رواية موضوع عائلي (الشيخ والبلطجي) الفصل العاشر 10 بقلم رحاب القاضي
رواية موضوع عائلي (الشيخ والبلطجي) الجزء العاشر
رواية موضوع عائلي (الشيخ والبلطجي) البارت العاشر
رواية موضوع عائلي (الشيخ والبلطجي) الحلقة العاشرة
#موضوع_عائلي
_الحلقه العاشره
ــــــــــــــــــــــــــــــــــــــــ
_ طلعت شهد من بيت اخوها من غير ما حد ياخد باله منها ، ووقفت تاكسي وقالتله العنوان اللي عايزه تروحله، وفعلا بعد شويه نزلها قدام المقابر بتاعت عيلتهم، ودخلت جوه وراحت لقبر ابوها وامها وقعدت علي الارض وفضلت تعيط وقالت..
شهد ببكاء
ابنكم ما صانش الامانه اللي انتو سيبتوها ليه، ما عرفش يحافظ عليا ولا يحميني، صبري كسرني وما كانش ليا اخ ولا عمره هيكون…
_ فضلت قاعده وما حستش بالوقت، وبعدين قامت عشان تمشي بس كان الوقت اتاخر اووي وما فيش اي موصلات وشافت عربيه مركونه جنب مدفن قريب من مدفن عيلتها، قربت منها بسرعه بس كانت فاضيه وسمعت صوت حد بيعيط جوه، دخلت بهدوء وقربت من اللي قاعد قدام قبر وبيعيط ووقفت وراه وقالت..
شهد بقلق
حضرتك كويس؟..
بصلها يونس بدموع وهي ابتسمت تلقائياً وقالت
انت؟!…
يونس مسح دموعه بسرعه وقال
انتي ايه اللي في وشك ده، وبتعملي ايه هنا في وقت زي ده؟..
قعدت شهد جنبيه وقالت
كنت بزور قبر اهلي، ده قبر اهلك انت كمان؟..
يونس
امي هنا،بس بوضو جايه في وقت زي ده تشوفيهم ولوحدك ليه يعني؟ …
شهد اتنهدت وقالت بدموع
لو كنت لقيت اللي يسمعني ويفهمني ما كنتش هاجي لحد ميت في قبر واتكلم معاه…
بصلها وقال بحزن
معاكي حق لو كنت لقيت اللي يسمعني ويفهمني ما كنتش جيت لحد ميت في قبر واتكلم معاه…
بصلها بهدوء وقال
تفتكري هتعدي، يعني الفتره الصعبه دي هتعدي ولا الوجع هيكمل ..
شهد بدموع
بالنسبالي لا نهايتها انا عرفاها كويس وو..
يونس بقلق
مالك سكتي ليه؟..
شهد وهي باصه قدامها بخوف قالت
في عفريت هناك..
_يونس بص للمكان اللي هي بصاله وشاف فعلا حاجه سودا واقفه بعيد وشكلها غريب جداً، واتنفض بخوف وقال..
يونس
شالله ما عن حد سمعنا ولا فهمنا يا شيخه انتي تعرفي تجري؟..
_ قامو بسرعه هما الاتنين عشان يجرو بس اول مالفو عشان يجرو شافو الحاجه السودا دي اللي شكلها مخيف قدامهم، فصرخو بصوتهم كلو وجريو بسرعه بره المدفن وكان شكلهم مضحك….
ـــــــ #بقلم_الكاتبه_رحاب_القاضي ـــــــ
_ في الوقت ده في شقة ريهام كان مازن قاعد ماسك موبيله وبيقلب في صور ولاء وهو مبتسم، وقربت منه ريهام وقالت…
ريهام
المفروض انك هتخلص جامعه السنه دي هنعمل ايه؟..
قفل مازن الموبيل وقال
عايزه ايه يا ريهام، ايه المطلوب مني؟..
ريهام قربت منه وقالت
نتجوز والشقه موجوده اهي والمشروع اللي انت عايزه اعملهولك عايز وظيفه هتصرف واخليك تتوظف في المكان اللي انت عايزه بس كل ده وانت جوزي..
مازن بجمود
هو انا فعلا هخلص جامعه وهخطب واتجوز بس مش انتي يا ريهام..
.
ريهام بعصبيه
نعممم اومال مين ان شاء الله..
