رواية وجع حنين الفصل الحادي عشر 11 بقلم ريحانة الجنة
رواية وجع حنين الجزء الحادي عشر
رواية وجع حنين البارت الحادي عشر
رواية وجع حنين الحلقة الحادية عشر
يوسف :ركب عربيته ومشي وراها تاني وبردوا شغل الكاست وسمعها الاغنية بردوا (لعمرو دياب ( ضحكت )
( ضحكت يعني قلبها مال وخلاص الفرق مابنا اتشال . يلا يا قلبي روحلها يالا قلها كل اللي بيتقال . مستني ايه بعد الضحكة دي الضحكة فتحالك سكة . مش هي دي اللي انت عاشقها وبقالها ياما شاغلة البال . ضحكت يعني حاسة هواك وموافقة تعيش العمر معاك . روح يا حبيبها ده انت حبيبها طمن شوقها اللي استناك.في حد يستني علي ادي ده كفاية بس الضحكة ادي . شوف اهي ضحكت تاني يعني اللي شوفته ماكنش خيال . ضحكت يعني قلبها مال )
وفضل يوسف ماشي وراها لحد ما وصلت حنين قدام البيت ونزلت وهو ركن عربيته علي الناحية التانيه اللي قصاد عمارة حنين ونزل شافها لحد ماركبت الاسانسير وفضل واقف ساند علي عربيته وبيكلم نفسه
يوسف :اممم ياتري بقي انتي في الدور الكام وانهي شقة طيب اسال البواب لا لا ممكن يقولها ووقتها تزعل وانا ماصدقت انها ابتدت تلين شوية طلع يوسف التليفون وبعت رسالة لحنين
يوسف:حبيبة قلبي طلعت البيت
حنين بتقرأ الرسايل بس مابتردش عليه بس بتكلم نفسها
حنين:هههههه والله ده فعلا مجنون بيتكلم كاننا فعلا مخطوبين ولا في بينا حاجة . اه اه يا يوسف انت ناوي تعمل فيا ايه .. واتنهدت حنين تنهيدة طويلة
يوسف :مش مهم تردي عليا المهم انك بتقرأي كلامي . يلا بقي اطلعي في البلكونة خليني اشوفك قبل مامشي
حنين :ههههه لا مش ممكن ده فعلا مخه ضارب بلكونة ايه دي اللي عايزني اقفله فيها الله يهديك يا يوسف
يوسف :يلا بقي اصل انا مش حمشي غير لما أشوفك
وفضل يوسف واقف قدام العربية وببيكتب لحنين لحد ما تليفونه رن تاني لانه كان بيرن كتير وهو مش عايز يرد علي حد
يوسف :ايوة يا محمود في ايه عمال ترن وانا اقفل افهم مش فاضي الله
محمود :معلش يا يوسف بيه بس الناس اللي انت مواعدها دي مستنين بقالهم اكتر من ساعة ونص و بكلمك مبتردش عليا
يوسف :اوه اوه معلش يا محمود انا نسيت خالص طيب بص انا نص ساعة بالكتير وجاي ماشي اعتذرلهم بس لحد ما اوصل يلا سلام
يوسف:بيكتب لحنين . انا ماشي بس مش علشان زهقت لا انا نفسي طويل بس اتصلوا بيا في المعرض ولازم امشي . بس متقلقيش حاجي تاني .
يوسف :اه علي فكرة حتوحشيني . بحبك
حنين كانت بتقرأ كلامه وبتبتسم ومبسوطة اوي وكمان كانت واقفة ورا الشباك وبتبص عليه طول الوقت وعلي قد ما كانت عايزاه يمشي علشان محدش ياخد باله علي قد مازعلت انه مشي
(في المعرض )
يوسف قابل الناس اللي كان مواعدهم واتكلم معاهم وخلصوا ومشيوا
وجه امير
أمير:ايه يا ابني جيت ملقتكش ومشيت وقلت ابقي ارجعلك تاني ايه كنت فين
يوسف :اسكت يا امير انا مبسوط اوي كان حتتة يوم
أمير:اوعي تقولي انك قابلتها
يوسف :امم مش بالظبط هو انا كلمتها اه وقلتلها اني بحبها بس مش مقابلة يعني
أمير:لا مش فاهم معلش اخوك غبي فاهمني ينوبك ثواب
يوسف :حقولك بص يا سيدي …..
