رواية ميراث نور الفصل الخامس والستون 65 بقلم لينا بسيوني
رواية ميراث نور الجزء الخامس والستون
رواية ميراث نور البارت الخامس والستون
رواية ميراث نور الحلقة الخامسة والستون
” بارود”
”نورا”
بعد مرور 3 سنين
أتنقلنا علشان نعيش فى القاهرة لأسباب كتيرة , منها أن بابا جاله عقد عمل مغرى فى شركة إلكترونيات عالمية واللى وافق عليه خاصة أن الخيمة اللى كان بيعالج فيها المسحورين وقفت بعد ما نصير فقد قدراته و مبقاش جن …
عمو حنوش رفض أنه يقف مكان نصير فى الخيمة وقال :
أنا جنى فرى لانسر , ومش معنى أنى كنت بساعدكم فى شغل الخيمة أنى ألبس فى شغل مش بتاعى .
بقلم Lina Basyouni
كذلك مارو رفض أنه يقف فى الخيمة و أيد فكرة أننا نتنقل القاهرة , قال وهو بيشرح أسبابه :
عايز أدخل كلية الطب ، نفسى أتعمق فى دراسة التشريح , كما أنى مشغول مع زيجا أو أجيز علشان أعالجه , يمكن على الاقل أرجع شكله طبيعى زينا , للأسف الحاجة الوحيدة اللى بيتفق عليها مع قرينه هى الانتحار بسبب شكله المشوه , فمش هينفع أسيبه و اقف فى الخيمة .
ده غير أننا محتاجين نعيش حياة طبيعية بعيد عن الحروب ومشاكل الجن .
نصير أيد برضة الفكرة وقال :
الصراحة بقيت بتشائم من الكهف ده … حاسس أنه سبب كل أيامنا السواد اللى فاتت .
أنا بقى كنت مؤيدة جدا للفكرة , علشان بابا يضطر يودينى المدرسة .
نفسى أتعرف على ناس جديدة ويبقى ليا أصدقاء من سنى….
خاصة بعد ما بابا ضحك عليا , بعد ماكان واعدنى أنه مش هيخلينى أدرس فى البيت و هيودينى المدرسة ويبقى ليا أصدقاء , لحس كلامه !! وكملت دراسة منازل !!
كنت بروح المدرسة بس فى الامتحانات !!!
فأضطريت أسقط نفسى فى الإمتحانات وأصدرله الأسطوانة بتاعت ،(أنا مش هنجح يابابا طول مانا بدرس فى البيت …
ضيعت من عمرى الدراسى 3 سنين ,فضلت فى خمسة ابتدائى منازل , ومع هوجة النقل للقاهرة وأننا هنبدأ نعيش حياة طبيعية , أضطر يقدملى فى مدرسة ابتدائية جنب البيت اللى أشتراه فى القاهرة …
بيت من 3 أدوار …
بقلم Lina Basyouni
مارو وزيجا خدوا شقة ونصير خد لوحده شقة وأنا وبابا وماما خدنا شقة .
كانت أسعد لحظات حياتى وأنا شايلة الشنطة وطالعة الصبح للمدرسة زى باقى البنات اللى فى سنى .
أنا مش محتاجة الدراسة فى حاجة , بالنسبة ليا حاجة تافهه , الحمد لله عقليتى فذة وعندى معرفة قوية عن كل العلوم .
والمؤهلات العلمية اللى عندى أعلى بكتير من مؤهلات طالب ببدرس فى جامعة هارفارد , مش مدرسة الإخلاص الإبتدائية المشتركة…
أنا بس حبيت جو المدرس ولمة الصحاب وجرس الفسحة وحصص الألعاب .
بابا كان عارف ده كويس وكان خايف منى ،علشان كده كل يوم الصبح وهو بيوصلنى للمدرسة يقولى :
نوشة ، أياكى تستخدمى السحر أو تلعبى بيه !!! اياكى يانوشة !!!
