رواية ميراث نور الفصل الثلاثون 30 بقلم لينا بسيوني
رواية ميراث نور الجزء الثلاثون
رواية ميراث نور البارت الثلاثون
رواية ميراث نور الحلقة الثلاثون
” بئر برهوت”
الحياة أستقرت تماما بعد ما قتلت شهاب الساحر ,حاولت أستدعي نيللى مراته أكتر من مره بحجر الهبهاب , بس مكانتش بتحضر.
Lina Basyouni
نصير قالى أنها بنسبه كبيره جدا ماتت !
بس انا كنت حاسس أنها عايشه وهترجع علشان تنتقم .
عدت شهور والمصنع أكتمل من حيث البنايه والمعدات , ونصير جابلى, زى ماوعدنى ,عشر مهندسين من الجن علشان يساعدونى أكمل مشروعى ونصنع أول جهاز بيولد كهربا لاسلكى.
كنت بشوف المهندسين على هيئه بنى أدمين لابسين نضارات نظر !!!
شاطرين جدا فى العمليات الحسابيه وصياغة المعادلات بس بيخافوا جدا من الكهربا , فعلمتهم أزاى يتعاملوا معاها من غير مايتكهربوا .
أتفاجأت بعبقريتهم لما فهموا فكرتى كلها فى أقل من يوم !!! وعدلوا عليها كمان , كانوا بيتشغلوا طول الليل والنهار , لحد ما فى يوم وصلنا لفكرة جهاز تانى خالص ينفع فى التجسس !!.
فروحت بالجهاز لمعتز باشا بما انه شغال فى جهه سياديه عليا , وياريتنى ماروحتله !!!
Lina Basyouni
عرض الجهاز على الجهه اللى شغال فيها , فوقفوا العمل فى المصنع كله !!! لخطورة الجهاز !! , المصنع أتشمع بالشمع الاحمر , أتهجر تماما وأتوقف شغله فى عالم الانس .
الجن المهندسين مارضيوش يسيبوا المصنع , وقالولى أنه يعتبر كنز فى عالم الجن، واصروا يفضلوا شغالين فيه ورفضوا يخرجوا منه !!
نصير أقنعنى أسيبهم مدام كده كده مقفول ومحدش بيستفاد منه فى عالم الانس , فوافقت ،خاصة لما لاقيت المهندسين متحمسين جدا وبدأوا يطلعوا أفكار جديده وغريبه جدا!!! ,ده غير أنى كنت بلاقى متعه فى الشغل معاهم ,خيالى كبنى أدم مع ذكائهم كجن كان عامل تناغم رائع !!
طبعا مكنتش بتردد على المصنع , علشان محدش ياخد باله انه لسه شغال.
كانوا بيجوا يقعدوا معايا فى الخيمة ساعه كل يوم , بنراجع المخططات والرسومات الهندسية بتاعت الاختراعات الجديده واللى هتعمل طفره فى عالم الجن , خاصة فى الحروب , الموضوع كان سرى عن عالم الجن والانس .
قطعنا شوط طويل فى ناحية تانيه خالص !!
Lina Basyouni
الفتره دى كانت أحلى فتره فى حياتى , كل حاجه كانت ماشيه كويس , بشتغل فى الحاجه اللى بحبها , الكهربا ,
وبعمل بوصيه جدى، بستعمل السحر فى الخير من غير فلوس , ومن الناحيه الماديه مستوره بعد ما بعت الفيلا والعربية وحطيت الفلوس فى البنك وبصرف من الفايدة بتاعتها .
حاجه واحد بس اللى كانت تعبانى … بنتى نورا …
بنتى الوحيده واللى أتولدت بأعاقه فى رجلها.
بخاف عليها من الهوا الطاير , ساعات كنت باجى عليها كتير بس علشان مصلحتها ,خاصة انى مبقتش أثق فى حد بعد كل اللى حصلى !! .
حاولت بشتى الطرق أنى أعالجها , بالطب وبالسحر, بس فشلت , وتأكدت أنه مالهاش علاج .
فى حته جوايا كانت بتحس براحه انها عاجزة !!!, أها عارف أنى أب سئ علشان حسيت بده, بس كنت بعتبرها رحمه من ربنا , يمكن عجزها هو اللى حامى حياتها ومخليها عايشه لحد ما كملت 9 سنين .
سندس امها كانت على طول بتدعيلها , وبتقول :
– يارب يانورا تتعالجى واشوفك بتجرى أسرع من الرهوان !!