مازن اتنهد وقال
بصي بصراحه انا عايز اتجوز واحده في سني او اصغر شويه، واكون انا اول حد في حياتها..
ريهام بدموع
وانا ليه جيتلي من الاول، حتت عيل زيك يضحك عليا انا…
مازن بحده
لمي نفسك يا ريهام انتي يا حلوه اللي رضيتي اجيلك واقرب منك، وبعدين اعقليها كده اقعد ازاي جنبك في الكوشه..
ريهام بغيظ
امممم انت ما كنتش كده انت بقيت كده لما ظهرت الزفته ولاء في حياتك..
مازن
بالظبط فوقت عرفت اني معاكي كده وخلاص بتسلي وبشوف نفسي، انما اللي قلبي اتحركلها بجد هي ولاء بنت خام كده ونضيفه وانا اول حد في حياتها..
وقفت ريهام وقالت بحده
امشي اطلع بره يلا، بس وحياة امك يا ابن هناء ما هخليك تتهني بيها وخليك فاكر كلامي ده كويس….
وقف مازن ولبس القميص بتاعه وقال
هاتي اخرك يا طنط ريهام….
_ قال كلامه وسابها وطلع، واول ما دخل شقتهم لقي محمد اخوه قاعد في الصاله وبيتفرج علي التلفزيون راح قعد جنبيه وقال..
مازن
يا عم روح صالحها وريح دماغك..
محمد بجمود
انت ليه ما بتحبش يونس يا مازن؟..
مازن بسخريه
واحبه ليه واحب حامد الصاوي ليه اصلا…
محمد
يمكن عشان هما ابوك واخوك وانت لازم تحبهم.
مازن
لا لا مش لازم، بص انت ممكن تفتكر حاجات ليهم وليونس ده، بس انا لا فاكرلهم حاجه ولا عايز افتكرلهم اصلا..
محمد بضيق
اخوك مكسور يونس انا اعرفه من نظرة عين، وهو وطالع من عندنا النهارده بصلي وحسيته عايز يقولي كلام كتير..
مازن
من غير كلام كتير انت صعبان عليك يا اسطا عشان مديت ايدك عليه مش كده؟..
محمد
لا هو صعبان عليا من كل حاجه، واحد زي يونس ده اتحط في حياه هو مش عايزها…
مازن
وبلاش الحنيه دي لان ابوك بيجرجر فيك عشان تروحله ووقتها هناء ممكن تروح فيها….
محمد اتنهد وقال
انا رايح اصلي القيام واسمع اياااك انت او امك حد يروح لهاجر..
مازن بجمود
علي فكره خطيبها القديم رجع شوفته داخل بيتهم وانا بوصاها وهي قالتلي انه خطيبهة القديم وانه ساكن في الشقه اللي قصادهم..
محمد بضيق
طيب يا مازن سيبوها براحتها، هصلي القيام واستني الفجر في المسجد مش جايلي نوم عايز. حاجه؟..
مازن قام وقال
شكرا يا شيخ محمد، تصبح علي خير..
ـــــــ #بقلم_الكاتبه_رحاب_القاضي ـــــــ
_ وفي عربية يونس كان بيسوق عربيته وهو ساكت، وجنبيه شهد اللي كانت لسه خايفه من اللي شافوه، وبصو لبعض مره واحده بهدوء وفضلو يضحكو..
شهد
هو المفروض ان العفريت يشوفو واحد بس، ازاي احنا الاتنين شوفنااه مع بعض..
يونس بسخريه
سبحااانه انا مش مستوعب اصلا اني شوفت حاجه زي دي، بس خلاص توبه لله ما هاجي هنا تاني..
شهد
مش لوحدك والله، ومعلش يعني تعبتك هتوصلني..
يونس
لا ولا يهمك تعبك راحه، تعرفي انك تاني حد يركب معايا العربيه…
شهد ابتسمت وقالت
بجد ومين بقي الاول مراتك ولا خطيبتك ولا اختك؟..
يونس رد عليها وقال
لا صاحبي اقرب حد لياوانتي بعده، المهم حارة الساهر مش كده؟..
شهد
ايوه المكان اللي نزلتني فيه المره اللي فاتت..
يونس ابتسم وقال
تمام اهو وصلنا لو محتاجه افتحلك الباب انا في الخدمه..
