رواية نسمة حائرة الفصل السادس 6 بقلم سحر السحرتي
رواية نسمة حائرة الجزء السادس
رواية نسمة حائرة البارت السادس
رواية نسمة حائرة الحلقة السادسة
*مرت ايام اجازة العطلة الاسبوعية وذهبت نسمة الى العمل في الموعد المحدد ليس باكرا كما تعودت لان عمتها كانت سافرت لتجد من يدخل المكتب بعنف
:ممكن اعرف تليفونك مقفول ليه في الاجازة
: بيتهيقلي ان في باب تخبط عليه الاول حتى لو كنت مديري مايدلكش الحق انك تدخل بالطريقة الهمجية دي واديك قلت اجازة يعني انا مش دكتورة نساء اسيبه مفتوح عشان ولادة طارئة
: ايه التشبيهات دى كان في شغل وكنا محتاجينك فيه
:بيتهيقلي كمان اني سلمت كل شغلي قبل ما اطلع الاجازة
: لا في جهزي نفسك نص ساعة وهنطلع على السخنة في فندق هناك السيستم وقع هنروح عشان نشوفه
*ردت بعصبية
: لحظة واحدة انا مش رايحة في حتة انا مش مهندسة ميدانية عشان الف واتنطط على العملاء الكلام ده له ناسه ولة انتم اخدتوا على كدة العقد اللي بنا مش بيقول كدة
*رد ببرود حتى يزيد من عصبيتها
: مستر فخر هو اللي رشحك المرة دي روحي قوليله كدة
: هروح هو انا هخاف
*ذهبت للسكرتيرة طلبت منها الاذن لمقابلة فخر فأذنت لها لانه كان بانتظارها
: بنتي الحلوة ازيك شكلك زعلان مالك
: انا اسفة يا مستر فخر بس مش هقدر اسافر السخنة انا مش مهندسة ميدانية كل شوية اتنطط من مصنع لفندق يا عالم المرة الجاية غواصة كدة بصراحة كتير قوي
: اهدي بس نسمة انت زي بنتي بطلب منك طلب تكسفيني سمعة الشركة هتبقي في الارض بقالهم فترة مش عارفين يصلحوه قلت مفيش غير عبقرية الشركة
: حاضر بس بابا مش هيوافق وحضرتك عارفه
: لا وافق وانا كلمته واطمن لما عرف ان فارس هيسافر معاك
: هو لازم مستر فارس يسافر معايا هروح لوحدي
: لا طبعا عشان نبقي مطمنين عليك وبعدين هو رئيسك لو حد اتعرضلك يدافع عنك اعتبريه بادي جارد ههههه
: طب هعدي على البيت احضر شنطة صغيرة اخدها معايا
: عشر دقائق والشنطة هتوصلك بابا بعتها
: طب حضرتك ابعت مستر فارس واول ما الشنطة توصل هحصله بعربيتي خليه يبعتلي اللوكيشن
: وعلى ايه يستناك وهو اللي يسوق رايح جاي وانت مستريحة كفايه تعبك هناك وزي ما قلت لك هو البادي جارد وسواق كمان هههههه
بقلمي سحر السحرتي
*كانت تهمهم في سرها : افففف استغفر الله زي ما تكونوا متفقين عليا ومرتبنها سوا
*خرجت لقت عم عثمان بيسلمها شنطة وبيبلغها انها من والدها عادت الى المكتب تلملم اشيائها
*تحدث بسخرية
: هاه اعتذرت لمستر فخر
*ردت بسخافة
: اه ومارضيش اتفضل انا جاهزة
: احب اشوف ال ٧ رجالة اللي عندك مش عارف راحوا فين
*ردت بغضب شديد
: ما تخلنيش ادخل في دور عند احسن اقعد وعليا وعلى اعدائي ولولا اني مش عايزة ازعل مستر فخر كنت قعدت لو فيها حتى استقالتي
: خلاص يا شرس وبعدين لو ما كنتش انا مديرك هتولعي فيا
*ردت ببرود هذه المرة وبتفاخر
: مستر فخر قالي اعتبرك البادي جارد بتاعي وانا هستغل الفرصة تحب تساله وتوريني ال ٧ رجالة بتوعك
