رواية موضوع عائلي (الشيخ والبلطجي) الفصل الثالث عشر 13 بقلم رحاب القاضي

رواية موضوع عائلي (الشيخ والبلطجي) الفصل الثالث عشر 13 بقلم رحاب القاضي

رواية موضوع عائلي (الشيخ والبلطجي) الجزء الثالث عشر

رواية موضوع عائلي (الشيخ والبلطجي) البارت الثالث عشر

رواية موضوع عائلي (الشيخ والبلطجي) الحلقة الثالثة عشر

#موضوع_عائلي
_الحلقه الثالثه عشر
ـــــــ ـــــــ ـــــــ ـــــــ ـــــــ
_ في بيت الشيخ محمد كانت قاعده شهد مع هاجر في اوضتها وقالتلها..
شهد
ويا بت يا هاجر الكل اول ما نزلت بيشاور عليا وخطيبته اهي واحلي من القديمه، مين القديمه دي بقي انا ما اعرفش حاجه..
هاجر
ابقي اسأل محمد عن الموضوع ده واقولك…
شهد وهي مبتسمه
بس تعرفي احساس حلو كده اني خطيبته وكلام الناس عنه تحسيه حد. تقيل كده وبيتعمله حساب برغم.اني خايفه منه ومن اللي ممكن يعمله لما يعرف الحقيقه..
هاجر بسخريه
دخلي القلوب اللي طلعت من عينيكي دي يا شهد وفوقي ده يونس الصايع عاجبك فيه ايه ده بلطجي..
شهد بحده
لمي نفسك و ما تقوليش عليه كده..
هاجر
يا غبيه ده انا قولتلك علي اللي عملو فيا في الشارع غير انه قبل كده كان رد. سجون وشراني ومالوش كبير..
شهد بضيق
كأنك بتحكي عن حد. تاتي غير يونس اللي اعرفه…
هاجر
يارب صبرني اموت واعرف عاجبك في ايه ابراهيم الابيض ده…
شهد ضحكت وقالت
والله مش عارفه، يمكن لو ما كنتش في ظروفي دي كنت هكون اسعد واحده دلوقتي بالخطوبه دي…
هاجر
انتي يا بنتي اتقدملك دكتور قبل وناس متعلمه ونضيفه ما شوفتكيش بتتكلمي عن حد منهم كده..
شهد اتنهدت وقالت
مش عارفه اهو القبول جه لده، ما اعرفش ليه بس مبسوطه بيه رغم اني عارفه ان اخر الموضوع ده سواد علي دماغي ومش بس خايفه ده انا مرعوبه..
هاجر بحزن
يعني هو ده لو كان حد بيفهم كنت قولتلك قوليلو الحقيقه من دلوقتي انما ده همجي وقليل الادب ومش متربي اصلا..
ضربتها شهد بالمخده وقالت
اتلمييي بقي يا هاجر، وبعدين ده اخو جوزك يعني المفروض تحترميه..
هاجر بسخريه
مش عايزه اقولك يا حبيبتي ان علاقتهم هما الاتنين خطيبك وجوزي عامله زي البنزين والنار..
شهد قامت وقالت
ربنا يصلح الحال انا خلاص قررت امشي في الموضوع وزي ما تيجي بقي وربنا يسترها..
هاجر
طيب انتي قايمه رايحه فين خليكي قاعده معايا شويه..
شهد
لا معلش عايزه اروح عشان متأخرش وزهره تزعل مني..
قامت هاجر وقالت
طيب وانا هجيلك يوم كتب الكتاب اصلا وسلميلي علي زهره..
_ وطلعو هما الاتنين وكانت قاعده هناء اللي بصت لشهد وقالت…
هناء
منورانا يا عسل والله…
شهد
ده نور حضرتك يا طنط شكراً…
هناء
قوليلي يا عسل انتي مخطوبه، يمكن الواد مازن لما يتجوز يتلم..
هاجر
اهدي يا طنط دي تبقي شهد خطيبة يونس اخو مازن كنا جيران انا وهي وصحاب من زمان..
هناء ابتسمت وقالت
مش تقولي من بدري يا اوزعه انتي…
وقامت وحضنت شهد وقالت
منوره بيتك يا مرات ابني، يونس زيه زي محمد ومازن عندي هو ااه طايش شويه بس قلبه طيب وعروسته زي القمر..
ابتسمت شهد وقالت
شكراً لحضرتك يا طنط. ده من ذوقك والله…
_ قبل ما ترد عليها هناء سمعو صوت دوشه بره وراحو وقفو في البلكونه لقيو يونس وقف بره عربيته ومحمد ومازن قصاده..
