رواية الحادية عشرة الفصل الخامس عشر 15 بقلم ميرنا ناصر
رواية الحادية عشرة الجزء الخامس عشر
رواية الحادية عشرة البارت الخامس عشر
رواية الحادية عشرة الحلقة الخامسة عشر
_صباح الورد على احلى مديره جمعية فى العالم
=انت!!
_عايز اعرف بتتخضى ليه اما تشوفينى
=عشان مش بحس براحه
.
_غرام..
=انا اسفة يانور انا بس ليا فترة متلغبطة ومش فاهمة ايه اللى بيحصلى
_انا جمبك ومعاكِ
=ودا لحد أمتى؟
_نعم!
=متستغربش انا اتعودت ان اى راجل بيظهر فى حياتى بيختفى بعد فتره. بص يانور وفر كل المحاولات الغريبة دى عشان انا بجد تعبانه جدا، يمكن انا..
” قاطعنى فى الكلام، لقيته بيقرب منى وبيمد ايده بمنديل، طبعا ما انا عيوطة، كان لازم اتدرب برضو على فكره عدم العياط اثناء الكلام الموضوع مزعج انا اقوى من كدا اصلا ”
_يمكن انتِ مش مبينة إنك تعبانة، مش مبينه إنك كل شوية بتفقدى جزء من غرام وعماله تحاربى وتعافرى، بس من جواكِ مش قادرة، ولا حتى قادرة تتناقشى ولا تناهدى، ووجودى ملخبطك واختفاء وسيم شاغل بالك فى بتتعصبى ازاى هو قرر الهروب وانتِ بتفكرى فيه، وخروج يوسف بعد ما اتنازلتِ عن القضية إمبارح موترك.
“اتصدمت، هو ازاى عرف كل اللى بفكر فيه؟!، اكيد فريدة حكتله، بس انا محكتش مع فريدة اى حاجة من دى”
_مصدومة كدا ليه؟
=عشان انا مش فاهمه انت عرفت دا كله ازاى! وانا محكتش فيه مع حد حتى مع نفسى
_اللى بيحب حد ياغرام مش محتاج حد يحكيله الطرف التانى بيحس بايه.
=نور لو سمحت.
_انا بحبك، بحبك ياغرام ومن زمان وانتِ عارفه كدا كويس، يمكن كنت طفل مراهق حابب السفر والخروج بره وكليه الطب عشان حلمه، غير بابا وضغطه الله يرحمه خلونى اتخلى عنك، بس مكنش سهل ابدا عليا، وحاولت ياغرام حاولت كتير. انتِ اللى كنتِ بتلغى الاد وبتبلكينى من كل حته صح؟! قولت خلاص يانور هى كرهتك وبطلت تفكر فيك.
=نور خلصت؟
_ايه!!مشاعرى واعترافى ليكِ بحبى بتقابليهم بردك كدا، دا بجد؟
=بص ياابن الناس، انا متلغبطة وانت لسة قايل دا بلسانك حالا، وبصراحة معنديش اى طاقة انى ادخل علاقة تانية بعد اللى حصل لى.
_ولا قصدك جيت متأخر ووسيم عرف يقنعك بيه.
=نور..ايه اللى انت بتقوله دا؟
_غرام ارجوكِ، ردى انتِ حبيتِ وسيم؟ انا عارف انك إنسانة صريحة وعارف إن الصفة دى متغيرتش فيكِ.
=لا يانور اطمن انا محبتهوش، ولا عندى مشاعر باقيه إيها لحد، كل الحكاية انى اتعودت عليه وفجأة اختفى دا لغبطنى، وعشان كدا بقولك مشاعرك الجميلة والنبيلة دى مش ليا انا، يمكن انت لما شوفتنى حسيت بمشاعر وذكريات زمان مش اكتر، لكن يانور انا اتغيرت واتجوزت واتطلقت ومعايا بنت. انت متخيل!! نور خلينا اخوات احسن والله هتلاقى احلى واجمل منى مليون مرة ابدا حياتك مع وحده شبهك متجوزتش تكون انت اول حد فى حياتها، ورقم واحد لكن انا عندى بنتى دلوقت هى رقم واحد ومن بعدها اى حاجة.
