رواية وخنع القلب المتجبر لعمياء الفصل الثامن والعشرون 28 بقلم سارة أسامة
رواية وخنع القلب المتجبر لعمياء الجزء الثامن والعشرون
رواية وخنع القلب المتجبر لعمياء البارت الثامن والعشرون
رواية وخنع القلب المتجبر لعمياء الحلقة الثامنة والعشرون
لقد ضاقت عليه الأرض بما رحُبت، وضاقت عليه نِفسه..
كان كمَن انفصل عن الواقع، ملامح وجهه اسودت وانطفأت مصابيح الحياة بوجهه وبروحه كل العذاب…
نظراته ثابته فوق لبيبة ينظر لها نظرات لن تنساها ما حيت، نظرات كانت كالخناحر تتوغل بقلب لبيبة..
أبعد أنظاره يرمق رِفقة التي أشرقت السعادة بوجهها وتبتسم باتساع في ترقب حياة جديدة ووعود كثيرة برؤية الألوان والزهور والفراشات..
كيف له أن يحرمها من هذه الحياة التي تستحقها؟!
لكن …. حياة بدون رِفقة!!!
كيف ستكون!!
قبلها كانت حياته باهتة شاحبة ازدهرت فور أن اقتحمت أحرف اسمها سماء أيامه..
يشعر بأن روحه هي من تُعذّب، ألم عَرِم بقلبه، يشعر كأن قلبه قد انكسر كسر لن يُجبر من بعده أبدا..
هو لم يكن أبدًا بالضعيف، كان يقتحم الحياة بكل جُرأة لا يخاف لومة لائم، عُرف بالتمرد عن كل شيء لا يُريده … لكن حين يتعلق الأمر برِفقة تنسلخ كل معانِي القوة عنه ويقوم بحساب كل ردة فعل وكل خطوة يخطوها..
رفع ملامحه التي سطرت الدنيا عليها ريب منونها، رفع وجهه الذي احتضنته أشباح الظلام، وخرجت كلمات بأثقال الأرض جاهد وجاهد لتخرج حتى أصبح داخله خوار .. قالها ليرتعش على إثرها كل خلية بداخله، قالها والعالم قد إسودّ بعينيه ومارت الأرض من تحت أقدامه وهو لا يعلم على أي أرضٍ يقف، قال بانطفاء وبروحٍ منشطرة:-
– موافق …. بس أطمن عليها … هشوفها من بعيد لبعيد بعد ما تخرج من العملية، هطمن إنها بخير .. ومتخافيش هي حتى لو شافتني مش هتعرفني..
أشارت لبيبة للطبيب ليبتسم ووقف يعقوب لتنسدل أمامه هذا الستار الأخضر من الداخل وتبدأ الجراحة المنتظرة…
ظلت لبيبة تتحدث إليه وقد نضحت أعينها بنظرة غريبة وانشطر قلبها لرؤية وجهه بهذا السوء..
كانت تتحدث لكنه لم ينبث ببنت شفة حتى أنه لم يصدر منه أي ردة فعل تدل على أنه يستمع لحديثها من الأساس .. فقط الجمود..
<<<<<<بقلم/سارة نيل>>>>>>
بعد مرور بعض الوقت انتهت كلًا من نِهال وآلاء من تزيين غرفة رِفقة، اردفت نهال بسعادة:-
– ما شاء الله الأوضة بقت تحفة، وأحسن حاجة إننا عملناها باللون الأصفر لونها المفضل والفراشات والورد..
قالت آلاء بحماس:-
– فعلًا بقت رقيقة أووي تشبه رِفقة، يلا بينا بقاا نخرج ونستناها برا أوضة العمليات، تلاقيها خلاص قربت تخرج..
أيدتها نهال وهم يخرجان:-
– يلا بينا..
وفور خروجهم دلف يعقوب للغرفة المليئة بالنور والبهجة لكن هو كان يمشي كمن سُلبت منه الحياة..
