رواية نادرة قلبي الفصل السابع والعشرون 27 بقلم دعاء أحمد

رواية نادرة قلبي الفصل السابع والعشرون 27 بقلم دعاء أحمد

رواية نادرة قلبي الجزء السابع والعشرون

رواية نادرة قلبي البارت السابع والعشرون

رواية نادرة قلبي الحلقة السابعة والعشرون

تاني يوم الصبح
نادرة صحيت بدري قبل حسن، ابتسمت بهدوء و هي بتبص لبحر اللي نايمة بأريحية.
قامت من جانبهم بهدوء خرجت من الأوضة و راحت الحمام تاخد دش.
بعد مدة كانت واقفه في المطبخ بتجهز الفطار لحد ما الساعة دقت سبعة، بدات تخلص بسرعة قبل ما هم يصحوا
بعد ربع ساعة تقريباً
خرج حسن من الأوضة و هو ماسك ايد بحر و بيتكلموا و باين عليهم الاندماج
نادرة بسرعة:
=عيني يا عيني ايه الجمال دا على الصبح
حسن ابتسم و هو بيرفع بحر و قعدها على رخام المطبخ
=صباح الخير يا قمر
نادرة بابتسامة :
=صباح النور يا سي حسن… صباح الجمال يا بحر
بحر بابتسامة:
=صباح النور يا نادرة… انتي صاحيه من بدري؟

كنتي صحيني ممكن اساعدك
نادرة بجدية و حنان :
=متشغليش بالك أنتي أنا أصلا نومي خفيف
حسن بمقاطعة:
=و الله يعني اللي بتنام لحد الساعة عشرة دي نومها خفيف
نادرة بغيظ:
=بس كنت بصحي أعملك الفطار و اقعد معاك لحد ما بتروح الورشة و بعدها برجع أنام
حسن و بحر ضحكوا على شكل نادرة و هي ماسكة المعلقة و رفعها في وشه و بتتكلم بسرعة
نادرة بضيق:
=أنا غلطانة أصلا أني قولتلك اني بصحي متأخر بس أنا اتعودت على كدا طول عمري في بيت بابا
حسن ابتسم بخبث و هو بيقرب منها
=يا عيني عليكي يا قطة أنتي هتعيطي و لا ايه
نادرة بضيق و زعل :
=على فكرة أنت رخم
حسن حط ايده على كتفها و هو بياخد من البطاطس المقلية و بيدي منها لبحر اللي اكلتها و هي بتتفرج عليهم و في ابتسامة صغيره على وشها
حسن
=على فكرة أنا بقا بهزر و بعدين ايه شغل العيال دا هتعيطي بجد
نادرة :على فكرة دي رخامة بجد يا حسن و بجد أنا زعلت
حسن طبع بوسة على خدها
=طب على فكرة أنا بنكوشك بس مش أكتر و بعدين أعمل إيه شكلك بيكون حلو لما بتتعصبي مش بذمتك يا بحر شكلها بيكون حلو
بحر بابتسامه واسعة :
=آه و مناخيرها بتحمر اوي
حسن :
=اهوه شوفتي عرفتي بقا أنك ظلماني
نادرة :
=لا تصدق ظلمتك يا واد يا برئ

حسن بخبث و طريقة شعبية
= البراءة عنواني يا أبلتي
نادرة ضحكت على شكله
حسن اتنحنح بجدية :
=أنا كدا هتاخر… الفطار جاهز؟
نادرة :
=ايوة هحطه على السفرة ياله بينا…. هات الخس و الجرجير من عندك
طلعت من المطبخ و هي شايله صنيه عليها الفطار و حسن و بحر وراها
قعدوا يفطروا لكن نادرة مكنتش عايزاه تاكل و حاسه بمغض بسيط
حسن لاحظ انها بتحاول تاكل بس علشان ميلاحظش
حسن بجدية :
=نادرة أنتي كويسة؟ مالك؟
نادرة :
=مفيش يا أبو علي أنا كويسة بس ماليش نفس أكل.
حسن اتنهد بحزن و مسك ايدها :
=طب معليش حاولي تاكلي علشان الدواء بتاعك قوليلي عايزاه حاجة معينة
نادرة :
=بص بس متزعقش أنا نفسي رايحة أني أكل أي حاجة فيها شطة كتير اوي اندومي مثالا و احطه شطة… او لسان العصفور و عليه شطة كتير او أي أكله فيها شطة بجد نفسي فيها
حسن أكتفي بنظرة حادة كانت كفيلة أن نادرة ابتسمت بتوتر
=خالص مش مشكله بلاش الاندومي و الشطة خلاص صلي على النبي كدا يا باشا
حسن بجدية حادة:
=النهاردة أن شاء الله هتصل بيكي تجهزي علشان نروح للدكتورة لان الصراحة مش مطمنلك
نادرة :
=على فكرة دي دكتورة شاطرة و معروفة و كمان مرجانة لما كانت حامل كانت بتابع معها
و ثانياً أنا مش تعبانة علشان اروح للدكتورة انا كنت عندها في اليوم اللي رجعت فيه البيت معاك يعني من اسبوعين تقريباً .
حسن بجدية :
=اللي قولته يتنفذ يا نادرة بدون كتر كلام لان أنا للأسف مش بحب الكلام الكتير بيعصبني

