رواية هلع الفصل الثالث والعشرون 23 بقلم آية
رواية هلع الجزء الثالث والعشرون
رواية هلع البارت الثالث والعشرون
رواية هلع الحلقة الثالثة والعشرون
وصل الاسير مسج على تلفونه من رقم غريب ،مسك تلفونه وقرا المسج
روان>> اسير تسمع فيا
اسير رفع راسه وحط التلفون ف جيبه>> ها هه معاك معاك
روان>> في حاجه
اسير >> لا ، شنو وقت على محاضرتك؟
مع طلعت ميرا
روان>> اه اهي ميرا جت ح نمشو
اسير >> ردبالك تكملي دوريني
روان>> عالمحل اه 🌚
اسير >> تي وين الشخصية😂
روان>> اسير بلا حناطه
اسير ضحك>> باه هي خوذن بعضكن وما تصبنش هنا
روان >> حتى التصباي ممنوع
اسير>> اه يالوزا ممنوع
روان>>لوزا فعينك 🙄
اسير>> راه مش ح تمشي مش ح نعدي ، وما ترفعيليش حاجبك را ما تخوفيش😂
ميرا مصبيه لاوره شويه بمسافه عشان خاطر موسى 😂❤️ و تضحك عليهم مسكت يد روان>> خلاص ح نمشو
روان>> هيا حتى انت اطلع خلاص البنات كلهن هنا
اسير غمز >> شن تغاري
روان >> مانغارش بس اطلع
اسير يضحك>> لا واضحه ياعيون اسير 😂”و برم طلع”
برمت روان على ميرا>> نقولك حاجه؟
ميرا مدتلها كباية القهوة>> قولي
روان>> عارفه انقني نحبه خلاص معش فيها
ميرا ضحكت>> طاح الفاس فالراس ؟
روان>> طاح طاح😂
ميرا>> هكي اطمنت علينا كلنا مازال رندة😂
روان>> لا شاطره تو تجيبه😂😂😂
ميرا>> عارفه ضحكني بكل
روان >> تخيلي انه طول الوقت يخفف في دمه هك 😂
ميرا>> خلينا نخشو وقت هيا
روان>>هي
//
//
مرن كم يوم والاوضاع شويه مستقره
الا عند ماما اللي كانت على وضعها مافيش جديد تعبانه جسديا عشان ما كانتش تاكل ولا تشرب كانت عايشه في الاكتئاب ورافضة تطلع منه واحمد مازال ما قاللنش، وكنت انا حاسه انه في شي بس مش عارفه شن ندير خايفه نمشيلها وخايفه نشوفها من بعد اللي صار اخر مره
فالايام هذينا حكى تيح مع موسى، واتفق معاه عالدفع
و كنا نوتو نحن والبنات للدفع متاع سالمة وتيح❤️
//
//
عند رسلان فالشركة وكان اسير مخطم عليه
رسلان>> ياراجل تحكي لكي ساعة ما فهمتش شي
اسير >> ما انت مركز في ام الاوراق
رسلان>> امالا بنركز في وجك شن نبي فيه
اسير >> زمري
رسلان نزل الورقه>> احكي 🙂 هاه
اسير >> هذي المرة الثالثه نعاود نشفت ريقي
رسلان>> تو نجيبلك كباية اميه احكي بس
اسير >> المهم هضك اليوم مشيت نشوف فروان فالجامعه وانا نحكي معاها جاني مسج من رقم غريب بس اللي داز المسج مش غريب يعني حد يعرفني ونعرفه
رسلان >> لغز يعني مفروض نحله
اسير عزق الولاعه>> ياراجل خرفي من امتى الحناطه هذي ؟
رسلان >> كمل سكتت😂
اسير>> المهم 😒 خلاص المسج كان “اللي مصبي معاها هضا حد ذوقك ” ومش عارف شنو واضح انه مدزوز من بنت ما دورتش طلعت من الجامعة رنيت ما ردتش بعدها رنت عليا ورديت قعدت نمشي فيها فالكلام لعند ما عرفتها من طلعت وحده قديمه حاكي معاها من قبل فتره ناسي حتى شكلها اسمها رغد