: هو قالك كدة مصدقك طبعا(في سره) ابويا ويبيعني عشان مصلحة الشغل
*ركبوا العربية فمسكت التليفون
: ايوة يا لين الغي مشوار النهاردة اصلي متنيلة مسافرة السخنة عندي شغل
: متنيلة
*نظرت له بلا مبالاة واكملت
: مش عارفه هتنيل ارجع امتى هبقى اكلمك اما اوصل سلام
: ايوة يا سولي بتبعني بقى انا اروح اتحجج انك مش موافق القيك محضرلي الشنطة للدرجة دي قاعدة على قلبك ….. خلاص يا حبيبي انتم اصحاب اتحشر في النص ليه ….طب خلاص حاضر سلام
: دى انت زعلانة بقى انك مسافرة دى حتى السخنة جميلة
*لم ترد عليه وبدات في تشغيل الاغاني في السيارة من تليفونها واخرجت راسها من الشباك وتركت شعرها للهواء يداعبه ويطير وكانها تطير معه تتذكر اجمل اللحظات معه ..غيرته العنيفة في الحفل عندما كانت ترقص مع الفتيات وكيف اتى وهو يمثل انه يرقص ايضا مع الشباب ليميل عليها ويهمس
: في رقاصة عايزة تطلع بس مستنياك تخلصي الوصلة بتاعتك مش تتهدي وتقعدي بقى وكفاية كدة
*لتهمس بدورها : هو انا عندي كام اخ هيتجوز كل يوم ( محاولة منها لتزيد غيرته)
*وايضا تذكرت تلك الدقائق المعدودة التي رقصوها معا الى القبلة العفوية التي كانت سر سعادة مخفية بداخلها وهي داخل الذكريات غفت وهي تستنشق رائحة عطره الرجولي الخلاب ومالت براسها على كتفه بشعور لا ارادي منها يكاد يكون متعمد ولكن الاكيد انه سر سعادة كلاهما وتشتغل الاغنية التي غنتها في الفرح فغنتها وهي نائمة وتردد كلماتها وهي تضغط على جملة انت اللي روحي بتعشقه …وقد اما حبك حبني
لتستيقظ فجاة وتلملم شعرها من على وجهها
: اسفة نمت فجاة انا بقالي كتير كدة
: كده اللى هو ايه بالضبط
: يعني نايمة على كتفك
: دى انا دراعي وقف من ثقل دماغك
: امال ما صحتنيش ليه ولة مستحليها
: يوووه صحيتك كتير بس انت نومك تقيل قوي
: كداب قوي على فكرة عشان نومي خفيف
: طب معاك كريم للعضلات عشان كتفي وقف كان في طوبة محدوفة عليه
*تتحدث بحدة وتحدف دبش بكلماتها كالعادة : دى احنا بنستهبل بقى الطوبة دي هتبقى في دماغك كمان شوية …. مفيش رست تقف فيه محتاجة قهوة مصدعة
: بس كده انت تؤمري بشرط
: بلاش مش عايزه محدش يشرط عليا
: خلاص خليه طلب بعد اذنك كمان مش بعملها مع حد
: اذا كان كدة معلش اتفضل قول طلبك
: نتكلم وتسمعيني ممكن
: مفيش حاجه تتقال كل الحوار اتلخص في جملة واحدة ….. ممكن اخود منك خطيبي انا مش خطافة رجالة ولا عمري هكون
: الكلام ده لما ابقى بتاعها لكن ده غير صحيح
: وقراءة الفاتحة والخطوبة اللي بعد كام يوم
: مش هتوصل للخطوبة ما انا قلت لك وفهمتك عشان كده
: هتوصل وهحضر حفل خطوبتك واسلم عليك وابقى قول نسمة قالت
: انت بس الوحيدة اللي في قلبي ومحدش غيرك هيقدر يدخله
: يبقى اما تحل موضوع الخطوبة يبقى في بينا كلام قبلها هكون خطافة رجالة
: يعني مش عيزاني اكلمك طول المدة دى
: ما احنا بنتكلم في الشغل وكل الحكاية كام يوم على ما تخلص زي انت ما بتقول وتقدر تاخد خطوة إيجابية قبلها اسمحلي مش هقدر انت في نظر اهلك واهلها انسان خاطب
