رواية مغامره في حاره شعبيه الفصل الأول 1 بقلم إيمان شلبي
رواية مغامره في حاره شعبيه الجزء الأول
رواية مغامره في حاره شعبيه البارت الأول
رواية مغامره في حاره شعبيه الحلقة الأولى
-لو سمحت هو انا شكلي حلو ؟
رفع وشه من علي اللاب وهو بيرفع حاجبه باستغراب وبيبص يمين وشمال
-حضرتك بتكلميني انا ؟
فركت ايدي بتوتر وانا ببلع ريقي وبصوت واطي:
-ايوه بسال حضرتك شكلي حلو ولا لا ؟؟
ابتسم ابتسامه لطيفه وهو بيهز رأسه :
-اه ماشاء الله زي القمر
اتنهدت بحزن وقعدت علي الكرسي قدامه وانا بسأله بدموع
-اومال هو خاني ليه ؟
-هو مين
-خطيبي
سكت لحظه وهو بيبصلي بحزن وبعدها ابتسم وهو بيقولي بلطف
-عشان معندهوش نظر !
-طب وقلبي ومشاعري للدرجادي ملهمش قيمه عنده
-متزعليش نفسك ياقمر هو فعلا ميستاهلش حد جميل زيك
ابتسمت بحزن وانا ببص قدامي :
-شكراً
-تحبي تشربي ايه
قومت من مكاني وانا بهز راسي بنفي :
-لا شكرا مش هقدر و واسفه اني عطلتك عن شغلك
-لا مفيش عطله ولا حاجه بالعكس انا مبسوط أن في قمر زيك قعد معايا علي نفس التربيزه
ابتسمت ابتسامه باهته واخدت شنطتي ومشيت من قدامه من غير ما انطق حرف زياده
-يا انسه يا انسه
لفيت باستغراب لقيته بيجري نحيتي لحد ما وصل لعندي
-نعم ؟
-هو انا ممكن اطلب منك طلب
-اكيد اتفضل
-بصي بصراحه انا مُصور وكنت محتاج موديل وفي الحقيقه بقالي فتره بدور علي بنت جميله ورقيقه زيك بس مش لاقي
-وحضرتك محتاج موديل لعرض ملابس نوعها ايه ؟
-فساتين وجيبات والخمار الفرنسي وانتي ماشاء الله وشك فيه القبول وكل اللبس هيليق عليكي
سكتت لحظه وانا ببصله بحيره وبفكر في كلامه
-عموماً انا اسمي صلاح اتفضلي ده رقمي فكري وقرري وكلميني عرفيني قرارك
مديت ايدي واخدته منه وانا بهز راسي بابتسامه مهزوزه
-عن اذنك
-اتفضلي
ـــــــــــــــــــــــــــــــــــــــــــــــــــــــــــــــــــــــــــــــــــــــــ
-طب وبعدين بتفكري في ايه
بصيت لاختي بحيره :
-مش عارفه بس بفكر اوافق
ردت بقلق :
-بس احنا منعرفش الشخص ده ياريما مش خايفه يكون شخص مش كويس؟
بلعت ريقي وانا بهز راسي بتوتر :
-لا لا يابنتي ده باين عليه شخص محترم اوي
-مش باللبس ولا بالمظاهر ياريما
-يابنتي هو انا هيجرالي ايه يعني وبعدين انا مش هروح لوحدي انا هاخد معايا حد
-هتاخدي مين ؟
-مش عارفه بس اكيد مش انتي
-ليه بقي أن شاء الله مشبهش ولا مشبهش
-ياغبيه مش قصدي انا اقصد يعني اني مش هاخد بنات هاخد معايا راجل
ردت بسخريه:
-هه راجل واحنا عندنا رجاله من بعد ابوكي الله يرحمه
بصيت قدامي بتفكير وحيره :
-طب اعمل ايه انا شايفه أنها فرصه وانا نفسي من زمان اوي اشتغل موديل
-تمام بس برضو لازم نأمن نفسنا
-امممممم طب والحل
-الحل انك متروحيش ياريما الله يخليكي انا مليش غيرك في الدنيا بعد موت بابا وماما الله يرحمهم مش هتحمل يجرالك حاجه
