رواية هلع الفصل الرابع والعشرون 24 بقلم آية
رواية هلع الجزء الرابع والعشرون
رواية هلع البارت الرابع والعشرون
رواية هلع الحلقة الرابعة والعشرون
//
كنت واقفه عند الدولاب و عقلي مش معايا وصوت افكاري قريب يطلعن من دماغي على خشت رسلان للدار
رسلان >> مش ح يسير شي ما تخافيش
صكرت الدولاب واتكيت عليه وبحتت فيه>> رسلان والله قلبي معش يتحمل ، كلهم يحسابوني نسيت وقويت بس انا العكس مليت وانا نمثل في دور الاخت الكبيره القويه اللي تجري بتعرف ربع دليل على قضية باتها واللي تشوف في امها مافيش امل منها و نقوي فروحي عشان ميرا لو شافتني منهاره ح تنهار معايا
رسلان حط يديه عالدولاب وانا فالنص >> بالفتحة مش بالكسره ❤️ و بعدين انتي لازم تقعدي قوية عشانك وعشاني ، سيمو مش حنقولك كلام انتي عارفتيه وسامعتيه مليون مره بس انتي قوية وحتقدري تكملي حياتك و توقفي جنب امك لعند تقعد كويسه
سما >> يارب بس المره هذي لما نشوفها تكون متحسنه شويه عالاقل بس
رسلان قرب مني ونزل راسه لعندي ومازال يديه عالدولاب >> كله ح يكون تمام
سما بتوتر >> رسلان حول خليني نغير دبشي
رفعت يديا بندفه مسكهن بالقوه ونزلهن لوطا >> بدون مقاومه لو سمحتي عشان تالف ، ح ادفي و تهربي و ح نغلبك فالنهاية 😂
//
//
ثاني يوم فالشركة عند رسلان
بعد كمية محاولات من اسير عشان روان لي كانت مصكره كل الطرق في وجهه كان يومها قاعد مع رسلان فالشركه
اسير >> مش انا صاحبك
رسلان>> لا ولد جيرانه ، اخلص
اسير >> ياعليك ذل
رسلان برم عليه>> خليني نكمل الحسابات بنطلع ازف
اسير >> خلاص عرفناك بتمشي السما قصدي المدام يعني
رسلان>> انا مش عارف عليش متحمل ام الصحبه هذي وما قربعتهش فوق راسك من زمان
اسير >> باه عادي نطلب طلب
رسلان>> احكي ياراجل
اسير>> عادي تقول المراتك هاه شفت ما قلتش اسمها ، بس قوللها تكلم روان تجيكم عشان نحكي معاها
رسلان>> وين الحياة المنبرحه هذي
اسير >> ماتذلش امي النبي
رسلان>> شن تبي فالبنت خلاص خليها تهدا
اسير >> رسلان لو صارت حاجه بينك وبين مراتك ، شفت هذي ثاني مره منقولش اسمها 😂 المهم حتحمل يعني اطول ما تحكيش معاها ؟
رسلان ضحك >> ايوه خليك هكي محترم ، خلاص بلا امثله تو نشوف
اسير >> اليوم اه !
رسلان>> اسير راسي صدع
اسير >> اليوممممم وضروري
رسلان>>اللهم طولك يا روح
اسير>> غير قتلك
رسلان>> شن بتقول
اسير نفخ الدخان >> كنك لابس رقبه مش تقول خلاص الجو بدا يسخن ” وضحك”
رسلان >> انت مكسد
اسير >> انقني بكل
رسلان>> خلاص به صبي حل
اسير >> والله حمو عليك ضيق علم
رسلان>> انت تستعبط
اسير ضحك >> دروحك ماليه رقبه و طروح، تقول متجوز لكي اسبوع الخبر لي بعد سنة هضا شن دوته
رسلان>> كلام كبار ما لكش دخل بيه
اسير >> ربي يجوزني روان بسرعه بس وتنحل مشكلتي معاها
رسلان>> تو نحقك وانت لابس رقبه صيف وشتاء
اسير ضحك وعزق الدخان >> انقنهم عيت انساباتك هضوما خذو عقولنا
رسلان >> ومعانا ربيع 😂😂
اسير >> تحكي جد 😂
رسلان>> اه موضوعه قريب 😂😂
غير مازال دروحه يكابر وشخصية ومحقق
اسير >> خليه هكي لحد ما يطيح طيحتي وطيحتك
رسلان>> قلتها له😂 كل ما يحقها عيونه معش يسيبنها كان يرخي روحه بس ويطلعلي من جو التحقيقات لي يضايق العلم
اسير>> اصبر عليه شويه ويطلع 😂
كمل رسلان الحسابات وطلع هو واسير الي كان ساكنله
//
//
كانت سما فالحوش تحكي مع احمد
احمد >> الخميس اه موعد الزياره و سما من توا اقل من ١٠ دقايق اكثر من هكي ممنوع
سما >> حاضر حاضر فهمت
احمد>> حكيتي مع ميرا؟
سما >> لالا بس ح نحكي معاها بعدين ، باهي قتلك
احمد>> ايوه؟
سما >> ما قالولكش شي على حالاتها
احمد >> لالا ما حد قال شي
سما >> باه اخر سؤال
احمد >> بسرعه عندي شغل
سما >> مش قلتو ح تفرغو الكاميرات عشان تشوفو لو في حد كان يومها فالمنطقه لما كنا فالشقة
احمد >> اه بس ما ستفدنش شي مافيش ولا شي غريب لاحظناه
سما >> امتى درتوهن باه ليش ماقتلي
احمد>> عشان ماتقعديش تفكري وساكنتلي هكي ما قتلكش
سما>> خلاص هاه سكتت
صكرت سما على خشت رسلان للحوش
سما >> وحشتني
رسلان ابتسم >> هكي حنوقف الشغل ونقعد هنا ديما
سما >> عميمه دزت غدا لو تبي كنت بندير بس كلمتني وقالت لي حسبتكم
رسلان>> لالا تغديت مع اسير
سما >> حترقد ؟
رسلان>> نغير دبشي و نبيك في موضوع
سما >> شن فيه
رسلان>> لحظة بس
خش رسلان غير وانا كنت على تلفوني فالصاله جا جنبي و اتكى عالكنبه ، بحتت فيه
سما >> ارقد لو تعبان