نادرة ابتسمت بدلال و هي بتقرب من السفرة، سندت رأسها على كف ايدها بخبث و دلال :
=حتى كلامي يا سونه
حسن بصلها و غصب عنه ابتسم و رد بخبث
=كله إلا كلامك يا قلب سونه
نادرة ابتسمت بخجل و بدأت تاكل
بحر بحزن:
_هو أنتي تعبانة يا نادرة؟
نادرة بسرعة:
=لا يا أميرتي أنا كويسة الحمد لله بس في نونو صغير بيكبر جوايا
بحر بحماس:
=نونو صغير …. طب هيجي أمتي؟
هو أنا ممكن العب معه زي ما بتخليني العب مع بوسي
نادرة ابتسمت بحب و هزت رأسها بالموافقة
=هنلعب معه انا و أنتي و بوسي و أبو علي بس لما يجي بقا علشان لسه بدري
بحر :
=أن شاء الله هيجي بسرعة و أنتي هتكوني كويسة
حسن :
=يارب يا ست بحر يا رب
ياله بقا نفطر بدل الكلام
****************
بعد مدة
نادرة كانت بتنضف البيت و بحر قعدة أدام التلفزيون بتتفرج على الكرتون اللي نادرة جبته ليها، قاعدة جانب قطة نادرة و هي بتتفرج بحماس
نادرة بهدوء:
=عنيكي هتوجعك يا بحر ارجعي وراء شوية
بحر هزت راسها و رجعت لكن قامت بعد شوية لما سمعت جرس الباب بيرن
فتحت الباب بصعوبة بسبب طولها.
جليلة كانت متخيلة أنها هتشوف نادرة لكن استغربت لما بصت للبنت الصغيرة اللي فتحت ليها الباب
جليلة بحدة؛
=أنتي مين و فين نادرة؟
بحر بصتله بخوف و رجعت بصت في الأرض بتوتر بطريقة خلت جليلة تضايق و تخاف على نادرة، دخلت البيت بسرعة و هي بتنادي عليها
=نادرة يا نادرة أنتي فين
نادرة من اوضه النوم ؛
=ايوة يا جليلة أنا جاية اهوه
جليلة فضلت تبص لبحر باستغراب لحد ما نادرة خرجت

=ازايك يا مرات ابويا تعالي انتي هتفضلي واقفه عندك كدا
جليلة بحدة :
=مين دي يا بت؟
نادرة بصت لبحر و ابتسمت بهدوء
=طب خلينا نتكلم جوا يا ماما…. بحر تعالي كملي الفيلم أنا مش هتاخر عليكي
بحر :
=ماشي.
نادرة اخدت جليلة بسرعة و دخلت اوضتها قبل ما تقول حاجة تضايق بحر
جليلة:
=ادينا بقينا لوحدينا مين دي بقا يا هانم؟
نادرة :دي بحر
جليلة :
=و الله بحر! تصدقي مكنتش أعرف
مين بحر يعني انطقي هو أنتي هتنقطيني
نادرة بهدوء
=طب اهدي بس يا جليلة بالله عليكي
جليلة:
مش ههدا الا لما افهم مين دي
نادرة :
=طب اقعدي بس و وطي صوتك بالله عليكي
جليلة قعدت بغيظ و نادرة قعدت ادامها
=بصي يا جليلة بحر تبقى بنت يتيمة متعرفش أهلها و لا ليها حد أنا و حسن قررنا نتكفل بيها و بتربيتها و صدقيني دي طيبة اوي و جميلة
جليلة بسرعة:
=تتكفلوا بمين يا بت أنتي بتستعبطي هو أنتي و جوزك اد مصاريف انكم تتكفلوا بحد
و كمان أنتي حامل و لسه بعد الولادة ان شاء الله في مصاريف كتير بتيجي و البنت دي لو هتدخلوها مدرسة هتصرف اد كدة
.. لا طبعا مينفعش تتكفلوا بيها
متنسيش يا نادرة حسن ميكانيكي يعني رزقه على الله و لو هو وافق فأكيد علشان مش عايز يسيبها في الشارع و تلقيكي انتي اللي طلبتي منه دا ف مش حابب يرفضلك طلب

