رواية ندالة عاشق الفصل الأول 1 بقلم نداء علي
رواية ندالة عاشق الجزء الأول
رواية ندالة عاشق البارت الأول
رواية ندالة عاشق الحلقة الأولى
💬💬💬💬💬💬💬💬
في إحدى القرى المصرية البسيطة المميزة بجمالها الهادئ تقف أمام المرآة واحدة من بطلاتنا تنظر إلى وجهها بتقييم، تهندم من زيها المدرسي باهتمام، نظرت من حولها تتأكد من غياب والدتها لتبتسم بسعادة عندما استمعت إلى صوتها تتلو القرآن كما تفعل كل يوم، امسكت ‘قلم الكحل’ وكحلت عيناها بخفة كي لا تلاحظ والدتها اختلافاً ووضعت القليل من أحمر الشفاه الوردي اللون، اسرعت خارجة تنتوي الذهاب قبل أن يلحظها أحد لكن شقيقتها الكبرى تحدثت إليها بخفوت قائلة
رايحة فين يابت
نادرة بملل : يوووه انتي صاحيه بدري ليه
عبير : عشان أقفشك
نادرة بغيظ : ده انتِ غلسه انتِ وعيالك
عبير : بتغلطي في اختك الكبيرة يا جاحدة، طيب أنا هنده لأمك واقولها انك متذوقه وبتتسحبي قبل ما هي تشوفك.
نادرة بدلال : بيرو حبيبتي، ده انتي ملاك انتِ وولادك، أنا عيلة هبله متاخديش على كلامي.
عبير : برده لأ
نادرة : أنا اختك الصغيرة يعني زي بنتك مفروض تدلعيني وتستري عليا وخليني امشي قبل صفيه ما تخلص وتقفشني.
عبير بحب : يلا امشي ده انتي عيله مصيبه، ومليكش دعوة بحد يا نادرة فاهمة
نادرة مهرولة بعيدآ عنها : حاضر يا ماما عبير فاهمه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
في بيت اخر أسرع بطلنا الأول بالخروج، استوقفته والدته قائلة
اقعد افطر الأول ياحبيبي
فياض : لأ هتأخر
ناديه ربنا يوفقك يابني شد حيلك علشان تجيب مجموع حلو ويشرفنا
فياض مبتسما : ايوة ادعيلي مع السلامه بقى
ناديه : واد انت استنى الدنيا مش هتطير وبعدين هو في ولد بيبقى مستعجل كده عالمدرسة ، تكونش بتحب؟
فياض : هو ممنوع؟
نادية بغرور : مش ممنوع طبعا المهم تختار واحدة تليق بيك، واحدة ترفع منك مش اي واحدة والسلام
فياض بملل : ماشي ربنا يسهل، سلام بقى
💬💬💬💬💬💬💬💬💬💬💬💬
على مقربه من المدرسة الثانويه يقف أحد الشباب يتطلع إلى الماره من حوله بتوتر فقد بات حديث الفتيات، ينظرن إليه باشفاق واعجاب فرغم وسامته العاديه الا أنه يتميز بجاذبية من نوع خاص، اجتماعي وحديثه مع الآخرين لا يخلو من اللباقة، يشهد له الجميع بالذكاء ومع ذلك لم يستطع الحديث إليها بعد، يتابعها منذ ثلاث سنوات، يتبادلان النظرات في صمت، عليه أن يفضي إليها بما يحمله لها من مشاعر فلم يعد بإمكانه الانتظار
انتشله من شروده رنين هاتفه المتكرر، نظر إلى اسم المتصل فأجابه على الفور قائلاً :
صباح الخير يا باشا، لأ أنا صاحي تحت أمر معاليك
استمع إلى حديث الطرف الأخر وقال
حاضر، هاخد أنا الورق واخلص كل حاجة ولا يهمك.
أنهى الاتصال بعد قليل ونظر إلى ساعة يده يخشى ألا تأت صفا في موعدها ولا يود المغادرة لكن موعد عمله قد حان.
💬💬💬💬💬💬💬💬💬💬
أسرع بخطوات راكضه إلى أن رأها تبتسم بخفوت فبادلها الابتسام بحب إلى أن همس إليها
اتأخرتي النهارده ليه؟
نظرت إليه بغيظ قائلة
انت اللي اتأخرت يابني.
