رواية من طرف واحد الفصل الثالث 3 بقلم وردة رضا

رواية من طرف واحد الجزء الثالث

رواية من طرف واحد البارت الثالث

رواية من طرف واحد الحلقة الثالثة

– يعنى اى مفيش فرح يا عمار
= يعنى مفيش فرح يا بسمله
– وأنا عاوزة أعرف اى السبب
=اى اللى مش مفهوم فى كلامى بقولك عاوز نبدأ حياتنا من غير معصيه تقوليلى فرح وأغاني
-وأصحابى وأهلى اقولهم اى …انت اكيد بتهزر
= دا اللى همك اصحابك وأهلك بدل ما تهتمي لزعلهم أوى كده أهتمي لزعل ربنا
-انت مكبر الموضوع أوى كده ليه …دا هى ليله فى العمر وبصراحه بقى أنا مش مقتنعه بكلامك
=ياحبيبتى هى عشان ليله فى العمر نبدأها بالمعاصى احنا ممكن نعمل فرح إسلامي او نطلع عمره او حتى نسافر فى اى مكان انتى تحبيه
– وأنا بقى مش شايفه انى بعمل حاجه غلط ما كل الناس بتعمل أفراح وعادى ولا انت اللى مستخسر فلوس الفرح
= معقوله انت شيفاني بالشكل دا يا بسمله
– كلامك بيثبت كده المفروض تعمل اللى يسعدنى مش العكس فكر كويس يا عمار فى كلامى دا لو عايزنا نكمل عشان لو فضلت مصمم على قرارك دا ساعتها يبقى الأحسن كل واحد يروح لحاله
= انتى بتتكلمى جد يا بسمله هتنهى كل اللى بينا عشان خاطر الفرح …معقوله هتسبينى بالسهوله دى للدرجادى أنا مش فارق معاكى
– انت اللى مصمم على قرارك وأنا مش مستعده اتنازل عن اى حاجه لمجرد ان علاقتنا تكمل وبالشكل اللى انت عاوزه …ياريت تراجع نفسك ياعمار وابقى بلغنى ردك النهائى
-يعنى دا أخر كلام عندك
= ايوه دا أخر كلام ومش هرجع فيه
-ماشى يا بسمله سلام
*********************************
-ايه اللى مسهرك لحد دلوقتى
=مش قبل ما تحكيلي انت ألاول ايه اللى مسهرك
كنت واقفه فى البلكونه زى عادتى بعد صلاه الفجر بحب وقت الفجر دا أوى عشان وقتى المفضل والناس كلها نايمه كنت سانده على سور البلكونه لما شوفته واقف جنبي مش عادته إنه يفضل سهران لوقت متأخر
– لقيته اتنهد تنهيده طويله …اتخانقت أنا وبسمله
= ليه
– مصممه تعمل فرح وأنا مش عاوز
= طيب اى المشكله ما تعملها فرح
-على أساس انتى مش عارفه رأيى فى الموضوع دا
دا أنا رفضت أحضر معظم أفراح أصحابى عشان موضوع الأغانى أقوم أنا أعمل فرح وأشغل فيه أغانى
= طيب أتكلمت معاها وشرحتلها السبب ؟
– ايوه بس برضو رافضه ومصممه على رأيها …أنا مبقتش عارف ازاى أرضيها ولا المفروض أعمل اى
أنا حاولت كتير اغيرها بس شكلى كده فشلت
= عمار انت اتقدمت لبسمله وانت عارف شخصيتها كويس يعنى هى مكدبتش عليك فى اى حاجه دى شخصيتها من البدايه وانت كنت عارف دا كويس يعنى مش حاجه جديده عليك …انت اللى غلط انك فكرت انك تغيرها هى لو حابه تتغير هتعمل كده من نفسها لكن هى مختلفه عنك ومش شبهك وانت عارف دا وأخترت تكمل فمتجيش دلوقتى وتزعل
-عارف ي اسماء بس أعمل اى حبيتها ….وفكرت أنى ممكن اقدر اغيرها حتى لو شويه بس شكلى كده طلعت غلطان تصورى قالتلى لو معملتش فرح مش هتكمل الجوازه بتقولى كده وفرحنا مفضلش عليه غير شهر
