رواية موضوع عائلي 3 (بيت الهنا) الفصل الثاني 2 بقلم رحاب القاضي

رواية موضوع عائلي 3 (بيت الهنا) الجزء الثاني

رواية موضوع عائلي 3 (بيت الهنا) البارت الثاني

رواية موضوع عائلي 3 (بيت الهنا) الحلقة الثانية

#موضوع_عائلي
“بيت الهنا”
_الحلقه الثانيه
ـــــــــــــــــــــــــــــــــــــــــ
_لا تثق كثيراً ولا تحب كثيراً ولا تتعلق كثيراً، لا شئ سوف يبقي كما هو فضع حدوداً لكل شئ حتي يكون الألم أقل🌹
ــــــــــــــــــــــــــــــــــــــــــــــــ
_ دخل يزن شركة الصاوي وكان في قمة غضبه وكل الموظفين بيبصولو بشفقه علي الحاله اللي هو فيها بعد ما وصلهم خبر ان عروسته هربت وسابته يوم فرحه والسبب مجهول للكل حتي هو ما يعرفش هي ليه عملت كده…
وقف يوسف قدامه وقال بقلق
اهدي احنا في الشركه وكفايه فضايح ده احنا بقينا تريند من امبارح..
يزن بجمود
هي فين؟..
يوسف
فوق في مكتب ابوك بيتكلم معاها و..
_ قبل ما يكمل كلامه زقه يزن جامد من قدامه وطلع فوق وزاد. غضبه اضعاف وهو ناوي يعاقبها علي اللي عملته فيه..
_ وقبل ما يجي يزن بشويه..
كان ماشي يونس ناحية مكتبه وجنبيه يوسف اللي قال بغيظ..
يوسف
وبعدين في اخوك خلي البت عملتلي بلوك..
يونس
هو ده وقته يا بارد اخوك فين؟..
يوسف
في اليخت بتاعه تقريباً وقالي ما اقولش لحد مكانه
يونس
ويا بارد سايبه لوحده ما تخليك جنبيه..
يوسف
لا طبعا ابنك لما بيتعصب بيبقي غبي وايده طويله وانا بخاف..
يونس بنفاذ صبر
امشي من قدامي يلااا..
جه. يمشي يوسف فيونس ندهله تاني
استني هنا..
يوسف بملل
يا نعم..
يونس
هو انا بشحت منك يالا اتكلم عدل..
يوسف
نعم يا بابا يا حبيبي يا سيد الناس هاا الحنهالك كمان واغنيلك..
يونس بغيظ
المهم يا بارد في مهندسه جايه من طرف عزالدين تعمل معاها المقابله مكان اخوك، انا عارف انها شاطره وعايزها تبقي في المشروع اصلا، انت يدوب هتراجع العقد معاها ومع المحامي فااهم..
يوسف
حاضر حاجه تاني…
_ما ردش عليه يونس ودخل مكتبه قال للسكرتيره بجمود..
يونس
هاتيلي قهوه..
السكرتيره
يونس بيه الانسه سدره جوه في انتظار حضرتك..
دخل يوسف بسرعه وقال
سدره العروسه الهاربه جوه..
يونس بخبث
روح كلم اخوك خليه يجي..
يوسف بقلق
لا طبعاً ده انت كده بتحط البنزين جنب النار يا بابا..
يونس بحده
خليه يجي زي ما قولتلك وكلم عمك يوسف، وروح اعمل اللي قولتلك عليه يلاا..
_ وسابه ودخل يونس مكتبه لقي سدره قااعده مستنيااه وبتبصله بنظره غريبه..
يونس
لا قلبك جامد يا بت يوسف هاين عليا اجيبك من شعرك دلوقتي بس يجي اللي اختارك وطلب يتجوزك ويتصرف معاكي..
ابتسمت ببرود وردت عليه وقالت
هو انت فاكرني جايه اتحامي فيك، بالعكس انا جايه اشمت فيك..
وقف يونس قدامها وقال بعدم فهم
قصدك ايه وتشمتي فيا ليه، هو حد مننا عملك حاجه ولا دي جينات وراثه من المرحومه امك..
سدره بحده
اوعي تجيب سيرتها انت فااهم..
يونس بجمود
انتي ازاي تكلميني كده يا بت انتي..
سدره
انا اتكلم براحتي وعلي فكره انا لا عمري حبيتك لا انت ولا مراتك ولا ولادك ولا اختك ولا حتي صاحبك اللي هو ابويا..
يونس
كملي المشهد بتاعك يلاا معاكي سم تختمي بيه المشهد ولا ابعت اجيبلك..
سدره ببرود
لا خليهولك عشان تديه لابنك اللي يا حرام مقطعه نفسه عشان سيبته..
اتعصب يونس وقالها
انتي بتعملي كده ليه ده انا كنت ولسه بعاملك زي بنتي يارا ويمكن اكتر، بتأذينا وتأذي نفسك ليه؟..
سدره بدموع
تخليص حق..
وطلعت من شنطها نوته صغيره وقالت
عارف دي ايه… دي مذكرات امي كانت كاتبه جزء كبير عنك انها حبتك بسبب اهتمامك بيها واتعلقت بيك وانت كنت بتستغلها عشان تخلصلك شغلك وكنت بتهينها وتوجعها كتير واستغليت انها في حاله صعبه ومش لاقيه حد جنبيها وقربت لمصلحتك، وفي الاخر سيبتها واختارت ترجع لمراتك مش كده، ماما كاتبه انها اول مره فكرت فيها تنتحر كانت بسببك انت لما عرفت انك كنت بتستغلها وعمرك حتي ما شوفتها بصوره كويسه..
مسحت دموعها وقالت
ودلوقتي ابنك بيدوق من نفس الكاس يا يونس الصاوي، انا لا عمري حبيته ولا هحبه وقربت منه وعلقته بيا عشان اوجعه واخليك تدوق من نفس الوجع اللي بحس بيه كل ما اشوفك مبسوط مع عيلتك وفي شغلك وامي ماتت بسببك انت وصاحبك..
يونس بصدمه
يخربيت السواد اللي جواكي بس طبيعي ما انتي تربية عقربه اسمها ام يوسف، بس كل اللي قولتيه ده ولا هيفرق معايا وابني انا لا هقوله يبعد عنك ولا هقوله اي حاجه من الكلام الفارغ ده، لاني متأكد ان ابني هيعرف ياخد حقه منك كويس..
_ قبل ما ترد عليه فتح يزن الباب ودخل وهو متعصب، اتنفضت هي بخوف من شكله وعصبيته ورجعت لورا كام خطوه وهو قرب منها ومسكها من دراعها جامد وقال بحده..
يزن
انتي تعملي فيا انا كده..
ابتسم يونس بهدوء وقال
ردي يا حلوه علي خطيبك..
سدره بقلق
مش خطيبي ومش هكمل الجوازه دي…
يزن بحده
هو بمزاجك انتي تخرسي خالص وكلامي مع ابوكي واقسم بالله لندمك ندم عمرك علي الفضيحه اللي عملتيهالي دي..
قرب منه يوسف وقال بقلق
سيبها يا يزن ما ينفعش كده..
ضغط يزن علي ايدها اكتر وقال بغضب
كنتي فين، قضيتي اليوم عند مين امبارح؟..
سدره بدموع
سيب ايدي يا يزن..
يزن بحده
ردي عليا الاول…
يوسف بحده
الكلام مش كده يا عم سيبها ما تقول حاجه يا بابا..
يونس وهو بيبص للاوراق قدامه ببرود
سيبه يربيها لحد ما يجي ابوها يكمل عليها، اصلها فاكره اللي عملته ساهل ولا هيعدي كده وخلاص…
يزن بحده
انطقي كنتي فين؟..
سدره بخوف
في بيت تيته القديم..
_ دخل يوسف في الوقت ده واول ما هي شافته اتخبت في يزن وكانت فعلاً خايفه، بصلها هو بلوم وعتااب كبير وقبل ما يقرب منها يوسف وقف قدامه وقال..
يزن
اهدي يا عمي لو سمحت..
يوسف بحده
انت مش قولت انها ما تلزمكش بعد كده ، بس هي بنتي وتلزمني..
وبصلها بغضب وقال
تعالي هنا يا بت انتي..
يزن بهدوء
لا تلزمني يا عمي ولسه خطيبتي زي ما احنا..
بصله يونس بغضب وقال
خد. بنتك وربيها في بيتك يا يوسف وابقي تعالي عشان عندنا شغل في شركتنا..
وقال ليزن بجمود.
وانت روح البيت واهدي النهارده ويوسف اخوك مكانك النهارده..
يوسف بحده لبنته
قدامي يلا..
سدره بقلق
انا هروح لوحدي..
يونس بسخريه
شوفت اخرة انك تتجوز واحده مجنونه ابتليتنا بمصيبه زيها..
سدره بغضب ودموع
ما تقولش علي ماما كده ما حدش مريض غيرك..
زعق فيها يونس بغضب وقال
احترمي نفسك يا بت انتي لو كان ابوكي مش عارف يربيكي فانا عمك ولو صوتك اترفع قدامي او قدام ابوكي تاني هقوم اديمي بالجزمه..
مسك يوسف ايدها وقال
ما حدش ليه دعوه ببنتي يا يونس وخطوبتها من ابنك خلصت خلاص ده لو عايز نفضل اهل زي ما احنا..