رسلان >> نرقد هنا عادي ” وشير عليها”
سما مسكت يده >> تعال
جا رسلان عندها وحط راسه ورفع وجه وهي عيونها عليه >> شن بتحكي
رسلان>> قصة اسير وروان
سما>> اه شنصار ؟
حكالها رسلان على طلب اسير
سما>> حنكلم رندة نقوللها تقنعها تجيبها وتجي اساسا حتى انا نبي القصة تنحل روان متنكده وعميمه منى بدت تفطن لها
رسلان>> معناها بعد انوض نكلم اسير
سما >> خلاص يا روحي تريح
رسلان غمض عيونه>> راك اتعاركي معايا و تديريلي زي ما دارت روان الاسير انا مش حنرجي حنجيك من اول دقيقه
نزلت راسي وبسته >> م س ت ح ي ل
ضحك رسلان وعلى طول غفى
بعد ما رقد كلمت رندة وقتلها تعالن عندي انتي وسالمة و روان وحكيتلها انه اسير يبي يشوفها وهكي وقتلها ماتحسسش روان بشي، ورندة عشان في احتمال تشوف ربيع طبعا قالت لي باهي😂 وصكرت مني مشت تقنع في روان
//
//
عند البنات
روحت سالمة من الصيدلية و رنت على تيح
تيح >> روحتي
سالمة>> كيف خشيت
تيح >> بدري اليوم
سالمة>> تقول مش انت لي قايلي نروح بدري 😒
تيح ضحك >> نختبر فيك 😂
سالمة>> كنه صوتك؟
تيح >> كنه
سالمة>> تعبان؟ تحس في حاجه
تيح >> اهدي ما في شي
سالمة>> تيح اكيده
تيح>> تو كان نحس في حاجه عليش بنسكت
سالمة>> انت هكي اصلا مستحيل تقول لحد ما اطيح فالمستشفي
تيح >> سالمة خلاص عاد فاهم اني مريض
سالمة>> حبيبي انا نحكي عشاني انا مش حنقدر نتحمل لو صارتلك حاجه والله
تيح >> مش ح يسير شي انتي معش تفكري هكي بس
سالمة>> متأكده صوتك ما فيش شي
تيح >> متأكد يا روحي خلاص تريحي واعيه بدري اليوم
سالمة>> اه بنرقد
تيح>> بعد تنوضي رني عليا بنخطم على موسى و بعدها مروح للحوش
سالمة>> تمام
صكرت سالمة وهي مش مطمنه من صوت تيح بس غلبها النوم ورقدت
//
//
في العشية
جن عندي رندة و روان قبل المغرب بشويه واسير كان لوطا
سما>> سالمة وين ؟
رندة>> تخيلي راقده عند توا روحت تالفه من الصيدلية
سما >> وميرا قالت لي بنقعد مع موسى
رندة>> خبر 😂
سما >> روان نحكو نحن 🙄
روان>> فكني من الجو هدرزن نسمع اصلا قلت الرندة بنقعد بس هي اصرت
رندة>>نكد 😒 “بحتت فيا” متبيش تشربينا حاجه
سما>>تعالي مطول لسانك😂
خشيت انا ورندة درنا نسكافيه
رندة>> شنصار؟
سما >>نستنا في رسلان يرن عليا ، كويس انه عميمه مش قاعده عشان ما يقعدش احراج
رندة>> كيف ح اديري ؟
سما >> لما يجي اسير ح نقوللها تنزل ندبر اي لقطه
رندة>> قتلك باهي ربيع وين 🫣
سما >> من امس بايت برا عنده شغل شكله
رندة>> وحشني بكل
سما >> بتقلبن لي الحوش مواعيد 😂
رندة>> يعني ح يجي اليوم؟
سما >> كان جا ح يجي بعد العشرة
رندة>> حنقول معناها الاحمد يجينا متأخر
سما >> مصره يعني 😂
رندة>> جدا🥹❤️
خذيت السفرة وجينا جنب روان اللي كانت متنحه قعدنا نهدرزو وهي مرات ترد مرات تسكت ، شويه ورن رسلان بحتت في رندة وخذيت تلفوني وصبيت رديت عليه
رسلان>> اسير لوطا
سما >> تمام باهي
رسلان>> قتلك
سما>> نعمين
رسلان>> نحبك
سما >> مش وقته بكل متوتره تقول انا لي بننزل
رسلان ضحك>> باه انزلي قاعد لوطا انا
سما >> حناطه واو، بس حتى انا نحبك راه
صكرت منه وانا قلبي يدق لما نسمع صوته ، خذيت نفس وطلعت صبت رندة خشت للحمام عشان روان ما تشكش
سما>> روان تنزلي النبي للمربوعه لي لوطا
روان بحتت فيا واستغربت
سما >> رسلان خذا شحني لوطا قالي سيبته فالمربوعه ما فيش حد راه انزلي
روان>> تي انزلي انتي را يجي ربيع ولا عمك
سما>> ماقتلكش طحت على كراعي اليوم ومش قادره للدروج ورندة فالحمام بسرعه تلفوني بيطفا ورسلان ح يرن عليا شويه اخرى عشان قالي بنجيب عشا من برا
روان صبت >> الصبر بس عطيني محرمتي مرات يزرق حد
كرت محرمتها عزقتها على راسها ونزلت وطلعت رندة
رندة>> مشاء الله عالتأليف 😂
سما>>صح والله رسلان بيجيب عشا 😂
رندة>> ان شاء الله ما تفصلش بس
سما >> عادي مهم تحكي معاه وتفهم
//
//
فالمربوعه لوطا
اسير >> شنصار
رسلان>>لكي خمس دقايق واصل حكيت مليون كلمه
اسير >> تنتهي القصة هذي بس وديني كله نرده لكي
رسلان ضحك>>اهي نازله | انا ندخن برا اه
برمت طلعت و سمعت صوت الباب صكر عرفتها روان نزلت
خشت للمربوعه و مطبسه راسها ، اول ما خشت سحبها اسير وصكر الباب
روان مصدومه
اسير>> مش ح تطلعي من هنا الا وانتي فاهمه
روان>> انت طبيعي ؟ فاطن الروحك ! تي وين قاعد انت
اسير >> فالمربوعه 😂
روان>> مانبصرش وما نضحكش ، اطلق يدي واطلع را يجي رسلان
اسير ضحك >> رسلان يعرف
رفعت حاجبها >> والي فوق يعرفن صح!
