رواية يكفيني حبك الفصل السادس 6 بقلم نوري
رواية يكفيني حبك الجزء السادس
رواية يكفيني حبك البارت السادس
رواية يكفيني حبك الحلقة السادسة
* نانسي!!
: اذيك يا قُصي
* الحمد لله، خير في اية، عمتو جرالها حاجة
: عمتك كويسة، بس هو انا يعني مينفعش ازورك أبداً
* لا طبعا مقصدش
_ مين يا حبيبي
كنت قاعدة في البلكونة لما قام يفتح الباب، سمعت صوتها واستغربت وجودها فجأة، يا ترى جاية ليه
_ نانسي، اذيك يا حببتي اتفضلي
مردتش عليا ودخلت، يخربيت بجاحتك يا شيخة
_ تحبي تشربي اية
: شكراً، انا جاية عايزة قُصي في كلمتين وهمشي
* خير يا نانسي اتكلمي
بصيتلي ورجعت بصيتله
: ممكن نتكلم لوحدنا
اهدي، خدي نفس عميق، مش هينفع تضربيها دلوقتي مش هينفع، مديتش اي رد فعل عشان واثقة أنه هيرد، وحصل فعلاً، مسك ايدي وبصلها
* وليه لوحدنا، انا مبخبيش على فرح اي حاجة، اتكلمي عادي
خوفت من نظراتها اوي، كانت عبارة عن كتلة حقد وحسد متوجهة لينا، شديت على ايده بخوف، حس بيا وطبطب على كفي بشويش، قرأت المعوذتين ودعيت ربنا يسترها علينا بعدها
: طيب .. انا كنت جاية اقولك إني جبتلك وظيفة عندنا في الشركة
* وانتي عرفتي منين اني بدور على وظيفة
: ياسين قال لماما وهي حكيتلي، ف انا كلمت المدير عليك و حددلك معاد للانترڤيو الاسبوع الجاي
* بشكرك طبعاً على إنك حاولتي تساعديني، لكن اعذريني انا مش هشتغل في الشركة معاكم
: ليه يا قُصي، ما انت بتدور على شغل، والوظيفة دي بجد هتنقلك نقلة تانية
* معلش انا مش حابب
: ممكن اعرف ليه
* ليا أسبابي الخاصة
: أسبابك الخاصة دي بتكون فرح مش كدا
شوفوا أم صورم، اومال هتكون انتي يعني
* مش كل كلمة تدخلي فيها فرح، انا صبري بدأ ينفذ من عمايلك معاها
: خايف على زعلها اوي
* لو مخوفتش على زعلها هي هخاف على زعل مين
: يا قُصي فكر كويس دي فرصة متتعوضش، طب اقنعيه انتي
_ اللي هو شايفه صح هيعمله اكيد
* بالظبط
: يعني دا اخر كلام عندك
* ايوا
: تمام، براحتك، بس خليك فاكر اني جيت لحد عندك اقدملك خدمة وانت اللي رفضت
* يا ستي جميلك فوق راسي شكراً
مشيت ورزعت الباب وراها، منكرش إنها ساعات بتصعب عليا أنها حبت ومتحبتش وحياتها واقفة، لكنه جوزي برضو، ومش معنى أنه محصلش ليا نصيب مع حد اني ابقى عايزة اخرب بيته بأي طريقة
_موافقتش ليه
* عشانك
_ عشاني ازاي
* مش هقبل اني احطك في الموقف دا، انا وانتي عارفين هي عايزة تشغلني معاها ليه
_ عشان تفضل معاها وقدام عينيها طول الوقت
* بالظبط، وانا ما صدقت أننا بقينا كويسين، استحالة اخليكي طول الوقت قلقانة ودماغك تجيب وتودي عشان هي هتستغل النقطة دي اوي، وكمان انتي مش حابة دا بدليل انك متكلمتيش طول القاعدة غير بأني عارف الصح
_ بصراحة مش حابة شغلك معاها، لكن في نفس الوقت انت مضايق وعايز تنزل تشتغل ف لو كنت وافقتها مكنتش هعارضك
* وانا مش هعمل حاجة انتي مش حباها ولا مريحاكي، عندي كام فرح انا