: يا ريتني ما وافقت على خطتها
: ايوة اقصر طريق لنقطتين هو الخط المستقيم ايه اللي يخليكم تلفوا وتدوروا وتطلع انت قدام اهلها ندل خطة خارجة عن نطاق العقل بصراحه الا اذا الكلام على حاجة تانية
: حاجة تانية زي ايه
: مش عارفه شغل مخك وفكر يا بشمهندس ان كيدهن
: مش فاهم
: عموما خلي بالك من نفسك الفترة اللي جاية وكل حاجة هتبان ياخبر النهاردة بفلوس ممكن نقف بقى عشان هموت من الصداع
بقلمي سحر السحرتي
: دقايق وهنوصل الفندق طب انا هحترم رغبتك ومش هتكلم في حاجة خارج الشغل بس ممكن تعاملك معايا ما يبقاش ناشف قوي كدة عشان مش هستحمل
: تمام هحاول
*بصلها بصة تكاد تحرقها من الغضب وهي بداخلها هتموت من الفرح وتتمتم (ولا يهمني)
*لياتيه اتصال
: ايه روح يعني ايه احنا خلاص قدامنا ١٠ دقايق ونوصل …. مراته في المستشفى يسيب المفتاح مع حد تاني…. يعني ايه مسئوليته هو وعهدته يعني لو مات يفضل الباب مقفول ده تهريج على فكرة احنا مش فاضيين للعطلة دي بكرة من بدري يكون عندي واحجز لنا غرفتين على ما نيجي
: قوله يخلي اوضتي على البحر
: خلي الغرفتين جمب بعض على البحر سلام ….. بتبصيلي كدة ليه
: ايه اللي خلاك تلزق اوضتك في اوضتي وتخليها على البحر كمان ما ان شاء الله تبقى اوضتك في السوق حاشر نفسك معايا ليه
: ايه يعني مش من حقي انا كمان اوضتي تبقى على البحر
: هو انت هتجيب نفسك ليا انا اللي هحل المشكلة انت جاي تتفرج تتساوى معايا ليه
: يا شيخة حب لاخيك
: اصل سهل يلاقي اوضة على البحر انما اتنين وجمب بعض على البحر صعب فكدة ممكن اتنتر معاك في حتة تانية كنت اخلص بنفسي
: مادية ما تخافيش بيسيبوا غرف للطوارئ
: اما نشوف مش همد ايدي غير وانا في غرفة على البحر
…. اللي فهمته اننا مش هنعمل حاجة النهارده يعني هنطعطل وممكن كمان ما اقدرش اخلص بكرة
: للاسف اه اعتبريها اجازة مدفوعة الاجر
: فول بورد
: فول بورد يا مادية هههههه وصلنا يالا انزلي تشربي القهوة الاول ولة نغير وناخدها على البحر
: لا طبعا اغير بس مش هتاخر مش بعمل حركات البنات هاخد شاور على السريع وربع ساعة بالدقيقة وهكون جاهزة
: خلاص اقابلك بعد ربع ساعه واللي يتاخر يدفع الحساب
: يبقى مش طالعة المية قاطعة ههههه
*يضحك بصوته الرجالي الحنون
: واضح انك اشهرتي افلاسك ما كنتيش كدة
: اه والله حالتي تصعب على الكافر
: طب شوفي حسابك المكافاة زمانها نزلت
: بجد ربنا يعمر بيتك ربنا يخليك ربنا يرزقك هههههه
: ايه اسطوانة الشحاتة اللي حفظاها دي جبتيها من اين
: دى انا حفظاها مخصوص مش بتطلع غير لسولي لما ابقى مزنوقة وخلصتها عليه ٥ مرات الشهر ده منها لله تفيدة اللي بتحوجني هههههه الحق اطير احسن ادفع الحساب سلام
: كان ينتظر امام باب الاسانسير بعد ان انتهى من ارتداء ملابسه وهي ملابس كاجوال مريحة ولكنه فاتن وعطره الرجالي الساحر ….. ليجد من ينقر على ظهره ولم تكن اقل منه جمال كانت ترتدي تريننج سوت بنطلون برمودا طويل احمر وترفع شعرها بربطة ذيل الحصان وخصلة شعر امامية زادتها شقاوة مع عطرها النسائي المثير