من اول يوم أتولدت فيه نورا وحنوش بيلاعبها وبيهزر معاها , كان بيحبها جدا و بيخاف عليها , وهى كمان حبته وأتعلقت بيه جدا .
ومن كتر حبه ليها بدأ يدلعها زياده عن اللزوم , لحد مافى يوم لاقيته بيصحينى من النوم , وبيقولى :
– مصيبة !!!
كنت لسه بفوق من النوم وبستوعب مين اللى بيصحينى , سمعته بيقول :
:
– مصيبه .. نيللى !!!
قومت من النوم مفزوع , فلاقيت حنوش واقف جنب السرير وشكله متوتر جدا وجمبه نورا لابسه جزمه بوت وواقفه على رجليها !!!
فركت عينى , وانا بحاول أدرك اللى أنا شايفه !!!!
سندس كانت نايمه جنبى و بتشخر!!!
فضلت ببص بحيره على الاتنين ومش عارف أسأل على أيه ولا أيه فقولت :
– حنوش … هى واقفه أزاى !! … ونيللى مالها !! … هو فيه أيه ؟!!
حنوش قالى وهو بيبص على سندس اللى بتشخر :
– ممكن تيجى بره احسن ، علشان ما نزعجش سندس !!!
Lina Basyouni
قومت من مكانى و انا بحاول أدرك اللى بيحصل ,خرجت بره وانا ببص بأندهاش على نورا اللى ماشيه قدامى على رجليها !!!!
حنوش قالى :
– نيللى طلعت من بير برهوت !!!
قولتله :
– واحده واحده ياحنوش وفهمنى أيه اللى حصل !!
بص على نورا وقال :
– أنا جيبت لنورا الحذاء ده , واللى عامل زى القميص السحرى بتاعك و الحمد لله خلاها تمشى على رجليها و و …..
قولتله :
– و أيه ؟!!
نورا قالت وهى متحمسه :
– والحذاء طلع فيه قدرات خارقه يابابا ،وبينط لفوق أوى وبيجرى بسرعة الصوت !!!جريت وانا بجرب الحذاء بعيد عن عمو حنوش وسمعت صوت واحده بتنادينى من جوه بير وعايزانى انقذها فأنقذتها و….
قطعت كلامها وقولت لحنوش :
– وطبعا اللى أنقذتها دى تبقى نيللى؟ !!!
فمردش عليا !!!
زعقت بعصبيه :
– صح ياحنوش , بنتى أنقذت نيللى !!!!
ناديت على نصير بعصبيه فحضر وهو ملهوف , وقالى :
– خير يانينو !! عصبى كده ليه !!! أيه ده هو نوشه واقفه أزاى !!؟
قولتله :
– أتفضل شوف … حنوش صاحبك عمل أيه !!؟ ده جزاتى انى وثقت فيه وامنته على بنتى !!
حنوش نزل وشه فى الارض وأعتذر وهو بيقول :
– وحياة نورا عندى انا كان قصدى أفرحها , ومكنتش أعرف ان كل دا هيحصل!!
نصير قال :
– أنا مش فاهم حاجه خالص ؟!!
فقولت لنصير بعصبيه :
– حنوش باشا لبس بنتى جزمه سحرية وخلاها تجرى تنقذ نيللى من بئر برهوت !!
نصير أتصدم وقال :
– نيللى وبير برهوت !!
قومت من مكانى وشيلت نورا وحطيتها على الكرسى المتحرك وقلعتها الجزمه الغريبه اللى كانت لابساها , بصيت على نورا لاقيتها بتعيط بحرقه وبتقولى :
– انت بتكرهنى وعايزنى أفضل طول عمرى عاجزه , أنا بكرهك , انا نفسى تموت بقى علشان أعرف أعيش !!!
اتعصبت عليها وقولتلها :
– انتى عارفه انتى عملتى أيه النهارده؟!! انتى عرضتى حياتك وحياة امك وحياتنا كلها للخطر , اتفضلى خشى جوه أنتى معاقبه !!
مدت أيديها وبدأت تلف عجل الكرسى بتاعها وهى بتعيط ودخلت جوه الكهف خالص.
Lina Basyouni
نصير ظهر بهيئته وقالى :
– أهدى يانينو …
وبص لحنوش وقاله وهو بيجز على سنانه :
– انت هببت ايه ؟! يخربيتك !!
حنوش قال :
– مكنش قصدى !!
