رواية ميراث نور الفصل الثامن عشر 18 بقلم لينا بسيوني
رواية ميراث نور الجزء الثامن عشر
رواية ميراث نور البارت الثامن عشر
رواية ميراث نور الحلقة الثامنة عشر
سمعت نصير بيقول فى ودنى :
أوباااااااااا, التاريخ بيعيد نفسه يانينو .. شكلنا داخلين على أيام سواد…
Lina Basyouni
الشاب مد أيده علشان يسلم عليا وهو بيقول :
أعرفك بنفسى أنا شهاب خزاعى!!
مسلمتش عليه وقولتله :
خزاعى؟ !!! أنا حاسس أنى سمعت الأسم ده قبل كده !!
سمعت نصير وهو بيلطم وبيقول :
مش عارف سمعت الاسم فين قبل كده!!! , خزاعى الساحر اللى جدك قتله , اللى قدامك يبقى حفيده , ركز يانينو أمال كنت جايب أمتياز فى الكليه أزاى!!
الشاب كان مادد أيده وبيبصلى وهو مبتسم وقالى :
أيه هفضل مادد أيدى كتير , ولا بتسأل نصير الجن تسلم ولا لآ؟ !!!
نصير قال فى ودنى :
أوعى تسلم , أنت فاهم , أوعى يانينو !!!
Lina Basyouni
فتحت أخر زرار فى القميص فظهرت بعد ماكنت مخفى وقولتله :
شيل أيدك علشان مش هسلم عليك , وأتفضل بره الكهف.
شال أيده و ضحك بصوت مصطنع وهو بيقول :
قول لنصير أنى مش عامل سحر على كفى , وانى مش جى علشان أأذيك بالعكس يانور أنا جاى أتعرف عليك علشان نبقى أصحاب !!!
قولتله :
أذيه ؟!!! أنت مفكر نفسك تقدر تأذينى مثلا !!! أنت ناسى أنى جدى معلم على جدك قبل كده ولا مبتقراش تاريخ أجدادك !!
سمعت نصير بيقولى :
عفارم عليك يانينو , أيوه كده !!! أديله ومتبينش أنك خيبه !!!
شهاب قالى :
يانور أنا جاى أتصاحب عليك , ومش جاى علشان أنتقم , على فكره أنا زيك بالضبط ما أخترتش أنى أبقى ساحر , أنا طالب فى كلية طب ومتفوق جدا.
و الجن اللى معايا ورثتهم عن أبويا اللى ورثهم من جدوده, وفضلوا يرهقونى لحد ما قدرت أسيطر عليهم .
سكت شويه وكمل كلامه وقال :
الجن دول حاجه وحشه أوى يانور وأوعى تثق فيهم ,
المفروض تثق فى بنى جنسك أكتر من كده , وماتخليش جنى زى نصير يحركك ويقولك تعمل أيه ومتعملش أيه !!!
قولتله بثقه :
ومين قالك أنى مخترتش أبقى ساحر!! , وان الجن اللى معايا بيرهقونى!!!
واضح أنك عندك مشكله ياشهاب , أو مفكرنى ساحر ضعيف علشان أسمح للجن يرهقونى ,أنا بعون الله أقوم بجيش جن لوحدى .
سمعت صوت نصير فى ودنى بيقولى :
حلو الاداء ده , بس متأفورش أوى , علشان متنكشفش !!!
شهاب قالى :
وانا مش جاى أشكك فى قدراتك لاسمح الله , وصدقنى يانور أنا مش بحمل أى ضغينه ضدك ,بالعكس أنا جاى أستفاد من علمك وأبقى تلميذك , وأحط أيدى فى أيدك , أنت مالكش ذنب فى اللى عمله جدك فى جدى , وكمان انا مؤمن أن الابناء مالهمش ذنب فى اخطاء أبائهم وأجدا….
قطع كلامه لما شاف سندس جاية بتجرى من أخر الكهف علينا , وقالت :
فيه أيه ياسيدى ومين ده !!؟ بنى أدم ولا جن !!؟
قولتلها :
خشى ياسندس جوه دلوقتى !!
سندس مردتش عليا وفضلت تبحلق فى شهاب وقالتله :
هو مش أنت اللى كنت بتسأل على سيدى لما كان فى القاهره !!؟
وبصتلى وقالت :
أنا فاكره الراجل ده ياسيدى كان بيسأل عليك لما سيبت البلد وسافرت القاهره..
قولتله :
يااه ده أنت عينك عليا من أول ماوصلت البلد بقى !!