: اظن ما اتاخرتش بج بن مظبوطة عليا هههههه
: بج بن حتة واحدة بس ملاقتيش غير اللون الاحمر ده
: كنت مأجلاه لمصارعة الثيران بس بابا اللي حرق المفاجاة اصلا لو وضبت انا الشنطة كنت جبت البكيني بس بابا نسيه باين
: بكيني لا خلينا في مصارعة الثيران قهوتك ايه
: نص فرخة مشوية على الفحم
: نعم
: عصافير بطني بتصوصو وصحيا ما ينفعش قهوة على معدة فاضية معدتك هتتعبك انا خايفة عليك
: طب تعالي يالمضة هأكلك اكلة عمرك ما هتنسيها
بقلمي سحر السحرتي
*وامسك يدها وسحبها جمبه حاولت سحبها لكن قوة قبضته منعتها لم تستطع المقاومة كثيرا ايمكن لانها محتاجة تحس بحبه وحنانه او يمكن لان كان نفسها هي كمان تمسكها احست بشعور غريب اول مرة تعلو ضربات قلبها يكاد العالم يسمعها خاصة عندما شبك اصابعهم مع بعض كأن قلوبهم تلامست
*احاسيس مراهقة تقابل حبيبها من خلف اهلها فهي كل هذا العمر اغلقت ابواب قلبها والقت المفتاح بعيدا ويبدو انه هو الوحيد الذى وجد المفتاح واطلق سراحه
*ليصلوا الى المطعم ويضطر ان يترك يدها
: ايه ساحب جاموسة وراك ولة حد قالك اني مش بعرف امشي لوحدي
: لا يا ستي ما تقوليش على نفسك كدة انت جميلة ممكن تقولي اخدتها حجة عشان امسك ايدك وعارف هتقولي ايه قبل ما تنطقي هعمل كل اللي اتفقنا عليه بس بعد اما نرجع القاهرة ممكن نعيش اليومين دول نتعرف على بعض اكثر ونسيب مشاعرنا شوية
: وبعد ما نسيبها نرجع نحبسها او نموتها بعد ما تخطب وتبقى المشاعر دي من حق خطيبتك
: مش هيحصل مفيش دبلة هتبقي في ايدي غير دبلتك انت انا مش مراهق انت عارفه انا عندي كام سنه اكيد لو عايز اقضي معاك يومين مش هتكسف وفي بنات مخصوص لكدة …..نسمة انا بحبك ومتاكد من مشاعري كويس قوي انا بقالي فترة نفسي اعترف بس كنت باجل لغاية لما اتاكد عشان ما اظلمكيش
: انا خايفة يا فارس
: خايفة مني
: خايفة من كل حاجة خايفة اتعلق بيك تسيبني خايفة الفرحة اللي في قلبي ما تكملش عشان عمر ما فرحة كملت ليا خايفة قلبي يتكسر وانا قفلاه طول عمري
*امسك يدها بحنان وقبل كف يدها وقال لها
: ما تخافيش طول ما انا معاك وجمبك عمري ما هكسر قلبك ولا هسيبك
: انت ما تعرفش حاجه عني واول ما تعرف هتسيبني
: عمري يا نسمة عمري ما هسيبك مهما كان
: مش قادرة لا لا انا هقوم انا اخدت عهد على نفسي قلبي ده ما يدقش ابدا لانه بداية الخراب على الناس مش هقدر اخلف العهد ده انا اسفة
: طب اقعدي بس خدي وقتك وفكري يمكن اليومين دول يخلوكي تغيري رأيك او بعد موضوع الخطوبة ده ما ينتهي واتقدملك وتعرفي اني جد تغيري رأيك
: مش انا اللي هغير رأي انت اللي هتغير
: اغير ليه ما تحكيلي كل حاجة
: مش دلوقت ما عنديش استعداد احكي حاجه ممكن نأجلها لما نفسيا اكون مستعدة
: ممكن بس تأكدي مهما كان مش هغير رأي … كدة عايزة تمشي وتضيعي عليك عزومة الاكل هههههه يلا عشان بعدها عازمك على رحلة بحرية نشوف الغروب مع بعض في وسط البحر
: الله طب بلاش اكل ويلا نروح