يزن بجمود
ما فيش حاجه من الكلام ده هتحصل والموضوع بيني وبينها..
يونس بحده
يزن مش وقته يلا علي البيت انت كمان روح طمن امك واختك عليك..
_ سمع يزن كلامه ومشي وكان قلقان عليها جدا من رد فعل ابوها معاها..ويوسف قعد. قدام يونس وقال..
يوسف
يا ربنا ده احنا عيلتنا طلعت مش سالكه لبعضها بربع جنيه، بس يزن غلبان ده انا لو عائشه عملت معايا الموقف ده والله ادفنها هي واخوك في تربه واحده..
_مسك يونس طفاية السجاير اللي علي المكتب ورفعها علي يوسف وقال بعصبيه..
يونس
تدفن مين يا ابن الكلب امشي غور اطلع بره..
_ جري يوسف من قدامه ويونس قعد علي مكتبه وهو مدايق وافتكر كلام سدره ليه واتنهد بضيق وقال..
يونس
حتي لو كنت غلطان في حق امك، انا مش هسمحلك تأذي ابني..
ــــــــــ #بقلم_الكاتبه_رحاب_القاضي ــــــــ
_وفي بيت الاستاذ حسن..
حطت ليلي قدامهم الفطار وقالت بعصبيه لحسن وعز الدين..
ليلي
ابن اختكم منكد. علي بنتي…
حسن
قصدك علي سيف؟..
ليلي بحزن
هو في غيره ابن لمياء، مش مقدر انها حامل وكل شويه البت تكلمني وبتبقي معيطه ليه كل ده ما انا اجيب بنتي عندي احسن..
رضوي
والله ياريت اصلا هو عيل مستفز..
طارق
روح رضوي الشربيني اللي جواكي تهدي دلوقتي وسيف ما يزعلهاش علي فكره اختي اللي نكديه..
ليلي بحده.
اتلم يا واد انت وايااك تقول علي اختك كده تاني..
عزالدين
كبري دماغك يا ليلي يحلو مشاكلهم لوحدهم وعلمي بنتك كده، قومي يا رضوي عشان ما نتأخرش..
طارق بحده
رضوي امسحي المكياج ده..
رضوي
لا..
طارق بحده
يبقي ما فيش طلوع من البيت، ايه المسخره دي..
حسن بحده
قوم اديها قلمين بالمره قدامي..
طارق
يعني عاجبك منظرها كده ولا كأن في رجاله فب البيت..
حسن بغضب
صوتك ما يعلاش علي اخواتك طول ما انا قاعد فاهم ولا لا…
رضوي بشماته
حبيبي يا بابا ربنا يخليك ليا…
حسن بجمود
اسمعي كلام اخوكي وادخلي امسحي المكياج ده وما يتحطش تاني، انتي رايحه تشتغلي مش رايحه تستعرضي جمالك قدامهم..
رضوي بأحراج
حاضر يا بابا..
_وبعد شويه في عربية عزالدين كانت رضوي ماسكه المرايه الصغيره بتاعتها وبتظبط الميكأب بتاعها وقالت بسخريه..
رضوي
عيلتي دي بيموتو في اللي يستغفلهم، ليه كلهم مش زيك يا عمو؟..
عزالدين
ده الحمد لله انهم مش زيي، بس طارق واخد حاجات كتير من ابوكي وابوكي واخد حاجات كتير من جدك في طبعه، انا بقي كان جدك علي طول يقول عليا زرع شطاني لاني لا عمري حبيت البلد ولا حبيت شغله ولا حبيت حاجه هو قالي عليها..
رضوي
طيب وده طلع صح ولا غلط، متهيألي كده انه صح..
عز بنبره حزينه
لما كنت في سنك. كنت مقتنع مليون في الميه انه صح، بس بعد ما العمر عدي طلع كل اللي اقتنعت بيه غلط وبقول ياريتني سمعت كلام ابويا، وياريتني حافظت علي مراتي وبناتي في الاول، او حتي يا ريتني كنت اتعلمت من غلطي وما خسرتش البني ادمه اللي حبتني ووثقت فيا بجد وما كنتش بقيت لوحدي دلوقتي…
حضنت رضوي دراعه وقالت بحزن
اخص عليك يا زيزو ده انا طول اليوم معاك ومش بسيبك ده انت بالنسبالي انا واخواتي اب تاني واسرارنا كلها معاك..
حضنها عزالدين وقاال بأبتسامه بسيطه
ربنا يخليكم ليا..
_ ووصلو بعد شويه واول ما رضوي دخلت الشركه بصتلها بأنبهار وقالت..
رضوي
ايه ده يا عمو..
عزالدين
لا وكمان ده مش المجال بتاع يونس الصاوي، دي شركة ولاده هو راجل يفهم في العربيات والحاجات دي بس بيحب يكون موجود مع ولاده عشان لسه بيبدأو..
رضوي
طيب انا هروح فين دلوقتي؟..
عز الدين
لا مع نفسك بقي يا جميل انا جيبتلك الشغل والباقي بتاعك انتي، هروح انا اسلم علي يونس وانتي تعاملي..
_ مشي عز وهي راحت سألت الموظفه اللي في الاستقبال وقالتلها..
رضوي
بعد اذنك انا عندي معاد مع البشمهندس يزن..
البنت
حضرتك البشمهندسه رضوي حسن؟..
رضوي
ايوه..
البنت
يوسف بيه في انتظار حضرتك، المكتب بتاعه في الدور التاني..
رضوي
هو مش المفروض الانترفيو بتاعي مع البشمهندس يزن..
_ما ردتش عليها البنت واتنهدت رضوي بضيق من تصرفاتها وطلعت فوق بالاسانسير واول ما وصلت مكتب يوسف مالقتش ان في سكرتيره ولا اي حاجه تدل انه مدير، وقفت ورا الباب وخبطت عليه بهدوء، وهو رد من جوه وقال..
يوسف
اتفضل…
دخلت رضوي وقالت بجديه
السلام عليكم..
ابتسم يوسف وقال
وعليكم السلام ورحمة الله وبركاته..
رضوي بتوتر من نظراته
اا انا المهندسه رضوي حسن ومعايا انترفيو مع البشمهندس يزن، بس تحت قالولي ان المعاد مع حضرتك..
يوسف وهو بيمثل الجديه
ايوه ايوه ما هو انا الكل في الكل هنا، اتفضلي اقعدي..
قعدت رضوي قدامه وقبل ما تتكلم قال هو بخبث
حضرتك مرتبطه..
رضوي
افندم؟!..
يوسف
قصدي تشربي ايه؟..
رضوي بجمود
لمون..
_ ابتسم يوسف بهدوء وطلبلهم لمون هما الاتنين وبعدين مسك السي ڤي بتاعها وقال بخبث..
يوسف
انتي متوتره ليه كده انا مدير متفاهم علي فكره..
رضوي
وانت مين قالك انتي متوتره وهتوتر ليه؟..
يوسف
حسيت بكده..
رضوي بنفاذ صبر
اممم احساسك غلط..
يوسف وهو بيقلد طريقتها بأستفزاز
امممم عندك تلاتين سنه، انا 26 المفروض اقولك يا طنط رضوي مش كده هههههه..
رضوي بحاجب مرفوع
طنط؟!
وتابعت بخبث
انا عرفتك خلاص انت بقي ابن مدير الشركه الفلاتي اللي حياته كلها سهر وو.. ولسه لحد دلوقتي ما اتخرجش من الجامعه..
اتغاظ يوسف من كلامها وقال ببرود
ما بحبش اتكلم عن نفسي بس فعلا ده انا، بس ده مالوش علاقه بالشغل وزي ما قولتلك انا الكل في الكل هنا…
_دخل الاوفس بوي وحطلهم العصير قدامهم ورضوي اتنهدت بضيق وهي بتحاول تكون هاديه وقال وهو بيقرأ في السي ڤي بتاع رضوي…
يوسف
اممم يعني كنتي شغاله في شركه كبيره وكنتي ماسكه منصب كويس هناك، ايه اللي خلاكي تسبيها؟..
رضوي بهدوء
ما ارتحتش مؤخراً ففضلت امشي وادور علي مكان تاني ارتاح فيه..
يوسف بسخريه
بس الشركه هنا مش للتجربه يعني هيكون في عقد وهتلتزمي بيه انتي هتشتغلي علي مشروع كبير، وقبل كمان ما تمسكي المشروع ده عايز اتأكد من شغلك هتنفعي ولا ولا..
اتنهدت رضوي بنفاذ صبر وردت عليه
لا حضرتك انا ما انفعش اشتغل هنا لاني مش لسه محتاجه اثبت لحد قدرتي علي الشغل..
يوسف بخبث
خلقك دايق والمشروع بتاعنا كبير وعايز مهندس شاطر يكون باله طويل، وبعدين انتي خايفه ليه لتكوني مش واثقه في شغلك وقدرتك؟..
رضوي بحده
لا واثقه جدا في شغلي وعشان كده مش هخلي عيل زيك مش عارف يدير مشروع انا عملت احسن منه قبل كده يديني تعليمات او استني رأيه فيا، عارف الرد اللي ينفع للعبث اللي بتقوله ده ايه؟..
بصلها بغضب وهي كملت كلامها وقالت ببرود
روح ناديلي حد كبير اتكلم معاه ويفهم شغلي..