اسير ابتسم وهز براسه>> هضا كله عشان نوصل فيك
روان>> باه اطلق يدي
اسير >> حنطلق بس ماتمشيش افهمي مني و بعدها ديري لي بديريه
بحتت فيه وسكتت ، سيب يدها و قعد متكي عالباب قدامها عشان ما تطلعش
مشت من جنبه عشان كانت متوتره وقعدت على حاشية الكرسي وماتبيش تبحت فيه وماتبيش تحس انه كل شي انتهى لانها كانت مصكره راسها وحاسه بشعور الخذلان ومش قادره تعطي فرصة ثانيه كانت تشوف في سيناريو تسييب باتها لها يتكرر
اسير كان مقابلها متكي عالباب طلع تلفونه من جيبه ومده لها
اسير >> خوذيه عندك خليه وفتشي كل شي فيه خليه اسبوع شهر سنة وردي على اي حد يرن
روان>> اسير مدخلنيش بتلفونك شن فيه انا دخلني بيلي صار
اسير>> اقسم بالله العظيم رنت عليا و رديت عليها ماعرفتهش من ، قعدت نمشي فالكلام عشان نبي نعرفها منو بس ! وبعد ما عرفتها من قتلها معش ترني وفوتيني ومن هضك اليوم معش رنت ، لما شافتني معاك فالجامعة ممكن غارت وجت بتخرب بس ، روان انا من اول يوم قتلك را انا مش ملائكة وكنت نعرف بنات بس والله ماعمري ما وعدت وحده بحاجه ولا ضحكت علي وحده كنت من الاول نوضحهلن اني مكسد وهنا بكيفهن وانا والله ما حكيت معاها هي الي رنت وبعد عرفتها من هزبتها على طول
روان >> لو جاك علي تذكره اللي شفته لما جيتني فجامعة وكان بس مصبي يسأل فيا عالقرايا ؟ لو جا وقالك رنيت على روان وردت عليا وحكيت معاها بغض النظر عن شنو الكلام بس ه تمشي الموضوع ؟ وبعدين سوا هي ولا غيرها انا مش فارق عندي ماضي بس انت ليش ترد عليها
اسير >> حنمشي ونقربعها على راسه “سكت شويه” وراسك برضو، ونعاود ونقولك والله ماكنت عارف رقمها و اقسم بالله ما حكيت مع وحده غيرك ولا نبي غيرك يا لوزا
روان>>مش وقت فرد عضلات، وما تقوليش لوزا
اسير قرب خطوه ونزل راسه عندها>> روان من اول ما حكيت معاك قتلك حياتي كيف كانت صح ومافيش بنت كملت معاها | ومش انا يلي تحكيلي على شي يوجعك ونديره من اول ما شفتك مافيش فبالي غيرك وفقلبي برضو ولله العظيم كنت بنجي ونحكي الاحمد عمك ونخطب رسمي بس انا عارفك خايفه من امك عشان موضوع قرايتك ما بيتش نخرب القصه
روان>> يعني مطلوب مني عادي نتحمل يرنن عليك وتحكي معاهن ونسكت عشان حياتك الخيال
اسير >>ما قلتش هكي انا بس غلطه ومش حتكرر واي حد يرن ولو رديت بالغلط حنقولك مع اني مش حنرد على حد بس مرات يكون رقم غريب يعني ونظطر نرد
روان رفعت راسها وبحتت فيه >> شن رايك تغير الشفرة بكل
اسير يبحت في عيونها>> حترضى يعني ؟
روان ارتبكت حطت يدها ورا رقبتها ونزلت عيونها>> نص ونص
اسير ابتسم ، طلع الشفرة من التلفون وكسرها قدامها و حطها فالطفاية
روان بجديه >> خليك على شفرتك الثانيه مش هذي مالك شي شاريها ماحلكش عاد درت بيها مواضيع
اسير>> لالا المدار متاعت شغل ماحد يعرفها ، قاعده معلوقه
روان>> خلاص اطلع
اسير>> عارفه انه ليا كم يوم ميت بدونك! خفت نخسرك ماكنتش نعرف انك هتقلبي هكي بعد تزعلي والله ما قدرت لا نرقد ولا نشتغل وانا مزعلك
فردة روحها وصبت ورفعت يدها قدامه >> مرة اخرى معش تزعلني
اسير مسك يدها وحط يده الثانيه ورا ظهرها>> مش حنقدر اصلا ، بعدين كنه وجك تعبان هكي
روان قلبها يدق مش قادره تفك روحها >> ماه منك مش انت بس يلي ما ترقدش
اسير >> بس وجهك سمح بالزعل بكل
روان تهربت من عيونه و تحاول تفك يدها >> خلاص خليني نركب عيب رسلان مرات يضايق
اسير >> نحس غير فيه 🙄😂 خليه
روان ضحكت ونزلت يدها منه وماقدرتش تحكي من كثر ما كان قريب منها
اسير رد مسك يدها>> كنه صوتك اختفى
روان توترت>> حول يدك خليني نطلع
اسير ابتسم عرفها متوتره >> نروح للحوش نرن عليكي
روان>> تمام
بحت اسير فعيونها وقرب وجها منها >> الواحد ما يبيش يغلط بس 🫢