: قوام كدة العصافير طارت ومش عايزة تاكل بس انا جعان هتاكلي احلى سمك عمرك ما دوقتيه
*صدمت نسمة مما قال : نعم سمك اكيد عمري ما دوقته انا مش بحب السمك
: طب جربي ده مش انا جربت سندوتشاتك اللي كانت هتجيب اجلى
: سندوتشاتي اللي كانت هتجيب اجلك ولة طفاستك عشان نبقي واضحين
: ههههه عايزة الحق طفاستي
*واتجهت جلستهم ما بين المرح والهزار واكلت نسمة السمك على مضض ولكنها اكتشفت انه لذيذ وان ذوق فارس في اختيار الطعام متميز
: شكل الاكل عجبك
: يعني مش قوي
: مش قوي ازاي دول مش محتاجين يغسلوا الاطباق من بعد ما اكلتي هههههه
*لتشرق وتكح تكاد تختنق
: انت عازمني ولة بتقر على
: بالهنا و الشفاء بهزر معاك قهوتك ايه
: ايس كريم مانجا وشيكولاتة وتوت
: انا كل ما بسألك قهوتك ايه بدخل في سكة تانية انا هبطل أسأل هههههه وبعدين ايه الكوكتيل الغريب ده من الايس كريم
: السمك بيكون بعده ايس كريم
: مين اللي قال كدة
: انا متعودة على كدة مع سولي عشان أرضى اكله وبعدين مزاجي كدة في الايس كريم انت هتاكل معايا
: يشرفني انك تعامليني زي عمو سليم واه هاكل معاك امال هطلب ٢ ايس كريم
: انت قلبت على بخل كدة ليه الكوكتيل ده وحش وبيوجع البطن اطلب لنفسك قهوة حلوة بعد السمك
: انا اللي قلبت بخل تعالي هوديك مكان بيعمل الايس كريم حلو قوي نجيبه ونطلع بيه على اليخت
: ماشي انا اصلا عجبني ذوقك في الاكل
: الاكل بس
*بخجل :مؤقتا مشيها
: ماشي همشيها
*وعاد وامسك يدها ولكنها هذه المرة لم تقاوم او تحاول سحبها وكأنها قالت لنفسها ( عشيلك يومين يا نسمة حتى لو مش هيتكرروا )
*ليجلب لها احلى ايس كريم تذوقته ونكهات اكثر مما طلبت وكان يشاركها من باب الحب والمشاكسة واتجها لركوب اليخت استعدادا للرحلة البحرية امسك يدها واسندها للصعود على ظهر اليخت لكن اتلوت قدمها وهي تصعد كادت ان تسقط ولكنه اسندها فسقطت في احضانه لم تدري ماذا تفعل غير انها صرخت من الم قدمها لتبرر سبب سقوطها وتداري سعادتها وهو يضمها لحضنه
: مالك في ايه
: رجلي اتلوت وبتوجعني قوي
: طب هتقدري تدوسي عليها
: مش قادرة بتوجعني
: طب هشوف شنطة الاسعافات اللي هنا فيها ايه لرجلك استني هنا هسال قبطان اليخت وارجعلك
بقلمي سحر السحرتي
*اجلسها في مكان وذهب لتقترب منها فتاة في مثل عمرها وتمسك بالكاس في يدها وتترنح قليلا
: مش ممكن نسمة مكاوي ما مش مصدقه انت لسة عايشة
: اكيد لسة عايشة واحسن منك كمان يا ديما
: بس مين الموز اللي معاك ده ووقعتي عليه ازاي
: مش كل الناس بتوقع زيك وملكيش دعوه باللي معايا
: يا ترى عرف انك مسخ ولة مخبية عليه وكل حاجه هتدارى في الضلمة (مع ضحكة ساخرة ساقطة)
: واضح انك ناسية ان المسخ دي هي اللى انقذت سمعتك وخليت الاستاذ اللي غلط معاك اتجوزك قدام اهلك وهكرت تليفونه ومسحت البلاوي اللي كانت عليه اللي كان هيفضحك بيها
: اكيد مش ناسية ما انا لسة مدبسة معاه واهو هناك عمال يشرب ومقضيها مع كل واحدة شوية
: مش انا اللي خليتك تغلطي معاه من الاول انا كنت بصلح غلطتك بس طبعا انت نسيتي مكافاتك ليا كانت ايه