ابتسمتله _ يسلملي جوزي العسول
حقيقي فرحت اوي باللي قالوهولي، فكرة أنه خايف على زعلي ومبهونش عليه خليتني طايرة من الفرحة
كنا طول الوقت بندور على شغل، بعتنا لشركات كتير وكان بيروح انترڤيوهات اكتر وكل مرة هي هي نفس النتيجة، كان بييجي مُحبط ومضايق وانا كنت بحاول اخليه مييأسش وخلي أمله في ربنا كبير، لحد ما في يوم جاتله مكالمة من شركة كانت بتتعامل مع الشركة اللي كان شغال فيها قبل كدا، كلمه واحد له مكانة هناك وقاله إنه عرف إنه مبقاش شغال في الشركة التانية خلاص وإنه محتاجه معاه في شركته في فرعها الجديد في القاهرة، الفرحة مكنتش سيعاه وقتها وكان متحمس اوي يروح تاني يوم عشان يمضي العقد، كنت بدعيله ربنا ييسرله أمره ويجبر بخاطره وتظبط المرة دي، نزل راح الشركة واتفقت معاه أنه أول ما يخلص يكلمني ويطمني، انشغلت في البيت والأكل ولقيت أنه عدى وقت كبير ومكلمنيش، المقابلة متاخدش كل دا، خوفت لحسن يكون محصلش نصيب أو حصلت حاجة ضايقته، كنت لسة هتصل بيه سمعت باب الشقة بيتفتح وبيدخل منه، كان داخل زي كل مرة، ساكت و وشه في الأرض، دخل ورمى مفاتيح العربية على الترابيزة، قربت و وقفت قدامه
_ ولا يهمك، فداك الدنيا بحالها، المهم انك بخير ومعايا
ابتسملي فجأة ولقيته بيشيلني وبيلف بيا وهو مبسوط وبيضحك، مكنتش مستوعبة اللي بيحصل لحد ما نزلني وسندني عشان الدوخة اللي حسيت بيها
* ظبطت المرة دي يا احلى فروح في الدنيا
_ بجد، يعني قبلوك
* طبعاً، هو جوزك اي حد ولا اية
_ حبيب عيوني اجمد واحد كدا كدا
حقيقي فرحت اوي أنه اتقبل وأخيراً نفسيته هتتحسن ويرجع ينزل من تاني، قُصي طول عمره بيحب شغله وبيتقنه، ولما قعد بسبب الحادثة ورفضوا يرجعوه تاني كان على طول حزين وصعبان عليه إن المكان اللي كان بيديله كل طاقته مراعاش الأزمة اللي هو فيها
حياتنا بعد كدا اتعدلت للأحسن، الحمد لله الشغل اللي نزله كان احسن ميت مرة من القديم وكمان مرتبه بقى أعلى
_ احلى صينية جلاش لأحلى بابا في الدنيا
كنا عازمين ماما وبابا ورقية وياسين كمان، عمل بيعة كبيرة في الشركة وجاله بونص كويس ف حب يعمل عزومة ويلمنا كلنا
• اااة، اهي دي اكتر حاجة كنت مستنيها من ساعة ما جهزتوا السفرة، تسلم ايدك يا حببتي
_ حبيبي بالهنا والشفا
° يعني احلى من اللي انا بعملهالك
• لا طبعاً ودي تيجي اية جمب اللي بتعمليها بايدك، دي حتة ناشفة وملهاش طعم
_ الله الله ما كانت حلوة من شوية ومستنيها وبتاع
غمزلي وكان هيحدفني بالمعلقة لولا قُصي
* خلاص يا حاج قلبك ابيض عندي انا دي
_ وانت يا جوزي يا حبيبي في حاجة مش عجباك في الأكل انت كمان
* حببتي انا اصلا مبعرفش اكل غير من ايديكي الحلوين دول
_ ثبتني، الف هنا وشفا
~ دا جول في الدقيقة التسعين دا
* اتعلم من اخوك عشان لما تتجوز
بص لرقية وسرح فيها
~ قول يارب
* احم، طب كل، كل يا حبيبي