شهد بصتله بحده وقالت
لا شكرا العربيه جديده والباب بتاعها شغال خليك مكانك…
يونس بهدوء
علي فكره انا ما عرفتش اسمك. ايه لحد دلوقتي؟
شهد بهدوء
مالوش لازمه احنا وارد جدا ١٠٠ في الميه اننا ما نتقابلش تاني فا مالوش لازمه نعرف اسماء بعض كفايه انك هتفتكرني هتبتسم…
يونس بهدوء
معاكي حق ونشكر العفريت انه خلانا نشوف الغمازات دي..
شهد ضحكت وقالت
طيب يا سيدي شكراً، يلا سلام..
_ مشيت شهد، وهي مبتسمه ودخلت البيت بشويش وراحت اوضتها اتوضت وصلت الفجر اللي اذن، وبعدين فضلت تدعي وهي نايمه علي سجادة الصلاه وقالت..
شهد بدموع
انت عارف يارب انه ما كانش ذنبي ده يحصل وانه كان غصب عني انا ماليش غيرك تقف جنبي وتحميني منهم..
وافتكرت يونس وقالت
انا كان نفسي اقوله اسمي واخليه يعرفني بس هيفيد بأيه، انا مش مكتوبلي اتمني حاجه ولا حتي احب حد، انا مش عايزه اشوفه تاني خلاص…
_ وجابت مخده من علي السرير بتاعها ونامت عليها علي الارض، وفي الوقت ده نزل يونس من عربيته قدام المسجد اللي في الحاره وبص للمسجد وقال…
يونس
ياتارا مخبيلي ايه تاني، وليه بيحصلي كل ده فين الحلو اللي هاخده في الاخر هو في حلو اصلا هيكون في حياتي، شكلها هتفضل ناشفه كده علي طول..
جاله صوت محمد من جنبيه وقال
وانت اديته ايه عشان يديلك حاجه حلوه، بدل ما انت واقف تكلم ربنا بره المسجد ادخل جوه واديله حقه الاول..
بصله يونس بحده وقال
هو ينفع بلطجي زيي يدخل المسجد يا شيخ محمد، ولا انت عايزني ادخل عشان تتريق عليا وتعمل عليا شيخ..
محمد قرب منه وقال
احنا بنصلي عشان ربنا يهدينا للخير مش بنتهدي ونصلي، الصلاه هي اللي هتنور قلبك للخير يا معلم يونس…
يونس بحده
ومدام انت فيه مش هدخله، ايوه بكرهك انت وامك واخوك ما بكرهش في حياتي قدكم…
ابتسم محمد وقال
مش مهم انا اصدق كلامك ده، المهم انك تكون انت مصدقه..
_ اتعصب يونس من ان محمد كاشفه ولكمه في وشه جامد ومحمد رجع لورا كام خطوه وهو ماسك وشه بألم وقال باستفزاز..
محمد
ولا كده برضو هصدق..
يونس بحده
انا هخليك تصدق كويس والقلم اللي خدته منك هيترد بس بطريقتي…
_قال كلامه وركب عربيته ومشي، ومحمد بصله بحزن وقال..
محمد
هترجع يا يونس، انا عارفك اكتر من نفسك…
ـــــــ #بقلم_الكاتبه_رحاب_القاضي ـــــــ
_ وتاني يوم صحيت ولاء علي صوت موبيلها وهو بيرن وردت عليه وقالت..
ولاء
ايوه يا مازن صباح الخير..
مازن
صباح. النور نايمه لحد دلوقتي؟..
ولاء
ايوه كنت سهرانه بقرأ روايه بالليل، خير انت كنت عايز حاجه..
مازن بهدوء
تعرفي انتي صوتك حلو اووي وانتي صاحيه من النوم..
اتسكفت ولاء وقالت
هو انت مالك بقي اليومين دول، بطل تقول كلامك ده وقول كنت عايز ايه..
مازن ضحك وقال
هههه ما فيش كنت عايز اخد رئيك البس ايه وانا رايح الحفله…
ولاء
هو بما ان الحفله بالنهار فياريت تكون حاجه هاديه هيكون افضل..