= يبقى مفيش حل قدامك غير انك تتكلم معاها تاتى وتشرحلها وجهه نظرك جايز تقتنع بكلامك لو قعدت معاها مره تانيه يمكن تغير رأيها وتلاقوا حل ينفع معاكم انتوا الاتنين …وياريت بلاش عصبيه ياعمار عشان انت كده هتخليها تعند معاك أكتر فاهمنى يا استاذ
– والله وكبرتى يا اسماء وبقينا ناخد منك نصايح
= يابنى انت بس اللى مكونتش واخد بالك
-كل دا وأبنك …دا انتى كلك على بعضك يادوب ٢٠ سنه
= العمر دا مجرد رقم المهم دا ..كانت تشاور على عقلها
– ماشى ياست العاقله ..بتشربى ايه ؟
= نسكافيه
– ورينى كده واخذ الكوب من يدها
= مش هتبطل العاده الزفت دى …على فكره بقى دا النسكافيه بتاعى
– شرب منه بتلذذ …أصل اى حاجه من ايديكى بتبقى حلوه
= طب هات النسكافيه بتاعى بقى
– رفع حواجبه بتسليه .. لا
= فضلنا نتكلم شويه وبعد كده كل واحد مننا دخل أوضته أول لما لقينا الصبح بدأ يطلع
أحب أعرفكم بنفسى أنا اسماء ودا عمار أبن عمى البيت لازق فى البيت ….عمار يبقى حب الطفوله بس هو طول عمره مش شايفني غير أخته على عكسى عمرى ما شوفته غير حبيب وعشان كده ولا مره فكرت أصرح ليه بمشاعرى من ناحيته ابدآ
***************************************
مر أسبوع وأنا مش بشوفه خالص أستغربت شويه من أختفاءه بس قولت أكيد مشغول يمكن عشان فرحه قرب
وفى يوم زى عادتى كنت واقفه فى البلكونه لاقيته فتح البلكونه ووقف جمبى
-بسم الله الرحمن الرحيم خضتنى ياجدع
=انتى على طول لازقه فى البلكونه كده
-مش عاجبك
=عاجبنى ونص هو أنا أقدر أقول حاجه
=مالك عامل كده ليه وشكلك زعلان ليه …حصل حاجه ولا اى
-بسمله سابتني
=طيب انت اتكلمت معاها
– الكلام مالوش فايده …نهت كل حاجه حتى من قبل ما تسمعني كأنى حاجه وبترميها يعنى مش فارق معاها
= بس انت بتحبها
-مش فكرة حب بس ي اسماء لازم يكون فيه تفاهم وأنا وبسمله عمرنا ما كان فيه بينا تفاهم دايمآ مختلفين فى كل حاجه لدرجه أنى فى مرات كتيره فكرت اسيبها بس كنت برجع عن قرارى ودا عشان بحبها …. أنا فاكر أول مره شوفت فيها بسمله جريت على بابا وقولتله أنا عاوز أخطب ساعتها قالى متأكد من قرارك …فاكر شكله لحد دلوقتى كان فرحان أوى أنى أخيرآ خدت خطوه الجواز ولا أمى مكانتش مصدقه من الفرحه
=ضحكت على كلامه ما عندها حق برضو مرات عمى
دا انت رفضت كل البنات اللى جابتهم وطلعت مليون عقده لدرجه انها فكرت تاخدك لشيخ يشوفك
– فكرة الجواز مكانتش فى دماغى ولا كنت أقدر أكلم اى واحده لمجرد انها عجبتنى لأن دا مش مبدأي الوحيده اللى شدتني كانت بسمله وبالمره عشان أخلص من زن أمى عليا
= طيب وقلبك هتعمل فيه اى
-بتشربى ايه ؟ توه على كلامى وأتهرب …سكت لما حسيت انه مش حابب يتكلم فى الموضوع
= بشرب قهوه
-ياه يا سمسمه دا انتى حاسه بيا ….لقيته خد الكوبايه من أيدى زى عادته وطبعآ أنا سكت خلاص اتعودت بقى
= شرب منها أول بوق ولقيته بيقول …يع دا طعمها يقرف
– خدتها من ايده ودوقتها …ما هى زى الفل اهى وطعمها حلو …لقيته شدها من أيدى تانى وهو بيقول
سمعت ان فيه عريس متقدملك الكلام دا صح ي اسماء
– هزيت رأسى ب ايوه
= حسيت أنه اتضايق …مش شايفه انك لسه صغيره