أمير :ههههههههه لا مش ممكن ده انت مصيبة . حنين دي رجعتك ليوسف المجنون الله يخربيتك مش قادر ابطل ضحك
يوسف:ههههههه انت بتقول فيها انا كنت حاسس اني رجعت زي ايام الكلية فاكر كنا بنعمل ايه مع البنات
أمير:ايوة انتي حتقولي مكنش في بنت تاخد في ايدينا غلوة كانوا بيطبوا علي طول معلم
يوسف :لا بس حنين حاجة تانية دي هي اللي في القلب بنت اللذين عسل وضحكتها تجنن ولا وهي متعصبة ومتنرفزة سكر تحسها قطة كدة حتي وهي متعصبة رقيقة كدة. بسكوتة انا مش عارف دي ام ازاي دي حاسيها طفلة كدة
امير : يا عيني يا عيني بركاتك يا شيخة حنين والله انا خايف لما تشوفها . تلاقيها عصام ابن خاتك هههههه
يوسف: اخرس هي مين دي انا واثق ان حنين دي موزة المزز وحتي لو مطلعتش بالجمال اللي في بالي. حفضل احبها انا حبيتها كلها علي بعضها كدة مش مهم اي حاجة تانية
أمير :طيب ياعم الحبيب انا كنت جايلك علشان اقولك اني مستفر مأمورية كدة اسبوع ولا اسبوعين وراجع علشان لو لقيت تليفوني مقفول ولا حاجة
يوسف :تيجي بالسلامة يا ميروا خلي بالك من نفسك انا مليش غيرك
أمير :يا عم خليها علي الله هي موتة ولا أكتر وبعدين ماخلاص راحت عليا والست حنين واكلة عقلك وقلبك مش سايبة لحد حاجة
يوسف :هو صح اكلتني كلي بنت اللذين بس انت حبيبي يا ميرو خلي انت بس بالك من نفسك
أمير:سلام اول ماارجع حجيلك
(بعد يومين في بيت هدي )
هدي :تسلم ايدك يا حنين الاكل زي العسل
حنين :بالهنا والشفا يا ست الكل
هنا : وانا مفيش تسلم ايدك علي فكرة يا تيتة انا ساعدتها في المطبخ النهاردة
حنين :ههههههه ايوة قطعت السلطة وحضرت السفرة
هدي :ههههه متزعليش يا ست هنا تسلم ايدك
عمر :ماما دي احسن واحدة بتعمل اكل في الدنيا كل اصحابي بيحبوا السندوتشات بتاعتها والبيتزا والحالويات كمان
هدي :هو انتي كمان بتعملي سندوتشات لصحاب العيال
حنين :اعمل ايه بس يا ماما كل يوم ماما صاحبي فلان عايز سندوتش كفتة . ماما صاحبي مش عارفة مين عايز سندوتش بانيه بقيت اعمله زيادة وهو بقي يوزع براحتوا
هنا :كل اللي بيدوق اكل ماما بيحبه اوي
هدي :ربنا يخليهالكم ومتتحرموش منها ابدا
حنين: ولا نتحرم منك يا هدهود يلا انا حقوم اعمل الشاي لوخاصتوا خرجوا الاطباق في المطبخ
حنين وهدي بيشربوا الشاي
هدي :الا قوليلي يا حنين
حنين :نعم يا ماما
هدي:انا حساكي كدة متغير اليومين دول حساكي مبسوطة وعنيكي بتضحك كدة
حنين :ايه يا هدهود انتي بقيتي بتقرأي العيون ولا ايه
هدي :لا صحيح قوليلي انتي عارفة انا ببقي مبسوطة لما بلإقيكي فرحانة
حنين :انا ببقي فرحانة مادم كلكم بخير . بقولك ايه زمان الغسيل خلص حروح انشره قبل ما امشي
هدي : ماشي روحي . هدي بتكلم نفسها . يارب يا بنتي يريح قلبك ويرزقك باللي يصونك و يحافظ عليكي هشام الله يرحموا ميرداش انك تبقي وحيدة كدة
وفاتت الايام ويوسف كل يوم يروح لحنين قدام البيت ويقف يبص عليها وهي مبتردش عليه ولا بترضي تطلع البلكونة بتبص عليه من ورا الشباك وبس . لحد ماجي يوم وكان اليوم ده برد جدا وهوا فظيع ويوسف مش عايز يمشي.
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية وجع حنين)