كل يوم على كده ويفضل يهزلى بصوباعه قدام عينى وهو بيحذرنى .
طبعا كنت بحط رأسى فى الأرض وأقوله وأنا مدلدلة شفتى اللى تحت :
أبدا يابابا …. استحالة أعمل كده !!
فيبوسنى على خدى ويتكل على الله يروح على شغله بعد مايطمن أنى دخلت من بوابة المدرسة .
غلبان أوى بابا ده ميعرفش أنى ممشياها بالسحر وتقريبا بجرب كل اللى بتعلمه فى المدرسة .
ده غير أنى بقابل حفيد غداف ( الغراب ) من وراه ودايما بيجى ويطير جنب شباك الفصل بتاعى علشان يتطمن عليا وأتطمن عليه ولو فيه حد من المدرسين بيضايقنى أو مرفعنى على السبورة زى الأستاذ وليد مدرس العلوم مثلا .. بيقوم بالواجب معاه
الاستاذ وليد مستقصدنى من يوم حادثة المعمل لما كنا فى حصة العملى ولقيت مكونات البارود ( فحم-ملح صخرى -كبريت )
خلطهم ببعض وكانوا كمية صغيرة …. لا كمية مش كبيرة
ومكنتش اقصد ..مخدتش بالى أن فيه شعلة مولعة جنبى !!!
بقلم Lina Basyouni
بووووووم فى المعمل…
الحمد لله محصلش إصابات واستدعوا بابا…. يوميها أخدت علقة محترمة ….بابا هددنى ان دى آخر فرصة خاصة انه دفع مبلغ وقدره عشان يعيدوا ترميم المعمل !!!
بابا حمد ربنا وتقبل الموضوع عشان جه فى الكيمياء مجاش فى السحر .
من ساعتها واستاذ وليد مدرس العلوم حاطط نقره من نقرى زى ما غداف الغراب حاطط نقره فى قفاه دلوقتى وبيهبشوا !!!
المهم حاولت يبقى ليا أصدقاء كتير بس ماطلعتش من الفصل غير بأتنين بس …
وفاء..
وجليلة …
أول وأقرب صديقتين ليا ..
كل واحد كان بيحكى عن عيلته وعن بيته والمواقف اللى بتحصلهم ، إلا أنا مكنتش بحكى علشان هيفكرونى بهلوس أو بحور عليهم !!!
كنت بحكى عن حياتنا الروتينية وبابا المهندس وماما سيدة المحشى الاولى …
مقدرتش أمسك نفسي و أخفى عن أصدقائى معرفتى القوية بالسحر ..
من باب التفاخر بنفسى وعلشان دايما بحب أشوف علامات الانبهار والاندهاش على وشوشهم لما أعمل قدامهم خدعة سحرية !!!
سألونى أتعلمت الكلام ده فين فقولتلهم من النت وأن ده سر ولو أهلى عرفوا هيقطعوا عنى النت .
الحمد لله أهلى معرفوش بس تقريبا كل الفصل عرف …
قصدى كل المدرسة ….
وفاء وجليلة مبيتبلش فى بوقهم فولة !!!
قالوا لبنات من الفصل واللى قالوا لبنات تانيين فى الفصول اللى جنبنا وأتسيطت فى المدرسة كلها أنى بعرف فى السحر والموضوع كبر ووصل للمدرسين!!
لحد مافى يوم دخل الاخصائى الإجتماعى قبل الفسحة ونادى على أسمى فى وسط الفصل كله وقال :
بقلم Lina Basyouni
نورا نور ناير !!!
وقفت وأنا رجلى بتخبط فى بعضها فالمدرس قال :
أنتى نورا ؟!!
هزلتله رأسى بالتأكيد ،قالى وهو على وشه علامات الغضب :
المديرة عايزاكى تحت !!
أتحركت معاه وأنا رجلى بتخبط فى بعضها …
شكرا كده مع السلامة يامدرسة ، بابا هيعرف وهينفخنى !! وماما هترزعنى بالقفا !!