سار حتى توقف بجانب وحدة الأدراج المجاورة للفراش ووضع على سطحها ورقة مطوية أعلاها مفتاح عريض وبجانبهم باقة كبيرة من الورود الحمراء وأخرى من زهور الأقحوان المفضلة لديها..
شمل الغرفة بنظرة شاملة وهو يتذكر المخططات التي كان ينتويها..
تحدث قلبه وهو صامت لم يعد يستطع الوقوف، يشعر أن قوته ستخونه:-
– يارب أنا تايه … أنا عارف إن كنت دايمًا بعيد عنك .. بس هي علمتني القرب منك وخدت بإيدي وعرفتني على قدرتك وقوتك ورحمتك..
اتعلمت منها اليقين والثقة..
هي مؤمنة بيك حد المعجزة، متعاقبنيش على بُعدي عنك ببعدي عنها يارب .. في حاجات كتير أوي لسه عايز أعلمها معاها، متحرمنيش منها يارب..
أنا حاسس بضعف وتوهان عمري ما حسيت بيه في حياتي … أنا حاسس بالعجز..
يارب أنا بطلب معجزة .. يارب تحصل معجزة..
كان صامت حتى الحديث لا يقوى عليه، يتحدث وهو صامت ..
وخرج ببطء وهو يضع قبعة على رأسه وتميل على وجهه بدرجة كبيرة وقناع طبي على فمه وأنفه … فانطمست ملامح وجهه…
على مقربة من غرفة العمليات وقف بأحد الزوايا النائية ووقف يترقب بقلبٍ نازف…
بالداخل…
وقف الطبيب أمام رِفقة الغافية وتنهد براحة وشرد في أغرب موقف مرّ عليه منذ عمله كطبيب..
عاد بذاكرته إلى ما حدث عندما قابلته لبيبة بدران وبقية خطتها التي لا يعلم المغزى منها..
– أنا مستحيل أعمل كدا وأخون مهنتي، مستحيل أأذيها…
نطقت لبيبة بحدة وقوة عجيبة:-
– وأنا مش هسمحلك أصلًا تإذيها، أنا لسه مخلصتش كلامي..
وخد تحذير مني … البنت دي لو حصلها خدش بس مش هتكفيني روحك..
في كل الحالات تخرج بخير وبعيونها بتشوف بيها، إياك ثم إياك يحصلها حاجة..
كل إللي بطلبه منك حركة واحدة قدام يعقوب توهمه إنك تبعي وإن اشتريتك…
توسعت أعينه بصدمة وردد بذهول:-
– طب ليه .. ليه تعملي كدا!! دا شكله هيموت عليها…
غرقت أعينها في شرودٍ عميق وهمست دون وعي:-
– لازم يحصل كدا .. لازم..
أفاقت وقالت بصوت واضح وبحسم:-
– وبالنسبة لتكلفة العملية فأنا حولتها على حساب المستشفى وحسابك والشيك إللي دفعه يعقوب باشا ميتصرفش ويرجع على حسابه..
وبحذرك للمرة الأخيرة، البنت دي تخرج بخير واتأكد إنها كويسة جدًا…
خرج الطبيب من شروده ينظر لرِفقة التي ستبدأ مرحلة الإفاق لديها وجاء الوقت المرتقب لمعرفة ناتج الجراحة…
في الخارج كان يقف كلًا من نهال وألآء التي قالت بتوتر:-
– هما اتأخروا ليه كدا .. ربنا يستر..
التفتت نهال من حولها وتسائلت بتعجب:-
– خلاص هانت ورِفقة تخرج ويعقوب مش موجود، يا ترى اختفى فين في وقت زي ده..
ومن ساعة ما إحنا وصلنا هنا وهو مختفي..
وما كادت أن تنتهي من حديثها حتى وجدوا الباب يُفتح وخرجت رِفقة التي بين الوعي واللاوعي ومن حولها الطاقم الطبي يدفعون الفراش المتحرك نحو الغرفة المخصصة لها..
بينما بعيدًا بأحد الزوايا فور أن وقعت أعينه فوقها جأر قلبه وشعر بأوردته تكاد أن تنفجر من فرط نبض قلبه المجنون..
