رواية ميراث نور الفصل السابع والستون 67 بقلم لينا بسيوني
رواية ميراث نور الجزء السابع والستون
رواية ميراث نور البارت السابع والستون
رواية ميراث نور الحلقة السابعة والستون
” ساعة ”
” نور ”
الحياة أختلفت تماما لما أتنقلنا القاهرة …
بينى وبينك طلبتها ونولتها …
كان نفسى أرجع اعيش طبيعى زى باقى الناس بعيد عن السحر وحروب الجان اللى أثرت عليا نفسيا وجسديا , والفرصة جاتلى .
عقد عمل فى شركة تطوير ألكترونيات عالمية واللى ماسك الفرع بتاعها فى مصر لواء مهندس كان صديق لمعتز باشا الله يرحمه .
كان عارف من معتز باشا أنى عقلية فذة فى الكهربا والاكترونيات فعرض عليا الشغل معاه وأدير قسم التطوير الالكترونى بمرتب مجزى جدا .
وافقت وحمدت ربنا من جوايا أن حنوش ومارو رفضوا يساعدونى فى الخيمة !!
فكيت الوديعة اللى كنا بنصرف منها وأشتريت بيت كبير يجمعنا كلنا .
مارو راح درس فى كلية الطب بعد ماحنوش زورله ورق الجامعة , الشئ اللى كنت رافضة تماما , كان نفسى نبدأ حياتنا الجديدة على نضيف من غير غش أو خداع , بس هعمل أيه ما باليد حيلة .
بعدها حسيت أن الموضوع عادى وجه بفايدة , خاصة بعد ما.نصير أندمج مع مارو وبقى يروح معاه الجامعة علشان يتعرف على بشر ويتعود على حياته الجديدة كبنى آدم .
أول يوم روحت فيه الشغل فى الشركة , سألت على الواء سالم , أستنيت عند السكرتيرة وأتصدمت لما شوفت شخص معين هناك !!
الدكتور اللى قفشنى بالموبايل فى لجنة الأمتحانات .. وقت ماكنت بغشش نيللى !!!
ياااااه أياااااام …..
مكنتش فاكر أسمه بس أول ماشافنى قاعد مع السكرتارية قرب عليا و قالى :
نور ناير !!
قولتله :
يااه يادكتور أنت لسه فاكرنى ؟!!
قالى :
فاكرك بس … أنا فاكر كل اللى حصل مابينا قدام المحقق القانونى , أيااام …قلبك أبيض .. أنت بتعمل أيه هنا ؟
قولتله :
جاى أقابل البشمهندس سالم مدير الشركة .
قالى بأستغراب :
يااااه .. سالم باشا مرة واحده .. خير فيه حاجة ولا أيه ؟ !!!
قولتله :
مفيش .. النهارده أول يوم ليا فى الشغل هنا .
قالى :
أنت هتشتغل هنا ؟!!
قولتله :
أن شاء الله .
قالى بفضول :
وهتشتغل أيه هنا ؟
قولتله :
همسك أدراة قسم التطوير و ال…
قالى وهو بياخد أنفاسه بصعوبة :
أنت المدير الجديد ؟!!
قطع كلامنا صوت السكرتيرة وهى بتنادى عليا علشان أدخل للمدير العام .
دخلت عنده المكتب ورحب بيا بعدها شرب قهوتة على عجالة وقالى :
مش هقولك تشرب أيه .. أنت تبقى تشرب براحتك فى مكتبك .. يلاه تعالا ورايا هعرفك على الشركة وعلى الموظفين اللى فى قسمك واسلمك الشغل .
بالفعل خرج من المكتب وخرجت وراه , الشركة كلها أتشدت مره واحده ، كنت مفكر الموضوع عادى فى الأول بس بعدها عرفت أن سالم باشا عمره ما سلم لحد الشغل بنفسه !!
ودانى مكتبى وعرفنى الناس اللى تحت أدارتى , واللى كان منهم الدكتور , فعرفت ليه , نفسه انكرش مره واحده لما عرف أنى هبقى مديره ….
الحياة كانت ماشية فى الشغل أحسن مما كنت أتوقع , كل المعدات والمهندسين الكفىء متاحين , مطلوب منى بس انغى أطور أو اجيب أفكار جديدة وبالفعل لاقيتنى بجيب أفكارجديدة وبالذات فى أسلحة ا لسيلف ديفنس
الدفاع عن النفس !! ..
لانها كان على قائمة الأكثر مبيعا فى الشركة…
زى مسدسات الدفاع عن النفس , والصواعق الكهربائية , أختصرت القطع وعملت أصغر صاعق كهربائى فى العالم!!!
