رواية هو مين دا الفصل العشرون 20 بقلم أسماء الطبلاوي
رواية هو مين دا الجزء العشرون
رواية هو مين دا البارت العشرون
رواية هو مين دا الحلقة العشرون
(كانت نجات لسه مصدومه من البوليس اللي واقف قدامها وجاي علشان يقبض عليها بس اللي جه في بالها هل المعلم شعبان مات فعلا ولا لا وهما عرفوا منين ان هي اللي عملت كده.
نجات: انا ما عملتش حاجه يا باشا حضرتك جاي تقبض عليا بمناسبه ايه.
الظابط: انتى هتبجحي ولا ايه يلا على القسم وبعدين تبقي تعرفي كل حاجه هناك وانصحك انك تشوفي محامي كويس لان التهمه لابساكي لابساكي
نجات: تهمه ايه يا باشا والله ما عملت حاجه ده انا عندي عيال
الظابط: وما فكرتيش في العيال دي ليه وانتى بتحاولي تقتلي ابوهم عموما الكلام ده ما ينفعش هنا هاتها يا عسكري.
( دخل العسكري اخذ نجات وخرج بيها علشان يروحوا الاسم وسط عياطها وصرخها ولما نزلت لقت سنيه واقفه قدام الباب بتبصلها وعينيها مدمعه.
نجات: انتى جايه تشمتي فيا يا سنيه.
سنيه: لا انا مش جايه اشمت فيكي انا كنت جايه مع الحكومه عشان ياخدوكي.. كده عايزه تقتلي الراجل اللي اكلتي وشربتى في بيته هانت عليكى العشره اخص عليكى.
نجات: يعني ايه يعني هو ما ماتش وبعتك تشفى فيا.
سنيه: لا انا جيت علشان احمي نفسي انا وجوزي وعيالي من شرك انتى بقيتي خطر على كل اللي حواليكى وما تخافيش هخلي بالي من عيالك انا وابوهم مالهمش ذنب انهم يعرفوا ان امهم كانت عاوزه تخلص على ابوهم..
(اخذ الظابط نجات ومشي وطلعت سنيه شقتها تجيب هدوم للمعلم عشان ترجعله المستشفى في الوقت ده كان فاروق وصل القسم ودخل على الظابط.
فاروق: صباح الفل يا باشا انا جاي اعمل محضر باختفاء واحده
الظابط: خير اللهم اجعله خير هتقولي نسمه بردو.
فاروق: بالظبط يا باشا جت عندكم هنا امبارح عشان تعمل محضر ومن ساعتها ما رجعتش.
الظابط: فعلا جت امبارح وجابت علبه ولسه تقرير البصمات واصل حالا وكنا هنكلمها علشان نبلغها.
فاروق: بصمات ايه يا باشا مش فاهم حاجه.
الظابط: هي جابت علبه امبارح وقالت ان في حد سابهالها قدام البيت ودي مش اول مره العلبه كان فيها حلويات وديناها المعمل تتحلل وطلعت فعلا مسمومه وبالشكل ده يبقى في حد بيحاول يقتلها ما كناش عارفين هو مين لكن عرفنا لما جالنا تقرير البصمات
فاروق: والبصمات طلعت بتاعه مين يا باشا.
(في الوقت ده عند هادي وهيام كانوا اخذين الحاجه اللي معاهم وراحوا على المديريه عشان يسلموها زي ما اتفقوا.
هيام: انا مش عاوزاك تفهمني غلط يا حبيبي بس انت واثق انك عاوز تعمل كده.
هادي: واثق مليون في المئه انتى مش عاوزه تعملي كده.
هيام: مش قصدي بس هنقولهم جبناها منين
هادي: انا مرتب كل حاجه كله عارف دلوقتي ان منصور لما مات سابلك ورث انا هقول انك استلمتى الورث بتاعك عادي ولما رحتى تسحبي فلوس من البنك قالولك ان ليكي خزنه.
هيام: طيب وبعدين.
هادي: بقولك ايه تعالي جوه وقدامهم هتعرفي كل حاجه.
(دخلت هيام مع هادي باستسلام وطلبوا يقابلوا رئيس المباحث وفعلا دخلوله.
هادي: السلام عليكم صباح الخير يا فندم.
الظابط: صباح النور حضرتك طلبت تقابلني خير في حاجه ولا ايه.
هادي: ايوه يا فندم جايين نسلم الحاجه دي.
( هادي رفع الشنطه بصعوبه شديده هو وهيام لانها تقيله وحطوها قدام الظابط على المكتب وفتحوها اتصدم الظابط لما شاف الاثار اللي جوه الشنطه وكميتها.