أنتي فكرك مصاريف البيت دي حاجة سهلة
دلوقتى أنتي مش حاسة بدا لأنكم لسه معندكش اولاد
لكن لما تخافوا و يبقا عندكم طفلين مثالا هتندموا انكم جبتوا البت دي من الشارع لا تعرفوا تصرفوا عليها و لا على ولادكم
و حسن الحمل هيبقى تقيل عليه اوي،
غير كدا الناس هيقولوا ايه؟!
هيقولوا راحوا جابوا بنت من الشارع مش عارفين لا أصلها و لا فصلها علشان يربوها
و اللي هيقول أكيد مراته عندها مشكله في الخلفة علشان كدا جابوها
و اللي هيالف الف حكاية و التانية
لا طبعا انا مش موافقه البت دي لازم ترجع الشارع.
نادرة بعقلانية :
=في ايه يا جليلة براحة
أولا ممكن توطي صوتك معليش
بصي يا ست الكل أنا فعلا اللي طلبت دا من حسن بس دا كان بسببك انتي
جليلة باستغراب:
=أنا؟!
نادرة :
=ايوة طبعاً بسببك لأن انتي اللي علمتيني أن الحياة لازم يكون فيها رحمة و حب
أنتي اللي بسببك حسيت أنك أمي رغم كل خناقتنا و كلامنا الدبش
يمكن لأنك اللي قررتي تربى بنت زي زمان مع اني فعلا مش بنتك يا جليلة
جليلة :
=بس حتى لو مش بنتي أنتي بنت موسي و بعدين يا نادرة أن انتي استحملتي دلوقتي و حبيتيها بعد كم سنة ممكن تكرهي تصرفك دا و تحسي ان البنت دي مكنش ينفع تجبيها من الشارع
نادرة بمحايلة :
=جليلة بالله عليكي
أنا عارفة أن مصاريف هتزيد شوية لكن فكري فيها يا جليلة دا ربنا عز وجل بيكرم الشخص اللي بيعمل عمل خير بسيط ما بالك برعاية طفل
و أنا عندي ثقة كبيرة في ربنا ان هيرزق حسن من الوسع علشان هو طيب و علشان دا رزق بحر هي كمان رزقها مكتوب لها صدقيني ربنا مطلع علينا و يمكن ظروف حسن بسيطة دلوقتي لكن ان شاء الله هيرزقه خير و بعدين أنا بابا كتب ليا معرض الأجهزة حتى لو الدنيا ضاقت بينا اوي ممكن اخد شهريه تساعد في مصاريف البيت

جليلة :
=و فكرك جوزك هيوافق أنك تصرفي عليه مثالا
نادرة:
=لا… بس برضو لا يمكن يتخل عن بحر علشان هو بيحب ربنا أوي و بيحب اي حاجة تقربه ليه
حسن ابن حلال يا جليلة
جليلة :
=علشان هو ابن حلال أنا بقولك بلاش تعملي حاجة تضغط على جوزك و تحسسه انه ممكن يقصر معاكم و بلاها موضوع البنت دي و بعدين أنتي كم شهر و هتخلفي و هيبقى كل اهتمامك بابنك او بنتك و البنت مش هيبقى ليها لازمة
نادرة بضيق و حزن:
=بلاش تتكلمي كدا يا جليلة علشان الطريقة دي بتضايقني
و ادعيلي بس ان الحمل يكمل على خير
محدش عارف نصيبه ايه
اه لما اخلف هكون مهتمة اوي بطفلي بس صدقيني مش ههمل بحر
و بعدين في ايه يا جليلة انتي عايزانى ارمي بنت عمرها خمس سنين في الشارع لكلاب السكك، انتي شايفة ان البنت دي هي اللي هتعمل أزمة كبيرة يعني
مصاريفها هي اللي تخليني انا و حسن نشحت مثالا
دا ربنا هو اللي بيرزق.
دا انتي اللي المفروض تدعميني و تساعديني في تربيتها
دا يمكن عملنا الحلو دا هو اللي يوقف لولادنا ولاد الحلال و بعدين دي دعاء نفسها لما عرفت فرحت جدا و طلبت مننا اننا راعيها و نهتم بيها و انتي بتقولي لي ارجعها الشارع تاني
جليلة بخوف
=طب اهدي يا حبيبتي الانفعال مش حلو علشانك، صدقيني أنا بس خوفت عليكي
نادرة :
=أنا كويسة و الله العظيم بس ادينا كلنا فرصة… ادي للبنت دي فرصة تلقى البيت الهادي و الأمان اللي افتقدته في الشارع و اديني أنا فرصة أعمل حاجة أنا نفسي فيها و حابها
جليلة بتنهيدة:
=ماشي يا نادرة و انا هقول لابوكي و هحاول أفهمه بس على الله يفهمني….بس قوليلي البنت دي شقية و لا هادية…. بتتعبك
نادرة بابتسامه:
=لا والله دي هادية خالص و جميلة.. طب اقولك تعالي نقعد معها برا و اقعدي أنتي معها و صدقيني هتحبيها اوي
جليلة :ماشي
جليلة خرجت مع نادرة لقوا بحر بتتفرج على الكرتون بهدوء. قعدت معها و نادرة سابتهم و دخلت المطبخ
جليلة كانت بتتكلم مع بحر و بتحاول تعرف عنها أكتر، حست بالراحة معها و أنها فعلا طيبة جدا
جليلة بمرح:
=طب ايه رايك بقا تسيبي نادرة دي و تيجي معايا انا البيت مش انا احلى منها

