رواية موضوع عائلي 3 (بيت الهنا) الفصل الرابع عشر 14 بقلم رحاب القاضي
رواية موضوع عائلي 3 (بيت الهنا) الجزء الرابع عشر
رواية موضوع عائلي 3 (بيت الهنا) البارت الرابع عشر
رواية موضوع عائلي 3 (بيت الهنا) الحلقة الرابعة عشر
#موضوع_عائلي
“بيت الهنا”
_الحلقه الـ 14
ــــــــــــــــــــــــــــــــــ
ما كُنتُ أهوى الدّارَ إلّا بِأهلِها
على الدّارِ بعدَ الراحِلينَ سلامُ💔
_في المستشفي اللي فيها حسن كانت رضوي مستنيه الدكتور يطلع يطمنها علي باباها ومعاها يوسف وكمال وعم سيد اللي طبطب علي كتفها بهدوء وقال..
سيد
ما تقلقيش يا بنتي هيطلع الدكتور دلوقتي وهيطمنا عليه..
رضوي ببكاء
الموضوع صعب يا عم سيد بابا عنده مرض وحش اووي وحالته خطر جداً، وما كانش راضي يخليني اقول لحد عشان فرح روان يتم علي خير..
بصلها يوسف بحزن وكمال زعق فيها وقال
ايه التخلف ده وانتي تسكتي ليه ما الفرح يتأجل، عاجبك يعني الوضع ده..
رضوي
اللي حصل بقي يا كمال دلوقتي المهم بابا يبقي كويس..
يوسف بهدوء
خير ان شاء الله يا رضوي وبلاش تبلغي اهلك فعلا دلوقتي لحد ما الدكتور يطلع ويطمنك عليه ، عشان باباكي ما يزعلش منك واحنا معاه اهو..
كمال بحده
وانت مال اهلك اصلا ايه اللي دخلك بينا احنا عيله في بعض انت بتتحشر ليه، انا هكلم طارق يا رضوي وهبلغهم بحالة خالي..
رضوي بجمود
مالكش. دعوه يوسف معاه حق لما اشوف الدكتور هيقول ايه الاول هبقي اكلمهم..
سيد
مش وقته الكلام ده يا جماعه فعلا نطمن علي الاستاذ حسن الاول والباقي ساااهل..
_وفضلو كلهم قااعدين مستنين الدكتور يطلع ويقولهم حالة حسن وصلت لايه، وفعلا طلع الدكتور وكان متدايق جدا وقال لرضوي بحده..
الدكتور
هو انا يا انسه رضوي مش قولت يبدأ في العلاج، اهي حالته راحت لمرحله خطر ولازم دلوقتي حالا يدخل اوضة العمليات واحنا مش لاقيين متبرع، وفي خلال الدقايق الجايه دي لو الاستاذ حسن ما دخلش العمليات لا انا ولا احسن دكتور في العالم هيقدر يعمله حااجه..
بصولو كلهم بصدمه اول ما سمعو اللي قاله وقالت رضوي بخوف
انا هكلم اهي يجو حالاً يعملو التحاليل وو..
يوسف
بيقولك ما فيش وقت هو انتو عايزين متبرع بالدم ولا ايه؟..
الدكتور
بجزء من الكبد ولازم تكون فصيلة دم المتبرع بنفس فصيلة دم الاستاذ حسن، والمشكله برضو ان فصيلة دم الاستاذ حسن O ساالب ودي فصيله نادره جداً، وفعلا ما فيش وقت وو..
قاطعه سيد وقال بسرعه
انا يا دكتور انا نفس فصيلة دم الاستاذ حسن..
الدكتور
متأكد يا حج وبعدين العمليه مش ساهله وسن حضرتك كبير يعني انت هتعرض نفسك برضو للخطر…
سيد بجديه
الاعمار بيد الله يا دكتور، الاستاذ حسن ده اخويا واكتر من كده وافديه بعمري الله يرضيك يلا شوف شغلك وانا اللي هتبرعله..
بص الدكتور للممرضه وقال
ايه بلغي ادارة المستشفي بسرعه ببينات الحج وفي اقل من عشر دقايق تكون اوضة العمليات جاهزه يلاا بسرعه..
_قال الدكتور كلامه ومشي من قدامهم بسرعه عشان يجهز للعمليه وسيد رااح مع الممرضه، وطلعو حسن برضو اللي كان نايم علي السرير الطبي المتحرك ونقلوه لاوضة العمليات..
كمال بقلق
طارق بيرن عليا انا هقوله يجي ما ينفعش نخبي عليهم اكتر من كده يا رضوي…
مسحت دموعها وقالت
مااشي يا كمال اعمل اللي انت عايزه..
كمال
ما فيش شبكه هنا كويسه هروح اكلمه عند الشبااك هناك..
مشي كمال ويوسف قعد جنب رضوي اللي بتعيط وقالها
انا مش عارف اقولك ايه بس ادعيله يعني العياط مش هيعمل حاجه..
مسكت رضوي ايده وقالت ببكاء
انا خايفه اووي يا يوسف لو بابا حصلتله حاجه انا هعيش بذنبه عشان ما اتكلمتش وقولت انه تعبان..
قربها يوسف ليه بهدوء وحضنها بشكل لطيف وقال
ما تخافيش ان شاء الله هيقوم بالسلامه، وانا معاكي اهو ومش هسيبك خالص لحد ما نطمن عليه واقولك ان انا كان معايا حق وهو بقي كويس.
قرب منهم في الوقت ده كمال وبص ليوسف بحده وقال
رضوي عمر ابن عمي اتضرب بالنار والدنيا مقلوبه هناااك..
بعدت رضوي بسرعه عن يوسف وقالت بصدمه
انت بتقول ايه ومين اللي عمل كده وهو عامل ايه دلوقتي وهما كويسين ولا لا..
كمال بضيق
مش عارف حاجه هروح عندهم هما هنا برضو في المستشفي بس تحت وهبعتلك طارق وطنط ليلي..
مشي كمال من قدامها وقال يوسف بسخريه
والله الواد البومه ده من لما رجع وانتو حياتكم بااظت
جات الممرضه في الوقت ده وقالت لرضوي
انسه رضوي الحج سيد عايزك ضروري..
رضوي
حاضر يوسف خليك هنا ما تمشيش انا محتجالك جنبي بجد…
قالت كلامها ومشيت وهو ابتسم بعدم تصديق وقال
قالتلي انا كده بجد ده انا هباااات هنا والله..
_وراحت رضوي للاوضه اللي فيها سيد وكان مغير هدومه ولابس الهدوم الطبيه المتعقمه ولما شاف رضوي ابتسم بهدوء وقال..
سيد
ما تخافيش يا استاذه رضوي كل الحاجه هتبقي كويسه والاستاذ حسن هيقوم بالسلامه..
رضوي
انا مش عارفه اقولك ايه يا عم سيد..
سيد
ما تقوليش حاجه ابوكي زمان لما تعبت دخلني المستشفي وكان بيبات جنبي وكنت محتاج تبرع بالدم واتبرعلي هو وعمل اللي اهلي ما عملهوش معايا، ودلوقتي هو محتاجلي وانا ما اقدرش اتأخر علي الاستاذ حسن..
واتملت عيونه دموع وقال
بس بالله عليكي يا بنتي لو حصلتلي حاجه تخلو بالكم من هنا قولي للاستاذ حسن ما يخليهاش تروح تقعد عند خالتها هي ما بتحبهمش ، وقوليلها ما تزعلش مني انا ما بحبش في الدنيا قدها..
رضوي بدموع
لا ان شاء الله هتقوم بالسلامه وهتفرح بيها، وهنا في كل الحالات زي اختي واحنا بنحبها جدا والله كفايه انها بنتك يا عم سيد..
سيد
ربنا يطمنك علي ابوكي يا بنتي..
دخلت عندهم الممرضه في الوقت ده وقالت
اتفضلي يا انسه لو سمحتي عشان نشوف شغلنا..
رضوي بقلق
حاضر.. وما تقلقش يا عم سيد ان شاء الله ربنا هيقومك انت وبابا بألف سلامه..
_وطلعت من عنده وراحت عند. يوسف لقيت هناك ليلي وعزالدين ولمياء واخواتها كلهم قاعدين بيعيطو معادا طارق اللي زعق فيها وقال..
طارق
يعني ابوكي تعبان وما تقوليش، لو حصلتله حاجه ما حدش هيبقي السبب غيرك يا كبيره يا عاقله..
رضوي بحزن
ما هو قالي عشان فرح روان..
