رواية ملحمة بنت الصعيد الفصل الرابع 4 بقلم ياسر عودة
رواية ملحمة بنت الصعيد الجزء الرابع
رواية ملحمة بنت الصعيد البارت الرابع
رواية ملحمة بنت الصعيد الحلقة الرابعة
توقفنا فى الجزء السابق لما حكى ماهر حكيته لحكم وهما مستنين وصول سيارات الجيش البريطانى بالاسلحه والذخيره .
اولا اذكر الله وصلى على الحبيب المصطفى وادعوا لاخوانكم بفلسطين والسودان وكل بلاد المسلمين.
كله كان مستخبى ومتربص ، ووصلت السيارات للمكان اللى محدده حكم ، وعلشان نعيش الحكايه لازم اعرفكم ترتيب السيارات ، كانت عباره عن عشر سيارات ، اول ثلاثه سيارات كانت كلها عساكر حراسه ، وبعد كده خمس سيارات محمله اسلحه وذخيره بانواع مختلفه ، ، واول حاجه نفذها انه ضرب اول رصاصه من البندقيه بتعته على تنك السياره الاولى واللى طبعا كانت كلها عساكر ، انفجرت السياره واتفحمت بكل العساكر اللى فيها ، ملحقوش يخرجوا من السياره .
المكان اللى عمل فيه حكم الكمين ده كان من ضمن مميزاته انه طريق سير السيارات ضيق يعنى علشان السيارات تمشى فيه لازم تمشى ورا بعض ومينفعش يمشوا جنب بعض ولما انفجرت السياره الاولى وقفت الطريق ومنعت باقى السيارات انها تتحرك للامام .
فى اللحظه ديه وقبل ما حد من حراسه الاسلحه يستوعب اللى حصل ويفكروا يعملوا ايه كان تصرف حكم التانى وهو انه يقطع عليهم طريق الرجعه ، وده اللى عمله حكم لما صوب تانى رصاصه من بندقيته على تنك السياره الاخيره ، وفعلا مكنش الامر محتاج غير رصاصه واحده من واحد زى حكم اللى محدش يقدر يتفوق عليه فىالتصويب وفعلا انفجرت السياره الاخيره وولعت بالعساكر اللى فيها وسدت الطريق من الناحيه التانيه ومنعت اى فرصه للهرب بالاسلحه .
بعد كده بدأ حكم يصطاد العساكر اللى خرجت من السيارات فى محاوله تنظيم نفسهم ، وفى الوقت ده رجاله حكم اللى معاهم البنادق ظهرت وضربت نار على العساكر ، وباقى الرجاله هجمت على باقى العساكر بالشوم والعصيان .
الموضوع مقعدش وقت كبير يدوب كام دقيقه وانتهى ومات كل العساكر واستولى حكم ورجالته على كل سيارات الاسلحه .
حكم طلب من رجالته انهم يخدوا اى اسلحه موجوده ، وطبعا علشان السيارات مش هينفع يخدوها للجبل لان مفيش طريق ممهد ليها طلب حكم منهم انهم يحرقوها كلها ، اما جثث العساكر طلب حكم من رجالته يحملوهم ويدفنوهم فى مكان تانى .
حكم كان عاوز الانجليز يقعوا فى حيره ، هما هيلاقوا السيارات محروقه ، بس مش هيلاقوا العساكر او الاسلحه وكان الامر ده هيعطلهم شويه .
رجاله حكم بعد ما نفذوا اومره خدوا الاسلحه والذخيره ورجعوا لمقرهم فى الجبل بعد ما بقى معاهم اسلحه وذخيره تكفيهم شهور .
لما تحرك الجيش البريطانى وشاف السيارات المحروقه وان مفيش اسلحه او العساكر او حتى اى شيء باقى منهم سعتها وقعوا فى حيره شديده واصابع الاتهام اتجهت نحيه حكم بس ازاى هيعمل كل ده لوحده وسعتها تم خلق اساطيل كتير حولين حكم اللى جسدوه كشيطان او من الجن او حاجات خرافيه كتير .
حكم كان بيستعد لمواجهه كبيره مع الانجليز ، بس مكنش عارف ان فى حاجه هتحصل هتقلب كيانه .
فى يوم خرج واحد من قريه حكم كان قريب ليه وكان شايل على ايده طفله رضيعه قاصد الجبل ، طبعا مكنش يعرف الطريق ، بس واحد من رجاله حكم اللى بيراقب الجبل قابله ورفع عليه السلاح وكان هيقتله بس قريب حكم قال انه قريب حكم وسعتها خدوه وحطوه قدام حكم اللى رحب بيه بس سمع منه خبر فظيع .
الانجليز لما وجهوا اتهام كمين سيارات السلاح لحكم كان لازم يتصرفوا ويعجلوا ارسال فرقه ضخمه للجبل علشان يقتلوا حكم ، بس الفرقه هتاخد اسبوعين على الاقل قبل ما تتحرك ، فكان لازم يحصل تصرف تانى للانتقام قبل خروج الفرقه وكان احسن تصرف هما شفوه انهم ينتقموا من حكم فى اهل بيته .
راح ضابط وكام عسكرى لبيت حكم واقتحموا البيت وخدوا هدى مرات حكم وسحلوها قدام اهل القريه ، وكل واحد حاول يدافع عنها ضربوه بالنار ، وبعد كده فى نصف القريه اهانوا هدى اللى اتعرضت للضرب المبرح وماتت على الفور .
اذكر الله وصلى على الحبيب .