فياض : في حد يقول لحبيبه يابني برده
قاطع حديثهما صفا التي تحدثت بغضب إلى صديقتها قائلة
يلا يا نادرة، في ايه مالك البنات بتبص علينا
فياض معتذرا : أنا أسف كنت بسألها عن حاجة
صفا : على فكرة اتأخرنا عالطابور بعد اذنك
تحدثت نادرة بلوم واعتراض قائلة
ايه ده يا صفا فكيها شويه ما انتي عارفه اننا بنحب بعض
صفا : حب ايه وبتاع ايه، احنا ثانويه عامه ركزي احسن
نادرة : والله انتِ فظيعه، طب بصي الواد المسكين اللي بيبص عليكي بقاله كام سنه وخايف يكلمك، يابت ده صعب على بنات المدرسة كلها وانتِ ايه، جبلة؟
صفا بحزن : وبعدين يا نادرة قولتلك أنا مليش في الحب ووجع القلب ده، البنت لازم تبقى قوية وتدور على مستقبلها ومصلحتها
نادرة : طيب ياختي، لما نشوف اخرتها معاكي متنسيش النهارده خطوبة هبه، عقبالنا يااارب.
💬💬💬💬💬💬💬💬💬💬💬💬
مساءا التقت صفا ونادره مع باقي الفتيات، كل منهن ترتدي أجمل ما لديها علها تحظى بعريس مناسب، كانت نادرة تهمس إلى صفا قائلة
ما تضحكي يابت، انتي مكشره كده ليه؟
صفا : أمي قالتلي ساعه واحدة بس وأروح
نادرة : محبكاها أوي أمك يا صفا
صفا : هقولها
نادرة ضاحكة : اياك تقولي يا صفا والله هعجنك
صفا : جبانه
نادرة : يابت بحبها ومش عوزاها تزعل مني
صفا : طيب ياختي مدي خلينا نبارك لهبه ونروح الساعة عدت من بدري وأسمع لي كلمتين حلوين عالمسا
تحدثت اليهما العروس قائلة بغيظ
تروحي فين انتي وهي، مش هتمشوا غير لما ألبس الشبكة
نادرة : معلش بقى الدنيا ليلت وانتِ عارفه صعب نمشي لوحدنا بالليل
هبه : هخلي حد من اخواتي يوصلكم
صفا : معلش ياهبه أمي هتزعل وانتِ عارفاها
هبه : يابنتي يعني حبكت
قبلتها صفا واعطتها هديه داخل متواضعة قائلة
ألف مبروك متعوضه في الفرح بقى
فعلت نادره المثل وغادرا الاثنان لتتحدث إحدى الفتيات قائلة
وخداها جد أوي صفا عبدالمجيد يا بنات
اجابتها أخرى
الناس مبترحمش وأبوهم مطلق أمهم من امتى وطبيعي تاخدها جد بدل ما حد يلسن عليهم
هبه : فعلا والله دي بنت حلال وجدعه جدا بس هي بتخاف حد يضايقها أو يزعل أمها
تعالت اصوات الزغاريد فتحدثت احداهن قائلة
العريس وصل يا هوبا
💬💬💬💬💬💬💬💬💬💬💬💬
دلفت صفا إلى مسكنها فوجدت والدتها غافيه فوق الأريكة، قبلت رأسها بحب وحزن من أجلها وتحدثت بحنو
قومي يا ماما نامي جوة أنا جيت أهو
بصوت يغلبه النعاس أجابتها فاطمه قائلة
اسخنلك تتعشي
صفا : لأ أنا شبعانة ولو جعت هقوم أعمل سندوتش، نامي انتِ ومتحمليش هم
فاطمه : ربنا يريح قلبك يابنتي ويطمني عليكي في بيت عدلك
تحركت فاطمة بخطوات مجهده كحال قلبها الذي عانى الكثير فقد قست عليها الدنيا كثيراً ومازالت صامده تتحدى الأسى بابتسامة راضيه، ونظرت صفا في أثرها بحزن قائلة
ربنا يعوضك خير يامه ويباركلنا فيكي.
💬💬💬💬💬💬💬💬💬💬💬💬
وتهرول الأيام سريعاً وكأنها تهفو إلى القاءنا عن كاهلها وحمل ركاب جدد، تهرول ونلهث نحن من فرط التعب.