كاد أن يركض تجاهها دون أن يشعر ويأخذها في رِحابه لكنه تصنم بأرضه وهو يتذكر أن أي تصرف خطأ هنا صادرًا منه سيُعرض حياتها للخطر، فهي هنا مازالت وسط الذئاب..
توقف بقلب مكلوم وقد بات يشعر بوجود ألم عاتٍ بجانبه الأيسر..
نُقلت رِفقة لغرفتها بصحبة الطاقم الطبي ونهال وألاء الذين ساروا بجانبها بلهفة واضحة..
بينما يعقوب فتحرك خلفهم بحذر فقد ظهرت لبيبة ووقفت تنظر له نظرات غريبة غامضة جدًا..
لكنه تجاهل كل شيء وصعد حيث غرفة رِفقة ووقف على مقربة منها بأحد الزوايا المخفية…
بداخل غرفة رِفقة…
أخذت تأن بضعف وتهلوس بكلمات غير مترابطة كان أوضحها هو اسم “يعقوب”..
تتلفظه من بين أنّتها الضعيفة..
استدارت نهال تسأل الطبيب بينما تدور بأعينها تبحث عن يعقوب بقلق متفاقم:-
– هي هتفوق إمتى يا دكتور .. وهي كويسة … يعني هتشوف عالطول ولا أيه..
قال الطبيب بهدوء:-
– هي هتفوق عالطول … يعني هي حالًا بتفوق وأول ما تسترد وعيها هنبدأ نشيل الشاش واحدة واحدة ونشوف نجاح العملية…
بالنسبة للعملية محتاج أشرح لحد حالتها وإللي لازم يحصل والتعليمات، فين يعقوب باشا…
تفاقم توتر نهال ودارت أعينها بالغرفة وهي تقول:-
– مش عارفة … شكله راح يجيب علاج أو أي حاجة ..أكيد هيجي دلوقتي..
أنا أختها تقدر تقولي…
تنهد الطبيب وقال بهدوء:-
– أولًا هي هتبدأ تشوف بضبابية، يعني مش هتشوف بشكل طبيعي والرؤية بتتحسن تتدريجي خلال من شهر لتلاته يعني خلال ثلاث شهور … بعد ما تفوق هيبقى في تشوش في الرؤية ودا طبيعي..
ولازم تتبع التعليمات ويكون في مرافق معاها دايمًا..
هتتجنب الفرك في العين والضغط عليها وأي مجهود بدني عنيف، طبعًا هكتبلها على قطره وعلاج هتستمر عليه..
وهيبقى فيه واقي للعين علشان يحميها من أي كدمة أو دخول حاجة غريبة…
طبعًا ممنوع دخول المايه لعنيها، يدوب قماشة أو قطن مبلول مايه وتمشي بيه على وشها..
ولو خرجت في النهار هتلبس نضارة شمس علشان تحمي العين من أشعة الشمس المباشرة..
هي هتحسّ بصداع ودا طبيعي بعد العملية..
على الرغم من إن عمليتها بسيطة لكنها دقيقة، وأهم من العملية الحفاظ عليها بعد الخروج من العمليات…
طبعًا تبعد عن الضوء المباشر زي التلفزيون والموبايل..
التعليمات دي هسلمهالك مكتوبة ولازم يتم الحفاظ عليها..
حركت نهال رأسها بإيجاب وهي تحفظ كل كلمة قالها الطبيب…
بينما رِفقة فقد أخذت تستعيد وعيها بشكلٍ كامل لتهمس بتعب وهي تشعر بصداع حاد ودوار يطوف برأسها:-
– يعقوب … أوب..
ركضت نهال وآلاء باتجاهها لتقول نهال بلهفة:-
– رِفقة .. إنتِ كويسة..
قالت رِفقة بصوت متحشرج وهي تتعجب لعدم سماعها لصوت يعقوب من بينهم:-
– أنا كويسة الحمد لله يا .. نهال..
اقترب الطبيب وتسائل:-
– مدام رِفقة إنتِ حاسه بأيه..