هناء بضيق
مش ده اللي كنت بقولك عليه طيب لا ده همجي ومشافش تربيه..
وقف محمد قدام يونس وقال
جاي عايز ايه يا يونس؟..
يونس بص لمازن وقال
انا يا حبيبي لو عايز اولع في المحل بتاعك او فيك انت شخصيا هعملها في وشك مش هاجي في ضهرك واعمل كده عشان خايف منك ولا من اللي يتشددلك…
وقف محمد قدام مازن وقاله
امشي يا يونس من هنا وسيبنا في حالنا…
يونس بجمود
انا كنت في حالي وانتو اللي جريتو شكلي، بس انا عملت باصلي وجيبتلك اللي حرق المحل بتاعك يا شيخ محمد…
_ وراح فتح العربيه وسحب عادل من قفاه اللي كان وشه كله كدمات ورماه علي الارض قدام محمد. ومازن، جه عادل يقف بس يونس زقه برجله وقال..
يونس بحده
علي الارض ياااه…
_وفوق كانت شهد وهاجر مصدومين من اللي بيحصل ده، وهاجر قالت بدموع..
هاجر
عادل اللي عملها يا نهار اسود…
يونس بجمود
اهو عندك يا شيخ محمد وكمان شويه هيتقبض عليه…
مازن بسخريه
مين ده اصلا ما يمكن واحد من الكلاب بتوعك وانت ملبسه الليله..
يونس بسخريه
وهعمل كده ليه هخاف منك يا طري انت مثلا؟…
جه يونس يمشي بس هناء قالت
واد يا يونس اطلع عايزااك….
_بص يونس لفوق بضيق وادايق اكتر لما شااف شهد واقفه جنب هاجر، وقفل باب عربيته وطلع البيت وراح وراه مازن…
بص محمد لعادل اللي وقف وقاله
واقف ليه امشي..
استغرب عادل منه ومحمد قال
ما تسمع يا ابني الكلام وامشي انا حقي هاخده بالقانون مش بالطريقه بتاعتكم دي..
_ خلص كلامه ودخل المحل بتاعه وهو مدايق وكانو العمال بيظبطو فيه،وفوق وصل يونس قدام شقة هناء وخبط علي الباب وكان مازن ورااه..
فتحت هناء الباب وقالت
يا اهلا وسهلا نورت اتفضل..
يونس بجمود
اندهي شهد من جوه…
بصت هناء لمازن وقالت
انزل عند اخوك تحت..
مازن
يا ماما اا…
هناء بحده
ما تتزفت تسمع الكلام وانزل يلااا…
نزل مازن وهناء قالت
عملت ايه في اللي قولتلك عليه، انا قولتلك انت وما قولتش لابوك عشان ما يصتادش في المايه العكره وياخده مني او يلف دماغه ويكرهه فيا..
يونس
اطمني وسيبي موضوع ابنك ده انا هعرف احله، اندهي شهد من جوه بس..
هناء بحده
جرا ايه ما تسيبها قاعده مع مرات اخوك، محسسني انها عند. اغراب..
بصلها يونس بسخريه وقال
انتو فعلا بالنسبالي اغراااب…
_ وعلي صوته ونده علي شهد اللي جات واخدها ونزل، وقالها وهو واقف قدام عربيته..
يونس
ما تركبي..
شهد بتوتر
اا لا انا هروح لوحدي..
يونس بغضب
قولت اركبي يا شهد يلااا..
_ ركبت شهد العربيه معاه ومشيو، ووقف بعد شويه بعيد عن بيتها شويه وقال..
يونس
ما تروحيش هناك تاني..
شهد
انا كنت عند هاجر صحبتي..
يونس
وانا قولت ما تروحيش هناك تاني…
شهد
والله انا لسه ما بقتش في بيتك عشان تحكم عليا..
يونس بحده
لا حلوه انتي خلاص بقيتي تخصيني. واللي اقوله يتسمع من مره واحده بدل ما اخليه يتسمع من ناحية اخوكي..
شهد بضيق
واضح انك بجد غير ما كنت فاكره…
_ قالت كلامها ونزلت من العربيه ورزعت الباب وراها ومشيت، ويونس رجع تاني البيت بتاعه ولقي حامد قاعد مستنيه..