_انا استحق فرصة مش كدا؟
=يانور انت انسان لطيف، وجميل بجد تستحق كل الحاجات الحلوة اللى فى الدنيا بس مع غيرى مش انا.
_بس انا مش عايز اى حاجةحلوة من الدنيا غيرك ياغرام، ومش عارف احب حد غيرك ياغرام، تقدرى تقوليلى ليه ما ارتبطش؟ لحد دلوقت لانى مش عارف احب حد غيرك،مش عارف مااشوفش وشك فى كل واحده، جايز مكونش فى خفة دم وسيم، وجايز مااكونش كاريزما زى ماانتى قولتِ عنه، بس الجايز والمؤكد كمان ان قلبى بينبض بحبك انتِ، ادينى فرصة، اعوضك عن اللى عمله يوسف، وعن اللى عمله عمو عادل، ادينى فرصة املى المكان اللى تركه وسيم، ادينى فرصة اكونلك نور لطريقك وسند لتعبك، ادينى فرصة اكونلك اب وحبيب وصديق وزوج، ادينى فرصة اكون اب لآيسل وصديق ليها ومعين ليكِ فى تربيتها، انا بحبك، بحبك ياغرام ومش هعرف اعيش فى غرام مع حد تانى غيرك انتِ.
“سيبته،حسيت بلغبطة ومشاعر مختلفة واحاسيس بقبول، واحاسيس بعدم راحه لشخصه ، احاسيس مقارنه بينه وبين وسيم. وسيم اللى قرر يهرب ونور اللى واجه واعترف وافصح. اعمل ايه، من حقى فرصة تانية؟ ولا مش من حقى وكفا ية تخبيط لقلبى اكتر من كدا، وهل انا صح؟ ولا وسيم ممكن يرجع؟ حتى لو رجع دا شخص بيهرب لمجرد مابيقرب.. الحل الأفضل هو النوم اهربى ياغرام من كل وحوش افكارك اللى بتنهش فى دماغك بسرعة، اهربى ياغرام ونامى”
________________________________________________
|بعد مرور ايام وفى صباح يوم جديد |
_تقدرى تقوليلى هتفضلى كدا لحد امتى انتِ ناسية إن افتتاح جمعيتك النهاردة
_قوليلها يا فريدة يابنتِ، دى ليها كام يوم مبتكلش ولا بتشرب بصِ خست ودبلت ازاى.
“من بعد ماقابله نور بقيت متلخبطة ومش حابة الكلام ولا حابة وحود حد حواليا خايفة على إقدام الخطوة دى، وبالذات لما طلع يوسف من القضية يعلن زواجه على ليلى دا شئ لغبطنى اكتر، خوفت اخد قرار يكون قرار متولد من عِند جوايا، بسبب يوسف، الغريب ان وسيم بيجى على بالى حتى بعد هروبة وعدم ظهوره، بس هما معاهم حق طنط كريمة، وفريدة ليهم كل الحق انا لو فضلت هنا فى مكانى كل حاجة هتتهد، يلا ياغرام هانت قومى، كملى انتِ بطلة تشجعى شهيق وزفير يلا كلميهم،يلا اضحكى، يلا اجرى وارقصى، انتِ النهاردة هتكسرى الدنيا”
=و حياة قلبى و افراحه .. و هناه فى مساه و صباحه
ما لقيت فرحان فى الدنيا زى الفرحان بنجاحه
_بسم الله ايه يابنتى دا خضتينى ما انتِ لسه كنتِ صامته ومبتتكلميش
=اتخضيت ياكوكو ، ياطنط انا كنت ساكته بوفر كلام وطاقة وبخزنهم للنهارة.. جماعه انا حاسة ان النهارده فرحى ياجدعان.. عايز كله يبقى تمام.