– اتعصبت من الكلمه مش كفايه انه أعمى القلب لا وكمان أعمى النظر …… مين دى اللى صغيره أنا عندى ٢٠ سنه
= صغيره برضو ي سمسمه
-متقولش صغيره
=لقيته ضحك ماشى يا كبيره
-نفخت بضيق وشديت منه كوبايه القهوه
= خلاص أنا أسف
-وديت وشى الناحيه التانيه قال يعنى أنا كده مقموصه
=لقيته زاد فى الضحك بصتله بغضب …معلش اصل مشوفتيش شكلك يموت من الضحك
-من أمتى وانت بارد كده
= من زمان بس انتى اللى لسه واخده بالك
مشيت عشان ادخل أوضتى لقيته وقفنى
-أستنى
=لفتله وأنا خلاص على أخرى …. عاوز ايه
-كوبايه القهوه
= نفخت بغيظ وأنا بمد أيدى … اتفضل خدها
بصتله وانا بقول لنفسى مش معقوله كتله البرود دى كلها فى بنى أدم واحد يعنى مش كفايه عليا غباوته لقيته بيبصلى وعمال يضحك بصوت عالى
دا يا قاصد يجلطنى او يشلنى
طيب أقوم اموته دا ولا أعمل فيه اى ياربى
سيبته ودخلت أوضتى مش هقدر أقف قدامه دقيقه كمان قعدت على سريري حاولت أنام كتير بس للأسف النوم كان هرب من عينى فضلت على الحال دا لحد ما نور الصبح ظهر …فقررت أقوم انزل جامعتى ولما أرجع ابقى أنام …لبست دريس نبيتى وطرحه سوده
وأول ما نزلت لقيته يعنى مش كفايه عليا أشوفه بليل لا وكمان الصبح الاقيه فى وشى
– رايحه فين كده على الصيح
= رايحه الجامعه
– طيب تعالى اوصلك
= لا شكرآ متتعبش نفسك أنا هركب اى حاجه …ثانيه واحده أنا بجادل معاك فى ايه مينفعش أركب معاك اصلآ
– يلا ي اسماء بلاش كتر كلام أنا هوصلك وهقول لعمى
= ركبت معاه بعد إصرار منه … وبعد ما وصلنا وقفنا بعربيته قدام كليتى
– اجى أخدك بعد ما تخلصى محاضراتك
=لا شكرآ يا عمار متتعبش نفسك أنا هتصرف يلا…سلام
– خلى بالك من نفسك
= حاضر …بصتله وأنا بتأكد معقول اللى قدامى دا عمار اينعم كان دايمآ بيخاف عليا بس ليه حاسه خوفه المرادى مختلف
دخلت محاضراتى وبعد ما خلصت رجعت البيت
-ياماماااا أنتى فين
= فى اى يابت حد كان قالك أنى طرشه
– عاملالى بقى أكل اى ياست الكل أحسن بنتك واقعه من الجوع
= عامله سمك ياعين أمك
– يوه يا ماما أنا مبحبش السمك وانتى عارفه كده كويس
= مش عملاه عشانك يا أختى دا عشان عمار بيحبه
– يعنى السمك عشان عمار وأنا ليا العيش والجبنه منك لله يا عمار
بت تعالى ساعدينى نحضر السفره بدل ما انتى واقفه ترغى كده كتير
– بقولك اى ياست الكل يا قمر انتى أنا هدخل أنام طالما مفهاش أكل النها…قطع كلامى خبط الباب
= روحى أفتحى دا أكيد عمار
– يوووه متنيله جايه اهو جتك خابطه فى نفوخك ياللى بتخبط على الباب …متسربع على اى
=اخص عليكى ي سمسمه …. بتدعى عليا هى دى أخرتها على العموم متشكر
– طب يلا يا أخويا ماما مستنياك جوه
= ازيك يا بنى عامل اى
-أنا الحمدلله بخير يا مرات عمى
= أما أنا عملالك صينيه سمك تستاهل بوقك اما أقوم اجيبها …خدى عمار ودخليه أوضه السفره على بال ما اجيب ألاكل
-رايحه فين ي سمسمه دا أنا حتى ضيف عندكم
= رايحه اتخمد أنام أصل مفهاش أكل النهارده
– اه صح انتى مش بتحبى السمك بس هتحبيه قريب
بصتله وأنا مش فاهمه كلامه ولسه هسأله يقصد اى لقيت ماما حطت الأكل وأنا سيبتهم وقعدت اتفرج على التلفزيون
