روايات

رواية ملاك في عالمي الفصل الرابع عشر 14 بقلم ندى صابر

رواية ملاك في عالمي الفصل الرابع عشر 14 بقلم ندى صابر

رواية ملاك في عالمي الجزء الرابع عشر

رواية ملاك في عالمي البارت الرابع عشر

رواية ملاك في عالمي الحلقة الرابعة عشر

بصتلها سميره بشر وراحت ضربها قلم على وشها: انتى هتبطلى استفزاز فينا امتى يابت انتى
حطت ايديها على وشها مكان القلم وهيا بتعيط: حرام عليكي بقا أنا تعبت من حياتى وتعبت منكم، انتم عاوزين منى ايه
سميره بتحذير: حسك عينك صوتك ده يعلى على اختك تانى، ومسمعش نفسك انتى فاهمه
بصتلها بوجع هيا مش عارفه تكرهها لانها للأسف تبقا أمها: ربنا معايا وربنا عالم بيا انا حاسه باايه دلوقتي ومش هقول غير كده
سابتها سميره ومشيت وهيا متعصبه منها جدا وبتدعى عليها
اما كريمه قربت منها وهيا بتضحك عليها: بلاش تحطينى في دماغك ياخديجه لان ده حال الي بيحطنى في دماغه، والمره الجايه مش هيكون قلم من ماما لا ده هيكون قلم منى أنا شخصيا……. سلام
طلعت من الاوضه وهيا فضلت قاعده في مكانها تعيط على حياتها وعلى نفسها، بعد شويه قامت تصلى يمكن ترتاح وبعد ماخلصت صلاه قعدت تدعى: يارب أنا حاسه إن جميله لسه عايشه يارب دلنى اعمل ايه انا مش عارفه ليه حاسه انها لسه عايشه يمكن علشان مش قادره اتخيل فكره إنها ماتت واختفت من العالم خلاص، يارب انا مش عاوزه افضل عارفه كل حاجه وساكته كده، ادينى القوه يارب وساعدنى.

 

خلصت دعاء وفضلت قاعده تقرء في المصحف وتعيط.
بعد شويه وصلت كريمه للمكان الي طلب منها وليد تقابله فيه واول مادخلت اتصدمت لانه كان شبه الكباريه، مليان بنات وشباب والكل بيشرب ومش واعي لأى حاجه، حست انها غلطت لما سمعت كلامه وجت المكان المشبوه ده، وكانت لسه هتمشي حست بحد بيشدها من ايديها بتبص لاقيته واحد سكر*ان عاوز يرقص معاها لسه جايه تسحب ايديها لاقت وليد في وشها سحبها وبعد الشاب عنها: انتى واقفه معاه بتعملى ايه
بصتله وهيا مصدومه: انا مكنتش واقفه معاه
وليد كان عامل نفسه غيران عليها: اومال كان ماسك ايديكى بتاع ايه
كريمه فرحت اوى انه غيران عليها ونسيت كل حاجه كانت بتفكر فيها: انت غيران عليا ياحبيبي
وليد بخبث: ايوه طبعاً اومال انا لازمتى ايه في حياتك طالما تعرفي واحد تانى غيري
كريمه حاولت تبرر الموقف: أنا كنت لسه همشي لاقيت واحد بيمسكنى من ايديا وعاوزنى ارقص معاه، ولما جيت اتصرف وارد عليه انت ظهرت
وليد عمل انه متعصب وفضل يبص في المكان: هو فين ابن ال****** ده والله لاعرفه قيمته الزب*اله
كريمه: خلاص اهدى ياحبيبي ومتعكرش مزاجك علشان واحد شبه ده
وليد: لا لازم اربيه

 

شدته من ايديه وراحت تقعد: تعال نقعد نتكلم وبلاش نضيع الوقت في شي ملوش لازمه.
قعد جمبها وهو عامل نفسه مضايق: هو انتى كنتى عاوزه تمشي ليه، المكان هنا مش عاجبك
بصت على المكان وهيا قرفانه من شكل النااس: بصراحه اول مره ادخل الاماكن دي لانى مش بحبها
وليد اخد كأس وضحك: ههههه، لازم تحبيها لانى بحبها وده مكانى المفضل
بصتله بصدمه وهو بيشرب: هو انت بتشرب
وليد ببرود: ايوه عادي
كانت مصدومه جدا ومش عارفه تقول ايه: بس الشرب حرام
ضحك عليها بإستهزاء: طب وشعرك الباين ده مش حرام،(شاور على هدومها) وهدومك الضيقه خالص دي مش حرام برضو، ده غير خروجك نص الليل مع واحد من ورا اهلك ده برضو مش حرام (غمزلها وهيا كانت بتبصله وعيونها مفتوحه على الاخر من الصدمه) لو انا بعمل حاجه واحده بس حرام فاانتى مشاء الله عليكي بتعملى كتيييير
كريمه عيونها دمعت: انت عاوز منى ايه طالما شايفنى بعمل حجات كتير حرام، ليه كلمتنى من الاول
ضحك بكل صوته: هههههه هو مين فين الي كلم التاني، هو مش حضرتك الي بتجرى ورايا وبتبعتيلى مليون جواب بقالك سنين وانا مكنتش شايفك اصلا
كريمه: يعني انت مش بتحبني