ليلي بحده
خلصنا خلاص نطمن علي ابوكم والباقي ساهل..
رضوي بقلق
طيب هو عمر عامل ايه دلوقتي وازاي ده حصل اصلا وروان فين؟..
ريناد
روان ما تعرفش حاجه قاعده في الاوتيل ومعاها عمتو علياء وعبدالله وسيف عند عمر تحت..
لمياء بسخريه
قال فرح قال ده بقي ميتم..
عز بجمود
ملافظ سعد يا لمياء، وانت يا طارق كلمهم اطمن علي عمر طلع من العمليات ولا لسه؟..
طارق
حاضر يا عمي..
ــــــــــ #بقلم_الكاتبه_رحاب_القاضي ــــــــ
_وعند عبدالله كان واقف قدام اوضة العمليات اللي فيها عمر وقميص بدلته كان مليان دم وملامحه باين عليها الحزن والخوف بشكل كبير، وكان واقف جنبيه كمال اخوه وسيف.. وقدامه فتحيه ام عمر واسرار اللي بتعيط وبتحاول تصبر امها….
فتحيه ببكاء
ياارب انا ماليش غيره ياارب، قوملي ابني بالسلامه ياارب انا واخته مالنااش غيره..
كمال بهدوء
اهدي يا مرات عمي ما ينفعش كده، اللي بتقوليه ده مش هيخليه يخف..
فتحيه بصوت عالي وبكاء
ما حدش ليه صالح بيا، انا لا هسكت ولا هستريح غير لما يقولولي ان ولدي كويس وبقي زين..
وبصت لعبدالله وقالت
فداك بروحه يا عبدالله هتعرف تدفع اللي خلي ولدي يتوجع التمن ولا لاه؟..
عبدالله بجمود
نطمن علي عمر يا مرات عمي واللي عايزااه هعمله..
_ما ردتش عليه فتحيه وفضلت تعيط وطلع بعد شويه الدكتور من اوضة عمر ونظراته ليهم كلها حزن وقال عبدالله بلهفه وقلق….
عبدالله
خير يا دكتور طمنا هو كويس..
الدكتور
للاسف الوضع كان صعب جدا البقاء لله..
_اتصدمو كلهم من اللي قالو الدكتور وبدأت فتحي تصوت وهي مش مصدقه ان ابنها خلاص ماات، وعبدالله زعق في الدكتور وقاله..
عبدالله
انت بتخرف تقول ايه، هو هيبقي كويس غصب عنكم..
وقف جنبيه سيف وكمال اللي قاله
اهدي يا عبدالله هو الدكتور ذنبه ايه، ده قضاااء ربنا خلاص..
_وقعت في الوقت ده فتحيه علي الارض فاقده الوعي وقالت اسرار بخوف وبكاء..
اسرار
عبدالله الحق امي ما بتتحركش..
ــــــــــ #بقلم_الكاتبه_رحاب_القاضي ــــــــ
_وعند عيلة الاستاذ حسن كان قااعد معاهم يوسف اللي لمياء مش منزله عينها من عليه، وسألت عز بصوت واطي وقالتله..
لمياء
هو مش الواد ده بتاع الرقاصه اللي كانت في الفرح يا عز، هو مين الولد ده وبيعمل ايه هنا؟..
رد عليها عز وقال
ده ابن يونس الصاوي صاحبي وزميل رضوي في الشغل وهو اللي جاب معاها هي وكمال حسن لحد هنا..
لمياء
لا لا مش زمايل بص الواد بيبصلها ازاي كده..
عز بجمود
مش وقته يا لمياااء اخوكي الله واعلم بحالته وانتي عماله تقطعي في بنته اتلميي بدل ما اقوم المك…
دخل عندهم طارق وقال بحزن
عمر مات..
الكل بصله بصدمه وحزن وقال عز بضيق
ان لله وان اليه راجعون، طيب روح لولاد عمتك اقف معاهم..
طارق
انا مش همشي من هنا غير لما اطمن علي بابا..
عز بحده
وانا مش هسيب اخويا يا طارق، روح بس شوف الدنيا هناك ايه وتعالي وانت يا زين روح معاه..
زين
حاضر يا بابا..
_وطلع هو وطارق وكانو نازلين عند عبدالله وكمال وموبيله رن برقم هنا اللي كلمها من شويه وقالها علي العمليه اللي هيعملها ابوها..
طارق
طيب انزل انت يا زين وانا جااي ورااك..
زين
ماشي..
نزل زين وهو رد عليها وقال
ايوه يا هنا انتي فين؟..
هنا
انا تحت في المستشفي اروح فين مش عارفه حاجه..
طارق
استني انا نازلك انتي فين بالظبط؟..
هنا بنبره خائفه
عند الاستقبال وفي حوادث هنا وناس بتصوت وو
طارق
طيب اهدي انا جايلك علي طول اهوو..
_ونزل فعلا طارق تحت ولقاها واقفه بتزعق مع واحد فراحلها بسرعه ووقف جنبيها وقال..
طارق
في ايه يا هنا؟..
هنا بصت للواد بحده وقالت
ما فيش واحد غلط وخد نصيبه..
الولد بغيظ
يا حجه هو انا قولتلك حاجه، انا معدي عادي انتي بترمي بلاكي عليا ليه؟..
جه طارق يتكلم بس هي قالت بحده
يالااا يعني هي الشتيمه مش جايه معاك، عايز تتهان بزياده يعني..
طارق بحده
هو مش انا واقف قوليلي عملك ايه واسكتي خااالص.
الولد
ايوه قوليلو قولتلك ايه؟..
هنا بتوتر
اهو اللي قاله بقي، انا مسمحااه خلاص تعالي وديني لابويا..
الولد
والله ما هتمشي غير لما كل اللي واقفين دول يعرفو انا قولت ايه يستحق اللي هي عملاه ده..
طارق بنفاذ صبر
ما تنطقي يا هنا قالك ايه؟..
بصت هنا للناس بقلق والولد قال
انا جاي عايز اعدي فبقولها بعد اذنك هي ما ردتش عليا روحت قولتلها انتي يا خمسه سنتي عديني وعينك ما تشوف اللي النور بقي خلت الناس كلها تشك فيااا..
طارق بصلها بغضب وقال
معلش اعتبرها اختك الصغيره وبلاش تخف دمك برضو علي بنات النااس تاني ممكن يطلعلك في عيالك..
هنا بغيظ
هو ايه اللي يطلعله في عياله ده ما تحترم نفسك انت كمان..
مسكها طارق من دراعها وركبو الاسانسير وقال
يا شيخه اسكتي ده انا افتكرته اعتدي عليك بالفرح اللي كنتي عملاه ده..
هنا بحده
ورحمة امي يا طارق لو لمستني تاني لاي سبب لاكون مدياك باللي في رجلي..
طارق بحده
اسكتي يا هنا مش وقتك خلاص وانا اصلا متدايق منك من غير حاجه..
هنا
احسن يارب ديماً، فين ابويا بقي وعملية ايه اللي هيعملها دي؟..
اتفتح باب الاسانسير وهو قالها
ابويا عنده مشاكل في الكبد ومحتاج عمليله ضروري وحد يتبرعله بجزء من الكبد بتاعه وانا جيت من فرح اختي لقيت ابوكي وابويا في العمليات..
هنا بقلق
يعني بابا هو اللي هيتبرع لابوك؟..
طارق
ايوه يا هنا بس ان شاء الله تكون عمليه بسيطه والاتنين يقومو بالسلامه، المهم اطلعي للدور الرابع هتلاقي هناك ماما واخواتي اقعدي معاهم وانا هشوف واحد قريبنا اتقتل في الفرح هنا وفي بلاوي ومشاكل وبعدين هبقي اجي..
هنا
يالهوي كل ده حصل في الفرح عشان انا ما روحتش..
ابتسم طارق غصب عنه وقال
شوفتي بقي… يلا اطلعي..
_ونزل من الاسانسير وهي طلعت فوق، وفي الوقت ده فوق طلعت رضوي وراحت وقفت عند شباااك كبير في أخر الممر ودموعها نزلت بخوف كبير علي باباها، وجه يوسف في الوقت ده وقال..
يوسف
بطلي عياط يا رضوي انا مش متعود عليكي كده..
مسحت رضوي دموعها وقالت بخوف
اتأخرو اووي جوه، وكمان عمر مات احنا من شويه كانت الناس بتحسدنا علي الفرحه اللي كنا فيها..
