك ما شوفتها دي
الياس قال….الغيره القمر الي في عيونك اول مره تغيري عليا قلبي كان بيرقص من السعاده
يمنى ابتسمت وقالت بكدب..احم مين دي الي غيرانه انا..لا ابدا طبعا انا بس معجبنبش طريقتها مش اكتر
الياس ابتسم وقال..عارف طبعا انتي مغرتيش خالص خدت بالي
الياس كان هيكمل بس سمع خبط على الباب وكانت تسنيم وقالت…. خلصت ادخل
الياس قال ثانيه بس يا تسنيم بس يمنى قالت ..لا خلاص روح اقعد مع اهلك انت مش بتشوفهم كتير كده كده هنتقابل باليل يلا سلام
الياس قال…طيب تمام اشوفك باليل مع السلامه
تسنيم دخلت والياس قال ..عايزه ايه يا قرده انتي
تسنيم قالت بمرح ..ايه ياعم قطعت عليك الجو الجميل مين دي الي بترغي معاها ساعه كده الصناره غمزت ولا ايه
الياس اتنهد وهو بيمشي ايده في شعره وقال بابتسامه…. هو باين عليا قوي كده
تسنيم قعدت قدامو وقالت..اوي اوي قلي بقى مين سعيدة الحظ ولا اقولك هحزر انا بس اوعى تكون البنت المدلعه اخت منير دي
الياس ضحك وقال..لا طبعا
تسنيم قالت..الحمد لله بس على فكره مش عيزاك تقلق خالص انت هتفتح عيادتك وهتبقى دكتور قد الدنيا ومش هتحتاج حد وبالنسبه للى اسمها يمنى دي مش عيزاك تحط في بالك اول ما اتجوز هخليها تتمنى الموت وهيه الي هتترجاك تطلقها وساعتها تتجوز البنت الي بتحبها و
الياس كان مبرق بزهول من كلامها وقاطعها وقال..ايه ده يخرب بيتك انتي بتقولي ايه اوعي تقولي كده تاني انا بحب يمنى اصلا
تسنيم بصتلو بصدمه وقالت ..ايه يمنى بتحبها ازاي بعد الي عملتو معقوله وانا الي عماله افكر ازاي اخلصك منها
الياس ضحك وقال..تخلصيني من مين يا مجنونه هو انا لو عايز اخلص منها مش هعرف يعني المهم لما هتتجوزي تتكلمي معاها كويس يا حببتي علشان خاطري انا والله يمنى طيبه قوي بس هيه حصلت لها ظروف غريبه خلتها نفسينا مش تمام اما هيه مفيش ابيض من قلبها بكره لما تعرفيها كويس هتصدقيني
تسنيم اتنهدت وقالت..واعرفها ليه كفايه انت عارفها وغرقان لشوشتك على العموم المهم انك مبسوط يا حبيبي
الياس قال…. مبسوط جدا جدا
يمنى لسه هتتكلم تلفونها رن وكان منير الياس بصلها وقال اممم هو مش كده
تسنيم ابتسمت ابتسامه بسيطه وقالت… ايوه هو
الياس قال تمام انا هروح اشوف بابا متتاخريش علشان هنتغدى ونطلع على العياده
الياس خرج وتسنيم ردت على منير وقالت.. الو
منير ابتسم لما سمع صوتها وقال..اذيك
تسنيم قالت..تمام الحمد الله وانت كويس
منير قال..انا بخير كنت عايز اسألك الياس وافق على الجواز مش كده ولا قلك حاجه
تسنيم قالت..اه وافق هو كان شاكك شويه بس الحمد لله عدت هو انهارده رايح يشوف عيادتو انا كمان هروح..احم يعني لو حابب تشوف العياده معانا تعالى
منير ابتسم بفرحه وقال. …يا ريت..انا اصلا اتمنى اشوفها ..هموت واشوفها
تسنيم ضحكت لما فهمت انو يقصدها وقالت طيب هستناك وقفلت معاه وطلعت..اتغدو كلهم وطلعو على العياده