أردفت بانزعاج وهي تتململ لتعتدل:-
– أنا عايزه أتعدل…
اسندها آلاء ونهال برِفق لتقول ألاء:-
– على مهلك علشان مش تدوخي يا رِفقة..
رددت رِفقة بألم وهي تُمسك رأسها:-
– راسي بتوجعني أووي .. عندي صداع فظيع..
أشار الطبيب للمرضة لتُضيف إبرة بالمحلول المُعلق بذراعها وأردف:-
– متقلقيش دا طبيعي .. ودي حقنة مسكنة هتسكن الصداع .. واستحملي الصداع كام يوم معلش..
وأكمل وهو يضع يده على الضماد المطوق لعينيها ورأسها:-
– دلوقتي تدريجي هنشيل الشاش وتقوليلي حاسه بأيه والرؤية أخبارها أيه..
عادت رِفقة للخلف مسرعة كمن لدغها عقرب وقالت برفض شديد وقلبها يطرق بجنون:-
– فين يعقوب .. أنا مش سامعه صوته، وأنا مش هشيل الشاش ألا ما يعقوب يكون موجود..
وأخذت تصيح باسمه:-
– يعقوب … يعقوب .. إنت فين … إحنا متفقين إن هو أول حد هتشوفه عيني. .
هو فين يا نهال .. آلاء هو بيجيب علاج أو حاجة..
إزدادت حدة التوتر في الغرفة وقد عجزوا عن الإجابة وانتشر الصمت بالغرفة…
وجمت ملامح رِفقة وازداد توترها وقد شحب وجهها لتهتف بجنون وهي تتحرك للوقوف فيسرع الجميع بإمساكها:-
– محدش فيكم بيرد ليه … يعقوب فين … هو حصله حاجة..
وجعلت تنادي بصوت أصبح على مشارف البكاء:-
– يعقوب … يعقوب إنت فين .. إنت موجود وبتعمل فيا مقلب ولا أيه..
قال الطبيب بتحذير:-
– مدام رِفقة لو سمحتي اهدي إللي بتعمليه ده غلط عليكِ وبلاش دموع أرجوكِ..
لازم نشيل الشاش علشان أطمن على عينك..
ثارت بشدة وصرخت بقلب مضطرب:-
– أنا مش هشيله ألا في وجود يعقوب..
محدش فيكم راضي يقولي هو فين ليه..
تشجعت نهال وجلست بجانبها وهي تراها على مشارف الإنهيار:-
– بصراحة يا رِفقة يعقوب اختفي مرة واحدة من بعد نص ساعة من دخولك العمليات ومحدش يعرف هو فين…
سقط قلب رِفقة وشحب وجهها شحوب الأموات وتمزق قلبها وجعًا من سماع هذه الكلمات، جمعت كلماتها بصعوبة وأخذت تقول بتقطع وعدم فهم:-
– مش فاهمة .. قصدك أيه …يعني حصله .. حاجة .. يعقوب..
لاحظت آلاء ما فوق وحدة الأدراج لتمد يدها متسائلة بفضول:-
– أيه ده..!!
اتجهت أنظار نهال نحوها وأسماع رِفقة التي قالت بلهفة:-
– في أيه … يعقوب جه..
رددت آلاء وهي تفتح الورقة:-
– لأ دي ورقة كانت محطوطة جمبك وباقة كبيرة ورد أحمر وباقة من زهور الاقحوان … ومفتاح..
أسرعت نهال تقول:-
– طب أيه مكتوب في الورقة…؟!
أخذت آلاء تقرأ بصوت مرتفع ما جعل الموت يجثم على قلب رِفقة:-
“رِفقة …. حبيبتي الأبدية … يا من أعادت الحياة لقلب يعقوب البائس..
لغاية هنا وصلتك لبر الأمان، تقدري تكملي من غير ما تحتاجي لحد، بخروجك من أوضة العمليات هيكون كدا يعقوب إنتهى…
خدي بالك من نفسك وعايزك تفضلي سعيدة ومبهجة زي ما عرفتك..