حطيت أيدى على قفايا فى حركة لاارادية وأنا بتخيل كف ماما وهو بينزل عليه .
المدرس خبط على الباب فالمديرة أذنتله بالدخول , فتح الباب وقال كأنه حاجب محكمة :
الطالبة نورا نور ياسيادة الناظره !!!
شاورتله يخرج ويقفل الباب , فخرج وقفل الباب .
المديرة كانت قاعدة على المكتب بتبص فى ورق , لمت الورق فى دوسيه وبصتلى من تحت النضارة وهى بتقول :
كنت معدية بالصدفة قدام الفصل وشوفتك !!.. شوفتك بعينى وأنتى بتستخدمى السحر فى الفصل وبتحرقى كتب ميس سحر , ده غير الغراب اللى بيهاجم الاستاذ وليد بأمرك طبعا .
أنا سألت على أهلك فى قرية النيارين وعرفت أصلك وفصلك .
سكت شوية وخبطت على الكتب وهى بتقول بعصبية :
العيب مش عليكى .. العيب على أهلك اللى مربوكيش , أهلك الدجالين , اللى علموا بنتهم الدجل والشعوذة …. أنا مندهشة أزاى بنت فى سنك بتعمل كده .
قولتلها وانا ببكى :
بقلم Lina Basyouni
أرجوكى يا….
شخطت فيا وهى بتقوم من على كرسيها وقالت :
بتعيطى يامشعوذة يا دجالة !!! بتعيطى يابت ولا دى دموع تماسيح , أهلك علموكى أزاى تنزليها … أنا هبعت للوزارة وهفضحكم , أبوكى لازم يتسجن وأنتى لازم تدخلى أى حتة يأهلوكى ويربوكى فيها !!
زقتنى بعنف وهى بتقولى بصوت عالى :
بره … أطلعى بره .
طردتنى بره مكتبها , خرجت و أتفاجئت بالمدرسين والطلبة ملمومين عند أوضة المديرة بسبب صوتها العالى .
رجعت الفصل وانا منهارة .
وفاء وجليلة كانوا بيطبطبوا عليا علشان يهدونى …
كنت منهارة ومندهشة ومصدومة ومشفقة على أهلى اللى هيتأذوا بسببى.
خرجت من المدرسة قبل الحصة الأخيرة علشان أقابل بابا فى الطريق قبل مايوصل عند بوابة المدرسة وحد يقوله من الطلبة أو المدرسين على اللى حصل .
شافنى وهو جاى بعربيته فقالى :
نورا … ماستنتيش عند المدرسة ليه ؟
قولتله :
مش عايزة وفاء وجليلة يجوا ورايا , أصل مخصماهم علشان أكلوا ساندوتشاتى النهاردة من ورايا … قال أيه بيعملوا فيا مقلب .
أبتسم وطبطب عليا وهو بيقول :
طيب تعالى .. أمك النهاردة عاملة صينية بطاطس باللحمة …
بقلم Lina Basyouni
ياعينى أهلى دول غلبانين أوى وهيروحوا فى الرجلين …
وصلت البيت وانا مسهمة , أكلت وخلعت على أوضتى .
معرفتش أنام اليوم ده , واليوم اللى بعده عملت نفسى تعبانة ومروحتش المدرسة .
أخر النهار أتفاجأت بباب البيت بيخبط جامد .
ماما سندس فتحت الباب ,كنت فى أوضتى وحطيت ودنى علشان أسمع .
سمعت ماما وهى بتقول :
مابراحة على الباب هتكسروه !!!
أتفاجأت بصوت وفاء وجليلة وهما بيردوا عليها وبيقولوا :
أسفين ياطنط … هى نورا مجتش المدرسة ليه النهاردة ؟
قالتلهم :
تعبانة شوية … خشوا أتطمنوا عليها .. أجيبلكم جيلى ولا رز بلبن؟ ..هجيب الاتنين .
