رواية ونس الفصل الثالث 3 بقلم هاجر نور الدين
رواية ونس الجزء الثالث
رواية ونس البارت الثالث
![ونس](https://camo3blog.com/wp-content/uploads/2024/07/ونس-178x300.jpg)
رواية ونس الحلقة الثالثة
وإحنا في الطريق بصيت لـِ بابا وأنا ماسكة راسي وسألت:
_تعرفه منين دا يابابا، وليه بيقولي طليقتي أنا مش فاهمة حاجة?!
إتكلم وهو سايق وباين عليه التوتر وقال:
=دا واحد بيني وبينه مشاكل في الشغل فـ هو بيحاول يدايقك مش أكتر فـ عشان كدا خوفت عليكي منه.
إتكلمت بإستغراب:
_ايوا ليه يقولي طليقتي برضوا!
إتكلم بابا بإنفعال بسيط وهو واضح عليه التوتر:
=معرفش يا حبيبة، هو بيحاول يدايقك وخلاص.
سكتت مع إني مش مقتنعة و وصلنا البيت، طلعت أوضتي لحد ما دماغي تهدا عشان أنزل أظبط شُغلي اللي راكناه بقالي 3 أيام، كنت قاعدة ساندة راسي على خشبة السرير ومغمضة عيوني وفجأة سمعت صوت صفير بنغمة مُعينة، تجاهلت الموضوع بس الصفير كان عالي وأتا أصلًا دماغي مصدعة فتحت البلكونة وأنا متعصبة وببُص مين اللي بيعمل كدا ولاقيته المُستفز دا، جزيت على سناني وقولت بغيظ:
_إنت بتعمل إي?
بص عليا بهدوء من غير تعبيرات على وشه وقال:
=وإنتي مالك?
فتحت عيوني من قوة الصد*مة وقولت بسرعة ومن كتر الإحراج:
_هو اي اللي إنتي مالك، أكيد مش بسألك بتعمل إي عشان عايزة أتعرف عليك مثلًا، حضرتك مسببلي إزعاج وأنا الجرح اللي في راسي عاملي صداع لوحده.
بص على الجرح اللي في راسي وبعدين قال بنفس الهدوء:
=متأسف، بس كُنت بنادي على العصفور بتاعي وجه.
بصيتله بصد*مة أكبر من الصد*مة بتاعت الإحراج وقولت:
_إنت إعتذرت?!
بص ناحية العصفور اللي ماسكه في إيده وبيملس عليه وقال:
=عشان أزعجت حد مريض لازم أتأسف.
إتعصبت وقولت:
_قصدك إي بـِ مريض دي، إنت شايفني مجنونة?!
بصلي بـِ ملل وهو بيحرك عينيه بحركة دائرية ونفخ وقال بنفاذ صبر:
=إنتي عبيطة يابنتي?
إنتي مش لسة قايلة إن راسك مُصابة وصفيري سببلك تعب، مش قصدي مريضة إن في فـ دماغك حاجة، دا إنتي عبارة عن كائن مخلوق للخناق.
بصيتله بإحراج وقولت:
_طب إعتبر الرد المُتعصب اللي قولته من شوية دا على كلمة عبيطة و كائن دي.
مبصش عليا فـ قولت بفضول:
_هو إنت ليه لوحدك، أقصد يعني مش بتتعامل معانا أو مع آي حد في الشارع.
رد عليا من غير ما يبُصلي وقال:
=شئ يُخصني.
قولت بإحراج:
_هو إنت متعود تحرج الناس كدا على طول?
بصلي وقال بعد دقيقة وهو باصصلي وساكت لدرجة إني شكيت إني قولت حاجة عيب وقال:
=إنتي اللي بتدخلي في حاجة متخصكيش، لكن أنا مش قصدي إني أحرجك أو حاجة.
بصيتله بعصبية ودخلت ورزعت باب البلكونة، ما أصل إزاي يفضل يحرج فيا كدا على التوالي، يااربي على الإحراج بجد، والله الواحد غلطان إنه بيتكلم مع شخص زي دا أصلًا، شخص مستفز وبارد ومشافش رباية أصلًا، بس.. بس حلو ومثير للإهتمام بصراحة، سمعت ضحكة عالية جاية من البلكونة فـ إستغربت وفتحت باب البلكونة وميلت راسي لـِ برا وأتأكد إن هو اللي بيضحك، دا طلع هو بجد يا ولاد!!
طلع بيضحك زينا وعادي أهو، إبتسمت وقولت بتلقائية:
_إنت بتضحك زينا عادي كدا?
قال وهو مُبتسم من الضحك:
=أومال لو عرفتي بضحك على إي.
إبتسمت إنه مأحرجنيش وقولت بحماس:
_على إي?
إبتسم وقال:
=صوت أفكارك كان عالي وسمعته، لأ وبيعلى لما تكوني متعصبة كمان!
خلص كلامه وكمل ضحك وأنا خدودي إحمرت من الإحراج ودخلت بسرعة وقفلت البلكونة، أتكلمت بصوت واطي وأنا بضرب نفسي بالألم بِخفة:
_يابنتي بقى يا بنتي بقى مش قولنا منفكرش بصوت عالي يخربيت أم تفكيرك ياستي متفكريش تااااني.
بعد شوية خدت اللاب توب بتاعي ونزلت عشان أظبط كام ديكور شقة كانوا جاينلي في شغل، موضوع إن يبقى عندي مكتب ديكور مُنفصل دا تحفة، فكرة إن يبقى ليك شغل مستقل أصلًا مُريحة نفسيًا، مكنش ليا مزاج أروح المكتب فـ روحت كافيه وقعدت بدأت أظبط في كام حاجة على اللاب، ولاقيت شخص جاي يُقعد قدامي بصيتله بإستغراب وإنفعال، ولاقياه نفس الشخص اللي شوفته الصبح إتكلم وقال:
_إنتي مش فكراني?
إتكلمت بعصبية وقولت:
=من فضلك قوم، عيب كدا.
_يعني إنتي فكراني?
=معرفكش أصلًا، بس كل اللي أعرفه إنك شخص مش كويس وبتحاول تدايقني وخلاص.
إبتسم بسُخرية وقال:
_شخص مش كويس وبحاول أدايقك، أممم يبقى الكلام اللي سمعته من المستشفى صحيح وإنك عندك فُقدان ذاكرة مؤقت يا حبيبة.
بصيتله بإستغراب وقولت:
=فُقدان ذاكرة إي، إنت عبيط?
بصلي بغضب وقال:
_بلاش غلط، إنتي كمان مش عارفة إنك فاقدة الذاكرة، دا إنتي حتى فقدتيها لما طلقتك وعملتي حادثة.
بصتله بصد*مة وقولت:
=طلقتني إي، أنا أعرفك أصلًا?!!
إبتسم بسخرية وشر وطلع من جيبه ورقة و ورهالي وقال:
_كنت عارف إنك مش هتصدقيني فـ جبتلك معايا ورقة كتب كتابنا وطلاقنا ياقمر .
مسكتها ولاقيتها فعلًا أنا!!
أنا إتجوزت وإتطلقت إمتى!!
حسيت بدوخة جامدة جدًا وملحقتش أسمع باقي كلامه لإني حسيت بإن في أحداث كتير أوي بتدور قدام عيني ومن كُتر الإرهاق أُغمى عليا ومحستش بأي حاجة بعد كدا.
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية ونس)