يوسف بهدوء
قولي الحمد لله واللي مات ده عمره كده بس هو مين اللي قتله ده وازاي ما حدش مسكه وانتو ليكم مشاكل مع حد؟…
رضوي بدموع
مش عارفه بس كانت في مشاكل مع عبدالله العريس وواحد في بلدهم علي مجلس الشعب وكده..
يوسف
لا حول ولا قوة الا بالله، ان شاء الله كل حاجه تتحل وابوكي هيقوم بالسلامه..
وصلت هنا في الوقت ده وراحت لرضوي وقالت بقلق
رضوي.. هو بابا فين دلوقتي؟..
رضوي بقلق
هو جوه انتي مين قالك؟..
هنا
طارق كلمني وقالي، هو في حاجه ولا ايه بابا كويس؟..
رضوي بدموع
ااه كويس ان شاء الله هيكون كويس هو في العمليات دلوقتي بقالهم شويه جوه وهانت وهيطلع الدكتور ويطمنا عليهم..
هنا بقلق
ان شاء الله طيب انا استني فين انا مش عارفه حاجه هنا..
رضوي
تعالي يا حبيبتي معايا هنروح عندهم جوه..
وبصت ليوسف وقالت
خلاص يا يوسف يعني انت تعبت اووي تقدر تمشي..
يوسف
لا طبعا انا هقعد هنا وهستني اطمن علي باباكي وبعدين همشي..
بصت رضوي لهنا بتوتر وبعدين قالتله
معلش عشان عمتي جوه واهلي كمان يعني مش عايزه حد منهم يفهم حاجه غلط وكمان كمال لو جه مش عايزه مشاكل انا هكلمك واطمنك عليه..
يوسف بهدوء وتفهم
حاضر يا رضوي هكلمك علي طول عشان اطمن عليكي.. اا واطمن برضو علي الاستاذ حسن..
رضوي بتوتر
تمام باي باي..
_ومشيت واخدت هنا وراحت الاوضه اللي فيها اهلها، وكانو لسه قاعدين هناك ودخلت عندهم فيروز بعد شويه وقالت..
فيروز بهدوء
السلام عليكم يا جماعه..
بصولها كلهم بأنتباه وريناد قالت
طنط فيروز مش كده؟..
لمياء بحده
ايوه هي وكمان ليها عين تيجي وتورينا خلقتها بعد اللي عملتو وحرمتنا من زين سنين وو..
عز بحده
لمياااااء اخرسي خالص وما تدخليش في الموضوع ده…
اتنهدت لمياء بضيق وسكتت وهو بص لفيروز وقال
اتفضلي يا فيروز تعبتي نفسك وجيتي..
فيروز بهدوء
لا ده الواجب هو زين فين انا بكلمه مش بيرد عليا..
وقف عز قدامها ورد عليها
واحد قريبنا اتوفي وهو واقف معاهم تحت عشان انا مش هينفع اسيب حسن هنا..
فيروز بهدوء
ايوه ما هو قالي وكمان قالي اجيبله العلاج بتاعه عشان معاده جه من ساعه تقريباً، وقولت احيبه واطمن علي حسن..
عز
طيب تعالي معايا نوديه ليه ونرجع..
فيروز
طيب هسلم علي ليلي الاول..
_وقربت فيروز من ليلي اللي كانت منيمه روز في حضنها وجنبيها روفان قاعده ساكته وقالتلها لهدوء.
فيروز
الف سلامه علي حسن يا ليلي ربنا يقومهولك بالسلامه..
ليلي بدموع
تسلمي يا فيروز، ان شاء الله خير.
ومشيت فيروز مع عز ورفان قالت لـ ليلي بدموع
يا ماما هو بابا هيجي امتي من جوه انا خايفه عليه اووي..
مسحت ليلي دموعها وقالت
هيطلع دلوقتي يا حبيبتي وهيبقي كويس ان شاء الله..
_وبعد شويه كانو كلهم قااعدين قدام اوضة العمليات مستنين الدكتور معادا عبدالله وكمال، وطلع الدكتور فعلا وكلهم جريو عليه وسألوه بلهفه علي حالة حسن معادا هنا اللي كانت واقفه لوحدها ومستنيه تطمن علي باباها اللي ما حدش سأل عنه ولا اهتم لامره غيرها…
الدكتور بحزن
البقاء لله يا جماعه العمليه كانت صعبه جدا وهو ما اتحملش وقلبه وقف واتوفي، احنا عملنا اللي علينا بس عمره كده..
بقيو كلهم بيعيطو فجأه وليلي قالت ببكاء مرير
انا عايزه اشوفه يا دكتور، مستحيل حسن كان كويس انا اخر مره شوفته فيها في الفرح كان كويس والله..
الدكتور
لحظه بس الاستاذ حسن كويس، المتبرع الحج سيد هو اللي اتوفي..
_وفي اللحظه دي كلهم بصو لهنا اللي كلام الدكتور نزل عليه كالصاعقه ودموعها نزلت فوراً وبصتلهم بعدم. تصديق، وراحتلها ليلي بسرعه وحضنتها بهدوء وما كانتش عارفه تقولها ايه ولا تصبرها ازاي وهي من لحظات ما كانتش قادره تصبر نفسها لما افتكرت ان جوزها اللي مات..
هنا ببكاء
بابا سابني هو كمان سابني، طيب ليه عمل كده انا محتجاله اووي ماليش حد غيره..
ــــــــــ #بقلم_الكاتبه_رحاب_القاضي ــــــــ
_وفي الوقت ده في الاوتيل في اوضة روان كانت علياء قاعده في الريسبشن اللي في الاوضه وبتعيط علي عمر، وطلعت روان من جوه بعد ما غيرت فستانها ولبست بجامه ومسحت الميكآب بتاعها وقعدت جنب علياء وقالت..
روان
وحدي الله يا عمتو هو عمره خلص خلاص، المهم بس دلوقتي يعرفو مين اللي عمل كده..
علياء ببكاء
ده ابني زيه زي عبدالله وكمال، حسبي الله ونعم الوكيل ما فيش غيره خلف هو اللي عمل كده وكان قاصد عبدالله….
روان
الحمد لله واتسترت اهي والا كان هيبقي شكلي وحش اووي لو كانت جات في عبدالله….
بصتلها علياء بحزن وهي قالت بسرعه
مش قصدي والله يا عمتو وو..
علياء بهدوء
الحمد لله يا بنتي علي كل حاجه، عبدالله جااي ياخدنا دلوقتي هنروح الشقه بتاعتك وجايب معاه اسرار ادخلي غيري هدومك..
روان
لا معلش هنروح الشقه ليه هو مش المفروض هيجي هنا ولا ايه؟..
علياء
مش وقت عِند يا بنتي دلوقتي، فتحيه كمان جاتلها جلطه في المخ ودخلت غيبوبه واكيد هنروح البلد ندفن عمر..
روان بضيق
اوووف بقي هي جوازه باينه من اولها ده ايه الفقر ده..
وقامت دخلت اوضتها وبصتلها علياء بحزن وقالت
ربنا يهديكي يا روان…
_وجه فعلاً عبدالله واخدهم وراحو شقتهم وكانت معاهم اسرار وقال بجمود..
عبدالله
انتو هتقعدو هنا يا امي وانا وكمال هنروح البلد عشان عمر بتدفن في مقابر العيله، وطارق وسيف هيبقو يجو عليكم هنا لحد ما اجي اخدكم ونرجع البلد..
علياء
طيب مش واجب اجي معاك انا عشان العزا وو..
قاطعها عبدالله بحده وقال
عزا ايه يا امي لما ابقي اخد بتار ابن عمي نبقي وقتها نعمل عزا…
علياء بدموع
استغفر الله العظيم يارب انا مش هتكلم دلوقتي يا عبدالله لحد. ما الموضوع يهدي…
أسرار بنبره حزينه
وديني عند امي يا عبدالله انا مش عايزه اسيبهاا لحالها..
عبدالله بجمود
بكره الصبح هبعتلك حد يوديكي هناك..
وقال لامه
امي.. اسرار ما تطلعش من البيت لوحدها وخليكي جنبيها علي طول..
وبص لروان اللي كانت واقفه مدايقه وقال
تعالي معايا يا روان..
_وراح لاوضتهم وهي راحت ورااه وقعدت علي الكنبه اللي قدامه وهو وقف قدام الدولاب وطلع هدوم ليه عشان يغير البدله اللي بقيت كلها دم من عمر..