قالى :
أها جيتلك أكتر من مره لما سمعت أنك رجعت تانى البلد وللاسف مالحقتكش قالولى انك سافرت وسيبت البلد , وأول ماعرفت أنك رجعت تانى جيتلك , علشان أحط
أيدى فى أيدك !! تصور يا نور الجن اللى معاك على الجن اللى معايا , أحنا ممكن نحكم العالم…
Lina Basyouni
سندس قطعت كلامه و قالت :
أنا مش مرتاحه للراجل ده ياسيدى !!!
فقولتله :
أهو لا جن ولا أنس طايقك فى الكهف !!
وقلبت وشى وقولتله :
أتفضل أطلع بره الكهف و أياك تعمل الحركه دى تانى وتدخل بيتى من غير أستئذان , أياك أصلا تنزل من فوق التبه وتقرب على الكهف , فاهم ؟!!
قالى وهو متوتر :
انت فاهم غلط والله … انا مكنش قصدى أضايقك .. انا بس كنت عايز أبهرك علشان تصاحبنى !! أنما انا طبعا ماجيش جمبك حاجه !! أنا لسه بتعلم السحر ومحتاجك تبقى أستاذى !!
Lina Basyouni
قولتله :
هو انت مفكرنى عبيط يا شوشو !!! هصدق الكلمتين دول وأقولك تعالى فى حضن عمو نور !!
أنا هعد لحد 3 لو لاقيتك قدامى هلعنك اللى باقى من عمرك أنت والجن اللى معاك , أطلع بره !!
قالى :
من غير ماتعد انا خلاص ماشى , بس المره دى أنت اللى أبتديت !!
ومشى ناحية الباب ونفد منه وهو مقفول !!
قولت لسندس بعصبيه :
تانى مره لما أقولك تدخلى جوه , تسمعى الكلام على طول … فاهمه !!
هزت رأسها وجريت على المطبخ فى أخر الكهف…
Lina Basyouni
نصير ظهر وهو قاعد على المكتب وقالى وهو قلقان :
لازم تتعلم السحر بسرعه يانينو , الواد ده ساحر مخضرم , ومعاه جن قوى جدا , ده غير المخلوقات اللى أقوى من الجن واللى أكيد ورثها هى كمان , ولو وصل لأزاى يستغلهم , لا أنت ولا أى ساحر على وجه الارض هيقدر عليه !!
قولتله :
مانا بذاكر أهوه يانصه هقطع نفسى يعنى !!! , مش كفايه سايب مشروع الاختراع بتاعى وبدرس فى السحر !!
قالى :
يانور أبوس أيدك أفهم , انت لو ماتعلمتش السحر فى أسرع وقت وبقيت ساحر قوى كمان , الواد ده هيرجع وهينفخك , وساعتها مش هتعيش علشان تكمل مشروعك أصلا !!!
Lina Basyouni
قولتله :
فاهم والله يانصه … بس برده صعبان عليا المشروع بتاعى يضيع كده !!
قالى بنفاذ صبر :
بالنسبه للمشروع ماتقلقش أنا عندى ليك مفاجأه هقولك عليها , بس لما تبقى ساحر مخضرم زى جدك !!
قولتله بفضول :
مفاجأه أيه !!؟
قالى :
لما تبقى ساحر مخضرم زى جدك !!!!!!
ضيقت عينى وقولتله :
أوعى يانصه تكون بتخدعنى !!
قالى :
ورحمة جدك أبدا , بس أبوس أيدك , أنجز وأتعلم بسرعه علشان نلحق قبل الدنيا ماتخرب .
قولتله :
حاضر يانصه , بس الموضوع صعب عليا جدا انا بقرأ بس مش فاهم حاجات كتير ولسه هحتاج وقت .
سكت شويه و قعد يفكر وقالى :
بس!!! يبقى هنلجأ للتمرس !!
قولتله :
تمرس !!! مش فاهم ؟!!
قالى :
لازم تمارس السحر كتير علشان تبقى ساحر قوى بسرعه , فعلشان كده هنزود اوردرات الشغل , فكك بقى من شغل أوردرين فى الاسبوع , أنت لازم تعملك على الاقل يجى خمسين أو ستين أوردر فى الاسبوع !!