ابتسمت عينا صفا عند رؤيتها لمنصف، لقد غاب عن ناظريها ما يقرب من الشهر، افتقدت وجوده واهتمامه الصامت بها وظنت انه قد يأس من تجاهلها له كما أخبرتها نادره
شهقت نادره بسعادة قائلة
الواد منصف رجع تاني يا صفا، شكلنا ظلمناه واهو رجع ومهربش
وكزتها صفا بغيظ هامسه
اسكتي يا زفته هيسمعك
نادره : يابت اعقلي بقى هيطفش من وشك َترجعي تندمي، وربنا شكله عسل في البدله الميري
صفا : يارب الواد فياض يسمعك وانتِ بتعاكسي غيره
نادره : حرام عليكي يا صافي دي مش معاكسه دي حقيقة واضحة
صفا ضاحكة : طيب يا فالحه امشي خلينا نروح نتغدى ونطلع عالدرس
نادره : يوووه امتى نخلص بقى من الثانويه العامه دي وناخد افراج
صفا : كل شيء بأوان مش يمكن الأيام دي احسن من غيرها
نادره : لاااا مفيش أيام بشعة زي اللي احنا فيها دي، الواحد قرب يتجنن من كتر الدروس والمذاكرة
صفا بسخريه : والحب!
نادره : الحب ده اللي مهون عليا كل حاجة، عارفه يا صفا اكيد كل اللي حوالينا شايفين ان حبي لفياض حب مراهقة وهينتهي بس والله ابدا أنا بحبه فوق ما حد يتخيل
صفا بهدوء : ربنا يجعله من نصيبك لو فيه خير
نادره : هتعملي زي أمي، اكيد فيه خير بس انتوا ادعوا وملكمش دعوة
صفا : هي أمك عرفت يابت؟
نادره : اه، فياض كلمها وقالها انه مستني ندخل الجامعة وهيجي يتقدملي بس ادعيلي يا صفا أهله ميعترضوش
صفا : ان شاء الله يا نادره ربنا يسعدك
اقترب منصف من وقفتهما وتحدث بجدية واشتياق قائلاً
سلام عليكم، اخباركم ايه
نادره : وعليكم السلام ورحمة الله، الحمد لله ازيك انت يا استاذ منصف
كانت نظراته معلقة بصفا التي اختبأت خلف صمتها فتحدث قائلاً
أنا كويس الحمد لله، ازيك يا صفا؟
صفا بمشاعر بريئة ومتضاربة : الحمد لله، يلا يا نادره هنتأخر
منصف : والله أنا ما قصدي اتسلى، أنا بحبك
صدمتها جعلتها تتسمر مكانها بينما ابتسمت نادره واستمر هو في حديثه موضحاَ
أنا غرضي شريف واكيد مش هسيب شغلي كل يوم واجي اقف قدام المدرسه بقالي كام سنه علشان اتسلى واضيع وقت
صفا بحدة خشية أن يراها أحد واقفه بصحبته
والمطلوب، انت عاوز مني ايه وبعدين لو حد شافنا دلوقتي وراح قال لأمي هتبقى مبسوط؟
منصف : المطلوب كلمة واحدة منك، بعدها هبعد عنك خالص لو رفضتي، ولو وافقتي هعمل كل اللي اقدر عليه علشان تكوني من نصيبي
صفا بتوتر وخجل : كلمة ايه
منصف : انتي مرتبطه بحد؟
صفا : لأ طبعا ايه الكلام الفاضي ده.
منصف : طيب بتكرهيني في عندك اعتراض عليا يعني؟
صفا بخفوت : لأ، أنا مبكرهش حد
منصف : يعني عارفه اني بحبك؟
صفا : لو سمحت ميصحش كده، خلينا نمشي
منصف : حاضر انا مش هضايقك، بس اجابتك وصلتني وصدقيني مش هتندمي والأيام هتأكدلك اني راجل وشاريكي.
ابتعد منصف بعدما أفضى اليها بمشاعره وبقيت هي تتخبط بين أفكارها الحائرة، قلبها يرجوها أن تمنحه فرصة ليحيا وينبض وعقلها يعلن عصيانه فالحب ضعف وألم لا قبل لها به شجعتها نادره قائلة
يابنتي عيشي حياتك، هيحصل ايه يعني الواد بيحبك وانتي كمان يا صفا شكلك مش رفضاه يبقى ليه بتعاندي
صفا : الرجالة بياعة يا نادره وأنا بخاف وقلبي مش حمل وجع
نادره : يابنتي بلاش تشاؤم، وبعدين هو حد كان ضربه على ايده بقاله كام سنه بيجري وراكي ايه بقى اللي يخوف
صفا : مش عارفه
نادره : يلا يلا خلينا نحب ونعيشلنا يومين مش هيبقى نكد من كله
ابتسمت صفا وتساءلت
انتي شايفه كده يعني
نادره : ومفيش غير كده ده الحب ده أجمل حاجة في الدنيا.
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية ندالة عاشق)