بحر بابتسامه :
=انتي طيبة بس نادرة احلى منك هي طيبة اوي هي و حسن و يخلوني انام معاهم و كمان بلعب بالألعاب و كمان بتفرج على الكرتون و نادرة بتخاف عليا ان عنيا توجعني لو قربت من التلفزيون اوي
و اشتروا ليا فساتين حلوة اوي و انا عمري ما كان عندي كل الحاجات دي علشان كذا أنا بحبهم
جليلة ابتسمت بود و هي بتسمعها عدي وقت لطيف بينهم و نادرة بتابعهم من المطبخ و هي سعيدة و برضو خايفة من كلام جليلة ان بعد كم سنة يجي اليوم اللي تقصر فيه في حق بحر و تكره قرارها دا و دا هيكون اسوء حاجه ممكن تحس بيها
لكن من جواها كانت عارفة ان اللي ربنا عايزه هيكون و قررت تسيب كل حاجة لوقتها
ضحكت للحظات و لأول مرة تحس انها بدأت تنضج في أفكارها يمكن كانت بتحب تفكر تلقائية و تهور زمان لكن دلوقتي في حاجات كتير اتغيرت
حاجات كتير بصت عليها من منظور تاني
يمكن بسبب حسن؟!
جليلة مشيت بعد ساعتين تقريباً بعد ما جهزت الغداء مع نادرة و معاهم بحر.
نادرة كانت بتضفر شعر بحر و هم قاعدين في أوضة بحر لحد ما موبيل نادرة رن باسم حسن
نادرة :الو
حسن :نادرة أنا في طريق البيت اجهزي و جهزي بحر خلينا نروح الدكتورة علشان نطمن
نادرة:حسن أنا كويسة دا عادي
حسن بحدة: اجهزي و جهزي بحر ياله
هستناكي تحت البيت
نادرة بغرور:
=لا مش هنزل… أطلع أنت هستناك
حسن بابتسامة:
=اي أوامر تانية يا هانم… ما هو أنا السواق بتاع دادي
نادرة :
=اه ياترى و حضرتك جاي تجيب معاك عصير لأن الجو حر للأسف و مفيش عصير في البيت
حسن:
=حاضر حاجة تانية… شوفي لو بحر عايزاه حاجة
نادرة سكتت شوية و رجعت كلمته تاني :
=بتقولك متتاخرش
حسن :
=ماشي يا ست بحر من عيوني.
نادرة:ياله بقا بسرعة…