في العياده كانو كلهم مبسوطين والياس كان بيشرح لمنير كل ركن فيها بفرحه وحماس ومنير كمان كان مبسوط جدا بوجودو معاهم وعنيه دايما على تسنيم الي كانت بتبصلو بكسوف من وقت لتاني
قضو اليوم بفرحه وسعاده ومنير وصلهم البيت والياس نزل على الطريق واشترى طقم جديد يلبسو باليل لما يقابل يمنى واشترالها هديه ورجع على شقة بباه لبس الطقم الي اشتراه ورش برفن جميل وكان قمر جدا جدا وهو قمر في كل حاجه اصلا وكمان اجر عربيه جميله علشان يوصلها بيها وكان كل شئ مثالي
الياس وصل القصر وضرب كلاكس ليمنى ويمنى كانت مستنياه تحت واول ما سمعت الصوت طلعت جري والكل بقم يضحكو عليها
يمنى طلعت واتفاجأت بالياس وبهيئته الجميله الي خطفت قلبها وكمان بصت للعربيه وابتسمت وقربت عليه وقالت ..بابتسامه انا جاهزه
الياس بقى كان واقف بيبصلها بزهول وعنيه هتطلع عليها كانت لابسه دريس جميل جدا وكانت رافعه شعرها ومنزله منو خصلات بطريقه جميله مع ميكب خفيف كانت تسحر والياس كان اول مره يشوفها بدريس ..كانت اميره قمه في الانوثه
يمنى كانت بتكلمو وهو سارح فيها.قالت..الياس
الياس قال بتوهان…… ها
يمنى ضحكت وقالت..ها ..ايه بقولك يلا بينا مالك
الياس قال..لا ابدا بس شكلك حلو قوي بجد تسحري وميل عليها وقال بهمس…ومغريه اوي تتاكلي اكل كويس اننا مش في الاوضه
يمنى ابتسمت بكسوف شديد وقالت بارتباك…احم انت كمان حلو قوي شكلك ولبسك ..والعربيه كمان بس ليه جايب عربيه يا الياس انت لسه بتعمل فرق بنا
الياس ابتسم وقال..مش الفكره بس انا قولتلك ان الخروجه كلها انهارده على حسابي دي اول مره نطلع فيها ولازم تليق بيكي.. يلا اركبي
طلعو وكانو طول الطريق مبسوطين وبيسمعو اغاني ويمنى كانت حاسه بسعاده محستش بيها قبل كده
وصلو قدام باب السنيما وكان الفيلم فاضل شويه ويبدأ قعدو على دسك قريب منها وكان الجو جميل والهوا حلو قوي والياس قال هجيب اعصير اجبلك حاجه غيره
يمنى قالت…اممم هاتلي شوكلت مع اني مبسوطه انهارده ومش محتاجه
الياس ابتسم وقال.. ياستي انبسطي حد يكره انا عايزك دايما مبسوط يا قمر ..وكان هيمشي بس يمنى فجأه مسكت ايده بخوف وقالت…هو انت هتتأخر
الياس استغرب وقال ..لا ابدا هنا فيه كل حاجه تحبي تدخلي معايا
يمنى ابتسمت وقالت لا انا هستناك هنا الهوا عاجبني اوي
الياس ابتسم وقال…. طيب ثانيه وهكون عندك
الياس دخل ويمنى كانت مستنياه بفرحه وبتبص على المكان وكان جميل جدا.. بس فجأه اتسعت عنيها بزهول وصدمه حقيقيه والرعب بان على ملامحها لما شافت شخص واقف من بعيد بيبصلها وبيبتسم
يمنى قلبها كان هيقف حرفيا وقفت ورجعت لورا من كتر الخوف وقعت على الارض بس قامت بسرعه ومن غير اي تفكير سابت المكان وجريت باقصى سرعه
الياس خرج على طول وبيبص لقاها بتجري بعيد استغرب جدا وقعت الحجات من ايده وجري وراها وووووووو