وقف يوسف وقال بحده
انتي قليلة الذوق وبجحه..
وقفت رضوي قدامه وقالت بغضب
وانت قليل الادب ومش متربي وهمجي وانا مش هشتغل في مكان فيه واحد زيك..
يوسف بحده
وانتي مين اصلا انتي شايفه نفسك كده علي ايه..
ومسك الملف بتاعها رمااه في وشها وقال
انتي بقي اخرك اقولك اطلعي بره مالكيش شغل عندي..
رضوي بغضب
انا هطلع فعلا بس لما ارد عليك برد يليق بيك يالااا..
_ومسكت العصير اللي قدامها وحدفته عليه وما اكتفتش بكدا دي كمان قربت منه ومسكته من هدومه بحركه سريعه وضربته بالروسيه في دماغه فوقع علي الكرسي وهو ماسك راسه بألم وقال..
يوسف بغضب
ااه يا بنت ال…
دخل عز ويونس في الوقت ده ويونس قال
في ايه، يوسف يا نهار اسود ايه اللي عمل فيك كده؟
عز بقلق
عملتي ايه في الواد يا بت؟..
رضوي بعصبيه
ده ولد مش متربي وهو قاصد يستفزني اصلا..
بصلها يونس بجمود وقال
بيستفزك ازاي يعني؟..
يوسف وهو ماسك راسه بألم
ايوه يا بابا هاتلي حقي منها الوليه دي.
يونس بحده
اخرس يا حيوان..
عزالدين
خلاص يا يونس حصل خير وانا بعتذرلك يا يوسف علي تصرف بنت اختي، بعد اذنكم…
يونس
استني يا عز انا عايز افهم منها ايه اللي عملو يوسف يخليها تتصرف معاه كده..
ردت عليه رضوي وقالت
هو حضرتك شايف اني مهندسه قليله عشان الاخ يعمل عليا مدير ويقعدني قدامه وكأني واقعه علي الشغل او جايه اشحت منه..
يوسف بتوتر
ما حصلش انا بتعامل عادي..
يونس بصله بحده وقال
قدامي علي المكتب يلا وانت يا عز كمان والبشمهندسه ياريت تسمع كلامي وانا هجيبلك حقك..
رضوي بثبات
لا شكرا انا اخدت حقي بنفسي..
عزالدين
يا بت اسكتي بقي…
_وراحو فعلاً كلهم مكتب يونس وحصل؟؟؟….
ــــــــــ #بقلم_الكاتبه_رحاب_القاضي ــــــــ
_وفي الكافي اللي طارق المفروض مشارك فيه دخل هناك وابتسم بهدوء ان معظم التجهيزات خصلت..
قرب منه عمرو صاحبه وقال
اخيراً جيت المحامي بقاله كتير مستني، تعالي بقي عشان نخلص العقد..
طارق
يا ابني في اي وقت هو احنا يعني هناكل بعض..
عمرو
لا الاول كان عقد ايجار فبأسمي او اسمك او اسم سندس مش فارقه انما دلوقتي المكان هيبقي تمليك ولازم يبقي بأسمنا احنا التلاته انت النص وانا وسندس النص التاني…
طارق
طيب خلاص فينه المحامي بتاعك ده..
عمرو
اهو تعالي..
وقفت جنبيه سندس وقالت
حبيبي تعالي عايزة اخد رئيك في حاجه بسرعه..
طارق
دقيقه طيب هخلص الحوار بتاع العقد ده مع عمرو واجيلك انتي مضيتي ولا لسه؟..
بصت لعمرو اللي قال
اا ايوه هي مضت يلا بقي يا طارق خلينا نخلص..
_ وراح فعلا طارق وبرا العقد بسرعه عشان سندس اللي كانت كل شويه تنده عليه ي عليه وراح وقف جنبيها وهو مبسوط جدا..
سندس
ايه الفرحه دي كلها؟..
طارق
طبعاً لازم ابقي مبسوط مش ناجح في المشروع بتاعي وكمان معايا اقرب صحاب ليا..
سندس بخبث
اقرب صحاب بس..
ضحك بهدوء ورد عليها
هو لحد الان اقرب صحاب نفتح بس الكافي وهكلم بابا عشان اجي اخطبك علي طول..
سندس
ده هيبقي اسعد يوم في حياتي يا حبيبي..
بصلهم عمرو بحقد وراح وقف جنبيهم وقال
هنقضيها حب اليوم كله يعني ما يلا عشان نشوف اللي ورانا..
طارق
هي مش حكاية شغل، بس روح السنجل الحقود اللي جواك انت لازم تطلعها علينا..
_ضحكو كلهم وكملو شغل سوا وكان طارق جاهل عن حقدهم واللي بيخططو ليه عشان يسرقو تعبه ومجهوده 💔
ــــــــــ #بقلم_الكاتبه_رحاب_القاضي ــــــــ
_وفي مكتب يونس كان قاعد علي ترابيزة الاجتماعات وجنبيه عزالدين ورضوي ومن الناحيه التانيه يوسف ابنه اللي بيبص لرضوي بعصبيه وكأنه هيقوم ياكلها….
يونس بجديه
ده شرف لينا انك هتشتغلي عندنا يا رضوي، وانا لما عز قالي عليكي رشحتك علي طول للمشروع الجديد مع يزن ابني..
اتنهدت رضوي بضيق وعزالدين قاله
مدام هتكون هي والاستاذ يوسف بعيد عن بعض يبقي ما فيش مشكله..
يوسف بغيظ
معاك حق انا الدكتور قالي ابعد عن الحيوانات المفترسه..
رضوي بحده
اللي شبهك طبعاً..
يوسف
ما تتلمي بقي ده انتي جايه تشتغلي عندنا يعني تحترمي نفسك..
رضوي
انا محترمه غصب عنك انت اللي قليل الادب..
عزالدين
والله انتو الاتنين ما عندكمش ذووق عشان في ناس كبيره قاعده والمفروض تخرسو خالص ولا ايه يا يونس؟..
يونس بص ليوسف بجمود وقال
ما اسمعش صوتك تاني..
سكت يوسف وكمل يونس كلامه وقال
المشروع اللي هيتم ده مهم وللاسف يزن ابني في حاله صعبه شويه ومش عايز اضغطته بيه فانتي هتكوني المسؤله عنه ودي ثقة عمك فيكي وفي شغلك انا هتأكد انك شاطره لما المشروع ينجح..
وبص ليوسف بخبث وقال
ويوسف الصاوي هيكون الشريك معاكي في المشروع..
رضوي بحده
مستحيل اشتغل مع البني ادم ده..
يوسف
وانا مستحيل اشتغل اصلا..
بصله يونس بعصبيه وهو اتوتر وقال
قصدي يعني مش هينغع اشتغل معاها..
يونس
انت غلطت وهي اخدت حقها زي ما قالت والشغل ما فيهوش هزار، فيه خد وهات وبس وانا بتعهدلك قدامك انك لو في يوم جيتي واشتكتيلي منه انا هخليه يمشي من الشركه كلها، وبرضو لو ما شافش شغله كويس معاكي يعتبر نفسه بره..
ابسمت رضوي بشماته وقالت
موافقه..
يوسف بحده
هو ايه الكلام ده يا بابا شغل ايه بس..
يونس بجمود
اخرس خالص….
وقال لرضوي
هستناكي بكره وهتفق انا بنفسي معاكي علي الشغل ونراجع العقد سوا تمام يا بنتي..
يوسف بغيظ
بقي انا تقولي اخرس وتقول للحرمبوءه دي يا بنتي..
يونس بصوت واطي
فكر تتكلم تاني عشان اقلع الجزمه وانزل بيها علي دماغ امك يا صايع..
وقف عز وقال
ان شاء الله يا يونس وانا هكون مطمن عليها مدام هتكون معاك هنا..
يونس
ان شاء الله يا عز، وهستناكي بكره يا رضوي..
رضوي
ان شاء الله يا يونس بيه..
_ ومشيت هي وعز واول ما عدت من جنب يوسف مد رجله قدامها عشان تقع بس هي كانت الاذكي وداست عليها وهي معديه..
يوسف بألم
اااه يا حيوانه..
رضوي بخبث
بتقول حاجه؟..
يوسف بألم
لا بقول اتفضلي…
وتابع بصوت واطي
في داهيه..
_طلعت رضوي ومعاها عزالدين وقام يونس قفل الباب كويس وبكل قوته ضرب يوسف بالقلم علي قفاه…
يوسف اتفزع وقال
ااااه ايه يا بابا اللي انت عملته ده؟..
يونس بحده
هو انا لسه عملت حاجه يا واطي بقي اقولك تتفق مع البت تقوم تحاول تشقطها هو انا مش فاهم حركاتك دي..
يوسف قام بسرعه وقال بخوف
والله ما كنت اقصد وبعدين هي طلعت جعفر في نفسها وغيرت فكرتي..
يونس بعصبيه
من الاخر يالا البت دي هتبقي ماسكه المشروع معاك وتسمع كلامها لانها اشطر منك وتتعلم منها وتساعدها والا والله هاخد منك العربيه ومفتاح البيت وهوقف حسابك في البنك وخليك في الشارع عشان تكمل صياعه كويس..
يوسف
هو انت ليه بتعمل معايا كده يا بابا، ان ما اتدلعتش بفلوسك دلوقتي هتدلع بيها امتي..