مازن
طيب اقفلي وافتحي الوتس هبعتلك صورة كام حاجه كده واختاري معايا…
ولاء بحماس
حاضر مستنيه…
_ وقفلت وفضلت تختار معاه، ودخلت عندها هاجر وقالت..
هاجر
صاحيه بدري يعني خير؟..
ولاء
لا ابداً انا بس بختار هلبس ايه مع صحابي..
هاجر بشك
اممم حاسه ان في حاجه مش مظبوطه معاكي..
ولاء بتوتر
لا لا ابدا انا كويسه بس هو بصراحه..
دخلت هاجر وقفلت الباب وقالت
ايوه بس ايه اتكلمي وقوليلي ايه سبب انك بطلتي تروحي للدكتوره ولا تنفذي كلامها..
ولاء بضيق
كلامها ما بقاش يعجبني ومش مريحني انا ماشيه علي العلاج وقت الضروره وبقيت كويسه..
هاجر
طيب بلاش تتعصبي وقوليلي كنتي عايزه تقولي ايه؟..
ولاء بضيق
مش عايزه اقول حاجه يا هاجر، لو سمحتي روحي شغلك وسبيني في حالي.
هاجر بهدوء
يا بنتي انا اختك وبخاف عليكي وعايزه اا..
ولاء بحده وايديها بدأت تترعش
عايزه تطمني اني خفيت واني مش هعملكم مصايب ومشاكل مش كده، انتو كلكم بتعاملوني علي اني مريضه واني طفله بتخافو من تصرفاتها بس الحقيقه لا انا كبرت وبقيت هقدر اتحكم في نفسي من غير حد. وممكن اعمل اي حاجه لوحدي..
هاجر بقلق
طيب اهدي ومش هنتكلم دلوقتي ويا عبيطه افهمي انا لو بسألك فبكون عشان اطمن علي اختي حبيبتي مش عشان خايفه من تصرفاتك..
زعقت فيها ولاء وقالت
انا كووويسه انا بقيت كووويسه انتو بلاش تضغطوني، بلاش طريقتكم دي معايا انا مش مريضه خلاص…
وقفت هاجر وقالت
براحتك يا ولاء بس انتي ما خفتيش والدليل اهو والادويه اللي بتاخديها دي مش هتعالجك من غير الدكتوره سلوي…
_ قالت كلامها ومشيت وولاء طلعت برشامه من علبة الحبوب بتاعتها واخدتها ونامت علي السرير وهي بتعيط..
ـــــــ #بقلم_الكاتبه_رحاب_القاضي ـــــــ
_ وفي المستشفي اللي شغاله فيها كانت قاعده بتفطر مع صحابها ودخل عادل وقال..
عادل
هاجر ممكن اتكلم معاكي شويه..
بصتله هاجر بضيق وقالت صحبتها
طيب هنقوم احنا نشوف الشغل يا هاجر، يلا يا هدير..
هدير
ماشي قايمه اهوو…
طلعو صحابها وهي قالت بحده لعادل
انت اتجننت ايه اللي جابك عندي هنا، اقسم بالله انا لولا اني خايفه تحصل مشكله هنا كنت اا..
عادل بحده
اخلصي يا هاجر انا مش فاهم انتي ليه بتعملي كده معايا، انا عارف ومتأكد ان جوزك ده علي ورق وخلاص لانك ما تقدريش تكوني مع حد غيري..
هاجر بعصبيه
انت ازاي تسمح لنفسك تتكلم معايا في حاجه زي دي يا حيوان، ازاي بجد انت كده فعلا الكل كان شايفك علي حقيقتك القذره دي الا انا كنت موهومه فيك..
عادل بجمود
والله العظيم بحبك يا هاجر ومش بحب غيرك، طيب تعرفي انا عملت شركة الشحن اللي نت لحلم بيها وشويه شويه هتقف علي رجليها بس وانتي معايا، الواد اللي بيقولو عليه جوزك ده مش بيحبك قدي ولا بيحبك اصلا..
هاجر بحده
اطلع بره ومالكش دعوه لا بيا ولا بجوزي، وحياتي خلاص بقيت مت الشيخ محمد حامد واقولك علي حاجه حتي لو ما كانتش معاه مستحيل تكون معاك انت..
