رواية ميراث نور الفصل السابع والثلاثون 37 بقلم لينا بسيوني
رواية ميراث نور الجزء السابع والثلاثون
رواية ميراث نور البارت السابع والثلاثون
رواية ميراث نور الحلقة السابعة والثلاثون
” رز بلبن”
“نيللى ”
أنا نيللى أقوى ساحرة على وجه الأرض , بحكم الالاف من الشياطين والمئات من عفاريت الجن .. ومش مؤمنه غير بنفسى .
أنتصرت على ألد أعدائى “نور ناير” .
سحقت جيشه على أرض المعركة ,محيتهم تماما ودكيت قلعتهم، ورميت على جسمه سم فتاك فى اللى اللحظه اللى كان متشكل فيها لحيوان مفترس وبيحارب ضدى.
كنت قاصدة أقتله فى وقتها .
بس اللى عرفته بعد كده أن السم ماقتلوش , سخطوا على هيئة الحيوان اللى كان عليه , وتاه فى الصحرا !!
بعت كتيبة من الشياطين يدوروا عليه فى الصحرا , فى الوقت اللى قررت فيه انى أأسس أمبراطورية فى عالم الجن .
عرفت أن الهيبة بتُصنع من الخوف ..
رميت الخوف فى قلوب كل الشياطين والعفاريت اللى بحكمهم.
مش بتفاوض فى قرارتى واللى بيخالفنى عقابه الموت على أيد ذنار, أكتر جن ومخلوق بثق فيه!!!!
أجبرت عفاريت الجن يبنوا لى قلعة فى أقل من يومين !!
قلعة حصونها منيعة … جدارنها من الجرانيت السميك وأرتفاعها واصل لفوق السحاب .. بيحاوطها وبيحميها تعزيمات من السحر الاسود وشياطين مجهزة بالاسلحة والدروع .
بملك أقوى كتاب فى السحر … كتاب العزيف .. وحضرت كل الكائنات اللى فيه .
حاليا أنا الاقوى فى عالم الجن والأنس والنهاردة يوم زفافى أو بمعنى أصح ميثاق الدم !! و قررت انه يوافق اليوم اللى هقضى فيه على سلسال عدوى “نور ناير” …
من حوالى خمس دقايق كتيبة نصها من عفاريت الجن توجهت ناحية كهف الكلب نور علشان تقتل بنته وترجعلى بمراته , سندس , عشان أستمتع وانا بعذبها اللى باقى من عمرها !!!!!!
************************************************
“نور”
أتجمعنا كلنا فى الكهف بعد الماتش انا و أبن القاف ونصير وحنوش ونوشة ومارو وسندس , أتجمعنا كلنا على طبلية واحده.
قعدنا ناكل فى المحشى اللى عاملاه سندس.
حنوش قال لمارو وهو بياكل:
– بس أزاى قدرت تصد ضربة الجزاء ….دى بقوة عفريت الجن !!
مارو حط صوباع محشى فى بوقه وقاله من غير مايبصله :
– على فكره كورتك كانت ضعيفة جدا !! مش عايز أقولك أن رجلك خفيفة اوى !!
حنوش أضايق ,و لوى بوزه وقال :
– مستهتر بقوة عفريت الجن .
مارو غمزلنا وقاله :
– الحمد لله لحد دلوقتى ماشوفت مخلوق أقوى منى !!
حنوش رمى 3 صوابع محشى مره واحده فى بوقه وقام من على طبلية الاكل وقال :
– طيب خلص أكلك وتعالالى بره !!
مارو قاله :
– موافق .. هخلص بس على حلة المحشى وأجيلك بره ..
وبص على سندس وقالها :
– تسلم ايدك ياخالة سندس .. المحشى فظيع الرز مستوى والورق مش مهرى والطعم قوى جدا .. اقوى من عفريت الجن !!
نصير فلتت منه ضحكة غصب عنه , فحنوش بصله بأستنكار وقال لمارو :
– خلص محشى خالتك سندس وتعالالى بره !!