رسلان>> تي باهي انا مافهمتش عليش تحكيلي فالموضوع
اسير >> ما يا سطل شافتني مع روان و عرفت انه في حاجه بينا وانا رغد كنت نمشي فيها بس خايفها تمشي تحكي الروان مع اني هزبتها وقتلها فوتيني ومعش ترني
رسلان>> شن بتحكيلها ؟ يعني انت ما كنتش تبيها حكيت معاها شهر ولا شهرين
اسير >> شهرين🚶 بس بتقطيع المهم يعني انتهت بسرعة و ماكانش في حاجه جديه
رسلان>> خلاص معناها عليش قالق حتى كان حكت ما عندها ما بتقول شن بتقوللها كنت نحكي مع اسير نضحكو علي بعضنا بعدين يا سيدي حتى كان روان عرفت وانت مثلا كنت تحب رغد ف مش من حقها تحاسبك علي ماضي
اسير >> والله مانعرف وانت شي ماتعرفش تقول حلول😒
رسلان>> ماعنديش خبره كيفك فالبنات عاد انت لي تعطينا حلول😂 المهم حطها فالحظر ومعش ترد عليها
اسير >> تو نحطك حتى انت فالحظر بالمره صاحب كيف قلتك لا تسمع كيف الناس لا تعرف تحل مشكلة🙄
رسلان>> بتخليني نكمل هالكم ورقة ونطلع ؟ ولا بتسكن؟
اسير >> ماعندي وين ساكن عند وجك طالع ، مستعجل بتمشي لسما 😍😂 “وطلع عند الباب ”
رسلان يعيط>> اقسم بالله تو يبانلك 😂 وين ماشي
اسير >> للمريخ ، خطاني تقول خاطبني
//
//
كنت فالحوش رسلان طالع وانا نحوس اذكرت انه مراد دزلي ومعش رنيت عليه، مسكت تلفوني ورنيت
مراد >> تي وين الغيبه هذي
سما >> رايفة علييييييكم بكل
مراد>> اللي يرايف يجي
سما >> لازم نجيكم ، كيف حالك
مراد>> بخير كلنا ، شنجو البطل لي عندك😂
سما >> مراد 😂
مراد >> ما قلنا شي 😂
سما >> كويس الحمدلله يكمل فيومه فالشغل
مراد>> تو في واحد يقعد عنده القمر و يعدي الشغل ما شغل 😂
سما >> اهو عاد شن تقول 😂
مراد >> المهم ما تبي شي انتي
سما >> سلامتك يا لوزا ، بس قتلك
مراد >> انعم؟
سما>> مازلت مصكر راسك😂
مراد >> اسطوانة امي ازح ، كنك عندك عروس ؟
سما >> الصراحه ما فيش حد فبالي بس لو تبي اندورلك
مراد>> عليك اللي صدقت
سما >> خرفي 😪
مراد>> تحكي هكي مع رسلان انتي ؟ ناريته نص يومه فالشركه😂😂
سما >> خطاني انعنك ما خطبت 😂
مراد >> والله انتي من جهه وامي من جهه
سما>> تصدق اني مرايفة على ايام زمان بكل ايام كنا ديما عندكم والدراما لي ندير فيها عشان نبات عندكم
مراد ضحك>> من صغرك ماتقدريش بدوني
سما >> سامط 😂
مراد >> ماتغير شي نفس ونحن صغار مازلتي ما كبرتيش فعيوني مش عشان درتي حوش تحسابي روحك كبيره 😂
سما>> والله الحوش هضا قاعده نعصد يوم غدا ينحرق يوم ننسى نغسل الدبش ويوم نحس انه الحوش حايس مانعرفش نضم 😭😂
مراد ضحك>> من يومك حوسه
سما >> خلاص مانعطلكش على شغلك ماتقطعش عليا
مراد>> المهم بيش تزرقن انتي و ميرا تبي حاجه دوريني اه
سما >> حاضر بدون ما تقول
صكرت من مراد و كسدت نزلت لوطا لقيت سارة ويزن
سما >> امتى جيتي ما سمعتش هرجت يزن