عادل بحده
لا هتكون يا هاجر، وبعدين هو فين جوزك ده هو حد. شايفه اصلاً…
قبل ما ترد عليه دخلت هدير صحبتها وقالت
بت يا هاجر جوزك هنا بيزور حد ممكن تلحقيه لو عايزه هو في اوضة الظابط اللي جه متصاب امبارح..
هاجر بحماس
احلفي متاكده ان هو؟..
هدير
ايوه والله هو باللحيه بتاعته وطوله وبياضه وحلاوته..
هاجر بغيظ
ما تتلمي يا بت ايه قلة الادب دي..
_ وما اهتمتش لوجود عادل وطلعت بسرعه وهدير بصت لعادل وقالت..
هدير
والنبي يا عم حسن تعالي نضف هنا ورش بيرسول عشان الدبان كتير…
_ طلع عادل وهو متعصب، وفي اوضه تانيه دخلت هاجر بعد ما خبطت وكان محمد قاعد مع “اياد معتز” اللي كان نايم علي سريره الطبي..
هاجر
الف سلامه علي حضرتك يا اياد باشا…
محمد بحده
انتي بتعملي ايه هنا؟..
هاجر بقلق
بب بشوف شغلي..
اياد
دي هاجر الممرضه القمر اللي بتاخد بالها مني، انتو تعرفو يعض ولا ايه؟..
اتنهد محمد بضيق وقال
مراتي يا اياد باشا..
هاجر
سؤال بس معلش هي اللي كانت طالعه من هنا دلوقتي دي المذيعه ناني بهاء بتاعت الراديو…
اياد
ايوه دي معرفه قديمه وكانت هنا في القاهره وجات هي وجوزها اطمنو عليا لما عرفو اللي حصل..
_قبل ما ترد عليه دخلت منه وهي متعصبه وقالت بحده..
منه
انا عايزه اعرف بقي ناني حبيبة القلب كانت بتعمل ايه هنا؟..
اياد بحده
لو حضرتك كنتي موجوده هنا كنتي عرفتي هي هنا بتعمل ايه..
منه بعصبيه
كنت بطمن علي ابنك اللي سيبااه مع ماما، ناني كانت بتعمل ايه هنا يا اياد؟..
اياد بحده
البنت جايه مع جوزها هيكونو جايين بيعملو ايه، يا منه انا طالع من عمليه كنت هروح فيها والغريب الناس اللي كانو بينا مشاكل قلبهم حن وجم يطمنو عليةا ومراتي جايه تقلبها نكد..
وقف محمد وقال
احمم طيب نستاذن احنا ونسيبكم براحتكم يلا يا هاجر..
اياد
استني يا شيخ محمد مش انت اللي جوزتنا وكتبت الكتاب بزمتك الطلاق فيها حلال ولا حرام..
بص محمد لهاجر وقال
ان ابغض الحلال عند الله الطلاق، بس حلال….
منه بدموع
بقي كده يا شيخ محمد ده بدل ما تقوله يراعي ربنا فيا..
اياد
طيب انا هشهدهم عليكي يا جماعه انا كنت علي علاقه بناني زماان بس حصلت ظروف وسيبتها ووجعتها وعملت فيها حاجات وحشه كتير، البنت كملت حياتها واتجوزت انا اتجوزت وخلفت..
منه بدموع
بس انت ما نسبتهاش يا اياد..
اياد
معاكي حق ده حصل في الاول وكنت بحاول انساها بيكي، بس مع الوقت لقيتها بقيت عادي ومش مجرد. كلام انا دلوقتي لما جات هي وجوزها واطمنو عليا ما اتأثرتش بيها..
هاجر بجديه
مش معني ان الواحد حب وما اتوفقش في الحب ده انه هيعيش بيه عمره كله، ولا يتعاقب بسببه عمره كله احنا من حقنا برضو ننسي ونبدأ من جديد وما نعلقش نفسنا بأخطاء كانت في الماضي..
بصلها محمد بهدوء واياد قال
وربنا انتي ما فيش منك، بطلي بقي يا منه تعاقبيني علي اللي عدي لانه خلص خلاص، وما فيش في حياتي غيرك وبس..
هاحر بدموع
قوله يمكن يفهم..
بصولها كلهم بصدمه وهي قالت
اا قصدي يعني قولها يعني اا انا انا لازم اروح اشوف الشغل ااه الناس عيانه…
طلعت هاجر بسرعه واياد قاله
مزعلها شكلك مش كده؟..