الظابط: ايه ده اثار الاثار دي حقيقيه.
هيام: ايوه يا فندم حقيقيه واحنا جايين نسلمها علشان نخلي مسؤوليتنا.
الظابط: تخلو مسؤوليتكم من ايه والاثار دي وصلتكم ازاي
هادي: الموضوع بسيط يا فندم خطيبتي من فتره ورثت من رجل اعمال اسمه منصور اكيد حضرتك عارفه والدنيا كلها عرفت عنه استلمت ورثها بشكل طبيعي ولما راحت البنك عرفوها ان في خزنه من ضمن الورث موجوده دخلنا علشان نشوفها ولقينا محتوياتها اللي حضرتك شايفها دي.
الظابط: يعني الحاجات دي كانت متشاله في البنك.
هادي: ايوه يا فندم واحنا لما خرجناها خوفنا جدا من المسؤوليه لان طبعا دي قضيه لوحدها علشان كده قررنا ان احنا نيجي نسلمهم ونخلي طرف.
الظابط: كويس جدا انك عملت كده لان اليومين دول في تشديد على الاثار وتهريبها واللي بيتمسك النهارده بتمثال صغير قد كده مش بيخرج ثاني.
هادي: الحمد لله احنا ملناش في الحرام يا فندم الشنطه عند حضرتك شوف هتعمل فيها ايه وهنستاذن احنا.
هيام: هو حضرتك كده مفيش اي مسؤوليه علينا طبعا.
الظابط: بالعكس مفيش اي مسؤوليه عليكم واول ما اسلمها كمان هيجيلكم مكافاه كويسه جدا منهم وهبلغكم علشان تيجوا تستلموها.
هيام:مش هتفرق مكافأة المهم ان الحاجه فى مكانها الصح.
هادي: بعد اذنك يا فندم احنا هنمشي احنا دلوقتي علشان بنرتب لفرحنا.
الظابط: الف مبروك مقدما وبجد متشكر جدا لامانتكم.
( خرج هادي وهيام وهما مبسوطين انهم عملوا الصح على الاقل من وجهه نظرهم.
هادي: انا بجد مبسوط قوي اننا النهارده بدانا صفحه جديده.
هيام: مش اكثر مني.
( رجع فاروق الحاره وهو زعلان جدا انه ما قدرش يوصل لحاجه عن نسمه وما كانش عارف هيقول ايه لامه علشان يطمنها وقتها شاف المعلم شعبان وهو بينزل من عربيه مع مراته.
شعبان: ازيك يا فاروق مش تقولي حمد لله على السلامه يا راجل دنا كنت هموت.
فاروق: سلامتك يا معلم شعبان الف سلامه عليك معلش مش رايق والله.
شعبان: ليه يا واد مالك امك كويسه.
فاروق: الحمد لله كويسه نسمه بس اللي مختفيه من امبارح ومحدش عارف عنها حاجه.
شعبان: ازاي الكلام ده وليه ما قلتليش.
فاروق: يعني لو قلتلك هتعمل ايه
شعبان: كلنا هنعمل مش انا لوحدي نسمه دي واحده مننا والمفروض كلنا نقف جنب بعض لحد ما نوصلها
(جه المعلم جابر وهما بيتكلموا علشان يطمن على شعبان.
جابر: حمد لله على السلامه يا شعبان هو في ايه بتتكلموا في ايه
شعبان: فاروق بيقول ان نسمه مختفيه من امبارح ومحدش عارف عنها حاجه.
جابر: هي لسه ما رجعتش من ساعه ما خرجت.
فاروق: انت كمان شفتها وهي خارجه.
جابر: الواد شفشق بيقول انها قالت راحه مشوار ومن ساعه ما خرجت ما رجعتش.
فاروق: ايوه كانت راحه القسم تعمل بلاغ عن العلب اللي بتجيلها وبيبقى فيها سم ده.
شعبان: نعم علب ايه اللي بتجيلها ويبقى فيها سم.
جابر: الله اكبر… والله انا ما بشكش في حد انه ممكن يكون عمل حاجه زي دي غير الواد سمير ابن عمها.
فاروق: انت كمان بتقولي سمير
شعبان: ليه هو مين تاني اللي قالك ان سمير ممكن يبقى ليه دخل في الموضوع ده
فاروق: انا لسه راجع من القسم وقالولي ان البصمات اللي على العلب اللي كانت بتيجي لنسمه بصمات سمير فرحات ابن عمها.