بدل مسدس وبطارية وحوار كبير ,, أختزلتها فى حجر بطارية ساعة يد حاجة فى حجم حبة العدس !! بس أيه كربااج …
الإنسان العادى بيصعق وبيحس بالشلل التام وممكن أغماءه خفيفة عند 50 الف فولت ودى مش مضرة لآن شدة التيار الناتج عنها 16 أمبير بس …
الحجر اللى عملته بيقدر يولد لحد 500 ألف فولت … عشر أضعاف , بيتحط جوه ساعه مخصصه
ولو حصل هجوم من حرامية أو مغتصبين بتدوس على الساعة وبيخرج منها الحجر اللى فى حجم حبة العدس ويكهرب كل اللى حواليك ماعدا أنت !!
أحتكيت بعالم البرمجيات وأتصاحبت على مدير القسم ووسعت مداركى أكتر …
كنت سعيد بكل حاجة و بالعالم ده وحمدت ربنا أنه حققلى اللى نفسى فيه …
حياة طبيعية فى الحاجة اللى بحبها وبعيد عن السحر
الحاجة الوحيدة اللى فضلت ربطانى بالسحر هى القميص اللى لابسه واللى بقى هو وجلدى حته واحدة
الصراحة موفر معايا فى الهدوم ..
مكنتش بخاف غير من شخص واحد بس بعد ربنا ..
نورا بنتى واللى مهووسة بالسحر زى جدها ناير !!
فجرت المعمل بتاع المدرسة وقولت ماشى , الحمد لله جات فى الكيمياء مجاتش فى السحر , أنما أروح المدرسة الاقيها منيمه كل اللى فيها على المشمع !! ..وواهماهم أنها ساحرة !!
ده اللى مايتسكتش عليه ….
فى اليوم ده نزلت من الشغل بدرى والمفروض كنت أمضى على ورق أستيراد معدات للشركة , نسيت خالص وروحت لنورا المدرسة بالسندوتشات المفرولة علشان أعرفها أن قفشت كدبها وبالمرة أعرف هى مخبية أيه عنى ..
روحت لاقيت المديرة مسهمة وبتبصلى نظرات غريبة , معرفتش أفسرها هل هى نظرات اعجاب ولا عليها حاجةوملبوسة
.
خرجت من عند نورا وغمزت الساعى بخمسيناية وسيجارة وجالبى قرار جلابة الخراب !!
منك لله يانورا …
جريت على البيت وقلت لسندس أمها , قعدت تطبطب عليا علشان تهدينى !!!
قولتلها :
بنتك مش هتسكت إلا لما نتحبس … يعنى أنا بقول يارب وياحيطه دارينى , وعمالين نهاتى ونقول يانورا أنا وضعى بقى حساس ومش عايز حد يعرف أنى كنت ساحر
الاقى المدرسة كلها بطلابها بمدرسينها بيقولوا عليا دجال وعليها ساحرة !!
الطم !!
سندس قالت :
لا ياسيدى ماطلتمش ,,, أنا هلطملك !!
قولتلها :
بلا تلطمى بلا ألطم مش ناقصه فقر .. أحنا نلطم على قفاها لما تيجى …
وبالفعل جت ولطمنا على قفاها وحذرناها أن دى المرة الأخيرة , مفيش قدامنا غير كده , قدرى !!!
على دخلة حنوش أتغدينا كلنا مع بعض بشاميل وبانية وحبسنا برز بلبن
حنوش خد باله من الساعة الجديدة اللى لابسها
قالى والاكل فى بوقه :
غريبة الساعة دى !! دى ماركة ايه ؟!!
قلتله :
دى ماركتى ..
قالى :
ودى بتعمل إيه؟
قلتله :
العب باليه
كل يا حنوش دى أسرار
خلصنا أكل و أتفرقنا حنوش دخل لنورا ونصير ومارو نزلوا
وأنا جيت أريح سمعت تليفونى بيرن , بصيت على الشاشة لاقيت الدكتور , فتحت عليه فقالى فى التليفون :
أنت فين يابشمهندس ؟ أنت ناسى أننا مستنين المعدات الجديدة , النهارده الخميس ولو ملحقناش مش هنستلمها ألا الأحد , على مسؤليتك التأخير ده…
قطعت كلامه وقولتلها :
طيب انا جاى الشركة حالا و…
قطع كلامى وقال :
لآ مش هتلحق!