روان فكت يده ويده الثانيه مازلت ورا ظهرها>> ماهو اطلع عشان ماتغلطش
اسير برم وفتح الباب وضحك>> خلاص اركبي فوق عشان الشيطان قاعد هنا وثانيه اخرى حندير حاجه مش مسؤول عليها
روان خبطت فيه >> كول كويس وجك تعبان ومعش ادخن لو سمحت
اسير >> نحبك
طلعت روان قدامه وركبت فوق وهو عيونه عليها لحد ما ركبت
– اسألني عنَ إنتهاز الفرص ، أُخبرك عن النظرِ إليك دون أنتباهك 💙.
//
خش رسلان >> قلنا خمس دقايق مش ساعة
اسير ضحك ومسكه من رقبته>> تذل فيا لكي كم صح
رسلان >> دروحكم اصالحتو 😂
اسير >> اطلع قدامي شربني قهوة مانبيش نتعبلك المدام
رسلان>> مش حنخليها اديرلك اصلا | خلينا نمشو بنجيبلها عشا هي والبنات
اسير >> على حسابي
رسلان>> طبعا امالا بندفع انا
اسير >> عليك حفلة هيه
//
//
ركبتلنا روان فوق مبتسمه عرفنا انه الجو تمام ، ومن فرحتها ما هزبتنش انا ورنده 😂
روان >> بس التمثيل عندكن رهيب بذات سما
رندة >> انا جايه عشان ربيع 😂 مش شوري بالباقي كله مخطط سما ورسلان
سما>> لو تحقي اسير كيف ساكن الرسلان اليوم قالي لو ما درتلش حل احتمال كنتي تلقيه عندك فالحوش
روان>> انحبه بكل ماكنتش متخيله انه كل شي كان ح ينتهي كنت مانبيش نسامحه لو ما دراش هكي وجا وشفته وضعفت قدام عيونه را كان الموضوع ح يطول بكل وكنت ناويه نقفل تلفوني شهور
رندة >> خلاص مش اصالحتو ، توا دوري
سما >> دورك فشنو
رندة>> نبي سيادة المحقق
سما >> رندة بلا فضايح را حد يفطنلك
رندة>> مش دايره شي بس لو جا لازم نشوفه
سما >> ربي يصبرني عليكن 😂
قعدنا نهدرزو ورسلان جابلنا عشا وطلع مع اسير ، شويه وسمعت صوت الباب بره عرفتها عميمه جت
سما>> بنات تنزلن تسلمن على عميمه؟كانت عند اختها كيف جت
رندة>> عادي
روان>> عابيه بتلقى ربيع
سما >> تهيالي هوا اللي جابها اصلا رسلان طلع مع اسير
رندة>> بحتن فيا باه شكلي كويس ؟
سما >> ع شن ناويه بزبط😂
رندة>> والله نبي نشوفه بس نظره بريئه😂
روان>> نعرفها انا النظره البريئه هذي 😂
رندة>> انتي كنك ركبتي من عند اسير مبسوطه ن شاء الله خير شن دارلك 😂
روان>> افضحيني باهي راك تنسي تقوليها قدام احمد بعدين فالسياره
رندة>> خلاص سكتت😂
سما >> ياربي الصداع انزلن قداميييي
نرلنا لوطا سلمنا على عميمه وقعمزنا حذاها ، وفعلا كان ربيع جايبها
زينب >> هدرزن ندير الربيع عشا ونجي
سما >> والله مانك مصبيه تو نصبي انا ورنده وخليك هدرزي مع روان
زينب>> قعمزي مع البنات جاياتك عيب غير مسكين من امس فشغل ربيع اكيده مش واكل شي لما يبات برا ما ياكلش
رندة>> لا والله تقعمزي تو نصبو ولا تحسبي فينا برانيات “خمسة لقاقه”
زينب >> لا والله كيف سارة انتن غير ما نبيش نتعبكن
سما >> مافيش تعب
صبيت وصبت ورايا رندة وسيبنا روان تهدرز جوها التهدريز مع الصبايا الكبار😂
سما>> لا تو نصبو مش برانيات “وضحكت”
رندة>> بطلي 🙄
سما >> مستحيل الجراءه😂
رندة>> فطنتيلي ؟ مش فاهمه كني 😂
سما >> تو بعد تحقيه بلكي تعرفي كنك ، خشي جيبي سفرة من جوا بس😂
درنا سندوتشات الربيع اكيد مش حنديرو عصبان يعني كويس طلع معانا سندوتشات 🙄
رندة>> ورس امك نشيلها انا
سما>> را تحقك عميمه فضيحه
رندة>> خليك هنا ما تخشيش لعند نجي نمدها له وبعد نجي نخشولهن مع بعضنا على اساس جا هوا خذاها منك
سما >> رندة كنك😂😂😂😂 عليك خبر
رندة>> بتساعديني ولا نهبد السفرة على راسك
سما >> خلاص عدي 😂 فالمربوعه تلقيه
طلعت رندة وانا نضحك مستحيل كيف منهاره عشان تشوفه بس 😂 ف عقلي يا مينتي على هالمربوعه من اسير الربيع
مشت رندة بسرعه ولما جت عند المربوعه وقفت شويه شمت ريحة الدخان عرفاته جوا، خذت نفس وخشت
رندة>> اظني هكي نردلك شويه من معروفك معايا