يونس
خير ان شاء الله يا حج ايه اللي مصحيك…
وقف حامد قدامه وقال
راجل يا يونس عرفت تجيب حق اخواتك…
يونس
انا جيبت حق نفسي مش حق حد، وهما مش اخواتي يا حج حامد…
حامد بضيق
حج حامد؟! انت لا معتبرهم اخواتك ولا عمرك اعتبرتني ابوك…
يونس بجمود
تصبح علي خير يا حج…
_ سابه يونس ودخل اوضته وقف الباب، وقلع الكوتشي بتاعه وراح نام علي السرير ولاول مره جات في باله شهد مش نور وافتكر اخر حاجه قالتهاله قبل ما تنزل من العربيه ” واضح بجد انك غير ما كنت فاكره “..
ابتسم وقال
يا تارا كنتي فاكراني ايه يا شهد…
ـــــــ #بقلم_الكاتبه_رحاب_القاضي ـــــــ
_ عدي اسبوع في التاني واتكتب كتاب يونس وشهد ومن وقتها ما اتقابلوش تاني، ورجعت ولاء الجامعه وكانت قاعده لوحدها وفجأه جه مازن وقعد قصادها وقال….
مازن
وحشتيني…
بصتله بحزن وقالت
قوم من هنا والا والله ما هقدر اتحكم في نفسي وفتحلك دماغك..
مازن
انا اسف والله العظيم ما كنت اقصد امد ايدي عليكي وبعدين انتي ردتيها علي طول وعورتيني..
ولاء بضيق
انت اللي عملت الاول يا مازن، اصلا ليه عملت كده هو انا لو بيني وبين علي حاجه كنت هخبي عليك ليه..
مازن سكت شويه وقال
غيرت عليكي..
ولاء
نعم؟؟..
مازن بهدوء
ايوه غيرت عليكي ما اتحملتش انه بيبصلك وانتي جنبي او يجي يسلم عليكي…
ولاء بتوتر
و وانت ايه اللي يخليك تغير عليا…
مازن بخبث
تفتكري ايه اللي يخلي واحد يغير علي واحده…
ولاء وقفت وقالت
مش عارفه ومش عايزه اعرف..
وقف مازن هو. كمان وقال
لا لازم تعرفي انا بحبك يا ولاء ومستعد اعمل اي حاجه بس ما تبعديش عني كده تاني..
ولاء ابتسمت وقالت
انت بتحيني بجد؟..
مازن مسك ايدها وقال
ايوه والله العظيم بحبك، ومش متخيل حياتي من غيرك..
ولاء بهدوء
انا رايحه المحاضره وبعدين انا كنت بتعامل معاك علي انك صديقي انما لو في حاجه غير كده عندك بيت اهلي..
مازن بقلق
ما هو بصي في حاجه كده انا لازم اقولك عليها..
ولاء بحده
بتتسلي انا فاهمه كويس، وبعدين انت ايه اللي يخليك اصلا تتجوز واحده زيي..
مازن ابتسم وقال
وانا اطول اتجوز واحده بالحلاوه والبراءه دي، ولاء انا هكلم اهلي واتفق معاهم ووقتها هقولك علي مفجأه كبيره وهخطبك وكل اللي انتي عايزاه بس نتكلم..
ولاء فرحت وقالت
انا رايحه المحاضره باااي…
_مشيت ولاء وكانت مبسوطه جداً وهي وماشيه خبطت في بنت وهي ماشيه بسرعه..
ولاء
معلش انا اسفه بس كنت متأخره علي المحاضره..
البنت
وانا كمان متأخره والله الدكتور الشربيني صعب جدا..
ولاء
اي ده انا كنان عندي محاضرة الدكتور الشربيني..
البنت
بجد. طيب ما تيجي نروح سوا مع بعض انا ما اعرفش حد هنا…
ولاء بتوتر
ماشي يلا بينا..
البنت
طيب انتي اسمك ايه انا اسمي نسرين..
ولاء
وانا اسمي ولاء…
_وراحو مع بعض المحاضره وكانت نسرين بتتكلم معاها بهدوء وخلت ولاء مبسوطه بالكلام معاها….
ـــــــ #بقلم_الكاتبه_رحاب_القاضي ـــــــ
_ في بيت حامد الصاوي..
_كان يونس قاعد في اوضته وبيتفرج علي صور خطوبة نور واحمد وشكلها الجديد وكأنها بقيت حد تاني، ودخلت عنده بطه وقالت..
بطه
يويو كنت عايزه اااه…
_طلعت بسرعه بعد. ما حدفها بالشبشب وخبطت علي الباب وهو قالها تدخل..
بطه
بنسي يا يونس والله اخبط المهم عايزه فلوس وامي مش راضيه تديني..