يونس بحده
انت راجل يالا يعني مالكش دلع، وبعدين ما انت بقالك سنين متدلع عملت ايه بقي عندك سمعه زي الزفت صايع وبتاع بنات وفاشل في التعليم والشغل هاتلي ميزه حلوه فيك؟..
يوسف بثقه
ما فيش مني اتنين في حلاوتي..
يونس بغيظ
بلا نيله يا اخويا، واسمع ده اخر كلام عندي ومش هرجع فيه ولو روحت وفضلت تعيط لامك وتخليها تتخانق معايا هطردها معاك وتبقي خربت علي امك..
يوسف ببرود
حلو اوي هي امي لو اطلقت منك هتاخد قد ايه نفقه كل شهر..
جري وراه يونس وقال بعصبيه
غور من وشي يا حيوااان يا بااااارد…
طلع يوسف وهو بيضحك وقال يونس لنفسه
يارب ايه الخلفه اللي تعر واحد عروسته تهرب منه يوم الفرح ويرجع يدافع عنها والتاني بنت تعلم عليه..
دخل يوسف راسه وقال بخبث
تربيتك يا حج ابو الخوازيق..
_ ميل يونس علي الارض وكان هيقلع الجزمه بس يوسف جري تاني بسرعه لبره..
ــــــــــ #بقلم_الكاتبه_رحاب_القاضي ــــــــ
_ وفي بيت يوسف دخل البيت ومعاه سدره اللي كانت بتحاول تداري خوفها منه، واول ما شافتهم بطه قامت بسرعه وقالت..
بطه
انتي كنتي فين يا بت انتي دي عمله تعمليها..
سدره بحده
وانتي مالك انتي…
يوسف بحده
ردي عليها كويس وقوليلنا عملتي كده ليه عشان انا ماسك اعصابي عنك بالعافيه..
سدره بجمود
مش عايزه اتجوز..
يوسف بعصبيه
جايه تقولي كده يوم فرحك بعد. ما فضحتينا..
سدره ببرود
والمطلوب يعني اعملكم ايه دلوقتي؟..
مسكها يوسف من ايدها جامد وقال
اتكلمي معايا كويس يا بت انتي…
سحبت منه ايدها وقالت بحده
انت ما تعملش راجل عليا، لو كنت راجل بجد ما كنتش خليت مراتك دي زمان تحكم عليك وتخليك تطلق امي..
_ اتصدم هو وبطه من كلامها وبكل قوته ضربها بالقلم ومسكها من شعرها وقال بغصبيه..
يوسف
انا فعلاً ما عرفتش اربيكي بس احنا فيها يا سدره..
بعدته بطه عنها وقالت بقلق
خلاص يا يوسف عشان خاطري سيبها دلوقتي..
وقالت لسدره بحده
وانتي غوري ادخلي اوضتك يلااا..
_ سابتهم سدره ودخلت اوضتها وقفلت الباب عليها ولقيت فستان فرحها اللي اختارته هي ويزن موجود. علي السرير، راحت قعدت جنبيه ومسكته وبصتله بدموع وفضلت تعيط وقالت بنبره حزينه جداً..
سدره
والله يا ماما هفضل اكرهم كلهم زي ما كانو بيكرهوكي…
_ وطلعت موبيلها من شنطتها اللي كانت قفلاه من لما سابت الاوتيل امبارح ولقيت عدد مكالمات كبير من اهلها وبالاخص يزن، تجاهلت الكل وكلمت واحده صحبتها وقالت..
سدره
ايوه يا سمر انتي فين؟..
سمر
انتي اللي فين وايه يا بنتي اللي حصل امبارح ده والكلام اللي اتقال انك طفشتي..
سدره
ده اللي حصل فعلا…
سمر
عشان كده بقي ما كنتيش راضيه تخلينس اكون معاكي من اول اليوم امبارح..
سدره بنبره خائفه
خلاص بقي يا سمر انا عايزاكي تيجي عندي دلوقتي انا مش عايزه اقعد لوحدي معاهم ارجوكي..
سمر
اجيلك فين هو انتي فين اصلا؟..
سدره
في البيت يلا مستنياكي مش طايقه ابويا ومراته وتعالي بسرعه والا هتحصلي حاجه..
سمر
طيب جايه علي طول..
ــــــــــ #بقلم_الكاتبه_رحاب_القاضي ــــــــ
_ واليوم عدي كويس ورجع حسن من الشغل لقاهم كلهم قاعدين بيذاكرو معادا رضوي وطارق فقال..
حسن
ربنا يهديكم اومال طارق اخوكم فين ورضوي كمان جات من الشغل ؟..
ليلي طلعت من المطبخ وقالت
طارق جه من الشغل ودخل ينام شويه وضوي جوه في اوضتها ، روح نام انت ساعه يكون الغدا جهز…
حسن
ماشي ومش عايز دوشه عشان عندي صدااع هيفرتك دماغي..
_ ودخل جوه وغير هدومه وقبل ما ينام، سمع صوت دوشه جامد بره، طلع بسرعه ولقي طارق بيتخانق مع روان ورضوي بتحجز بينهم وروفان وروز بيتخانقو وليلي بتكلم اختها في الموبيل..
طارق
انا مش قولت ما تنزليش صور تاني علي الانستجرام بالمنظر ده ياا بت…
رضوي
ميصحش كده يا طارق اتكلم بالراحه وهي هتمسح الصوره..
روان بحده
سبيه يا رضوي يوريني هيعمل ايه بتاع سندس بقي في واحد. يحب واحده اسمها سندس..
رضوي
سندس الملزقه صح، انت ليه بتعمل فيا كده يا طارق مالقتش غير البت دي يعني صحابي يقولو عليا ايه انا اخويا يخطب البت الغلسه دي…
طارق جري ورا روان
اخرسي يا رضوي ما تقوليش عليها كده، والله لانفخك يا روان…
رضوي وهي بتجري وراهم
استني هنا رد عليا ازاي تحب سندس الملزقه رد عليا…
وعلي الارض روفان بعيااط
سيبي الواجب بتاعي يا روفان..
روز
يا كداابه ده بتاعي انا انتي مش بتعرفي تعملي الواجب..
روفان
يا بت انا مش عايزه اغلط فيكي عشان ابوكي الراجل الكبير اللي واقف ده..
ليلي وهي بتتكلم في الموبيل
لااا يا منال روان مش هتتجوز دلوقتي وبعدين احنا خيبنا لما جوزنا ريناد للواد سيف ابن عمتها وخطبتنا رضوي لكمال ابن عمتها التانيه واهو ابن الجزمه عقدها ليا، اما روان دي هجوزها لواحد عليه القيمه بلاش تخيب خيبتي وخيبة اخواتها..
حسن بحده
بااااااس يا غجر اييييه حلب عايش مع حلب اقفلي ام الموبيل ده يا ليلي..
روفان
مالك يا بابا يا حبيبي حد زعلك في حاجه متعصب كده ليه..
طارق
ايوه يا بابا كويس انك صحيت عشان تشوف بنتك اللي مالقيتش حد يربيها ااا..
قلع حسن الشبشب وقال
مين دي اللي مالقيتش حد يربيها وبتقولها في وشي..
جري طارق وروان قالت
ايوه اجري واتخبي زي الفار المبلول كده..
طارق
وربنا لاجيلك يا جزمه..
يروز ببكاء
يا بابا روفان اخدت الواجب بتاعي يا بابا..
حسن بعصبيه
اخرسو يا غجر عايز اسمع صوت حد تاني عشان يبقي يومه مش معدي..
ليلي
في ايه بس يا حسن ما ده حال كل يوم..
حسن
انا تعبت من العيال والدوشه بقي ساعه مش عارف انام فيها في البيت لا الصغير بيسمع الكلام ولا حتي الكبير..
روفان
بابا بابا روز شدتني من شعري..
حسن بعصبيه
روحي شديها من شعرها انتي كمان ما تجيش تقوليلي
ليلي
جرا ايه يا حسن انت بتسخن الولاد علي بعض، ده بدل ما تراضيهم..
_ وفجأه الباب خبط ودخلت ريناد بنته الكبيره وهي شايله بنتها علي ايدها وبطنها كبيره قدامها وقالت..
ريناد ببكاء
طلقني منه يا بابااا انا مش عايزه اعيش معااه تاني..
ودخل وراها سيف جوزها وقال
هو انتي كنتي تطولي تعيشي معايا، ازيك يا خالي عامل ايه وحشني والله..
ريناد
لييه من حلاوتك ولا من حلاوتك يا عود القصب انت، انت كويس يا بابا..
دخل عزالدين عندهم وقال
في ايه مالكم ولا مش مهم حد. يجيب موبيله بسرعه عشان الماتش هيبدأ..
سيف جوز ريناد
استني يا خالو عز كده بقي انا عود قصب يا كوره كفر انتي، واقف ليه يا خالو حسن تعالي ندخل..
حسن
الله يخربيتك علي بيت مراتك علي بيت خالك اطلعووو بره عايز اناااااااام..
ليلي
الله بقي يا حسن استني نشوف العيال مالهم وايه الحكايه..
_ وبعد شويه قعد حسن وليلي مع ريناد بنتهم وجوزها سيف وطارق معاهم ورضوي وروان اخدو تيا بنت اختهم واخواتهم الصغيرين وقعدو جوه..
حسن
مش كنتو داخلين ماسكين في بعض سكتو دلوقتي..