بصلها عبدالله بطرف عينه وقال
انتي شايفه اللي حصل لوحدك. اليومين دول انا مش هكون موجود هنا، بكره طارق هيجي ياخدك انتي وامي تطمني علي خالي حسن وترجعي هنا تقعدي مع امي وأسرار لحد ما ارجع..
روان بضيق
لا انا هقعد مع اهلي مش هقعد مع حد. هنا..
عبدالله بحده
انا اقول الكلمه مره واحده يا روان..
_وبدأ يغير في هدومه وهي بصت للناحيه التانيه، وبعد ما خلص كان لسه هيطلع بس هي وقفت لما قالت بعصبيه..
روان
انا هبات عند. اهلي يا عبدالله لحد ما ترجع، اصلا انا مش بطيق بنت عمك دي اللي انت. جيبهالي تقعد. في بيتي..
قرب منها عبدالله وقال. بجمود
بنت. عمي دي اخوها ضحي بعمره عشاني، بنت عمي دي امها بين الحيا والموت ومالهاش غيري واقسم بالله يا روان لو اتعاملتي معاها بطريقه تقلل منها او عملتي حاجه غير اللي قولتلك عليها لهتشوفي ردة فعل مش هتعجبك خااالص، انا واصله معايا لاخرها وما بقاش فيا دماغ ليكي..
_قال كلامه وسابها وطلع ولقي امه طالعه من الاوضه اللي جنبيه وهي بتعيط، وقالتله ببكاء.
علياء
اسرار حالتها وحشه اووي يا عبدالله جسمها. كله بيتنفض ومش مبطلع عياط خالص..
عبدالله بحزن
خليكي جنبيها يا امي وانا وكمال هنروح البلد وهشوف الدنيا هناك وهرجع اخدكم علي طول بس لو طولت عن يوم او يومين تلاته اسبوع ما تقلقيش..
علياء بخوف
هتعمل ايه في خلف يا عبدالله؟
عبدالله بنبره غاضبه
اللي لازم يتعمل وهخليه يندم. ندم عمره ان الطلقه جات في عمر مش فيا، كان هيخلص مني بس دلوقتي هتفتح عليه وعلي عيلته كلها ابواب جهنم..
وتابع بدموع
عمر ده اخويا وصاحب عمري كله، انا كان يومي كله من طفولتي معاه كل حاجه بعملها كنت بعملها معاه وبطمن بوقفته جنبي، هو خد. مني حاجه غاليه اووي يا امي وان ما حرقت قلبه علي كل اللي غالي عنده قبل ما اخلص عليه ما ابقاش انا عبدالله القاضي.
حضنته علياء وقالت ببكاء
بسم الله علي قلبك حتي يهدأ يا عبدالله… بسم الله علي قلبك حتي يهدأ يا عبدالله…
_بعد. عنها عبدالله ومشي وهي رجعت تاني قعدت جنب اسرار اللي كانت لا حول لها ولا قوه..
ــــــــــ #بقلم_الكاتبه_رحاب_القاضي ــــــــ
_وفي المستشفي كانت هنا قاعده مع رضوي اللي بتحاول تهون عليها وطارق واقف مع سيف وزين وعزالدين بس كل شويه يبصلها بحزن وطلعت وقربت منهم ليلي وقالت..
ليلي
سيف خد امك ومراتك وروحهم البيت ريناد تعبت اووي وخدو معاكم روفان وروز..
سيف
حاضر يا مرات خالي، يلا يا ريناد..
_قامت ريناد من علي الكرسي اللي قاعده عليه وهي ماسكه بطنها بألم وبالايد التانيه شايله بنتها اللي نامت علي كتفها، وقالت بقلق..
ريناد
هي البت روفان فين بقالها حبه مختفيه..
ليلي بخوف
روفان… كانت هنا دلوقتي شوف اختك يا طارق..
قبل ما يرد عليها طلعت الممرضه من اوضة حسن وقالت
لو سمحتو يا جماعه في بنت صغيره دخلت جوه ومش راضيه تطلع..
عز
طيب انا ومامتها هندخل نجيبها ونطلع علي طول.
الممرضه
بسرعه يا حج طيب كده مش كويس للمريض..
عز بغيظ
حج… طيب ابعدي عن وشي قال حج قال حج في عينك..
سيف ضحك وقال
ههههه كويس وطنط فيروز مشيت كان هيبقي شكلك وحش يا خالي..
عز بغيظ
اسكت انت كمان بدمك. اللي زي دم امك ده..
_ودخل هو وليلي عند حسن واتصدمو من روفان اللي كانت نايمه جنبيه وحاضنه دراعه وماسكه فيه اووي وغرقانه في النوم..
ليلي بدموع
روز نامت واختك لمياء نامت علي نفسها وهي كانت قاعده صاحيه وكل شويه تسألني عليه..
ابتسم عز بدموع وقال
طيب روحي هاتيها يا ليلي بالراحه لاحسن تصحي وتفضحنا.
_قربت ليلي منها وجات تاخدها بس حسن حرك راسه وقال بصوت كله تعب
حسن
سبيها يا ليلي..
ليلي بدموع ولهفه
انت كويس يا حسن..
ابتسم بصعوبه ورد عليها وقال
كويس يا قلب حسن، سبيها انا كويس وهي جنبي..
باسته ليلي علي راسه وقالت
ربنا يطولي في عمرك وما يحرمني منك ابدا يا حبيبي..
قرب منها عز وقال
مش وقت محن الراجل تعبان يا ليلي، وانت يا ابو علي قوم بسرعه بقي ده انت كأن بقالك سنين غايب عني يا عم..
_ابتسم حسن بهدوء وما قدرش يرد عليهم من تعبه واخدها عز وطلع وقالت ليلي بقلق..
ليلي
طيب كده هتكون في مشكله عشان روفان جوه..
عز
لا مشكله ولا حاجه اصلا المفروض واحد يقعد عنده جوه وخليها هي جوه..
ليلي
طيب وانا ورضوي هنقعد مع هنا، البنت قطعت قلبي..
لمياء
المهم ان حسن اخويا كويس وفدااه اي حاجه..
طارق بحده
هو ايه الكلام ده يا عمتي، اللي مات ده ضحي بعمره عشان ابويا يعيش وبنته دي ما كانش ليها غيره بجد…
عز
سيبك منها يا طارق هي دي بتحس، خد. امك يا سيف وامشي بدل ما اخدها ادخلها المشرحه واقفل عليها ونخلص..
_سمع سيف كلامه واخدهم في عربيته وكانو في طريقهم للبيت وريناد قااعده جنبيه ومامته ورا وهي شايله تيا اللي نايمه علي ايديها..
_ورن موبيل سيف في الوقت ده بأسم “مراد” فبص هو لريناد بتوتر وقال..
سيف
ده مراد اكيد في حاجه في الشغل..
ريناد بخبث
والله طيب ما ترد عليه؟..
سيف
هو احنا في ايه ولا في ايه يا ريناد بعدين هبقي اكلمه..
مسكت ريناد الفون وقالت
وماله اردلك عليه انا..
_وفتحت بسرعه وبصلها سيف بخوف وسكتت ريناد واستنت اللي متصل يتكلم بس ما كانش في اي صوت فقالت بخبث..
ريناد
الو… الو.. مراااد..
فجأه اتقفلت السكه فضحكت ريناد بسخريه وقالت
امسك شكله مراد اتكسف مني وما عرفش يرد..
سيف بحده
انتي امتي هتبطلي الشك ده والطريقه دي انا زهقت بجد..
ريناد ببرود
لا انا مش بشك فيك انا متأكده يا سيف..
سيف بقلق
متأكده من ايه؟..
بصتله بهدوء وقالت
انك. مش بتخوني اصل انت هتلاقي احسن مني فين؟..
مسك ايدها وقال
طبعا يا قلبي ياريت نبقي ديما بالعقل ده..
_بصت لايده اللي ماسك بيها ايدها وبصتله بدموع وهو مركز علي الطريق وسحبت ايدها من ايده وبصت للناحيه التانيه وهي بتمسح دموعها..
سيف
هوصلك بيتنا تمام..
ريناد بخبث
لا وديني لبيت اهلي عشان هظبط شوية حاجات هناك وكمان عشان موضوع عم سيد اللي توفي ده..
لمياء
وصلها هي وانا وديني بيتي ما برتاحش غير في بيتي انا..
سيف
حاضر اللي انتو عايزينه..
ــــــــــ #بقلم_الكاتبه_رحاب_القاضي ــــــــ
_وفي المستشفي كانت ليلي قاعده جنب هنا اللي بتعيط ومعاهم رضوي وطارق وموبيلها رن فسألها طارق وقال..