ابتسم محمد باحراج وقال
لا عادي يعني الف سلامه علي حضرتك، وان شاء الله ربنا يهدي سركم..
منه بهدوء
ميرسي يا شيخ محمد ربنا يخليك…
_ طلع محمد ورا هاجر وهي ماشيه مسك ايدها ومشي جنبيها وقال..
محمد
مش المفروض تاخدي رأي جوزك انك ترجعي الشغل ولا لا..
هاجر بدموع
انا مش هجري وراك علي فكره..
محمد
كفايه كده يا هاجر، اللي حصل بقي ياريت بقي ترجعي..
هاجر بحده
هرجع بس مش دلوقتي عشان زي ما طردتني تيجي تاخدني من بيت اهلي..
محمد
وبالنسبه انك نزلتي الشغل من غير اذني وطولت لسانك علي امي وتصرفاتك اللي مش موزونه في الشارع ده عادي، انا ما اتصرفتش معاكي كده من فراغ يا هاجر..
هاجر بدموع
اولا امك هي اللي بتعصبني، والشغل ايوه انا هشتغل لانك متجوزني وانا بشتغل وبالنسبه للي حصل في الشارع انا اسفه مش هيتكرر..
محمد
طيب انا هاجي اخدك النهارده و…
هاجر حطت ايدها في نصها وقالت
لا لا لا لازم تديني وقتي الاول افكر…
محمد ضربها علي ايدها وقال
نزلي ايدك دي بكلم رقاصه، وخليكي فكري براحتك، وقوليلي صح بتدي حقن..
هاجر كتمت ضحكتها وقالت
والله عملت بأصلي وقولت مش هدي رجاله، حتي اياد باشا خليت هدير صحبتي تبدل معايا وتبقي هي اللي عنده..
محمد ابتسم وقال
طيب بقي اشوفك علي خير، وهكلمك عشان اشوف فكرتي ولا لسه النهارده بالليل كده عشان اجي اخدك…
_ قال كلامه ومشي وهاجر دخلت اوضة الممرضات وطلعت موبيلها وكلمت شهد وقالت.
هاجر
بت اشاااااهد صالحني صالحني، اقسم بالله ما شوفت في حلاوة اهله ده الموف اون بذات نفسه ده..
شهد ببكاء
حياتي اتدمرت يا هاجر، صبري حلف ليجوزني ليونس الصاوي اخو جوزك…
هاجر بصدمه
نعممم يا اختي هيجوزك للبلطجي ده؟!….
ـــــــ #بقلم_الكاتبه_رحاب_القاضي ـــــــ
_ وفي الحفله اللي عاملينها صحاب ولاء كانت قاعده مع مازن وهي مبسوطه جداً…
ولاء
الحفله حلوه اووي..
مازن بصلها وقال
هو انتي تعرفي الواد اللي اسمه علي ده؟..
ولاء
ايوه كان معانا في الشله وكان لطيف بصراحه غيرهم..
مازن بضيق
امم لطيف اكمنه عمال يبصلك وهياكلك بعنيه..
ولاء ابتسمت وقالت
ايه ده لا طبعا اصلا هو بيحب مي وهي معجبه بيه جدا…
مازن بضيق
ممكن مالكيش دعوه بالكلام ده الاعجاب والحب والجو ده، انتي بنت محترمه بلاش تبقي زيهم..
ولاء بقلق
حاضر انا اصلا عمري ما كلمت حد ولا عرفت حد. غير مجرد زمايل وبس…
_ قبل ما يرد عليها قربت منهم سالي ومعانا علي اللي مش مركز غير مع ولاء وقالت..
سالي
مالكم بقي واخدين جنب مننا وقاعدين لوحدكم ليه؟..
جات ولاء تتكلم بس مازن قال
عادي جابين نكون لوحدنا انا وهي عندكم مشكله..
علي بحده
بس احنا عازمين ولاء عشان تيجي تقعد معانا مش عشان تجيبك..
قام مازن وقال
انت ازاي تتكلم معايا كده وبعدين هو انا جاي بيت امك…
مسك فيه علي وقال
لا بقي ده انت قليل الادب وعايز تتربي…
سالي بحده
بس بقي انت وهو، انتو عايزين تخربولي الحفله ولا ايه..