******************
حسن وصل البيت بعد مدة
طلع البيت لقى السفرة جاهزة
نادرة :ها نتغدا و لا نروح بسرعة
حسن بجدية و هو بيديها الاكياس:
=ما انتي حطيتي الغداء خلاص
نادرة اخدت الحاجة و دخلتها المطبخ و رجعت تاني
بعد مدة
وصلوا الاتنين للعيادة بعد ما ودوا بحر عند دعاء اللي حبت بحر بسرعة جدا و كانت فرحانة من البداية بقرارهم و فرحت أكتر لما عرفت بخبر حمل نادرة
نادرة كانت قاعدة مع حسن في العيادة الزحمة فيها ناس كتير بس معظمهم ستات قليل لو فيه رجالة
الممرضة ندت على اسم نادرة اللي دخلت مع حسن بعد لحظات
بعد دقايق
حسن كان ماسك ايد نادرة و هو مبتسم و شايف الجنين على السونار كان فرحان جدا لأول مرة يحس بالسعادة دي حتى قبل ما يجي للدنيا
الدكتورة :
=على فكرة حالتك مستقرة جدا يا نادرة يعني مفيش داعي للقلق دا كله
نادرة :
=و الله قلت كدا يا دكتور بس نقول ايه بقا حُكم القوي….
حسن بصلها و مردش:
=طب يا دكتورة غادة هي ميولها كلها في الأكل بتعصبني
يعني دايما بتحب الأكل اللي فيه شطة كتير و الاندومي مثالا و أكل الشارع
غادة بجدية :
=لا طبعاً مينفعش الحاجات دي خالص دلوقتي لان مش هياثر عليكي لوحدك
و بالذات أكل الشارع و الأندومي
و بعدين هي الحجة جليلة معقول تسيبك تاكلي من الشارع؟!
نادرة :
=لا بس أنا مبقولش لحد اصلا و بعدين ايه من الشارع دي بيكون في عربيات بتاع أكل
غادة:
=نادرة الموضوع مش هزار بجد بلاش تخاطري…. و بالنسبة لحبك للشطة فأنتي ممكن تحطي نسبة صغيره على الأكل في وجبة واحدة بس و مش كل يوم
نادرة بحماس:ماشي
طب هو ممكن اعرف نوع الجنين امتي
غادة:
=انتي مستعجله ليه… انتي كدا هتبداي في الشهر التالت و ان شاء الله تعرفي قريب بس المهم تتابعي معايا الحاجات اللي انا كتبهالك

بعد مدة خرجوا سوا من العيادة
لكن نوال كانت قاعدة برا منتظرة تدخل للدكتورة اول ما شافتهم حست انها متضايق و مش فاهمة في ايه و هل ممكن تكون حمل
قامت بسرعة راحت السكرتيرة
=بقولك يا سارة هي نادرة بتعمل ايه هنا
سارة :
=هتكون بتعمل ايه في عيادة دكتورة نساء يا حضرة المحامية هو دا سؤال يعني
بتابع الحمل تقريبا كدا في التاني او التالت الله اعلم
نوال بكراهية و حقد لنفسها :
=حامل و خالتي جليلة مخبية علينا ايه خايفه احسدها بعد ما ابني مات قبل ما يتولد
ماشي يا خالتي
نوال خرجت من العيادة و هي متغاظة من نادرة و هي شايفه ان حظ نادرة دايما بيكون احسن منها
في الجمال نادرة آجمل…
رغم ان نوال كملت تعليمها و نادرة خلصت مدرسة ثانوي صنايع و قررت متكملش و قالت إنها مش بتحب التعليم و لا بتفهم فيه حاجة
نوال شايفة ان نادرة متدلعة زيادة عن اللزوم و شقاوتها سبب في ان معظم الناس يحبوها
رغم ان نوال اتجوزت شخص مكانته الاجتماعية احسن من حسن و كمان بيعاملها كويس لكن هي دايما حاسة بعقدة نقص جواها

كانت سبب في انها ترد معاملة جوزها بطريقة مش كويسة خليته بقا يتضايق منها
لأنها دايما بتقارن حياتهم اللي هي بتبوظها بحياة اصحابها المحامين اللي بالنسبة ليها احسن منها و سعداء اكتر منها
متعرفش انها سبب في فشل علاقتهم و سبب الحزن و الكآبة اللي فيها
لأنها حاصرة نفسها مع الناس في حياتهم
بصت بس على السعادة اللي في حياتهم بدون ما تهتم ان لكل شخص نصيب من السعادة و الحزن
كانت عايزاه تبقى هي اللي دايما أهم و هي اللي محبوبة و الأجمل و كمان تتعامل مع الناس بطريقتها المتكبرة دي و تفرض عليهم رأيها.
******************
حسن و نادرة و صلوا بيت دعاء لقوها قاعدة هي و تبارك مع بحر و بحر بتضحك بسعادة مع تبارك
حسن :السلام عليكم ورحمة الله
=و عليكم السلام ورحمة الله وبركاته…
دعاء :ادخلوا يا ولاد.. قولولي عملتوا ايه عند الدكتورة
نادرة :
=طمنتنا و قالت إن حالتي مستقرة بس ابنك هو اللي موسوس
حسن:دا أنا؟!
نادرة :اومال عندك شك و لا ايه
حسن لنفسه :
=أنا مش هتعصب انا مش هتعصب صبرني يارب…
نادرة :طب اقعدوا أنا عاملة بقا سمك و رز صيادية تاكلوا صوابعكم وراهم و كمان فيه ملوحة و فسيخ
نادرة بحماس :
=فيه بصل اخضر ؟!
دعاء بابتسامة:
=طبعا هو الأكل دا يحلي من غير البصل الأخضر و اللمون