_لا انا بقول نغنى لحليم احسن ياغرام يابنتى
=ومالو ياطنط دا حليم دا القلب ايسل، فريدة ، طنط كوكو واحد اتنين تلاتة
«و حياة قلبى و افراحه .. و هناه فى مساه و صباحه
ما لقيت فرحان فى الدنيا زى الفرحان بنجاحه
دا حلم جميل فى خيالنا
و لا غابش فى يوم عن بالنا
و بنا لنا قصور
و فرشها زهور
لحياتنا و مستقبلنا»
“بمجرد ما غتيت وضحكت واتكلمت حسيت بمود مختلف، واحنا زى الاطفال بنلف دايرة حوالين بعض وبنغنى، مليانة توتر كلها ساعات وحلمى يتحقق دا بجد،؟ انا هتكلم النهاردة، وهعلن عن اهداف ومبادئ الجمعية، انا هحقق حلم حلمته”
_غرام هنعمل ايه دلوقت، انا اخدت اجازة، وايسل مرحتش المدرسة ورامى جاى فى الطريق وادى طنط معانا وعمو طالع.. مش المفروض يكون فى خطة وهتقسمينا
“ابتسمت وشاورت على كشكول الإنجازات”
=كله مترتب ياكبيره، دلوقت عمو كامل هياكد على كبار البلد هنا الدعوه وصلتلهم ولا لاء. واتفضل الدعاوى علسان لو فى حد فعلا موصلهوش ترجع تستعد علطول ياعمو كامل للتحرك للقاعة.
(عمو كامل): تمام ياغرام يابنتِ بالتوفيق لينا إن شاء الله.
=امين ياعمو كامل اللهم أمين.
=ايسل مهمتك إنك تتأكدى اننا لايف على كل مواقع السوشيال ميديا وهتكونِ مكلفة ب ده انا واثقة فيكِوهيكون معاكِ عمو رامى كل شوية هيتأكد انك تمام او محتاجة مساعده واحنا هناك.
ايسل: تمام ياحضرة المديرة العظيمة، بصى ياماما انا فى واحده صحبتى هتيجى تساعدنى وكدا كدا عملنا بيدج باسمك وعملت حاجة على انتستجرام هتعجبك اوى بصى الاكونت ده.
“حضنتها وانا شايفها، فخورة بيا يمكن ماشفتش نظرة الفخر دى ولا مرة فى عنيها تجاهى،يمكن عشان عمرى ماكنت ناجحة”
= جميل اوى يا سولى تسلم ايدك وتفكيرك ياقلب ماما. فريدة عايزاكِ تتأكديلى ان كل اعضاء النادى اللى جمب بيت بابا جايين دول سيطهم عالى ولو شربوا بيتصورا دول هيفيدونا جدا فى الدعايا بالذات انهم سيدات مجتمع.
فريدة: تمام ياروما متشيليش هم كله تمام هظبط كل حاجة.
=طنط كريمة اتاكديلى ان كل الستات المُطلقات ابتدوا فعلا يمضوا وينضموا للجمعية وحاجة كمان تنزلى بسرعه تصلى كدا وتدعيلنا.
“حضنتنى، يمكن حضن طنط كريمة دا أكتر حضن بيثبتنى، بحسها أمى اللى مخلفتنيش، حضن مليان بحنية العالم وجماله”
=كدا ايسل فستانك فى اوضتك، فريده فستانك فى اوضة ايسل، البنت المصففة والميك اب ارتست جايين الساعة3 عايزة كل حاجة تخلص قبل 3 عشان نلحق نكون متواجدين فى القاعه الساعة 5 بالظبط.
” بعد ما مشيوا كلهم حبيت ربنا يباركلى فى الخطوة اللى بقدم عليها، اعظم سبيل للفضفضة هى الدعاء فى الصلاة، خلصت الصلاة، وكنت مرتبكة جدا وكلى توتر بحضر كل الكلام اللى هيتقال ليا فترة بس النهارده قررت اغيره كله واعيد صياغته وكتابتة من جديد ”
|الساعة الخامسة مساءًا |
“دخلت القاعة وانا لابسه فستان اسود وهيلز، وميك اب هادى وبسيط، ماسكة فى ايدى الورق اللى هلقى من خلاله الخطاب، القاعة مليانه ناس، واللى اتصدمت بيه نور وهو جمبه المحافظ. المحافظ مره واحده!. ناس كتير بتصور صمت رهيب وناس كتير بيبصوا عليا.. وكأنى سامعة اصوات تفكيرهم « هى دى اللى مجمعانا» صافحت المحافظ وكلى رهبة انى اطلع على الاستيدج، روحى بتتسحب، قلبى بيرقص من الفرحة، ابتسامتى مش مفارقانى، كل المشاعر وعكسها،”
_غرام متخفيش انا جمبك .