ريناد
اهو عندك خليه يتكلم ويقولك عمل ايه؟..
سيف
وانا اتكلم ليه هو انتي بتديني فرصه اتكلم، قولي انتي كل اللي عندك..
حسن
ما هو يا تتكلمو وتخلصو يا تمشو وتسيبوني انام..
ريناد بدموع
البيه يا بابا اللي عامل فيها محترم ومؤدب عمل..
عيطت وقالت
والله ما قادره اقولك عمل ايه؟..
ليلي
يالهوي هي وصلت لكده يا سيف..
سيف
ما تافوريش يا مرات خالي هي ماقالتش حاجه اصلا..
طارق
بت انتي انطقي ده انتي رخمه بجد، وبعدين سيف صاحبي وحبيبي ما يعملش حاجه غلط..
ريناد بحده
لو هو صاحبك انا اختك علي فكره يا طارق…
حسن
لاخر مره هقولك اتكلمي علي طول يا ريناد جوزك عمل ايه؟..
ريناد
شميت ريحة بيرفوم حريمي في هدومه يا بابا الخاين الغشاش بعد كل ده بيخوني..
سيف
شوفتو انا بقي مش هتكلم عشان انا تعبت اتكلمو انتو..
ليلي
هرمونات الحمل معلش..
ريناد بغيظ
انا بتكلم بجد وبعدين انا خلاص مش عايزه ارجعله تاني..
وقف سيف وقال
ده انتي بتتلككي بقي خليكي قااعده عند ابوكي براحتك شالله تخللي..
عزالدين
اترزع يالا واتكلم كويس..
ليلي بحده
استني يا عز طيب ايه رئيك بقي انها هتقعد عندنا فعلا ولما تعرف قيمتها ابقي تعالي خدها..
حسن
ما تكبريش الموضوع يا ليلي وخلي بنتك تروح مع جوزها..
طارق
انا بقول كده برضو الموضوع مش مستاهل يا ريناد..
ليلي
جرا ايه هو انتو بتجاملوه كمان هي ريناد مالهاش اهل ولا ايه..
حسن بحده
لا ليها خليها عندك وانت يا ابن اختي روح عند امك اليومين دول ولما تبقي تتعلم تنضف هدومك قبل ما تدخل بيتك ابقي تعالي خد مراتك..
ليلي بخبث
وانت عرفت منين موضوع ينضف هدومه قبل ما يدخل البيت ده يا حسن..
عزالدين ضحك وقال
هههههههه البس بقي فوق دماغك..
حسن بغيظ
ايه هتشكي فيا وهتزعلي في بيت اهلك يلا بالسلامه وخدي عيالك في ايدك وانتي ماشيه انا مصدع وعايز انام..
ليلي
لا يا حبيبي انا يوم ما احس بس انك بصيت لوحده غيري والله لاكون مبيتاك في الشارع انت وعيالك يا حسن..
عزالدين
بس يا ليلي حسن ده حافظ مصحفين ده قال يبص برا قال، وانت يا سيف اقعد والكلام بالهداوه مش كده..
سيف بضيق
لا يا خالي انا ماشي يا خالي وبراحتك يا ريناد اعملي اللي انتي عايزااه..
_ مشي سيف وريناد فضلت تعيط واخواتها كلهم دخلو وفضلو يعيطو معاها..
رضوي
خلاص بقي يا ريناد هما كلهم كده صنف واطي..
بص طارق وحسن وعزالدين لبعض وقال عز
بنتك بتلقح علينا يا حسن ينفع كده..
روفان بصوت واطي
بابا هي ريناد بتعيط ليه؟
حسن
عشان تعبانه يا حبيبتي شويه..
روفان ضيقت عينيها بشكل مضحك وقالت
انت بتكدب يا بابا وفاكرني صغيره ومش فاهمه حاجه..
بص حسن لعز بغيظ وقال
رد عليها مش تربيتك دي..
عزالدين
وانا مالي انا مش عيالك..
حسن لريناد بحده
انتي بتعيطي ليه دلوقتي؟..
ليلي بغيظ
بسبب اختك وابنها جوازة الشؤم والندامه.
ريناد
شوفتي يا ماما الخاين ما صدق يسيبني ويمشي اكيد عشان يروحلها…
حسن
انا رايح انام عندك يا عز وخليك معاهم يا بيت مجانين..
_مشي حسن فعلا وطارق بص لروان اللي كانت ماسكه موبيلها ومبتسمه بهدوء وقال..
طارق
بتكلمي مين يا بت انتي؟..
روان
وانت مالك بكلم صحابي..
طارق
طيب وريني كده..
رووان
وانا اوريك الكلام اللي بيني وبين صحابي ليه، انا داخله اوضتي..
دخلت روان اوضتها وروفان قربت من طارق وقالتله
طاروقه اقولك روان كانت بتكلم مين؟..
طارق بجمود
ايوه قولي..
روفان
والمقابل..
طارق
هديكي عشره جنيه اخلصي..
روفان
طيب طلعها يلا والا مش هقول..
طلع طارق الفلوس وادهالها وهي قالت
انت بقي عايز تعرف روان كانت بتكلم مين.؟..
طارق
ايوه اخلصي..
روفان
وانا اعرف منين هو الموبيل كان في ايدها ولا في ايدي..
طارق بغيظ
اطلعي بالعشره جنيه يا بت انتي..
عز بحده
وطي صوتكم مش عارف اسمع الماتش..
طارق
انا سيبهالكم ونازل، وانتي يا بت يا ريناد لمي الدور سيف ده راجل ما فيش منه..
ليلي بحده
واختك ما غلطتش وتقعد هنا براحتها ولما يبقي يلم نفسه يرجع..
عزالدين
سيبهم دول مجانين يا عم انا هبقي اكلم سيف يجي ياخدها..
ليلي بحده
طيب قوم امشي من بيتي انت كمان، ده انت اصلا اكبر خازوق في الرجاله طبيعي تيجي مع ابن اختك..
عزالدين
يا ليلي ما دي بنت اخويا برضو، وبعدين الراجل ما غلطش بصراحه وبنتك اللي هبله..
قامت ريناد وقالت بعصبيه
بقي كده يا عمي ماشي شكرا انا عارفه انك بتحبه اكتر…
عزالدين
ايوه غوري بقي من وشي اندبي جوه..
_قامت ريناد دخلت جوه ومعاها ليلي اللي كانت متدايقه من عزالدين، وقعدت رضوي جنب عزالدين وقالتله..
رضوي
ما قولتليش رئيك ايه في موضوع شغلي عند عيلة الصاوي ده؟..
عزالدين بجديه
بصي هو انا كنت مرتاح عشان هتبقي مع يزن الصاوي الواد ده معروف انه بتاع شغل وشاطر ومحترم جداً، انما يوسف الصاوي ده حالته حاله..
رضوي بغيظ
رخم ومستفز وقليل الادب وعيل كده في نفسه ومش طيقاه بجد ويا ايامه السودا لو بقي معايا فعلا في الشغل..
عزالدين
لا ما تتغريش اووي الولد ده برغم معرفتي البسيطه بيه الا ان اللي بسمعه عنه يخليني انا بكل اللي عملته صفر علي الشمال جنبه..
رضوي بثقه
علي نفسه انا واحده رايحه اشتغل وبس هيقل ادبه مالوش غير اللي في رجلي..
عزالدين
شاطره يا بت كده اطمنت عليكي..
_ وتحت في العماره كان قاعد راجل كبير عنده 53 سنه وباين عليه الحزن بدرجه كبيره، قرب منه طارق وقعد جنبيه وقال..
طارق
عم سيد حمد لله علي سلامتك…
قام سيد البواب بسرعه وقال
الله يا سلمك. يا دكتور طارق..
طارق
البقاء لله في الحجه ام هنا انا والله لو كنت قولتلي ما كنتش هسيبك وكنت هروح معاك..
سيد بحزن
وكأنك جيت يا ابني تعالي اقعد هعملك شاي..
طارق
والله وحشني الشاي بالنعناع بتاعك يا عم سيد…
_ عمل سيد الشاي وراح قعد جنبيه علي الكنبه الصغيره، وطارق بصله بأهتمام وقال..
طارق
هو انت مش عندك بنت يا عم سيد ما جيبتهاش معاك ليه؟..
بان الحزن علي سيد وقال
البت ما تعرفش اني شغال بواب ما كنتش اقدر اجيبها هنا، فسيبتها عند. خالتها والبت غلبانه ما تعرفش تعيش هنا البلد احسن ليها..
طارق
ربنا يسترها يا عم سيد ، هنسافر الصعيد كلنا بكره وهنقعد بتاع يومين كده وهرجع اعمل افتتاح الكافي بتاعي انا وصحابي..
ابتسم سيد. وقال
طيب كويس يا ابني الاستاذ حسن لما يلاقي مشروعك نجح هيبقي مبسوط منك اووي…
طارق بسخريه
والله انا مهما عملت هفضل في نظر ابويا فاشل، مع اني مكمل في الجامعه لحد النهارده وفي حاجه مش بحبها عشانه هوو..
سيد
اللي يرضي ابوه وامه ويكسب دعائهم ربنا هيراضيه دنيا وأخره فمهما حصل اوعي تخسر رضاهم عليك ودعائهم ليك 🤍🌺
طارق
طبعا يا عم سيد انا ما عنديش في الدنيا اغلي من ابويا وامي واخواتي، ربنا بس يعدي اللي جاي ده علي خير والدنيا هتكون كويسه..