عيوني لمعت بالدموع وانا باخدها في حضني وبتنهد بحزن
-خلاص مش هروح
ثواني ورفعت وشها وهى بتقولي بلهفه
-انا جالي فكره حلوه اوي
-ايه ؟
-ما تاخدي معاكي “عمرو” ابن طنط فتحيه جارنا
-عمرو
-اه عمرو شخص محترم اوي وبيحبنا زي اخواته واعتقد انك لو طلبتي منه يجي معاكي مش هيرفض
-امممم فكره برضو
-طب يلا مستنيه ايه
-يلا ايه
-يلا انزلي بسرعه اتكلمي معاه
هزيت راسي وقومت جريت علي الدولاب ولبست اللي جه قدامي ولبست طرحه مش لايقه علي لبسي بشكل عشوائي بس حصل خير برضو قمر ها اي تاني
ـــــــــــــــــــــــــــــــــــــــــــــــــــــــــــــــــــــــــــــــــــــــــ
-مساء الخير ياطنط ازي حضرتك
فتحيه:
-مساء النور ياحبيبتي اتفضلي اتفضلي
ابتسمت وانا بدخل البيت وبفرك في أيدي بتوتر
-احم ا انا انا كنت عايزه اتكلم مع حضرتك في موضوع
-اتفضلي ياحبيبتي ولا اقولك لا استني الاول اعملك حاجه تشربيها
-لا لا مفيش داعي و…
قاطعتني بإصرار :
-هعملك لمون بالنعناع اللي بتحبيه
هزيت راسي بابتسامه رقيقه :
-شكراً ياطنط
-صفررررررر
اتنفضت من مكاني بفزع وانا شايفه كراسه بتتحدف من الاوضه اللي في وشي وصوت “عمرو ” وهو بيقول صفررر
-حسبي الله ونعم الوكيل انا كان ايه بس اللي دخلني مجال التدريس ليه اجيب لنفسي الضغط والسكر والجلطه ليه!!!!
صفررررررررر
فضلت اضحك بصوت عالي وانا سمعاه عمال يصيح ويشتم الطلاب ويرمي في الكراسات بتاعتهم برا الاوضه
فتحيه وهي بتخرج من المطبخ :
-اهو كل يوم علي الموال ده صياح للصبح
ضحكت وانا باخد منها اللمون وبهز راسي بيأس
-الله يكون في عونك ياطنط والله
قعدت جنبي وهي بتحط ايديها علي رجلي وبتطبطب عليها
-اخبارك ياحبيبتي عامله ايه انتي واختك
-بخير الحمد لله وحضرتك
ردت بيأس:
-زهججججت
-ليه بس كده ياطنط ا….
-صفررررررر
شاورت علي الاوضه وهي بتلوي بوقها :
-عايشه مع رمضان مبروك
-هههههههه معلش ياطنط بكره يتجوز ويعقل
-يااااارب المهم ياحبيبتي خير كنتي عايزاني في ايه
فركت ايدي بتوتر :
-احم ب بصي ياطنط بصراحه انا كنت محتاجه عمرو
ردت باستغراب :
-محتاجه عمرو في أيه؟
-بصي انا جالي فرصه شغل “موديل” هعرض ملابس فساتين وجيبات وخمار فرنساوي وكده وبصراحه يعني الشخص اللي عرض عليا الشغل انا معرفش عنه اي حاجه بس انا زي ما حضرتك عارفه يعني أني محتاجه الشغل ده عشان اقدر اصرف علي نفسي وعلي اختي ف فكنت محتاجه يعني لو حضرتك تقولي لعمرو يجي معايا وانا رايحه اقابل صاحب الشغل لأن زي ما حضرتك عارفه أن مليش حد لا اعرف حاجه عن خالي ولا عن اعمامي ولا عن اي حد
وبصراحه ملقتش قدامي غير عمرو عشان يجي معايا
-مين بيجيب سيرتي؟
قالها وهو بيخرج من الأوضه وملامحه باين عليها الضيق
قومت وقفت وانا بفرك ايدي بتوتر :
-احم أزيك ياعمرو
ابتسم ابتسامه واسعه :
-اهلا اهلا وانا بقول البيت منور ليه