المفتاح إللي جمب الورقة مفتاح بيتك، هتلاقي عقد تمليك الشقة في مكتبي وكل حاجة هتحتاجيها… كدا أنا أمنت عليكِ ومحدش هيقدر يقرب منك..
خليك بخير دايمًا وعيشي حياتك وكل إللي اتحرمتي منه … بس أوعي تنسي أوب..
إنتِ دخلتي الحياة لقلب يعقوب وعشقك، ومن بعدك قلبه اتكسر ومات…”
(يعقوب)
وضعت نهال كفها فوق فمها بصدمة بينما انزلقت دموع ألاء وهي لا تصدق ما قرأت…
بينما رِفقة ….الكلمات وجميع حروف العربية تقف عاجزة عن وصف ما تشعر به..
استقامت فجأة ليهاجمها دوار عنيف لتمسك رأسها بكفيها وهي تترنح وصرخت بجنون بينما تضحك بهسترية وشهقاتها العالية تمزق القلوب:-
– يعقوب …. يعقوب…لا لا مستحيل …هو وعدني بحاجات كتيرر… يعقوب قال مش هيسيب رِفقة، وإن هو أهل رِفقة…
يعقوب رد عليا يلا ….قولي دا كلام كذب..هونت عليك يا أوب … هانت عليك رِفقة..
طب ليه … ليه دا أنا مليش حد غيرك…
قال الطبيب وهو ينظر لحالتها بصدمة:-
– كدا غلط يا رِفقة .. خطر على عينك إللي بتعمليه ده…
نهال وألاء يحاولون جعلها تجلس واثنين من الممرضات لكنها أخذت تقاومهم بشراسة ليُشير لهم الطبيب بتركها كي لا تبذل مجهود عنيف ووقف الجميع حولها لتلقفها ومنعها السقوط إثر ترنحها…
أمسكت رأسها وحركته بنفي وهي تهتف دون تصديق:-
– لا لا …يعقوب ميعملهاش … يعقوب بيحب رِفقة …مستحيل يسيب رِفقة أصلًا …هو وعدني بكدا..
بتقولي أكون سعيدة …طب إزاي .. إزاي يا يعقوب…
دا بر الأمان إللي بتقول عليه…
عملتلي العملية علشان تسيبني… ياريتني فضلت عميا يا يعقوب..
لا …لا مستحيل رِفقة تهون على يعقوب .. هما أجبروه … أيوا أكيد أجبروه وهددوه بيا…
هو مستحيل يعمل كدا من غير سبب..
أنا واثقة في يعقوب … واثقة فيه…
وفور أن تلفظت أخر كلمة لم يستطع الواقف أمام باب الغرفة الصمود وتحرك يبتعد عن الباب ليستند على أحد الجدران وأخذ يبكي بكاءًا شديدًا وقلبه يحترق كمدًا..
بكاءًا لم يبكيه حتى حين سافرا والديه وعاش بدونها..
يستند بعجز على الحائط وهو يشعر بأن أقدامه لم تعد صامدة لحمله..
يشعر بروحه تفارقه … نعم قد فارقته..
تحرك يخرج بجسد متهدل وبخطى بطيئة، يخرج بدون روح … نعم فلقد تركها خلفه..
كانت على بعد منه …خلفه تقف لبيبة التي استمعت لكل ما حدث…
قبضت على يديها بشدة حتى جرحت أظافرها جلدها … أعينها كانت تحمل الكثير من المجهول والآن قد أخذت إجابة ما تريد معرفته..
سارت خلف يعقوب الذي يسير كالميت لا يشعر بما حوله ولا يستمع لأي صوت سوى صوت بكاء رِفقة وكلماتها وصراخها باسمه الذي يمزق أوتار القلوب..
وقبل خروجه من مدخل مركز العيون توقف وهو لا يستطيع مواصلة السير أو التحرك، رفع كفه يضعه فوق موضع قلبه وهو يشعر بألم لا يُطاق وقبل أن يُقرر فعل أي شيء سقط هامد القوة كارهًا للحياة همسًا بصوت متقطع بحروف اسمها:-
– رِ …. فـ .. قة…
تخشبت لبيبة وهي ترى جسده المُلقى أرضًا لتصرخ بصدمة وقلبها على وشك التوقف:-
– يــــــــــعــــــــقــــــــوب….