طارق
مين بيكلمك دلوقتي..
بصت رضوي لاسم يوسف وردت علي طارق بتوتر وقالت
دي صحبتي في الشغل كانت في الفرح وبتكلمني اكيد تطمن عليا هروح ارد عليها بره..
وطلعت فعلا وردت علي يوسف وقالتله
ايوه يا يوسف…
يوسف
العمليه خلصت؟..
رضوي
ايوه خلصت من شويه ونسيت اكلمك، الحمد لله بابا كويس بس عم سيد تعب جدا وراح فيها…
يوسف بحزن
ايه اليوم ده بجد، انتو ما تعملوش افراح تاني في نااس كده النكد بيبقي لايق عليها اكتر زيكم..
رضوي بغيظ
انت كده بتواسيني يعني؟..
يوسف
لا طبعا المهم تعالي عند الشبااك بسرعه..
رضوي بقلق
ليه في ايه عند الشبااك؟..
يوسف
يا ستي اخلصي انا تلجت من الوقفه والله…
_راحت رضوي عند الشباااك وابتسمت بعدم تصديق لما لقيته واقف تحت جنب عربيته ولما شافها ابتسم وقال…
يوسف
ما انا مكنش ينفع امشي غير لما اطمن علي عمي حسن، اصله مطلع عين امي وواخد قلبي كله كده ليه لوحده…
ابتسمت غصب عنها وقالت
والله انت مش طبيعي، اقفل يا يوسف وروح بيتكم يلاا وشكراً وجودك فرق معايا النهارده..
يوسف
لا انا خدوم اووي علي فكره وهتلاقيني معاكي في اي وقت تحتاجيني فيه من غير ما تطلبي..
رضوي
ان شاء الله ما فيش حاجه وحشه تاني..
يوسف
ان شاء الله رضوي انا كنت قولتلك اني بحبك ايه بقي؟..
اتوترت جداً وبصت للناحيه التانيه وقالت
بالله عليك ده وقته يعني بابا تعبان والنااس عماله تموت، وانت جاي تقولي كده يا يوسف وكمال رجع وانا متلخبطه لوحدي..
يوسف بضيق
اممم كمال طيب الف سلامه علي باباكي سلام..
_قال كلامه وقفل في وشها وركب عربيته ومشي وهي بصتله بحزن، ولقيت مامتها طالعه من الاوضه وقالت..
ليلي
رضوي كلمي روان اختك اطمني عليها،وكلمي خالتك قوليلها اننا كويسين احسن صدعتني وانا ماليش دماغ ارغي معاها، وانا هروح اشوف ابوكي وروفان جوه وادخلي عند. هنا..
رضوي
حاضر يا ماما..
_وراحت ليلي عند حسن ورضوي رجعت تاني وقفت عند الشباك وهي بتكلم روان، وفي الوقت ده في الاوضه اللي قاعده فيها هنا بعد ما طلعت ليلي قالها طارق بهدوء..
طارق
انا لو كنت اعرف انه تعباان او انه هيعمل العمليه مع بابا ما كنتش هوافق ولا هخليه يعملها، بس والله انا جيت هنا لقيته في العمليات..
هنا بدموع
ولو كنت عرفت كنت هتعمل ايه، كنت هتخليه ما يعملش العمليه وتعرض حياة ابوك للخطر، انتو كلكم كان كل همكم حياة باباكم وبس انما هو مش مهم..
وتابعت ببكاء
ومش مهم اني ماليش غيره، وان اللي جاي في حياتي كله هيبقي اسود وانا لوحدي لا اب ولا ام ولا اي حد معايا، حتي خالتي جوزها واحد حيوان انا عمري ما هقدر اروحلهم ولا اسند عليهم، وابويا اللي ما صدقت اني هعوض غيابه عني ونعيش سوا واحس بوجوده وحنانه اختار هو بنفسه اهو يبعد عني ما فكرش فيا ما همتوش بنته قد ما حياة ابوكم كانت بتهمه..
دخلت في الوقت ده رضوي وقالت
في ايه مالكم..
قام طارق وقال بجمود
انا هروح اخلص اجراءات الدفن بتاعت عم سيد، لما اكلمك تيجي يا هنا عشان هحتاجلك تحت..
_ما ردتش عليه وهو نزل وسابها ورضوي قعدت جنبيها وقالت بهدوء..
رضوي
بقيتي احسن شويه دلوقتي يا هنا؟..
_هزت هنا راسها بمعني ايوه وما ردتش عليها وكانت دموعها بس بتنزل بصمت..
ــــــــــ #بقلم_الكاتبه_رحاب_القاضي ــــــــ
_وتاني يوم الصبح في بيت يوسف ابو سدره، بعد ما راح يوسف الشغل جهزت بطه الفطار علي صنيه صغيره ودخلت عند سدره اللي كانت قااعده علي السرير وملامحها بقيت شاحبه جدا وعيونها حمرا جداً من كتر العياط، وقعدت جنبيها علي السربر وحطت الاكل قدامها وقالت..
بطه
انا ما فطرتش مع باباكي وقولت لما هو يمشي اجي افطر انا وانتي..
سدره بدموع
انا مش جعانه..
بطه
ازاي يعني ده انتي مش بتاكلي خالص ولا الشاي والقهوه مشبعينك..
مسحت سدره دموعها وقالت
ماليش نفس..
بطه
اغصبي علي نفسك، انتي كده بتعاقبي نفسك يعني حرام عليكي اللي بتعمليه ده مالوش لازمه..
بصتلها سدره بدموع وقالت
ممكن تكلمي يزن..
بطه
يزن؟!..
سدره
ايوه هو اكيد دلوقتي حالته وحشه وزعلان وو وانا عايزه اسمع صوته بس مش هينفع اكلمه..
بطه
حاضر هكلمه ودلوقتي علي طول..
_وطلعت بطه فعلا موبيلها وكلمت يزن تللي رد عليها بعد لحظات وقال بنبره هاديه جدا..
يزن
صباح الفل يا طنط..
بطه
صباح النور يا حبيبي، عامل ايه واخبارك ايه..
يزن
الحمد لله يا طنط كويس، انتي عامله ايه وعمو يوسف عامل ايه؟..
بطه
كويسين يا حبيبي، بقولك ايه مش ناوي تيجي وتتكلم انت وسدره ونحل المشكله دي..
_بصتلها سدره بلهفه وفضول تسمع رده اللي كانت متوقعه انه هيوافق او هيتكلم في الموضوع مع بطه بس رده صدمها لما قال بنبره غاضبه..
يزن
لو سمحتي يا طنط انا مش عايز اسمع اي حاجه عن البنت دي تاني، ولا حتي اتكلم معاها ولا اشوفها حتي لو بالصدفه هي كانت صفحه سودا في حياتي واتقفلت خلاص..
بطه بحزن
طيب اهدي واسمعني انتو اا..
يزن بجمود قاطعها وقال
بعد اذن. حضرتك انا عندي شغل ولازم اقفل..
قال كلامه وقفل في وشها وسدره دموعها نزلت بحزن وقالتلها بطه
معلش هو هيهدي شويه بس وهيجي ويصالحك..
بطه ببكاء
لا هو مش هيرجع انا وجعته اووي المره دي، هو مش هيرجعلي خلاص انا خسرته خلاص مش هيبقي في يزن وسدره تاني، هبقي لوحدي تاني من غيره..
بطه بحزن
طيب ليه عملتي كده، هو حقه يا سدره انتي افتريتي علي اخوه بكلام وحش وصعب، وكمان كنتي هتشوهي سمعت اخته وكنتي هتعملي مشاكل بينه وبين اهله وبين ابوكي ويونس ليه الشر ده كله..
سدره ببكاء والم حقيقي
عشان انتو وجعتوني ووجعتو ماما زمان وكنتو بتكرهوها وبتكرهوني هو الوحيد اللي حبني يزن كنت عايزااه يكون معايا لوحدي واوجع يونس الصاوي اللي كان السبب ان ماما تدمر اصلا لما لعب بيها وبمشاعرها وكمل عليها جوزك، طيب مدام كان كل واحد فيهم بيحب مراته دخلوها ليه وسطيهم، مدام جوزك بيحبك اووي كده ليه اتجوزها ليه خلاها تحمل وتخلف وهو مش عايز يبقي اب، ليه انا اتظلم بينهم، هو كانت عجبااه اللعبه بس وانه يخلف ويطلقها ويقرب من الست اللي كانت عجبااه ماما كاتبه كده في المذكرات بتاعتها وهو ده اللي حصل وقتها صح؟..