سارة>> كيف خشينا
سما >> نديرو قهوة مع بعضنا الساعه اربعه
علي خشت ربيع >> احسبوني
سارة>> نحسابك طلعت
ربيع>> بندوش و نطلع
سارة>> حاضر باه
سما >> عميمه مقيله ولا نحسبوها
سارة >> لالا راقده
خشينا انا وسارة للمطبخ
سارة>> شنجوك مع رسلان
سما >> نقولو تمام
سارة ضحكت>> حسيت 😂
سما >> كيف حسيتي😂
سارة>> اخر فترة انتو الاثنين كأنكم متعرفين على بعضكم جديد تقول دايرين علاقة😂 هو كيف يبحت فيك وانتي كيف كل شويه تدوري فيه
سما>> زارقة علينا 😂
سارة>> حتى ربيع هضك اليوم يبحت فيكم ويضحك 😂😂😂
سما >> عليك فضايح لازم نديرو كونترول😂
سارة حطت البكرج عالنار >> خلي كل شي نفس ما هو وعيشي الايام هذينا ما فيش اجمل منهن ماتركزيش اهم شي انتو الاثنين مبسوطين
سما >> الحمدلله هكي شويه شويه على قولتك كأنه باديين نتعرفو على بعضنا😂
على خشت رسلان >> من يتعرف على من
سما >> ياربي الفضول بس 😂
سارة>> يزن ما سمعكش شكله كان هضا جاك يجري
رسلان>> لالا ما حقيتش وانا خاش شكله مع باتي فالدار
سارة>> خل نعطي ربيع فنجانه “وطلعت ”
قرب رسلان مني >> كنك كل يوم تزيدي سماحه
سما>> وانت كنك ما تبعدش را يخش باتك ولا ربيع
رسلان>> خليهم يخشو يتفرجو عرض مباشر😂
سما ضحكت>> ليش طولت ؟
رسلان>> رايفتي عليا
هزيت براسي
رسلان>> عادي نشربو قهوتنا فوق ❤️
سما >> سامط 😂 نحسبك
رسلان مسكني وقربني عنده>> بنركب نرقد تالف بكل واعيني عالمغرب
كنت نبحت في عيونه >> حاضر ، بس قتلك
رسلان>> عيون القتلك
سما >> نطلعو بعدين
رسلان>> وين
سما >> بنشري لبسه الدفع سالمة، ولا بتطلع مع اسير كالعادة
رسلان>> انتي فيه موال في راسك قوليه
سما >> نحس معش قعدت نشوف فيك 😔فالصبح شغل و مرات تروح العصر و ترقد اتنوض تطلع مع اسير و اصحابك
رسلان نزل راسه لوجي وكان يحكيلي بصوت واطي >> انتي اللي تبيه نديره تبي نقدم حتى استقالتي توا حاضر بس نبرة الزعل هذي ما نبيش نسمعها بكل
سما ابتسمت>> ما قلتش هكي انا بس بنشوفك بس ،ووخر را يخش ربيع يلبسنا قضية اداب 😂
رسلان >> ياستي الله ياخذ اسير ” اسير انا شكو” 😂
معش حنشوفه لعند ما انتي تملي مني ، وكلا ربيع ياما شايف من قضايا ما دوريش😂
رفعت روحي ووصلت فيه>> يعني ح نطلعو بعدين
رسلان>> نطلعو بعدين و نطلعو بكرا وامتى ما تبي” وباسني”
سما ابتسمت >> لسانك يسكت فيا بس نحبك
رسلان ضحك >> عارفك ناويه من اول ما خشيت 😂
سما >> بس مش تضحك عليا وتمشيني بكلمتين
رسلان>> وعد “ومدلي يده”
مديتله يدي >> وعد ، خلاص عدي يابيبي ارقد
رسلان>> ناعليا ماتنسيش تواعيني
سما >> شويه وح نركبلك
//
//
ثاني يوم كنا فحوش جدي ، نوتو في حاجة دفع سالمة
فالليل قعمزنا بعد كملنا ونهدرزو
رندة>> شن اخبار ربيع
سما>> غارق فالشغل نادر ما نشوفو فيه
رندة >> اوووف معش وصلت فيه بكل