نادرة :طب بالاذن أنا يا حسن
سبته واقف و دخلت المطبخ بمنتهى الاريحية كأنه بيتها
حسن :احنا مش متغديني مرة يا بت
نادرة طلعت من المطبخ و هي شايلة طبقين فيهم سمك مشوي
=بتصلي في الأكل يا حسن؟
كملت بدموع مزيفة و خبث
شوفتي يا ماما بيبصلي في الأكل و انا باكل علشان مين يعني مش بسبب ابنه
دعاء بسرعة و هي بتحضنها :
=متعيطيش يا حبيبتي… و انت يا حسن احترم نفسك أنا بقولك اهو… و بعدين تاكل براحتها كل اللي هي عايزاه
نادرة كانت بصه لحسن و بتلاعب حواجبها بخبث و هي مبتسمة
حسن اتكلمت من بين شفتيه بغيظ:
=مثلي يا أختي مثلي لما نرجع بيتنا…
معليش يا ماما انا بس كنت خايف عليها تفطس من كتر الاكل
نادرة:غلس اوي علي فكرة
تبارك :خلاص بقا يا حسن ياله الاكل هيبرد
حسن خرج للبلكونة الواسعة كانت بحر قاعدة على مخدة أدام الطبلية و نادرة بتحط الاطباق
حسن :
=الفسيخ دا متاكليش منه كتير احنا لسه جايين من عند الدكتورة انتي سامعه
نادرة:
=يعني ماكولش
حسن :
=عندك سمك و رز و سلطة و طحينة و بصل كُلي اي حاجة من دي بس ابعدي عن الملوحة و الفسيخ
نادرة :
=على فكرة دا فسيخ بيتي امك اللي عامله
حسن :
=صبرني يارب.. ماشي بس مش عايز طفاسة
نادرة بصتله بلامبالة و قعدت جانب بحر و هي بتبص للفسيخ و البصل الأخضر بطمع و خبث
بعد لحظات كانوا كلهم قاعدين حوالين الطبلية و حسن بيحط لبحر السمك في طبقها بعد ما اتأكد أن مفيش فيه سيف
بص لنادرة اللي بتاكل بشراهة و شهية مفتوحة خليتهم يستغربوا و في نفس الوقت عايزين يضحكوا على شكلها
حسن بقرف:
=بت بت!!براحة و بعدين ايه الفجع دا انتي خارجة من مجاعة
شيلي الفسيخ دا من ادامها يا ماما انتي بطني بتقلب
نادرة رفعت عنيها بخبث و هي بتاكل بصل اخضر. رفعت راسها و هي بتعصر الليمون في بوقها بطريقة خليتها تقشعر
نادرة باستغراب:
=هو أنت مش بتحب الفسيخ و الرنجة يا حسن؟!
دعاء ضحكت بصوت واطي و هي بتبص لحسن اللي وشه قلب الوان
=لا و مش بقبل ريحتهم اصلا و كمان دي عبارة عن سموم
دعاء بخبث
=أصله أكل منه و هو صغير و قضى طول اليوم بطنه بتوجعه و حالته بالبلاء
نادرة باستمتاع و هي بتاكل
=و الله العظيم مفيش حاجة بتكيفني زي الاكله دي
حسن بضيق:
=طب كفاية كدا أنتي مش هتستحملي
نادرة سكتت فجأة و بصتله ببراءة و حزن مزيف