مازن مسك ايد ولاء وقال
احنا مش هنخرب حاجه انا غلطان اني جيبتها من الاول عندكم…
_ واخد ولاء ومشي وعلي بص لسالي بعصبيه وقال..
علي
انتو السبب فضلتو تخوفوني منها لحد ما خسرتها…
سالي
انت زعلان اووي كده ليه يوم ولا اتنين وهيسيبها ويزهق منها وابقي حبها براحتك..
علي بحده
انا مش عايز اعرفكم تاني…
مشي علي ومشي قالت لسالي
هو بيحب فيها ايه ليه مش شايلني انا وعلي طول مركز معاها هي…
سالي
فكك مني يا مي انا عايزه انبسط بالحفله..
_ وبره كان مازن متعصب جداً وهو ماسك ايد ولاء جامد، وهي قالتله بقلق..
ولاء
مازن لو س…
زعق فيها وقال
انتي تخرسي خالص الله واعلم اللي كان بينك وبينه بلاش تكدبي عليا..
ولاء بدأت تتوتر وقالت
سيب ايدي لو سمحت انت بتوجعني..
مازن بحده
بينك وبينه ايييه ولا هو وش البراءه ده بيكون عليا انا بس..
ولاء بعصبيه ودموع
انت حيوااااان..
_خلصت كلامها ونزل هو بايده علي وشها وكانت في ناس معديه والكل وقف يشوف ايه اللي بيحصل، وهي بصتله بدموع…
مازن
انا اسف والله العظيم مش قصدي اا..
زقته ولاء وزعقت فيه وهي بتعيط
ابعد عني انت فاهم سيبني واياك تقربلي تاني..
مازن بقلق
طيب اهدي مش هينفع اسيبك وانتي كده…
_ اتنهدت نور وبصت حواليها بعصبيه وبعدين مسكت طوبه من الارض وخبطته فيها في وشه..
مازن وهو ماسك وشه بالم وقال
انتي اتجننتي ده انا اتعورت يا ولاء..
_ مسكت ولاء طوبه تانيه بس هو جري من قدامها وهي بسرعه اخدت تاكسي ومشيت..
ـــــــ #بقلم_الكاتبه_رحاب_القاضي ـــــــ
وبالليل تحت بيت هاجر وصل محمد وكان لسه هيطلع لقي عادل في وشه وقاله..
عادل بخبث
مش عيب برضو يا شيخ محمد تتجوز وحده مخطوبه…
محمد رجع وقف قدامه وقال
مين حضرتك بس الاول عشان تتكلم معايا في حاجه زي دي؟..
عادل
معاك عادل خطيب مراتك يا شيخ محمد..
محمد بضيق
طيب ما تقولش كده تاني عشان عيب، وانت راجل كبير وانا مش عايز ازعلك..
عادل باستفزاز
لا انت اللي هتزعل لما خطيبتي هتطلق منك وهترجعلي..
محمد اتعصب وقال
لا ده انت مصمم بقي تتخانق..
جه حمدي ومسك محمد وقال
انت بتعمل ايه يا عادل، استني يا محمد عشان خاطري انا..
عادل
قصدك الواد ده بيعمل ايه هنا، ده بيت خطيبتي وهو لو عنده كرامه يطلقها..
محمد بعصبيه
لو سمحت يا عمي سيبني عليه الواد ده عايز يتربي..
حمدي
سيبك منه يا محمد يا ابني ده فاضي وهو لو جه عمل كده تاني انا هروح اعمله محضر عدم تعرض..
عادل بحده
ماشي يا عمي بس الشاطر اللي يضحك في الاخر..
مشي عادل ومحمد قال
ايه يا عمي ده انا اسف بس ازاي كنت هتجوز بنتك لواحد مش متربي زي ده..
حمدي
ما كله بسبب اني ما عرفتش اربي مراتك، انا لو كنت عرفت اربيها ما كانتش وقفت قدامي واختارت الصايع ده..
محمد ابتسم
لا انت سيب الربايه دي علي امي قايمه بالواجب معاها وبزياده..
حمدي
يا ابني خاف علي امك من بنتي دي مش ساهله..
_ضحك محمد وحمدي، وبعدين محمد اخد هاجر ورجعو البيت واول ما دخلو البيت كانت هناء مستنياهم و قالت..