قولتله :
عادى أحنا معانا لحد 12 بالليل
قالى :
لحد 10 باليل والساعة دلوقتى داخلة على … مش هتلحق
ضحك وقال :
أنا هنا فى المقطم قولى على عنوانك بالضبط واان أجيلك ونختصر الوقت أنا معايا الورق ,,, أمضيه وأطلع , أى خدمة مريحك اهو يامديرى !!
أديتله العنوان شوية ولاقيته بيرن عليا
قالى :
أفتح البلكونة بتاعتك كده !!
فتحت البلكونة لاقيته واقف مستني بالعربية بتاعته وبيشاورلى نزلت من البيت قابلته , سلمت عليه وقولتله :
مش عيب برضة تبقى تحت البيت ومتطلعش تشرب حاجة
قالى :
أنا مش جاى أضايف يابشمهندس ,, امضيلى على الورق خلينى ألحق
مضيتله على الورق وشكرته
قالى :
لا متشكرنيش عيب عليك
قولتله :
والله عيب تبقى أول مره تزورنى و,,,
قطع كلامى , ركب العربية وقال :
مش وقته يابشمهندس
أنطلق بعربيته ولسه هدخل البيت لاقيت الكهربا بتقطع , أستغربت لآن كل البيوت اللى جنبنا منورة !!!
أندهشت أكتر لما سمعت صوت هبدة قوية وهزه خفيفة فى الأرض اللى تحت البيت , جريت بسرعة وبحذر ,
سمعت صوت أيسر !!!!! وهو بيقول :
المرة دى الناهية ياكلاب !!!
نورت الساعة وزررت القميص لحد آخره وأختفيت ..
مشيت بحذر وانا بدور عليهم , طلعت على السلم
سمعت صوت كأن حد بيجرجر حاجة !!!
شوفت أيسر من ضهره وهو بيجرجر مارو المغمى عليه وبيكومه جنب حنوش ونورا وسندس ونصير !!
أيسر أتلفت وشاف النور اللى طالع من الساعة ..
هجم عليا وأنا مختفى وجه يمسكنى ، أطلقت من الساعة أكتر من حجر كهرباء ورا بعض , مسكوا فيه وصعقوه ، آيسر أرتعش ووقع على الأرض وهو بيتنفض !!!
جريت بسرعة وشغلت محول الكهربا الاحتياطى , البيت كله نور تانى ..
جبت جنزير من اللى كان محضرهم أيسر علشان يكتفنا بيه وكتفته بيه ..
كان بيحاول يفوق , أطلقت عليه باقى الأحجار اللى فى الساعة فأتكهرب تانى وأغمى عليه , خد دش كهربا معتبر !!
لفيت الجنازير حواليه وربطه جامد ,وانا بقوله :
المره دى الناهية ليك انت يابن الكلب !!
بعد كده بدأت أفوقهم
************************************************
“مارو ”
فوقت وأندهشت لما لاقيت أبويا هو اللى بيفوقنى !!بصيت جنبه لاقيت أيسر متكتف بالجنازير !!
قبل ما اسأل أيه اللى حصل , لاقيت نصير بيسأل نفس السؤال بعد ما أبويا فوقه وفوق سندس ونورا وحنوش وأتطمن عليهم !!
جاوب وقال :
معرفش أيه اللى حصل , أنا كنت تحت البيت وسمعت صوت الكلب ده , دخلت كهربته وكتفته .
نصير باس أبويا وقال :
الله عليك يابو النور …
بص لأيسر اللى مغمى عليه وقال :
الكهربا تكسب ياروح أمك !!
حنوش قال :
طيب مستنين أيه يلاه نقتله !!
أبويا قال لخالتى سندس :
خدى نورا وخشى جوه ياسندس !!
هزت رأسها فى طاعة وأدت نورا على قفاها ودخلوا الاوضة!!
أول مادخلوا الاوضة , أبويا قال :
مش هينفع نقتله هنا
قولتلهم :
مش هينفع نقتله أصلا … هو الوحيد اللى يعرف التركيبة اللى بتعالج زيجا
بصولى بأستغراب فقولتلهم :
أنا نفسى أقطعه والله , بس أبن الكلب قال لزيجا قبل مايهجم علينا أنه معاه البلازما بتاعة عيد وأحنا محتاجينها فى علاج زيجا ولا هنسيب زيجا كده بعد كل اللى عملوا علشانا ؟!!
أبويا قال :
درء المفاسد مُقدم على جلب المنافع … والكلب ده مفسدة ولازم يموت مفيش حل تانى غير كده !!