رفع ربيع راسه وبحت شور الباب واول ما شافها ابتسم ، صبا لعندها ومسك السفره وبحت فيها
ربيع>> معروف شنو بس | انتي درتيلي العشا؟
رندة>> على صار يعني وكيف ساعدتني ” وهزت راسها”اها انا لي درته
ربيع >> بس هضا شغلي مش معروف “حط السفرة”
رندة>> لو كان حد غيرك ما كنتش حنقعد كويسه لعند توا صدقني
ربيع صبا قدامها >> ممكن معش تفتحي السيرة كل ما تشوفيني تبطلي تشكريني وتحكي معايا عادي مش كل ما بنشوفك بتقوليلي شكرا و معروف وجميل
رندة هزت براسها>> خلاص كول عشان عميمه مبدري تفكر فيك 😂 ربيع جيعان وربيع ماياكلش فالشغل
ربيع ابتسم >> بس وين الوليمه هذي
رندة>> انا وسما شن ح يطلع معانا 😂
ربيع>> مدام فيها سما معناها كثر خيركن😂
رندة بحتت فيه >> صحة “وجت بتطلع”
ربيع >>ماحدش ضايقك فالجامعه ؟
رندة>> لالا ، اساسا ما نتواصلش مع حد من المحاضرة نطلع للبنات دغري ونروحو
ربيع >> احسن وما تعطيش رقمك الحد ، لا قروب واتساب ولا للجامعة لا صاحبتي ما فيش داعي
رندة>> يعني ما نديرش صحبات
ربيع>>لالا خليك بروحك مانبيكش اتعرفي على حد
رندة>> باه زملاء يعني
ربيع قرن حواجبه>> عشان نصكرلكم الجامعة بالشمع الاحمر
ما ردتش من جديته وهو يحكي و بتطلع مسك يدها برمت عليه وبحتت في يده
ربيع طلق يدها وتنحنح>> حنرن عليك بعدين وتردي
رندة هزت راسها زي البنت الشاطره
طلعت وربيع من اللخبطه نسى حتى ياكل😂🤦🏻♀️
– القدر جابك .. وأنا ممنونه للأقدار جداً💙.
على طلعت رندة خش رسلان طبس راسه”حبيبي المؤدب😌” و خش لقى ربيع متنح ، عزق المفتاح
رسلان>> خذت العقل معاها ولا شن
ربيع ضحك>> خليك فحالك
رسلان>> اسملله على هالمربوعه ياما حقت من حبّيبه
ربيع >> كيف
رسلان ضحك >> شي 😂 شنو بنخطبو قريب؟
ربيع>> خليني فحالي وماتحكيش الامك شي عشان ما تسكنليش انت عارفها علي سبله
رسلان بحت فيه>> شعرك بدا يطلع فيه الشيب
ربيع >> كنت مع اسير انت عاطيك شوية من حناطته
رسلان >> من الصبح وانا معاه
ربيع>> ناريتك جاي اطلع فيها عليا
رسلان>> كول كول عشا المدام 😍 وارخي روحك مش ح يفيدك المركز و التحقيقات والشخصية القوية ح تجي قدامها وتحس روحك هنا ونبات
ربيع >> بتطلع ولا كيف ؟
رسلان خذا مفاتيحه >> طالع 😂
//
//
روحن البنات فالليل و مسكت تلفوني ورنيت على ميرا عشان نقوللها على مشيتنا الماما
ميرا>> سما كل مره نقول اخر مره وتشوفي شن يسير
سما >> المره هذي بس ماتخلنيش نمشي بروحي
ميرا>> ياربيييي سيمو اخر مره هذي رغم اني عارفه شن ح يسير
سما >> خلاص معناها بعد بكرا احمد قال
ميرا>> تمام تمام
صكرت ميرا من سما و بطنها توجع فيها ماعرفتش من الخوف ولا شن صاير طلع موسى
ميرا >> سما تبيني نمشي
موسى>> اين كان قرارك انا معاك
ميرا بتسمت>> نعرف
موسى>> باه كنا وجك اصفر هكي ؟
ميرا>> مش عارف بطني توجع فيا ما عرفتش من شنو
موسى >> اكيده ما كليتيش شي
ميرا>> الصراحه كليت سندوتش بس
موسى >> كولي يابنتي مش كويس هكي
ميرا>> حنخش ناكل ، بتطلع انت
موسى>> اه بنكسد مع تيح فالاستراحه
ميرا>> عوامة لا اه
موسى ابتسم>> حاضر
ميرا>> ماطولش يا بيبي
موسى ضحك>> من غير ما توصي ، بس انتي شكلك ما تبينيش نمشي
ميرا مسكاته من عند تيشرته قرباته لها>> نبيك ديما جنبي ومعايا انا هكي تعودت وهكي نتريح
موسى ابتسم و قرب >> لا هكي مش ح نقدر نتحرك خطوه انا
ميرا >> مش زعلان مني صح
موسى سكتها شويه 🫢 ووخر
ميرا ضحكت
موسى>> الاجابه وصلت صح
ميرا >> نحبك
موسى >> يا بنت الناس انتي ما تبيش تخليني نطلع ولا شنو
ميرا >> خلاص عدي هاه سكتت😂
موسى >> اطلقي الماليه باه 😂
ميرا فكاته ووخرت مسح موسى على راسه وصبا
مشت ميرا للمطبخ وسيبت موسى ع اساس بيطلع خش وراها مسك يدها وبرمها له
ميرا >> بسم الله نحسابك طلعت