Lina Basyouni
قولتله :
نعم !!! , ودول هجيبهم منين !!!؟
قالى :
لا دول كتير اوى و مبيخلصوش ،أحنا هنعمل خيمه فوق التبه اللى قدام الكهف ، ونعرف أهل القريه أنك هتستقبل الحالات الملبوسه والمسحوره وهتعالجها ببلاش، وأنت هتلاقى الناس بتجيلك لوحدها ، وبكده هقدر أشرحلك عملى , أحسن ما أنت تايه فى الكتب .
Lina Basyouni
بالفعل عملنا الخيمه , وبعت سندس تعرف الستات اللى فى القريه أنى فاتح الخيمه طول اليوم لحد الساعه 12 بالليل وبعالج من السحر واللبس ببلاش .
معداش نص اليوم وفوجأت بناس كتير جايه على الخيمه !!!
وكلهم بيهتفوا :
مدد ياسيدى ناير مدد!!!
يالهوى كل دى ناس ملبوسه !!
سندس نظمتهم فى طوابير ، ودخلت أنا الخيمه ولبست لبس جدى ومسكت سبحته ,ومسكت ورقه وقلم علشان أكتب اللى نصير هيقولهولى , كمذاكرة عملى !!
Lina Basyouni
نصير كان معايا فى الخيمه و شجعنى وقالى :
لو ظبطت الدنيا هنا , الناس هتجيلك من كل القرى اللى حوالينا وهيذيع سيطك , وأى حد هيخاف منك لا أراديا , فاهم !!
قولتله :
فاهم يانصه !!!
قالى :
أنا هبقى قاعد قدامك فى الخيمه فى الحته دى !!
وشاور على ركن فى الخيمه وكمل كلامه وقال :
أكتب الحاله وتشخصيها وعلاجها .
قولتله :
تمام يانصه !!
وحضرت نفسى ومسكت الورقه والقلم وناديت على سندس علشان تدخل أول حاله.
ودخلت أول حاله !!
Lina Basyouni
كان راجل فى متوسط العمر , أول مادخل الخيمه حاول يبوس أيدى , سحبت ايدى وقولتله :
أحكى مشكلتك من غير بوس أيادى , الطاعه لله فقط .
قعد على الكرسى اللى قدامى وقال :
أنا بقالى فتره مش مظبوط ياشيخنا , مبنامش تقريبا و لما بنام بيجليلى كوابيس , وجسمى بيهمد وبيتعب أوى كل يوم حد وخميس !! وباقى الاسبوع ببقى مهمد برده ،بس مش زى يوم الحد والخميس ببقى مش قادر أتحرك من فوق السرير !!
التجاره بتاعتى خسرت , وغالبية المواشى والدواجن اللى بربيها ماتت من غير سبب , وبقيت مديون !! , ارجوك ياسيدنا توجدلى حل!! أصلى لفيت كتير ومحدش لاقيلى حل !!!
Lina Basyouni
قولت لنصير :
أيه يانصه , الكلام على أيه !!
قالى وهو فرحان :
ثانيه يانينو وأجيبلك قراره .
أختفى نصير شويه ورجع تانى بسرعه وقالى :
معلهوش جن ومش ملبوس , ومحدش عامله عمل !!!
قولتله :
أمال ماله , اللى بيحصله ده من أيه !!؟
قالى :
شبشبه !!!!
قولته بأستغراب :
شبشبه !!! يعنى أيه ؟!!
قالى :
ده سحر بدائى ومن أقدم وأسرع و أخطر أنواع السحر , علشان مالوش حل ومحدش بيقدر يبطله غير اللى عمله !!
قولتله وانا بكتب وراه :
عباره عن أيه الشبشبه دى !!؟
قالى :
بص ياسيدى … الشبشبه دى حاجه كانوا بيعملوها الستات زمان فى العصور القديمه , بيقعدوا وهما كاشفين شعرهم ويمسكوا الشبشب ويقعدوا يخبطوا بيه بأيقاع زى الموسيقى وهما بيدعو على الغريم أو العدو بكلام مسجوع زى الاغانى , و بيخاطبوا فى الاغانى بتاعتهم نجم معين أو كوكب !!
زى مثلا نجمه العشاء ونجمه الصباح والشمس والقمر , وفيه اللى بيخاطب الايام زى الحاله اللى قدامك دى .
