رواية معجزة من السماء الفصل الثالث 3 بقلم عمرو على
رواية معجزة من السماء الجزء الثالث
رواية معجزة من السماء البارت الثالث
رواية معجزة من السماء الحلقة الثالثة
” يا سلام لو تديني رقمك عشان اطمن عليكي بس لما تروحي
” في نفس اللحظة لقيتها لفت وشها تاني ليا ، قولت بصوت واطي ” لو مش عايزة خلاص مش مهم يعني ”
********011
= ايه دا بجد ، هو دا رقمك
اه رقمي ، ياريت تسجله عندك
= في قلبي ، هشيله جنب قلبي حاضر
بتقول حاجة يا استاذ رامي
= بقول خلاص اتفضلي حضرتك وهنبقا نكلمك
مع السلامة
” مع السلامة يا قلبي ، كاريزما اوي انا ، و دي الواحد يعاملها ازاي ، دا من كلمتين مبقتش قادر اسيطر على نفسي ، لا انا لازم اكلم وليد ، اتصلت بيه
الو
= ايه الدوشة دي يابني ، انت فين
بتقول فين!!!
” قفلت المكالمة ، لا لا انا كنت غلط من الاول لما قولت اكلمه ، دا خرج مع الحرامي و دخلو سينما ، يكش يتقبض عليهم هما الاتنين و ارتاح ، خلصت شغلي و روحت ، طول الطريق بفكر في اللي جاي ، خايف وقلقان من بكرا ، رغم ان مفيش حاجة تخليني اخاف ، انا معايا قوة خارقة تخليني مخافش من اي حاجة ، بس هو احساس الخوف اللي فضل ملازمني طول حياتي وشكله هيفضل مكمل معايا لاخر العمر
ما تسيبي الواد يا فاطمة يتفرج على التليفزيون
= وانت عايزني اسيبه عشان نظره يضعف وبعدها ندوخ على المستشفيات والدكاترة وفي الاخر يتعمي
متلعبش مع الولد دا تاني يا رامي
” اتنططت على الارض
= ليه بس يا ماما ، دا فارس صاحبي
الولد دا شقي جدا ولو لعبت معاه اكيد هدومك هتتوسخ وانا معنديش استعداد اجبلك هدوم جديدة ، الهدوم دي بتاعت العيد مينفعش تتوسخ
” قطع تفكيري صوت سواق الاتوبيس وهو بيخبط على كتفي
في ايه
= بقالي ساعة بنادي على حضرتك ومش سامعني
معلش كنت سرحان شوية
= طب احنا وصلنا للاخر
” نزلت و اتمشيت ، طول ما انا ماشي ذكرياتي كانت بتطاردني ، من هنا احساس الخوف اتولد جوايا ، اني لازم اعمل حساب لكل حاجة و افكر في اللي هيحصل بعدين ، ليه مفرحش زي الناس كلها ، ليه لازم اكون انا الشخص المختلف
يا ماما انا مش عايز اكون مختلف
= لما هتكون مختلف ، الناس هتحبك وتحترمك اكتر
” للأسف انا مبقاش ليا ناس عشان اخسرهم أو حتى احبهم ، وصلت البيت ، دخلت و اترميت على السرير ، سمعت الباب بيخبط ، قومت وفتحت
اخيرا جيت
= تقدر تقولي يا وليد كنت فين
كنت مع حسن
= حسن مين؟
الحرامي
= انت بقيت تصاحب حرامية
دا طلع جدع أوي يا رامي والله ، خدني عزمني على السينما وجبلي فشار وكمان جبلي بنات
” بصيت للسقف بعدم صبر
اطلع برا يا وليد
= طب قولي اتأخرت ليه
خلينا في المهم ، انا النهاردة قابلت واحدة ، قمر ايه ، رقة ايه ، حلاوة ايه وشياكة ايه ، دي ملهاش وصف
= للدرجادي
وأكتر كمان
= شوفتها فين دي
كانت جاية تسأل على شغل عندي
= ووافقت
اه طبعا
= طب وايه المطلوب يا رامي
عايز ادخل اكلمها
= وكمان معاك رقمها
اه يابني طبعا ، اصل انا لما لقيتها ماشية اتمنيت اني….
= ايه سكت ليه ، اتمنيت ايه؟
ولا حاجة ، المهم اعمل ايه
= ادخل اديها واحدة ، روحتي؟
مش قديمة شوية
= بالعكس دي جديدة جدا
” فتحت وبعتلها
روحتي؟
= نعم!