سمعت صوت الباب بيخبط , أول مافتحت الباب قالوا :
أهلا بالساحرة الشريرة…..
قولتلهم وانا بقفل الباب بسرعة :
هششششش … يخربيتكم فضحتونى فى كل حتة .
بصوا لبعض وقالوا :
مش هتصدقى اللى حصل النهاردة فى المدرسة !!
قولتلهم بفضول وبخوف :
أيه اللى حصل ؟!!
قالوا بصوت واحد :
المديرة !!!
بقلم Lina Basyouni
قولتلهم :
مالها ؟
قالولى :
الدنيا اتقلبت عليها , ومتحولة للتحقيق , سمعنا المدرسين وهم بيقولوا لبعض أنها ممكن تدخل السجن كمان !!
قولتلهم باستغراب :
ليه ؟!!
وفاء قالت :
بيقولوا أنها اختسلت فلوس باين ,خدت الفلوس اللى المفروض يجددوا بيها المدرسة وجددتها على حساب مقاول تبعها وخدت الفرق حاجة زى كدة .
جليلة قالت لوفاء :
لا ياهبلة … بيقولوا أنها وجوزها ناصبين على ناس وواخدين فلوس منهم .
حسيت أن روحى بترجعلى تانى وحسيت بأرتياح , أندهشت لما لاقيت وفاء وجليلة بيقولولى أن فى أشاعة فى المدرسة أن أنا السبب فى اللى حصل للمديرة وانى أنا اللى كشفت أمرها بالسحر .
الإشاعة منتشرة فى وسط المدرسين والطلبة!!!! ..
باب أوضتى خبط مرتين وفتح بسرعة , أتفاجأت ببابا على الباب بهدوم الشغل , بص لوفاء وجليله وقالهم :
مش عيب اللى عملتوه مع نورا ده !!
بصوا لبعض بأستغراب وقالوا :
والله ماعملنا حاجة ياعمو !!
قالهم وهو مضيق عينه :
بقلم Lina Basyouni
مينفعش تاخدوا الساندوتشات بتاعتها !!
بصوا لى بأستغراب فقولتلهم :
أها يا أندال !! كده تخدوا ساندوتشاتى وتروحونى جعانه , على العموم يابابا هم جم علشان يصالحونى ويتطمنوا عليا .
بابا ضيقلى عينه وفضل واقف على الباب ،فقولتله :
أحم … أحم أتفضل يابابا غير هدومك وبعد أذنك أقفل الباب علشان دى قعدة بنات .
هز رأسه , خرج وقفل الباب .
وفاء قالت :
ماشوفتش فى كدبك !!
جليلة قالت :
أنا أرتبكت مع أنه مش أبويا , فعلا عندك ثبات فظيع !!
بصتلهم بفخر وقلت :
دى أقل حاجة عندى !!
تانى يوم روحت المدرسة وأندهشت من ردود الفعل المختلفة تماما عن أخر مره !
المدرسين قبل الطلبة بيبصولى بخوف وبأحترام زيادة عن اللزوم !!
طلعت الفصل وقعدت على التخته وأتفاجأت بكل الطلبة بيبصولى ومش معبرين أستاذ وليد اللى واقف بيشرح على السبورة .
أستاذ وليد بص وراه ولقى الطلاب كلهم مش مركزين معاه , فبصلى بغضب وقال بصوته الاجش :
نورا … قومى أقفى .
بقلم Lina Basyouni
وقفت فلاقيت غداف حضر عند الشباك ونقر نقرتين علشان يعلن عن حضوره , الأستاذ وليد شاف الغراب عند الشباك فقالى وهو بيبلع ريقه :
خلاص يانورا ياحبيبتى أقعدى .
وقال للطلبة وهو بيلم كتبه وبيخلع:
كله يسقف لنورا!
