رواية ميراث نور الفصل الحادي والسبعون 71 بقلم لينا بسيوني
رواية ميراث نور الجزء الحادي والسبعون
رواية ميراث نور البارت الحادي والسبعون
رواية ميراث نور الحلقة الحادية والسبعون
“جزيرة الدمى”
“نور”
مارو قال :
اوعوا حد يلمس الدمية .. دا سحر فودو لو الدمية وقعت نورا هتتخنق وتموت.
نصير قال :
فى ورقه مربوطة بخيط حوالين وسط الدمية !!
حنوش قال :
انا هجيبها من غير ما احرك الدمية .
لسه حنوش هيمسك الخيط لقينا الدمية بتنزف !!
نصير قال :
كدا نورا كمان بتنزف لازم نلحقها !!
انفعلت فمارو هدانى وقال:
هو دا اللى ايسر عايزه , بيلعب بأعصابنا، لازم نكون هاديين خالص عشان منخدش قرارات متهورة .
التفتنا لحنوش اللى نتش الورقه بسرعة.
فتح الورقه وشفنا علامات الاندهاش والصدمة على وشه وبصلنا وقال وهو بيقرأ من الورقة :
مستنيكم فى جزيرة الدمى فى المكسيك …
مارو قال :
أكيد فيه فخ هناك ,لازم نبقى جاهزين المره دى , أنا هروح أجيب العصاية
هزيناله رأسنا بالموافقة , فجرى بسرعة وخرج من البيت
وفضلنا انا وحنوش ونصير.
حنوش كان بيحكلنا عن الجزيرة بس ملحقش يكمل ، مارو رجع بسرعة وفى أيده العصايا!!
قرب علينا وهو بينهج وقال :
يلا بسرعة عشان نلحق نورا .
حنوش قال :
هاتوا أيديكم عشان انقلكم ..
مسكنا أيد حنوش فنقلنا جزيرة الدمى..
زى ماحنوش حكالنا بالظبط … جزيرة كلها دمى وعرائس , فى كل ركن من أركانها وعلى كل شجرة متعلق دمية زى اللى عليها صورة نورا !!
العرائس والدمى كانت بتهمس لبعض بكلمات مش مفهومه !!!
خدت بالى أن العرائس والدمى بيبصوا وبيبحلقوا فينا وأحنا بنتحرك وسطيهم!!!
حنوش قال :
أهدوا خالص ومحدش يبحلق فى أى دمية , خلوا عينيكم فى الأرض وانتوا بتتحركوا !!
مارو ما أهتمش بكلام حنوش ومشى يبحلق فى الدمى !!!
أتصدمنا ووقفنا مكانا لما سمعنا همسات الدمى بوضوح وهى بتقول :
مارو …. مارو !!!
حنوش قال لمارو بعصبية :
قولتلك متبحلقش في الدمى …
مارو قطع كلام حنوش وقال :
أنتوا سامعين اللى أنا سامعه ؟!!
نصير قاله :
أها الدمى بتنادى على أسمك !!
مارو قال :
لآ انا سامع صوت نورا .. ركزوا فى الأصوات كده !!
حنوش قالنا:
أياكم تركزوا فى أصوات الدمى , هتتجننوا !!
مارو رد على حنوش وقاله :
أنت خواف أوى … أمال لو مكنتش عفريت من الجن كنت عملت أيه !!
حنوش كان هيقول حاجة فمارو قطع كلامه قبل مايقوله وقال :
أنت ناسى ياحنوش أنى مش بتأثر بالسحر الأسود … انا بأكدلكم دى مش هلاوس , ركزوا معايا فى الأصوات .
بصينا لبعض أنا ونصير تجاهلنا كلام حنوش وركزنا فى الآصوات زى ماقالنا مارو.
شوية وبالفعل سمعنا صوت نورا بتنادى علينا !!!
جرينا كلنا ناحية الصوت ماعدا حنوش اللى سد ودانه بأوراق الشجر!!
فضلنا نجرى فى أتجاه صوت نورا لحد ما وصلنا لضفاف الجزيرة …
الدنيا كانت ضلمة بس كنا قادرين نشوف الميه على ضوء القمر … سمعنا صوت نورا بتنادى علينا.
ألتفتنا وتأملنا الميه وأحنا بندور على نورا لحد ماشوفناها !!
نورا !!!
حبل ملفوف حوالين رقبتها … الحبل مربوط فوق جزع شجرة فى وسط الميه !!