جابر: سمير ثاني.
شعبان: هو انت تعرف حاجه يا معلم جابر.
جابر: اصل ليله امبارح كان عمال يلف حوالين الدكان وانا والواد شفشق شفناه ولما سالناه قال ده عايز يعمل لها مفاجاه جوه الدكان علشان هو طالب ايدها وكان عاوز ياخد المفتاح من الواد شفشق بس احنا زحلقناه.
شعبان: يبقى اكيد وبدون شك هو اللي ورا اختفاء نسمه ولازم حالا نعرف هو فين.
( جت سنيه وشعبان بيتكلم بخوف.
سنيه: مش هتطلع عشان ترتاح يا معلم.
شعبان: مش هينفع اطلع دلوقتي يا سنيه احنا دلوقتي هنروح ندور على نسمه وان شاء الله مش هنرجع غير بيها وما تخافيش انا هدور عليها بس عشان هي بنت الحته وابوها كان صاحبي مش عشان اي حاجه تانيه.
جابر: عين العقل يا معلم شعبان يلا بينا يا رجاله.
(خرج شعبان وفاروق والمعلم جابر علشان يدوروا على سمير وقالوا هيبداوا البحث من اول الفندق اللي هو قاعد فيه… وهناك عند نسمه كانت لسه قاعده ومربوطه على الكرسي زي ما هي في الاوضه الضلمه لما سمير دخل لها ثاني وشال الرباط عن بقها وهو بيتكلم بغضب.
سمير: بصي بقولك ايه من الاخر كده ما تفكريش ان حد ممكن يجي يخلصك من ايدي انا عليا ديون تسد عين الشمس بره علشان كده اعتبري نفسك بتساعديني.
نسمه: انت لو كنت جيتلي على طول وقلتلي انا عاوزك تساعديني علشان عليا ديون انا ما كنتش اتاخرت عنك انا بنت بلد واعرف في الاصول وانت رحت ولا جيت حتى لو طلعت قليل الاصل بس انت ابن عمي كنت هساعدك بأي شكل انما انت اخترت السكه العوجه وعملت اللي انت عامله ده
سمير: ملكيش دعوه انا اخترت انهي سكه المهم انك هتكتبيلي تنازل عن البيت بتاعك وهتعرفيني الفلوس دي كلها راحت فين.
نسمه: هو انت فاكر ان انت ممكن تطول مني مليم واحد غصب عني انسى انا عشت العمر ده كله لوحدي بتعامل مع رجاله بشنبات يسدوا عين الشمس ومفيش فيهم واحد قدر يوم انه يلوي ذراعي او يخليني اعمل حاجه غصب عني تقوم انت بقى جاي عاوزني اتنزلك عن بيت ابويا وكمان اديك فلوسه ده لو ابويا نفسه طلع من التربه وقالي كده مش هعمل كده.
سمير؛ طيب هقولك على حل ثاني تعالي نتجوز ولما نتجوز هيبقى انا وانتى فلوسنا واحد صدقيني هسدد ديوني وهشتغل ومش هحرمك من حاجه.
نسمه: تحرمني ولا ما تحرمنيش انا مش عاوزاك ومش هوافق ان انا اتجوزك مهما حصل انت عايز تتجوزني عشان مصلحه وبس وانت لسه قايلي كده امبارح غير انك عاوز تتجوزني عشان مصلحه وبس لا كمان بجح وبتشرط عليا
سمير: افهم من كده انك انتى مش عاوزه تجيبيها لبر ومش موافقه على حل من الاثنين صح
نسمه: انت ما بتقوليش حلول انت بتفرض عليا اللي انت عاوزه بس وده مش هيحصل اوعى تكون فاكر عشان انا يعني لابسه الجلابيه والقرطه على دماغي طول الوقت وقاعده في محل خرده انك ممكن تيجي تضحك عليا انا قبل ما اقعد القعده دي انت عارف كويس انا كنت ايه وعارف اني متعلمه كويس وبفهم في الناس كمان اخذى الشيطان يا سمير وفكني وخليني امشي لانك صدقني هتندم ندم عمرك على الرابطه اللي انت رابطهالي دي.
سمير: انا ما بتهددش واتخن تخين يبقى يجي يوريني نفسه ولو اني عارف كويس قوي ان ما فيش تخين هيتشددلك انتى معلمه على الحاره كلها وغير كده كمان مالكيش حد يدور عنك.
نسمه: صدقني ليا كتير قوي يدوروا عني وهتتفاجئ بعددهم.