سالمة>> اهمدي
رندة >> اش😒
على رنت تلفون روان كان رقم غريب
ميرا>> ردي ولا حطي صامت صدعتيني 🙄
روان>> رقم غريب
سما >> ردي في ارقام غريبه يرنن توا اكيد حد يعرفك
فصل الخط وجا الروان مسج ” نبيك ضروري فموضوع يخص اسير”
قبل ما تكمل المسج رد الرقم رن اخرى وصبت من جنب البنات وردت ، جاها صوت بنت استغربت
روان>> منو
البنت>> مش ح نكثر كلام بس ما نبيكش تطيحي في دوامه زي اللي طحت فيها ، اسير مش جدي في اي علاقة يخش فيها
روان>> تي غير لحظة بس انتي من ؟ و كيف اصلا جبتي رقمي و شن اللي تقولي فيه
البنت>> اانا معاك في نفس الجامعة مش صعب نجيب رقمك ، المهم هضا كلامي وقلته لكي وعشان تصدقي مش اسير كان عندك فالجامعه من كم يوم وشفتيه ؟ فنفس اليوم فالليل رد عليا وحكى معايا
صكرت الخط و روان مصدومه ! مش مستوعبه وعلشان هي متعوده عالخذلان من وهي طفله ف على طول صدقت ودزت الاسير رسالة ” بعد تفضى كلمني”
دزت المسج وجت جنب البنات وما حبتش تحكيلهن شي
على خشت موسى >> امي جوا ؟
سالمة>> اه مع جديده
موسى >> ما تبو شي البكرا
سالمة>> لالا كله واتي
ميرا>> انا نبي🙊
موسى>> عارفك شن تبي ولا من توا 😪
ميرا>> اووووووووف 😩
خش موسى
سالمة>> يعني مش حتباتي 😭
ميرا>> شفتي الجواب قدامك خمس دقايق وح يطلع يقولي هيا
سالمة>> وانتي
سما >> حنجيك بكرا بدري
رندة بحتت فسالمة>> مش حيقعدلك الا اختك 🙄😂
شوية وطلع موسى بميرا وجا رسلان خذا سما
وخشت روان وجنبها رنده يهدرزن على رنت اسير ، ركبت رنده فوق وسيبتها ترد عليه
//
//
عند روان اللي ردت على اسير وبدون مقدمات سألاته من البنت لي رد عليها وحكى معايا يوم ما جاها فجامعة
اسير >> ماتصغريش عقلك واسمعيني
روان>> انا ما صغرتش عقلي وقفلت تلفوني وقعدت نحكي بالالغاز جيتك وواجهتك وسألتك ونبيك تجاوبني ممكن تعطيني اجابه؟
اسير >> باهي ممكن تهدي
روان>> اسير ما تحرقش اعصابي وجاوبني
اسير >> كلمتها اه
روان بهدوء>> وشن حكيت
اسير >> والله العظيم ما حكيت حاجه هي اللي رنت ورديت عادي وكلام كله عادي
روان>> اللهم طولك ياروح ممكن تجاوب بدون لف ودوران؟
اسير >> لما جيتك فجامعة شافتني معاك دزتلي مسج وقتها تذكري لما قلتيلي كنك ؟ مش عارف كيف صار الموضوع ورنت عليا!
روان>> يعني بعد ما قتلي نحبك ! 😂 قول والله
اسير >> روان اسمعيني بس وخليني نفهمك و بلا ضحك
روان>> اول ما حكيت معاك قتلك اسير ما نبيش نتعلق بحد و يغدر بيا صح ؟ بس درت كل شي عكس اللي قلته لكي ، دمرت اي ثقه كنت حاطتها فيك
اسير >> روان ازح عطيني فرصة نحكي قبل ماتفسري الموضوع كيف ماتبي
روان>> اسير انا معش نبي نعرفك ، كيفك كيف بابا كيف اي حد اطلعو من حياتي ومعش ترد عدي كلم ولا هدرز دير لي تبي اديره طلعني من راسك
صكرت روان الخط و قعدت تبكي !