بطه بدموع
جايز يكون باباكي غلط وقتها بس هو بيحبك ومش بيكرهك وانا مش بكرهك انا كان ناقص ابوس علي رجل جدتك زمان عشان تسيبك ليا اربيكي انا ونعوض انا وانتي النقص اللي في حياتنا مع بعض بس هي استكترتك عليا، واتمنيت لما هي ماتت اني اقدر اعمل عيله حلوه بيني انا وانتي ويوسف بس لقيت وقتها ان حماتي ماتت وسابتلي نسخه منها تطلع عيني..
نامت سدره وغطت وشها باللحاف وقالت
سبيني لوحدي انا مش عايزه اتكلم مع حد..
بطه بحزن
حاضر والاكل اهو انا مش هاخده معايا، اتمني تاكلي وبلاش الزعل يخليكي تهملي في صحتك وقتها ما حدش هينفعك وعلي فكره انا هخليكي تدخلي الامتحانات وتذاكري غصب عنك..
_قالت كلامها بطه وسابتها وطلعت من عندها..
ــــــــــ #بقلم_الكاتبه_رحاب_القاضي ــــــــ
_وفي النادي كانت قااعده شهد مع يونس اللي قالها بحده..
يونس
يعني ايه موضوع قديم، بقولك ابنك خلاني في نص هدومي امباارح والرقاصه واقفه تتسهوك معاه، والبجح حتي ما جاش امبارح لا تلاقيه راحلها…
شهد
لا كان بايت في شقة يزن، المهم هو قالي ان البنت دي كانت موضوع قديم وخلص، وبعدين يعني قبل ما نحااسب غيرنا ياريت نحاسب نفسنا هو مش جايبه من بره..
يونس بغيظ
بنتك فين اللي جيبانا تعرفنا علي صاحبتها وابو صاحبتها دي انا عندي شغل مش فاضي لرغي الحريم ده؟..
شهد
اتكلم كويس يا يونس يارا بتقول ان صحبتها دي واهلها ناس راقيين جدا والمفروض احنا زيهم، يعني تبطل الفاظك دي حريم ومش حريم في حد يقول كده..
يونس بحده
بقي دلوقتي مش عاجبك، والله انتي متجوزاني وانا كده وانا اتكلم بالطريقه اللي تعجبني، بنتك فين بقي؟..
شهد
بتكلم واحده من صحابها في الموبيل، وقالتلي ان ياسمين وباباها خلاص علي وصول….
_وعند سدره كانت واقفه بعيد عن اهلها بشويه بتكلم زين في الموبيل وقالتله..
يارا
معقوله كل ده حصل امبارح، الله يكون في عونكم بجد..
زين
بصراحه اكتر حد صعبان عليا هو عبدالله يعني ملحقش يفرح..
يارا
طيب وانت هتعمل العمليه بتاعتك امتي؟..
زين
مش عارف المفروض الايام دي بس مش عايز اضيع مني سنه في الدراسه وبفكر اجلها لبعد الامتحانات وبرجع واقول هو انا ضامن عمري ومش فارقه اعملها وخلاص وما اتعبش نفسي في المذاكره علي الفاضي.
يارا بحزن
ممكن تبطل تتكلم كده، والا والله مش هكلمك تاني وبعدين انا حاسه انك هتعمل العمليه وهتخف وهتبقي زي الفل كمان..
زين بخبث
هو انا لو يعني ما اتكتبليش عمر جديد بعد العمليه انتي هتعملي ايه؟..
يارا بحده
مش هعمل حاجه مش هكلمك تاني اصلا وقتها..
ضحك زين وقال
هههههه علي اساس يعني اني هبقي موجود انتي بتفهمي ازاي يا يارا؟..
يارا بضيق
مش عارفه بقي اهو وقتها هبقي مدايقه وزعلانه جداً..
زين بتنهيده
خير يا يارا هو انتي بتعملي ايه دلوقتي؟..
يارا
ياسمين حابه تعرف باباها علي بابي ومامي فجيبتهم النهارده معايا النادي عشان يتعرفو علي بعض، وانت؟..
زين
بابا سافر البلد مع ولاد عمتي وانا هنا مع طارق في المستشفي من امبارح عشان عم سيد الله يرحمه والدفنه وكده..
يارا
ربنا يرحمه طيب انا هروح لبابي ومامي وانت ابقي طمني عليك..
ابتسم زين وقال
من عينيا حاااضر، مع السلامه..
_وقفل معاها وراحت هي قعدت مع يونس وشهد وبعد شويه جات ياسمين لوحدها وقعدت معاهم..
ياسمين
معلش بس بابي جاله شغل فجأه واتأخر شويه بس هو وصل النادي وجاي دلوقتي حالاً..
شهد
لا يا حبيبتي ولا يهمك، ايه اخبار المذاكره معاكي شاطره زي يارا ولا ايه؟..
ياسمين
لا هو ما فيش حد. اشطر من يارا بسم الله مشاء الله يعني، بس الحمد لله بنجح كل سنه…
يونس
هو انتي باباكي شغال ايه؟..
ردت عليه يارا وقالت
مصمم ازياء يا بابا زي ماما كده بس هو عالمي شويه..
ياسمين
اهو جه اهو..
_بصو كلهم للمكان اللي بتبصله ياسمين واتصدم يونس وكمان شهد لما شافو زيد اللي كانت شغاله عنده شهد زمان بيقرب منهم ووقف قدامهم وبص لشهد وقال..
زيد
فرصه سعيده يا مدام شهد..
وبص ليونس وقال
اهلا وسهلا يا يونس بيه..
ابتسمت شهد وقالت
انت ابو ياسمين ايه الصدفه الجميله دي..
سلم عليها زيد وباس ايدها بهدوء وقال
هي فعلا صدفه جميله…
يارا
اتفضل يا اونكل اقعد معانا..
_قعد زيد معاهم وبصت شهد وهي مبتسمه ليونس بس ابتسامتها اختفت بسرعه اول ما لقيت نظراته ليها كلها غضب وغيره واضحه جداً..
زيد
انا كنت عارف من فتره ان يارا تبقي بنتك علي فكره، وكنت مبسوط ومرتاح جدا ان صديقتها المقربه تبقي بنتك لانها اكيد زيك بالظبط..
يارا بفضول
هو حضرتك تعرف ماما يا اونكل زيد؟..
ياسمين
اهي دي الحاجه الوحيده اللي انا خبيتها عليكي، بابي قالي ان طنط شهد كانت شغاله عنده زمان قبل ما انا وانتي اصلا نبقي موجودين..
يونس بغيظ
كانت شغلانه منيله بنيله..
بصوله كلهم فهو قال بسرعه
وانتي امك فين يا ياسمين تيجي وتشاركنا القعده الحلوه دي..
ضربته شهد في رجله تحت الترابيزه ورد عليه زيد وقال
ياسمين والدتها متوفيه من 12 سنه ومالهاش غيري..
ياسمين
طيب هنسيبكم بقي تتعرفو وتقعدو مع بعض وانا ويارا هنروح نجيب شوية حاجات كده..
شهد
اوكي يا حبيبتي وخلو بالكم من بعض..
ومشيت يارا مع ياسمين وزيد قال لشهد
تعرفي ان ياسمين بتحبك جدا، ديما بتحكيلي عليكي وعن حبك ليارا، ياسمين عمرها ما اتمنت واحده تبقي مكان مامتها غيرك..
اتوترت شهد ويونس قال بحده
لا معلش يا اونكل فهمني تبقي مكان امها ازاي يعني؟..
ضحك زيد بهدوء
لا لا انا مش قصدي حاجه هي بس بتقول ان كان نفسها في ام تحبها وتبقي معاها زي شهد ما بتعمل مع يارا كده..
شهد
طيب وانت ليه ما اتجوزتش واحده تكون معاها وتعوضها عن غيااب مامتها..
زيد
للاسف اتجوزت وكانت واحده مش كويسه ياسمين تعبت اووي معاها فقررت اقفل الموضوع ده خالص واهتم انا بنفسي ببنتي، وده حصل فعلا انا كنت بشتغل وياسمين معايا حاولت اعوضها بس طبعا وجود مامتها كان هيفرق، فانا بتمني انك لو تقربي منها شويه وتتعاملي معاها بقرب اكتر يعني ده هيفيدها وخصوصا انها بتحبك اووي.
شهد بهدوء
من غير ما تقول يا زيد اكيد طبعا وانا بحبها جدا كمان..