نصير سكت شويه وقال :
الراجل دا أفترى على واحده بتربى يتامى وخد منها الجاموسه بتاعتها , فالست شبشبت عليه ، ودعت أنه ماينامش الليل ويعيا فى أيام الحد والخميس وتخسر تجارته وتنفجر مرارته ،
ومحدش هيقدر يشفيه أو يفك لعنته غير الست اللى ظلمها !! لازم الست تشبشب تانى بس علشان يخف , بس المره دى تشبشب بعكس الكلام وتسامحه , هى شبشبت عليه وقالت :
أخدت لباسى وهمى وكاسى وحططتهم تحت رأسى
لاترتاح ولاتغييب ولا يجيلك نوم يا سامح يا أبن سعاد
و كمل نصير باقى سجع الشبشبه … وكتبته وراه
Lina Basyouni
قولت للراجل على كل اللى قالهولى نصير , وأعترف أنه أفترى على الست فقولتله يروحلها ويراضيها ويخليها تشبشب بعكس الكلام علشان تبطل السحر اللى عليه , واديته ورقه فيها كلام الشبشه اللى قالته الست، وقلتله لو مارحش بسرعة مرارته هتنفجر !!
خرج من الخيمة جرى وهو بيقول :
الله يباركلك ياشيخنا .. مدد ياسيدى ناير مدد !!
Lina Basyouni
دخلت بعده كام حاله كانوا كويسين ومفهمش حاجه , مرضى عاديين نصحتهم يروحوا للدكتور
لحد مادخل علينا راجل أربعينى , من أول مادخل الخيمه وعرفت انه مسحور …من ريحته الوحشه !!
حاول يبوس أيدى زى الباقيين بس أنا رفضت وقولتله زى ماقولت للى قبله.. “الطاعه لله وحده”
قعد قدامى وقال :
انا مش من بلدكم ياشيخ ناير أنا من قريه جمبكم وكنت بالصدفه هنا وعرفت أنك بتعالج و….
قولتله بنفاذ صبر :
أنجز الخيمه مقفوله والريحه هتموتنى !!!
قالى :
لامؤاخذه ياشيخنا ,أدي أنت شامم ريحتى عامله أزاى !! ده غير أنى مبنمش وبحلم أنى باكل لا مؤاخذه روث الحيوانات , المشكله أنى نفسى رايحه ليها على أنها أكل !!!
قولت فى بالى :
الله يقرفك !!
بصيت على نصير اللى قاعد فى الركن , فلاقيته أختفى من غير ما أسئله ورجع تانى .
قالى :
مراته عملاله سحر جلب !!!
قولتله وأنا بحضر القلم والكراسه :
وضح يانصه !! عملاله سحر أزاى !!؟
قالى :
كانت بتأكله لما يرجع من الشغل وبعد مايخلص أكل , بتجيبله يغسل ايديه وبوقه , والميه اللى غسل بيها كانت بتخبيها وتجيب جير من اللى بيبيضوا بيه الحيطان وتكب عليه الميه
وهى بتقول :
أطفيت يدك وفمك مثل ما طفى هذا الجير!!
وبعدين خدت حبه صغيره من الجير على أد قبضة أيديها وبيضت بيه جدار في البيت .
هى كان قصدها تخليه يبطل يضربها و تعلقه بيها ، بس اللى متعرفوش الهانم أنها نسيت حبة حاجات , فجوزها أتلمس واتلبس , أنا خلصت من عندى , بس قوله على حبة النصايح دى .
قولت للراجل زى ماقالى نصير , بس ماقولتلوش أن مراته هى اللى عملاله العمل , ممكن يروح يقتلها…
نصحته يعامل مراته كويس ،و قولتله يجى الاسبوع اللى جاى ومعاه مراته , علشان أقولها بينى وبينها ماتعملش كده تانى , و أهددها انى هقول لجوزها المره اللى جايه لو الحركه دى أتكررت , شكرنى ووعدنى يجى الاسبوع اللى جاى ومعاه مراته وطبعا عمل هوليله وهو طالع من الخيمه , وفضل يدعيلى لحد ماخرج بره البلد .
Lina Basyouni
وفضلت على كده كام يوم أستقبل الناس فى الخيمه.
أغلبية الحالات كانت كويسه ومفيهاش حاجه ،حالات قليله للى بيبقوا مسحورين أو ملبوسين .
نصير علمنى فى فتره صغيره , أزاى افك المربوط وأعالج الملبوس , وأحضر التركيبات العلاجيه ,و الاعشاب الطبيعيه , وبأمر الله قدرنا نشفى كل الى دخل الخيمه وكان عنده عله …
لحد مادخل عليا الخيمه شخص غريب , لابس اسود فى أسود و مخبى رأسه بزعبوط
أول مادخل الخيمه ,نصير قالى :
مش هتصدق مين فى الخيمه ؟!!!
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية ميراث نور)