 

بصلها وبعدين ضحك على غبائها: هو لما واحد يفضل يكلم واحده ليل نهار من ورا اهلها ويخرج معاها ويمسك ايديها ويتفسح معاها وكمان يجبها مكان مشبوه شبه ده، تفتكري بعد كل ده بيحبها وإلا بيقضي شويه وقت مسلي وخلاص
عيطت كريمه: يعني انتي مش بتحبني ولسه بتحب اختى جميله
وليد: جميله اختك زيك بالظبط بس الفرق مابينكم انها محصنه نفسها كده من اي راجل غريب ومحترمه والنوع ده مينفعش معاه شبه ماانا عملت معاكى كده النوع ده بندخل ليهم رسمى من باب البيت علطول ولو عرفنا نتسلى شويه في الخطوبه بيبقا خير وبركه وبعدين بنفسخ الخطوبه عادي
كريمه كانت منهاره: انت زباله، انا مش بحبك انا بكرهك
شدها من شعرها: لا فوقي ياقطه واعرفي انتى بتكلمي مين، وبعدين انا مليش دعوه حضرتك الي كنتى هتموتى وتكلمينى وانا مردتش ارفض مع انك……..(رماها بعيد عنه بقرف) روحي بصي لنفسك في المرايا وانتى تعرفي، كتك القرف
سابها وقام يرقص مع بنت وهيا سحبت نفسها وكرامتها الي تقريباً مبقاش منها حاجه وخرجت من المكان ده، رجعت بيتهم حاسه إن كل احلامها اتحرقت وبقت رماد في ثانيه، هيا إزاى كانت بتحب الشخص ده إزاى كانت عاميه ومش شايفه اي حاجه غير حبها ليه، ده حتي كرهت اختها جميله وقتلت*ها بسببه هيا اكيد شيطانه لا لا ده حتى الشيطان كان ملاك وكفر لكن هيا طول عمرها انانيه ومش بتفكر غير في نفسها وبس.
خديجه استغربت من دخولها الاوضه ساكته ومعلقتش على حاجه المرادي رفضت تتدخل وراحت تنام.
___________________________________________________________________________________________

 

_
عند ملاك ”
طلعتها عفاف من افكارها وهيا بتسألها: هتنزلى مع هبه النهارده ياحبيبتي
ملاك: اي ده هيا هبه هتنزل معايا النهارده نعمل شوبينج
ضحكت هبه: ايوه ياملاك واهو بالمره اشترى شويه حجات ليا وللعيال
عفاف: طيب انا هقول لشهاب يوصلكم، هتنزلو على امتى كده
ملاك بحماس: دلوقتي دلوقتي
عفاف ضحكت: خلاص ياحبيبتي مفيش مشكله، ادخلو اجهزو عقبال لما اقول لشهاب
راحت ملاك تجهز ولبست فستانها الازرق الي معندهاش غيره وطرحه من عند هبه، عفاف قالت لشهاب وشهاب قام يجهز عشان ينزل معاهم.
بعد شويه خرج شهاب لاقى ملاك وهبه قاعدين في الصالون بيستنو: ها… جاهزين
هبه غمزتله: جاهزين يامعلم بس ايه الكاريزما دي كلها، قميص اسود وبنطلون ابيض والنضاره كمان لا لا كده كتير اوى عليا
شهاب ضحك عليها: طول عمري كاريزما يابنتي
هبه وقفت بفخر: شبهي طبعاً
شهاب كان بيقلع الجزمه عشان يخبطها في وشها: شوف بتقولى ايه المعفنه اش حال انك بتغسلى شغرك مره واحده بس في الاسبوع ياجربانه

 