-لقيته بيقول بصوت عالى عشان يوصلى… تسلم ايدك يا مرات عمى طعم الأكل حلو أوى
=بالهنا والشفا يا حبيبى ….قومى ي اسماء أعملى كوبايه شاى لأبن عمك
-نفخت بضيق حاضر ياماما قايمه أهو
= بالنعناع ياملك …بصيتله بغيظ وأنا بجز على سنانى
دخلت بالشاى أخد الكوبايه من أيدى ….يا خبر ! جايبه الشاى بنفسك ؟ قال يعنى فيه غيرى فى البيت دا غبى ولا اى …. شرب بوء وأبتسم تسلم ايدك
بصتله بضيق وقمت دخلت أوضتى بغلب من تعمده استفزازي الايام دى …من أمتى وهو كده ولا انا اللى مكونتش واخده بالى بس صبرك عليا يا عمار إن ما ربيتك من أول وجديد مبقاش اسماء
****************************************
وفى يوم كنت سهرانه قولت اما أطلع أقف شويه فى البلكونه ببص جمبى لقيته واقف واضح انه واقف هنا من بدرى
– سجاير ؟ من أمتى وانتى بتشرب سجاير يا عمار
= ملكيش دعوه
– فى اى مالك بتكلمنى كده ليه …لقيته بصلى وسكت ورجع يكمل السجاره اللى فى ايده
=شديت السجاره من ايديه ورمتها ….كلمنى زى ما بكلمك
-لقيته اتعصب… ايه اللى عملتيه دا
= من أمتى وسيادتك بتشرب سجاير
– من دلوقتى عندك مانع قال كده وسابنى ودخل بعد ما رزع باب البلكونه جامد
= ماله دا اى اللى حصله محطتش فى بالى كتير قولت أكيد حصلت معاه حاجه فى الشغل مضيقاه ودخلت أنا كمان أنام
تانى يوم صحيت بدرى
– ماما ياماما أنتى فين
= أنا فى المطبخ
– أنتى مبتزهقيش من قاعده المطبخ دى ابدآ
=هو دا اللى فالحه فيه ياروح أمك ياريتك بتعرفي حتى تسلقى بيضه
-فى اى ياطمطم دا أنا حتى بنتك الوحيده يعنى المفروض ابقى مدلعه …تخيلى كده ياماما لو كان عندك منى اتنين
= دى من رحمه ربنا عليا والله انك واحده بس دا الله يكون فى عونه اللى هيتجوزك هيطلع عينه
– عندك حق والله هشله دا أنا هخليه يقول حقى برقبتى
=طيب أوعى كده يا أختى من وشى خلينى أخلص اللى ورايا
– حاضر ماشيه اهو…أنا معرفش كلهم بيشوفوا خلقتى بيحصلهم اى حتى أمى مش طيقانى
= أمشى يابت الجزمه من قدامى الضغط عالى لوحده مش نقصاكى
– طيب أنا داخله الاوضه ولو عوزتى اى حاجه نادى عليا بس وهتلاقينى جيتلك هوا ماشى يا طمطم
=شوف البت ايوه أعمليهم عليا ….أنا مش عارفه انتى هتعمرى فى بيت ازاى ؟
– هو يطول دا أنا نعمه المفروض يشكر عليها ربنا ليل ونهار
= يا أختى بلا خيبه يلا يابت من هنا قال نعمه
خدت فطارى وقولت اما أدخل اقف فى البلكونه شويه بما ان النهارده معنديش اى محاضرات ببص جمبى لقيته واقف دا حتى محسش بوجودى …استغربت بيعمل اى من الصبح كده مش المفروض يكون فى شغله
-بتشرب سجاير على الريق وقهوه كمان
=اهو حاجه بحرق فيها بدل ما أولع فى نفسى
-نازل شرب فى البتاعه دى وانت ومحطتش اى حاجه فى بوقك من أمبارح
-وانتى عرفتى منين ؟اتوترت ولسه همشى لقيته شدنى من أيدى ….دا انتى مركزه معايا بقى
= سيب أيدى يا عمار من أمتى وانت بتسمح لنفسك تمسكنى بالشكل دا انت اى اللى حصلك يا عمار
– لقيته ساب أيدى بسرعه وكأنه ندم أدخلى جوه يا اسماء مش قادر أتكلم …ولسه هتكلم تانى لقيته اتعصب