هدى لما شافت العساكر بتحاول تقتحم بيتها سعتها خبت بنتها ملحمه ولقاها الراجل اللى خد الطفله وطلع بيها الجبل ، وسلم ملحمه ل ابوها حكم اللى سمع كل اللى حصل لمراته هدى .
حكم زى ما يكون بركان غضب انفجر جواه ، مسك بنته وحضنها ودموعه نزلت عليها ، وبعدين سلم بنته لواحد من الرجاله وشال سلاحه ولسه هيركب حصانه بس سعتها ماهر وقف قدامه وقاله : على فين يا سيد الجبل ؟
حكم : ابعد عنى يا ماهر ، ملكش دعوه انا رايح فين .
ماهر : يعنى ايه نبعد عنك ، انا عارف ان اللى سمعته مهوش هين بس قبل اى تصرف لازم تقعد وتفكر كويس وسعتها احنا معاك ، اما لو سبتك دلوقتى واتصرفت من غير تفكير سعتها هتخسر نفسك واحنا كمان هنخسر انفسنا ، كل الرجاله اللى هنا متعلقين فى رقابتك يا سيد الجبل ، انت مابقتش ملك نفسك .
كلام ماهر خلى حكم مايتحركش ، بس جواه بركان غضب لازم يفجره بس مش عارف يفجره ازاى ، سعتها صرخ حكم باعلى صوته وهو بيقول أااااااااااااااااااااااااه بحرقه وغضب ينفس بيها عن اللى جواه ، وشال حكم بنته مره تانيه وخدها ودخل بيها للمكان اللى بينام فيه .
حكم فضل فى مغاره الجبل ثلاثه ايام مش بيخرج منها ،كان فى حاله حزن وحداد ،وماهر كان متكفل باكل بنته ملحمه ، وكان تفكير حكم فى الانتقام .
بعد كده جه خبر من واحد من رجاله حكم الجواسيس فى معسكر الانجليز بخبر فرقه ضخمه من الانجليز خرجين باتجاه الجبل علشان يمسكو حكم او يقتلوه ، الفرقه كانت مكونه من 500 عساكر وضباط ، ومعاهم اسلحه مختلفه وكبيره ، ومعاهم مدافع متحركه علشان يهدوا الجبل على دماغ حكم لو لزم الامر .
الخبر لما وصل للرجاله فى الجبل معظمهم شعر بالخوف واليأس ، ازاى يواجهوا قوه بالشكل ده ،الامر كان شبه مستحيل .
ووصل الخبر لحكم اللى خرج منمغرته وشاف ان دهوقت الانتقام لموت مراته ، خرج حكم على رجالته وهما فى الحاله اللى شفها وسعتها وقف وسطهم وقال بصوت عالى : يا رجاله الجبل ، انا سمعت زى ما انتم سمعتوا ان قوه من الانجليز باسلحتهم جيين علينا علشان يهدوا الجبل فوقينا ، وشايف فى عيون كتير منكم الخوف ، بس انا حابب اسألكم انتم خيفين من ايه ؟
ممكن واحد فيكم يقول خايف من الموت .
سعتها هقوله : لو شرفك وعرضك بيغتصب قدامك هتموت علشانه ولا لاء ؟
فردت الرجاله : هنموت طبعا علشانه .
حكم قال سعتها : اهو الانجليز كل يوم بيعتدوا على حرمه ارضنا وحرمه عيلنا ومراتتنا واهلينا ، انا قدمكم قتلوا مراتى بعد ما سحلوها قدام كل الناس ، والدور على كل واحد فيكم ، انا هقف قدامهم واحاربهم ، واللى فيكم عنده استعداد يقدم اهل بيته للانجليز يمشى علشان انا اللى هيفضل جنبى لازم يبقى زي حكم رجل حر مايعرفش الذول او المهانه راجل صعيدى يقف قدام الظالم ولو على حساب حياته في حد فيكم راجل زى حكم يقف معايا يا رجاله ؟
فالكل رد عليه بصوت عالى وبشكل حاسم وبكل حماس : كلنا حكم يا حكم ، كلنا حكم يا حكم ، كلنا حكم يا حكم .
حكم اجتمع مع كام راجل من رجالته من ضمنهم طبعا ماهر علشان يحطوا الخطه اللى هيحربوا بيها الجيش الانجليزى .
ماهر : احنا عندنا السلاح والذخيره وقنابل ومتفجرات وحتى الالغام لقينا كميات كبيره فى عربيات الانجليز بس الحاجات دىمحتاجه ناس فهمه فيها ، احنا لو حاولنا نستخدم الالغام او المتفجرات ممكن تضرب فينا وسعتها هيبقا قتلنا نفسنا بايدينا .
حكم سكت ثوانى وبعدين قال : اللى ميطوعكش انت طاوعه .
ماهر : تقصد ايه يا سيد الجبل .
حكم : انا عارف هنستخدم الالغام والمتفجرات ازاى متقلقوش ، المهم انها تنفجر فى وش اعدائنا مش مهم نستخدمها زى الانجليز او نستخدمها زى الصعايده .
ماهر : دماغك فيها ايه يا سيد الجبل .
حكم : هتفهم بعدين ، اهم حاجه دلوقتى اننا نختار الارض اللى هنحارب عليها ، لو اخترنا الارض واستدرجنا الجيش الانجليزى ليها سعتها يبقى كسبنا نص المعركه .
ماهر : انت فى دماغك مكان معين يا سيد الجبل ؟
حكم : ايوه اسمعونى كويس هقولكم ايه .
اذكر الله وصلى على الحبيب .
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية ملحمة بنت الصعيد)