زيد ابتسم وقال
علي فكره اول مره شوفت فيها يارا وافتكرتك هي شبهك اوووي، وجميله جدا ربنا يخليهالك..
شهد
ميرسي..
قام يونس وقال بجمود
قومي يلاا هنمشي..
زيد
تمام انا كمان لازم امشي عشان عندي شغل، وفرصه سعيده يا يونس بيه..
_ما ردش عليه يونس ومسك ايد شهد ومشي وكان متعصب جدا، وهي اتنهدت بضيق وقالتله..
شهد
استني يا يونس هناخد يارا معانا..
وقف يونس وقالها بحده
اتنيلي كلميها يلااا..
_وكلمت يارا وجات فعلا وركبو هما التلاته عربية يونس اللي كان بيسوقها السواق ويونس قااعد جنبيه وشهد ويارا قااعدين ورا..
يارا
ماما هو في ايه ماله بابا متعصب ليه كده، هو حصل حاجه بينه وبين اونكل زيد ولا ايه؟..
شهد بقلق
لا يا حبيبتي ما حصلتش حاجه بس في مشكله معاه في الشغل..
يونس بجمود
انا هوصلكم ورايح الشغل، ما فيش خروج من البيت يا شهد غير لما اعرف..
اتنهدت بضيق وقالت
حاضر يا يونس..
ــــــــــ #بقلم_الكاتبه_رحاب_القاضي ــــــــ
_وبعد شويه من دفن عم سيد كانت هنا قااعده في العربيه جنب ليلي في عربية حسن اللي بيسوقها طارق وجنبيه زين..
طارق
ماما خدي هنا معاكي فووق ما تخليهاش تقعد لوحدها..
هنا بجمود
انا ماشيه اصلا..
بصلها طارق في المرايا وقال
ماشيه رايحه فين؟..
هنا
رايحه بلدنا هقعد في بيتنا اللي هناك..
طارق بحده
لا طبعا انتي مش هتروحي البلد دي تاني ولا في حاجه اسمها انك هتقعدي لوحدك..
ليلي بصتله بضيق وقالت لهنا
مش وقته الكلام ده اصبري بس يرجع عمك حسن من اللي هو فيه ونشوف هنعمل ايه..
هنا بدموع
انا مش عايزه اقعد هنا تاني، هقعد مع مين اللي كنت جايه عشانه هنا خلاص مات هقعد مع مين..
ليلي بحزن
معايا انا اعتبري البيت ده كله بيتك، بس بلاش تاخدي قرار دلوقتي وانتي لسه صغيره هتروحي ازاي تعيشي لوحدك هناااك..
وقف طارق قدام العماره وقالت ليلي
استناني يا طارق هطلع انا مع هنا وهنزل تاني عشان نروح المستشفي
طارق
حاضر يا ماما هي ريناد فوق مش كده؟..
ليلي
ايوه وانا هروح المستشفي ورضوي هتيجي كمان تقعد معاهم هنا..
_ونزلت فعلا ليلي مع هنا وطلعو فوق وطارق بص للمكان اللي كان بيبقي قااعد فيه عم سيد وكان بيقعد معاه علي طول فيه ونزلت دموعه غصب عنه وزين قاله بحزن…
زين
كان راجل طيب اووي، والمشكله دلوقتي في بنته دي صغيره علي انها تبقي لوحدها كده..
طارق بجمود
مش هتبقي لوحدها يا زين احنا مش هنسيبها..
ــــــــــ #بقلم_الكاتبه_رحاب_القاضي ــــــــ
_وفي المستشفي كانت رضوي قاعده هي وروفان قدام حسن اللي كان نايم وعيونه ملياانه دموع وقالت رضوي بقلق..
رضوي
ده نصيب يا بابا عم سيد عمره كده خلاص وكمان عمر الله يرحمهم..
حسن بحزن
بنته هنا فين؟..
رضوي
مع ماما في البيت ومعاهم ريناد..
حسن بجديه
هنا ما تمشيش من البيت يا رضوي، ولو تقدري تجبيهالي هنا ياريت..
رضوي
حاضر يا بابا…
_في الوقت ده الباب خبط ودخل يوسف وهو ماسك ورد في ايده وابتسم بهدوء وقال..
يوسف
الف سلامه علي حضرتك يا عمي..
حسن بص لرضوي اللي اتوترت ورد. عليه وقال
الله يسلمك يا ابني..
رضوي
اتفضل يا يوسف تعبت نفسك..
روفان
جايب ورد بس مش جايب شوكلاته زي اللي كنت بتجيبها لرضوي وهي تعباانه..
حسن بحده
عيب يا بنت..
يوسف
لا لا عادي انا هجيبلها شوكلاته المره الجايه..
رضوي بتوتر
يوسف هو اللي جابنا المستشفي هنا امباارح يا بابا وفضل مستني معانا لحد ما اطمن عليك..
حسن
صاحب واجب يا ابني، قولي صح هو انت اللي الرقاصه كانت واقفه معاه في الفرح..
كتمت رضوي ضحكتها وقال يوسف بصوت واطي
قولي لابوكي يرجع يتعب تاني..
حسن بخبث
بتقول حاجه يا يوسف؟..
يوسف
لا ابدا يا عمي بقول انا لازم استأذن عشان عندي شغل بنت حضرتك بقي سيبانا لوحدنا والشغل من غيرها بيبقي صعب اووي..
حسن بخبث
امم ما انا عارف وصليه لبره يا رضوي وكلمي امك خليها تيجي، سيباني لوحدي ليه الوليه دي..
ابتسمت رضوي وقالت
حاضر يا بابا..
وطلعت مع يوسف وقالتله
انت ايه اللي بتعمله ده، بابا يقول عليا ايه دلوقتي..
يوسف
هو انا ايه اللي عملته ده جااي اطمن عليه فيها حاحه، المهم هترجعي امتي الشغل؟…
رضوي
بكره ان شاء الله..ليه في حاجه حصلت ولا ايه؟..
يوسف
لا انا هروح دلوقتي الشباب هناك مش مقصرين في حاجه..
رضوي
طيب تمام يلاا امشي بقي..
يوسف بهدوء
طيب ما تخليكي واقفه معايا شويه..
رضوي ابتسمت غصب عنها وقالت
انت بتقول ايه هو ده وقته يا يوسف، امشي يلااا..
ودخلت عند حسن وهو قال بتنهيده طويله
يالهوي علي يوسف اللي داااب خلاص فيكي يا بنت عمي حسن اللي هيبقي حمايا ان شاء الله..
ــــــــــ #بقلم_الكاتبه_رحاب_القاضي ــــــــ
_وفي البلد في بيت خلف كان نايم ودخلت عنده هنيه مراته وقالت بخوف..
هنيه
خلف قووم يا خلف في مصيبه..
خلف قام بسرعه وقال
في ايه يا وليه بتولولي ليه من وش الصبح..
هنيه
عمر ولد اختك اتقتل، اوعاك تكون انت اللي عملت فيه العمله المهببه دي يا خلف؟..
خلف بجمود
ما كنتش اقصده هو، كنت قاصد زفت الطين عبدالله بس الواد اللي بعته غبي وبدل ما يطخ عبدالله جات في عمر..
هنيه لطمت علي وشها وقالت
يخربيتك يا خلف قتلت ولد اختك، وفكرك ان عبدالله القاضي هيسكت علي تار ولد عمه، وشعبان يعرف الموضوع ده ولدي كان عارف اللي عايز تعمله ده..
خلف
اومال هيفوت ابوه لحاله، ايوه كان يعرف وما تخافيش ولد القاضي اخره يبلغ الحكومه ده حياله عمر كان ولد عمه..
هنيه
طيب واختك وبت اختك هتعمل وياهم ايه..
خلف
بلا اختي بلا بتها، اطلعي بره وهمليني انااام..
هنيه
طيب حتي عشان الناس ما تقولش علينا حاجه اطلع وراهم واحضر الدفنه..
خلف
مالكيش صالح واياكي تخلي ولدك يروح هناك دلوقتي، انا هبقي اتصرف بعدين..
_وعند عبدالله وكمال بعد ما دفنو عمر ورجعو البيت قاله كمال بضيق…
كمال
يا ابني ما تسيبك من البلد دي واللي فيها واقعد قبال شغلك في القاهره..
عبدالله
مالكش دعوه يا كمال مش هنبقي انا وانت سايبين بلدنا، وبعدين انت عملت الواجب وبزياده اتفضل روح مكان ما عايز تروح..