موسى قرب منها >> والله ما قدرت نطلع
ميرا >> عيب ياروحي انا كويسه وتيح يراجي فيك
موسى في عالم ثاني ما يسمعش فيها حتى شن تقول 😂
ميرا دفاته>> موسى عاد
موسى ابتسم >> نكمل ونمشي التيح
ميرا>> تي شن تكمل حول
موسى >> اشششش بس
//
//
عند رندة بعد ما روحت من عندي كانت ماسكه تلفونها و تستنى في رنة ربيع
سالمة>> تيح صوته مش صافي من الصبح
رندة>> كنه ؟
سالمة>> مش عارفه ، وبعد نضت حكيت معاه برضو حسيته تعبان
رندة>> بلكي برد بس
سالمة>> ممكن بس نرد عليه توا ما يردش
رندة>> اكيده جنب موسى
سالمة> باهي عالاقل يدز مسج
رندة>> بطلي هز بكراعك وترتيني
سالمة>> طالعه بكل 😒
طلعت سالمة و رندة تبحت فالتلفون على رنت ربيع
خذت نفس و من التوتر نست كيف يردو عالتلفون 😭😂😂 بعد ما قريب تكمل الرنة ردت
ربيع >> الو
رندة >> ا ل و
ربيع>> راقده ولا شنو ؟
رندة>> لالا واعيه ” في عقلها اي راقده نراجي فيك”
ربيع>> كيف حالك
رندة >> احم الحمدلله كويسه
ربيع >> وانا نمام والحمدلله ، نخش فالموضوع طول بدون عباطه😂
رندة >> اي موضوع “خمسه استعباط”
ربيع ضحك>> شوفي انا مش صغير ، يعني مش حنخش في موضوع وانا مش متأكد من روحي اني جدي عالاخر
رندة>> باه عادي تفهمني معاك وتحولي شخصية المحقق شويه على جنب 😂
ربيع ابتسم >> من لما شفتك اول مره ما رحتيش من بالي بس كنت متردد او في شي كان مخليني متردد ، قعدت نصادف فيك واجد وكل ما نشوفك نتأكد انه قلبي بدا يدق بس شخصية المحقق غالبتني وشغلي واخذ اكثر وقتي عشان هكي ماكنتش حاب انك تتعبي معايا بس قعدت انا اللي نتعب كل ما نشوفك ونتخيل انك ممكن تكوني الحد ثاني غيري لو تأخرت اكثر من هكي
رندة>> الشي لي مخليك متردد لي في بالي صح؟ يعني قصة خطفتي ؟
ربيع >> خلاص صكري الموضوع
رندة>> بس انا من اول يوم حكيتلك كل حاجه والدكاترة اكدو على كلامي ما فيش شي صار و هو كان خاطفني عشان يرضى غروره ليش ما صدقتنيش
ربيع>> رندة انتي كنتي مش بوعيك و الحقير هضا كان مغلول منك من يوم مسكته و حققت معاه وانا نشو فالحقد في عيونه ف متوقع منه اي شي كنت نبي نتأكد
رندة بصوت واطي كأنها منحرجه من الموضوع والسيرة هذي>> وتأكدت ؟
ربيع >> اه بس تصدقي انه ما يهمش ؟المهم انتي تكوني في حياتي، من يوم يلي خشيت للمستشفي وحققت معاك وانا نحس انك مسؤوليتي صح مر وقت طويل لحد ما شفتك مره ثانيه بس كنتي ديما تجي على بالي
رندة>> لو تبيني نكون في حياتك ما نبدوهش بقلة ثقه
ربيع >> ما قتلك شخصية المحقق غالبتني ولازم نحقق ونعرف كل حاجه عشان هكي قتلك ح تتعبي وعشان هكي كنت بعيد طول الفتره هذي مانبيش نظلمك بشخصيتي وشغلي وفرق العمر لي اكثر من عشر سنين، بس ما قدرتش بكل واليوم بعد شفتك وانتي قدامي لعنت الشيطان مية مره عشان ما نقربش منك 😂 تأكدت انه الموضوع معش يتحمل التأجيل
رندة حاولت تمسك فرحتها عشان ما تبانش انها طايحه رغم انه باين بكل 😂>> نعرف وهضا شغلك ، بس هو طلب واحد
ربيع>> اطلبي عيوني
رندة >> افصل من الشغل وقت تحكي معايا
ربيع ابتسم>> هو نحن مش ح نطولو ونحن نحكو عشان انا ناوي الجد و في اسرع وقت
رندة>> كيف يعني
ربيع>> يعني انا مش صغير وحوشي واتي و لقيت البنت لي نبيها
رندة>> بس انا وياك ما نعرفوش بعضنا
ربيع>> شهر كويس انه نعرفو بعضنا؟
رندة ضحكت>> كله بسرعه بسرعه
ربيع >> نقولك اليوم كويس انك روحتي طيبه و قدرت نمسك روحي تقوليلي بسرعه ما بسرعه
رندة تهربت من كلامه >>معناها الشهر بدا من اليوم ، شن بتحكيلي عليك
ربيع>> اول حاجه ح نقولها اني كذبت عليكي
رندة استغربت>> كذبة عليا في شنو؟
ربيع >> لما يوم التحقيق قتلك اني ما فتشتش تلفونك
رندة ضحكت>> يعني احساسي صح ؟
ربيع>> جاكتي عندك ف شن فيها لو قعدت صورتك عندي