يونس
انتي لابسه كده الاول ورايحه فين؟..
بطه
رايحه لشهد مل عندهاش صحاب تقريباً فقولت اخد البت علا ونروح معاها الكوافير..
يونس بحمود
طيب عندك المحفظه اهي خدي اللي عايزااه..
بطه قعدت جنبيه وقالت
ما تزعلش يا يونس بس والله العظيم نور ما تستاهلك انت عارف انا عمري ما كنت بحبها كانت علي طول شايفه نفسها عليا انا شهد حساها زينا كده ومتواضعه…
اتنهد يونس بضيق وقال
قومي يا بطه خدي الفلوس اللي عايزاها وانزلي..
بطه بغيظ
نفسي مره واحده تاخد وتدي معايا في الكلام..
يونس
خدي انتي بعضك وامشي يا بطه انا مش ناقص زن…
بطه
قااايمه اهوو علي العموم برضو يوسف جابلك البدله وحطهالك في شقتك فوق..
يونس بخبث
وانتي عرفتي منين؟…
بطه بتوتر
ااا هه هو قالي اقولك لما انت ما ىدتش عليه فف فرن عليا…
يونس وقف وقال
انا صاحي ما نمتش اصلا ويوسف ما رنش عليا…
بطه بخوف
بص انا والله ماليش دعوه هو اللي بعتلي علي الوتس وانا رديت عليه..
يونس بحده
اعمليله حظر يلااا…
بطه بضيق
ليه تقطيع الارزاق ده؟..
يونس مسكها من قفاها
اخلصي يا زفته انتي يلااااا…
_ طلعت بطه موبيلها وعملت حظر ليوسف، ومسك منها يونس الموبيل وقال..
يونس
اما نشوف البيه كان بعتلك ايه؟..
بطه بضيق
يا يونس عيب كده علي فكره دي خصوصيات…
يونس بسخريه
بيقولك ادام الله حمدك وباعت قلب احمر وحياة امه ماشي..
بطه بغيظ
الله يخربيت محو الاميه اللي علموك القرايه والكتابه انت…
_ خلصت كلامها ويونس ضربها بالقلم علي قغاها وهي قالتله وهي بتعيط..
بطه ببكاء
طيب والله لاقول لعمي حامد بس…
_ واخدت موبيلها وطلعت من عنده، ويونس اخد حاجته وطلع شقته فوق وكانت مفروشه بجهاز شهد وكانت حاجات فعلا حلوه، ابتسم بهدوء وقال لنفسه…
يونس
شهد… ده انتي حكايه لوحدك..
ـــــــ #بقلم_الكاتبه_رحاب_القاضي ـــــــ
وفي حارة الساهر ……
كانت شهد قاعدة مدايقه ودخلت عندها زهره وقالت وهي بتقعد جنبيها ..
زهره
وبعدين بقي فكيها شويه يا بنتي ده انتي عروسه والليله دخلتك…
شهد بدموع
وايه المطلوب مني بقي مش عملتو اللي في دماغكم واديني اهو هتجوز
زهره
هو احنا يا بنتي هنرميكي في النار طيب ده احنا اهو هنجوزك راجل ما فيش منه ..
شهد اتنهدت وقالت
خلاص يا زهره انتي جايه عندي ليه دلوقتي عندي
زهره
جايه اقولك حرام عليكي اللي انتي عملاه في اخوكي ده
،قومي راضيه بكلمتين انتي ما تعرفيش هو عمل ايه عشانك ..
-وقبل ما ترد عليها شهد دخل عندهم صبري وقال بجمود…
صبري
ما فيش داعي هي اللي تيجي زهره قومي انتي شوفي اللي كنتي بتعمليه وانا هتكلم معاها كلمتين
زهره
طيب يا اابو اسر بس بالله عليك امسك اعصابك شويه ده الليله فرحها
صبري بسخريه
لا ما هو باين علي وشها اللي عامل وكأن ميت ليها ميت،روحي يلا شوفي هتعملي ايه
_طلعت زهره وصبري راح قعد قصاد شهد وقالها…
صبري بجمود
هما كلمتين هقولهملك انا ما ظلمتكيش في الجوازه دي، انا هجوزك. لواحد هيحميكي وراجل الكل بيحلف بجدعنته…
شهد
انا كان من. حقي اقول موافقه او مش موافقه…
صبري بحده
لا مش من حقك يا شهد ما دام ما عندكيش سبب يبقي مش من حقك، قولي بقي عليا جاهل متخلف اللي تقوليه…
شهد بدموع
انت جاي ليه عندي يا صبري هتنصحني وتقوم بدور ابويا وامي لا كتر خيرك انا اللي اتعلمته منك يخليني اعرف اعيش كويس اووي..