مش بالساهل لقت اسير ومش بالساهل حباته وخششاته حياتها حطت الثقة لي كانت محولتها من حياتها كلها فيه ، بس بموقف بسيط انهدم كل شي …ماكانتش فاهمه هي شن تحس بالزبط بس الحاجه الوحيده لي فاهمتها انه كل شي ادمر
//
//
سما >> وين ماشي
رسلان>> مش عارف رن عليا اسير مافهمتش كنه
سما >> باهي ما اطولش
رسلان>> بترقدي ؟
سما >> بنوتي حاجتي ونرقد بكرا بنمشي بدري
رسلان>> حاضر، باه راجيني مش مطول انا نشوفه ونجي
سما >> لولا اني عارفه اسير ما يرنش عليك الا وهو في حاجه يعني كان هضا را قتلك مافيش مشي 🥲
رسلان ضحك>> راجيني
سما >> يكمل المسلسل نرقد خليك سريع😂
خذا تلفونه ونزل
//
//
صكر اسير من روان وهو يسب ويلعن صكر المحل على تدريسة رسلان
رسلان>> كنك مصكر بدري كيف صار
اسير>> وراس امك فوتني
رسلان>> ان شاء الله خير ران عليا نجيك وتقولي فوتني 😂
اسير ركب فالسياره نزل رسلان من سيارته وركب جنب اسير
اسير >> انت من امتي تعرفني ؟
رسلان>> من عرم سنين لدرجة معش قعدت نحسب😂
اسير>> عمرك شفتني جدي مع بنت غير روان
رسلان>> تي اوكي قولي القصة فيها روان ما روان
اسير >> جاوبني بس
رسلان>> لا عمرك ما قعدت عاقل الا معاها اصلا
اسير >> وخربت كل حاجه تخيل ! مش حنقدر نردها
رسلان>> تي احكي ازف شن فيه
اسير >> والله ما نعرف شن صار ولا كيف صار بس خربت امها بكل ! ما سمعتش صوتها كيف تحكي ولا الكلام لي تقول فيه وتضحك ع اساس مش هامني وهي محروقه عارف انها صكرت وقعدت تبكي عشاني انا اللي مانسوش شي
رسلان يبحت في اسير ومش فاهم شي بس كان اول مره يشوف اسير هكي
رسلان>> عالقصة لي حكيتها ليا هضك اليوم
اسير >> اه طلعت فرخة الحرام مكلمتها و روان صدقت بسرعه
رسلان>> صدقني تو تهدا وتفهم ، عادي تصير الغيره وبعدين مفروض تفرح هضا دليل انها تحبك و تغار 😂
اسير >> رسلان بلا سفتره😒
رسلان>> نوصلك باهي
اسير>> لالا حنسوق بشويه مش ح ننتحر يعني
رسلان ضحك>> بعد تهدا دورني
اسير >> تمام
رسلان>>مروح للحوش
اسير >> كنك تقول قاري فاتحتي تي خطاني ياراجل
نفخ الدخان ونزل رسلان السيارته وهو يضحك و اسير علق وطلع طول
//
//
ثاني يوم
رندة >> تي كيف مش ماشيه
روان>> بالله عليكي والله ما صدقت قنعت ماما اني مريضه شويه
رندة>> باهي فهميني كنك بس عليش باكية
روان>> بعدين تو نحكيلك مش توا
رندة>> اسير صح !
روان>> خلاص بعدين اطلعي موسى برا
طلعت رندة بروحها للسيارة برمت ميرا عليها
ميرا>> وين روان
رندة >> مريضه
موسى>> كنها نشيلها مستشفى
رندة>> لالا مزكومة بس قالت تو راسي يصدع مش ح نستوعب شي
ميرا بحتت في رندة مش مصدقه ، رندة غمزتلها انه تسكت عشان موسى
وصلهن ونزلت رندة ، مسك موسى ميرا من يدها قبل ما تنزل
موسى>> انحبك
ميرا ابتسمت >> حتى انا وما اطولش اه بنروحو على حوش جدي عشان نساعدو سالمة واكيد سما ماشيه توا
موسى>> حاضر و رد بالك اه
ميرا>> فهمت والله
موسى>> تبي حاجه؟
ميرا>> نبيك انت
موسى ضحك>> خلاص تعالي نروحو
ميرا>> المشكله محاضره مهمه بس
موسى >> مش ح نطول عليك