نصير قالى :
– خلاص يانينو … اكيد حنوش مكنش قاصده , خلينا نفهم بس أيه اللى حصل وأيه اللى ودا نيللى بير برهوت ؟!!
وبص لحنوش وقاله :
– قول ياحنوش أيه اللى حصل ؟!!
حنوش قال :
– هقولكم على كل اللى عرفته من قرين نيللى بس لما نينو يسامحنى الاول !!!
قولتله بعصبيه :
– يووووووووه … ماتنجز ياعم أنت , قول اللى عندك .
نصير قال :
– أهدى يانينو .. حنوش بيتصرف بحسن نيه…
قطعت كلام نصير وقولتله :
– حسن النية لا يبرر سوء الفعل يانصير , المفروض كان جالى الاول قبل ما يدى نورا حاجه زى كده !!
نصير قال :
– عندك حق فى دى يانينو … بس برضه حنوش يشكر أنه عالج نورا بنتك .
دخل حنوش فى الكلام وقالى :
– واللى حصل بعد كده مليش دخل فيه، وكان هيحصل لو كنت نجحت فى الاول و عالجت بنتك نورا بنفسك يا نور !!
قولتله :
– مش فاهم !!
لاقيت حنوش راح ناحية التليفزيون ، فتحه ومسك الريموت وهو بيقول :
– عندكم تردد قناة الجن اليوم !!!
نصير قاله :
– أيه!!! معاك فيلم حلو … نعمل فشار؟!
حنوش قال :
– فيلم حلو بس !!! ده فيلم دمار شامل …
نصير قالى :
– يبقى تعملنا فشار يانينو ومن غير ملح ، الله يخليك !!
ولاقيته نط جنب حنوش وقعد على الكنبه!!
Lina Basyouni
وانا روحت أعمل الفشار من غير ما أعترض، معرفش ليه؟!! بس كنت فرحان جدا من جوايا ان بنتى وقفت على رجليها وبتمشى رغم المصيبه اللى لسه معرفتش تفاصيلها .
روحت على المطبخ , جبت حله كبيره وحطيتها على النار وحطيت الزيت والذره وغطيتها , شويه وسمعت صوت الفشار وهو بيطقطق و بيتنطط جوه الحله , سرحت وانا بفكر فى بير برهوت.
وبدأت أفهم ليه مكنتش بعرف أستدعى نيللى بحجر الهبهاب ,علشان طول الفتره دى كانت فى المكان اللى مابتسريش عليه قوانين السحر!!
في اقوال بتقول ان البير عباره عن سجن للجان ومسجون فيه الجن المتمردين ومنهم الجن اللى اتمردوا على سيدنا سليمان ، مالوش قاع ومحدش من البشر قدر ينزله
و كلمة برهوت في اللغة الحميرية القديمة معناها أرض الجن أو مدينة الجن.
الرسول أتكلم عن بير برهوت وقال :
“وشر ماء على وجه الأرض ماء برهوت بقية حضرموت كرجل الجراد من الهوام، يصبح يتدفق، ويمسي لا بلال بها”
و علي بن أبي طالب قال عنه :
أبغض البقاع إلى الله تعالى وادي برهوت بحضرموت فيه بئر ماؤها أسود منتن يأوي إليه أرواح الكفار.
الفشار بطل يتنطط , ففضيت الحله فى طبق كبير وروحت ناحية حنوش ونصير ولاقيتهم بيتكلموا مع بعض , واول لما شافونى قطعوا الكلام , ونصير قالى وهو مبتسم :
– أوعى الملح يانينو !!
حطيت قدامهم الطبق وقولتلهم بقرف :
– يلا شغل اللى عندك !!!
نصير غرف حبة فشار فى أيده ورماهم فى بوقه .
حنوش فضل يقلب فى التليفزيون بسرعه جدا .. وقال وهو بيقلب فى القنوات :
– اللى هتشوفوه ده حصل من حوالى 10 سنين !! بعد حرب الميجوانا على طول , قبل مانينو يستدعى شهاب ويحرقه بالكهربا , ركزوا فى شاشة التليفزيون.
ركزنا فى شاشة التليفزيون , شويه وشوفت نيللى فى الشاشه واقفه جنب شهاب , وبتقوله بعصبيه :
– يعنى أيه خسرنا الحرب دا أحنا أكتسحناهم !! وهدينا القلعه السودا يعنى قضينا عليهم , ومتفضلش منهم الا أعداد قليله !!