هناء
شايفه ان رجل مراتك خفت كل ده عند.بيت اهلها وكمان نزلت الشغل….
محمد بصدمه
والله العظيم هي اكتر حد. كان بيقولي ارجعك..
هاجر بغيظ
طيب سبيني اخد نفسي الاول ده انا لاسه داخله البيت، وبعدين جربي تخفي رجلك. انتي كمان وتقومي كده هترتاحي بدل ما الناس بقيت شاكه انك لاسقه في الكنبه من كتر القعده..
هناء
ما انتي لو متربيه مش هتقولي كده..
طلع مازن من اوضته وهو ماسك المخده وقال
هو انتو ليل نهار كده بتتخانقو انا تعبت بجد وعايز انام..
هناء
وكمان ليك نفس تنام يا ابو ملحق ومتخانق وجاي متعور في وشه..
محمد بغضب
هو شال مواد تاني ولا ايه؟..
جري مازن واتخبي في مامته وقال
من غير اهانه وقلة قيمه انا مش بتاع تعليم وهسيب الكليه انا قولتلكم كده من زمان انتو ما صدقتوش انا جوزوني وقعدوني في البيت احسن..
هناء
لا والنبي لاا انا ولاد هناء لازم يتعلمو وهيتعلمو وهيبقو متجرجين كليات..
مازن
علي اساس انك وزيرة البيئه يا ماما ده انتي لما الموبيل اتفيرس اخدتيه وروحتي المستشفي وفكرتي جاتله كورونا..
ضحك محمد وهاجر وقالت
هههههه لا ايه الدماغ الجباره دي يا حماتي…
هناء باحراج
ممم مالكيش دعوه وخليكي في حالك، وانت يا مازن انا قيمالك..
جري مازن علي اوضته وقال بخوف
يالهوي الحقوووني دي ما بترحمش..
محمد بص لولاء وقال
وانتي هتنامي في ليلتك دي ولا حكايتك..
هاجر
في انت كمان هتبقي انت وامك عليا ما توطي صوتك ده..
محمد
انا اتكلم براحتي وبالطريقه اللي تعجبني..
هاجر بضيق
وانا ما حدش يعلي صوته، بسبب او من غير سبب انت تتعامل معايا زي ما بتعامل معاك باحترام..
محمد بحده
ولو ما عملتش كده هتعملي ايه هتطلقي وتروحيله..
هاجر
بقي هي كده طيب اسمع بقي يا عسل..
محمد بعصبيه
انا مش عسل واتكلمي كويس وشيلي ايدك نصك ومش هقولك تاني..
نزلت هاجر ايدها وقالت
انا يا محمد لو كنت عايزه اروحله ما كنتش خليت جوازنا بقي بجد ولا كمل لدلوقتي، بس انا مش هرجع لواحد واطي وزي ما انت سترتني انا واهلي قدرتك واحترمتك واتقبلتك كزوج رغم ان كل حاجه جات بسرعه،واهو قبلت اىجع معاك رغم قلبت وشك عليا ..
زعقت وكملت كلامها
انما بقي جو التلقيح ده بتاع النسوان الفاضيه اللي زي امك ما يتعملش عليا..
هناء بغيظ
الله وانا مالي دلوقتي بتجيبي سيرتي ليه؟..
مازن قعد جنبيها وقال
بس يا ماما خلينا نتفرج دي شكلها هتبقي عركه جامده..
هناء قلعت الشبشب وقالت
وديني ما انا سيباااك اتنيل ادخل ناام..وانتي يا بت يا سرنجه لو جيبتي سيرتي تاني هقطع الشبشب ده عليكي..
هاجر
لا اجيب ولا ما اجيبش انا داخله انام تصبحو علي خير…
_تفتكرو بقي هيحصل ايه؟..
*هل ولاء هتسامح مازن ولا لا؟..
*محمد هيلدر يتقبل هاجر ولا لا؟..
*ويونس هيعمل ايه لما يعرف ان اللي هيخطبها هي شهد؟..
*وهيحصل ايه في مقابلة نور وام احمد؟..
ـــــــ ـــــــ ـــــــ ـــــــ ـــــــ ـــــــ ـــــــ ـــــــ
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية موضوع عائلي (الشيخ والبلطجي))