صبري قام وقال بحده
ياريتك روحتي معاهم وكنت خلصت من. همك يا شيخه…
_ قال كلامه وطلع وكان نازل من الشقه، بس وقفته زهره وقالت..
زهره
انت رايح فين يا صبري ده النهارده فرح اختك الوحيده وبرضو انت نازل الشغل..
صبري بضيق
الديون كترت يا زهره ولازم ما افوتش يوم في الشغل..
زهره بضيق
ما كنت سمعت كلامي واخدت الفلوس من ي نس وكملت الجهاز…
صبري بحده
لا طبعا انا قادر اكفي اختي جهاز من غير ما احتاج من حد حاجه، وكمان عشان تبقي ديماً هناك راسها مرفوعه..
زهره ابتسمت وقالت
ربنا يخليك لينا يا حبيبي وما يحرمناش منك..
_ ابتسملها صبري ونزل، وفي اوضة شهد كانت قاعده بتعيط وزهره وقغت علي الباب وقالت..
زهره
وبعدين معاكي يا بت انتي بقي، زودتيهم يا شهد وقومي البسي يلا بنت عظيمه جايه عشان تروح معاكي الكوافير وفرحك هيتعمل في قاعه كبيره واحده غيرك كان زمان الحته كلها حست بفرحتها..
شهد مسحت دموعها وقالت
خلصتي يا زهره انتي كمان تقطيم فيا ولت لسه..
زهره بضيق
والله الكلام معاكي زي قلته يا بت انتي…
_ وطلعت من عندها زهره، وشهد قامت عشان تغير هدومها وكانت برضو بتعيط…
ـــــــ #بقلم_الكاتبه_رحاب_القاضي ـــــــ
_ في بيت الشيخ محمد….
صحيت هاجر لقيته قاعد علي الكنبه بيقرأ في المصحف، قامت وقعدت جنبيه وقالت…..
هاجر
عايزه اتكلم معاك شويه…
قفل محمد المصحف وبصلها وقال
خيراً ان شاء الله…
هاجر بضيق
هو انا عملت ايه عشان تعاملني كده كل ما تكلمك ترد عليا من تحت ضرسك، وحتي بقيت بتنام علي الكنبه مش جنبي ليه كل ده انا زعلتك في ايه؟…
محمد بجمود
لو كنت اقدر اقعد فوق بعيد عنك خالص من غير ما حد ياخد باله كنت عملت كده…
اتملت عيونها دموع وردت عليه
ياااه هو للدرجه دي انا تقيله عليك؟…
محمد بجمود
انا ما قولتش كده كل الحكايه اني حاسس اني اتسرعت في الجوازه دي اووي..
قامت هاجر وقالت بدموع
لا وعلي ايه تكتم جواك وتتحمل احنا فيها اهو كل واحد يروح لحاله احسن…
قام محمد ومسك ايدها وقال
انتي رايحه فين، وايه اللي بتقوليه ده؟…
سحبت ايدها منه وقالت
برد علي كلامك، وهسيبهالك وامشي عشان تاخد راحتك…
محمد اتنهد بضيق وقال
لا مش هتمشي انا اصلا مختصرك ومش بوجهلك كلام خلاص…
هاجر دموعها نزلت المره دي وقالت
وانا مش هقعد في مكان مش مقبوله فيه…
محمد بحده
اقسم بالله يا هاجر لو طلعتي من البيت بعد ما انا قولتلك لا هيبقي فيها كلام تاني وما فيش شغل اليومين دول برضو..
مسحت دموعها وقالت
بس انا عايزه اروح لشهد..
محمد بضيق
لا ولا نسيتي اللي عملو يونس..
هاجر بحده.
انا مالي بيه زفت الطين ده، انا رايحه لصحبتي..
محمد زعق فيها وقال
ما بحبش اكرر كلامي مرتين ومش كل حاجه هتعاندي فيها…
هاجر بحزن
ماشي…
_ سابته وراحت قعدت علي السرير ومسكت موبيلها وعملت نفسها مشغوله فيه. عشان تداري دموعها…
محمد
ابن. عمك خرج. بكفاله واللي دفعها ابوكي…
هاجر بهدوء
عارفه ماما قالتلي…
محمد بجمود
وابوكي يدفعله ليه الكفاله بالمبلغ ده كله؟…
هاجر بضيق
عشان عادل يبقي ابن اخوه وكمان ااا..