حمدنا ربنا إن بابا مكنش مركز معانا وبيكلم ماما وإلا مكنش هيعديها بالساهل
_ اية اللي انا شوفته دا، اخوك عينه من اختي ولا اية
* باينه كدا
_ حلو دا، هتجيبوا الدهب امتى
* اية الحماس دا هو انتي اللي هتتجوزي ولا هي
_ انا أو هي مش هتفرق
* نعم يختي
_ اية، ل..لا لا مش قصدي
* اسكتي يا فرح بدل ما البسك طبق الشوربة في وشك
_ واهون عليك
مردش عليا وبعد وشه عنه وهو متعصب، يا صغيرة على الهم يا لوزة دي هتبقى خناقة للصبح
” اصب لقُصي جوافة ولا فراولة
_ لا بيحب الجوافة
” طب .. وياسين
_ زيه برضو
_ قوليلي يا روكا، اية رأيك في ياسين
” ماله
_ يعني، شاب محترم، متعلم، وظيفته كويسة، لطيف معاكي
” عايزة اية يعني
_ لو اتقدملك، تقبلي؟
” ياسين؟؟
_ اية الابتسامة دي يختي
” لا بس اصل استغربت، انا وهو علاقتنا سطحية شوية ف مجاش في بالي خالص إن ممكن تحصل حاجة زي كدا، وبعدين انا لسة هدخل الجامعة وهو مخلص من بدري يعني كبير
_ كبير اية يا هبلة الفرق بينك وبينه سبع سنين يعني مش كتير، بس عمتاً يعني انتي ممكن توافقي
” مش عارفة يا فرح حقيقي، بس يعني انتي اية اللي خلاكي تقولي كدا
_ مشوفتيهوش وهو على الغداء ولا اية، دا مشلش عينه من عليكي
” بجد
_ دا انتي طلعتي واقعة ومحدش سمى عليكي، طب مش كنتي تقوليلي يبت
” اقولك اية بس، انا اصلا مش عارفة دا حب مراهقة ولا بجد
_ بتحسي بأية من ناحيته
” فراشة، عارفة الفراشة لما بتطير في الربيع والجو حواليها يبقى صافي وجميل كدا وبتطير بخفة، انا ببقى كدا في وجوده، ويا سلام بقا لما يتكلم معايا، بيبقى لطييييف، وبحس إنه لا يلا نتجوز دلوقتي
_ مش واقعة لا انتي غرقانة، اية كل دا
” شوفتي، اومال انا اعمل اية بقا
_ يارب يكون خير ليكي ومن نصيبك يا حببتي، ياسين متخيرش عن قُصي ودا مطمني وهيطمن بابا وماما
” يارب ادعيلي
_ خير إن شاء الله، تعالي نطلع ليهم بالحاجة بقا
~ ما تشوط يعم بقا شوط
* راحت عليكم خلاص
• قولتلك سيبك من الزمالك وشجع معانا الأهلي مسمعتش كلامك
~ ولو ولو
كانو بيتفرجوا على ماتش للأهلي ومش قاعدين على بعضهم، من أسباب حب بابا لقُصي أنه اهلاوي زيه، أما ياسين ف زمالكاوي، يا عيني يابني هيتعب مع بابا اوي، قدمت الحلو وقعدت جمبه، كان باصص للتليفزيون ومش مركز معايا، قعدت افكر اصالحه ازاي لحد ما جاتلي فكرة، قومت دخلت اوضتنا وندهت عليه، غاب شوية ودخلي
* في اية
قربت منه وحضنته
_ حقك عليا، انا اسفة عارفة ان مكنش ينفع اقول كدا بس والله ما كان قصدي، طلعت مني كدا بتلقائية
اتنهد ولف ايديه حوالين وسطي
* مكنش ينفع اللي قولتيه
_ عارفة والله، حقك عليا، مش عيزاك تكون زعلان مني
رفعت وشي ليه وكملت
_ وبعدين انا مبعرفش اقعد من غير نكشك فيا
ضحك* دا اللي مضايقك يعني
_ ايوا
* خلاص يا ستي مش زعلان
_ اكيد
* ما انتي استغليتي نقطة ضعفي وحضنتيني
_ منا بحبك
* وانا بموت فيكي