صكرت ميرا الباب ومشت شور رندة وهي تضحك
رندة>> العشق الممنوع عالصبح
ميرا>> نحبه بكل
رندة>> سبحان مغير الاحوال كل شي فيكي تغير عشانه
ميرا>> فعلا ومستعده نغير اي شي عشانه ، مهم قوليلي كنها روان
رندة>> ما فهمتش كنها انا امس رقدت فوق وهي لوطا عشان بتكلم اسير وهكي خليتها براحتها اليوم ناضت شكلها باكيه و حالتها حاله
ميرا بحتت شور الكافيتيريا >> مش هضا اسير
رندة>> جاي شورنا
قرب منهن اسير>> صباح الخير
رندة>> صباح النور
ميرا عشان ما تقربعش على راسها من موسى>> صباح النور ، قتلك بنجيب اميه انا
رندة>> اطلبيلي حاجه نشربها لاحقتك
مشت ميرا وبحت اسير في رندة>> سامحيني بس معش عرفت كيف نوصل الروان
رندة>> متعاركين صح
اسير هز براسه
رندة>> كانت تبكي و ما جتش اليوم اصلا
اسير تنهد وطلع دخانه>> معش عرفت كيف نوصل فيها مصكره تلفونها من امس
رندة>> روان لما اتنرفز تقعد بروحها لحد ما تهدا
اسير >> مش ح نقدر نخليها والله
رندة>> باهي شن صاير انا مش فاهمه
اسير >> تحسابني نخون فيها ولا نلعب عليها والله ما فاهم الله بس مانبيش غيرها من امس ما قدرتش نرقد نراجي فالصبح يصبح عشان نجي ونشوفها
رندة >> والله لو قدرت ندير اي حاجه ح نديرها اهم شي انه انت مش غلطان وصدقني روان ح ترضى تاخذ وقتها بس
اسير >> والله ما درت حاجه بقصد بس مش عارف ” ولع الدخان”
رندة>> خلاص خليني نمشي لميرا وان شاء الله خير
طلع اسير و خشت رندة الميرا
ميرا>> شنصار؟
رندة>> وجعني 🥲 شكله مش راقد بكل من امس وتفكيره متلخبط مفهمتش منه شي
ميرا بحتت فساعه>> المحاضرة بدت صبي امشي الكليتك حتى انا بنمشي
رندة>> خلاص تمام اطلعي بدري عشان ما نطولوش
ميرا>> اه قلت الموسى ما يطولش نكملو ونطلعو طول
رندة>> تمام
//
//
عند سالمة
سما >> كل شي واتي صح ؟
سالمة >> اه خلاص
سما>> احمد وين
سالمة>> كان هنا وطلع
سما>> بنطلع نشوفه
مشت سما وكانت تسمع في احمد يحكي بالتلفون و عاطيها بظهره ومصبي عند الباب
احمد >> مش ح نحكيلهن شي و ردبالك تحكي حاجه
ضحى>> احمد را امهن وضعها كل يوم يسوء انت قوللهن مرات يبن يشوفنها
احمد >> باهي حاضر بس مش اليوم
ضحى>> راه كان رنت عليا سما مش ح نعرف ندس عليها
احمد>> فهمت تمام خلي حوسة اليوم تفض و نحكيلهن
ضحى >> خلاص تمام
احمد>> انتي وين ؟
ضحى >> روحت فالحوش
احمد >> تمام نكمل ونرن عليك
ضحى>> عقبالك
احمد>> عقبالنا يعني😂❤️
ضحى ضحكت>> باي
صكر احمد وانا عرفت انه يحكي مع ضحى وعرفت انه في حاجه شورنا بس مافهمتش عشان ما كنتش نسمع في ضحى شن تقول
تنحنحت عشان يفطنلي ، برم عليا
سما >> ماتقوليش ما فيش شي
احمد عرف اني سمعت >> حنفهمك بعدين انتي وميرا
سما >>يعني في حاجه
احمد >> ما تشغليش بالك مش حاجه خطيره
سما >> باهي مافيش جديد؟
احمد >> شن دايره في ربيع انتي 🙄
سما >> كل يوم نسأل فيه وكل يوم يقولي لو في جديد حنقولك
احمد>> معناها مافيش جديد ولو في حنقولك
سما >> اوفففف ، باهي شن الجديد عندك
احمد ضحك>> بنت 😂
سما >> فرحنا وديرلنا دفع باه🙊
