رواية نوح الفصل الثاني 2 بقلم أمنية الجزار
رواية نوح الجزء الثاني
رواية نوح البارت الثاني
رواية نوح الحلقة الثانية
_ أنا باخد مخد.رات يا بابا
بصتله بصدمة مخدرات إيه اللي بيتكلم عليها ؟ حاولت أخرج صوتي طبيعي لكنه خرج مهزوز خايف
_ لو بتقول كدا علشان متتعاقبش على كلامك مع والدتك تبقى هتتعاقب مرتين علشان….
قاطع كلامي وبصلي وابتسم وفيه دموع ظهرت في عيونه
_ أنا فيه في دمي مخدرات يا بابا مش بكذب
_ بطل كذب يا نوح
دموعه نزلت وهنا اتأكدت أنه فعلًا مش بيكذب
_ والله مش بكذب
فضلت باصصله بصدمة من عملته، وخوف عليه وخوف على بحر والأولاد من الخبر اتكلمت بعد صمت دام مش عارف قد ايه بالظبط.
_ من إمتى وأنت كدا ؟
اتنهد ومسح دموعه وبدأ يحكي
_ من كام شهر اتعرفت على شاب معايا في الشغل قرب مني وبقينا شبه أصحاب بعدها بقيت اخده معايا وأنا رايح أقابل معاذ وإبراهيم يعني يكون صاحبنا الرابع وكنت بحاول أصلّحه يعني يصلي معانا ويبطل سجاير وخلافه
معاذ وإبراهيم نصحوني ابعد عنه لأنه مش ناوي يبعد عن اللي هو فيه دا غير إننا لاحظنا تصرفاته مش طبيعية ودايمًا بحسه مغيب عن الواقع لكن رغم كدا مسمعتش من صحابي وفضلت معاه لحد من شهرين تقريبًا بقى يُصِر يعزمني على حاجة أشربها عصير أو شاي أي حاجة من اسبوعين بدأت أحس بصداع ودوخه في الأول مهتمتش لكن بعد كدا معاذ قالي لازم أكشف بالفعل رحت للدكتور من يومين، اللي طلب مني تحليل والنتيجة ظهرت امبارح وقالي إن فيه نسبه مخدرات في دمي لكنها مش كبيرة لما عرفت مكنتش عارف أعمل إيه ولا هعرفكوا إزاي لحد ما حصل اللي حصل مع ماما انهاردة كان بسبب إني مأخدتش الحباية اللي بتتحط في العصير اتعصبت عليها هي، حتى أنا ساكت دلوقتي لكن حاسس دماغي هتنفجر
سبحان من مخليني هادي دلوقتي والله
كان بيحكي وهو بيعيط زي ما يكون عنده عشر سنين لسه قربت منه اخدته في حضني وحاولت أهديه
بِعد عني بعد فترة واتكلم وهو بيمسح دموعه
_ أنا هبعد فترة على ما السم دا يخرج من جسمي وبعدين هرجع بس خلي ماما تسامحني
قومت وقفت ووقفته معايا _ مش هتبعد عن عيني يا نوح وماما يا أخويا قلباها مناحه هناك وعايزة نوح هاتلي نوح
كملت بغضب مصطنع _ خايفه عليك حتى وأنت شحط كبير على إيه يعني
ضحك _ أعترف إنك بتغير مني يا رحيم كمل كلامه بهدوء وحزن_ بس حتى بعد اللي قولته لسه بتحبني ؟
فهمت قصده ورديت عليه وأنا بحط ايدي على خده
_ بتحبك لسه؛ علشان أنت حته منها يا نوح، وبعدين هي أخدت حقها لما سلمت على وشك
ضحك بصوت عالي وهو بيحط ايده على خده وبعدها اتكلم
_ مين يصدق مضربتنيش وأنا عيل تضربني وأنا راجل والله عيب بس أنا استاهل أكتر من كدا والله
بعد وقت كنا وصلنا قدام البيت بابا بيشجعني أدخل وأنا خايف
مش هقدر أشوفها بعد ما صوتي علي عليها ولا هعرف أقولها السبب فوقت من أفكاري على صوت بابا وهو بينادي عليها وأنا واقف قدام باب البيت بره خايف أدخل
_ بحر تعالي جبتلك نوح حبيبك ياختي
ضحكت عليه وعلى غيظه مني وهو بيتكلم خرجت من الاوضه بتاعتي دموعها على وشها أول ما شفتني جريت عليا