سيد
ان شاء الله يا ابني اشرب الشاي قبل ما يبرد..
ــــــــــ #بقلم_الكاتبه_رحاب_القاضي ــــــــ
_ وفي اوضة روان استغلت انشغال مامتها واخواتها مع ريناد ودخلت اوضتها وردت علي موبيلها اللي كان بيرن وقالت..
روان
ايوه يا امير معاك..
امير
كل ده بكلمك ومش بتردي، انتي كده عايزه تباني تقيله ولا ايه؟..
روان بسرعه قالت
لا لا والله مش قصدي كده بس احنا بيتنا دوشه اووي ومش بعرف ابقي لوحدي كتير عشان اكلمك..
امير
اوكي انا عايز اشوفك النهارده..
روان بصوت واطي
لا مش هينفع خالص هبقي اشوفك في الجامعه زي كل يوم..
امير بحده
لا انا مش عاجبني. جو الجامعه ده، انا هستناكي في كافي حلو كمان نص ساعه ولو ما جيتيش هزعل بجد اوكي يا رورو…
روان بقلق
حاضر ان شاء الله هاجي..
_قفلت معاه ورجعت لاوضه بتاعتها هي ورضوي وكانت هناك ريناد قاعده مدايقه وليلي ورضوي بيحاولو يخلوها تهدي..
رضوي
تعالي اتكلمي انتي معاها يا روان عشان انا زهقت..
ريناد بدموع
زهقتي مني يا رضوي اومال مين يشيل همي بس..
روان بملل
لا دي هرموناتها ضاربه علي الكل، المهم يا ماما انا عندي كورس مهم ولازم اروح دلوقتي..
ليلي
طيب روحي وطارق اخوكي فاضي اهو خليه يوصلك..
روان بقلق
لا لا طارق لا ما ينفعش..
ليلي بشك
ليه ان شاء الله ما هو بيوصلك ديماً الكورسات بتاعتك؟…
روان
ما هو عشان يعني انا وهو متخانقين ولو جه معايا هنتخانق تاني، بصي انا هقابل صحابي ونروح سوا..
ليلي
طيب ولما اكلمك تردي عليا علي طول فاهمه؟.
روان
حاضر يا ماما من عينيا..
طلعت روان وليلي قالت لريناد بهدوء
وانتي اهدي ما فيش حاجه تستاهل مش علي اخر الزمن بنت ليلي حد يزعلها..
رضوي
هي اللي مزعله نفسها بصراحه يعني الموضوع بسيط علي اللي انتي عملاه ده يا ريناد..
ريناد بدموع
لا مش بسيط انا عارفه جوزي يا ناس هو متغير بقاله فتره عشان في وحده في حياته غيري وانا النهارده قفشته..
رضوي
قفشتيه ازاي يعني شوفتيه معاها؟..
ريناد
لا بس شميت ريحتها في هدومه..
ليلي بضيق
خلاص يا رضوي سيبي اختك دلوقتي وتعالي ساعديني في تجهيز الغدا قبل ابوكي ما يصحي، وانتي خدي بنتك في حضنك ونامي واهدي وانا هكلم عمتك تشوفلها حل في ننوس عينها الحيله بتاعها ده..
ريناد بقلق
لا لا ما توصليش الموضوع لعمتو يا ماما معلش..
رضوي بخبث
ليه يا ريناد خايفه لعمتو تعرف وتكبر الموضوع وتنفصلو، هو انتي عايزه تكملي مع واحد خاين ولا ايه؟..
ريناد بتوتر
لا ما هو انا مش متأكده اوي يعني يا جماعه..
ليلي بغيظ
اتخمدي بدل ما اجي اقطم في رقبتك وانتي قدامي نشوف الغدا قال يا مخلفه البنات يا شايله الهم للمامات لا اللي مش متجوزين مريحني ولا اللي متجوزه مريحاني..
طلعت ليلي ورضوي قالت لريناد بحماس
اوعي تنامي هروح اساعدها شويه واجي احكيلك اللي حصل في الشغب معايا النهارده..
ريناد وهي بتحضن بنتها الصغيره بهدوء
لا لا بعدين انا عايزه انام اقفلي الباب وراكي..
رضوي بغيظ
وليكي نفس تنامي يا رخمه، برضو هجيلك وهصحيكي..
_ وطلعت وقفلت الباب وراها، ودخلت المطبخ عند ليلي اللي قالت بسخريه..
ليلي
كنت بكلم عمتك علياء وبتقولي ان كمال بيكلمهم كل كام يوم، قوليلي بقي هو بيفتكرك وبيكلمك ولا لا؟..
اتنهدت رضوي بضيق وقالت
لا مش بيكلمني وهيكلمني ليه؟..
ليلي بحده
اومال انتي مستنيااه ليه؟..
رضوي بدموع
انا مش مستنيه حد يا ماما ولو هتتكلمي معايا في الموضوع ده يبقي اروح اقعد بعيد عنك احسن..
ليلي بحزن
انتي ليه بتعملي فيا وفي نفسك كده اختك اهي اللي قدك في العمر معاها بنت وحامل في ابنها التاني وصحابك كلهم اتجوزو ومعاهم عيال وانتي معلقه نفسك بواحد اول حاجه عملها في علاقتكم انه سابك عشان يحقق حلمه، ما فكرش فيكي بربع جنيه حتي.
_نزلت دموع رضوي بحزن وسابت الخضار اللي في ايدها وطلعت من المطبخ والشقه كلها وطلعت قعدت علي السطوح وفضلت تعيط اووي وافتكرت اللي حصل من 5 سنين…
_ فلاااش باااك..
خرجت رضوي من الشركه اللي شغاله فيها وكان كمال القاضي ابن عمتها واقف مستنيها، راحتله بسرعه وقالت..
رضوي
وشك حلو عليا واترقيت النهارده وكمان المرتب بتاعي زاد شويه..
كمال بجمود
طيب كويس مبروك..
رضوي
الله يبارك فيك، مالك يا كمال في ايه؟.
كمال
في موضوع مهم لازم نتكلم فيه….
رضوي
موضوع ايه ده انت قلقتني يا كمال..
كمال بضيق
تعالي بس نروح البيت بس هما كلهم مستنينا دلوقتي ولازم الكلام يكون قدامهم…
رضوي بقلق
في ايه يا كمال اتكلم انا اعصابي باظت والله..
كمال بحزن
بصي هو بعيد عن اي حاجه بتحصل انا والله العظيم بحبك وعمري ما هحب غيرك بس اللي هيحصل كمان شويه ده هو الصح ولمصلحتك..
_ وقبل ما ترد عليه فتحلها باب العربيه عشان تركب، واخدها ورجعو البيت وكان حسن وليلي وعلياء مامت كمال موجودين ومستنينهم…
حسن
اهم جم في ايه يا كمال يا ابني قلقتنا..
ليلي
استني عليهم طيب يا حسن شويه يرتاحو من المشوار..
رضوي بقلق
في ايه يا كمال ما تتكلم ايه الجو اللي انت عامله ده..
كمال بجمود
انا جاتلي فرصة عمل بره مصر كويسه جداً، هتنقفل في شغلي نقله كبيره واسمي هيبقي كبير اووي كمان..
علياء بدموع
يعني ايه انت عايز تسافر يا كمال وتسيبني انا واخوك اللي مالوش غيرك يقف في ضهره ويشوف مصالح البلد معاه..
ليلي بخوف
اسكتي يا علياء عشان شكله ابنك هياخد. بنتي معاه بس ده طبعا مستحيل انا بناتي ما يبعدوش عني..
كمال بجمود
لا للاسف مش هينفع اخد معايا رضوي بأي شكل من الاشكال وكمان انا هقعد هناك عشر سنين مش هينفع انزل من هناك لمصر خالص..
علياء
ايه اللي انت بتقوله ده، عشر سنين ده عُمر بحاله يا ابني..
حسن بجديه
استني يا علياء يعني ايه هتقعد عشر سنين ورضوي مش هينفع تسافر معاك..
بصلها كمال بدموع وقال
ما هو للاسف دي المشكله انا مش عارف اتصرف ازاي، بس انا مش هقدر اضيع الفرصه دي من ايدي لاي سبب من الاسباب..
ليلي بحده
يعني انت عايز تربط البت جنبك 10 سنين كمان، لا يفتح الله هجوزهالك واسنانها واقعه ولا ايه..
حسن بضيق
هو ده ينفع برضو يا علياء انتي وابنك دي اصول انه يسافر ويسيبها متعلقه ورااه..
كمال بجديه
امي مالهاش دعوه يا خالي ده قراري انا، وانا زي ما قولتلك مش هينفع اضيع الفرصه دي…
وقلع الدبله من ايده ومسك ايد رضوي وحطها فيها وقال بنبره حزينه..
كمال
احنا بقالنا سنين بنحب بعض ومخطوبين وانا عمري ما اتمنين اتجوز غيرك بس للاسف ظروفي وحلمي مش مناسبين مع حبي ليكي….
رضوي بدموع
فأنت بقي قررت تتنازل عن حبك ليا عشان حلمك مش كده، بس انا هبقي احسن منك وهستناك بس انت هترجع صح..
ليلي بحده
هتستنيه يعني ايه مستحيل طبعا ده هو ان شاء الله يرجع ويلاقيكي معاكي تلات اربع عيال..