في هذا الأثناء كان على المدخل كريم الذي حدثه يعقوب لأجل أن يأتي من أجل حماية رِفقة..
وقبل دلوفه شاهد يعقوب يسقط ليركض بلهفة وصدمة نحوه…
بينما في الأعلى عند رِفقة التي تُمسك برأسها بألم وقد أخذوا يقيودن حركتها وأخذ الطبيب يُبعد الضماد من فوق عينيها لتظل تفتح وتغلق أعينها باستمرار حتى فتحتهم على وسعهم لتتضح الرؤية أمامها وإن كان بها بعض التشويش، فتحت أعينها مستعيدة البصر لكن نظراتها كانت باهتة فاقدة للحياة…
شهقت بشدة وهمست بألم قبل أن تسقط فاقدة للوعي بين أيديهم:-
– يعقوب..
<<<<<<بقلم/سارة نيل>>>>>>
في ذات الأثناء كان كلًا من حسين وفاتن ويامن يقفون أمام باب منزل يعقوب يطرقون الباب مراتٍ عديدة لكن لا فائدة..
قال يامن بضجر:-
– وبعدين بقاا يعقوب باشا مش عايز يفتحلنا ولا أيه..
شكله شاف من جوا إن أنا موجود معاكم علشان كدا مطنشنا ومش راضي يفتح..
نهرته فاتن وقالت بغضب:-
– بطل سوء الظن وأفكارك السودة دي بقاا يا ابني..
قال بثقة:-
– طب أراهن على أيه إن هو جوا، دا أنا اتهريت عليه رن ومش مكلف نفسه يرد…
قال حُسين بعتاب:-
– التمسله مية عذر يا يامن وبعدين أخوك يعقوب مش كدا … يلا رن عليه مرة أخيرة قبل ما نمشي..
قال وهو يضغط على ذر الإتصال بلامبالاة:-
– أكيد يعني مش هيرد … اشمعنا المرة دي إللي هيرد..
لكن تمت الإجابة وأتته صوت ضجة كبيرة ليقول بتعجب:-
– ألوو مين معايا..
نظر له والديه بترقب ليستمع إلى الصوت المرتعب من الجهة الأخرى ولم يكن سوى صوت كريم يقول ببكاء:-
– يامن … إلحقوا يعقوب … بسرعة تعالوا على مستشفى بدران الخاصة..
ارتعشت يد يامن وتوسعت أعينه بصدمة وقد تزايد معدل نبض قلبه وصاح برعب:-
– يــــــــــعــــــــقــــــــوب…
بعد بضع دقائق كان يامن يقود سيارته بسرعة جنونيه ووالده بجانبه تهبط دموعه بصمت ووالدته تبكي بمرارة وصوت رجاءها لرب العباد يملأ السيارة..
وبنفس التوقيت بالقرب من حافة الطريق السريع صرخت نرجس بحماس رغم هوانها وتعبها الجليّ فور أن رأت حدود الطريق، قالت بسعادة:-
– أخيرًا يا يحيى .. الطريق قدامنا …يلا بسرعة..
أسرعوا وهما يُمسكان بأيدي بعضهم البعض حتى توقفوا على جانب الطريق، قال يحيى بحذر:-
– هنقطع الطريق يا نرجس، خليكِ ماسكة فيا كويس..
– يلا بسم الله مش عارفة الطرق سريع ليه كدا.!!
وأسرعوا يقطعون الطريق وقد حدث كل شيءٍ سريع ولم يُسمع سوى صراخ نرجس الذي اختلط بصراخ فاتن، وصوت حسين الصارخ بقوة ليامن الشارد والذي دعس على المكابح بشدة ليتفادهم..
– حااااااسب..
لكن تمت مشيئة الله واصدمت السيارة بجسدهم لينطرحوا أرضًا بشدة…
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية وخنع القلب المتجبر لعمياء)