خلصنا أكل وطلعنا بره الكهف لاقينا حنوش ناقل صخرة كبيرة مسطحه زى الترابيزة !!
وقال لماروا بتحدى :
– تعالا !! هنلعب رست … جنى لجنى وراجل لراجل !!
مارو قرب على الصخرة المسطحه وهو متحمس , فرد دراعه ومده وهو بيقول :
– تعالا !!
حنوش قاله :
– لالالا أنا هدخلك فى الاخر لانى اقوى واحد هنا !! فانت هتلاعب أبن القاف وابوك ونصير وتجيلى فى الاخر ..
لو خسرت من واحد منهم قبل ماتجيلى , فأنت مالكش شرف انك تقابل عفريت من الجن !!
قاله وهو مش مهتم :
– موافق ياعفريت !!
أبن القاف قرب على مارو وهو عارف النتيجة , خسر فى لمح البصر وسلم على مارو ورجع ورا .
مارو شاورلى وقال :
– قرب ياوالدى .
قولتله :
– براحة على أبوك.. ها !!
ضحك وقالى :
تعالا هقولك !!
لفيت لفه كامله , وقربت عليه وانا متحول ل “ذا روك” الممثل و المصارع !!
بصيتله بتحدى وحطيت دراعى الضخم على الصخرة المسطحة وقولتله بصوت ذاروك :
– كام أون ( تعالا )!!
مد دراعه ومسك دراعى وبدأت المبار…
خلصت بسرعة و رجعت وقفت جنب أبن القاف !!!
مارو أتحمس أكتر والمحشى سخنه وضرب الصخرة المسطحة بأيده فأتشققت !!
نصير بلع ريقه و قرب عليه وهو مقلق وقاله :
– أهدى يامارو .. انا ورثك ياحبيى , خد بالك !!
نصير مد أيده وشبكها فى أيد مارو .. و قدر يقاوم حبة صغيرين قبل ما مارو ينزل بدراعه على الصخرة ويكسبه !!
فرجع سلم علينا ووقف جمبنا زى خيبتها !!
مارو بص لحنوش وقاله وهو بيتريق :
– أيه خلاص نولت الشرف .. تعالا ياعفريت قرب !!
حنوش قرب عليه وهو بيشمر دراعه .. ومد أيده وشبكها فى أيد مارو.
وبدأ المباراة … حنوش كان داخل حامى والوحيد اللى قدر يميل أيد مارو.
فضل يضغط ويميل فيها , لحد ماعروقه برزت وحستها هتنفجر .. وقرب خلاص ينزل بأيد مارو على الصخرة ويفوز ,أتفاجئنا بمارو بيضحك !! وبص لحنوش فى عينه وقاله :
– هو ده أخرك ؟!! أصل أنا لسه مالعبتش !!
صرخ , صرخة قوية و مره واحده ميل بدراع حنوش وفى أقل من ثانية رزع دراع حنوش على الصخرة بقوة، فالصخرة أتفتت تماما !!!!وبقت عبارة عن رمل غطى وشنا وأحنا بنتفرج.
حنوش كان متغاظ جدا , ونصير كان بيحاول يهديه ويتستفزه فى نفس الوقت قاله :
– أهدى ياحنوش .. هو الواد مرمطك أها .. بس الريست مش مقياس للقوة !!
حنوش قال لنصير :
– عندك حق يانصير !! الريست لعب عيال !! أنا هغلبه فى مجاله !!
مارو قاله :
– مش فاهم !!
حنوش قاله :
– يعنى تشوف أكتر حاجة متفوق فيها وتخشلى جن لجن وراجل ل
نصير قطع كلام حنوش وقاله :
– مابلاش البوق الحمضان ده بتخسر فى الاخر !!
قولت لحنوش :
– خلاص ياحنوش .. ماتصغرش دماغك زى العيال .. مش علشان علم عليك مرتين تقوم تعمل كده .