=يعني مش هتاكل معايا منه… افرض فيه حاجة اتعب يعني
حسن بلامبالة:
=لا يا عنيا تبطلي اكل منه خالص انا مباكلش منه
نادرة بخبث و براءة:
=يعني افرض انا بتوحم دلوقتي على فسيخ و طلع مش حلو او تعبني هتستحمل بهدلة المستشفيات معايا
حسن جز علي سنانه بغيظ و همس لبحر
=انتي اكلتي فسيخ حلو و لا ايه اصل انا ماليش فيه
بحر هزت راسها و هي بتمضغ الاكل باستمتاع
=حلو اوي يا أبوعلي
حسن بسرعة و حماس
=اهي بتقول حلو يبقى على بركة الله ما تكتريش بس
نادرة بحزن و غيظ؛
=يا حسن دوق الاكل
حسن بصلها بطرف عنيها و بص للاطباق اللي ادامه، بلع ريقه بتوتر
و حاول يأكل و هي بيحاول ميشمش الريحة
بعد نص ساعة
بحر و نادرة كانوا بيضحكوا و هم بيتفرجوا على حسن اللي لسه قاعد في مكانه و بياكل من الفسيخ و البصل الأخضر بنفس طريقة نادرة قبل شوية
بحر :
=يا ابو علي مش أنت بتقول سموم و بتاع
نادرة بضحك و هي بتهز كتفها بحركة عفوية
=ما شاء الله يا استاذ حسن أنت هتفضل قاعد تاكل كدا بقالك نص ساعة أو اكتر مش قلت مش حلو و مش عارفه ايه
ياله قوم كفاية كدا، خلينا نلم الزفارة و الحاجة دي”
حسن باستمتاع :
=قوموا انتم و انا هشيل بعد ما اخلص… حلو اوي الفسيخ دا يا ماما أنت جبتيه منين؟
دعاء بسخرية:
=انا اللي عاملة يا حسن

تبارك ضحكت و هي بتقعد على الكنبة بعد غلست ايدها
=انا اول مرة اشوف حسن بياكل رنجة و فسيخ دا كان أوقات بيزعق لما يتحطوا ادامه على الطبلية و يخرج من البيت لحد ما نخلص اكل و كمان نرش معطر و بخور
نادرة هزت كتفها بفخر
=ادعولي
بعد وقت
حسن كان بيلم الأكل هو و تبارك
نادرة و بحر كانوا بيلعبوا شطرنج و نادرة بتعلمها ازاي تلعبها و خصوصا انها كانت بتلعبها مع موسى كتير جداً
بحر بغيظ:
=أنتي قفلتيها عليا اعمل ايه دلوقتي
نادرة ببساطة و مرح:
=حركي الحصان و كملي انتي و شطارتك
بحر بصت للعبة بتفكير قاطعهم حسن و هو بيحرك قطعة في اللعبة قفل اللعبة على نادرة و بخبث
=كش ملك
نادرة بغيظ و صوت عالي
=أنا كنت هكسب
بحر صقفت بسعادة و هي بتقعد جانب حسن
=برافو عليك يا حسن
نادرة :
=أنت خسرتني اللعبة

حسن ؛
=اامم بس انا كسبت ف مش مهم خسارتك لانك جوا اللعبة عدوتي يا انا أموت او أنتي
نادرة :
=بعيد الشر عني أنتي بتفول عليا انا لسه صغيرة و في عز شبابي
حسن بابتسامه :
=بس برا اللعبة أنتي الهواء اللي بتنفسه و بعدك عني بيحبسني جوا ضلمة مخيفة و خنقة مبعرفش اخرج منها
نادرة سكتت و معرفتش ترد
بحر بهمس:
=اثتبتت يا معلم
حسن بضحك :
=انا قلت كدا برضو
نادرة بغيظ:
=اووف…. بطل تضايقني يا حسن و بعدين مش هلعب معاك تاني.
دعاء :
=بس بقا يا حسن و يالة قوم اغسل المواعين و أنتي يا تبارك أعملي الشاي
تبارك :
=كالعادة انا اللي هعمل الشاي حاضر يا ماما
دعاء :
=اتفضل يا استاذ حسن
حسن قام بهدوء و دخل لجو الشقة
نادرة بذهول :
=دا بجد هو هيغسل المواعين؟! طب انا ممكن ادخل اساعده
دعاء :
=لا سيبك منه هو أصلا متعود على غسيل المواعين و بعدين دول هم الأطباق اللي كنا بناكل فيها مش كتير يعني
نادرة :
=متعود ازاي هو كان بيغسل المواعين قبل الجواز
دعاء و هي بتقعد جانبها :
=كان بيروق الشقة كلها و بيجهز الاكل كمان بس دا لما بكون تعبانة

غير كدا بيصعب عليا اخليه يجي من الشغل يعمل حاجه
نادرة ابتسمت براحة و هي بتمسك ايدها
=حسن طيب و أنتي عرفتي تربيه
دعاء ابتسمت بحب و هي بتربت على كتفها بحنان
=الولاد نعمة يا نادرة و تربيتهم عمل عظيم لان احنا مش مهمتنا بس ناكلهم و نشربهم
لا يا حبيبتي التربية في حد ذاتها عمل عظيم و أجرها كبير عند ربنا
نادرة ابتسمت و هي بتبصلها
بعد شوية
خرجت تبارك و هي شايلة صنية الشاي و خرج معها حسن و هم بيتكلموا
نادرة:
=على الله تكون نضفت المواعين يا أخينا
حسن:
=مجتيش تتفرجي عليا يعني
نادرة :
=خفت اني احرجك
حسن بسخرية
=خوفتني تحرجيني و لا خفتي اقولك تغسلي انتي الاطباق
نادرة :
=مبحبش غسيل المواعين يا حسن
تبارك:
=الشاي بالنعناع….
بحر قامت وقفت على الكنبة جنب حسن قربت منه و همست في ودنه بلطف كأنها بتطمن له هو
=يا ابو علي أنا عايزاه عصير من اللي مامتك جابتلي منه اول ما جيت مش بحب الشاي.