ايه دا هو باظ ولا ايه
= هو ايه
التريند ، اصل انا قولت اركب التريند
= لا معتقدش هتلحق ، بس ممكن تركب اللي بعده
= اللي هو ايه
البلوك!
” لا لا اكيد مش هعمل كدا ، الحمدلله أن المشهد كان في دماغي مش في الحقيقه ، لقيت نفسي لسة قاعد وفاتح الشات وبفكر ابعت ايه ، وفي الاخر بعت
روحتي؟
= مين حضرتك
انا رامي
= رامي مين؟
” دي مش فكراني اصلا ، اعمل ايه دلوقتي ، استنيت شوية ومردتش لكن لقيتها بعتت علامة استفهام
انا رامي مدير فرع ****
= ااااه انا اسفة يا استاذ رامي ، بس انا مش فاكرة اني اديتك رقمي
لا افتكري كويس ، خدته منك الصبح وأنتي بنفسك قولتيلي سجله
= اه افتكرت ، هو كان في حاجة يا استاذ رامي
لا أبدا ، كنت بطمن عليكي اصلك ماشية في وقت متأخر
= متأخر ازاي ، انا مشيت الساعة 1 الضهر
اه يمكن انا اللي بصحا بدري
= تمام
” هو فتح المواضيع بيكون عامل ازاي في المرحلة دي ، طب اقولها ايه ، ابعتلها جمعة مباركة ، لا احنا لسة التلات ، ثواني ، انا اخليها هي اللي تكلمني
” يا سلام لو تدخل تكلمني دلوقتي
” ايه دا ، فين الرسالة ، مفيش اي حاجة اتبعتت ، هو الكنز باظ ولا ايه
” يا سلام لو تكلمني دلوقتي عشان اشرحلها طبيعة الشغل ”
” برضو مفيش حاجة ، واضح كدا اني لازم استعمل القوة دي بس عن قرب ، لكن مينفعش اكون بعيد ، نمت وصحيت تاني يوم ، جهزت نفسي كأن فرحي النهاردة لكن في الحقيقة انا هشوفها تاني النهاردة ، روحت الشغل لقيتها قاعدة مستنياني
انا اسف لو اتأخرت عليكي
= لا ابدا مفيش حاجة ، انا جيبت لحضرتك الورق عشان اقدر استلم الشغل
معلش يا استاذة نادين أنتي مرفوضة
= مرفوضة ازاي ، حضرتك كنت موافق امبارح
اه بس في حد جه واتعين خلاص
” انا مش عارف بقول الكلام دا ازاي ، حاولت امنع لساني ، لساني هو اللي متحكم وبيتكلم
اتفضلي يا استاذة نادين عشان عندي شغل كتير
” لا متمشيش ، انا مش قادر اتكلم ، او بمعنى اصح ، انا مش قادر اسيطر على الكلام اللي بيخرج مني ، حاولت استعمل القوة اللي معايا وبرضو مش عارف
متحاولش يا رامي
” في اللحظة دي عرفت اتكلم
محاولش ايه
= انا اللي عملت فيك كدا ، انا اللي خليتك تقول الكلام اللي انا عايزاه مش اللي أنتي عايزه
ازاي دا
= يعني انا عارفة انك عندك قوة خارقة ، بس انا قوتي اكبر بكتير ، يعني انا اقدر اتحكم فيك زي ما انا عملت دلوقتي ، واقدر احرك اي حاجة عن بعد
بجد ” قولتها ب استهزاء
= طب شوف كدا
” وفي لحظة كانت الكوباية اللي قدامي طارت في الهوا ووقعت على الأرض اتكسرت
أنتي عايزة ايه
= نكون تيم واحد ، احنا هنقدر نعمل حاجات كتير أوي ، هنكسب ملايين لو اتحدنا
هو في حد معانا في التيم دا غيري
= اه ، واحد تاني معانا
و دا بيعمل ايه
= هتعرف بنفسك لما توافق
” بصيت في الارض ، فكرت لثواني قبل ما اسمعها بتقول
هااا يا رامي ، معانا؟
= معاكي!!
يتبع…
لقراءة الفصل التالي : اضغط هنا
الرواية كاملة اضغط على : (رواية معجزة من السماء)