محمد بعصبيه
ايوووه ابن اخوه انا حياتي تدمر وابوكي يخرجه وما علينا ما هو ابن اخوه وكمان شويه ترجع. المايه لمجريها وتقوليلي ايه ما هو ابن عمي…
هاجر بهدوء
لا اطمن هي مش هترجع لمجاريها خالص ولو رجعت مع اهلي انا بيني وبين الشخص ده مليون سد، وابويا عمل كده عشان هو غصب عني وعنه ابن عمي ومش عايز تحصل مشاكل لبنته…
قبل ما يرد عليها قالت هناء وهي بره
بت يا سرنجه بما انك مش رايحه الشغل النهارده تعالي اعملي الغدا انا جهزت الفطار ولا كل حاجه هتكون علي دماغي…
هاجر بصوت عالي
جايه يا عملي الاسود جاااايه..
_ وطلعت هدوم ليها ودخلت الحمام بعد ما رزعت الباب وراها…
ـــــــ #بقلم_الكاتبه_رحاب_القاضي ـــــــ
_ وبالليل في مركز التجميل…
كان واقف يونس من بره وجنبيه يوسف اللي قرب منه وقال…
يوسف
مالك يا عم انت كمان قالب خلقتك ليه عليا كده..
يونس بجمود
يعدي بس الفرح علي خير ولينا كلام تاني يا صاحبي..
طلعت عظيمه وقالت
تعالي يا عريس عشان تاخد عروستك…
_ دخل يونس جوه وكانت شهد واقفه وهي باصه للارض وبرضو كعادتها مدايقه جداً بس كانت جميله جداً، قرب منها يونس وباس راسها وهي اتوترت جداً وقربت منهم بطه وقالت..
بطه
صورتكم حتت صوره جاامده والله…
زهره
طيب يلا بينا بقي هنتاخر علي الناس وصبري مش مبطل زن عليا..
_مسك يونس ايد شهد اللي كانت بتتنفض من كسوف ولا توتر كانت بخوف شديد باين جداً عليها، وقرب منها وقال بصوت واطي..
يونس
علي فكره انا لسه ما عملتش حاجه للكسوف ده كله..
شهد اتكسفت وقالت
ممكن تحترم نفسك..
غمزلها وقال
تؤ لا..
_ بصت الناحيه التانيه ووشها كله قلب احمر بأحراج، ويونس ابتسم بهدوء وطلعو، وفي الوقت ده صورتهم بطه اكتر من صوره وبعتتهم لرقم نور علي الوتساب وبعتتلها ريكورد وقالت…
بطه
اوعي يا دكتوره تنسي تقولي ليونس مبروك…
_ قفلت بطه مسجل الصوت ، وطلعت راحت وراهم وهي متجاهله يوسف جدا…
ـــــــ #بقلم_الكاتبه_رحاب_القاضي ـــــــ
_ وفي الفيلا بتاعت اهل احمد خطيب نور..
كانت نور قاعده في اوضتهة وبتسمع ريكورد بطه وهي بتتفرج هلي الصور بتاعت يونس وشهد ودموعها نزلت علي وشها وقالت..
نور
انا متاكده انك اتجوزتها بس عشان ترد اللي عملته فيك بس انا هوريك يا يونس…
_ وقامت نور وراحت لاوضة احمد وخبطت عليه وهو فتح الباب وقال..
احمد
خير يا حبيبتي في حاجه؟..
نور
احنا. هنتجوز امتي يا احمد؟..
احمد ابتسم وقال
والله انا لو عليا اتجوز دلوقتي، بس انتي عارفه ماما قالت نستني شويه عشان الناس ما تقولش حاجه..
نور بضيق
لا معلش انا مش حابه اقعد هنا معاكم من غير ما ابقي مراتك رسمي..
مسك احمد ايدها وباسها وقال
انتي اهدي يا حبيبتي وانا هكلم ماما ووالله العظيم هتجوزك وفي الوقت اللي انتي عايزااه…
_ ابتسمت نور وكانت عيونها كلها دموع وما فيش في بالها غير يونس وهو واقف جنب عروسته..
ـــــــ #بقلم_الكاتبه_رحاب_القاضي ـــــــ
_ في بيت عادل دخلت عنده في اوضه وفاء مامته وقالت وهي مدايقه..