قولت ادخلى يا اسماء
دخلت بسرعه وأنا خايفه ومستغربه من طريقته الجديده معايا عمار عمره ما كان عصبى بالشكل دا طول عمره وهو هادى معرفش اى اللى خلاه اتغير كده
بليل كنت قاعده مع ماما قدام التلفزيون لقيتها بتقولى
-مش ناويه تشوفى العريس
= تانى ياماما أنا مش قولتلك مش بفكر فى الموضوع دا دلوقتى أنا لسه صغيره
– هو أنا غصبتك على حاجه بقولك شوفيه مش يمكن يعجبك …دا أنا حتى قولت لعمار يبقى يييجى يقعد مع العريس بما أن أبوكى مسافر أصل مينفعش يجى ومفيش راجل فى البيت
= وليه ياماما تقوليله اى اللى خلاكى عملتى كده
– مالك يابت محموقه كده وفيها اى يعنى مش أبن عمك وزى أخوكى ولازم يقف معانا
– أنا داخله أنام أحسن تصبحى على خير
=وأنتى من اهله يا أختى
دخلت أوضتى وأنا بفكر فى عمار معقوله يكون متغير معايا بسبب كده بس ازاى وهو ملمحش فى اى حاجه …أنا هشغل نفسى ليه بكره اروح اسأله وافهم منه
******************************************
تانى يوم اول ما صحيت الصبح قولت لازم اروح لمرات عمى وبالمره أشوفه وأتكلم معاه لازم أعرف ليه متغير معايا
– ماما أنتى فين أنا رايحه عند مرات عمى
= ردت عليا من المطبخ ماشى وابقى سلميلى عليها
نزلت من العماره دخلت العماره اللى جمبنا خبطت على الباب ومرات عمى هى اللى فتحتلى
-صباح الخير يا أحلى مرات عم فى الدنيا
= صباح النور يا بكاشه
– فين عمار هو لسه نايم ولا اى
ايوه معرفش حاله بقى متشقلب اليومين دول كده ليه
قولت لنفسى يعنى مش أنا الوحيده اللى ملاحظه كده أنا لازم أتكلم معاه النهارده ضرورى
قعدنا نرغى شويه أنا ومرات عمى واحنا جايبيين فى سيرته لقيته صحى وواقف قدامى…معقوله فيه حد أول ما بيصحى بيبقى حلو كده
– صباح الخير يا أمى
=صباح النور يا حبيبى أحضرلك الفطار
لا ياماما مش جعان هبقى أفطر بعدين ….لقيته بصلى ومشى دخل أوضته تانى
هو مالو دا الا ما فكر حتى يقولى صباح الخير هو أنا شفافه
لقيته طلع تانى وووقف عند باب أوضته
– ماما بعد إذنك اعمليلى قهوه
= خليكى انتى قاعده يامرات عمى أنا اللى هعملها بصلى من غير ما يقول اى كلمه ورجع دخل أوضته عملت القهوه زى ما بيحب وخبطت على أوضته
-أدخلى
-القهوه
=حطيها عندك
-هتفضل مطنشنى كده لحد أمتى…أنا عملت اى عشان تتعامل معايا بالأسلوب دا
= اطلعي بره يا اسماء مش حابب أتكلم فى اى حاجه أنا مش فايق
-طبعآ وانت هتفوق ازاى وانت بالحاله دى
= لقيته اتعصب وعلى صوته ….حالتى دى انتى السبب فيها مفهمتش اى اللى يقصد بكلامه ازاى هكون أنا السبب
– سألته بعدم فهم وأنا ببصله بترقب مستنياه يتكلم ازاى أنا السبب مش فاهمه ؟ عمار أحكيلى اللى فى قلبك أنا سمعاك… اللى أعرفه ان اللى بيحكى بيرتاح
=متهيألك صدقينى فيه حاجات لو اتقالت مش هنرتاح بعديها .. ولف ضهره عشان يخرج
-هتفضل طول عمرك جبان
=بصلى بوجع شوفته فى عينيه …عشان خايف
-خايف من اى ؟
=خايف من كل حاجه خايف أكون بتعلق بحبال دايبه
رجع شعره لورا وهو بيتنهد وسكت لثوانى وهو بيقعد عايزه تعرفى الحقيقه عشان…….