:مش ناسية اني حاولت اهديه بيك بس هو مارضيش لما لقى انك مسخ
: دى من حسن حظي اني ابقى نسخ مختلف عنك وامشي من خلقتي وما تحتكيش بيا عشان حاجاتك لسة معايا انت وهو (بزعيق )امشي من قدامي غوري
*على وصول فارس ومعه دهان ورباط ضاغط مالت عليه ديما وهي تترنح
: ابقى خلي بالك منها بس ما تشغلش النور الضلمة بتداري حاجات كتييير (ونفس الضحكه الساخرة)
: هي تقصد ايه مش فاهم حاجه
: ما تاخدش في بالك دي حاجه من ضمن الحاجات اللي اما تعرفها عنى هتغير رأيك جاهز لاول صدمة من ناحيتي انا جاهزة احكي الجزء ده ….( تتحدث بمرارة)مش قلت لك مفيش حاجة حلوة بتدوم معايا اليوم كله كان حلو وختم
:مش عايز اعرف حاجه هاتي رجلك لما ادهنها واربطها
: بس انا عايزة احكي الحقني قبل ما اغير رائي
: هسيبك تحكي بس مش دلوقت علشان حاسس انك هتنكدي على نفسك نكمل اليوم وبعدين احكي
*ليرى شاب قادم اليهم
: معقول نسمة مكاوي مش مصدق اول ما ديما قالت لي قلت اكيد بتهزر انا دورت عليك كتير صدفة لطيفة
: اكيد مش بالنسبالي اني اشوفك انت وديما في يوم واحد وتسمو بدني بكلامكم اكيد في حد داعي على النهارده
: ليه بس بتقولي كدة دى انا ما صدقت وكنت عايزك في كلمتين مش تعرفيني على الاستاذ جوزك
: لا المسخ ما اتجوزتش ولا هتتجوز زي مراتك ما قالت كتر خيرها ممكن تمشي انت كمان لو كان اليخت لسة واقف كنت نزلت
: ارجوك ما تفهمنيش غلط انا كنت بدور عليك من زمان عشان اعتذر لك بس انت بعد التخرج قطعتي علاقتك بينا كلنا وغيرت ارقام تليفونك
: تفتكر من حلاوة معرفتكم عايزني ابقى على صلة بيكم وخصوصا بعد اللي حصل
: طب ممكن نتعشى سوا النهاردة ونتكلم
: ما افتكرش ان بقى في حاجه نتكلم فيها بعد اللى حصل انتهينا
: طب اديني من وقتك ١٠ دقايق بس بعد اذنك يا استاذ
:فارس مدير نسمة في الشغل
: عن اذنك هاخودها منك ١٠ دقايق بس
: اتفضل انا همشي لانها مش هتقدر تمشي دلوقتي انا هقف هناك يا نسمة لو احتجتي حاجة نادي على
: استنى انا ما وافقتش اني اسمعه
: نسمة اديله ١٠ دقايق انا هناك مش هبعد
: اتفضل يا استاذ باسل خير عايز تكسر ايه تاني جوايا بعد اللي عملته انت ومراتك ولسة بتعملوه
: انا مش عارف هي قالتلك ايه دلوقت اعذريها هي شاربة ومش عارفة بتقول ايه انا كنت بدور عليك عشان اعتذر لك
*لتضحك بسخرية: ههههه باسل بيعتذر لا قول حاجة تانية اصدقها
: انا اسف يا نسمة انا كنت شاب طايش اذيتك وانت كل اللي عملتيه كنت بتحاولي تنقذي شرفها وسمعتها وابننا اللي كانت حامل فيه ما عرفتش قيمة الحياة او اللي انت عملتيه غير لما شلت ابني على ايدي وحسيت بحبه وبقى اغلى حاجه عندي وحسيت قد ايه انا كنت شخص سئ اتغيرت عشانه … انا يمكن عمري ما حبيتك بس بكن لك كل احترام وتقدير
: امال مراتك لسة الى الان بتكن لي كل كراهية رغم اللي عملته معاها
: هي من بعد الولادة وحست اني مش بحبها واني مجبر اعيش معاها عشان ابننا ومفكراني على طول مقضيها مع الستات كلها وده مش صحيح وبعتذر لك عن اي حاجه قالتها واتمنى انك تسامحينا ولو احتجت حاجة افتكري اني زي اخوك