اترمت في حضني وبدأت تعيط
_ أنا آسف والله
بعدت عني وبصتلي بلوم _ كدا يا نوح ينفع اللي أنت عملته دا وكمان تخرج وتسيبني هموت من قلقي عليك
مسكت ايدها بوستها _ حقك على قلبي يا قلب نوح سامحيني على كلامي وعلى قلقك عليا بس والله غصب عني
قربت منه المرادي وأنا ايدي على خده اللي ضربته عليه
_ وجعتك ؟
باس ايدي _ وجعني كلامي معاكي أكتر حقك على قلبي
بصت في عيني بتركيز _ مالك إيه حصلك غيرك كدا احكيلي يا نوح
بصيت لبابا المرادي ينقذني لأن مش هقدر أقولها فهو اتدخل
_ والله عال يعني واقفه تطمني على ابنك وجوزك اللي نزل يلف على الشحط دا مش مهم ؟
بصتله وقربِت منه بهدوء وحضنته
_ مافيش أهم منك يا رحيم
بصلي بانتصار وضحك وهو بيلف ايده حواليها
_ ولا حتى الشحط دا
ضحكت _ ولا حتى هو يا حبيبي
أخدتها ودخلنا الأوضة بعد ما نوح وأدهم دخلوا الأوضة يتكلموا قعدنا على السرير مش عارف اقولها إزاي
_ مالك يا رحيم ؟
أخدت نفس وخرجته بالراحة وبدأت اتكلم
_ هقولك حاجة بس علشان خاطري خليكي هادية
_ نوح كويس ؟
_ هحكيلك
بدأت أحكيلها ومع كل كلمة كانت دموعها بتنزل أول ما خلصت كلامي قامت وخرجت من الأوضة بسرعة خرجت وراها لقيتها عند نوح في الأوضة
أول ما رحيم حكالي حسيت إن فيه جبل على قلبي
إزاي ابني يكون كدا وأنا ملاحظتش عليه حاجة خرجت جري عليه لقيته في الأوضة مع أدهم جريت عليه وحضنته
_ هتكون بخير يا حبيبي الحمد لله أنت لسه في الأول صح ؟
باس جبيني ورد بهدوء وهو بيمسح دموعي
_ صح يا حبيبتي، حقك على قلبي علشان صوتي علي عليكي وقولت كلام مينفعش أقوله حقك على قلبي يا عيوني
حطيت ايدي على خده مكان ما ضربته
_ حقك عليا يا نوح علشان ايدي اترفعت عليك
مسك ايدي وباسها واتكلم وهو بيضحك
_ فداكي نوح كله والله
قربت منهم وقدت جنب أدهم اللي بيبصلهم ومبتسم
_ أسمع يا نوح أنت في الأول لسه علشان كدا بكرة تعمل أجازة من الشغل لمدة شهر كدا وهتفضل في البيت هنا على ما تفوق
الحبوب مفعولها هيروح علشان أنت مأخدتهاش كتير بس لازم التغذية السليمة تمام
_ حاضر يا غالي
قرب مني وشد بحر عليه
_ حضرلك الخير يا أخويا، ابعد عن مراتي بقى
أدهم ضحك ورد عليه
_ والله احنا عيالها نفسي تفتكر دا
بصلنا بقرف وأخد ماما وخرج وأدهم اتحرك قعد جنبي تاني
_ هتكون بخير يا نوح الحمد لله إنك عرفت في الأول
_ الحمد لله
تاني يوم فعلًا روحت الشغل وعملت أجازة لمدة شهر وكان بابا معايا رجعنا البيت علشان ابدأ أفوق تاني
_ حبيبي اشرب العصير دا أنت بتحب الجوافة
_ ماما ممكن تقعدي
قعدت جنبي فمسكت ايدها وبدأت اتكلم
_ أنا هكون بخير أنا عارف إنك خايفة ومتوترة لكن عايز اطمنك الدكتور قالي ارتاح بس واتغذى كويس واستحمل الصداع والدوخة وهخف في أقرب وقت لأن النسبة عندي مش كبيرة الحمد لله فـ اهدي أنا كويس متقلقيش يا حبيبي
_ هتكون كويس أنا عارفة بس معلش استحمل خوفي عليك الفترة دي ويلا اشرب العصير على ما أجهز الغدا
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية نوح)