وفاء
قوم يا خيبتها في ناس بره عايزااك…
عادل بغيظ
اطلعي بره يا ماما انا لا عايز اقابل حد ولا اشوف حد…
وفاء
لا قوم دول جايين ومصممين يقبلوك، وبعدين مش اد انك تعادي جوزها ما كنتش عملت عملتك دي من الاول..
عادل قام وقال
يووه طالع واقسم بالله جوزها ده واخوه ما هرحمهم وهتشوفي…
وفاء بسخريه
اهو انت عامل زي البطه الشرشار تكاكي تكاكي وتاكل في نفسها وما تجيبش كيلو كيلو لحمه في الاخر…
عادل بغيظ
منك لله يا وفاء انا ما فيش حاجه جيباني ورا غير تشبيهاتك دي..
_ وطلع بره لقي علي ابن عم بطه ومعاه كمال الحديدي..
عادل
اهلا وسهلا مين حضراتكم…
كمال
كمال الحديدي وده علي عبد الرحمن من منطقة الصاوي..
عادل بسخريه
هه عارفك مش انت الواد اللي يوم فرحك يونس الصاوي علم عليك…
علي بحده.
لا اسم الله عليك ده انت لسه وشك متدشمل اهو..
كمال بهدوء
بس يا علي عادل ما يقصدش…
علي
انتو جايين عايزين مني ايه؟..
كمال بهدوء
المثل بيقولك عدو عدوي حبيبي، وانا ليا حق عند يونس الصاوي وانت كمان يبقي نحط ايدنا في ايد بعض ونجيبه..
بص عادل لعلي وقال
والبيه جاي ليه مصلحته ايه في الليله دي؟..
علي بحقد
بنت عمي وورثها عنده وبيلوي دراعي بيها…
عادل بجمود
يبقي اتفقنا مصلحتنا واحده بس مش يونس بس يونس واخوه..
عادل ضحك وقال
ههههه وحياتك واخواته كلهم بس خليهم بالدور بالهداوه..
عادل
يبقي اتفقنا..
ـــــــ #بقلم_الكاتبه_رحاب_القاضي ـــــــ
_ وفي بيت الشيخ محمد…
كانت هاجر واقفه في المطبخ وبتغسل الاطباق ودخل عندها مازن وقال..
مازن
جوجو قوليلي ايه رئيك فيا؟..
هاجر
ده ايه السؤال الغريب ده؟..
مازن
لا ولا غريب ولا حاجه انا عايز اعرف رئيك فيا انتي شيفاني ازاي؟..
هاجر
بصراحه كده انت كويس وغلبان وحلو، بس طايش شويه..
مازن
عقلت والله وبطلت كل الغلط اللي بعمله..
هاجر بخبث
وطنط ريهام..
مازن بتوتر
مم مالها طنط ريهام…
هاجر
بص يا مازن انت اخويا الصغير وانا بحبك زي ما بحب ولاء اختي وبخاف عليها، نصيحه مني بلاش تحتك خااالص بالست اللي اسمها ريهام دي نيتها مش خير من ناحيتك..
مازن
علي فكره بقي انتي فاهمه غلط، انا بعتبرها زي امي ومستحيل ابصلها اصلا..
هاجر
طيب كويس المهم بقي انت بتلف وتدور عايز ليه انجز؟..
مازن
بصي انا معجب بولاء اختك علي فكره وقولت لماما وهي وافقت..
هاجر بصدمه
نعممم انت بتتكلم جد ولا بتهزر؟…..
مازن
ايوه والله العظيم انا بحب ولاء وهخطبها..
هاجر
مش ده اللي صدمني انا اللي مستغربااه ان امك ازاي وافقت باختي..
مازن
لا ما امي دي مش ساهله حلفت عليا اني لو طلعت بمواد السنه دي مش هتخليني اتجوزها..
هاجر ضحكت وقالت
ههههه ما انا قولت برضو امك مش هتعدي الموضوع كده خلاص..
مازن
طيب عشان خاطري يا هاجر اقفي جنبي..
هاجر
لاا معلش هو انا اللي شيفااه مع امك هجيب اختي كمان تشوفه..
مازن بغيظ
ماشي يا هاجر والله مش هقف تاني معاكي ضد امي..
هاجر
وانا مش هعملك اكل من اللي بتحبه وابقي كل بقي في ملوخية امك الواقعه..
مازن
يوووه عليكي ده انا بهزر،بس واغلي حاجه عندك فكري في الموضوع….
هاجر بضيق
ان شاء الله…
_ طلع مازن وهاجر خلصت اللي بتعمله ودخلت اوصتها غيرت اخدت شاور وغيرت هدومها ونامت علي الكنبه، وجه محمد بعد شويه ولما شافها نايمه علي الكنبه ادايق وقال..