حنوش أتضايق مننا كلنا وكان هيمشى , بس وقف لما سمع مارو بيقوله :
– ليك فى النشان .. الرماية يعنى ؟!!
حنوش لف ضهره وقاله :
– محدش يقدر يشوف بعين عفريت الجن انا أقدر أصيد الدبانة فى عز الضلمة وعلى بعد كيلوهات الامتار .
مارو قاله :
– معاك قوس !؟
حنوش لف لفه كامله ولقينا فى أيده قوس طويل وقال لمارو :
– مابمشيش من غيره !!
مارو قاله :
– أختار الهدف !!
حنوش قاله :
– من عينيا ..
وبعدها أختفى , غاب شويه ورجع وقاله :
– أنا حطيت جرس صغير على شجرة فى أخر القرية.
وشاور لمارو عليها وقاله :
– شايفها اللى هناك دى ؟!!!
مارو قاله :
– أها شوفتها .. دى قريبه أوى .
قولتلهم :
– قريبة !!! هى فين دى؟ !! أحنا مش شايفين حاجة ومش هنعرف مين اللى كسب !!
حنوش قال :
– الجرس الصغير لما يتصاب بالسهم , هيطلع صوت عالى هيرج القرية كلها !!
حنوش بص لمارو وقاله:
– اتفضل أبدأ .
مارو قاله :
– والله أبدأ أنت اللى تبدأ الاول !
حنوش قاله :
– أوكى على الاقل تتعلم من عمك حنوش الرماية !
حنوش خد نفس عميق حط السهم فى قوسه وشد وتر القوس لحد أخره ..
وأطلقه فى السما ….
السهم طار فى السما لحد مأختفى .. شوية وسمعنا صوت الجرس العالى وهو بيرج القرية كلها !!!
حنوش بصلنا بفخر وحيانا برأسه !!!
مارو رفع قوسه ومط وتره من غير مايحط فيه سهم !!
عينينا ما أدركتش اللى حصل بعد كده …فى اقل من ثانيه مد مارو ايده فى جعبته اللى فيها الاسهم و أطلق بسرعة رهيبه أكتر من خمس أسهم !!
وسمعنا بعدها صوت الجرس بيرن وفضل يرن كتير كأنه بيستنجد !!!
حنوش قاله :
– يبقى نشوف هدف أبعد …
سندس قطعت كلام حنوش وقالت :
بلا أبعد بلا أسعد … تعالا ياولا يامارو هأكلك رز بلبن ..
مارو بصلها وقالها بفرحة الطفل :
– أيه ده !! هو فيه رز بلبن ؟!
قالته :
– بالمكسرات والزبيب .. أدعى لعمك حنوش هو اللى جابلنا خزين البيت !!
حنوش قال بصوت واطى:
– حار ونار فى جتتك يابغل .
أترصينا كلنا قدام الكهف فى مشهد سيريالى بناكل فيه كلنا رز بلبن !!
أتفاجئنا بحنوش ونصير بيبصوا لبعض …
حنوش قال لنصير:
– حسيت باللى حسيت بيه؟!!
قاله :
– أها حاسس بطاقة كبيرة بتقرب على الكهف .
مارو قال وهو مش مهتم وبياكل رز بلبن :
– دى مش طاقة.. دى كتيبة من الشياطين وتقريبا معاهم عدد كبير من عفاريت الجن و هيهجموا علينا كمان شوية … الرز بلبن تحفة ياخالة سندس !!
قولناله كلنا فى صوت واحد :
– نعم !!
قالنا :
– أها والله …
وقفنا كلنا وأتلفتنا يمين وشمال.
جريت دخلت سندس ونورا جوا الكهف .
حنوش حضر قوسه وبدا يبص فى السما .
أبن القاف ونصير طلعوا سيوفهم وأستعدوا للاشتباك وانا حضرت نفسى علشان أتحول لتنين …
مارو كان قاعد , مقامش من مكانه وبيكمل أكل فى الرز بلبن !!!
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية ميراث نور)