( هناك عند هيام كانت قاعده هي وهادي بيتفرجوا على التلفزيون وبيتكلموا وهم مبسوطين قوي ان خلاص اتفقوا على الجواز.
هادي: انا بجد مش مصدق ان الدنيا ضحكتلي وكل حاجه اتمنيتها خلاص حصلت.
هيام: لا صدق انا نفسي من فتره قريبه ما كنتش متخيله ان ممكن كل مشاكلي تتحل وانك تبقى من نصيبي ولا كنت حتى مصدقه ان ممكن ابقى قاعده جنبك دلوقتي وبترتب لفرحنا.
هادي: هيبقى احلى فرح وانتى هتبقي احلى عروسه في الدنيا كلها.
هيام: وانا متاكده انى هبقى مبسوطه قوي وانا معاك.
( كانوا بيتكلموا وفجاه النور طفى وولع ثاني وظهر راكان قدامهم.
هادي: اعوذ بالله من الشيطان الرجيم ده يطلع ايه.
هيام: استنى يا هادي خليك انت برا الموضوع ده.
هادي: بره ايه خليكى انتى ورايا اما نشوف ايه اللي بيحصل.
راكان: هي كلمه واحده انا عاوز اعرف نسمه فين.
هادي: نسمه مين وانت تطلع مين اصلا.
هيام: علشان خاطري يا هادي قلتلك ما تتكلمش دلوقتي.
راكان: لو مش عاوزه تخسريه خليه يسكت دلوقتي احسنله.
هيام: حاضر حاضر علشان خاطري ما تأذيهوش.
راكان: نسمه فين انا رحتلها شقتها ما لقيتهاش واخر مره كانت عندك هنا دي اخر حاجه وصلتني عنها وديتي نسمه فين.
هيام: والله العظيم انا خدتها بعربيتي ووصلتها لحد الحاره نزلت على اول الشارع وانا اخذت بعضي ومشيت على طول دي اخر حاجه اعرفها عنها.
راكان: كانت عندك هنا بتعمل ايه
هيام: انا كنت مخنوقه شويه وكلمتها علشان تيجيلي تقعد معايا حبه ولما الوقت اتاخر قلتلها هتبات خرجت من القسم وجاتلي هنا على طول.
راكان: القسم ليه كانت بتعمل ايه هناك.
هيام: لما جت انا سالتها ايه اللي وداها القسم قالتلي ان جالها علب في البيت فيها حاجات مسمومه وجارتها اكلت منهم وكانت هتموت وراحت تعمل بلاغ بالكلام ده خصوصا انها بتنادي عليك بقالها كتير وانت ما بتظهرلهاش.
( قلق راكان جدا وندم انه ما سابش والده وطلع على طول وقت ما حس بخطر عليها.
راكان: تمام انا هتصرف لو كلمتك اذكري اسمي بس وانا هاجي.
هيام: حاضر يا امير حاضر.
( النور اتطفى ولع ثاني وراكان اختفى وهادي كان واقف مش مصدق اللي حصل قدامه ومستغرب.
هادي: ممكن افهم ايه اللي حصل هنا دلوقتي.
هيام: هفهمك كل حاجه اهدى الاول وبعدين هنتكلم.
( وهناك عند ام فاروق كانت قاعده بتعيط وزعلانه لانها لسه ما تعرفش حاجه عن نسمه فجاه النور اتطفى وولع لقيت قدامها راكان.
ام فاروق: اعوذ بالله من الشيطان الرجيم بسم الله الرحمن الرحيم انت تطلع مين.
راكان: انا الامير راكان اظن ان نسمه حكيتلك عني.
ام فاروق: ايوه حكيتلي عنك لكن انت طالعلي ليه انا.
راكان: ما تخافيش انا مش هاذيك
ام فاروق: انا مش خايفه تاذيني انا قصدي اقولك طالعلي ليه ومش بتدور على نسمه.
راكان: انتى ما تعرفيش هي فين
ام فاروق: اخر مره شفتها كانت راحه تبلغ في القسم كان امبارح ومن ساعتها ما رجعتش.
راكان: ما تعرفيش ممكن تكون راحت فين.
ام فاروق: والنبي يا ابني ما اعرف حاجه بس رجاله الحاره بيدوروا عليها وبيقولوا انهم شاكين ان سمير ابن عمها هو اللي اخدها علشان رفضت تتجوزوا وكمان في القسم بيقولوا ان العلب اللي كان بيجيلنا فيها الحلويات المسممه دي لقوا عليها بصمات سمير.
راكان بغضب : سمير
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية هو مين دا)