نصير قال :
على ما اعتقد هو عمل العملية وبقى هجين زى ما انتوا شايفين شكلوا بقى عامل ازاى ، ودمه أسود , بصلى وقال :
أحنا محتاجين قلب هجين صح يامارو ؟!
قولتله :
صح !!
قالى :
يبقى نقتله وناخد قلبه ونركبه للواد زيجا وبكده يبقى درئنا المفاسد وجلبنا المنافع , وأحنا بناخد قلبه بقى هنعذبه لحد مايقول على مكان بلازما عيد علشان لو أحتجناها فى العملية …
هزوا راسهم بالموافقة ماعدا حنوش اللى كان عايز يشق رقبته وقتى !!
برأى الأغلبية خدنا أيسر متكتف و طلعنا بيه فى الدور التالث واللى فيه شقة فاضية ..
أمنا الشقة بتعزيمات وحاوطناها بدايرة تبطل السحر .
مارو حقن أيسر بحقنة وقالنا أنها تقدر تهبط فيل لمدة شهر !!
جنزرناه فى سرير وعزمنا على الجنزير والسرير وفصلنا نستجوبه ..
مارو كان بيديله حقنة بتفوقه لمدة ربع ساعه بس نعذبه فيها ويفصل تانى ..
أبن الكلب مكنش بيقول حاجة خالص
نصير قال :
انا مستغرب حاجة يا جماعة !! هو مش أيسر دا معاه شياطين ازاى مهجمش بيهم وهجم لوحده مع انه طلى التعزيمات اللى نقشينها !!!
قلتله :
السؤال هو ازتى دخل البيت وازاى عرف يشيل التعزيمات اصلا ،احنا مبندخلش حد غريب !! حتى محصل الكهربا والمايه بنعاملهم من بره الباب !!!
حنوش قال :
انا حاسس ان دا كله لعبة وأنه قاصد أن إحنا نمسكه.. أيسر خطير يا جماعة ولا انتوا ناسيين!
ابويا قال :
متهولش كدا يا حنوش من قوته ،هيعرف منين أن أنا معايا أحجار كهربا وهكهربه واسيطر عليه , إحنا قبضنا عليه وهو كان ناوى يقتلنا …
قلتلهم :
أيسر أول ما ظهر ..ظهر لزيجا , معقولة !!
قالوا كلهم فى صوت واحد :
معقول ايه ؟!!!
قلتلهم :
يكون تواصل مع زيجا قبل كدا وخلاه يمسح التعزيمات خاصه أن زيجا مبيعرفش يسيطر على قرينه وممكن يكون دا حصل ومش فاكر أصلا! !!
نصير قال :
تصدق ممكن !!! إحنا اغلب الوقت بنكون بره البيت وزيجا لوحده ممكن يكون أيسر جرجره بره البيت وقدر يأثر عليه
.
ابويا قال :
اى كان التفسير انا بدأت اقتنع بكلام حنوش ، أيسر لازم يموت وكدا كدا مش هيقولنا على مكان البلازما فاحنا ناخد قلبه وربنا يساهل .. مش انت تعرف تعمل العملبة يا مارو ؟!
قلتله :
اها اكيد اعرف بس الموضوع محتاج تجهيزات كتير
أبويا قال :
معاك وقت اد ايه يعنى تقدر تجهز فيه
قلتله :
يعنى اسبوع مثلا
قالى باستنكار :
اسبوع ايه !! بكرة تخلص و يموووت
نصير قال :
قدم المشيئة
قلتلهم :
إن شاء الله
حنوش قال :
انا قاعد جنبه هنا مش هسيبه
نصير قاله :
وانا هبدل معاك
قلتلهم :
وانا هبدا من دلوقتى أجمع المعدات وأحضر للعملية …
بالفعل ظبطت كل حاجة وعديت على زيجا وقلتله :
جايبلك خبر حلو بس الأول حضر نفسك هديك حقنة بعدها هتصحى حاجة تانيه… هعدى عليك المغرب
عصرت دماغى عشان منساش حاجة ..
الأدوات والتعزيمة اللى هتتقال , المحاليل أكدت على كل حاجة ..
كويس أن هيبقى معايا فى العملية حنوش ونصير , الأتنين بيفهموا اكتر من دكاترة كتير بيدرسولى!!
نزلت عشان اجيب زيجا افتكرت انى نسيت مضاد الجلطات
رحت الصيدلية عشان اجيبه ورجعت لقيت شقتى مفتوحة وزيجا مش موجود فى الشقه !!
طلعت أجرى على فوق واتصدمت من اللى شفته ..
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية ميراث نور)