رضوي ببكاء
لا لا مش هينفع تسيبني يا كمال انت وعدتني انك عمرك ما هتسيبني..
كمال بدموع
انا اسف يا رضوي بس مش هينفع اكمل معاكي ولا انتي حتي ينفع تستنيني…
_ قال كلامه وسابها ومشي وفضلت علياء تحاول تخليها تهدي هي ومامتها، بس ما حصلش وفضلت رضوي لحد النهارده بتعاني في غيابه ومش قادره تحب راجل غيره ولا حاي تنساه برغم اهماله ليها ولا حتي بيسأل عليها…
_ رجعت من ذكرياتها ومسحت دموعها وقلعت السلسله اللي لابساها في رقبتها وبصت للدبلتين اللي معلقاهم فيها وخانتها دموعها ونزلت تاني وقالت بنبره مهزوزه من كتر بكائها..
رضوي
انا متاكده انك هترجع وانا مش هكون غير ليك يا كمال…
ــــــــــ #بقلم_الكاتبه_رحاب_القاضي ــــــــ
_وفي بيت يونس الصاوي وبالاخص في الطابق المخصص ليزن، كان قااعد معاه يوسف اللي قاله..
يوسف
وربنا عمك ده هيجلطني ما صدقت اخلي عائشه تشيل البلوك هوب الاقيه هو اللي بيرد عليا علي الواتس.
ضحك يزن غصب عنه وقال
والله انت وعمي فاضيين، بس انا نفسي افهم انت مدام يتحب عائشه اوي كده ليه مش بتلم نفسك ده انت تقريبا كل يوم بتسهر مع واحده غير التانيه..
يوسف
وهي عرفت حاجه لا ومش هتعرف ساذجه اووي وعمك عرف يربيها علي انها تبقي قطه مغمضن ودي اللي تنفع معايا، اقدر اعمل اللي عايزه وهي ولا دريانه بحاجه..
يزن
بس الغطله معاها بفوره لانها زي عمك واشد كمان…
يوسف
عيب عليك ده انا يوسف الصاوي، المهم هكت انا بقي ولو ابوك سألك انا اتكلمت معاك عشان تهدي وكده قوله ايوه..
يزن بضيق
امشي يا يوسف ربنا يبتليك باللي يعلمك الادب قادر يا كريم..
_ ابتسم يوسف بهدوء وسابه ونزل تحت وقبل ما يطلع شهد ندهتله وقالت..
شهد
استني هنا يا يوسف..
يوسف
يا نعم يا ست ماما..
شهد
رايح فين الساعه بقيت 7 المغرب وخلاص معاد العشا قرب استني عشان تفطر معانا..
يوسف
لا مش جعان ولازم امشي عشان لو جوزك شافني مش هيخليني اطلع..
شهد
طيب وغلاوتي عندك ما تتأخرش..
يوسف
ساعه كده وهاجي يلا بااي..
طلع يوسف وهي قالت بغيظ
قال ساعه قال، انا عارفه هترجعلي وش الفجر يا يوسف وهيتنكد عليا وعليك من ابوك..
_ وشافت يزن نازل من فوق وهو لابس بدله رسميه بشكل بسيط غير مبالغ فيه، وقالها..
يزن
بابا فين؟..
شهد
جوه في مكتبه انتو خارجين ولا ايه؟..
يزن
ايوه قالي هنروح مشوار مهم..
_طلع في الوقت ده يونس من مكتبه ومعاه يارا وزعق فيها وقال بحده..
يونس
خلاص بقي يا يارا قولت ما فيش رحلات هتروحيها لوحدك..
يارا بدموه
يا بابي هيكونو معايا صحابي وماما موافقه..
بص يونس بحده لشهد اللي قالت بسرعه
لا والله انا قولتلها موافقه لو انت موافق يا حبيبي..
يزن
يا بابا ما فيهاش حاجه دي رحله تبع المدرسه وكلها مدرسين وصحابها..
يونس بحده
وانا قولت لا وما عنديش بنات تبات بره البيت والموضوع ده يتقفل، وكمان شويه كده نبقي نطلع كلنا البلد اللي عايزاها نغير جو انما تسافري لوحدك لا والف لا..
يارا بغيظ
ماشي با بابي، يارب جيت ليه بنت بس ما انا لو كنت ولد.كتن زماني بسافر لوحدي عادي..
يزن
حرام تقولي كده علي فكره وبابا معاه حق مش هينفع تباتي بره البيت..
يارا بحده
خلاص عرفنا ده ليها الحق سدره تطفش منكم يا عيله نكد…
_وسابتهم وطلعت من اوضتها ويونس قال لشهد
روحي صالحيها يا شهد وفهميها كلامي كويس..
شهد
طيب انتو رايحين فين؟….
يونس
مشوار تبع الشغل يا شهد، يلا يا يزن..
_ طلع يزن مع يونس واول ما ركب العربيه مع باباه وقاله بجمود…
يزن
خير يا بابا هنروح فين؟..
يونس بجمود
هجوزهالك..
يزن بقلق
هي مين؟..
يونس
سدره البت دي مالهاش غير كده..
يزن بضيق
ولو ما وافقتش..
يونس بحده
ياد انت طالع خرع كده لمين، مدام وقفت قدام عمك يوسف وقولت انك لسه عايزها يبقي تصلح العك اللي حصل امبارح اتجوزها وبعد كده ربيها وماشيها علي عجين ما تلخبطوش، انما تخليها تتحكم فيك وانت زي اللعبه في ايدها ده ما يحصلش مع ابن يونس الصاوي واسترجل كده…
اتنهد يزن بضيق ويونس قاله بجمود
انا اتفقت مع يوسف برضاها او غصب عنها هنلم الموضوع ده بينا ونعرف الناس انكم اتجوزتو، انت بقي قلبك رهيف ومش هتهون عليك يبقي نقفل الموضوع ده والبت دي سيرتها ما تجيش علي لسانك تاني فاهم ولا لا؟..
يزن بضيق
ماشي يا بابا هتجوزها…
_ ابتسم يونس بأنتصار وشاور للسواق عشان يتحرك بيهم ووراهم عربية الحرس الخاصه بيونس الصاوي..
ــــــــــ #بقلم_الكاتبه_رحاب_القاضي ــــــــ
_وفي بيت يوسف كانت سدره قاعده مع سمر صاحبتها في اوضتها…
سمر
وبعدين يعني انتي دلوقتي يا بنتي زعلانه ليه مدام مش بتحبي يزن؟..
سدره
ومين قالك اني زعلانه عليه، انا كويسه…
سمر
شكلك ما يقولش كده، المهم انتي هترجعي الجامعه امتي بقي؟..
سدره
من بكره بس اما اشوف هيرضو يخلوني اطلع ولا لا..
سمر
انا برضو مش فاهمه انتي ليه عملتي كده، ده يزن كان اكتر واحد بيتمنالك الرضا ترضي..
سدره بدموع
مش بحبه ولا عايزه اتجوزو ولا هقدر اعيش معاه هو واهله وابقي واحده من بيت الصاوي..
سمر
وانتي بقي جايه تقولي كده دلوقتي…
_ قبل ما ترد عليها الباب خبط وقالت سدره للي بيخبط يدخل وكان يوسف اللي قال لسمر بأبتسامه بسيطه..
يوسف
معلش يا سمر اقعدي مع طنط بره شويه لحد ما اتكلم مع سدره..
سمر
حاضر يا عمو، بعد اذنكم..
طلعت سمر ويوسف قعد سدره وقالها
يزن وعمك يونس جايين ومعاهم المأذون…
سدره بقلق
ليه جايين ليه؟.
يوسف
عشان هتتجوزي يزن..
سدره بحده
مستحيل انتو ازاي تقررو حاجه زي دي من غير ما انا ابقي موافقه..
يوسف
لا ما هما العيال ياخدو الاوامر بس وينفذوها وانتي تقولي حاضر وبس عشان نقدر نلم الفضيحه اللي حصلت بسببك دي..
قامت سدره من جنبيه وقالت بحده
وانا قولتلك مش هتجوزو…
يوسف بعصبيه
لا هتتجوزيه وغصب عنك كمان انتي بعد كده تنفذي الكلام اللي اقول عليه وبس والا والله ادفنك عايشه واخلص منك ومن همك..
اتملت عيونها دموع وسكتت وهي خايفه منه، وهو قال بجديه..
هما زمانهم علي وصول اجهزي بسرعه ولو يزن قالك تروحي معاه بيتك الجديد تقولي حاضر وبس…
_قال كلامه وطلع وهي قعدت علي السرير وفضلت تعيط، ودخلت عندهت سمر وقالت بقلق..
سمر
يا بنتي في ايه، عملك ايه يزن عشان تبقي رافضه الجواز منه كده طنط بطه قالتلي انه جاي وهتتجوزو دلوقتي وانا هصوركم كام صوره كده حامدين ننزلهم ونعرف الناس انكم اتجوزتو….
مسحت سدره دموعهت وقالت بغضب
انا ما حدش هيمشي كلامه عليا…
سمر
يعني ايه؟..
سدره بخبث
هتشوفي..
_تفتكرو سدره هتعمل ايه؟؟..