“كان نور بيقول الكلمات دى وانا فى عالم تانى وانا شايفة نفسى، وانا بضرب وبيتكسر عليا عصاية المكنسة، وانا حماتى بتتنمر عليا وعلى وزنى، وانا بتعالج من سكر وضغط، وانا بتذل وبشتغل شغلانه مش هدفى ولا كريرى عشان يتاخد منى فلوس، لقيت دموع عنيا قررت انها تفضحنى وتعلن وجودها لحد ما فوقت على اسمى بعد ما رامى عمل مقدمة بسيطة عشان يفوقنى واطلع ابتديت امشى وانا بحاول افصل عن الافكار اللى ف دماغى، مع اول درجة سلم وابتديت اشجعنى، يلا ياغرام، كملى ياغرام، انتِ بطلة مسكت المايك ”
=بسم الله الرحمن الرحيم ، انا غرام عادل مؤسسة وصاحبة جمعية كونِ انتِ.. تحية طيبة وبعد .. السيد اللواء / احمد إبراهيم محافظ الجيزة
أتوجه بكل الاحترام والشكر والتقدير إلى شخصكم الكريم، ولتشريفكم الإفتتاح.
حضرات السيدات والسادة المحترمين،
الحضور الكرام،
السلام عليكم ورحمة الله وبركاته
يطيب لما في كونِ انتِ أن نرحب بكم جميعاً في هذا المتنفس الجديد، وكل الترحيب لشخصكم الكريم باسمي وباسم جميع الأخوة بالمكتب المسير وجميع الأعضاء المتطوعين والمنخرطين ومن خلال هذه المناسبة أود أن أتقدم بفائق شكري وامتناني العظيم إلى كل من شارك في إنجاح إنشاء الجمعية ، وترجمة كافة أهدافها العظيمة على أرض الواقع، وأخص بالذكر في هذا المجال أعضاء المكتب المسير المتعاطفين والشركاء والمنخرطين والمانحين ورغم إمكانياتنا المحدودة، والفترة الزمنية القصيرة على تأسيس الجمعية، فقد استطعنا بفضل الله وبفضل العزيمة الصلبة والقوية للمشرفين عليها، اهلى والمؤمنين بى ان نضم حوالى ستمائة مُطلقة فى الجمعية، وثمان مئة إمراه ارملة تعول. استسمحكم عذرا أكمل حديثى بكلام عامى بسيط سلس تفهمه كل ست بسيطة جاية النهاردة حاطة أمل انه يدخلها رزق« كونِ انتِ» نقطة البداية لبنت لقيت نفسها فى اوائل التلاتين مريضة بسكر وضغط وسِمنة مفرطة، ست بتضرب وبتتهان وبتشتغل عشان يتاخد فلوسها ، وام تايهه مش عارفه تهتم ب اولادها ، ست ملهاش حد يحميها والمجتمع جاى عليها وبيذلها، علشان هى ست، انا هنا بكون جمعية لكل بنت لكل ست لقيت نفسها فى الشارع مش معاها مصدر رزق، انا هنا لكل بنت محتاجة حد يقف جمبها، محتاجة عيلة تحميها، انا هنا عشان تتعلمى حاجة جديدة وتكون ليكِ كرير مختلف، انا هنا هكون ليك صحبة، وام واخت وبنت، وهكون ليك سند، انا هنا علشان اوعيكِ واقولكم انها مش نهاية العالم ولا آخر المطاف دى بداية جديدة مختلفة فرصة تانية تعيشى فيها حلاوة الدنيا، فرصة تانية تكتشفى فيها جمالك وشخصك وقوتك الحقيقة. كونِ انتِ.
هنتعلم اقسام كتير فى كل المجالات.
هندرس وهنبتكر.
هنكبر وهنأسس مشاريع صغيرة.
هنكمل عشان تكونِ انتِ
وانا ابتديت وكلنا هنكمل سوا
والسلام عليكم ورحمة الله وبركاته
“صوت تصفيق حار، دموع عنيا مكنتش مخليانى اشوف كويس، بس كل الناس دى بتسقف وواقفين علشانى، مبروك ياغرام، مبروك يابطلة لأول حلم واول بداية”
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية الحادية عشرة)