-ربنا يخليك تسلم
فتحيه بخبث :
-طيب بما أن عمرو قدامك اهو قوليله بقي اللي انتي عايزاه منه
رد باستغراب :
-مين اللي عايز مني ايه ؟
-احم ا انا انا ياعمرو كنت محتاجه منك خدمه
-اتفضلي
حكيتله الموضوع لكن بتوتر وانا كل ثانيه بوقف كلام وبحاول اجمع جمله علي بعض لحد ما قدرت الحمد لله وقدر ولطف
حك فروه رأسه وهو بيبصلي وبيفكر بحيره :
-امممممم تمام مفيش مشكله
-بجد يعني موافق
ابتسم بلطف :
-اكيد موافق مش انتي زي اختي ؟
رديت بفرحه :
-بجد بجد شكرا انا مش عارفه اقولك ايه
-لا ولا حاجه شوفي هتروحي امتي وانا هفضيلك نفسي
هزيت راسي بلهفه :
-حاضر هشوف واقولك علي طول يلا باي
ـــــــــــــــــــــــــــــــــــــــــــــــــــــــــــــــــــــــــــــــــــــــــ
-انتي متأكده يابنتي أن هو ده المكان ؟
بصيت حوليا بتوتر وخوف وانا ببلع ريقي بصعوبه …
-ايوه هو والله
-يابنتي دي حاره كلها صيع اكيد انتي غلطانه في العنوان
-في حاجه ازميلي
اتنفضت من مكاني بفزع وانا بمسك في دراع عمرو وببص للشخص اللي ظهر قدامنا واللي كان شكله يوحي بالاجرام
عمرو بتوتر :
-احم لا يازميلي مفيش حاجه
لف حوالينا وهو بيبصلنا من فوق لتحت وبيعمل حركات بوشه مُرعبه
-بتدور علي حد يباشا ؟
عمرو بصوت حاول يكون حاد :
-متشكر
حط أيده علي رقبته وهو بيضرب عليها وبيعوج بوقه:
-رقبتي سداده معاك يابا اي صنف تلاقيه عند هشام مكرونه
-مكرونه!!
-اااه اصل هما هنا سموني كده عشان بحب المكرونه
رديت بفضول :
-وياتري يا استاذ هشام بتحبها بالصلصه اكتر ولا وايت صوص ؟
رد بصعوبه وهو بيتطوح :
-ايه الوايب صو ده ؟
رديت بلهفه :
-يعني الصوص الابيض وجبن بقي وجمبري وحركات
-لا معرفش الوايب ده انا امي بتعملها بطماطم بايظه
رديت بتأثير:
-اووووه بجد صعبت عليا
عمرو وهو بيبصلي بسخريه:
-ياحنينه!
وفجأة سمعنا صوت خناقه كبيره جدا بنبص لقينا ناس كتير ماسكه مطاوي وسكاكين وليله كبيره اوي
برقت بصدمه وانا شايفه صلاح واقف في النص وهو بيترعش بخوف
واحد منهم وهو بيمسكه من التيشيرت بتاعه :
-فين فلوسي ياض بقولك
صلاح بخوف :
-هه ا انا انا قولتلك يامعلم ان الفلوس اتسرقت مني
ضربه بوكس في وشه وهو بيشتمه بألفاظ مش كويسه مقدرش اقولها عشان أنا واحده محترمه طبعا
-انطق ياض بقولك وديت الفلوس فين
مسكت في دراع عمرو بخوف :
-انا خايفه اوي
عمرو وهو بيحط أيده علي ايدي بيطمني :
-متخافيش انا معاكي
-الفلوس معاهم يامعلم انا افتكرت هما اللي سرقوني
وفجأة الأنظار كلها اتوجهت نحيتي انا وعمرو ..
عمرو وهو بيبلع ريقه بخوف :
-او خافي يعني حقك تخافي
مسكت أيده وانا بقوله بصوت عالي :
-اجرررررررري يامجددددي
طلع يجري معايا وقال وهو بيترج :
-ياسواد السواد يابا رشدي ياحزن الحززززززن
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية مغامره في حاره شعبيه)