وطلع يجرى من الفصل
الفصل كله أتلم عليا وأتحولوا كلهم لصحفيين :
اللى بيسألنى هو أنتى فعلا مشيتى المديرة لما عرفتى أنها هتطردك ؟!!
واللى بيألف أحداث محصلتش بمزاجه وبيقول :
أنا سمعت نورا وهى بتقول للمديرة بصوت عالى ( انا هعرفك مقامك يامديرة يافاسدة ,أنا هسجنك )
على أد الهبد اللى كنت سامعاه على أد الفشخرة اللى كنت حاسه بيها , السيط حلو مفيش كلام !!
الاخصائى الإجتماعى قطع جلسة الهبد اللى فى الفصل ونادى على أسمى بس المره دى وهو مبتسم وقال :
نورا حبيبتى … المديرة الجديدة عايزاكى !!!
قومت من وسط اصحابى وروحت مكتب المديرة الجديدة
واللى أول ماشافتنى دخلت المكتب وقفت !!
شاورت للاخصائى الإجتماعى عشان يخرج بره وقالتلى :
أتفضلى يانورا … أتفضلى ياحبيتى أقعدى .
بقلم Lina Basyouni
قالتلى :
تشربى حاجة !!!؟
قولتلها :
عصير مانجا … لا لا كوكتيل .
أبتسمت ورفعت سماعة التليفون ، طلبت عصير كوكتيل وقهوة .
قالتلى :
بصى أنا هخش فى الموضوع على طول , أنا هنا بدل الأستاذة نجوى وسمعت عنك ..قدامى الملف بتاعك والمذكرة اللى كاتباها فيكى … بصى أنا مش هبعت المذكرة وهقطعها .
بصتلى بصة غريبة وقالت :
أنا هساعدك أهوه ، أرجوكى خلى أبوكى يساعدنى !!
قولتلها :
أبويا !! يساعدك فى أيه ؟!!
قالت :
انا اللى عليا صعب أوى و محتاج ساحر كبير , وعلى حسب المذكرة اللى كانت كاتباها الأستاذة نجوى قريت أن أبوكى دجال كبير فى قرية أسمها النارين .
قولتلها :
ثوانى حضرتك بابا مش دجال وقصدك قرية النيارين واللى أتسمت نسبة لجدى ناير , أبويا وجدودى معالجين بالقرأن مش دجالين , كمان أبويا فى الأساس مهندس وساب الموضوع ده من بدرى جدا نظرا لظروف معينة تخص نصير .
قالتلى بأستغراب :
نصير مين ؟!
قولتلها وانا بقفل بوقى :
بقلم Lina Basyouni
لا متشغليش بالك … المهم واللى عايزه أقولهولك أن أبويا مش هيقدر يساعدك لأنه معهوش جن حاليا .
لوت بوزها ولمت المذكرة وهى بتقول :
ماشى يانورا .. أتفضلى روحى على فصلك .
قولتلها :
والمذكرة ؟!!
قالتلى :
المذكرة هبعتها للوزارة وهم يشوفوا بقى … معلش مش هقدر اساعدك .
قولتلها :
ياسيادة الناظره قدرى موقفى , بابا لو عرف انى استخدمت السحر فى المدرسة هينفخنى .
ملامحها أتغيرت تماما وقالت بصوت أجش وبغضب :
أخرجى بره !!!
فضلت واقفه ومخرجتش قولتلها :
ياااه ده شكله مبهدلك أوى !!
نبرة صوتها أختلفت وهى بتقول :
أرجوكى يانورا أنا مبنمش الليل !!
قولتلها :
أنا هساعدك بس أرجوكى ماتقوليش لبابا حاجة لانه لو عرف هين….
باب أوضتها خبط ودخل الساعى وفى أيده الصينية اللى فوقيها العصير والقهوة , بصيت على الباب وفتحت بوقى من الصدمة لما شوفت مين اللى واقف ورا الساعى ….
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية ميراث نور)