*ومد يده ليسلم عليها كأنه يوقع معاهدة سلام معها تحت نظرات فارس المندهشة في ما حدث فسلمت عليه نسمة مضطرة لتنهي الحوار معه وعاد الى زوجته واصدقائه وعاد فارس ليقف بجانب نسمة التي كانت الدموع تنفجر من عينيها
: قالك ايه زعلك قوي كدة
: بالعكس ما قالش حاجة وحشة بس الذكريات معاهم هي اللى كانت مؤلمة بشكل صعب
: تعرفيهم من زمان
: كانوا زمايلي في الجامعة وكنا شلة واحدة بنقعد على طول مع بعض
: زمالة الجامعة دي اجمل ذكريات اكيد فكرك بحاجات حلوة
: اذا كان انه يفكرني بانه فشل في اغتصابي ذكريات حلوة بنظرك تبقى اكيد حلوة
بقلمي سحر السحرتي
*ليصعق من جملتها وكأنها القت عليه دوش بارد يمكن جملتها فسرت له ليه كانت متضايقة انها شافتهم لكن لسة في حاجات مبهمة مش واضحة بس هو مش مستعجل انه يعرفها لان واضح انها ذكريات قاسية وسايبة اثر واضح عليها
: طب شوفي رجلك تقدري تدوسي عليها كدة عشان نقعد في مكان كويس الغروب قرب
: بقت كويسه شكرا بجد
*طبطب عليها وكان عايز ياخدها في حضنه لكن خاف يجرح مشاعرها خصوصا انه حس انها مدبوحة مش مجرد ذكريات ومواجع اتقلبت عليها ….. مسك ايديها وسندها عشان يقعدوا في مكان مميز يراقبوا غروب الشمس وهي بتنزل كانت دموع نسمة بتنزل كمان …فارس كان بيراقبها وسايبها تخرج اللي جواها
عشان تستريح بس ماسك ايدها ومحسسها بالامان وانه جمبها ومش ممكن يتخلى عنها بس هي كانت في عالم تاني
*ديما فكرتها بحاجة ماكانتش واخدة بالها منها كان كل همها انها تقفل قلبها طب لو اتفتح ازاي الراجل اللي هتحبه ويحبها يقبل يتجوزها وجسمها مشوه زي المسخ زي ديما ما قالت …..قررت انها لازم تقوله وتعرفه اول ما يرجعوا الفندق لكن ازاي قعدت تفكر
*فارس كان بيفتكر برضة اول نسمة ما اشتغلت معاهم في الشركة ازاي كانت حذرة في التعامل مع كل الناس وفضلت مدة طويله على ما قدرت تتصاحب على زميلها كان مفكره خجل زيادة عن اللزوم بس طلع من اثر اللي حصل معاها ايام الجامعة ازاي هيقدر يمسح الذكريات المؤلمة دي من جواها قدامه تحدي صعب
*اثناء ما كان يفكر قالت نسمة
: فارس انا عزماك على العشا
: ايه ده خير هتصرفي وتكلفي ولة سخنتي من هوا البحر
: ههههه بتكلم جد
: طب تعرفي مطعم حلو ولة اختار على ذوقي
: لا عزماك عندي في الاوضة التراس هناك الفيو بتاعه يجنن نطلب العشا ونقعد سوا حتى ممكن نسهر ونشغل فيلم نشوفه مع بعض
: فكرة حلوة بس اوضتك ولوحدنا
: هههههههه خايف على نفسك مني مش هعضك
: الصراحة خايف انت ممكن تاكليني لو العشا ماكفاش او تشغلي فيلم رعب ههههه
: هستناك الساعه ٩ ما تتاخرش هروح اشتري شوية حاجات قبل العشا
*بعد ان عادا اليخت الى الشاطئ وصلوا الى الفندق تركته نسمة وذهبت لشراء بعض الاشياء على لقاء لتناول العشاء معا
# ماذا ستخبره وما هي حكايتها مع زملائها
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية نسمة حائرة)