ملاك كانت مش قادره تتنفس من الضحك: هههههه الكاريزما كلها راحت ههههههههه مش قادره
بصلها بغيظ: وانتى كمان اخر واحده تتكلمى عن الكاريزما، كفايه العبايه ام ورده الي كنتى بتمسحى بيها امبارح دي ورابطه دماغك كأنك جدتى
ملاك اتعصبت منه: طيب هتشوف ام عبايه دى هتعمل فيك ايه
قامت تجرى عليه هيا وهبه وهو طلع يجرى منهم لأن ملاك كانت جابت الكاتشب من المطبخ وناويه تحطه في وشه: والله العظيم لازم اعملك كاتشب كتير في وشگ عشان تبطل تغلط فينا وتعرف مين فينا فعلاً الي كاريزما
هبه: ايوه ياملاك عندك حق، هاتى بتاعت كاتشب
وقف وهو بيضحك: خلاص خلاص مش هغلط فيكم تاني بس بلاش كاتشب عشان اعرف انزل معاكم اوصلكم… اوك
بصو ملاك وهبه لبعض وكأنهم بيتفقوا على حل نهائي:خلاص سماح المرادي، يلا بقا علشان ننزل نعمل اجمد شوبينج
نزلو مع شهاب قدام مول كبير ودخلو بس وهما داخلين لاحظو إن شهاب مش معاهم،ملاك: اومال شهاب فين
بصت هبه ورا لاقته واقف عند عربيته: هو واقف عند العربيه ليه
ملاك استغربت: مش عارفه تعالى نشوفه ماله
راحت ملاك وهبه عنده وهبه سألته: انت واقف بتعمل ايه عندك، مدخلتش معانا ليه
شهاب ابتسم: انا هسيبكم براحتكم وهروح العياده عشان عندي شغل ( بص ناحيه ملاك) اشتري كل حاجه بتحبيها النهارده وكمان حاولى تختاري فستان مناسب ومميز كده

 

بصتله وهيا مش فاهمه حاجه:بس اشمعنا
شهاب ضحك: انتى نسيتى فرح صاحبي بكره وانتي هتيجي معايا انتى وماما
افتكرت وراحت باصه لهبه: وهبه مش هتيجي معانا
هبه ضحكت: اجي معاكم فين بس ياملاك والعيال يعملو ايه ياحبيبتي، انا مبعرفش اروح مناسبات عشان العيال
ملاك بتفكر في حل: مش سوزى هتفضل في البيت، ممكن يفضلو مع سوزى لحد ماترجعى
هبه ضحكت بكل صوتها: سوزى الي تقعد بعيال هيا دي بتعرف تغسل طبق، انتى لسه متعرفيش سوزى ياحبيبتي اصبري اصبري
شهاب كان واقف بيضحك: ملاك متاخديش فى بالك دى اختى عادى، يلا بقا ادخلو هاتو كل حاجه محتاجينها وانا كمان ساعتين كدا وهاجى اخدكم .
سحبتها هبه وهيا بتجري: يلا بسرعه ياملاك لأن ده مواعيده مظبوطه وهيكون عندنا بعد ساعتين بالدقيقه
ركب شهاب عربيته وهو بيضحك وراح على شغله
ملاك اختارت مع هبه كام دريس عجبوها وجابت طرح ليهم كمان
هبه: احنا نسينا الفستان ياملاك
ملاك: ايوه صح
هبه كانت واقفه قدام محل فيه فساتين راحت داخله: تعالى نشوف ده
دخلت معاها ملاك تتفرج على الفساتين وفضلت تقيس ومفيش حاجه لايقه عليها: مفيش ولا فستان حلو عليا اعمل ايه ياهبه

 

هبه لاحظت فستان ستان باللون الأسود شكله رقيق جدا: جربي ده ياملاك
اخدت ملاك الفستان ودخلت تجربه وكان شكله تحفه عليها: اي رأيك
هبه أول لما شافتها عجبها شكله جدا، كانت شبه الاميرات بالفستان ده: تحفه، شكله جميل اوى عليكى مشاء الله.
لفت بالفستان وهيا مبسوطه: بس مش طويل اوى
هبه ضحكت: هتلبسي كعب وهيكون مظبوط ياحبيبتي متقلقيش
جابو الفستان وكملو بقيت الحاجه وبعد شويه جه شهاب ياخدهم في معاده بالدقيقه، اتصل على هبه: انتو فين
هبه: جايبن عليك اهو
قفل معاها اول ماشافهم وراح ياخد منهم الشنط: مش تقوليلى ياهبه انكم معاكم حجات كتير كنت جيت اخدتهم منكم وانتو فوق
هبه وملاك ركبو العربيه وهما مبسوطين،هبه: مش عاوزين نتعبك معانا ياحبيبي
حط الشنط في العربيه وركب: مش هتعب يستى ملكيش دعوة انتى
غمزتله هبه بعد مااتحرك بالعربيه: طب انزل هات لينا ايس كريم
ضحك بكل صوته: لو ملاك عاوزه هنزل اشطا
ضربته هبه بهزار: اتفوووو على الاخوات
ملاك بصتله: ايوه ايوه انا عاوزه
شهاب ضحك: خلاص مش جايب
هبه: شهاب يلا بقا بليز