قالها :
– الكلب نور أتدخل وقضى على كائنات العزيف ورجع النصر ليهم تانى .
قالتله :
– وأيه العمل دلوقتى !!؟
قالها :
– هنكن فتره ونحضر جن تانى وبكتاب العزيف اللى معايا هحضر كائنات تانيه والمره ده هنسحق…..
أختفى شهاب من قدام نيللى قبل ما يكمل جملته , نيللى اتلفتت حواليها وهى بتدور على شهاب , نادت عليه …
مردش عليها.
فأستدعت الجن اللى معاها فى خدمتها ,فحضر على هيئة رجل أسود ملامحه غليظه وأقرع , كان طويل جدا ومفتول العضلات !!
قالتله :
– يا ذنار , شوفلى بسرعه شهاب أختفى فين؟ !!
أختفى ورجع بسرعه وقالها :
– فيه حد أستدعاه بالهباب النازف .
قالتله :
– أستدعاه فين !!؟
قالها :
– فى مصنع تحت الانشاء فى قرية النيارين.
قالت :
أها يانور الكلب , أكيد هيستدعينى انا كمان !!! ..
بسرعه يا ذنار روح بكل الخدمه اللى معاك وأنقذوا شهاب
قالها :
– مش هينفع !! الجن اللى كان مع شهاب معظمهم أتحرق أول مادخل المصنع , الساحر اللى خطف شهاب عامل حاجه زى تعزيمه مميته لآى جن بيفكر يدخل المصنع !!!
قالت وهى مرعوبه :
– طيب أتصرف يا ذنار أحمينى !! , ماتخلهوش يستدعينى انا كمان!!!
قالها :
– مش هقدر اعمل حاجه !! الهبهاب النازف قوة جلبه قويه جدا وطول ما انتى على كوكب الارض مفيش قوه تقدر تمنعه من أنه يجلبك !!
قالته :
– خلاص اطلع بيا على أى كوكب تانى !!
قالها :
– هتموتى من أنعدام الاكسجين والضغط !!
قالتله وهى بتصرخ فيه :
– أتصرف يا ذناااار .
قالها وهو متوتر :
– فيه مكان على الارض مابتسريش عليه قوانين سحر الجلب كلها , لانه سجن الجان , بس ده خطر جدا عليا وعليكى وبنسبه كبيره اول ما هننزل فيه هنموت !!
قالتله :
– بنسبه كبيره هموت؟ !!!على الاقل فيه أمل أنى أعيش !! الكلب نور لو أستدعانى هيقتلنى !! انطق ايه المكان !!؟
قالها وهو قلقان :
– بير برهوت فى اليمن !!
قربت عليه وقالتله :
– أنقلنى هناك بسرعه !!!
حضنها وهو متردد واختفوا .
شاشة التليفزيون فضلت مضلمه شويه لحد ماظهرت نيللى والجن اللى معاها جوه البير و حواليهم جن شكلهم غريب وافاعى كبيره .
كانوا واقفين قدام جنى لابس عبايه سودا ووشه مش ظاهر, كل اللى ظاهر منه ظلام .
الجنى أبو عبايه سودا قال بصوته الاجش واللى هز أرجاء البير :
– ماهتار نيزانا…..
وكمل كلام بلغة الجن القديمه , فقولت لحنوش :
– هو بيقول أيه؟ !!
قالى :
– لامؤاخده نسيت اشغل الدبلجة والترجمة الفوريه …
وسألنى وهو ماسك الريموت :
– عايز الدبلجة فصحى ولا عامية مصريه؟ !!
قولته وانا لاوى بوزى ومش مديله ريق :
– عاميه مصريه .
داس على زرار الريموت فلاقيت الجن أبو عبايه سودا كلامه بيتدبلج للعاميه المصريه !! وبيقول لنيللى وللجن اللى معاه :
– أنتوا مين !!؟ وأيه اللى جابكم مملكة برهوت؟ !!
نيللى جسمها كان بيترعش من الخوف وبتتلفت حواليها وهى مرعوبه .
الجن اللى حواليها كانوا بيبصولها بأشتهاء , والثعابين الكبيره فاتحه بوقها ومستعده للهجوم , فمردتش ومسكت فى الجن اللى معاها وهى بتتحامى فيه .
فالجن اللى معاها قال بجرأه وبثقه :
– أنا ذنار من سلسال الملك الأحمر، و دى سيدتى , موكل بخدمتها من سيدى تروبكار الشديد , وجينا نحتمى بيكم , بعد ماخسرنا فى حرب الميجوانا ضد الجن المؤمن .
الجن أبو عبايه ضحك بصوت عالى , وقاله :
– وأيه اللى خلاك واثق أنك هتجد الحمايه فى بير برهوت ؟!!
رد عليه وقاله :
– علشان أحنا شبه بعض , نصكم اتمرد على سليمان والنص التانى ملوك الجن حبسوهم هنا علشان خالفوا القوانين وكانوا عايزين يرجعوا المجد والحكم تانى لمملكة الجن بعد ماسيطر عليها بنو الانس.
الفرق الوحيد بينا اننا خدنا موقف وأتحركنا فى حرب علشان نسترد المجد , وأنتوا أرتضيتوا بالسجن فى بير برهوت !!
أبو عبايه سودا قاله بغضب :
– ألزم حدودك يابن الاحمر !! أحنا أقوى الجان على الارض ومحدش يقدر يضاهينا فى قوتنا , أباطرة الارض عبدونا كألهة وكتبوا عننا القصص والاساطير ، نقشوا أسامينا على جلودهم وذبحوا أولادهم تقربا لنا , احنا تحدينا سليمان نفسه ووقفنا ضده فى اول الزمان .
ذنار قاله :
– قصدك خونتوا سليمان وعاقبكم , ومن ساعتها وانتوا ضعاف ومحبوسين برغبتكم هنا, بالرغم من أن سليمان مات من قرون , بس لسه ذكراه مخوفاكم ورعباكم ومخلياكم زى التعابين بتستخبوا فى الجحور !!
الهرج والمرج زاد فى البير والتعابين قربت على نيللى وذنار أكتر وفتحت بوقها على أخره .
Lina Basyouni
أبو عبايه سودا شاور للجن والتعابين علشان يرجعوا , فرجعوا ورا وأنصاعوا لامره , فقال :
– عندك جرأه يابن الاحمر , فهل قوتك على قد جرأتك !!؟
قاله بثقه :
– قوتى تضاحى قوة عفريت منكم , انا جنى متمرس , وأقوى من مارد عاش حياته كلها فى بير من غير مايستخدم قوته !! وأتحداك !!
ضحك بأستهزاء وقاله :
– تتحدى شخصى انا !!؟
ذنار قاله :
– لا طبعا … مفيش قوه على الارض تقدر تغلب مارد البير , بس أتحدى ترشيحك لحد يقف ضدى .
فرد عليه وقاله :
– لو كنت أتحديت شخصى كنت قتلتك فى لحظتها , بس مادام عارف حدودك كويس….
وسكت شويه و قال لذنار :
تقدر تشرب أد أيه من الخمر؟ !!
ذندار قاله :
– اقدر أشرب ابيار و أنهار وبحور وماسكرش أو توازنى يختل !!
مارد البير ( أبو عبايه سودا ) شاور للجن اللى فى البير فجابوا كأس حجمه عادي مليان خمره ومكتوب عليه كلمة بلغة الجن ,عرفت اترجمها لوحدى , الكلمة كانت (هادى).
ذنار خد الكاس الكبير ورفعه بأيده الاتنين وفضل رافعه وبيشرب منه فتره طويله جدا !!
وبعدين نزل الكأس وهو بياخد نفسه بالعافيه , الكأس كان مشروب منه ربعه بس !!
ذنار كان بيترنح يمين وشمال وهو سكران ,بعدها سمعت مارد البير وهو بينادى على حد .
فسمعنا صوت جاي من الضلمه اللى فى البير , صوت عامل زى خشبه بتدك الارض وبتهزها , بعدها ظهرت ست عجوزه جدا ماشيه بالعافيه وبتتسند على عصايا خشب وهى ماشيه وبتدك بيها الارض .
العجوز قربت من ذنار واللى كان دايخ وسكران ورفعت العصايا الخشب اللى فى أيديها وحاولت تنزل على رأس ذنار !!
ذنار التفت ليها ومسك العصايا الخشب قبل ماتنزل على راسه , وحاول يقاوم الست العجوز , بس كان بيقاومها بصعوبه جدا , ونزل على ركبته وهو ماسك قصادها العصايا الخشب وبيقاومها .
لحد ما مارد البير شاور للست العجوزه وقالها :
– كفايه !!