احمد>> عدي عندك دفع اليوم انا ساهل
سما >> خليك هكي لعند تريح منك
احمد>> من قالك بنخليها تريح
سما>> ايوه هضا الكلام💃🏻😂
على خشت رندة وميرا من الجامعة، مشت رندة على طول عند روان لي كانت في دارها وماطلعتش وحكتلها على جيت اسير
روان>> معش تحكيلي عليه
رندة>> ما قلتش شي بس قتلك انه جا و مش راقد والله وواضح انه زعلان
روان>> يدير القصة ويزعل
رندة>> باهي شن صار
خذت روان نفس وحكت الرندة يلي صار
رندة>> مش من جدك والله ! قصدي افهمي منه به
روان>> مجرد ما حكى معاها ورد عليها ونحن ع اساس مرتبطين ف خليه يطلع من راسي
رندة>> تي باهي بلكي هي تألف بلكي المكالمه كانت قطاف افهمي بس
روان>> رندة بالله عليك معش بنسمع شي
رندة>> خلاص هاه سكتت🥲
ممكن تحسو ان روان اوڤر ولا كبرت الموضوع بس الخذلان لي عاشاته من باتها ما كانش ساهل وآثر علي كل حياتها و بصعوبه عاشت معاه ، ماكانتش حابه تجرب الشعور مره اخرى وخصوصا من اكثر شخص وثقت فيه
//
//
في العشية كنا كل وحده ادير في حاجه و سالمه تبرم
ومتوتره
سما >> اهم جو راه
سالمة>> رسلان ماجش
سما>> كلهم مسيبن الشركة اليوم قعد هوا مسكين هلكتو الراجل 🙄😂
سالمة>> اسمحيلنا اليوم بس 😂
ميرا >> مراد جا نجك ليا رايفت عليه
سما >> اكيد موسى مكلمه
ميرا>> اه
رندة>> وموسى يعرف انك تقولي نجك ليا ورايفت عليه؟😂
ميرا>> لا طبعا وابرمي عالقهوه را تفور😂
حطينا القهوة و خش احمد شالها و كانو الرجاله يتفقو عالشروط مع بعضهم وكان كلام معتاد مافيش جديد
سما >> روان عاد افرديها
روان>> خلوني فحالي
سما >> حتحقك عميمه منى هكي تنشغل عليك
روان>> انتو ما تركزوش معايا بس عشان ماتفطنش
سما >> عناد 😪
سمعنا صوت الرجاله طلعو
سالمة>> كلمو احمد نطلع معاه الحاجات
سما>> تو اناديه من السقيفه
طلعت عند السقيفه وجاني مراد كان اقرب واحد
سما >> عقبال دفعك
مراد >> عليك موضوع😂 شن تبي طالعه؟
سما >> نادي احمد يشيل موال الرداده
مراد>> عليك سريب تو ضروري القربج هضا
سما >> قربج اه تو نحقك وانت تشيل فيه 😂
مراد >> تحبن الجو هضا طبعا 😂 بس وين السماحه هذي
سما>>اطلع يا بايخ
طلع كلم احمد وعدو الرجالة بعد ما اتفقو على كل شي ومشت كل حاجه تمام
خشت روان تغير في دبشها و سالمه ركبت بتحكي مع تيح ❤️ و رندة كانت ترد فالحوسه مع عميمه منى و امها ، وجديده فالدار يهدرز معاها عمو عاشور
كنا فالجنان انا و ميرا بعد ما نادا علينا عمو احمد وكان موسى ومراد مصبيين فالجنان يهدرزو وقريبين منا شويه
احمد >> اسمعن اه مش كل ما نحكي حاجه بتمرضن و تتعبن
ميرا>> شن فيه؟ عرفتو حاجه على بابا
احمد>>خرفي 😪
سما>> احميدا احكي النبي بلا مقدمات ماعنده ما بيسيرلنا
وقف موسى كلام و قرب منه و مراد وراه
احمد>> امكن تعبانه شويه الفتره هذي ، ضحى قالت لي انه لها فتره تعبانه كنت نحسابه زي كل مره تنتكس و ترد بس مش الموضوع المره هذي انها رافضه تاكل و ضحى كل يوم تقولي لازم تقول للبنات مرات يبن يشوفن امهن ومرات لو يزورنها اتحسن حالتها وتاكل