خرجنا برا تاني بعد ما صالحته وقضينا السهرة معاهم لحد ما مشيوا، اليوم كان لطيف بشكل، ولذيذ عشان هو جمبي ومعايا، دخل يساعد معايا في تشطيب المواعين اللي كانت بالكوم ومرضيش اعملهم لوحدي، بحمد ربنا بجد أنه رزقني بزوج صالح وحنين كدا وهين لين حتى في غضبه
مشيت حياتنا عادي وكنا مبسوطين لكن كنت بحس طول الوقت إن ناقصنا حاجة، ناقصنا طفل، طفل يملى علينا حياتنا واحس بمشاعر الأمومة معاه، كنت واقفة في المطبخ بحضر الغداء عقبال ما ييجي ودموعي على خدي، نفسي اسمع كلمة ماما، نفسي اخلف طفل أضمه لحضني، نفسي افرح قُصي ويبقاله ولاد تشيل اسمه، سمعت صوت باب الشقة بيتفتح ونده عليا، مسحت دموعي بسرعة عشان ميتخضش
_ انا هنا يا حبيبي
دخل باس راسي و وقف جمبي
* ريحة الاكل جوعتني اكتر منا جعان، عملالنا اية بقا
_ محشي ورق عنب
* مال صوتك
_ ماله يا حبيبي انا كويسة
لفني وقفني قدامه
* مالك، انتي معيطة
_ لا دي عيني اتطرفت بس
* متخضينيش عليكي، اية اللي حصل يا حبيبي قوليلي
مقدرتش امسك نفسي اكتر من كدا وعيطت، اخدني في حضنه وفضل يطبطب عليا وهو يا عيني مخضوض ومش فاهم حاجة
* مالك بس قوليلي
_ انا نفسي اخلف يا قُصي، نفسي يكون عندنا طفل بقا
* هو دا اللي مخليكي تعيطي
_ هي دي حاجة هينة
* حبيبي بصيلي
خرجت من حضنه وبصيتله، مد ايده مسح دموعي ورجع شعري لورا
* انتي عارفة إن التأخير دا ربنا ليه حكمة فيه صح، واي حاجة ربنا بيعملها بتكون خير لينا حتى لو مش فاهمينها، حتى لو بتوجعنا، بس كفاية يقيننا إن لطف ربنا محاوطنا، لا انا ولا انتي عندنا مشكلة، يعني الخلفة مش مستحيلة، وحتى لو حد فينا عنده مشكلة، مفيش حاجة مستحيلة على ربنا صح ولا اية
_ ايوا
* يبقى ليه الزعل والعياط، بالعكس دحنا عشان عندنا يقين بربنا المفروض نقعد ندعي لحد ما ربنا يستجيب، وهيستجيب والله وهيقر عيننا بأطفال مش طفل واحد
_ طب انت مش زعلان
* هزعل ليه يا عبيطة
_ متضحكش عليا يا قُصي انا حاسة بيك
* مش بضحك عليكي والله، يا فرح انا قولتهالك وهقولهالك مرة كمان، إن مجبتش اولاد منك انتي يبقى مش عايز ولاد وراضي بحكمة ربنا، واصلا يكفيني حبك
من بعدها مفتحتش موضوع الخلفة تاني، كلامه ريحني ولقيت أنه معاه حق، انا فعلا مش لازم ازعل لأن ربنا جميل وهيجبر بخاطرنا، انا واثقة والله
فاجأنا ياسين وطلب ايد رقية من بابا، طبعاً فرحتها مكنتش سيعاها، ماما اللي كانت معارضة الفكرة في الوقت دا لأنها لسة صغيرة وقدامها الجامعة، لكن بابا اخد رأيها ولما لقاها ميالة ليه سمحلهم يقعدوا سوا في رؤية شرعية، وطبعاً طلعوا الاتنين منها مبسوطين وفرحونا، وبابا اتفق مع ياسين أن الخطوبة سنتين والسنتين الباقيين تكملهم في بيته، واتخطبوا فعلاً وكلنا كنا فرحانين ليهم