نورا كانت ماسكه فى جزع الشجرة ومتشبثه بيه … لو وقعت من فوق الشجرة هتتشنق !!
مارو جرى ناحيتها وجرينا وراه كلنا ماعدا حنوش اللى أعترض طريقنا وفضل يقول فى كلام مش مفهوم!!
حنوش حاول يوقفنا بالعافية , بس كان كل أما يقرب مننا يقع لوحده !!!
نصير قاله :
أستنانا على الشط ياحنوش ,طالما خايف تيجى..
حنوش رد عليه وقال برضه كلام مش مفهوم خالص !!!
سمعنا مارو بيقول :
أثبتى مكانك يانورا … متتحركيش.
بصينا على نورا لاقيناها بتصرخ , وأيديها بتفك من فوق جزع الشجرة .
مارو جرى فى الميه أسرع لحد ماالمية غطته وبدأ يعوم فى أتجاه الشجرة …
جرينا وراه انا ونصير !!!
ظهر جنبنا واحد شبه مارو بالضبط كان بيحاول يمنعنا زى حنوش وكل ما يحاول يمنعنا يقع..
نصير قالى :
لما دا مارو… امال اللى قدامنا دا مين؟ !!!
************************************************
“مارو”
روحت علشان أجيب العصاية زى ماقولتلهم …ورجعت مالقتهمش !!!
مالقتش غير دمية الفودو اللى عليها صورة نورا .
معقول يكونوا مشيوا وما أستنونيش !!
لا ما أظنش !!
أكيد فى حاجة غلط !! ممكن تكون لعبة من أيسر !!
خبطت العصايا 3 خبطات بسرعة وأتنقلت لجزيرة الدمى لوحدى.
الدمى كانت بتحلق فيا , فحطيت رأسى فى الأرض..
مشيت وسط الدمى وأنا عينى فى الارض وبتعقب أثرهم ..
شوفت على الارض أثار أقدام حنوش ونصير وأبويا وشخص رابع معاهم !!!
مين معاهم غيرى !!
تعقبت آثار أقدامهم وتعمقت فى الغابة , سمعت حنوش بيصرخ وبيقول :
يانووووور … يانصيييير … حاسبوا …دى نار .
جريت فى أتجاه صوت حنوش.
أتصدمت من اللى شوفته !!
واحد شبههى بيقود أبويا ونصير لحفرة نار فى وسط الغابة.
حنوش كان بيحاول يمنع نصير وأبويا ويفوقهم , بس كل مايقرب منهم علشان يلمسهم يقع على الأرض !!
جريت بسرعة عليهم وحاولت أمسك أبويا .. بس حسيت بقوه غريبة بتمنعنى ووقعت على الأرض !
مكنتش عارف أمسكه .. كان مكمل طريقة فى أتجاه حفرة النار ومش واخد باله منى !!
حاولت أهاجم الشخص اللى شبهى بس فشلت ووقعت برضه على الأرض !!
حضرت عصايتى وتمتت بالتعزيمات اللى تمنع السحر اللى محاوطنا !!
ضوء أبيض خرج من العصايا وغطى المكان , حصل صوت فرقعة كبيرة و الأرض أتهزت لوهلة !!
نجحت أنى أبطل السحر اللى حوالينا …
نصير وأبويا بصولى بأندهاش وأغمى عليهم .
***********************************************
“زيجا”
فوقت من الغيبوبة , فتحت عينى و بصيت على أيدى
لاقيتنى لسه متكتف فى السرير و…
أيدى جلدها طبيعى مش اسود !!!
أندهشت وبصيت على جسمى كله اللى بقى متغطى بجلد متوصل ببعضة بغرز كأنها قطع بازل ومتخيطة فى بعضها .
سمعت صوت رجلين أيسر جاى من ورايا وبتقرب عليا ..
حط فى وشى المرايا على طول !!
فشوفت شكلى !!
وشى متغطى بجلد طبيعى .. أقرع زى أيسر , بس عينى بلونها الحقيقى!!!
أيسر شال المرايا من على وشى و قال :
كل الغرز اللى فى جسمك وفى وشك هتخف .. غريبة مابصتش على لسانك يعنى !!
طلعت لسانى فى حركة لاأردايه … لاقيته لسان طبيعى لونه وردى !!
أيسر أبتسم وقال :
حبيبى يازيجا … كده خالصين؟ !!
سكت وماردتش!!
شخط فيا وقال :
رد عليا … عايز أجرب اللسان اللى مركبهولك !!!
حركت لسانى وقلت بصعوبة :
خالصييين … يا أيسر … فكنى بقى !!
ضحك وقال :
مش دلوقتى يازيجا … مستعجل على أيه !! تعرف أصحابك فين دلوقتى ؟!!
بصتله بأستغراب فقالى :
أصحااابك … عيلة ناير .. بعتهم مشوار فى جزيرة الدمى , ماتيجى نشوف بيحصل أيه هناك !!
سحب ترولى فوقيه طبق معدنى , فيه ميه وفوقيها طبقة زيت.
أبتسم وقالى :
فاكر !! الايام بتعيد نفسها …
قولتله وانا بغيظه:
طبعا فاكر .. كنا فى شقتك و بعت عيلة ناير سجن قارا ورجعوا علموا عليك !!
قالى وهو مبتسم :
المره دى أنا عارف كويس أنا عايز أيه …
طيب أقولك أيه اللى هيحصل من قبل مايحصل !!
بص .. هينخدعوا فى الدمى ومارو هيكتشف أنهم راحوا من غيره وهيحاول ينقذهم بس هيفشل وهيستخدم العصاية علشان يفك السحر اللى عليهم , وساعتها هوصل لهدفى …
عارف أيه هدفى يازيجا ؟!!
قولتله بفضول :
أيه ؟!!
قالى :
هدفى العصاية !!!
***********************************************
” نورا ”
جليلة اعز صديقة ليا خدعتنى !!! ومش بس كدا طلعت بنت نيللى , الد اعدائنا .
جرجرتنى بره الحفرة وفضلت تضرب فيا فعملت نفسى اغمى عليا .
ايسركان بيحاول يقلعنى الحذاء لكن النباتات فضلت متبتة فى رجلى ومقدرش يشده منى, حاول بشتى الطرق وبالسحر وبالقوة معرفش.
جليلة قالتله :
وبعدين هو مبيطلعش من رجلها ليه؟ !!
قالها :
معرفش !!! ممكن معزمة عليه او الحذاء طبع معاها وخد عليها , حاجات فى السحر معقدة مقدمناش الا اننا نقطع رجليها او نبوظه خالص.
جليلة قلتله :
لا تبوظه ايه انا عايزاه، اقطع رجليها .
قالها:
لو قطعنا رجليها هتنزف وهنضطر نسعفها واحنا معندناش وقت و لسه محتاجينها تفضل عايشه .. انا هبطل الحذاء مؤقتا وبعدين نبقى نقطع رجليها واطلعلك الحذاء منها..
خليكى جنبها هنا ورقبيها لحد ما انزل اجيب السيف واطلع
نزل وسمعنا صرخته وطلع تانى بسرعة .
جليلة قالتله :
مالك ؟!! بتترعش كدا ليه ؟!!
قالها :
ابن الكلب ناير معزم على السيف بتعزيمة قوية !
قالتله :
طب وبعدين ؟!
قالها :
ولا قبلين ارميها فى المقبرة لحد ما ناخد عصاية مارو، هى متعزم عليها هى كمان بس تعزيمة خفيفة هقدر افكها ولما افكها هفك بالعصاية السيف .
جليلة قالتله :
ياااا دى لفة كبيرة اوى .. ما نقتلهم ونخلص!!
قالها :
احنا قلنا ايه؟ !! هنمشى على خطتى مش عايزين نغلط نفس غلطة نيللى وجوهر .. بلاش غشومية .. الذكاء والصبررر خليكى زى الصياد ارمى الطعم عشان تصطادى سمكة اكبر .
وشدنى من على الارض ورمانى فى الحفرة اغمى عليا من الهبدة.
فقت لقيت نفسى محبوسة فى المقبرة والباب مقفول عليا بصيت جنبى لقيت السيف .
زحفت لحد ما وصلت للسيف وجيت امسكه حسيت كأن كهربا مسكت فى جسمى فاغمى عليا تانى .
فقت لقيت السيف فى وشى فبعدت عنه , حسيت بحاجة سخنة عند مناخيرى ,حطيت ايدى عليها لقيته دم مناخيرى بتنزف من اثر الكهربا .
قلت فى بالى :
حويط يا جدى !!!
زحفت وطلعت السلم اللى بيودى للباب المعدنى حاولت افتحوا من جوا بس مفتحش .
نزلت تانى وانا بزحف على السلم .
سمعت صوت جليلة بيرج المقبرة فعرفت انهم بيرقبونى قالتلى بأستهزاء :
ازحفى على بطنك زى الحرباية ..
ضحكت وقلتلها بسخرية :
انتى غبية زى امك , الحرباية ليها رجلين مبتزحفش على بطنها, الافعى اللى زيك انتى وامك هى اللى بتزحف على بطنها .. انا هخرج وعيلتى هتعلم عليكى انتى وايسر بتاعك زى ما كل مرة بنعلم عليكوا.
ضحكت وقالت :
وهتخرجى ازاى وانتى مكسحة ؟!!
قلتلها :
هخرج وهفكرك.
قالتلى :
وانا قاعدة اهو بتفرج عليكى بث مباشر يلا فرجينى .
قعدت محتاسه مش عارفة اعمل ايه !! عطشانة وجعانة ومش عارفة افكر !!
ياترى اهلى عاملين ايه دلوقتى !! ياترى ايسر عمل فيهم ايه !!
عدا اليوم وانا رايحة جايه على السلم وبحاول ازق الباب من جوا نمت مكانى من التعب .
افتكرت وانا نايمة اللى حصل واللى شفته فى طبقة الزيت وقت الحرب بين جدى وايسر فى الحزام الصامت , افتكرت ان انا وحنوش شفنا جدى فى طبقة الزيت وهو بيحضر خادم السيف كان بيناديله ويقوله ..
الحلم مكملش ففقت وانا بفكر فى اسم خادم السيف!!
كان بيقوله ايه يا بت يا نورا افتكرى .. تتح .
لا لا لا
تنح
لالا برضه
ننح
اول ما قلت ننح حسيت ان السيف اتهز !!
همست تانى وقلت :
ننح انت سامعنى ؟!!
السيف اتهز تانى !!
قلتله :
انا نورا حفيدة ناير لو سامعنى ادينى اى علامة !!
السيف فضل ثابت متحركش ..
شكلى بهلوس من الجوع والعطش !
انا جعانة اوى وهفتانة وجسمى كله وجعنى ودرعاتى
نفسى فى بوق مايه يا كفرة !!
ناديت وقلت :
ننح
محصلش حاجة !!
نمت وحلمت حلم غريب!!
حلمت بخادم السيف ننح بيقولى :
انتى مين وعايزة ايه ؟!!
قلتله :
انا حفيدة ناير و ..
قطع كلامى وقال :
حتى لو حفيدة الزفت .. عايزة ايه ؟!!
قلتله :
اولا متقلش على جدى زفت ..
قال وهو بيلوى بوزه :
نفس تناكته .. انا اقول اللى انا عايز اقوله .. اقولك حاجة انا ماشى..
وادانى ضهره فى الحلم فجريت وراه وقلتله :
استنا بس استنا
قالى :
اخلصى عايزة ايه ؟!!
قلتله :
عايزاك تطلع من السيف محتجاك ضرورى!!
قالى :
طب ما تطلعين.. ليه قاعدة بتنادى عليا وتقولى ننح ننح انا مسميش ننح؟.
قلتله :
ما انا مش عارفة اطلعك .. طب قولى اسمك ايه؟!!
قالى :
انا اسمى نوتريتموس نيرو حينوخاع.
قلتله :
تمام كدا.. ماشى يا ننح .. اطلعك ازاى وانا مش عارفة امسك السيف اصلا !!
انتبه ليا وقالى باهتمام :
يعنى ايه مش عارفة تمسكى السيف ؟!!
قلتله :
جدى تقريبا معزم عليه!!
قالى :
طب تمام حلو اوى..
واختفى وسابنى
قلتله :
اه يا ننح يا ندل !!
صحيت من النوم وفى وشى السيف.
بصيت للسيف وقلتله :
ماشى !!!
سمعت صوت جليلة بتتاوب وبتقول :
انا زهقت .. ايه مش ناويه تخرجى!!
بصيت ناحية صوتها بغيط وتفيت بس ريقى كان ناشف، مطلعش حاجة ..
الوهن اتمكن من جسمى فترميت على الارض جنب السيف ودخلت فى غيبوبة.
هلاوووس , ذكريات متدخلة , امى بتنادى عليا , حنوش بيدينى الحذاء , جدى على المسرح صوت بابا , حنوش , نصير , مارو , وفاء , ننح..
صوت ننح بيقول :
3 نقط من دمك على السيف، لو انتى من نسل ناير التعزيمة هتتفك.. بس خدى بالك لو فكيتى التعزيمة اى حد يقدر يستخدم السيف .
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية ميراث نور)