كمال
طيب انت هتعمل ايه دلوقتي هنا وسايب امك ومراتك هناك..
عبدالله
روحلهم انت وانا هظبط اموري هنا وهروح اجيبهم..
كمال
اللي تشوفه انا همشي دلوقتي اصلا مش بحب القعده هنا..
_ومشي فعلا كمال وقعد عبدالله زي ما هو لفتره كبيره، لحد ما جاله واحد من رجالته وقال بجمود…
حمدي
تم يا عبدالله بيه، كل اللي امرت بيه تم وشعبان ولد خلف متكتف كيف الدبيحه في المصنع القديم..
قام عبدالله وقال
طيب يلا بينا..
حمدي
علي وين؟..
عبدالله بحقد
هنروح بيت خلف يلا بينا..
حمدي
تحت امر جنابك..
ــــــــــ #بقلم_الكاتبه_رحاب_القاضي ــــــــ
_وفي بيت الاستاذ حسن كانت قااعده هنا مع روفان وروز في اوضتهم ودخلت عندها رضوي وقالت..
رضوي
طلبتلكم بيتزا عشان نتعشي لان طبعا انا ما بعرفش اطبخ وكمان ريناد راحت شقتها تقريباً جوزها عايزها..
روفان
اخدت تيا معاها!..
رضوي
لا تيا في اوضتي انا روحو العبو معاها يلاا لحد ما الاكل يجي..
طلعو اخواتها وهي قالت لهنا بهدوء
طارق قالي علي فكره علي موضوع جوز خالتك..
بصتلها هنا بحزن وهي قالت
معلش يا هنا بس بعد اللي عرفنااه ده احنا مش هينفع نسيبك تروحي هناك، وقبل ما تقولي اننا بنعمل كده شفقه او عشان اللي عملو عم سيد الله يرحمه مع بابا لا احنا بنعمل كده عشان بنحبك وعشان عم سيد كان غالي علينا كلنا وبالاكتر غالي علي بابا وعلي طااارق….
هنا بدموع
انا مش زعلانه منكم يا رضوي، بس انا فعلا كنت جايه هنا عشان اقعد معاه، انا ما اعرفش حد. هنا وفي البلد هيكون احسن ليا علي الاقل هعرف اتحرك براحتي وليا بيتنا هناك..
رضوي
ما الشقه اللي تحت بابا كاتبها من زمان بأسم عم سيد، وبعدين حتي لو برضو انتي ما ينفعش تقعدي لوحدك..
سكتت هنا وكان باين عليها الحزن بدرجه كبيره وقالت رضوي
بابا عايز يشوفك طلب مني اخليكي تروحيله بكره..
هنا بجمود
ان شاء الله..
_وفي الوقت ده الباب خبط ففكرته رضوي بتاع الديلفري وراحت فتحت لقيت بنت حلوه جدا واقفه قدامها..
رضوي
نعم؟..
بصتلها البنت من فوق لتحت وقالت
لا طلعتي احلي من الصور كمان، انتي رضوي حسن مش كده؟..
رضوي
ايوه انا خير مين حضرتك؟..
البنت دخلت وقالت بجمود
هايدي رؤوف السويسي مرات كمال ابن عمتك وام بنته ياللي بيقول انك.خطيبته وحبيبته..
_برقت رضوي بصدمه و…..؟؟؟
ــــــــــ #بقلم_الكاتبه_رحاب_القاضي ــــــــ
_في بيت يونس الصاوي رجع من شغله بالليل وكانت شهد قااعده علي مكتبها الصغير بتظبط في شغلها وهو لما دخل بصلها بحده وقال..
يونس
عملت زي ما بتحبي اهو وما اتكلمتش قدام بنتك الصبح علي اللي حصل..
شهد ببرود
وهو ايه اللي حصل؟..
وقف يونس قدامها وقال بنبره غاضبه
بنتك شبهك وحلوه اووي والهانم تضحك وعاجبها الكلام وكأني كيس جوافه قااعد..
شهد وهي بتبص للروق بتاعها
والمفروض كنت اعمل ايه يعني؟..
يونس بحده
كنتي مشيتي انتي وبنتك وقولتيلها ما تتكلمش مع بنت الراجل ده تاني..
ضحكت شهد بسخريه وبصتله وقالت ببرود
اطمن يا يونس انا مش هسيبك واروحله، هو انا هلاقي اوطي منك فين بس..
يونس بحده
شهـــــــد لمي نفسك انا علي أخري منك، وهي كلمه لو الراجل ده عرفت انك شوفتيه او اتعاملتي مع بنته تاني اقسم بالله لا هيفرق معايا الولاد ولا غيره وهرجع اوسخ من الاول معاكي..
شهد بجمود
انا مش هستناك انت تعدلي علي تصرفاتي واللي عندك اعمله يا يونس..
يونس بحده
لا عندي كتير وهتشوفي..
_وسابها وطلع وهي راحت ورااه بقلق وراح ليارا اللي كانت قااعده هي ويزن عند يوسف في شقو يزن اول ما خبط قالتله شهد بقلق..
شهد
انت هتعمل ايه، بلاش جنان يا يونس وسيب الولاد في حالهم..
فتح يزن وقال
في ايه يا بابا؟..
دخل يونس وقال ليارا بحده
اسمعي يارا البنت اللي اسمها ياسمين دي اوعي تتكلمي معاها تاني او حتي تتواصلي معاها انتي فاهمه..
يارا بقلق
ليه يا بابا مالها ياسمين دي بنت كويسه جدا..
يونس بغضب
سمعتي قولتي ايه ولا اغيرلك المدرسه بتاعتك كلها ونخلص من الموضوع ده..
اتملت عيون يارا دموع وقالت بحزن
حاضر..
وسابتهم ونزلت وشهد قالتله بغيظ
اقسم بالله عمرك ما هتتغير وهتفضل طول عمرك بني ادم همجي..
وسابتهم هي كمان وراحت ورا يارا ويوسف قال بقلق
في ايه يا بابا مالها ياسمين دي بنت كويسه وانا ويزن نعرفها كويس..
_ما ردش عليهم يونس ومشي من البيت كله وهو متعصب جداً، وما كانش عارف يتحكم في غيرته علي شهد حتي بعد ما كبرو لسه زي ما هو بيكره ان حد غيره يكون من ضمن اهتمامتها..
ــــــــــ #بقلم_الكاتبه_رحاب_القاضي ــــــــ
_وفي شقة سيف وريناد كانو قاعدين بيتعشو وهو قالها بأبتسامه واسعه..
سيف
والله انتي غريبه يا ريناد يعني الدنيا كلها خربانه وانتي عامله عشا رومانسي ومروقه الشقه ومخليه تيا مع اخواتك، بس مفجأه حلوه..
ريناد بهدوء
لا لسه المفجأه جايه في الطريق..
سيف
جايه في الطريق، هي ايه الحكايه بالظبط؟..
الباب خبط في الوقت ده فقالت ريناد بهدوء
اهي جااات استعد بقي يا حبيبي..
_وقامت وفتحت الباب وكانت شرين مرات سيف التانيه اللي اول ما شافتها اتوترت وقالت ريناد بخبث..
ريناد
ما تخافيش كده انا اللي بعتلك تيجي اصلا ادخلي ادخلي انتي مش غريبه..
دخلت شرين واول ما شافها سيف قام وقال بصدمه
شرين انتي بتعملي ايه هنا؟..
ريناد بجمود
استنو زي ما انتو دقيقه واحده وجايه..
دخلت ريناد اوضتها وقالت شرين بحده
انت اتجننت جايبني هنا ومراتك موجوده..
سيف
اجيبك فين هو انا كلمتك اصلا النهارده..
شرين
يا سلام اومال مين اللي باعتلي رساله من ساعه تقريبا وبتقولي فيها اجيلك هنا ضروري وريناد مش موجوده..
فضل يدور سيف علي موبيله وقال
موبيلي فين اصلا انا مش عارفه فين؟..
طلعت ريناد من اوضتها وهي معاها شنطها وقالت
موبيلك اهو معايا انا اللي بعت رساله لشرين تيجي هنا خلاص بقي ما فيش داعي تقابلها من ورايا انا عرفت كل حاجه وسيبهالكم وماشيه عشان تاخدو راحتكم وكفايه كدب بقي..
بصلها سيف بصدمه وقال؟…
_تفتكرو بقي ايه اللي هيحصل؟..
ــــــــــــــــــــــــــــــــــــــ
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية موضوع عائلي 3 (بيت الهنا))