عدى عليا كام يوم كنت تعبانة فيهم، كنت حاسة بأعراض الحمل لكن مرضتش اتعشم، جبت اختبار من الصيدلية وعملته والمفاجأة أنه طلع إيجابي، كنت مصدومة جداً ومش مستوعبة ولا مصدقة اللي شايفاه، اتصلت بقُصي وانا منهارة من العياط وطلبت منه ييجي، شوية و وصل وكان مخضوض وملهوف عليا
* فرح، مالك، فيكي اية
* ردي عليا في اية، لسة تعبانة طيب
_ انا .. انا ح..حامل
صدمته مكنتش تقل عني، فضل باصصلي وهو مش فاهم حاجة ف طلعتله الاختبار
_ اهو .. اهو بص، حامل، انا حامل يا قُصي، هبقى أم
دموعه نزلت ومكنش مصدق، مسك ايدي وفضل يبوس فيهم وفي راسي ويحمد ربنا
* الحمد لله .. الحمد لله يارب، قومي .. قومي تعالي نروح للدكتورة نطمن يلا
قومت لبست ونزلنا روحنا عيادة الدكتورة اللي كنت بتابع معاها لما الحمل اتأخر، قعدنا مستنين دورنا بفارغ الصبر وأول ما اسمي اتنده دخلنا، كانت بتكشف عليا في صمت رعبنا، فضلت شوية تمشي السونار على بطني لحد ما لقيناها ابتسمت
: الف مبروك يا مدام فرح، انتي حامل في اسبوعين
_ اية
* بجد، بجد يا دكتورة انتي متأكدة
_ متأكدة جداً، الحمد لله ربنا عوض صبركم خير
مكناش مصدقين بجد اللي احنا فيه، خرجنا من عندها والفرحة مش سيعانا، اول حاجة عملناها أننا عدينا على ماما وبابا نفرحهم، فضلت ماما حضناني وهي بتعيط وبتحمد ربنا، وبابا دخل يصلي ركعتين شُكر لله
~ الله أخيراً هبقى عم
” وانا هبقى خالتو
~ احلى خالتو كدا كدا
_ احم احم، استاذ ياسين احنا لسة هنا على فكرة
~ طب ما تقوموا تروحوا
* طب ما يلا معانا يا شبح ولا انت بايت
بص لرقية برومانسية
~ مش عايز امشي والله
شده قُصي من قميصه وخرجه معاه
* قدامي يا نحنوح
فترة الحمل مكنتش صعبة لكن كانت متعبة شوية، وطبعا هرموناتي وتعبي كله كنت بطلعه على قُصي وهو يا حبيبي مستحمل ومستني أولد بفارغ الصبر
_ قُصي .. قُصي قوم الحقني
* نامي يا فرح مبتولديش نامي
_ مبولدش اية قوم مش قادرة
صرخت فيه ف اتفزع وقام قعد جمبي
* انتي بتولدي بجد ولا اية
_ اااااة اومال كدا وكدا
* طب استني استني
اخد الشنطة اللي كنا محضرينها عشان لو ولدت في اي وقت وشالني وجري بيا على تحت، بلغ ياسين وقاله يجيب بابا وماما وييجي على المستشفى، مسابنيش ودخل معايا، ولدت طبيعي والحمد لله كانت الولادة سهلة وجبنا ولد وبنت
• يتربوا في عزك يا حبيبي
° اللهم بارك جمال خالص
” هتسموهم اية بقا
* هسيب اختيار اساميهم لفرح، هي أحق واحدة بدا
كنت شايلة البنت وهو شايل الولد، قرب مني وحطه على دراعي التاني وقعد جمبي
* نفسك تسميهم اية
_ اية رأيك في يزن ولينا
* زي السُكر يا سُكر
فضلوا معانا شوية وبعدين روحوا، رفض قُصي يسيبني وفضل معايا
_ شكلهم حلو وهما نايمين
* يشبهولك يا جميلة
_ اية الدلع دا كله
* وانا عمري ما دلعتك ولا اية
_ لا بس النهاردة اكسترا
* فرحان اوي، فرحان إن ربنا استجاب لدعانا ورزقنا بولد وبنت زي القمر
_ انا فرحانة اكتر لفرحتك
* وانا بحبك وبموت فيكي
تمت بحمد الله
لقراءة الرواية كاملة اضغط على : (رواية يكفيني حبك)