حسن ابتسم بود :
=حاضر يا ست بحر… بقولك يا ماما
في عصير من اللي كنتي جايبة منه لبحر
دعاء :
=اه
حسن:
=طب ممكن تجيب لبحر منه لان الشاي مش كويس ليها لأنها صغيره
دعاء :
=حاضر يا حبيبي من عنيا…
بحر صقفت بسعادة و هي بتقعد جانب حسن اللي غمز لنادرة بشقاوة و هي ابتسمت بحب……
……………………………….
بعد كم يوم
حسن كان واقف أدام المرايه وهو بيزرار قميصه و بيجهز لأنه هيروح طنطا في أهم مشوار بالنسبة له حاليا
نادرة :
=ما بلاش يا حسن تسافر أنا مش مرتاح قلبي بيقولي ان السفرية دي مش هيجي من وراها خير
حسن لف و بصلها و هو مبتسم :
=متقلقيش كدا ان شاء الله خير و بعدين انا بس مش محتاج غير دعواتك ليا ان ربنا يوفقني أنا و عامر في المشوار دا بالذات يا نادرة
صدقيني لو حصل حياتنا هتتنقل ناقلة تانية خالص و أنا حقيقي محتاج أني اكمل المشوار دا
نادرة :
=طب هتقعد في طنطا اد ايه؟
حسن :
=و الله مش عارف ممكن يومين تلاته او اسبوع بالكتير

اللواء كمال قاعد دلوقتي في فيلاته في طنطا و دا انسب وقت اعرف اوصله فيه و أعرض عليه عرض الخواجة اللي اسمه نيكولاس
و الصراحة انا لما قعدت معه اتأكد أنه فعلا عايز المراكب و بالمبلغ اللي تستحقه
نادرة:
=أنت متأكد من الخواجة دا و كمان أنت بتقول ان في ناس واقفين في البيعه علشان متكملش
حسن بابتسامة:
=اللي ربنا عايزة هيكون يا نادرة لو ليا رزق فيها انا و عامر صدقيني هناخده و بعدين مش يمكن دا رزق اللي في بطنك و الغلبان اللي نايمة في اوضتها دي
ادعيلي بس يا نادرة
نادرة :
=روح يا حسن اللهي ربنا يرزقك من الوسع و يفتحها عليك و يوقفلك ولاد الحلال و يطمن قلبك و يسعدك يا رب
حسن حضنها و غمض عنيه
=ربنا يحفظك يا نادرة…. المهم تخلي بالك على نفسك و انا هكلمك كل شوية اطمن عليكي أنا كلمت امي و هي قالت إنها هتيجي تقعد معاك و تخلي بالها عليكي
و كمان جليلة قالت إنها مش هسيبك
لو تخافي تقعدي لوحدك ممكن تروحي بيت ابوكي
نادرة :
=متخافش عليا اطمن انت و بعدين انا مش هسيب البيت
حسن :
=طب مش نفسك في حاجة اجيبهالك معايا من طنطا
نادرة بحماس:
=المدلعة… عايزة المدلعة بيقولو حلوة اوي في طنطا

حسن بمراوغة:
=و الله ما في حد متدلع هنا غيرك انا بقول ناجل السفر
نادرة :
=عامر بيرن عليك زمانه تحت
حسن بضيق:
=الواد دا بيجي في اوقات غلط
نادرة :
=معليش يا حبيبي بس المهم تخلي بالك على نفسك و بلاش يا حسن تقرب من النار و لو حست انك داخل في مكان مش بتاعك و الناس دول هياذوك بالله عليك ابعد يا حسن علشان خاطري
حسن باس رأسها و طمنها
خرج من اوضتهم و دخل طمن على بحر اللي كانت نايمة و خرج بعد ما ودع نادرة

يتبع…

لقراءة الفصل التالي : اضغط هنا

لقراءة الرواية كاملة اضغط على : (رواية نادرة قلبي)