ــــــــــ #بقلم_الكاتبه_رحاب_القاضي ــــــــ
_ وفي المكان اللي سهران فيه يوسف الصاوي، كان قاعد في مكان لوحده ومعاه واحد صاحبه اللي قاله بهدوء…
هشام
طيب وانت ناوي تعمل ايه هتسمع كلام ابوك؟..
يوسف بخبث
انا مش بتاع شغل ونام بدري واصحي بدري، والبنت دي ان ما خليتها تمشي من الشغل بفضيحه ما ابقاش انا..
هشام
ازاي يعني؟..
يوسف
فكك مني وكلم امير شوفه فين خليه يجي..
هشام
امير مع البنت اللي اتعرف عليها في الجامعه ولو حصل ايه مش هيسيبها ويجي..
_ ما ردش عليه يوسف وطلع سجاره وولعها وهو بيبص لموبيله بخبث وخصوصاً لما لقي حساب رضوي علي الانستجرام… وبقي يقلب في صورها واللي كان اغلبها مع صحابها وعيلتها وعملها متابعه وقفل الفون وقال لهشام..
يوسف
كلمت امير ولا لسه؟..
هشام
كلمته وقال جاي، قولي هو انت هتتجوز امتي؟..
يوسف بسخريه
لما عمي يتأكد اني بقيت شيخ زيه هيجوزهالي…
_ وضحكو هما الاتنين، وفي الوقت ده في بيت الاستاذ حسن كانت رضوي وريناد قاعدين في البلكونه…
رضوي وهي ماسكه موبيلها
اهو بدأنا..
ريناد
في ايه؟..
رضوي
الولد اللي اتخانقت معاه في الشغل النهارده عملي متابعه علي الانستجرام..
ريناد بخبث
اممم حلوه البدايه دي تتخانقو الصبح يعملك متابعه بالليل وهيبقي المدير بتاعك في الشغل..
رضوي بحده
مسحتيل طبعا ده فاشل ولسه اصلا ما اتخرجش من هندسه لحد دلوقتي وانا اشطر منه فمستحيل اخليه يعمل مدير عليا، لو بابا او اخوه اشطا دول ناس محترمين انما البني ادم ده مستحيل اسيبه يتنطط عليا..
ريناد
طيب اهدي ما قولتش حاجه لكل ده..
_ قبل ما ترد عليها رضوي اخدت بالها من روان اختها اللي نزلت من عربية واحد بعيد شويه عن بيتهم، فقامت وقفت بسرعه وقالت بغضب..
رضوي
يا نهارك اسود ومنيل بستين نيله يا روان..
ريناد بقلق
في ايه مالها روان؟..
رضوي
تعالي شوفي واعرفي بنفسك مالها روان..
وقفت ريناد جنبيها وقالت بصدمه
يخربيتها ده لو بابا او طارق فو المنظر ده هتبقي ليلتها سودا..
رضوي بحده
لا ما هي هتبقي سودا فعلاً…
_وبعد شويه دخلت روان وهي مبسوطه جداً وقالت لاخواتها….
روان
مالكم بتبصولي كده ليه؟..
رضوي بحده
مين ده اللي كان بيوصلك يا روان؟..
روان بقلق
دي واحده صحبتي كك كان مروحه وقالت توصلني..
رضوي بحده
انتي كدابه ده كان ولد انا شوفته واختك كمان شافته..
روان بتوتر
ماشي يعني عايزين ايه؟..
ريناد
هو ايه اللي عايزين ايه، يا بنتي اللي بتعمليه ده غلط لو حد شافك وانتي نازله من عربيته يقول علينا ايه، ولا من امتي احنا حد فينا بيعمل التصرفات دي..
روان ببرود.
انا ما بعملش حاجه غلط وما حدش ليه دعوه بيا..
رضوي
تمام ابقي قولي الكلام ده لبابا وماما بقي لما اقولهم علي اللي شوفته..
روان بخوف
خلاص والله مش هتتكرر تاني، وبعدين ده اخو صحبتي صمم يوصلني وبس ومش هتتكرر تاني بس بلاش بابا وماما يعرفو حاجه..
ريناد
خلاص يا رضوي بلاش تقولي حاجه بس لو اتكررت تاني قوليلهم..
رضوي
انا رايحه انام عشان عندي شغل الصبح..
روان
هو انتي مش هتيجي معانا البلد بكره ولا ايه؟..
رضوي
لا انا وطارق هنيجي وراكم عشان عندي حاجه مهمه بكره…
_ وسابتهم وراحت نامت، وفتحت موبيلها ولقيت رساله من يوسف علي الانستجرام بيقولها فيها..
يوسف
هتيجي بكره ولا خايفه؟..
_ اتنهدت بضيق وما ردتش عليه وقفلت الفون ونامت علي طول..
ــــــــــ #بقلم_الكاتبه_رحاب_القاضي ــــــــــ
_ وفي مكان تاني في الصعيد، في بيت راقي جداً ويعتبر احلي واكبر بيت في البلد كلها، كان قاعد عبدالله القاضي الشاب اللي عنده 33 سنه وملامحه جامده وبرغم وسامته الكبيره الا انه وليه هيبه تبينه اكبر من عمره، وكان قاعد جنبيه كبار البلد وقال بعصبيه وصوت عالي..
عبدالله
انا ما حدش يعلي صوته عليا ولا قدامي يا حج خلف..
خلف بحده
ما هو من اللي بتعمله من امتي الصغيرين بيترشحو للمجلس والكبار يقعدو يتفرجو عليهم..
عبدالله بجمود
والله المجلس ما قالش ان انا ما ينفعش اترشح وانا شايف اني احق بالعضويه من اي حد في البلد ولا ايه يا رجاله..
رد عليه شاب في نفس عمره وقال
معاك حق يا عبدالله وانت عامل للبلد خير كتير كفايه المصانع اللي خلت الشباب ما تتغربش وتسيب اهلها والفلوس اللي بتتوزع للفقرا كل شهر..
خلف بحده
اخص عليك يا عمر هتقف في وش خالك عشان ولد عمك..
عمر
انا واقف مع الحق يا خالي، عبدالله اترشح لما الناس واهل البلد طلبو منه كده، عبدالله هو المتاسب دلوقتي للمنصب ده..
خلف وقال بغضب لعبدالله
ماشي يا ولد القاضي اعتبر انك من النهارده انك كسبت عداوتي وانا كمان هترشح والشاطر اللي يكسب…
رد عليه بهدوء وقال
تمام ودي اخر مره تقعد معانا في الجمعه دي واللي مش عاجبه كلامي يتفضل معاه..
_الكل سكت وما اعترضش وخلف مشي وهو متعضب جدا، وبعد كده الكل مشي ما فضلش غير عمر معاه اللي قاله..
عمر
حقك عليا يا ولد عمي من اللي عملو خالي بس هو صعبان عليه ان حد. هياخد منه العضويه..
عبدالله
وانا مش هفضل واقف محلك سر كده عشان خالك يفضل واخد العضويه اسم بس ومشاكل البلد ما بيتدخلش فيها ما بيدفعش ربع جنيه في اي حاجه..
عمر
معاك حق المهم انا هروح دلوقتي ونتقابلو بكره…
عبدالله
طيب ابقي روح بدري وحل مكاني عشان خوالي جايين من القاهره وهبقي مشغول وياهم شويه..
عمر
عينيا يا كبير يلا فوتك بعافيه..
_ مشي عمر ودخل عبدالله البيت ولقي علياء امه قااعده مستنيااه..
عبدالله
ايه اللي مصحيكي لحد دلوقتي يا امي؟..
علياء
مستنيااك اطمن عليك وهخلي الشغاله تجهزاك الاكل دلوقتي..
عبدالله
ما انا هخليها تجهزلي ليه تاعبه نفسك انتي بس؟..
علياء
لما تبقي تتجوز وتيجي مراتك تعيش معانا هنا هخليها هي اللي تشيل مسؤليتك ومش هستناك تاني..
ضحك بهدوء وقال
قولي كده بقي، اممم عايزه ايه يا امي؟..
علياء بحماس
خالك جاي بكره هتتكلم معاه في موضوع روان مش كده؟..
عبدالله
ما انتي لما كلمتيه يا امي قالك انه مش هيجوز روان قبل رضوي..
علياء بضيق
ورضوي مش راضيه تتجوز وموقفه حياتها علي اخوك اللي ما ناويش علي رجوع، وبعدين كلامي انا معاه غير لما انت تتكلم معاه..
عبدالله
والمطلوب؟…
علياء
تكلم انت خالك وتقوله انك عايز تتجوز روان وتاخد منه رد واضح يا ايوه يا لا، ولو قال لا خلاص اشوفلك اسرار بنت عمك واهو عمر اخوها زي اخوك بالظبط وهي زي اخوها ونفس طيبته..
عبدالله بضيق
يا امي بنت عمي علي عيني وعلي راسي، بس انتي قولتي روان في الاول وانا وافقت ومش عايز غير روان واطمني انا هتكلم مع خالي واللي فيه الخير يقدمه ربنا..
علياء
خدني الكلام معاك، هقوم اخلي البت تجهزلك الاكل..
قام عبدالله وقال
لا مالوش لزوم شبعت يا امي تصبحي علي خير…
قال كلامه وطلع اوضته وهي قالت
وانت من اهل الخير يا ولدي وربنا يريح بالك وقلبك..
_ تفتكرو بقي ايه اللي هيحصل؟
ـــــــــــــــــــــــــــــــــــــــ