محمد
ما فيش داعي للي بتعمليه ده ممكن تيجي تنامي مكانك..
هاجر
لو سمحت انا تعبانه وعندي شغل الصبح وعايزه انام..
محمد بضيق
روحت المستشفي النهارده خليت واحده صحبتك اخدتلك اجازه…
قامت هاجر وقالت بحده
انت مين سمحلك اصلا تدخل في شغلي…
محمد بهدوء
حقي كجوزك اتدخل في اي حاجه تخصك…
_وقف محمد قدام الدولاب وبدأ يغير هدومه بكل هدوء، وهاجر كانت متعصبه منه وقالت بغضب..
هاجر
محمد انا عايزه اطلق..
ضحك محمد وقال
هههههههه والله كنت متوقع كده طبعا ما هو رجع دلوقتي والقلب حن..
هاجر ببكاء
قلبي ده يستاهل ضرب الجزم عشان كل مره بيحب ناس ما تستاهلش، وهمشي ودلوقتي هكلم بابا يجي ياخدني وخلصت يا محمد..
محمد بجمود
خلصت يا هاجر اقولك علي حاجه احلي في ستين داهيه يا غلطة عمري…
_ قال كلامه وطلع تيشرت تقيل ولبسه واخد موبيله ومفتاح الشقه اللي فوق وطلع، وهاجر فضلت تعيط وبعدين مسكت موبيلها وكلمت ابوها وقالت..
هاجر ببكاء
بابا تعالي دلوقتي حالاً لو سمحت، انا مش عايزه اقعد هنا تاني..
ـــــــ #بقلم_الكاتبه_رحاب_القاضي ـــــــ
_ وفي شقة يونس بعد ما خلص الفرح اللي الكل كان مبهور ومبسوط فيه معادا شهد. اللي كانت قاعده خايفه في اوضة نومها الجديده ومعاها زهره مرات اخوها اللي قالتلها..
زهره
مش كده يا هاجر اهدي شويه واعقلي كده انتي خلاص بقيتي مراته وهيتفل عليكم باب واحد..
شهد ببكاء
ما تسبنيش يا زهره قولي اني تعبت وهتباتي معايا اي حاجه بس ما تسبنيش هنا معاه لوحدي..
زهره بضيق
هو عفريت ده جوزك، بصي هتتعودي عليه والله وبعدبن الروب التبيض ده عليكي اهو هياكل منك حته والله هيتجنن عليكي وهتبقي الكل في الكل عنده..
شهد ببكاء
انتي مش فاهمه حاجه يا زهره…
زهره
هو ده وقت مفهوميه اصلا، اعقلي يا شهد مش عايزين فضايح وانتي فهماني…
قالت عظيمه من بره
ما يلا بقي يا ام اسر انتي هتباتي عندك ولا ايه عايزين نسيب العرسان براحتهم..
زهره
ايوه جايه اهو يا ام بطه..
وبصت لشهد وقالت
اتعدلي بقي يا بت انتي كفايه بقي دلع بنات فاضي…
_ وقامت زهره سابتها وطلعت، وكان اسر ابنها قاعد جنب يونس بيعيط..
زهره
مالك يا حبيب امك بتعيط كده ليه؟..
اسر ببكاء
عايز شهد تروح معانا…
ضحكو كلهم وعظيمه قالت
خلاص يا حبيبي ما بقاش ينفع…
زهره
هو انتي هتخليه يعيط اكتر، قوم يا اسر نروح والصبح هجيبك ليها..
_ وطلعو كلهم وقبل ما يونس يقفل الباب قالتله زهره بقلق..
زهره
بقولك ايه يا يونس البت شهد دي غلبانه والله بس هي دماغها صغيره شويه فاستحملها ومتزعلهاش..
يونس بهدوء
من غير ما تقولي يا ام اسر دي في عينيا..
زهره
تسلم عينيك، بعد اذنك…
_ وقفل يونس الباب وراهم ودخل عند شهد اللي اول ما شافته قامت وقفت وكانت بتعيط وبتحاول تقفل الروب بتاعها علي اد ما تقدر، وقفل يونس الباب وقرب منها ووقف قصادها و؟؟…
_ تفتكرو بقي هيحصل ايه؟….

يتبع…

لقراءة الفصل التالي : اضغط هنا

لقراءة الرواية كاملة اضغط على : (رواية موضوع عائلي (الشيخ والبلطجي))