رواية ملحمة بنت الصعيد الفصل التاسع 9 بقلم ياسر عودة

توقفنا فى الجزء السابق لما شاف جورج ابنه جون وهو ميت ومعلق .

الاول اذكر الله وصل على الحبيب المصطفى وادعوا لاخوانكم بفلسطين والسودان وكل بلاد المسلمين .

موت جون بالطريقه المهينه ديه مكنش سهل على جورج اللى اصدر التعليمات بتجهيز جيش عدد مايقلش عن 3 الاف جندى بريطانى لنسف رجال الجبل من على وش الارض بشكل نهائى ، مش بس كده امر بالمدفعيه الثقيه تتحرك وتتمركز على بعد مسافه من الجبل لضربه بالمدفعيه ، وقبل ده كله فرقه من الطياران هيضرب الجبل بشكل عشوائى لتقليل عدد مقاتلين رجال الجبل لقرب عدد ممكن .

ممكن نقول بالمختصر كانت عمليه اباده شامله هيستخدم فيها جورج كل امكانيات الجيش البريطانى .

جورج حدد معاد للهجوم ومكنش قلقان من وجود جواسيس لان المعدات اللى هتستخدم مش هيفرق معاها اى حيله من حيل رجال الجبل .

العقبه الوحيده اللى جورج كان عرفها هى انه مش قادر يحدد موقع رجال الجبل بالمظبوط ، وان الضرب بالمدفعيه والطائرات هيبقى مجرد ضرب عشوائى بدون هدف محدد ، وطبعا مش هيقدر ينسف جبل بالكامل لصمود صخوره وايضا لوجود مغارات كثيره بداخله هتحمى الرجاله اللى فيه ، وعلشان ينسفه يبقى لازم يفخخه من الداخل وده صعب علشان رجاله الجبل موجودين .

بس كل ده مايمنعش ان الطياران والمدفعيه هيحبسوا رجال الجبل ويعجزهم عن الحركه فى الوقت اللى الجيش البريطانى هيهاجمهم ويفاجئهم بوجوده ويقضى عليهم بشكل نهائى .

لما عرفت ملحمه الخطه وان الجيش هيتحرك بعد 3 ايام فقط كان لازم توصل ل ماهر باى شكل وتتفق معاه على خطه لتنقذ رجاله الجبل من الموت المحقق .

خرجت ملحمه فى وقت متأخر من الليل من المعسكر ، وكانت مجهزه لبس راجل صعيدى ملثم ولبسته ، وتوجهت بالحصان للجبل ، ورغم انها مكنتش عارفه موقع ماهر بالضبط بس كانت عارفه انها هتلقيه او تلاقى حد يوصله ليها .

ملحمه طلعت الجبل فى وقت متأخر والذئاب مليه الجبل والوحوش المفترسه بس هى متبقاش اى حد هى ملحمه بنت حكم سيد الجبل ، ملحمه كانت بتمشى بشكل عشوائى وحسب احساسها وفجأه لقت اتنين ظهرولها رفعين عليها السلاح وطلبو منها ان تنزل من على الحصان ، وطبعا كانوا فكرنها راجل .

نزلت ملحمه من على الحصان ورمت البندقيه بتاعتها على الارض ورفعت ايديها وقالت بصوت شبه الرجاله : انا مش جاى فى شر انا عاوز اقابل الريس ماهر كبير الجبل .

فرد عليها واحد من الرجلين : عوزه فى ايه ؟ وانتم ين اصلا ؟

ملحمه : مش وقته انتم فى خطر وانا جاى احذركم ، ودينى للريس ماهر بسرعه .

فرد الراجل : انت هتدينا اوامر ، شيل اللثام من على وشك ورينا شكلك .

فهمت ملحمه ان مفيش فيده من الكلام معاهم ، وعلشان كده بشكل مفاجيء ضربت واحد منه برجليها في صدره فوقعته والتانى سحبت البندقيه منه وضربته بضهرها على صدره وقعته هو كمان ووجهت السلاح ليهم وقالتلهم : هو حل من الاتنين تخدونى للريس ماهر ولا ادفنكم هنا واكمل طريقى لوحدى .

فى الاول محدش رد وسعتها ضربت عيار جنبهم على الارض سعتها وافقوا انهم يخدوها للريس ماهر .

ملحمه كتفت ايديهم وربطتهم وركبتهم حصان واحد وراحت معاهم على حصنها وسحبت الحصان اللى فاضل .

وصلت ملحمه لمقر ماهر ، لما الحراسه شافت اتنين من زمايلهم متكتفين ووراهم واحد مهددهم بالسلاح سعتها كلهم حوطوه ورفعوا عليه السلاح ، ساعتها ملحمه رمت سلاحها وقالت : انا مش جاى فى شر انا عاوز اقابل الريس ماهر ، انا جايلكم فى خير .

فى الوقت ده ظهر علوان ، الاول اعرفكم مين علوا نده من اهم رجاله ماهر ، انسان شجاع بس متسرع .

علوان مسك ملحمه من هدومها وهى على حصانها ووقعها من على الحصان ومش بس كده سحالها وجرها لكام متر ، وفى الوقت ده جه ماهر وسعتها حط علوان ملحمه قدام رجل ماهر .

كل ده وملحمه مستسلمه محولتش تقاوم ، ولسه وشها كان ملثم ، واول لما جه ماهر علوان قال : اهوه الريس ماهر انت تحت رجله ، بس متفتكرش انك هتطلع من هنا حى بعد اللى انت عملته فى رجالتنا .