الست العجوزه شدت العصايا من أيد ذنار وأديتله ضهرها , ورجعت تانى وهو بتمشى براحه وبتسند على العصايا الخشب لحد ما اختفت فى الظلام .
قولت لنصير وحنوش :
أيه ده !!!! دا جنى ضعيف جدا مقدرش يشرب كاس خمره عادى و قاوم ست عجوزه بالعافيه!!!
نصير لطم وهو بيقول :
– للاسف يانينو الجن اللى مع نيللى ده قوى جدا !!
قولتله بأستغراب :
– أزاى !!؟
قالى :
– الكأس اللى شرب منه كانت مكتوب عليه الهادى .. يعنى مقدار الخمره اللى فيه توازى مقدار الميه اللى فى المحيط الهادى كله !!
واما الست العجوزه اللى وقف قصادها دى .. دى تبقى الشيخوخه !!! يعنى الجن ده هيقاوم الشيخوخه وهيفضل قوى جدا لفتره كبيره .
رمى حبه فشار فى بقه وكمل وقال :
– ازاى يا نينو متعرفش الاختبار دا ؟!! مقرتش قبل كدا عن اساطير الفايكينج؟!!
حنوش قالنا :
– فكك من الكلام ده دلوقتى !! ركز فى اللى جاى هو المهم !!
بصيت على الشاشه وشوفت مارد البير وهو بيسقفله وبيقوله :
– أبهرتنى , وليك الحمايه وهسيبك تعيش انت وهى , بس هتفضلوا محبوسين وسطنا , مش هتخرجوا من هنا طول عمركم !!
ذنار قاله :
– لا أحنا هنحتمى عندكم فتره لحد ما عدو سيدتى ينساها ونخرج تانى !!
المارد ضحك وقاله :
– الحماية وسطنا يعنى السجن زينا !!
ذنار قاله :
– أنا عارف كويس أن الجن المارد بيعشقوا الرهانات , وانا جاهز لأى رهان علشان نكسب حريتنا فى أى وقت عايزينه !!
المارد سكت شويه وقاله :
– فى رهان … بس ليها هي مش ليك!!
وشاور على نيللى اللى كانت لسه مرعوبه مش فاهمه أى حاجه من لغتهم ومن اللى بيحصل وقال :
– تنادى على عدوها ويجى يمد أيده فى البير وهو اللى ينقذها .
ذنار قاله :
– بس ده أستحاله .. عدوها ساحر قوى جدا وأستحاله تعرف تندهه زى النداهه !! ولو عرف انها في البير هيقتلها مش هيطلعها.
مارد البير قاله :
-هو دا الرهان.
ذنار فكر شويه وقاله :
– موافقين … ولو كسبنا الرهان؟ !!
المارد قام من مقعده وبدأ يطول ويطول زى النخله وبص عليهم من فوق وقال :
– أنا مارد البير , الوحيد الباقى من سلالتى , سيد برهوت قاهر قوانين السحر و محقق الامنيات, عدو سيدتك لو مد أيده و أنقذها , هنفذ ليها 3 أمنيات .
ذنار قال :
– عدوها او نسله !!
رد عليه وقاله :
– أو نسله بس بشرط نسله يكون عاقل مش مجذوب، وجسده مش معيوب , واقف بطوله وبيعرف يفرق بين الجمره والثمره .
المشهد أتغير وظهرت نورا على الشاشه وهي بتشد نيللى وبتخرجها من البير , بعدها الاتنين أتنفضوا بعيد عن بعض وأغمى عليهم .
شوفت بعدها جن كتير بيخرجوا من البير وبيحاوطوا نيللى ونورا.
حنوش كان هيقرب من البير علشان ينقذ نورا بس الجن حذروه وقالوله لو قرب هيقتلوها !!
فوقف بعيد ونادى عليها علشان تقرب عليه !!
فاقت وجريت عليه.
وقف حنوش شويه بيبص على نيللى قبل ما تفوق وتهاجمهم .
العرض وقف والتليفزيون رجع على قناه أخباريه.
كنا متنحين انا ونصير وبنبص لبعض .وفاتحين بوقنا , سمعنا حنوش بيقول :
– في حاجه كمان لحقت اعرفها من قرين نيللى قبل ما تفوق وتهاجمنا , أمنيتن من التلت امنيات اللى هتتمناهم !!!.
قولناله انا ونصير فى صوت واحد :
– أيه !!
حنوش قال :
– الامنيه الاولى هى ….
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية ميراث نور)