رندة >> اي صورة عندك بس وقصدك تفرجت عليهن كلهن ؟
ربيع>> لالا عيب عاد نعرف انه البنات يحبن يصورن واكيده عندك صور صحبات ولا بنات عمك ومش متحجبات وانظر شن لابسات ، التلفون قعد معايا انا حتى بعد شلته قسم المعلوماتيه عشان ياخذو منه رسائل التهديد قعدت مصبي على راسه ما سيبتش لحظة، بس خشيت على البوم الكاميرا كانت صورتك اخر صورة صورتها من تلفوني وخليتها عندي
رندة ابتسمت على شخصيته وكيف انه يعرف ادق التفاصيل >> بس مش سمحه الصورة
ربيع>> لو الصورة هذي مش سمحه يبقى ما فيش صور سماح فالعالم
وقعد ربيع يحكي مع رندة وكانت بجد اول مره يفصل فيها من الشغل و يطلع من مود المحقق ربيع ويحكي على روحه هكي برا الشغل ورندة كانت في اسعد ايام حياتها 😂❤️
ربيع>> اول مره نطول هكي وانا معنديش شغل
رندة>> سهرتك
ربيع >> لا عادي متعود نمسك نقعد عالق
رندة>> الساعه كم ح تنوض
ربيع>> ١٠
رندة>> خلاص عندي جامعة بكرا تو نرن عليك خلي تلفونك عالي
ربيع>> ردبالك فالجامعة اه
رندة >> ربييع فهمت
ربيع ابتسم>> خلاص تصبحي علي خير
رندة>> قدامك الخير
صكرت رندة وهي مازالت مش مستوعبه انه ربيع كان يحكي معاها، صوته و كلامه واسلوبه وشخصيته وكل شي كان كل شويه يتكرر في دماغها غمضت عيونها وهي تفكر فيه❤️
//
//
في نفس الوقت هضا ، كانت سالمة ترن على تيح و ما يردش عليها مسكت تلفونها ورنت علي ميرا
ميرا>> ايوا
سالمة>> موسى فالحوش ؟
ميرا>> اه شن فيه
سالمة>> تيح معاه ولا كان معاه
ميرا>> شافه فالعشية تهيالي بس لكن مروح من مبدري موسى تي كنك شغلتيني
سالمة>> نرن عليه ما يردش علياااااا بكل
ميرا>> فجعتيني تي بلكي راقد ولا عنده حد من اصحابه شن فيها
سالمة>> مش عوايده يا ميرا وبعدين انا كنت نحكي معاه وصوته تعبان
ميرا>> تي باهي شن ندير نقول الموسى كلم تيح بيش يقصلي رقبتي ورقبتك
سالمة>> موسى يوم الدفع تيح قاله انه بيحكي معايا وسكت موسى ف اكيد يعرف يعني انه حكينا مع بعضنا مش غبي هو واساسا اكيد عارف انه نحكو من قبلها
ميرا >> هو موسى ما يغفلش علي شي😂 يعني نحكيله ؟
سالمة>> احكيله ما عنده ما بيدير وقوليلي
ميرا >> باهي
صكرت ميرا من سالمة ومشت الموسى كان فالدار ، جت جنبه فالسرير وقربته عنده حط تلفونه جنبه وبحت فيها وابتسم
ميرا>> تصدق انه تفكيرك قليل ادب
موسى ضحك >> شن درت انا 😂
ميرا >> بلا ابتسامات قليلة ادب باه
موسى جابها عنده >> باه شن تبي جنبي
ميرا >> بنسألك
موسى >> شنو؟
ميرا>> ماه بطل عشان نحكي
موسى وخر وحول شعرها من وجها >> احكي
ميرا>> المهم قتلك
موسى>> عيون القتلك
ميرا >> كنت مع تيح انت؟
موسى>> شفته مبدري و بعدها مشيت عندي شغل درته وروحت ليش؟
ميرا>> انت مش غبي صح 🙊
موسى رفع حاجبه>> شن السؤال هضا
ميرا>> قصدي ما نبيش نستعبط ونديرلك فيلم هندي انت عارف انه سالمة تحكي مع تيح
موسى >> ما فيش داعي تقولوها فقش قدامي 🙂 كنك ؟
ميرا>>ما شفت انت هاه نخاف نحكيلك
موسى>> من امتى تخافي مني ؟
ميرا>> مش نخاف منك بس ما نحبكش لما تعصب
موسى قربها منه>> ياستي احكي هاه كنه سي تيح
ميرا>> سالمة قالت لي انه صوته تعبان وبعدها ترن عليه ما يردش عليها من مبدري بكل
موسى استغرب لانه عارف تيح >> كذا وين تلفوني
وصبا جاب تلفون ورن عليه مرتين وما ردش عليه
ميرا>> شنو ؟
“وكانت سالمة ترن على ميرا ”
موسى >> ما يردش تو نشوف ولد سيده
رن علي ولد عم تيح وصكر وخش يجري للدار يلبس
ميرا>> موسى شن فيه ؟
موسى>> حالته خطيره قاعد فالمستشفي
ميرا>> كيف شن صارله
موسى>> ميرا مش فاهم ، الوقت متأخر تمشي لحوش خوخه ولا تقعدي بروحك عادي انا مرات نطول
ميرا>> عدي بس ما نعطلكش لو طولت تو نكلم احمد يشيلني
موسى >> تمام