ميرا بحتت في موسى >> بالنسبة ليا انا من بعد اخر مره هي بعظمة لسانها قالت اعتبرن ما عندكنش ام هي تخلت عنا من سنتين وتوا تبينا نمشولها
سما >> ميرا ! امك مش بعقلها بتحاسبيها على كلامها
ميرا صبت جنب موسى >> انا بنروح
موسى غمض عيونه>> البسي نراجي فيك
كان الباب مردود خش رسلان لي كان جاي يروح بيا
سما>> شوفلي اقرب موعد بنمشيلها وتو نقنع ميرا
مراد >> سما شفتي اخر مره شن صارلك
سما >> مانبيش نندم يا مراد بندير اللي نقدر عليه كله
قرب رسلان وجا وين ما نحن مصبيين >> السلام عليكم
احمد >> وعليكم السلام، اهو راجلك جا احكيله و هو يشيلك
مراد وموسى>> وعليكم السلام
سما >> قول الضحى بس
احمد >> مش تقول قلتي اسمها واجد😒😂 الدنيا كلها مصبيه
موسى >> تي قولولنا شن فيه😂
رسلان بحت فيا >> كنكم؟
سما >> تو نفهمك بعدين
رسلان سكت وهز براسه ، مراد بحت فيا وضحك
مش وقت سماطته 😂 بس بحتت في رسلان كان مرفع حاجبه شريني را عليش طالعه حذا مراد
بس ما دورتش خشيت من حذاهم سيبتهم يهدرزو
سما >> ميرا ماتصكريش راسك
ميرا >> سما راسي دايخ خليني نخش نسلم على خوخه تو نحكو بعدين
سما >> حتى انا بنسلم عليها 😒 بنروح رسلان جا
خشينا سلمنا على خوخه وطلعنا
سالمة>> هاكي عشاكم
سما >>كنه ميرا واجد وانا شويه😒😪
سالمه>> ميرا توصيه عشان موسى 😂ماما حطتله
سما >> ايييوه 😂😂 كلمتي تيح؟
سالمة>> اه عالسريع كانو عيال عمه عنده قالي شويه تو يكلمني
سما >> خلاص باي
طلعت ميرا هي وموسى
سما >> رسلان طلع؟
مراد>> اه البطل طلع😂
سما >> سامط 😂😂
مراد >> ماتبي شي ناقصتك حاجه؟
سما>> سلامتك يالوزا باي
طلعت للسيارة وفالطريق قعدت نحكي الرسلان شن صار وشن قاللنا احمد على ماما
درسنا قدام الحوش التفت عليا
رسلان>> سيمو لو تبي تمشي انا حنشيلك حاضر بس انا مش ضامن انك اتحملي ومش ح نقدر كل مره نشوفك تعبانه ومريضه واطيحي قدامي
سما >> رسلان افهمني ، مانبيش نحس اني مقصره نبي ندير كل شي نقدر عليه كل فرصة لازم نستغلها لو كان فيه امل حتى ١ ٪ انه ماما ممكن ترد
رسلان>> لو توعديني انك تكوني قويه حاضر
سما>> انت حتكون معايا صح؟
رسلان>> صح
سما>> معناها مش ح يسير شي
رسلان ابتسم>> شن يبي مراد جاي 😒
سما>> انتهينا من قصة ليش طالعه بدون حجاب وقعدت نلبس فيه و سكرناها القصة ، وبدينا في موضوع كنك طالعه من الاساس
رسلان>> ما حكيتش عليك سألت كنه جاي
سما >> مانبوش ننزلو من السيارة نحن؟😂
رسلان>> سما 🙄
سما >> ما صاحب الشباب عاد اكيده بيعزموه
رسلان >> كنا مصبي فوق راسك وهو يحكي
سما فتحت باب السيارة>> العشا ح يبرد انزل تعشا وما تصغرش عقلك 😪
لحقني رسلان وصكر الباب >> انا اللي نصغر فعقلي اه😒
خشيت للحوش و مشيت نغير في دبشي وانا دماغي يفكر في ماما بكل ، كل ما نحاول نكون كويسه و بخير
تطلع حاجه جديده تلخبط كل شي في حياتي
كنت واقفه عند الدولاب و عقلي مش معايا وصوت افكاري قريب يطلعن من دماغي على خشت رسلان للدار
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية هلع)