قامت ملحمه من على الارض ووقفت قدام ماهر وتجاهلت علوان نهائى وبصت لماهر وقالت : انا جيالك فى حاجه مهمه يا ريس ماهر وعاوز اتكلم معاك .

ماهر : قول اللى انت عوزه ، الرجاله دوول هما انا ، بس قبل ما تتكلم شيل اللى على وشك ، خايف تورينا وشك ليه .

ملحمه : عاوز اكلمك لوحدنا ، الكلام اللى هقوله ماينفعش حد غيرك يسمعه .

اذكر الله وصلى على الحبيب .

سعتها علوان قرب منها وشد اللى على وشها ورسها وسعتها انكشف وش ملحمه وشعرها الطويل الاسود واتفاجيء الكل لما عرف ان الراجل ده مجرد بنت مش اكتر ، والاغرب ازاى بنت قدرت تضرب اتنين رجاله وتكتفهم .

اول لما ماهر شاف ملحمه قرب منها بسرعه وقال : بنتى ملحمه خير حصل ايه يا بنتى ايه اللى جابك فى الوقت ده وبالشكل ده ؟

ملحمه : انا جيت احذرك يا عمى ، جورج هيهاجم الجبل بجيش من 3 الاف جندى على الاقل ده غير ضرب الطيارات للجبل وكمان المدفعيه .

ماهر وهو مصدوم : انتى بتقولى ايه ؟ ازاى ده ، دا كدا احنا انتهينا .

ملحمه : اهدى يا عمى ، انا عندى خطه هتخلينا نطلع من الحرب ديه منتصرين .

سعتها علوان كالعاده اتسرع ومسك ملحمه من دراعها وقال : خطه ايه ؟وانتى مين اصلا ؟ اكيد انتى جسوسه للانجليز علينا ، انطقى قبل ما اقطع راسك .

ماهر بصوت عالى وبعصبيه : شيل ايدك يا علوان ، انت مش عارف انت بتتكلم مع مين ، دى ملحمه ست الجبل وبنت سيد الجبل حكم .

علوان لما سمع اسم حكم ساب دراع ملحمه ، اصل علوان طول عمره كان مبهور بحكايه حكم ، وهو اصلا انضم لرجاله الجبل علشان يبقى زى حكم .

علوان : حتى لو بنت حكم ، ازاى نسمعها ونصدقها ؟

ماهر : حاسب على كلامك يا علوان ، ملحمه دى بنتى زى ما هى بنت حكم .

ملحمه : استنى يا عمى ماهر ، شكله اسمه ايه ده فاكر علشان سكتله انى ضعيفه ومحتاجه حد يدافع عنى ، اسمع ياللى اسمك مايفرقش عندى فى حاجه ، انا ملحمه بنت حكم ، واصلى معروف بين الناس ، مش انا اللى اخون اهلى وناسى ، وجيت فى الوقت ده الحقكم قبل ما يدبحوكم زى الفروج .

علوان قرب منها وقال : لولا ان انتى حرمه كنت عرفتك مقامك دلوقتى .

فقربت ملحمه منه هى كمان وقالت : انا بنت ابوى ، ورحمه حكم همسح بيك الجبل كله .

علوان بعصبيه : النبوت يحكم بنا يا بنت ابوكى .

ابتسمت ملحمه : طلبتها ونلتها يا عديم الاسم وطويل اللسان .

علوان خد نبوت ، وملحمه جلها نبوت بس ماهر قرب منها وقال : يا بنتى علوان محدش يغلبه فى النبوت ، انتى اتسرعتى .

ملحمه : قولى يا عمى حكم كان يقدر عليه ولا لاء ؟

ماهر : مفيش حد زى حكم ، كان يقدر عليه طبعا .

ابتسمت ملحمه : وانا اقدر على حكم .

وقفت ملحمه بالنبوت قدام علوان ، وبكل سخريه علوان قال : هتعرفى تمسكى النبوت ولا اعرفك تمسكيه ازاى ؟

ملحمه مردتش عليه ، وابتدت بالهجوم هيا ، بدأت ضربات ملحمه شديده على علوان ، حس ان قوه الضربه مش معقول تكون من وحده ست ، ومكنش ملاحق يصد الضربه منين ولا منين ، مكنش عنده وقت يهاجم ، كان بيدافع بس ، وقبل ما يستوعب علوان اللى بيحصل معاه كانت ملحمه ضربته نبوته ضربه طيره النبوت من ايده وبعديها رفت نبوتها علشان تضربه على راسه بقوه وقبل ما يوصل لراسه وقفت ملحمه فى صدمه وزهول من كل الموجودين ، اما ماهر فمكنش شايف ملحمه اصلا كان شايف قدامه حكم ابوها كانه هو اللى واقف وماسك النبوت .

اذكر الله وصلى على الحبيب .

اذا عجبك الجزء ادعيلى وجزاكم الله عنى خيرا .

الى هنا يكون نهايه حديثنا اليوم ولكن لم تنتهى روايتنا بعد ، ارجوا ان تنال اعجابكم ويسعدنا مشاهده تفاعلكم وتعليقاتكم .

ارجو عمل متابعه لصفحتى الشخصيه الجديده ( ياسر عوده) وللصفحه العامه الجديده ( روايات بقلم ياسر عوده ) لاحتمال سرقه حسابى القديم لمتابعه باقى رواياتى .

لو اى حد حابب ينشر الروايه بصفحته او باى جروب يتفضل ، بس فضلا انسبهالى لانها مجهودى .