ميرا>> ما تشغلنيش عليك رد عليا لما نرن
موسى خذا مفتاح السيارة >> تمام تمام
طلع موسى و سالمة ترن للمرة المليون وزادت انشغلت
ردت ميرا بس ما قالتلهش انه حالته خطيره قالتلها انه مريض و شالوه للمستشفي وبس
سالمة>> لما يرن عليكي موسى قوليلي على طول
ميرا>> توا كيف مشا
سالمة>> ياربي حاسه روحي مش عارفه شن ندير مش قادره نهدا
ميرا>> سالمة تيح مش اول مره يتعب والله موسى كم مره يطلع ويقولي تيح تعب
سالمة>> يارب يارب مش حنقدر نعيش لو صارتله حاجه
ميرا>> حولى الافكار هذينا من راسك بس و صبي معش تبكي اغسلي وجك و توضي للفجر قريب ياذن
سالمة>> تمام اي حاجه رني عليا مش ح نرقد انا
ميرا>> حاضر
//
//
بعد كم ساعه في المشتشفي
الدكتور >> المرة هذي كان لازم عملية ما قدرنش نسيطرو بدون عمليه
موسى>> هو توا كويس ؟
الدكتور >> درناله عمليه قسطرة كان لازم تندارله
وان شاء الله انه حيكون كويس ، المفروض يطلع بكرا بس هو تعبان وجسمه ضعيف ح يقعد ٤٨ ساعه تحت الملاحظة بعدها نشوف وضعه ونقررله خروج
موسى >> تمام يا دكتور نقدر نشوفه
الدكتور>> حاليا لا ، الصبح حنمر عليه ونقولك
كانت الساعه خمسة ونص الصبح بعد ما اطمن موسى عليه كان بات تيح و عيال عمه معاه خلاهم موسى يمشو ويطمنو باقي هله عشان طاح وسطهم فجأة وانشغلو عليه ، وقعد هو و سليم ولد عم تيح بس
موسى >> انا نازل لوطا شويه وجاي
سليم>> تمام
نزل لوطا و رن على ميرا
ميرا>> شنصار ؟
موسى>> داروله عمليه ووضعه تعبان
ميرا>> ماناضش؟
موسى>> لالا وما شفتش الدكتور قالي الصبح ممكن عال ٩ كان فتح عيونه نقدر نشوفه
ميرا>> شن نقول السالمة
موسى>>قوليلها عمليه بس طمنيها
ميرا>> انت مش مروح؟
موسى >> لالا لعند نشوفه ونطمن
ميرا>> ماه اليوم خميس حنمشو بعدين انا و سما لماما
موسى خبط على راسه>> تو نجي ساعه
ميرا>> لالا خليك حنمشي مع احمد
موسى >> اكيده
ميرا>> اكيده انت خليك مع تيح عالاقل تطمن عليه حرام ما عندش حد غيرك
موسى>> وانتي
ميرا>> هو حتى انا ماعنديش حد غيرك بس مسموحلك عشان مفتاح مريض بس
موسى ابتسم>> نحبك
ميرا >> حتى انا خلاص خليني نشوف سالمة
موسى >> باي
صكرت ميرا من موسى و طمنت سالمة بس سالمة ما كانتش مطمنه حتي ١٪ كل شوية ترن على امل انه تيح يرد عليها ومارقدتش وكملت اليوم كله واعيه
//
//
قبل الفجر بشوية عند احمد
ضحى >> تو انت مازلت ما رقدت و بكرا بتجيبلي البنات فالصبح ومازلت فالشغل شن الهلاك هضا
احمد >> شن ندير هضا شغلي
ضحى>> نعرف يا احمد بس هكي تهلك في روحك وبعدها ح تمرض و ح تجيني فالمستشفي ومش ح نخلي اي دكتور يشوفك عشان تستاهل
احمد ضحك >> نهون عليك
ضحى >> لا طبعا 😂 بس والله نحكي جد خلاص هيا روح ارقد وح نواعيك ٩ كويس
احمد صكر الملف>> اساسا كملت خلاص
ضحى >>خلاص مافيش داعي تلف على المكاتب وتنابش هضا وتحكي مع هضا للسيارة طول
احمد >> انتي تعالي اشتغلي معانا فالقسم وين الاوامر هذينا 😂 وبعدين خايفه عليا يعني
ضحى >> بلا سماطه
احمد >> بنفهم بس امتى بترخي روحك
ضحى >> احمد انت شن مفهومك الارخي روحك
ضحك احمد بصوت عالي >> مفهومي للكبار فقط مش ح نقدر نقوله لكي الا في دارنا
ضحى >> دارنا كيف ؟ من قالك بنقعد معاك في دار وحده
احمد >> اسمها نرقد معاك في دار وحده ، وه امالا وين بترقدي
ضحى بستعباط >> نجوزو وانت تقعد في حوشكم وانا في حوشنا
احمد >> انتي كان قدامي بس
ضحى >> شن ح ادير
احمد >> بتسمعي قلة ادب ؟
ضحى >> احمد توصل للحوش كلمني
احمد ضحك >> حاضر يا عصبيه😂
//
//
الساعه ١٠ الصبح قدام مستشفى الامراض النفسية
كان احمد جايب ميرا ويستنو عند الاستقبال في سما شويه وخشت سما ووراها رسلان
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية هلع)