 

وقف العربيه ونزل جابلهم ومجبش لنفسه: اتفضلو
ملاك لاحظت انه مجبش لنفسه: طب وانت
شهاب كان قاعد قدام وهبه وملاك قاعدين ورا: مش بحبها عادي
ملاك اكلت بإستمتاع: حد ميحبش ده، طب جرب كده وانت اكيد هتحبها
هبه ضحكت: متحاوليش معاه لاني فشلت قبل كده ومعرفتش برضو اخليه يجرب
ملاك في ثوانى كانت قدامه براسها: افتح بوءك
بصلها ولاحظ انها قريبه جدا منه وبقا متوتر خالص ومش عارف يتنفس: ارجعي مكانك
بصتله بعند: لا مش هرجع غير لما تجرب
استسلم ليها لانه مبقاش عارف يهرب منها وكدا اكيد نظراته هتفضحه: خلاص هاتى
ملاك: لا افتح وكل علطول
اكل منها واستغرب إن طعمها حلو جدا: اي ده
ملاك بصتله وكانت خايفه من رد فعله: ايه وحشه
ضحك على شكلها: حلوه جدا
رجعت مكانها وكملت اكل وهيا مبسوطه
بصلها وكان مصدوم هو وهبه، هبه سالتها: انتى بتاكلى عادي كده
استغربت ملاك من السؤال: وهو في مشكله
شهاب اتحرج جدا: أنا اكلت منها علفكره
ملاك اكلت بتلقائيه ومحستش بنفسها: اسفه، تحب تاخد تكملها

 

هبه ضحكت بكل صوتها: ياحبيبتي مش قصدنا كده، انتى بتاكلى عادي ورا شهاب ومش قرفانه
ملاك خدودها احمرت واتكسفت جدا: ع. ا.
شهاب كان مبسوطه جدا من الموقف ده وفضل يضحك علي شكلها المكسوف: خلاص ياهبه اكيد مااخدتش بالها، سبيها بقا البت وشها بقا شبه الطماطم
هبه ضحكت: خلاص ياملاك متكبريش الموضوع وتتكسفى كده انا كنت بهزر هههههه
ملاك فضلت انها تفضل ساكته وكملت اكل بهدوء وكل شويه تلاحظ نظرات شهاب ليها من المرايا، بعد شويه وصلوا البيت واول مادخلو سمعو صوت ملك بتعيط
هبه اخدتها من عفاف: ايه ياحبيبتي ايه انا جيت اهو
عفاف: من ساعه ماصحيت وهيا بتعيط الحمدلله انك جيتى
ملاك حاولت تاخدها: هاتيها ياهبه
هبه ابتسمت: خودي ياحبيبتي
اخدتها ملاك وسكتت في ايديها: يروحي ربنا يبارك فيها يارب
عفاف ضحكت: كنتى تيجي تشيليها من زمان ياملاك، هاا بقا جبتم ايه
هبه فرجت لعفاف كل حاجه وشهاب كان قاعد بيتفرج وعجبه الفساتين جدا: حلوين أوي
هبه ضحكت: انت مشوفتش فستان ملاك الي هتحضر بيه بكره الفرح
ملاك اتكلمت بسرعه: لا لا خليها مفاجأة

 

ضحك شهاب: طيب لونه ايه
هبه غمزتله: اسود
شهاب ضحك: حبيبت قلبي والله
عفاف بصتله: ادخل صالح سوزى لانها رافضه تطلع من الاوضه ولسه زعلانه
لسه جاى يرد طلعت سوزى وكانت لابسه طقم قصير وضيق جدا وحط ميك اب كتير: هاي جماعه
شهاب في سره: ده احنا لو بنجيب في سيره 10جنيه مش هتيجي بسرعه كده
عفاف سمعته: احمممممم، تعالي ياحبيبتي اقعدي
بصتلها ملاك ولاحظت انها جميله جدا لانها كانت شعرها اصفر قصير وجسمها كان رفيع جدا وده غير انها بيضا جدا شبه الاجانب الي بتشوفهم في المجلات
اتكلمت سوزى بتكبر وكانت ملاحظه نظرات ملاك ليها: لا هروح اقضي يومين مع عمو لانه وحشنى اوى ونفسه اشوفه
بصتلها عفاف بسرعه: هاجى معاكي ياحبيبتي، م. ماانتى اكيد مش هتعرفي تروحي وترجعي لوحدك
شهاب بصلها واستغرب جدا: اييييه

يتبع…

لقراءة الفصل التالي : اضغط هنا

لقراءة الرواية كاملة اضغط على : (رواية ملاك في عالمي)

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى